1, 2. 1) ¿Bin-utʼil ya awaʼiy aba kʼalal ay machʼa ya skoltayat? 2) Te Jehová la yakʼ te sNichʼan ta jtojoltik, ¿bin yuʼun jaʼ te majtanil te mukʼxan skʼoplale?

NOPA awaʼiy te ay jtul awamigo te la skoltayat te kʼalal ayat ta tulan wokol, yaniwan xtuun awuʼun takʼin-a. Te awamigo ma lajuknax yilat, la yakʼbat te takʼin ya xtuun awuʼune. ¿Bin yaʼiyel la awaʼiy aba yuʼun? ¿Mabal jichuk te mero tseʼel awoʼtan yuʼun sok te la awalbey bayal wokol te awamigoe?

² Te Jehová ay bin yakʼojbotik te kʼax mukʼ skʼoplal te maʼyuk machʼa yan ya xjuʼ jich ya yakʼbotike. Te bin la yakʼbotik ta majtanile, jaʼ te la yakʼ ta lajel ta jtojoltik te sNichʼan yuʼun ya jta jkoleltik. Ta swenta te mukʼul majtanil ini ya xjuʼ ya xkuxinotik ta sbajtelkʼinal (kʼopona Mateo 20:28). Kʼalal te Jehová la stikun te sNichʼan ta Balumilal la yakʼ ta ilel te kʼuxotik ta yoʼtan ta smelelil. Ta kapitulo ini bayalme bin ya jnoptik ta swenta te majtanil la yakʼ te Diose.

3. ¿Bin yuʼun ya xlajotik?

³ Te Dios la yakʼ ta lajel te Jesús ta stojol te ants winiketik yuʼun jich ya yakʼ ta libre ta stojol te mulil sok te lajele (Efesios 1:7). Swenta ya xkʼot ta koʼtantik bin yuʼun ya skʼan ya kichʼtik akʼel ta libre, ya skʼan ya jnaʼtik te bin kʼot ta pasel ta namey kʼinal ta tsʼunbil kʼinal Edén. Te sbabial jmeʼ jtatik te Adán sok te Eva la spasik tulan mulil, jaʼ yuʼun lajik bael. Jich bitʼil la kichʼbeytik jilel te smulike, ya xlajotik-euk (ilawil te nota 9, mulil).

4. 1) ¿Machʼa-a te Adán? 2) ¿Bin yilel skuxlejal te kʼalal tojil winik-a?

⁴ Te Adán jaʼ te sbabial winik pasot yuʼun te Jehová. Kʼalal  pasot ay bin kʼax tʼujbil akʼbot, jaʼ te toj te skuxlejale. Jkʼaxel maʼyuk mulil ta stojol. Jich yuʼun maʼyuk bin-ora ya xtsakot ta chamel, ya xmamalub sok ya xlaj. Te Adán jaʼ snichʼan Dios, melel jaʼ pasot yuʼun (Lucas 3:38). Te Dios spisil-ora ya xkʼopoj sok te Adán sok ya yalbey ta jamal bin ya skʼan te ya spase. Jaʼnix jich la yakʼbey tʼujbil yaʼtel (Génesis 1:28-30; 2:16, 17).

5. ¿Bin ya skʼan ya yal te la yichʼ pasel ta slokʼomba Dios te Adane?

⁵ Te Adán la yichʼ pasel ta slokʼomba te Diose (Génesis 1:27). Jaʼ ini ya skʼan ya yal te kʼalal pasot yuʼun Jehová akʼbot ta yoʼtan taleliletik te ay yuʼun jich bitʼil te skʼuxul yoʼtan, spʼijil yoʼtan sok stojil yoʼtan. Te Dios la yakʼ te jaʼnix ta stukel te Adán ya xjuʼ ya sta ta nopel bin ya spas ta skuxlejal. Chikan ta ilel te ma jichuk la yichʼ pasel bitʼil te chambalametik te maʼyuk spʼijilik ta stael ta nopel te bin ya spasike. Yan stukel te Adán ya xjuʼ ya sta ta nopel bin-utʼil ya skʼan ya xkuxin. Ya xjuʼ ya stsa teme jaʼ ya spas te bin lek o te bin ma lekuke. Te lajuk schʼuun te bin la yal te Jehová, sbajtelkʼinal kuxin ta Nichimal Kʼinal te jichuke.

6. ¿Bin kʼot ta pasel ta stojol te Adán kʼalal la skʼaxuntaybey smantal te Diose?

⁶ Ta skaj te la skʼaxuntaybey smantal Dios te Adane, kʼax ma lek te bin la sta yuʼune. Maba lek ilotix yuʼun te Jehová sok albot yuʼun te ya xlaje. Och mulil ta stojol sok la yichʼ tenel lokʼel ta Nichimal Kʼinal (Génesis 3:17-19). Jich yuʼun maʼyuk bin lek ya smaliyikix te Adán sok te Eva, melel jaʼiknix la staik ta nopel te ya skʼaxuntaybeyik smantal te Diose.

7, 8. ¿Bin-utʼil la yutsʼinotik te la skʼaxuntay mantal te Adane?

⁷ Ta skaj te la skʼaxuntay smantal Dios te Adán «och mulil ta bahlumilal» sok «och lajel ta scuenta mulil, hich cʼoht lajel ta stojol spisil ants-winiquetic ta scaj te spisilic stahoj smulic» (Romanos 5:12). Kʼalal la sta smul te Adán la yichʼ mosoinel yuʼun te mulil sok te lajel, jichnix kʼot ta jtojoltik te talemotik ta stsʼumbale (Romanos 7:14). Pero ¿aybal bin  ya jmaliytik te joʼotike? Ay, melel te Jehová ay bin la spas yuʼun ya yakʼotik ta libre yuʼun te mulil sok te lajele.

⁸ Maʼyuk ni jtuluk ants winik te ya xjuʼ ya skoltayotik lokʼel ta mulil sok ta lajel te la yotses jilel te Adán. Pero te Jehová la yakʼ ta jtojoltik te Jesús yuʼun ya skoltayotik lokʼel ta mulil sok ta lajel. Kiltik bin-utʼil la spas sok bintik lekilal ya jtatik yuʼun.

9. ¿Bin-utʼil ya xjuʼ ta manel lokʼel ta mulil sok ta lajel te ants winiketike?

⁹ Te machʼa ya sman lokʼel ta mulil sok ta lajel te ants winiketike, ya skʼan te mero pajal skuxlejal sok te Adán te kʼalal tojil winik-ae. Pero jich bitʼil la jnoptikix maʼyuk ni jtuluk ta koliltik te ya xjuʼ ya stoj, melel jpisiltik jmulawilotik (Salmo 49:7, 8). Yan stukel te Jesús juʼ yuʼun spasel, te Biblia jich ya yal: «La yacʼ sba ta lajel yuʼun smambeyel scolel spisilic» (1 Timoteo 2:6). Te skuxlejal te la yakʼ te Jesús pajal kʼot sok te skuxlejal te Adán te kʼalal mato spasoj mulil-ae.

10. ¿Bin la spas te Jehová yuʼun ya sman jkoleltik?

¹⁰ ¿Bin la spas te Jehová yuʼun ya sman jkoleltik? La stikun tal ta Balumilal te Jesús te jaʼ te sNichʼan te kʼux-xan ta yoʼtan (1 Juan 4:9, 10). Te Jesús la slokʼes sba ta yoʼtan ta yijkitayel te sTat sok te skuxlejal ta chʼulchan te bayal yutsile (Filipenses 2:7). ¿Bin la spas te Jehová yuʼun ya x-ayin ta Balumilal te Jesuse? La skʼasesbey te skuxlejal ta schʼujt te María. Jaʼ yuʼun tojil winik tal ta kʼinal te Jesuse, jkʼaxel maʼyuk mulil ta stojol (Lucas 1:35).

11. ¿Bin-utʼil ya jnaʼtik te jtul winik ya xjuʼ ya smanbey skolel spisil te ants winiketike?

¹¹ Jich bitʼil la jnoptikix, te sbabial winik la skʼaxuntaybey smantal te Jehová, jaʼ yuʼun jpisiltik ochotik ta mulil. Jnop kaʼiytik ini: ¿yabal xjuʼ te jtulnax winik ya smanbey skolel spisil te ants winiketike? Yak. ¿Bin-utʼil ya jnaʼtik te  yake? Te sujtib ya jtatik ta Romanos 5:19 (kʼopona). Te Jesús juʼ yuʼun yakʼel te skuxlejal ta skoltayel lokʼel ta lajel te yal snichʼnab te Adane, melel maʼyuk bin-ora la sle smul stukel (1 Corintios 15:21, 22, 45).

12. ¿Bin yuʼun te puersa kʼax tulan swokol te Jesuse?

¹² Te Biblia ya yakʼ jnaʼtik spisil te wokolil kʼax ta stojol te Jesús te kʼalal nopol ya xlajix-ae. La smilik ta majel, la sjijpanik ta teʼ sok mero la yaʼiybey skʼuxul te lajele (Juan 19:1, 16-18, 30; ilawil te nota 15, crus). ¿Bin yuʼun te puersa kʼax tulan swokol te Jesuse? Jaʼ ta skaj te bin yaloj te Satanás, te maʼyuk ni jtuluk winik te jun yoʼtan ya yakʼ sba ta stojol Dios teme ya yichʼ akʼbeyel tulan pruebaetik. Pero te Jesús la yakʼ ta ilel te jtul tojil winik ya xjuʼ te jun yoʼtan ya yakʼ sba ta stojol te Jehová manchukme ya yichʼ pasel ta prueba ta ban kʼalal. Ya jnaʼtik te mero tseʼel yoʼtan te Jehová yuʼun te bin la spas te sNichʼane (Proverbios 27:11).

13. ¿Bintik kʼot ta pasel swenta ya yichʼ tojel te jmultike?

¹³ ¿Bintik kʼot ta pasel yuʼun la yichʼ tojel te jmultike? Te Jehová la yakʼ ta lajel te sNichʼan ta skʼab te skontratak ta 14 yuʼun nisán ta jaʼbil 33 ta kalendario judío (Hebreos 10:10, TNM). Oxeb kʼajkʼal ta patil, te Jehová la schaʼkuxajtes te Jesús jich bitʼil espiritu, maba ta chʼichʼbakʼetix. Ta patil, chaʼmo bael ta chʼulchan te Jesús yuʼun ya stejkʼan sba ta stojol te sTate (Hebreos 9:24). Te Jehová la stsak te bin la spas te Jesuse, jaʼ te la yakʼ skuxlejal ta stojol te ants winiketike. Jich la yichʼ tojel te jmultike sok jam te be yuʼun ya kichʼtik akʼel ta libre yuʼun te mulil sok te lajele (kʼopona Romanos 3:23, 24).

14, 15. ¿Bin ya skʼan ya jpastik yuʼun ya spasbotik perdon te Jehová?

¹⁴ Bayal bin lek ya jtatik ta swenta te la yakʼ skuxlejal ta jtojoltik te Jesuse. Kiltik bin ya jtatik ta swenta te mukʼul  majtanil la yakʼbotik te Dios sok bin ya yakʼ jmaliytik ta pajel chaʼbej.

¹⁵ Ya xjuʼ ya jtatik perdon yuʼun te jmultike. Ay wokol ya kaʼiytik spasel spisil-ora te bin leke. Jpisiltik ya jta jmultik, ay ya xchʼayotik ta jkʼoptik sok ay ya jpastik te bin ma lekuke. ¿Bin ya skʼan ya jpastik yuʼun ya spasbotik perdon te Jehová yuʼun te jmultike? Jaʼ te ya jsujtes koʼtantik ta smelelil sok te ya jkʼanbeytik te Jehová sok spekʼelil koʼtantik te yakuk spasbotik perdone. Teme jich ya jpastike, ya xjuʼ ya schʼuun koʼtantik te ya kichʼtik pasbeyel perdone (Colosenses 1:13, 14; 1 Juan 1:8, 9).

16. ¿Bin ya skʼan ya jpastik yuʼun lek ya kaʼiy jbatik ta stojol te Diose?

¹⁶ Ya xjuʼ te maʼyuk jmultik ya kaʼiy jbatik ta stojol te Diose. Teme ya yal koʼtantik te ay bin ma lekuk jpasojtike, jkʼaxel ma lekuk ya kaʼiy jbatik yuʼun. Jichniwan ya kaʼiy jbatik te jkʼaxel maʼyuk jkʼoplaltik sok jkʼaxelniwan ya xlaj smukʼul koʼtantik. Pero mame xkakʼ jbatik ta tsalel. Yame yaʼiy jkʼoptik te Jehová sok yame spasbotik perdon teme sok spisil koʼtantik ya jkʼanbeytik perdone (Hebreos 9:13, 14). Te Jehová ya skʼan te ya kakʼbeytik snaʼ chikan bin yak ta kʼaxel ta jkuxlejaltik sok te ya jkʼanbeytik koltayel te banti ya xchʼayotike (Hebreos 4:14-16). Teme jich ya jpastike, maʼyuk jmultik ya kaʼiy jbatik ta stojol te Diose.

17. ¿Bin bendisionetik ya xjuʼ ya jmulanbeytik yutsil jich bitʼil la yakʼ sba ta lajel te Jesuse?

¹⁷ Ya xjuʼ ya xkuxinotik ta sbajtelkʼinal. Te Biblia jich ya yal: «Te stojol te mulil, ha te lajele, yan te mahtanil yuʼun Dios, ha te cuxlejal sbahtel qʼuinal ta scuenta te Cajwaltic Cristo Jesús» (Romanos 6:23). Ta swenta te la yakʼ sba ta lajel ta jtojoltik te Jesuse, ya xjuʼ ya jtatik te lekil kuxlejalil ta sbajtelkʼinale (Apocalipsis 21:3, 4). ¿Bin ya skʼan ya jpastik yuʼun ya xjuʼ ya jmulanbeytik yutsil te bendisionetik ini?

18. ¿Bin yuʼun te mero schʼuunej koʼtantik te kʼuxotik ta yoʼtan te Jehová sok te Jesuse?

¹⁸ Kʼalal ay machʼa ay bin tʼujbil ya skʼebanbotik, ¿mabal jichuk te tseʼelnax koʼtantik yuʼune? Te mukʼul majtanil akʼbilotike, jaʼ te la yichʼ tojel te jkoleltike. Jich yuʼun yame skʼan ya kalbeytik bayal wokol te Jehová. Te Juan 3:16 ya yal te «cʼux ta yoʼtan Dios te bahlumilal te la sticon tal te hip jtuhl Snichʼan». Jaʼnix jich ya jnaʼtik te kʼuxotik ta yoʼtan te Jesuse, melel lokʼ ta yoʼtan yakʼel skuxlejal ta jtojoltik (Juan 15:13). Jich bitʼil la stoj jkoleltik te Jehová sok te Jesuse, jamal chikan ta ilel te jpisiltik ta jujuntul kʼuxotik ta yoʼtanik ta smelelil (Gálatas 2:20).

19. ¿Bin ya xjuʼ ya apas swenta ya awamigoin te Jehová?

¹⁹ Jich bitʼil la anaʼix te kʼax kʼuxotik ta yoʼtan te Jehová, ¿bin ya xjuʼ ya apas yuʼun ya awamigoin? Jaʼ te ya anaʼbey sba ta lek. Ma xjuʼ kʼux ta koʼtantik te machʼa ma jnaʼbeytik sbae. Pero ya xjuʼ kuʼuntik snaʼbeyel sba te Jehová jich bitʼil ya yal te Juan 17:3. Teme ya anaʼbey sba ta leke, kʼuxme ya awaʼiyxan ta awoʼtan, ya apas te bin ya smulane sok ya awamigoinxan ta lek te Jehová. Jich yuʼun mame xa akom aba ta snopel te Biblia, jichme ya anaʼbey sba ta lek te Jehová (1 Juan 5:3).

20. ¿Bin-utʼil ya xjuʼ ya awakʼ ta ilel te ay skʼoplal ta awoʼtan te la yakʼ sba ta lajel ta jtojoltik te Jesuse?

²⁰ Akʼa ta ilel te ay skʼoplal ta awoʼtan te la yakʼ sba ta lajel ta jtojoltik te Jesuse. Te Biblia jich ya yal: «Te machʼa ya schʼuhun [o ya yakʼ schʼuunel yoʼtan ta stojol] te Nichʼanil ay scuxlejal sbahtel qʼuinal» (Juan 3:36). ¿Bin ya skʼan ya yal te ya kakʼtik schʼuunel koʼtantik ta stojol te Nichʼanile? Jaʼ te ya jpastik te bin la yakʼ ta nopel te Jesuse (Juan 13:15). Ma tikʼuk-a te ya kaltik te ya jchʼuuntik te Jesús, ya skʼan te ay bin ya jpastike. Te Santiago 2:26 jich ya yal: «Chamen te  schʼuhunel-oʼtanil teme mayuc yaʼtelule». Jich yuʼun te bin ya jpas ta jkuxlejaltike yame skʼan ya yakʼ ta ilel te ay skʼoplal ta koʼtantik te la yakʼ sba ta lajel ta jtojoltik te Jesuse.

21, 22. 1) ¿Bin yuʼun ya skʼan te ya xbootik ta jujun jaʼbil ta tsoblej yuʼun te Snaʼojibal slajel te Cristo? 2) ¿Bin ya kilbeytik skʼoplal ta kapitulo 6 sok 7?

²¹ Baan ta tsoblej yuʼun Snaʼojibal slajel te Cristo. Te kʼalal junxanix ajkʼabal ya skʼan xlaj-a te Jesuse, la yal te ya skʼan te ya jnaʼulantik te slajele. Jich ya jpastik kʼalal ya xbootik ta jujun jaʼbil ta Snaʼojibal slajel te Jesús o Weʼel Uchʼel yuʼun Kajwaltik (1 Corintios 11:20; Mateo 26:26-28). Te Jesús ya skʼan te ya jnaʼulantik te la yakʼ sba ta lajel ta jtojoltike, melel jich la yal: «Pasahic ta scuenta jnaʼojibal» (kʼopona Lucas 22:19). Te kʼalal ya xbootik ta tsoblej yuʼun Snaʼojibal slajel te Jesuse, jich ya kakʼtik ta ilel te ay skʼoplal ta koʼtantik te bin la spasik ta jtojoltik te Jehová sok te Jesuse sok te kʼuxotik ta yoʼtanike (ilawil te nota 16, te snaʼojibal slajel te Cristo).

²² Maʼyuk yan majtanil te ya spaj te bin la yakʼbotik te Jehová, jaʼ te la yakʼ ta jtojoltik te sNichʼane (2 Corintios 9:14, 15). Ta swenta te mukʼul majtanil ini, jaʼnix jich yame xjuʼ ya sta slekilalik-euk te machʼatik lajemike. Jaʼme ya kilbeytik skʼoplal ta kapitulo 6 sok 7.