1, 2. (a) Die yen nẹrhẹ okẹ ghanra kẹ wẹ? (b) Diesorọ ọtanhirhe na vwọ dia okẹ rọ ma rho ro nẹ obọ rẹ Ọghẹnẹ rhe?

DIE yen okẹ ro me yovwin ra kẹ wẹ re? Okẹ ghanra tavwen ọ ke da ohwo ẹro-o. Okẹ na da nẹrhẹ oma vwerhen owẹ, yẹrẹ ọ da dia obo wọ ghene guọnọ dẹn, kọ sa da wẹ ẹro.

² Usun rẹ okẹ rẹ Ọghẹnẹ vwọ kẹ avwanre, o vwo ọvo rẹ avwanre ma guọnọ. Ọyen okẹ rọ ma rho rẹ Ọghẹnẹ vwọ kẹ ihworakpọ. Vwẹ uyovwinrota nana, avwanre cha mrẹvughe nẹ Jihova ji Ọmọ rọyen Jesu Kristi rhe rere avwanre sa vwọ dia bẹdẹ. (Se Matiu 20:28.) Fikiridie nẹ Jihova vwo ẹguọnọ rẹ avwanre mamọ, kọyensorọ ro vwo ji Jesu rhe otọrakpọ na rhe tan avwanre hirhe.

3. Diesorọ ihworakpọ vwo ghwẹ?

³ Ọtanhirhe na, ọyen idjerhe rẹ Jihova vwo sivwin avwanre nẹ umwemwu kugbe ughwu. (Ẹfesọs 1:7) Re vwo vwo ẹruọ rẹ oboresorọ avwanre vwọ guọnọ ọtanhirhe na, ofori nẹ avwanre riẹn obo re phiare vwẹ ogba rẹ Idẹn ikpe uriorin buebun re wanre. Ọsẹ vẹ oni rẹ avwanre rẹsosuọ Adam vẹ Ivi ru umwemwu. Ọtiọyena, kẹ ayen ghwuru. Avwanre ji ghwẹ kidie avwanre riuku rẹ umwemwu nẹ obọ rẹ Adam vẹ Ivi rhe.—Ni Eta rẹ Odjefiotọ 9.

4. Ono yen Adam, die yen o vwori?

 ⁴ Ọke rẹ Jihova vwọ ma ọshare rẹsosuọ Adam nu, Ọ da kẹ emu ọvo rọ pha ghanghanre. Ọ kẹ Adam arhọ ọgbagba. O vwo iroro kugbe ugboma rọ gbare. Ọ cha muọga-a, ọ cha ghwo-o, o ji che ghwu-u. Kidie nẹ Jihova yen ma Adam, kọ pha kerẹ ọsẹ vwọ kẹ. (Luk 3:38) Jihova nene ta ota kọke kọke. Ọghẹnẹ djere phephẹn obo rọ guọnọ mie, ọ da je vwẹ omamọ iruo vwọ kẹ nẹ o ru.—Jẹnẹsis 1:28-30; 2:16, 17.

5. Die yen omudiaphiyọ rẹ Baibol na vwọ tanẹ a ma Adam vwẹ “oma rẹ Ọghẹnẹ”?

⁵ A ma Adam vwẹ “oma rẹ Ọghẹnẹ.” (Jẹnẹsis 1:27) Jihova kẹ rẹ iruemu re họhọ erọyen, evo usun rayen yen ẹguọnọ, aghwanre, orhiẹn-abavo vẹ ẹgba. Ọ kẹ Adam egbomọphẹ. Adam dia irhọbọtu-u. Ọghẹnẹ ma rọ vwẹ idjerhe rọ sa vwọ jẹ ojẹ rẹ obo re gbare vẹ obo re chọre. Ọ da dianẹ Adam nyupho rẹ Ọghẹnẹ jovwo, mane ọ ra dia vwẹ Iparadaisi bẹdẹ.

6. Ọke rẹ Adam vwọ churhi rẹ Ọghẹnẹ, die yen va rọ obọ? Mavọ yen ọyena djobọte avwanre?

⁶ Okpemu yen va Adam obọ ọke rọ vwọ churhi rẹ Ọghẹnẹ, Ọghẹnẹ de brorhiẹn rẹ ughwu hwe. Adam de ku oyerinkugbe rọyen vẹ ọ rẹ Jihova kufia, ọtiọyen ji te arhọ ọgbagba, kugbe ogba rẹ Iparadaisi. (Jẹnẹsis 3:17-19) Adam vẹ Ivi jẹ ojẹ rẹ ayen vwọ churhi rẹ Ọghẹnẹ, ọtiọyena ayen rhe vwo iphiẹrophiyọ-ọ. Fikirẹ oborẹ Adam ruru na, “umwemwu . . . rhe akpọ rẹ ughwu da wan oma rẹ umwemwu rhe na, ọtiọyen na ughwu da hrabọ ro ihwo ejobi fikiridie ihwo ejobi ru umwemwu.” (Rom 5:12) Ọke rẹ Adam vwo ru umwemwu, ọ “shẹ” oma rọyen kugbe avwanre eje kẹ umwemwu vẹ ughwu. (Rom 7:14) Iphiẹrophiyọ herọ vwọ kẹ avwanre? E, ọ herọ.

7, 8. Die yen ọtanhirhe?

 ⁷ Die yen ọtanhirhe? Ọtanhirhe churobọ si erọnvwọn ivẹ. Ọrẹsosuọ, ọtanhirhe ọyen osa ra hware rere e vwo siobọ nẹ ohwo yẹrẹ dẹ orọnvwọn rhivwin. Ọrivẹ, ọtanhirhe ọyen osa rẹ uchunu rẹ orọnvwọn re miovwirin.

⁸ O vwo ohworakpọ vuọvo rọ sa hwosa rẹ umiovwo rẹ Adam soro ọke ro vwo ru umwemwu rọ so ughwu kẹ avwanre-e. Ẹkẹvuọvo, Jihova ru ọrhuẹrẹphiyotọ ro vwo si avwanre nẹ umwemwu kugbe ughwu. E jẹ avwanre yono kpahen oborẹ ọtanhirhe na wian wan vẹ erere ro se te avwanre obọ.

9. Mavọ a sa vwọ hwosa rẹ ọtanhirhe na?

⁹ O vwo ohwo vuọvo rọ cha sa hwosa rẹ arhọ ọgbagba rẹ Adam ku kufia na-a. Diesorọ? Kidie avwanre eje gbare-e. (Une Rẹ Ejiro 49:7, 8) Arhọ ọgbagba yen ọtanhirhe ra guọnọre. Kọyensorọ a vwọ tanẹ ọ vwẹ “ekpuyovwi rẹ oma rọyen tan avwanre ejobi hirhe.” (1 Timoti 2:6) Ofori nẹ ọtanhirhe na vẹ arhọ rẹ Adam ku kufia na dia abavo.

10. Idjerhe vọ yen Jihova vwọ vwẹ ọtanhirhe na phia?

¹⁰ Idjerhe vọ yen Jihova vwọ vwẹ ọtanhirhe na phia? Jihova ji Ọmọ rọyen rọ pha ghanghanre na rhe otọrakpọ na. Ọmọ na, rọ dia Jesu yen emama rọyen rẹsosuọ. (1 Jọn 4:9, 10) Jesu vwo owenvwe rọ vwọ yanjẹ Ọsẹ rọyen vẹ ẹdia rọyen vwẹ odjuvwu vwọ rhe otọrakpọ na. (Filipae 2:7) Jihova de ji Jesu nẹ odjuvwu rhe otọrakpọ, ke rhi vwiẹ kerẹ ohwo rọ gbare, o vwo umwemwu-u.—Luk 1:35.

11. Mavọ yen ohwo ọvo sa vwọ tan ihworakpọ eje hirhe?

 ¹¹ Ọshare rẹsosuọ, Adam, ku arhọ ọgbagba kufia ọke rọ vwọ churhi rẹ Jihova. O vwo ohwo ọfa ro se si ughwu no vwọ kẹ emọ rẹ Adam? E. (Se Rom 5:19.) Jesu ro vwo umwemwu-u na, vwẹ arhọ ọgbagba rọyen vwọ tan avwanre hirhe. (1 Kọrẹnt 15:45) Arhọ ọgbagba rọyen kọyen e che vwo si ughwu no vwọ kẹ emọ rẹ Adam.—1 Kọrẹnt 15:21, 22.

12. Diesorọ Jesu vwọ rioja mamọ?

¹² Baibol na dje kpahen oja rẹ Jesu re re tavwen o ki ghwu. A fa rọ, e hwere mu urhe, o de ji ghwu ughwu oja. (Jọn 19:1, 16-18, 30) Diesorọ Jesu vwọ rioja mamọ tavwen o ki ghwu? Kidie Eshu tare nẹ o vwo ohwo vuọvo rọ sa fuevun ga Ọghẹnẹ vwẹ ẹdia rẹ ọdavwini-i. Jesu djerephia nẹ ohwo rọ gbare sa fuevun ga Ọghẹnẹ, o toro oborẹ oja na gan te-e. Vwẹ ẹro roro oborẹ oma cha vwerhen Jihova te fikirẹ Jesu!—Isẹ 27:11; ni Eta rẹ Odjefiotọ 15.

13. Mavọ yen a hwosa rẹ ọtanhirhe na wan?

¹³ Mavọ yen a hwosa rẹ ọtanhirhe na wan? Jesu vwẹ ọghanrovwẹ rẹ arhọ rọyen kpahotọ kẹ Ọsẹ rọyen. Vwẹ Nisan 14 ukpe rẹ 33, vwẹ ikalẹnda rẹ ihwo rẹ Ju, Jihova da vwẹ uphẹn kẹ ivwighrẹn rẹ Jesu nẹ ayen hwe. (Hibru 10:10) Ẹdẹ erha vwọ wan nu, Jihova da rhọvwọn nẹ ughwu, ọ dia kerẹ ohworakpọ-ọ, ẹkẹvuọvo kerẹ ohwo rẹ ẹwẹn. Ọyena vwọ wan nu, Jesu de rhivwin bru Ọsẹ rọyen ra vwẹ odjuvwu, ọ da vwẹ ọghanrovwẹ rẹ arhọ ọgbagba rọyen na kpahotọ kẹ Jihova. (Hibru 9:24) Ra vwọ hwosa rẹ ọtanhirhe na nure na, avwanre ki rhi vwo uphẹn ra vwọ vrabọ rẹ umwemwu kugbe ughwu.—Se Rom 3:23, 24.

14, 15. Die avwanre che ru rere a sa vwọ vwẹ imwemwu avwanre vwo ghovwo avwanre?

¹⁴ Avwanre mrẹ erere vwo nẹ okẹ rọ ma rho ro nẹ obọ rẹ Ọghẹnẹ rhe. E jẹ avwanre yono oborẹ avwanre sa vwọ mrẹ erere asaọkiephana kugbe ọke rọ cha vwẹ obaro.

¹⁵ A vwẹ imwemwu rẹ avwanre vwo ghovwo avwanre. Ọ bẹn re se vwo ru obo ri yovwirin ọkeneje. Avwanre vwo echobọ, avwanre ta chọ, ji ruẹ chọ ọkiọvo. (Kọlose 1:13, 14) Mavọ avwanre sa vwọ mrẹ evwoghovwo? E jẹ avwanre kurhẹriẹ nẹ oruchọ rẹ avwanre na, rere avwanre nẹrhovwo rhe Jihova nẹ o vwo ghovwo avwanre. Ọtiọyena, avwanre ki se vwo imuẹro nẹ Jihova vwo ghovwo avwanre nure.—1 Jọn 1:8, 9.

16. Die avwanre ru rere e se vwo vwo omamọ rẹ ẹwẹn obrorhiẹn?

¹⁶ Avwanre se vwo omamọ rẹ ẹwẹn obrorhiẹn. Ẹwẹn obrorhiẹn avwanre de bru hwe avwanre, kọ nẹrhẹ avwanre vwo ẹwẹn rẹ abe, ọ je nẹrhẹ avwanre ni oma rẹ avwanre nẹ avwanre vwo iphiẹrophiyọ-ọ, ọ je sa nẹrhẹ avwanre roro nẹ avwanre fiemu-u. Ẹkẹvuọvo ukẹcha herọ. Avwanre da nẹrhovwo nẹ Jihova vwo ghovwo avwanre, kẹ avwanre se vwo imuẹro nẹ ọ cha kerhọ, ji vwo ghovwo avwanre. (Hibru 9:13, 14) Jihova guọnọre nẹ avwanre vuẹ kpahen ebẹnbẹn kugbe ẹdia rẹ ovwiẹrẹ avwanre. (Hibru 4:14-16) Ọtiọyena, avwanre vẹ Ọghẹnẹ ke sa dia vwọrẹ ufuoma.

17. Ebruphiyọ vọ yen se te avwanre obọ kidie nẹ Jesu ghwu kẹ avwanre?

¹⁷ Avwanre vwo iphiẹrophiyọ rẹ avwanre vwọ dia bẹdẹ. “Kidie osa rẹ umwemwu hẹ ughwu, ẹkẹvuọvo ẹserọphẹ rẹ Ọghẹnẹ na ọye hẹ arhọ ri bẹdẹ vwẹ evun ri  Jesu Kristi Ọrovwavwanre.” (Rom 6:23) Kidie nẹ Jesu ghwu kẹ avwanre, avwanre sa dia bẹdẹ vẹ omakpokpọ. (Ẹvwọphia 21:3, 4) Ẹkẹvuọvo, die yen avwanre ru rere ebruphiyọ nana se vwo te avwanre obọ?

18. Mavọ avwanre ru riẹn nẹ Jihova vwo ẹguọnọ rẹ avwanre?

¹⁸ Roro kpahen oborẹ oma vwerhen owẹ te ọke ra vwọ kẹ wẹ okẹ ọvo rọ pha yoyovwin. Ọtanhirhe na yen okẹ rọ ma ghanre, ọtiọyena, e jẹ avwanre kpẹvwẹ Jihova fikirẹ okẹ yena. Jọn 3:16 da ta: “Ọghẹnẹ guọnọ akpọ na ọ da vwẹ Ọmọ ọvuọvo rọyen na kẹ.” Vwọrẹ uyota Jihova vwo ẹguọnọ rẹ avwanre mamọ, kọyensorọ o vwo ji Jesu Ọmọ vuọvo rọyen na rhe. Avwanre je riẹn nẹ Jesu vwo ẹguọnọ rẹ avwanre, kidie ọ rhọnvwere nẹ o che ghwu kẹ avwanre. (Jọn 15:13) E jẹ okẹ rẹ ọtanhirhe na kẹ wẹ imuẹro nẹ Jihova vẹ Jesu vwo ẹguọnọ wẹn.—Galesha 2:20.

19, 20. (a) Mavọ wọ sa vwọ dia ugbeyan rẹ Jihova? (b) Mavọ wo se vwo djephia nẹ wo rhiabọreyọ izobo rẹ ọtanhirhe rẹ Jesu na?

¹⁹ Ru wo vwo yono kpahen ẹguọnọ rode rẹ Ọghẹnẹ nure na, mavọ wọ sa vwọ dia ugbeyan rọyen? Ọ bẹnre re vwo vwo ẹguọnọ rẹ ohwo re vugheri-i. Jọn 17:3 tare nẹ avwanre sa riẹn Jihova. Wo vwo ruẹ ọnana, ẹguọnọ wẹn kpahọn kọ cha ganphiyọ, ku wo ji che vwo owenvwe wo vwo ru obo ri je, ọtiọyena ku wọ sa dia ugbeyan rọyen. Gbe rhe yono kpahen Jihova womarẹ Baibol na.—1 Jọn 5:3.

²⁰ Rhiabọreyọ izobo rẹ ọtanhirhe rẹ Jesu na. Baibol na tare nẹ “ọ ro se Ọmọ na gbuyota vwo arhọ ri bẹdẹ.” (Jọn 3:36) Die yen ọnana mudiaphiyọ? O mudiaphiyọ nẹ avwanre ru oborẹ Jesu yono avwanre. (Jọn 13:15) Ọ dia ugbunu ọvo yen a cha vwọ tanẹ avwanre se Jesu gbuyota-a. Re vwo rhiabọreyọ ọtanhirhe na,  ofori nẹ avwanre ru orọnvwọn kpahen esegbuyota rẹ avwanre. Vwẹ Jems 2:26, avwanre de se: “Esegbuyota ro vwo iruo-o ji ghwu rhe.”

21, 22. (a) Diesorọ avwanre vwo kpo Ẹkarophiyọ rẹ Ughwu rẹ Jesu kukpe kukpe? (b) Die yen a cha ta ota kpahen vwẹ Iyovwinreta 6 vẹ 7?

²¹ Kpo Ẹkarophiyọ rẹ ughwu rẹ Jesu. Ovwọnvwọn tavwen Jesu ki ghwu, ọ vuẹ avwanre nẹ avwanre ru ẹkarophiyọ rẹ ughwu rọyen. Kukpe kukpe yen avwanre vwo ruẹ ọnana, e sere nẹ, Ẹkarophiyọ rẹ Ughwu rẹ Jesu yẹrẹ “Emu rẹ Ovwọnvwọn rẹ Ọrovwohwo.” (1 Kọrẹnt 11:20; Matiu 26:26-28) Jesu guọnọrẹ nẹ avwanre karophiyọ nẹ ọ vwẹ arhọ ọgbagba rọyen vwọ tan avwanre hirhe. Ọ da ta: “Ru ọnana vwọ karohọ ovwẹ.” (Se 1 Kọrẹnt 11:24.) Ọke wo de kpo Ẹkarophiyọ rẹ Ughwu rẹ Jesu, jẹ wo dje phia nẹ wọ karophiyọ ọtanhirhe na kugbe ẹguọnọ rode rẹ Jihova vẹ Jesu dje kẹ avwanre.—Ni Eta rẹ Odjefiotọ 16.

²² Ọtanhirhe na yen okẹ rọ ma rho ra vwọ kẹ avwanre. (2 Kọrẹnt 9:14, 15) Iduduru rẹ ihwo ri ghwure cha mrẹ erere vwo nẹ okẹ nana rhe. Iyovwinreta 6 vẹ 7 che dje oborẹ ọnana sa vwọ dia ọtiọyen.