1, 2. (a) Exeeni eniiriha yoovahiwa okhala ya faita? (b) Xeeni yowoopola eryaaya yoovaha yuulupalexa ya Muluku?

ETTHU xeeni yootepa oreera etonko anyu ovahiwa? Wira yoovaha ekhale ya faita, khenitthuneya okhala ya musurukhu munceene. Masi akhala wira ennoosivelani ni yaahoothowani, tthiri nyuwo munnixukhurela.

² Mwa itthu sinceene sivahiwa ahu ni Muluku, yookhala etthu enivikana sotheene. Etthu ene ti yuulupalexa Muluku aavanha awe apinaatamu. Ntoko ninrowa ahu wiixutta muru ola, Yehova oomuruma Mwanawe, Yesu Kristu, wira niphwanye ekumi yoohimala. (Mmusome Matheyo 20:28.) Mwaha woomuruma Yesu orwa valaponi wira ovahe yowoopola, Yehova ohooniherya tthiri wira onniniphenta.

3. Xeeni apinaatamu vanikhwa aya?

³ Yowoopola ti ephiro Yehova erumenle awe wira owoopole apinaatamu mwa yoottheka ni okhwa. (aÉfeso 1:7) Wira niiwexexe otthuneya waya yowoopola ela, nihaana osuwela ele yiiraneyale ojardim ya wEedeni iyaakha ikonto sinceene sivinre. Anamuyari ahu oopacerya, Adamu ni Eva, yaahittheka. Mwaha woottheka awo ahookhwa. Nave ninnookhwa maana noorava yoottheka ya Adamu ni Eva.​—Nwehe Enoota 9.

4. Adamu aarina okumi xeeni ni eparakha xeeni aarina awe?

⁴ Okathi Yehova ampattunxe awe mulopwana oopacerya, Adamu, Yehova aahinvaha etthu yootepa oreera. Muluku aahinvaha Adamu okumi wooloka. Adamu aarina  muupuwelo ni erutthu yooloka. Nto khaarowa owereiwaka, wuuluvala, nnakhala okhwa. Okhala wira Adamu aapattuxiwe ni Yehova, tthiri Muluku aari ntoko tiithi aya. (Luka 3:38) Khula okathi Yehova aanimulavuliha Adamu. Nave aaninvaha Adamu malakiheryo ni muteko woohakalaliha wira ovareke.​—Maphattuwelo 1:28-30; 2:16, 17.

5. Anitaphulela exeeni masu oowi: Muluku ampattunxe Adamu “aìlattanihaka mwanene”?

⁵ Muluku ampattunxe Adamu “aìlattanihaka mwanene”. (Maphattuwelo 1:27) Moolumo ala anitaphulela wira Yehova aahinvaha mikhalelo sirina awe ntoko, ophenta, miruku, exariya, ni owerya. Nave aahinvaha Adamu othanla mootaphuwa. Adamu khaapakiwe ntoko eroboti aahiiso maakina. Muluku aahinvaha owerya wira othanleke ele eri yooloka aahiiso yoohiloka. Vaakhanle wira aahithanla omwiiwelela Muluku, owo aamukhalaka moohimala mParayiisu valaponi.

6. Adamu apweteiwale exeeni mwaha woohimwiiwelela Muluku? Nto onnivara sai mwaha owo?

⁶ Mwaha wa Adamu ohimwiiwelela Muluku, awo yaahilamuliwa okhwa, nto Adamu aaliva esisapo yuulupalexa. Ohiiwelela waya waahiwiiriha opweteiwa wataana wooloka ni Yehova, okumi wooloka, ni eParayiisu yaakhala aya. (Maphattuwelo 3:17-19) Adamu ni Eva yaahithanla ohimwiiwelela Muluku, nto eyo yaahiwiiriha ohikhalana-tho nlipelelo. Tivonto Biibiliya vanihimya awe so: “Etamp’iyo yoruha okhwa. Siso okhwa ohaphwanya atthu othene, okhala wira atthu othene àttheka”. (aRoma 5:12) Vaavo Adamu yaatthenke aya, awo ‘yahìtumiha’ mmensaya khukhala epottha ya etampi ni okhwa. (aRoma 7:14) Ankhi hiyo, niireke nookhala nlipelelo? Aayo.

7, 8. Yowoopola enitaphulela exeeni?

 ⁷ Yowoopola enitaphulela exeeni? Nuulumo noowi yowoopola, nintaphulela itthu piili. Yoopacerya: yowoopola esisapo mutthu onliva awe ophavelaka otaphula aahiiso woopola etthu. Yanenli: yowoopola ti esisapo eniphiyerya oliva wala orantteliha ele epweteyale.

⁸ Nto khuuvo pinaatamu aawerya oliverya ele Adamu yaakumihenrye aya mwaha woottheka oruuhale okhwa. Masi Yehova ookumiherya yowoopola wira onitaphule yoottheka ni okhwa. Nrowe nthokorerye efaita erina aya yowoopola ni moota ninwerya ahu ottottela mureerelo.

9. Yaarowa oliveriwa sai yowoopola?

⁹ Khuuvo nnakhala mmosa a hiyo aawerya oliverya okumi wooloka Adamu yaapweteiwale aya. Mwaha wa xeeni? Mwaha woowi otheene ahu noottheka. (Esalimo 49:8, 9) Nto yowoopola yaatthuneya okumi woohittheka. Tivonto, Biibiliya vanihimya awe wira Yesu oovaha okumi onilikanela “wira awòpole atthu othene”. (1 Timótheyo 2:6) Tthiri, yowoopola yaahaana okhalana esisapo emosaru ni ele Adamu apweteiwale aya.

10. Yehova ovanhe sai yowoopola?

¹⁰ Vano Yehova ovanhe sai yowoopola? Yehova aamurumme orwa valaponi Mwanawe ootepa otthuneya. Mwaana ola, ti Yesu yoowo ori oopacerya mwa soopattuxiwa sotheene. (1 Yohani 4:9, 10) Nto Yesu aaheemererya okhuma wiirimu ni omuhiya Tiithi awe. (aFilipi 2:7) Yehova aahithaamiha okumi wa Yesu oruuhaka valaponi, vano Yesu aahiyariwa oomalela aahiiso oohittheka.​—Luka 1:35.

11. Vanweryaneya sai mutthu mmosa owoopola apinaatamu otheene?

¹¹ Mwaha woohimwiiwelela Yehova, mulopwana  oopacerya, Adamu, aahittheka ni ohaaraviha etampi apinaatamu otheene. Niireke ookhala mutthu aawerya omaliha okhwa waaphwannye anamwane a Adamu? Aayo. (Mmusome aRoma 5:19.) Yesu, yoowo ohitthenke, aahivaha okumi awe wooloka ntoko yowoopola. (1 aKorinto 15:45) Okumi woohittheka wa Yesu toniwerya omaliha okhwa wa anamwane a Adamu.​—1 aKorinto 15:21, 22.

12. Xeeni Yesu ohalaka ohaaxiwa vanceene?

¹² Biibiliya onnihimya ohaawa wa Yesu ohinatthi okhwa. Maana onihimya wira aahiwaxuliwa vanci, okhomeliwa vamwirini wa nihaaxeryo, ni ovilela wiiviwa mootakhala. (Yohani 19:1, 16-18, 30) Xeeni Yesu ohalaka ohaaxiwa vanceene? Mwaha woowi Satana aahimyale wira khuuvo pinaatamu aarowa ororomeleya wa Muluku eehereriwa vanceene. Nto ororomeleya wa Yesu waahooniherya wira mutthu oomalela aahiiso oohittheka anwerya ororomeleya wa Muluku hata ohaaxiwaka vanceene. Tthiri Yehova aahihakalala oweha ororomeleya wa Yesu!​—Miruku 27:11; nwehe Enoota 15.

13. Yowoopola eliveriwe sai?

¹³ Yowoopola eliveriwe sai? Yesu aahinvaha Tiithi awe esisapo ya okumi awe. Nihiku 14 a Nisani, mwaakha wa 33 a kalendaario aaYuda, Yehova aaheemererya wira awanani a Yesu amwiive. (aHéberi 10:10) Nuuvira mahiku mararu, Yehova aahimuhihimuxa Yesu ni omuttikiherya okumi womunepani. Nuumala-vo, aahitthikela wiirimu ori Tiithi awe, Yesu aahinvahererya Yehova esisapo ya okumi awe wooloka ntoko mukuttho wowoopola. (aHéberi 9:24) Okhala wira vano yowoopola yooliviwa, nto nookhalana eparakha ya otaphuliwa mwa yoottheka ni okhwa.​—Mmusome aRoma 3:23, 24.

14, 15. Nihaana opaka exeeni wira nileveleliwe soottheka sahu?

¹⁴ Nenna-va hiyo ninnittottela mureerelo yoovaha ela yuulupalexa ya Muluku. Nrowe niwehe moota ninttottela ahu mureerelo olelo-va ni muhoolo.

¹⁵ Oleveleliwa soottheka. Vannivila okathi wotheene opaka itthu sooloka mwaha wa etampi. Otheene ahu ninnivonya, ikwaha sikina ninnilavula aahiiso opaka etthu yoohiloka. (aKolosi 1:13, 14) Vano ninrowa oleveleliwa sai? Nihaana ottharuwa mwekeekhai etthu yoohiloka epanke ahu, ni mowiiyeviha onvekela Yehova wira onlevelele. Tthiri niroromeleke wira Yehova ononlevelela.​—1 Yohani 1:8, 9.

16. Nipake exeeni wira nikhalane yowuupuxerya ya murima yooloka?

¹⁶ Okhalana yowuupuxerya ya murima yooloka. Akhala wira yowuupuxerya ya murima ahu enninleela wira noopaka etthu yoohiloka, waaniheryasa ninniivaha nthowa, nuupuwelaka wira khanrina nlipelelo ni ohiivaha efaita. Masi nihuupuweleke siiso. Maana nanvekela Yehova, nihaana okupali wira onooniwiriyana ni onilevelela. (aHéberi 9:13, 14) Yehova oniphavela wira nimuleeleke mixankiho ni soovonya sahu. (aHéberi 4:14-16) Nto, hiyo nnookhalana murettele ni Muluku.

17. Mareeliho xeeni aniweryaneya mwaha wa Yesu onikhwela?

¹⁷ Okhalana nlipelelo na okumi woohimala. Biibiliya onihimya so: “Ale anvarela muteko etampi anniliviwa n’ukhwa: vano eparakha Muluku ennivahawe mahala enniphwanyiha ekumi ehinimala, mwa Yesu Kristu Pwiy’ahu”. (aRoma 6:23) Okhala wira Yesu oonikhwela, nto nnoowerya okhala mahiku otheene, okhalana ekumi  yooloka ni yoohakalaliha. (Wisupulula 21:3, 4) Nto nipake exeeni wira naakhele mareeliho awo?

18. Ninsuwela sai wira Yehova onniniphenta?

¹⁸ Niireke munnuupuwela moota mutthu onihakalala awe avahiwa etthu yooreera? Nto yowoopola yoovaha yuulupalexa enivikana sotheene, ni nihaana omuxukhurela vanceene Yehova onivanhe. Yohani 3:16 onihimya so: “Muluku ohaphentexa atthu mpakha wavaha Mwan’awe mmosene”. Tthiri Yehova ooniphenta vanceene mpakha onivaha Yesu, Mwanawe a vameekhaawe. Nave noosuwela wira Yesu onniniphenta, maana aaheemererya onikhwela. (Yohani 15:13) Tivonto, yowoopola ehaana onikupaliha wira Yehova ni Yesu anniniphenta tthiri.​—aGalasia 2:20.

19, 20. (a) Ninrowa okhala sai mpatthani a Yehova? (b) Munrowa wooniherya sai wira munnaamini mukuttho wowoopola wa Yesu?

¹⁹ Nto nyuwo muhiixutta voohimya sa ophenta wuulupale wa Muluku, vano munrowa okhala sai mpatthani awe? Masi khivaniweryaneya omphenta mutthu ohinimusuwela ahu. Yohani 17:3 onihimya wira hiyo nnoowerya omusuwela Yehova. Vaavo vanimusuwela anyu, omphenta wanyu onoolipa vanci, ni munrowa ophavelaka omuhakalaliha, ni okhala mpatthani awe. Tivonto, nvikaniheke wiixutta voohimya sa Yehova mmusomaka Biibiliya.​—1 Yohani 5:3.

²⁰ Mwaaminiki mukuttho wowoopola wa Yesu. Biibiliya onihimya wira: “Ole onimwamini Mwana òkhalana ekumi yohimala”. (Yohani 3:36) Onitaphulela exeeni omwaamini Yesu? Onitaphulela opaka ele Yesu enniruma awe. (Yohani 13:15) Khoniphiyerya ohimya wira kinnimwaamini Yesu. Masi weemererya yowoopola onitaphulela  ovara miteko sinooniherya waamini. Yakobo 2:26, onihimya wira: “Wamini ohirina miteko sorera ti wokhwa”.

21, 22. (a) Xeeni vanitthuneya ahu orowa Wuupuwelela okhwa wa Kristu khuta mwaakha? (b) Ninrowa othokorerya exeeni Muru 6 ni 7?

²¹ Wuupuwelela okhwa wa Kristu. Makaaripi wa nihiku nne Yesu ohinatthi okhwa, aahihimya wira nihaana wuupuwelela okhwa wawe. Hiyo ninnuupuwela khula mwaakha, nave niira nna ninnihimmwa-tho okhala Wuupuwelela aahiiso “Yolya y’Apwiya”. (1 aKorinto 11:20; Matheyo 26:26-28) Yesu oniphavela wira nuupuweleke wira oovaha okumi awe wooloka wira onoopole. Yesu aahimmye so: “Mwireke iya, mukupuwelaka miyo”. (Mmusome Luka 22:19.) Orowa Wuupuwelela okhwa wa Yesu, munooniherya wira munnivaha efaita yowoopola ni ophenta wuulupale Yehova ni Yesu orina aya wa hiyo.​—Nwehe Enoota 16.

²² Yowoopola ti etthu yuulupalexa Muluku enivahale awe. (2 aKorinto 9:14, 15) Nave-tho, yowoopola ela enrowa waakhaliherya atthu imilyau sinceene akhwiiye. Muru 6 ni 7 ninrowa othokorerya moota atthu awo anittottela aya mureerelo.