1, 2. (a) Yoovaha yooreera, ontthuneya okhala ya musurukhu muntxipale? (b) Mwaha wa heeni orwa wa Yesu elapo ya vathi oraaya yoovaha etokotoko ya Muluku?

MOOTOKO ovahiwa etthu yootepa oreera? Oreera wa etthu, khohiyono onkhala waatta wa etthu eyo. Yoovahiwa yooreera ti yeele enoohakalalihani eyo tiiyo, etthu yeele muntthunaanyu vantxipale. Moohihovela mwavahiwa etthu mwatthunaanyu munotthapela nave munimweera asantte.

² Nto Muluku oonivaha hiyo etthu nahaawela ahu vantxipale, ophwaha itthu sootheene. Eheeniyo? Yehova omurumiha mwanawe, Yesu Kristu owa elapo ya vathi weera anveleele ekumaawe niwoko na hiyo. (Mmusome Matheyo 20:28.) Orwa wa Yesu elapo ya vathi, yoovaha etokweene nivahiwaahu ni Muluku. Moota heeni? Mwaha wooweera onnanivaha eparakha ya okhala mahuku ootheene. Yehova ohoonihera osivela wawe weekhaikhai ni yoovaha ela.

3. Mwaha wa heeni ninkhwaahu?

³ Weera nisuwele nnene ele Yesu okhwenlaawe, ontthuneya wuupuwelela ni wiiwexexa ele yaakhumelenle oJardim w’Edeni. Asitithihu oopatxera Adamu ni Heva, yaamutthekela Muluku. Nave tiyeeyo eweerinhe okhwa. Nto mwaha wooweera aanivaliha yoottheka eyo, atthu ootheene onnaphwanya okhwa. Weera noopoliwe mwa yoottheka eyo, Yehova aamurumiha mwanawe Yesu weera anikhwele hiyo. — Aefeso 1:7, Nwehe Enoota 9.

4. Yaari hayi ekumi ya Adamu, ahinaakhuve ottheka?

⁴ Yehova aampattuxa mulopwana oopatxera Adamu moomalela. Eyo yaari etthu yootikiniha. Adamu ahinaakuve  ottheka, erutthu awe ni muupuwelo awe waari wookwanela. Owo khaweherera ovoreiwa, wuuluvala naari okhwa. Niwoko Yehova aari tiithawe. (Luka 3:38) Yehova nave annuluma ni Adamu amuleelaka etthu eerawe apakeke. Nave owo aavahiwa muteko weera omuhakalaliheke emaara yootheene. — Ephattuwelo 1:28-30; 2:16, 17.

5. Enthonyera eheeni masu oweera Adamu aapattuxiwa “mwa ekhove ya Muluku?”

⁵ Adamu aapattuxiwa “mwa ekhove ya Muluku.” (Ephattuwelo 1:27) Eyo enthonyera weera Yehova anvaha Adamu makhalelo oraaweno, ntoko osivela, osuwela, ni exariya. Naari vareene hiiho, Muluku ampattuxa Adamu ni otaphuwa wa othanla yooreera ni yoonanara. Owo khohiyono aari maakina. Nave aathanlale omwiiwelela Muluku, aarowa okhalaka mahiku ootheene mParadiso.

6. Adamu mwaha woohimwiiwelela Muluku, ekhumelenle ti heeni? Nave onnihasula hayi?

⁶ Yoottheka etokweene Adamu aapankaawe waari ohimwiiwelela Muluku. Owo ahootxeela onthamwene awe ni Yehova, nave aaleliwa weera aamookhwa. Adamu aakhala oohimalela ni aahikariwa oJardim w’Eedeni. (Ephattuwelo 3:17-19) Atthu ootheene ninnihasuwa mwaha wa Adamu, “yottheka evonlonwaya mwelaponi mumu ni mwaha wa yottheka okhwa tho, siso tho okhwa wòhàphiyera atthu othene, wona wi othene aya àttheka.” (Aroma 5:12) Vanonto atthu ootheene akhumme wa Adamu akaporo a yoottheka ni okhwa. (Aroma 7:14) Adamu ni Heva yaathanla ohimwiiwelela Muluku, nto khakhalanne yooweherera eri yootheene. Ninkha hiyo? Neereke nnooweera okhala oothaphuwa wa yoottheka ni okhwa? Aani, weera nitaphuliwe mwa yoottheka eyo, ontthuneya mutthu anlivele yoowopola.

7, 8. Entaphulela eheeni masu ooweera yoowopola?

 ⁷ Yoowopola ti heeni? Yoowopola eri ntoko mutthu owaleliwe mukaliposo, ovinyaka mutthu mukina anavelela musurukhu weera amoopole mukhwaawe. Nave mBiblyani masu ooweera yoowopola, entaphulela há: mutthu olinvaawe atthunaka woopola etthu, nto yoowopola eyo ekhaleke yoophiyera oliva naari orantteliha ele enananre.

⁸ Atthu ootheene yatthukeya mwa yoottheka ni okhwa, khaavo aaweera onoopola. Yehova oopaka etthu yootthuneya weera anoopole. Owo oomurumiha Yesu weera aveleele ekumi awe weera anoopole.

9. Heeni atthu yeeraya ehiwere woopolana?

⁹ Ekumi yootxeliwe ni Adamu yaari yoomalela. Vano weera noopoliwe, aatthuneya mutthu oomalela eyo tiyo mutthu oohittheka. Nave tiyeeyo Biblya onahimaawe weera Yesu oveleela ekumi awe, “wera àvuluxe antxipale”. (1 Timotheyo 2:6) Mene hiyo na atthu oohimalela. Mwa yeeyo mpuwa mwa hiyo, khaavo eera aweere onoopola — Nsalmu 49:8, 9 [49:7, 8 NM].

10. Yehova apanke eheeni weera anoopole?

¹⁰ Yehova apanke eheeni weera anoopole? Nto owo aamurumiha mwanawe osiveleya orwa elapo ya vathi. (1 Yohani 4:9, 10) Vano Yesu ahakhulela orwa elapo ya vathi, aahiyaka atithawe nave nipuro aakhalawe wirimu. (Afilipi 2:7) Mene Yehova aapanke mwiiriira weera ayariwe Yesu, nave owo aari oomalela, eyo tiiyo, ohittheka. — Luka 1:35.

11. Onwereya hayi mutthu mmoha owoopola atthu antxipale?

¹¹ Oniwereya hayi mutthu mmoha owoopola atthu antxipale? Ntoko onihimaawe Biblya, mwaha wa mutthu mmoha, atthu ootheene aari oohimalela nave annikhwa. Nto vamoharu, mwaha wa mutthu mmoha owoopola atthu  antxipale. (Mmusome Aroma 5:19.) Adamu khaamwiiwelenle Muluku, nto ahootxela ekumi yoomalela. Mene Yesu oovaha ekumaawe yoomalela weera alivele yoottheka. (1 Akorinto 15:45) Mwaha wa yeele Yesu opankaawe, atthu ootheene akhalano eparakha ya okhalano ekumi yoohimala. — 1 Akorinto 15:21, 22.

12. Mwaha wa heeni Yesu ahaawiyaawe vantxipale?

¹² Biblya onnahima moota Yesu ahawalaawe, ahinaakuve okhawa. Nto atoropa yaamuhasula woohikhala exariya. Mene awo yaamukhomela vamwirini va nihaaxero, nave mwaha wooweera aamweera omaniwa, owo aapisa okhwa ni ahaawa vantxipale. (Yohani 19:1, 16-18, 30) Mwaha wa heeni Yesu ahaawaka mootene yoola? Mwaha wooweera Satana aaninvanyiha Muluku. Weera khaavo aneera awere okhala ororomeleya vamaithoni va Yehova, yaamphwanyaka mahooxo mantxipale. Nave Yesu aahonihera woomalela weera mutthu onoowera okhala oororomeleya naamwi akumanakano maxupo mantxipale. Moohihovela, Yehova waamutteela murima omoona mwanawe Yesu areene oororomeleya emaara yootheene! — Miruku 27:11; Nwehe Enoota 15.

13. Yoowopola eliviwe hayi?

¹³ Yoowopola eliviwe hayi? Eyaakha ya 33, nihuku na 14 a Nisani a kalendariyu a Yuda, Yehova ahakhulela weera Yesu iiviwe ni amwiittani awe. (Aheberi 10:10) Yesu khaaphwanenle okhwa, maxi owo aveleela ekumaawe ntoko yoowopola. Emalakaru mahiku mararu akhwiyeene, Yehova aamutthikihera Yesu okumi awe. Mene haakhanleno erutthu ntoko mutthu, maxi erutthu yoomunepani. Yesu atthikelakaru wirimu, Yehova aavarela muteko ekumi ya Yesu weera anoopole. (Aheberi 9:24) Nto mwaha wa yeeyo nookhalano eparakha yootaphuliwa mwa yoottheka ni okhwa. — Mmusome Aroma 3:23, 24.

14, 15. Nipakeke eheeni weera nileveleliwe soottheka sahu?

¹⁴ Woohihovela yoowopola etthu etokotoko Muluku onivanhaawe. Vano nrowe nsuwele moota yoowopola enikhaviheraaya vanano vaava ni moota enrowaya onikhavihera muhoolo.

¹⁵ Oleveleliwa wa soottheka sahu. Ovila opaka itthu sooreeraru ehuhu yootheene. Emaara ekina mutthu onnapaka ni wuuluma itthu soonanara. Vano nipakeke heeni weera nileveleliwe soottheka sahu? Etthu yootthuneya ori ottharuwa soottheka sahu, ni oveka oleveleliwa wa Yehova moowiyeviha. (Akolosi 1:13, 14) Navekela oleveleliwa, nroromeleke weera Yehova onoonilevelela mwaha wa yoowopola Yesu ovanhawe. — 1 Yohani 1:8, 9.

16. Mwaha wa heeni otthuneyaya okhalano yoowupuxera ya murima yooreera, navekela oleveleliwa?

¹⁶ Yoowupuxera ya murima yooreera. Napaka yoottheka, yoowupuxera ya murimaahu ennalemela. Emaara ekina ninniivaha mathowa, ni ninnupuwela weera khanimphureleya etthu vamaithoni va Yehova. Nto nihuupuweleke hiiho, Yehova khantthuna weera nooveke wuulumano wa itthu sinnixupa. (Aheberi 4:14-16) Navekela oleveleliwa, ontthuneya weera nikhaleke ni murettele ni Yehova. Nikhalekeno yoowupuxera ya murima yooreera. (Aheberi 9:13, 14) Onnatthuneya okhalano murettele ni yoowupuxera ya murima yooreera, mwaha wooweera Yehova onnaiwa mavekelo ahu. Nave onnanlevelela mwaha wa yoowopola.

17. Mwaha wa Yesu onikhwela, mareeliho heeni nneerahu naphwanye?

¹⁷ Yooweherera ya okhalano ekumi yoohimala. “Khweli nlivo na yottheka ti okhwa, vahera yovaha ya Muluku ti okumi wohimala mwa Kristu Yesu Apwiy’ahu.” (Aroma 6:23) Muhoolo nnooweera okhalano ekumi yoomalela ni okhala  mahuku ootheene, mwaha wooweera Yesu onikhwela hiyo. (Apokalise 21:3, 4) Vano eheeni nintthuneyaahu opaka?

18. Ninsuwela hayi weera Yehova onnasivela?

¹⁸ Nkupuwelani moota onoottelayani murima mwaakhela vale etthu yootepa woosivelani. Yoowopola etthu yootepa otthuneya ninvahiwaahu ni Yehova, nto ontthuneya woonihera otthapela wahu. Ebuukhu ya Yohani 3:16 enahima weera, “Muluku òtthuna vantxipale elapo ya vathi ophiyera onvaha Mwan’awe mmosaru.” Ninnawera woonelela weera Yehova onnasivela vantxipale, mwaha woomurumiha mwanaawe oosiveleya, Yesu. Nave mwaha wa Yesu weema okhwa weera anoopole, owo tho ohoonihera onisivela wawe. (Yohani 15:13) Mpaka va, nooweera osuwela weera Yehova ni Yesu annasiveliwa vantxipale ni hiyo. — Agalata 2:20.

19, 20. (a) Munaawera hayi okhala nthamwene a Yehova? (b) Nnoonihere hayi weera ninnaroromela yowoopola?

¹⁹ Mmusuwele Yehova. Ovila omusivela mutthu muhimusuwenla anyu, nto weera mmusivele Yehova ontthuneya omusuwela. Nave Yohani 17:3 onahima weera hiyo nnoowera omusuwela Muluku. Mene emaara muneeraanyu mmusuwele Muluku, omutxeketta wanyu oneereke otepa. Nto nvirelelihe omusoma Biblya weera mmusuwele nnene Muluku ni mmusiveliheke yoowo. — 1 Yohani 5:3.

²⁰ Muroromeleke mwa yoowopola. Ororomela khoiyono waasa ohima weera, kinnamusivela Yesu. Biblya onahima weera “ole onamwìwelela Mwana, onnakhalano ekumi yohimala.” (Yohani 3:36) Onitaphulela heeni wiiwelela? Onitaphulela opaka itthu sootheene Yesu oxuttinhaawe. (Yohani 13:15) Naapakaka itthu iyo, nnimoonihera  weera ninnaroromela yoowopola. Yakobe 2:26, onnahima weera: “wiwelela ohikhanleno miteko saya ti wokhwene.”

21, 22. (a) Mwaha wa heeni ontthuneyaaya orowela muthukumano wa wuupuwelela okhwa wa Yesu? (b) Eheeni muru wa 6 ni 7 onrowaya ohimexexa?

²¹ Wuupuwelela okhwa wa Yesu. Ohiiyu omoha Yesu ahinakhuve okhwa, owo ahaaxuttiha oohusera awe weera yuupuweleleke okhwa wawe. Nave hiyo ninnapaka “Yotxa ya Apwiya”. Muthukumano owo oneeriwa, wuupuwelela okhwa wa Yesu onipakiwa ekwaha emooha vayaakhani.” (1 Akorinto 11:20; Matheyo 26:26-28) Yesu ontthuna weera, hiyo nuupuweleleke weera owo oovaha ekumaawe yoomalela weera anoopole. Mene owo ahimme weera: “Mpakeke iya mukùpuwelaka miyo.” (Mmusome Luka 22:19.) Emaara ninrowelahu muthukumano ola, ninnonihera weera ninnupuwela yoowopola eveleeliwe ni Yehova vamoha ni Yesu. Ni nsivelo yoonihenraya weera ewoopole atthu. — Nwehe Enoota 16.

²² Yoowopola yoovaha etokweene naakhenlaahu enakhuma wa Muluku. (2 Akorinto 9:14, 15) Muru wa 6 ni 7 onnihimexexa moota yoovaha eyo, enrowaaya waakhavihera atthu n’atthu ekhwiye.