1, 2. а) Кыӵе кузьымез тӥ самой умой кузьым шуысалды? б) Малы дун тырон — со Инмарлэн дуно кузьымез?

КЫӴЕ кузьымез тӥ самой умой кузьым шуысалды? Созэ, дыр, кудӥз тӥледыз шумпоттӥз но пайда вайиз.

² Инмар милемлы трос кузьымъёс кузьмаз. Нош вань кузьымъёс пӧлысь тужгес но пусйыны луоз одӥгзэ, малы ке шуоно со вань адямиослы пайда вайиз. Та люкетын верамын луоз, кызьы Иегова аслэсьтыз Пизэ, Иисус Христосэз, музъем вылэ ыстӥз но кызьы Иисус, адямиосты мозмытон понна, аслэсьтыз улонзэ дун тыриз, соос пырак дауръёс ӵоже улыны мед быгатозы шуыса. (Лыдӟе Матфейлэсь 20:28.) Иисусэз музъем вылэ ыстыса, Иегова милемыз яратэмзэ возьматӥз.

3. Малы адямиос куло?

³ Дун тырыса Иегова адямиосты сьӧлыклэсь но кулонлэсь мозмытӥз (Ефесъёслы 1:7). Малы ми понна дун тыроно вал шуыса валан понна, ойдолэ учкомы, мар луиз Едем садын трос дауръёс талэсь азьло. Милям вашкала атаймы но анаймы, Адам но Ева, сьӧлыказы. Соин ик соос кулӥзы. Табере вань адямиос куло, малы ке шуоно соослы Адамлэн но  Евалэн сьӧлыксы выжиз. (Учке 9-тӥ ватсам валэктонэз.)

4. Мар верамын Библиын Адам сярысь?

⁴ Нырысетӥ адями, Адам, чик изъянтэк, яке тырбыдэс, кылдытэмын вал. Солэн мугорыз но, йырвизьмыз но тырбыдэс вал. Со ноку но ӧй висьысал, ӧй пересьмысал но ӧй кулысал. Иегова Адамлы атай вал, малы ке шуоно со сое кылдытӥз (Лука 3:23, 38). Соос ӵем ог-огенызы вераськылӥзы. Адам умой тодэ вал, мае возьма солэсь Инмар. Иегова Адамлы тунсыко уж сётӥз (Улон-вылон 1:28—30; 2:16, 17).

5. Кызьы валано, Адам Инмарлы укшатыса кылдытэмын вал шуыса?

⁵ Инмар Адамез «Аслыз укшатыса кылдытӥз» (Улон-вылон 1:27). Иегова сое аслаз кадь сямъёсын кылдытӥз. Кылсярысь, со Адамлы таӵе сямъёс сётӥз: яратон, визьлык, шонерлык но кужым. Инмар Адамлы бырйыны эрик сётӥз. Адам робот кадь кылдытэмын ӧй вал. Со ачиз бырйыны быгатэ вал, мар карыны: шонер ужъёс яке шонертэм ужъёс лэсьтыны. Адам Инмарлэсь кылзӥськысал ке, со райын пырак дауръёс ӵоже улыны быгатысал.

6. Мае ыштӥз Адам, куке Инмарлэсь ӧз кылзӥськы? Кызьы со милям улонамы шӧдӥськиз?

⁶ Но Адам ӧз кылзӥськы, соин Иегова сое кулыны судъяз. Кылзӥськымтэез понна Адам бадӟым дун тыриз. Солэн Иеговаен матысь кусыпъёсыз сӧриськизы, со тырбыдэс луэмысь дугдӥз но райын улыны луонлыксэ ыштӥз (Улон-вылон 3:17—19). Адам но Ева Инмарлэсь кылзӥськытэк улонэз бырйизы, соин ик соос пумтэм вапумъёсы улыны ӧз быгатэ ни. Адамлэн кылзӥськымтэез  понна «дунне вылэ сьӧлык пыриз, нош сьӧлык пыр кулон лыктӥз, соин сэрен кулон вань адямиос доры вуиз, малы ке шуоно вань адямиос сьӧлыказы» (Римъёслы 5:12). Сьӧлыкаменыз Адам ассэ но, асьмемыз но сьӧлыклэн но кулонлэн киулаз ляльчие вузаз (Римъёслы 7:14). Но Инмар тодэ, кызьы ваньзэ сое тупатоно.

7, 8. Мар со сыӵе дун тырон?

⁷ Мар со сыӵе дун тырон? Сое валаны юрттозы кык малпанъёс. Нырысетӥез — дун тыро, куке кинэ ке мозмытыны яке мае ке берен басьтыны кулэ. Кыкетӥез — дун тырыку собыдӟа дун тыроно, мар быдӟа изъян ваемын вал.

⁸ Адямиос пӧлысь нокин но ӧй быгатысал дун тырыса берен басьтыны сое, мае ыштӥз Адам, куке сьӧлыказ. Нош Иегова шедьтӥз амал, кызьы ми понна дун тырыны но милемыз сьӧлыклэсь но кулонлэсь мозмытыны. Ойдолэ тодомы, кызьы дун тыремын вал но кыӵе пайда со милемлы вайыны быгатэ.

9. Мар кулэ вал, дун тырон понна?

⁹ Асьмеос нокудмы но ум быгатӥське дун тырыса басьтыны, яке берен берыктыны, тырбыдэс улонэз, кудзэ ыштӥз Адам. Малы? Малы ке шуоно ваньмы асьмеос тырбыдэстэмесь (Псалтирь 48:8). Тырбыдэс улонэз берыктон понна, сётоно вал сыӵе ик тырбыдэс улонэз, кудзэ ыштӥз Адам. Иисус «Ассэ Ачиз сётӥз». Со быгатэ вал сыӵе дун тырыны, малы ке шуоно со Адам кадь ик тырбыдэс адями вал (1 Тимофейлы 2:6).

10. Мар кариз Иегова, дун тырон понна?

 ¹⁰ Мар кариз Иегова, дун тырон понна? Иегова музъем вылэ аслэсьтыз дуно Пизэ, Иисус Христосэз, ыстӥз. Со сое котьмалэсь азьло кылдытӥз (1 Иоанн 4:9, 10). Иисус дась вал аслэсьтыз инмысь улон интызэ кельтыны но Атаез дорысь кошкыны (Филиппыослы 2:7). Иегова Иисуслэсь улонзэ инмысь музъем вылэ выжтӥз но, Иисус музъем вылын сьӧлыктэм адями луыса вордӥськиз (Лука 1:35).

11. Быгатэ вал-а кин ке вань адямиос понна дун тырыны?

¹¹ Куке Адам Инмарлэсь ӧз кылзӥськы, со ассэ но, нылпиоссэ но пырак улонтэк кельтӥз. Быгатэ вал-а кин ке Адамлэсь вань нылпиоссэ кулонлэсь мозмытыны? Быгатэ. (Лыдӟе Римъёслы 5:19.) Иисус, кудӥз ноку но ӧз сьӧлыка, аслэсьтыз тырбыдэс улонзэ ми понна дун тыриз (1 Коринфъёслы 15:45). Солы луыса Адамлэн вань нылпиосыз кулонлэн киулысьтыз мозмытэмын луыны быгато (1 Коринфъёслы 15:21, 22).

12. Малы Иисуслы сокем курадӟоно вал?

¹² Библиын гожтэмын, мае чидано луиз Иисус Христос кулон азяз: сое зол жугизы, кортӵогазы но кулыны кельтӥзы (Иоанн 19:1, 16—18, 30). Малы Иисуслы сокем курадӟоно вал? Малы ке шуоно Шайтан вераз, одӥг адями но, бадӟым шуг-секытъёсын пумиськиз ке, Инмарлы оскымон уз кыльы шуыса. Иисус Христос возьматӥз, тырбыдэс адями, туж бадӟым шуг-секытъёсын пумиськыса но, Инмарлы оскымон кыльыны быгатоз шуыса. Малпалэ гинэ, макем Иегова данъяськиз Иисусэн! (Мадёнъёс 27:11; учке 15-тӥ ватсам валэктонэз).

13. Кызьы дун тыремын вал?

 ¹³ Нош кызьы дун тыремын вал? Асьме вакытысь 33-тӥ арын 14-тӥ нисанэ * Иисус виемын вал (Еврейёслы 10:10). Иисусэз виемзы бере куинетӥ нуналаз Иегова сое духовной, яке синмын адӟыны луонтэм, мугорын улӟытӥз. Иисуслэн правоез вал музъем вылын улонэз бырйыны но отын тырбыдэс адями кадь улыны. Куке Иисус Атаез доры инме берытскиз, со правозэ со Атаезлы сётӥз. Озьы дун тыремын вал (Еврейёслы 9:24). Табере вань адямиослэн луонлыксы вань сьӧлыклэсь но кулонлэсь мозмытскыны. (Лыдӟе Римъёслы 3:23, 24.)

14, 15. Мар кароно, сьӧлыкъёсмы куштэмын мед луозы шуыса?

¹⁴ Иисуслэн ми понна дун тыремез милемлы али ик ини пайда вае. Ойдолэ учкомы, кыӵе пайда вае со милемлы али но кыӵе пайда ваёз со вуонояз.

¹⁵ Милям сьӧлыкъёсмы куштэмын луыны быгато. Тӥ соглаш луоды, дыр, котьку но котьмае шонер лэсьтыны секыт шуыса. Ми ялан янгышаськомы: я вераськомы, я лэсьтӥськомы мае ке умойтэмзэ. Мар кароно, сьӧлыкъёсмы куштэмын мед луозы шуыса? Милемлы вань сюлмысьтымы жаляно, ми шонертэм лэсьтӥмы шуыса, но зӥбыт-востэм мылкыдын Иеговаез сьӧлыкъёсмес куштыны куроно. Соку оскыны быгатомы, со сьӧлыкъёсмес куштоз шуыса (Колоссыослы 1:13, 14; 1 Иоанн 1:8, 9).

16. Мар милемлы кароно, возьытлыкмы чылкыт мед луоз шуыса?

 ¹⁶ Милям возьытлыкмы чылкыт луыны быгатэ. Куке ми мае ке шонертэм лэсьтӥськомы, милемыз возьытлыкмы йырйыны кутске. Ми асьмеды янгышен шӧдӥськомы но малпаськомы, номыре тупатыны уг луы ни шуыса. Но киосмес лэзёно ӧвӧл. Иеговаез сюлворыса куриськомы ке сьӧлыкъёсмес куштыны, оскыны быгатӥськомы, со милемыз кылоз но сьӧлыкъёсмес куштоз шуыса (Еврейёслы 9:13, 14). Иеговалэн потэ, ми солы шуг-секытъёсмы, ляб интыосмы но янгышъёсмы сярысь мед вераломы шуыса (Еврейёслы 4:14—16). Озьы лэсьтӥмы ке, Инмар азьын милям возьытлыкмы чылкыт луоз.

17. Кыӵе бакель каронъёс вае Иисуслэн кулэмез?

¹⁷ Милям пумтэм вапумъёсы улыны осконмы кылдэ. «Сьӧлык вае кулон-бырон, нош Инмарлэн кузьымез пумтэм вапумъёсы Кузё-Инмармы Иисус Христос бордын улон луэ» (Римъёслы 6:23). Милям висьытэк, пумтэм вапумъёсы шумпотыса улыны луонлыкмы вань, малы ке шуоно Иисус ми понна кулӥз (Усьтӥськон 21:3, 4). Нош мар милемлы кароно, со бакель каронъёсты басьтон понна?

18. Кытысь ми тодӥськомы, Иегова милемыз яратэ шуыса?

¹⁸ Тодады вае, макем тӥ шумпотӥды, куке тӥледлы кузьым кузьмазы. Кызьы ми тодӥмы, дун тырон — со Инмарлэн самой дуно кузьымез. Со понна ми Иеговалы туж тау карыны кулэ. Иоаннлэсь 3:16  гожтэмын: «Инмар сокем дуннеез яратӥз, Аслэсьтыз одӥг вордӥськем Пизэ сётӥз». Иегова туж яратэ асьмемыз, соин ик со аслэсьтыз дуно Пизэ, Иисус Христосэз, ми понна сётӥз. Ми тодӥськомы, Иисус Христос но асьмемыз яратэ шуыса, малы ке шуоно со ми понна кулыны соглаш луиз (Иоанн 15:13). Веранэз ӧвӧл, ми понна дун тырыса, Иегова но Иисус возьматӥзы, милемыз ярато шуыса (Галатъёслы 2:20).

19, 20. а) Мар кароно, Иеговалэн эшез луон понна? б) Кызьы Иисуслэн мозмытӥсь курбонэзлы оскеммес возьматыны луоз?

¹⁹ Ми тодӥмы, Инмар милемыз туж яратэ шуыса. Со милесьтым мылкыдмес ӝутэ соин эшъёс луыны. Но секыт эшъяськыны соин, кинэ ми умой ум тодӥське. Тӥни малы Иоаннлэсь 17:3 верамын, Иегова сярысь тодон-валан басьтоно шуыса. Нош кызьы? Азьланяз но Библиез дышетэ. Озьы тӥ Иеговаез юнгес яратоды, тӥляд сое шумпоттэмды потоз но, дыр ортчыса, тӥ соин эшъёс луоды (1 Иоанн 5:3).

²⁰ Иисуслэн мозмытӥсь курбонэзлы оскемдэс возьматэ. Библиын верамын: «Пилы оскись муртлэн быронтэм улонэз вань» (Иоанн 3:36). Мае возьмато «Пилы оскыны» кылъёс? Соос возьмато, милемлы кулэ шуыса улыны озьы, кызьы дышетӥз Иисус (Иоанн 13:15). Иисуслы оскиськомы шуыса вераны гинэ ӧжыт, кулэ мар ке но карыны. «Оскон но ужъёстэк улыны уг быгаты»,— гожтэмын Иаковлэн 2:26. Ми Христослэн мозмытӥсь курбонэзлы оскиськомы шуыса, милям ужъёсмы возьматозы.

21, 22. а) Малы котькуд аре Христослэсь кулонзэ Тодэ ваён ӝытанэ ветлоно? б) Мар сярысь вераськон мыноз 6-тӥ но 7-тӥ люкетъёсын?

 ²¹ Христослэсь кулонзэ Тодэ ваён ӝытанэ ветлэ. Иисус косӥз милемыз солэсь кулон нуналзэ пусйыны. Котькуд ар со нуналэ ми Христослэсь кулонзэ Тодэ ваён ӝытанэз пусйиськомы (Матфей 26:26—28). Иисуслэн потэ вал, ми ноку но медам вунэтэ, милемыз мозмытон понна, со аслэсьтыз тырбыдэс улонзэ дун тыриз шуыса. Со вераз: «Монэ буре вайыса, тае быдэсъялэ». (Лыдӟе Лукалэсь 22:19.) Тодэ ваён ӝытанэ лыктыса, ми возьматӥськомы, Иисуслэсь ми понна кулэмзэ тодамы возиськомы шуыса. (Учке 16-тӥ ватсам валэктонэз.)

²² Иегова ми понна аслэсьтыз дуно пизэ сётӥз. Со самой бадӟым кузьым (2 Коринфъёслы 9:14, 15). Со кузьым пайда ваёз соослы но, кинъёс али кулэмын ини. Кызьы со соослы пайда ваёз, ми тодомы 6-тӥ но 7-тӥ люкетъёсысь.