1, 2. (a) Ana chichi chachikusatendekasya kuti mtuka uŵe ŵakusosekwa kwa wawojo? (b) Ligongo chichi kuwombola kuli mtuka wakusosekwa mnope waŵatupele Mlungu?

ANA pana mtuka uliwose wambone mnope waŵapochele wakusawukumbuchila? Kuti mtuka uwe wakusosekwa, ngayikwegamila kuti uwe wakudula. Mtuka ukusaŵa wakusosekwa naga akusasangalalaga nawo soni naga uli chindu chakusosekwa mnope kwa wawojo.

² Pa mituka josope jatupele Mlungu pana mtuka umo wawuli wakusosekwa mnope kwa m’weji. Mu mtwe awuno chitulijiganye kuti Yehofa ŵamtumisye Mwanagwe, Yesu Klistu pachilambo chapasi kuti tupakombole kutama ni umi wangamala. (Aŵalanje Mateyu 20:28.) Yehofa ŵalosisye kuti akusatunonyela mwakumtumisya Yesu pachilambo chapasi kukwawombola ŵandu.

3. Ana ligongo chichi ŵandu akusawaga?

³ Kuwombola kuli litala lyaŵalikamulichisye masengo Yehofa pakwagopola ŵandu ku ulemwa ni chiwa. (Aefeso 1:7) Kuti tupikanichisye ligongo lyakwe kuli kwakusosekwa kwa m’weji, tukusosekwa kumanyilila kaje yayatendekwe mumgunda wa Edeni yaka masawusande yipiteyo. Pandaŵijo achinangolo ŵetu ŵandanda, Adamu ni Hawa ŵalemwisye. Yakuyichisya ya ulemwawu, yaliji yakuti jemanjajo ŵawile. M’wejisoni tukusawaga ligongo lyakuti twajigalile ulemwa kwa Adamu ni Hawa.—Alole Maloŵe Gakumbesi 9.

4. Ana Adamu ŵaliji ŵani, soni Yehofa ŵampele chichi?

⁴ Yehofa ali ampanganyisye mundu jwandanda, Adamu,  ŵampele chindu chakusosekwa mnope. Yehofa ŵampele Adamu umi wamlama. Yayikugopolela kuti ŵakwete nganisyo soni chilu chamlama. Jwalakwe ngamkanalwala, kalambala, soni kuwa. Ligongo lyakuti Yehofa ni juŵampanganyisye Adamu, jwalakwe ŵaliji mpela mtatigwe. (Luka 3:38) Yehofa ŵaŵechetega najo ndaŵi jilijose. Mlungu ŵamsalile Adamu yaŵasosekwaga kuti atendeje soni ŵampele masengo gakusangalasya.—Genesesi 1:28-30; 2:16, 17.

5. Ana Baibulo jikusagopolela chichi pajikuti Adamu ŵampanganyisye “m’chiwanichisyo cha Mlungu”?

⁵ Adamu ŵapanganyidwe “m’chiwanichisyo cha Mlungu.” (Genesesi 1:27) Yeleyi yigopolela kuti Yehofa ŵampele Adamu ndamo syakulandana ni ndamo syakwe. Ndamo syelesi sikupwatikapo, chinonyelo, lunda, chilungamo, soni machili. Jwalakwe ŵampelesoni upile wakuti alisagulileje yakutenda. Adamu nganaŵa mpela makina gakuti gasosekwaga mundu kugajendesya. Mlungu ŵampanganyisye Adamu kuti akomboleje kusagula jika kutenda yambone kapena yakusakala. Adamu akapikanile Mlungu, nikuti akatemi ni umi wangamala m’Paladaiso.

6. Ana Adamu ŵajasile chichi ligongo lyakuti nganampikanila Mlungu? Soni Yeleyi yikusatukwayaga chatuli m’weji?

⁶ Nambo Adamu paŵalemwisye, ŵapochele chilango cha chiwa. Pelepatu yindu yamsokonechele mnope. Jwalakwe ŵajasile unasi wapajika ni Mlungu, umi wamlama, soni malo gakusalala ga paladaiso. (Genesesi 3:17-19) Ligongo lyakuti Adamu ni Hawa ŵasagwile kuti akapikanila Mlungu, jemanjaji nganakolasoni chembecheyo chambone kusogolo. Yakuyichisya yakwe yaliji yakuti, “ulemwa wajinjile m’chilambo kupitila mwa mundu jumo, soni chiwa kupitila mu ulemwa, chiwacho chawandile kwa ŵandu ligongo wosope ŵalemwisye.” (Aloma 5:12) Adamu paŵalemwisye ‘ŵalisumisye’ msyene soni wosopewe ku ukapolo wa ulemwa soni chiwa. (Aloma 7:14) Ana nikuti tukwete chembecheyo chilichose? Elo, tukwete.

7, 8. Ana kuwombola kuli kutenda chichi?

 ⁷ Ana kuwombola kuli kutenda chichi? Kuwombola mpaka kugopolelele yindu yiŵili. Chandanda, mpaka kugopolele mtengo wawukusapelechedwa pakusaka kumgopola mundu. Chaŵili, kuwombola mpaka kugopolelesoni kulipila mtengo mwakamulana ndendende ni mwachaŵelele chindu chachijonasiche.

⁸ Kulemwa kwa Adamu, kwatendekasisye kuti tuweje. Pangali mundu jwangali umlama jwampaka akombole kulipila yindu yekulungwa yaŵajonasileyi. Nambo Yehofa ŵapeleche litala lyakutugopola ku ulemwa soni chiwa. Kwende tulijiganye mwakukusakamulila masengo kuwombola soni kusosekwa kwakwe kwa m’weji.

9. Ana kuwombola kwasosekwaga kutendedwa chamtuli?

⁹ M’weji ngaŵa mkupakombola kulipila umi wamlama waŵajasile Adamu. Ana ligongo chichi? Ligongo lyakuti wosopewe tuli ŵangali umlama. (Salimo 49:7, 8) Kuti Mlungu atuwombole pasosekwaga mundu jwine jwamlama. Lyeleli ni ligongo lyakwe kukusakolanjidwa kuti “kuwombola kwakwilana.” (1 Timoteo 2:6) Pakuŵa Adamu jwaliji jwamlama, kuwombola kwasosekwaga kutendedwa ni mundu jwamlama.

10. Ana Yehofa ŵatuwombwele chamtuli?

¹⁰ Ana Yehofa ŵatuwombwele chamtuli? Yehofa ŵamtumisye Mwanagwe jwakunonyelwa pachilambo chapasi. Mwanache jweleju, jwaliji jwandanda kupanganyidwa pa yindu yosope yaŵapanganyisye Mlungu. (1 Yohane 4:9, 10) Yesu jwaliji jwakusachilila kwaleka Atatigwe soni kutyoka kwinani kuŵatamaga. (Afilipi 2:7) Yehofa ŵasamichisye umi wa Yesu kutyoka kwinani nikuwuŵika m’chitumbo mwa Maliya pachilambo chapasi. Jwalakwe jwapagwile jwangali ulemwa.—Luka 1:35.

11. Ana yakomboleche chamtuli kuti mundu jumo ŵawombole ŵandu wosope?

 ¹¹ Mundu jwandanda Adamu paŵalemwisye, ŵajasile umi wamlama wa ŵandu wosope. Nambo ana mundu jwine akakombwele kwatyochesya chiwa ŵanache ŵa Adamu? Elo. (Aŵalanje Aloma 5:19.) Yesu jwanganalemwa chilichose, ŵapeleche umi wakwe wamlama kuti atuwombole. (1 Akolinto 15:45) Umi wakwe wamlama ni waŵaliji wakuti wuchikamula masengo pakutyosya chiwa pasikati pa ŵanache wa Adamu.—1 Akolinto 15:21, 22.

12. Ana ligongo chichi Yesu jwalasile mnope?

¹² Baibulo jikusatusalila muŵalajile Yesu mkanawe. Jwalakwe ŵamkwapwile mwangalwe, ŵamkomele pachitela chakulagachisya, soni ŵalasile ni chiwa chakupweteka mnope. (Yohane 19:1, 16-18, 30) Ana ligongo chichi Yesu ŵalasile mnope chamti m’yoyo? Ligongo lyakuti Satana ŵasasile kuti pangali mundu jwampaka akombole kuŵa jwakulupichika kwa Mlungu ali asimene ni yakusawusya yakogoya mnope. Nambo Yesu ŵalosisye kuti yili yakomboleka mundu jwamlama kuŵa jwakulupichika kwa Mlungu atamose ali asimene ni yakusawusya yakogoya mnope. Pelepatu Yehofa jwasangalele mnope ni Yesu.—Misyungu 27:11; alole Maloŵe Gakumbesi 15.

13. Ana kuwombola kwapwatikagapo chichi?

¹³ Ana kuwombola kwapwatikagapo chichi? Palisiku lya 14 lya mwesi wele Ayuda wawukolangaga kuti Nisani, m’chaka cha 33, Yehofa ŵakundile kuti Yesu awulajidwe ni adani ŵakwe. (Ahebeli 10:10) Nambo pali pamasile masiku gatatu, Yehofa ŵamjimwisye Yesu ku ŵawe. Jwalakwe nganajimuka ni chilu chaumundu, nambo chilu chausimu. Pambesi pakwe, jwalakwe ŵawujile kwinani. Kweleko ŵawonechele pameso pa Mlungu mwamti Mlungujo ŵajitichisye yaŵatesile Yesu pakupeleka umi wakwe mpela mbopesi. (Ahebeli 9:24) Ligongo lyakuti Mlungu ŵatuwombwele, m’weji tukwete upile wakugopoledwa ku ulemwa soni chiwa.—Aŵalanje Aloma 3:23, 24.

14, 15. Ana tukusosekwa kutenda chichi kuti Yehofa atukululuchile yakulemwa yetu?

¹⁴ Mtuka wa Mlunguwu uli wakamuchisya mnope. Kwende tulole mwampaka utukamuchisye lelojino soni msogolo.

¹⁵ Yakulemwa yetu yikusakululuchidwa. Yikusaŵaga yakusawusya kuti tutendeje yambone ndaŵi syosope. Tukusalemwaga, soni ndaŵi sine tukusaŵecheta soni kutenda yindu yangaŵajilwa. (Akolose 1:13, 14) Ana mpaka tutende chichi kuti Mlungu atukululuchile yakulemwa yetu? Tukusosekwa kulitendela chanasa pa yindu yakulemwa yatutesile, soni mwakulinandiya tum’ŵende Yehofa kuti atukululuchile. Kutenda yeleyi kuchitukamuchisya kulupilila kuti Yehofa atukululuchile.—1 Yohane 1:8, 9.

16. Ana mpaka tutende chichi kuti tukole chikumbumtima chambone?

¹⁶ Mpaka tukole chikumbumtima chambone. Chikumbumtima chetu pachitusalile kuti tutesile chakulemwa, tukusalijimba magambo, soni mpaka tuliwoneje kuŵa ŵangali sogolo jambone kapena kuliwona kuŵa mundu jwangaŵajilwa. Nambo ngakusosekwa kwasa mtima. Naga tum’ŵendile Yehofa kuti atukululuchile, tukakayichilaga kuti jwalakwe atupikene soni chatukululuchile. (Ahebeli 9:13, 14) Yehofa akusasaka kuti tumsalileje chakusawusya chetu chilichose soni yakulepela yetu. (Ahebeli 4:14-16) Yakuyichisya yakwe yichiŵa yakuti, tuchiŵa pa mtendele ni Mlungu.

17. Ana chiwa cha Yesu chichitukamuchisya kupata yambone yapi?

¹⁷ Tukwete chembecheyo cha umi wangamala. “Ligongo malipilo ga ulemwa gali chiwa, nambo mtuka ŵakusapeleka Mlungu uli umi wangamala kupitila mwa Ambuje ŵetu Yesu Klistu.” (Aloma 6:23) Ligongo lyakuti Yesu ŵatuwilile, yichiŵa yakomboleka kutama ni umi wangamala soni umi wamlama. (Chiwunukuko 21:3, 4) Nambo ana mpaka tutende chichi kuti tupochele yeleyi?

18. Ana tukusamanyilila chamtuli kuti Yehofa akusatunonyela?

¹⁸ Aganisye mwakusapikanila mumtima mundu jwine paŵapele mtuka ŵakusangalasya? Kuwombola kuli mtuka wakusosekwa mnope pa mituka jampaka tupochele. M’yoyo tukusosekwa kum’yamichilaga mnope Yehofa ligongo lyakutupa mtukawu. Lilemba lya Yohane 3 ndime 16 likusati, “Mlungu ŵachinonyele mnope chilambo chapasi mwati ŵapeleche Mwanagwe jwakupagwa jika.” Yisyene kuti Yehofa akusatunonyela mnope, mwati ŵayikene pakupeleka Mwanagwe jwakusosekwa mnope jwali Yesu. Tukumanyililasoni kuti Yesu akusatunonyela ligongo lyakuti jwalakwe jwaliji jwakusachilila kutuwila. (Yohane 15:13) Yeleyi yikusatusimichisya kuti Yehofa soni Yesu akusatunonyela yisyesyene.—Agalatiya 2:20.

19, 20. (a) Ana mpaka atende chichi kuti aŵe mjakwe jwa Yehofa? (b) Ana mpaka alosye chamtuli kuti akusayamichila yaŵatesile Yesu?

¹⁹ Sambano pakuŵa alijiganyisye yakwamba chinonyelo chekulungwa chaŵatulosisye Yehofa, ana wawojo mpaka atende chichi kuti aŵe mjakwe? Yili yakusawusya kumnonyela mundu jwakuti ngakummanyilila. Lilemba lya Yohane 17 ndime 3 likusati yili yakomboleka kummanyilila Yehofa. Pakummanyilila Yehofa, nikuti chachimnonyelaga mnope. Nambosoni chachiŵa ŵakusachilila kutenda yindu yakumsangalasya. Pelepo ni pachachiŵa mjakwe jwa Yehofa. M’yoyo ajendelechele kulijiganya ya Yehofa pakamulichisya masengo Baibulo.—1 Yohane 5:3.

²⁰ Ayamichileje mtuka waŵapeleche Yesu. Baibulo jikusati, “Jwalijose jwakumkulupilila Mwanachejo akwete umi wangamala.” (Yohane 3:36) Ana kumkulupilila mwanachejo kukusagopolela chichi? Kukugopolela kutendaga yindu yaŵatujiganyisye Yesu. (Yohane 13:15) Yili yangakomboleka kwamba kusala kuti tukusamkulupilila Yesu. Kuti tulosye kuti tukusayamichilaga yaŵatesile Yesu, tukusasosekwa kutenda  yindu yine yakwayana ni chikulupi chetu. Pa Yakobo 2 ndime ja 26, tukusaŵalanga kuti, “chikulupi changali yitendo chili chewe.”

21, 22. (a) Ana ligongo chichi tukusosekwa kusimanikwaga pa chikumbuchilo cha chiwa cha Yesu chaka chilichose? (b) Ana mu Mtwe 6 ni 7 tuchilola yamtuli?

²¹ Asimanikweje pa chikumbuchilo cha chiwa cha Klistu. Yesu mkanawe, ŵasasile kuti tukusosekwa kukumbuchilaga chiwa chakwe. Tukusatendaga yeleyi chaka chilichose. Chakutendekwachi chikusakolanjidwa kuti chikumbuchilo kapena “chakulya chaligulo cha Ambuje.” (1 Akolinto 11:20; Mateyu 26:26-28) Yesu akusasaka kuti tukumbuchileje kuti jwalakwe ŵapeleche umi wakwe wamlama pakutuwombola m’weji. Jwalakwe ŵatite, “Ajendelechele kutenda yeleyi pakungumbuchila.” (Aŵalanje Luka 22:19.) Pakusimanikwa pa chakutendekwachi, akusalosyaga kuti akusakumbuchila chinonyelo chekulungwa chaŵatulosisye Yehofa soni Yesu.—Alole Maloŵe Gakumbesi 16.

²² Kuwombola kuli mtuka wakusosekwa mnope kupunda mituka josope jwatwapochele. (2 Akolinto 9:14, 15) Mtukawu uchakamuchisyasoni ŵandu ŵajinji ŵaŵawile. Mtwe 6 soni 7 tuchilola muyichikombolechela yeleyi.