KHAYILU mbi yilutidi luvalu ngyewu ma tambula? Khayilu yisintombila ko thalu yinangama mwingi yiba luvalu. Vayi wulenda tuba ti luvalu yidi va meso maku, ti mayangi yi kutwadisa voti yawu wube tombanga.

1, 2. (a) Mbi bimvanga khayilu kuba luvalu va meso maku? (b) Kibila mbi khudulu yididi khayilu yilutidi Nzambi kavana?

² Mu mikhayilu myoso Nzambi kama tuvananga, vadi yilutidi nkinza mu befu. Yawu khayilu yilutidi mu batu. Dedi bu twanlogukila mu kapu ayiyi, Yave wufila Mwan’andi Yesu Klisto, mwingi tubaka luzingu lu mvu ka mvu. (Tanga Matai 20:28.) Bo kafila Yesu va ntoto mu kibila kitu, Yave wumonisa ti wutuzolanga beni.

3. Kibila mbi batu bamfwilanga?

³ Khudulu phila Yave kakudila batu va kivika ki masumu ayi ki lufwa. (Efeso 1:7) Mwingi tuvisa buboti kibila tuntombila khudulu, tufweti yindula mamonika va thonono ku lumbu lu Edeni. Matata mitu ma theti Adami ayi Eva basumuka. Mu kibila ki disumu beni, bawu bafwa. Diawu befu boso tumfwilanga, mu kibila ki disumu divola Adami ayi Eva.—Muna tanga Tsudukusu yi bikuma 9 ku tsuka buku.

4. Adami wuba nani ayi khayilu mbi Yave kamvana?

⁴ Bo Yave kavanga dibakala di theti Adami, nandi wumvana khayilu yithalu—luzingu lusonga. Adami wuba nyitu yilunga. Kuba wulunga kunsundula kukhambu bela, kununa, ayi kufwa. Yave wuba tat’andi, kibila nandi wumvanga. (Luka 3:38) Yave waba kolukanga ayi Adami thangu ka thangu, wummonisa bwidi kalenda zingila ayi wumvana kiyeku ki kukyeba bivangu binkaka.—Ngenesi 1: 28-30; 2:16, 17.

5. Mbi binsudula bo Kibibila kintuba ti Adami wuvangu “kifwani ki Nzambi”?

⁵ Adami wuvangu “kifwani ki Nzambi.” (Ngenesi 1:27) Yave wumvanga na zikhadulu zyandi, dedi luzolo, ndwenga, busonga ayi zingolo. Nandi wumvanga na lwaku lu kusola mamboti ayi mambi. Nzambi kasa vanga ko Adami banga kinsengo kinsadilanga mu komandu. Vayi wubavanga na lwaku lu kuzaba kusola mamboti ayi mambi. Boti Adami wusola kutumamana Nzambi, khanu wuzingila ku paladizu mvu ka mvu.

6. Bo Adami kabayisa Nzambi, mbi kazimbisa? Bwidi nandi katukotisila mu mambu beni?

⁶ Bo kabayisa Nzambi diawu kakotila va kivika ki lufwa. Adami wufuta thalu yilutidi mu mambu kavanga. Nandi wutulula kikundi kyandi na Yave, wuzimbisa luzingu lu lunga ayi luzingu lu mvu ka mvu ku paladizu. (Ngenesi 3:17-19) Adami ayi Eva babaka makani ma kubayisa Nzambi, diawu bakhambulu dyana di kuzinga mvu ka mvu. Mu kibila ki Adami, ‘disumu dikota mu nza ayi lufwa luyizila mu nzila yi disumu, diawu lufwa lukotila mu batu boso kibila batu boso bavola disumu.’ (Loma 5:12) Bo Adami kasumuka, nandi “wu yisumbisa” naveka ayi nkunu’andi va kivika ki masumu ayi ki lufwa. (Loma 7:14) Twidi na dyana di kubwe zinga mvu ka mvu? Ngete, twidi.

7, 8. Khudulu muna mbi?

 ⁷ Khudulu muna mbi? Tulenda fwanikisa khudulu, mu mambu mwadi. Ditheti, khudulu thalu wumfuta mwingi kukula mutu voti kyuma kidi va kivika. Dimwadi, khudulu yilenda sundula thalu yimfuka voti yimfuta kyuma ki luvalu.

⁸ Vasa ba ko mutu wulenda futa thalu yi disumu Adami kavola di tutwadisila lufwa. Vayi Yave wutomba nzila mwingi kutukula va kivika ki masumu ayi lufwa. Twanlonguka bwidi Nzambi kavanina khudulu ayi bwidi tulenda landukila mu yawu.

9. Ntindu khudulu mbi yaba tombulu?

⁹ Vasi ko mutu mu befu wulenda futa khudulu mwingi kubaka luzingu lusonga Adami kazimbisa. Mu kibila mbi? Kibila befu boso twidi bankwa masumu. (Minkunga 49:7, 8) Mwingi kufuta khudulu, vaba tombulu luzingu lu mutu wunkaka wusonga. Diawu bayitedilanga ‘khudulu yidedakana.’ (1 Timoteo 2:6) Khudulu, yaba tombulu luzingu lunkaka lusonga, buka luzimbisa Adami.

10. Bwidi Yave kavanina khudulu?

¹⁰ Bwidi Yave katukudila? Yave wufila Yesu va ntoto Mwan’andi wu luzolo ayi wutheti mu bivangu byoso. (1 Yoane 4:9, 10) Yesu wuba wukubama mwingi kubika Tat’andi ayi diyilu bwangu kyandi. (Filipi 2:7) Yave wubotula luzingu lu mwan’andi ku diyilu ayi wumfila va ntoto. Yesu wubutuka mutu wusonga wukhambu disumu.—Luka 1:35.

¹¹ Dibakala di theti Adami, bo kalevula matuba Yave, wuzimbisa luzingu lusonga mu naveka ayi mu nkunu’andi. Bukyedika ti vadi mutu wulenda kula nkunu wu Adami mu lusingu lu lufwa? Ngete. (Tanga Loma 5:19.) Yesu wukhambu sumuka, nandi wuvana luzingu lwandi lusonga mwingi kutukula. (1 Kolinto 15:45) Luzingu lwandi lusonga, luvakulu mwingi kukula bana ba Adami va kivika ki lufwa.—1 Kolinto 15:21, 22.

12. Kibila mbi Yesu kamwena ziphasi ziwombo?

¹² Kibibila kinsudikisa buboti ziphasi Yesu kamona ava kafwa. Nandi wubulu, wubandu va dikunzi ayi wufwa lufwa lu ziphasi. (Yoane 19:1, 16-18, 30) Kibila mbi Yesu kamwena ziphasi ziwombo? Kibila Satana wutuba ti vasi ko mutu wulenda kwikama kusadila Nzambi na kumona zithotolo. Wulenda yindulula mayangi Yave kamona bo Yesu kakindama mu zithotolo zi Satana!—Zingana 27:11; Muna tanga Tsudukusu yi bikuma 15 ku tsuka buku.

13. Bwidi khudulu yifutulu?

¹³ Bwidi khudulu yifutulu? Yesu wuvana kwidi Tat’andi thalu yi luzingu lwandi lusonga. Mu kilumbu 14, mu ngonda Nisa mu mvu 33, mu thangulu yi Bayuda, Yave wubika zimbeni zi Yesu bamvonda. (Ebeleo 10:10) Bilumbu bitatu bivyoka, Yave wuvulubukisa Yesu mu nyitu yi Kiphevi. Bosi Yesu wumaka ku diyilu kwidi Tat’andi, ayi wuyundula kwidi Yave thalu yi luzingu lwandi lusonga kavakula mwingi kutukula. (Ebeleo 9:24) Kuzaba ti khudulu mfutu’itu, tulenda tuba ti tukulu mu masumu ayi mu lufwa.—Tanga Loma 3:23, 24.

14, 15. Mbi tufweti vanga mwingi tubaka nlemvu wu masumu mitu?

¹⁴ Tuma baka ndandu mu khayilu yilutidi luvalu Nzambi kavana. Twammona bwidi tulenda landukila yawu bubu ayi mu bilumbu binkwiza kuntwala.

¹⁵ Nlemvu wu masumu mitu. Nzingu wunneni kuvanga mambu masulama thangu zyoso. Tunsumukanga ayi khumbu zinkaka tunkolukanga mambu ma khambulu fwana. (Kolosai 1:13, 14) Mbi tufweti vanga mwingi tubaka nlemvu wu masumu mitu? Tufweti monisa ti tunyongini beni mu mambu tuvengi ayi kudinda Yave katulemvukila mu mambu beni. Tulenda ba lufyatu ti nandi wala tulemvukila.—1 Yoane 1:8, 9.

16. Mbi tulenda vanga mwingi tuba mayindu mamboti?

¹⁶ Tulenda ba mayindu mamboti. Ti mabanza mitu ma tsi ntima matutatisa mu dyambu dimbi tubevanga, khumbu zinkaka tulenda kuyivana mbedi ayi kumana dyana voti kuyimona banga twisi ko luvalu. Vayi kisi ko kiawu kibila tulenda vutukila mbusa. Kibila befu kudinda nlemvu kwidi Yave mu ntima woso, nandi kalenda kutuwilukila ayi kutulemvukila. (Ebeleo 9:13, 14) Yave wuntomba tunkamba dyosokwa dyambu twidi ayi kulebakana kwitu. (Ebeleo 4:14-16) Befu kumavanga twala kala ndembama ayi Nzambi.

17. Lusakumunu mbi tulenda baka bo Yesu kafwila mu kibila kitu?

¹⁷ Twidi dyana di kuzinga mvu ka mvu. ‘Mfutu wu masumu lufwa angi khayilu Nzambi katuvana, luzingu lu mvu ka mvu mu Yesu Klisto Mfumu’itu.’ (Loma 6:23) Bo Yesu kafwila mu kibila kitu, diawu twididi dyana di kuzinga mvu ka mvu mu mayangi va ntoto. (Nzaikusu 21:3, 4) Mbi tufweti vanga mwingi tubaka lusakumunu beni?

18. Bwidi tuzabidi ti Yave wutuzolanga beni?

¹⁸ Wukiyindula phila wummwenanga ku tsi’aku ntima boti khayilu yimboti be tambula. Khudulu, khayilu yilutidi tsundu mu luzingu lwitu. Diawu tufweti vutudila Yave matondo mu khayilu beni. Yoane 3:16 yitukamba “Nzambi wuzodila ngolo batu va nza diawu kavanina Mwan’andi wumosi kaka.” Bukyedika, Yave wutuzola beni diawu kafidila mwan’andi wu luzolo, Yesu. Ayi befu mvitu tuzebi ti Yesu wutuzolanga beni, kibila nandi wukivana mu dyambu kafwila mu kibila kitu. (Yoane 15:13) Khudulu, khayilu yimmonisa kivisa luzolo lu Yave ayi lu Yesu mu befu.—Ngalatia 2:20.

¹⁹ Bo malonguka luzolo Yave kadi mu ngyewu, bwidi wulenda bela nkundi’andi? Bukyedika ti mwa phasi wuzola mutu wukhambu zaba buboti. Yoane 17:3 yitukamba bwidi tulenda tonina kuzola Yave. Buna bu wunkwiza vangila mawu, bwabuna luzolo lwaku lumbwedimina mu nandi ayi mawu mala kuvanga wuba nkundi’andi. Diawu tatamana kulonguka matedi Yave mu Kibibila.—1 Yoane 5:3.

19, 20. (a) Bwidi wulenda bela nkundi Yave? (b) Bwidi wulenda vutudila matondo mu khayilu yi khudulu yi Yesu?

²⁰ Vutula matondo mu khudulu yi Yesu. Kibibila kintuba; ‘woso wunlekilanga kiminu mwana Nzambi, wala baka moyo wumvu ka mvu.’ (Yoane 3:36) Mbi binsundula kulekila kiminu voti tela mana? Mansudula kuvanga mo Yesu katutuma. (Yoane 13:15) Bika to kutubila va munu ti wunlekilanga kiminu mu Yesu vayi  monisa mu nzingulu’aku ti widi kiminu mu khudulu’andi. Kibila buku yi Yakobi 2:26 yintuba: “Minu ki khambulu mavanga kidi kifwa.”

21, 22. (a) Kibila mbi tufweti bambukila moyo lufwa lu Yesu mu kadika mvu? (b) Mbi tunkwiza longuka mu kapu 6 ayi 7?

²¹ Landakananga mbambukulu moyo lufwa lu Yesu. Va bwilu boso Yesu kafwa, nandi wuvana nswa tuntebukilanga moyo. Tumvanganga mawu khumbu yimweka mu mvu ayi tuyitedilanga mbambukulu moyo ‘Bidya Bimfumu va Masika ma Bwilu.’ (1 Kolinto 11:20; Matai 26:26-28) Yesu wuntomba tubambukilanga moyo luzingu lwandi lusonga kavana mu kibila kitu. Nandi wutuba: ‘Vanganga bobo mwingi mumbambukilanga moyo.’ (Tanga Luka 22:19.) Kulandakana mbambukulu moyo lufwa lu Yesu, phila yi kumonisina ti wuntebuka moyo luzolo Yave ayi Yesu bamonisa mu ngyewu.—Muna tanga Tsudukusu yi bikuma 16 ku tsuka buku.

²² Khudulu, khayilu yilutidi tsundu wulenda tambula. (2 Kolinto 9:14, 15) Khayilu ayoyo yilenda kula mafunda ayi mafunda ma batu bafwa. Mu kapu 6 and 7 tunkwiza longuka bwidi mala salimina.