TOKO 5
Vidipan̈avotan̈a Kado Farany Tsara Baka amy Zan̈ahary
1, 2. a) Kado karakory ten̈a hankasitrahinao mare? b) Nan̈ino vidipan̈avotan̈a io kado farany maventy baka amy Zan̈ahary?
INO ma kado farany tsara nazonao? Izikoa kado io mamparavoravo anao na koa ten̈a ilainao ankitin̈y, anao ten̈a hankasitraka izio mare.
2 Amy kado jiaby namiany Jehovah atsika, misy araiky zay ten̈a ilaintsika. Izio kado farany maventy baka amy Zan̈ahary. Hianarantsika amy toko ty fa Jehovah nan̈iraka Jesosy Kristy Zanany, baka atsika mety ho velon̈o tsisy farany. (Vakia Matio 20:28.) Jehovah nandefa Jesosy tambony tany teto natao vidipan̈avotan̈a. Zen̈y ahitan̈a fa Jehovah ten̈a tia atsika ankitin̈y.
INO MA VIDIPAN̈AVOTAN̈A IO?
3. Nan̈ino ma olo mety maty?
3 Izio fomba araiky nataony Jehovah han̈avotan̈a olo amy fahotan̈a ndreky fahafatesan̈a. (Efesianina 1:7) Baka haintsika nan̈ino vidipan̈avotan̈a io ilain̈y, atsika hizaha raha nandalo tamy zaridain̈y Edena tan̈y. Nanota olobentsika voanalohany, Adama ndreky Eva. Zen̈y nahavy iro naty. Mety maty koa atsika, fotony nandova fahotan̈a baka taminy Adama ndreky Eva io.—Zahava Fan̈azavan̈a 9.
4. Azovy Adama zen̈y? Karakory izy tamy mbala tsendriky nanota?
4 Jehovah koa fa niasa Adama, lelahy voanalohany, namiany Jehovah raha ten̈a tsara izy. Adama namiany fiain̈ana lavorary, baka io sain̈y ndreky vatan̈a lavorary. Izy tsy tokony harary, tsy tokony hahaihatoe, ndreky tsy tokony hofoaty zen̈y foeky. Jehovah niasa izy, ke efa nira babany niteraka izy in̈y. (Lioka 3:38) Jehovah nikoran̈a matetiky taminy Adama. Zan̈ahary nivolan̈a mazava taminany raha tiany ndreky tsy tiany. Namiany asa mahafapo koa izy.—Genesisy 1:28-30; 2:16, 17.
5. Baiboly mivolan̈a fa Adama niasain̈y “mira sorany Zan̈ahary.” Ino dikanizen̈y?
5 Adama niasain̈y “mira sorany Zan̈ahary.” (Genesisy 1:27) Jehovah nan̈amia izy toetry mira ninany, an̈isanizen̈y fitiavan̈a, fahendrena, fitiavan̈a ny rariny, ndreky angovo. Adama io tsy mira papoety, fotony izy nataony Zan̈ahary nahavita nifidy ndreky nandiniky, ke afaka nan̈avaka ny tsara ndreky ratsy. Izikoa Adama nifidy han̈araka volan̈a Zan̈ahary, izy hotrizay mbala niain̈y tsisy farany tamy Paradisa tao fo.
6. Nan̈ano karakory Adama koa fa tsy nan̈araka volan̈a Zan̈ahary? Nan̈ano karakory koa atsika taranakanany?
6 Nivangainy Adama lafo tsy fan̈arahany volan̈a Zan̈ahary, ke izy tsy maintsy hofoaty. Tapaka fihavan̈andro ndreky Jehovah, izy efa tsy lavorary eky, baka io koa niroasin̈y niala tamy Paradisa tao. (Genesisy 3:17-19) Adama ndreky Eva kinia nifidy tsy nan̈araka volan̈a Zan̈ahary, ke iro efa tsy avotro eky. Baka taminy Adama “nidirany fahotan̈a tamy zao tontolo zao. Baka tamy fahotan̈a io nidirany fahafatesan̈a, ke fahafatesan̈a io nahazo olo jiaby, fotony iro jiaby samy efa nanota aby.” (Romanina 5:12) Adama koa fa nanota, izy “nandafo” ain̈inany ndreky nintsika nanjary andevony fahotan̈a ndreky fahafatesan̈a. (Romanina 7:14) Mbala ho avotro edy atsika va? Ia.
7, 8. Ino ma vidipan̈avotan̈a io?
7 Ino ma vidipan̈avotan̈a io? Mahazo aroe dikanizio. Voanalohany, vidipan̈avotan̈a io vola hifain̈y han̈avotan̈a olo, na vola han̈ifan̈a raha efa nintena taloha. Faharoe, izio koa mira vola hifain̈y, izikoa nandrobaka rahanolo.
8 Tsisy olombelon̈o mahavita man̈adoso atsika amy fahotan̈a ndreky fahafatesan̈a nilovaintsika baka taminy Adama. Jehovah nan̈ano raha han̈avotan̈a atsika. Atsika izioty hianatra asany vidipan̈avotan̈a io ndreky hatsaran̈a azontsika baka amizio.
JEHOVAH NAN̈AMIA VIDIPAN̈AVOTAN̈A?
9. Vidipan̈avotan̈a karakory ma nila nifain̈y?
9 Tsisy olo mahavoaefa ain̈y lavorary karaha niny Adama tamy voanalohany in̈y. Nan̈ino ma? Fotony atsika jiaby samy tsy lavorary aby. (Salamo 49:7, 8) Olo lavorary fo mahavoaefa vidipan̈avotan̈a io. Zen̈y ivolan̈ana izio “vidipan̈avotan̈a mifandanja.” (1 Timoty 2:6) Vidipan̈avotan̈a io mila mifandanja amy fiain̈ana nariany Adama.
10. Akory nataony Jehovah nan̈amia vidipan̈avotan̈a?
10 Akory nataony Jehovah nan̈amia vidipan̈avotan̈a? Nalefany tambony tany teto Zanany ten̈a tiany. Jesosy Zanany io voanalohany raha niasainy. (1 Jaona 4:9, 10) Jesosy von̈ono hiala Babany ndreky hiala tandan̈itry tan̈y. (Filipianina 2:7) Jesosy nafindrany Jehovah tambony tany teto, ke Jesosy koa fa teraka, ain̈inany lavorary, tsisy fahotan̈a.—Lioka 1:35.
Jehovah nan̈amia Zanany ten̈a tiany natao vidipan̈avotan̈a hamonjian̈a atsika
11. Akory ahavitany lelahy araiky han̈avotro olo jiaby?
11 Adama koa fa tsy nan̈araka volan̈a Jehovah, izy tsy lavorary eky. Mbala misy olo hafa koa ma afaka man̈avotro taranaka Adama? Ia. (Vakia Romanina 5:19.) Jesosy tsiary nanota. Izy nahafoe ain̈inany lavorary atao vidipan̈avotan̈a. (1 Korintianina 15:45) Ain̈inany lavorary io mahafaka fahafatesan̈a manjaka amy taranaka Adama.—1 Korintianina 15:21, 22.
12. Nan̈ino ma Jesosy nijaly mare?
12 Baiboly mikoran̈a raha niaretany Jesosy talohany nifatesany. Nikaravasin̈y mare izy, nifantsihin̈y taminy hazofijalian̈a, ke niaritry narary firaka izy nafaka fahin̈ana. (Jaona 19:1, 16-18, 30) Nan̈ino Jesosy nijaly mare karaha zen̈y? Fotony Satana nivolan̈a fa tsisy olombelon̈o hahavita tsy hivadiky amy Zan̈ahary, izikoa tojo raha mitsapa finoan̈a mare. Naboakany Jesosy tamy fiain̈ananany fa olo lavorary mahavita tsy mivadiky amy Zan̈ahary, nata an̈atiny fitsapan̈a farany mare. Aleva onon̈o akory haravoan̈any Jehovah nahita Jesosy tsy nivadiky!—Ohabolana 27:11; zahava Fan̈azavan̈a 15.
13. Akory nan̈ifan̈a vidipan̈avotan̈a io?
13 Akory amy zay nan̈ifan̈a vidipan̈avotan̈a io? Jesosy nan̈amia Jehovah vidiny ain̈inany lavorary in̈y. Tamy 14 Nisana, taon̈o 33 amy kalandrie jiosy, nambelany Jehovah izy nivonenolo tsy tia izy aby io. (Hebreo 10:10) Nafaka telo andra, izy nivilominy Jehovah. Efa tsy olombelon̈o eky izy, fa nanjary anjely. Izy baka tio nimpody tamy Babany tandan̈itry tan̈y, nitondra vidiny ain̈inany lavorary in̈y. (Hebreo 9:24) Baka amy zen̈y mahavy atsika mety havotan̈a amy fahotan̈a ndreky fahafatesan̈a.—Vakia Romanina 3:23, 24.
HATSARAN̈A AZONAO BAKA AMY VIDIPAN̈AVOTAN̈A
14, 15. Ino raha mila ataontsika, baka atsika voafafa heloko?
14 Efa mahazo hatsaran̈a baka amy vidipan̈avotan̈a io atsika. Hizahavantsika ino hatsaran̈a ho azontsika io rango izioty ndreky aminy amaray an̈y.
15 Ho voafafa helokontsika. Sarotro man̈ano ny marin̈y isanandra. Atsika man̈ano hadisovan̈a, baka io koa mety ho tafivolan̈a ndreky tafan̈ano raha tsy mety. (Kolosianina 1:13, 14) Akory hahavy helokontsika ho voafafa? Atsika mila manen̈iny mare amy raha tsy mety nataontsika, baka io mila manetry ten̈a mangataka Jehovah han̈ambela hadisovan̈antsika. Atsika koa man̈ano zen̈y, atsika matoky tsarabe fa ho voafafa heloko.—1 Jaona 1:8, 9.
16. Ino raha mila ataontsika, baka milamin̈y eritreritrintsika?
16 Milamin̈y eritreritrintsika. Izikoa menimenintsika mampatsiaro raha tsy mety nataontsika, atsika man̈ameloten̈a, ndreky mety mahatsiaro ho tsisy fan̈antinan̈a ndreky tsisy dikany. Tsisy raha tokony hampalemy troko atsika. Atsika koa mangataka Jehovah han̈ambela hadisovan̈antsika, matoky atsika fa izy hitandren̈y atsika ndreky hamafa helokontsika. (Hebreo 9:13, 14) Tiany Jehovah ambarantsika izy raha jiaby manahiran̈a atsika ndreky raha mora mandavo atsika. (Hebreo 4:14-16) Atsika koa man̈ano zen̈y, atsika mety hihavan̈a amy Zan̈ahary.
17. Ino aby hatsaran̈a mety ho azontsika baka tamy nifatesany Jesosy?
17 Man̈anten̈a hiain̈y tsisy farany atsika. “Fahafatesan̈a valiny fahotan̈a, fa fiain̈ana tsisy farany kado amiany Zan̈ahary atsika aminy an̈arany Kristy Jesosy Tompontsika.” (Romanina 6:23) Hiain̈y tsisy farany ndreky tsy harary foeky atsika, fotony Jesosy naty han̈avotan̈a atsika. (Apokalypsy 21:3, 4) Ke ino raha mila ataontsika azahoan̈a hatsaran̈a aby io?
HIKENAO MA VIDIPAN̈AVOTAN̈A IO?
18. Akory ahaizantsika fa Jehovah tia atsika?
18 Izikoa misy olo man̈amia anao kado tsara, misora ravoravo mare anao. Atsika ten̈a tokony hankasitraka Jehovah, fotony vidipan̈avotan̈a io kado farany tsara. Amy Jaona 3:16 mivolan̈a fa “be ankitin̈y fitiavany Zan̈ahary zao tontolo zao, ke namiany Zanany lahitokana.” Jesosy koa ten̈a tia atsika, fotony izy nan̈eky hofoaty. (Jaona 15:13) Baka amy vidipan̈avotan̈a io mahavy anao hatoky tsarabe fa Jehovah ndreky Jesosy ten̈a tia anao ankitin̈y.—Galatianina 2:20.
Arakaraka ahaizantsika Jehovah hampitombo fitiavantsika izy ke atsika hanjary kamaradiny
19, 20. a) Karakory ataonao baka manjary kamaradiny Jehovah? b) Akory an̈aboahanao fa ikenao soron̈o nataony Jesosy in̈y?
19 Efa hainao izioty fa Jehovah io ten̈a tia atsika. Ino raha tokony hataonao, izikoa tianao hanjary kamaradiny? Sarotro amintsika ho tia olo tsy haintsika. Zen̈y mahavy amy Jaona 17:3 ao mivolan̈a fa atsika mila mianatra momba Jehovah. Anao koa man̈ano zen̈y, hitombo fitiavanao Jehovah, anao man̈iry han̈ano raha mamparavoravo izy, baka io koa anao hanjary kamaradiny. Ke tohiza fo fianaranao Baiboly, baka anao mahay Jehovah.—1 Jaona 5:3.
20 Ikia soron̈o nataony Jesosy. Karaha ty koran̈iny Baiboly: “Zay olo mino Zanaka io manan̈a fiain̈ana tsisy farany.” (Jaona 3:36) Karakory ma olo mino Jesosy zen̈y? Man̈ano raha nirahiny hatao. (Jaona 13:15) Izikoa mivolan̈a mino Jesosy fo, tsy mahampy. Karaha ty koran̈iny Jakoba 2:26: “Finoan̈a koa tsy aboaka amy raha atao, maty.”
21, 22. a) Nan̈ino isaka taon̈o atsika tokony han̈aton̈o Fahatsiarovan̈a nifatesany Kristy? b) Ino raha ho hitantsika amy Toko faha-6 ndreky faha-7?
21 Man̈aton̈a Fahatsiarovan̈a nifatesany Kristy. Alin̈y talohany Jesosy hofoaty, izy nampianatra fa atsika mila mahatsiaro andra nifatesany. Isaka taon̈o atsika mankalaza izio. Fahatsiarovan̈a na koa “Sakafo Harivany Tompo” ikahian̈a izio. (1 Korintianina 11:20; Matio 26:26-28) Tiany Jesosy atsika hahatsiaro fa izy nan̈amia ain̈inany lavorary natao vidipan̈avotan̈a, hamonjian̈a atsika. Karaha ty nivolan̈iny: “Ataova fo ty hatsiarovanaro zaho.” (Vakia Lioka 22:19.) Mankasitraka vidipan̈avotan̈a ndreky fitiavany Jehovah ndreky Jesosy atsika io anao, izikoa man̈aton̈o Fahatsiarovan̈a.—Zahava Fan̈azavan̈a 16.
22 Vidipan̈avotan̈a kado farany tsara nazontsika. (2 Korintianina 9:14, 15) Olo maty antapitrisany koa hahazo hatsaran̈a baka amizio. Amy Toko faha-6 ndreky faha-7 ahitantsika karakory hampamety zen̈y.
