1—3. Бистер кандый «тӱрмеде» отурып јадыс ла бисти Иегова канайып јайымдаар?

СЛЕРДИ буру јогынаҥ јӱрӱмеердиҥ учына јетире тӱрмеге отургызып салган деп сананып ийзегер. Эмди слер тӱрмеде отурып, јайымдалар арга јок деп сананадыгар. Оныҥ учун нени де солып болбозыгарды оҥдоп, колдороорды бош салып ийедигер. Је кенетийин слерди јайымдап ийетен кижи табылып, слерге болужарым деп сӧзин берген болзо, слер нени сезер эдигер?

² Анайып ла бис ончобыс, јӱрӱмистиҥ учына јетире тӱрмеде отурганы чылап, ӧлӱмниҥ олјозында болодыс. Оныҥ учун нени де этсебис, јайымдалар аргабыс јок. Је Иеговада бисти ӧлӱмнеҥ јайымдап салатан ийде-кӱч бар. Ол: «Калганчы ӧштӱ — ӧлӱм, јоголтылар» — деп, сӧзин берет (1 Коринфтегилерге 15:26).

³ Ӧлӱм јоголып калза, кандый јакшы болорын сананып ийзегер де! Ӧлӱмнеҥ кем де коркыбас. Је Иегова бисти ӧлӱмнеҥ јаҥыс ла јайымдап салар эмес, ол божоп то калгандарды тиргизер деп сӧзин берет. Иегова божоп калган улусты ойто јӱрер деп айткан (Исаия 26:19). Мыны Агару Бичик тирилиш деп адайт.

4. а) Јуук улузысты јылыйтсаас, токуналды кайдаҥ аларыс? б) Иисус кемдерле најылашкан?

⁴ Јуук улузысты эмезе најыбысты јылыйтып, бис тыҥ карыгып, кунугып јадыс ла бойыстыҥ арга-чыдал  јогысты сезедис. Нениҥ учун дезе нени де этсебис, божоп калган кижибисти тирилтип болбозыс. Је Агару Бичик биске токунал берип јат. (2 Коринфтегилерге 1:3, 4 кычырыгар.) Иегова ла Иисус Христостыҥ бистиҥ јуук улузысты тирӱ јӱрзин деп тыҥ кӱӱнзегенин кӧргӱзип турган бир учурал кӧрӱп ийектер. Иисус јерде јӱрерде Лазарьга, Марфага ла Марияга карузып јӱрген. Агару Бичикте олор оныҥ најылары болгон деп айдылат. Је бир катап Лазарь тыҥ оорыйла, јада калган (Иоанн 11:3—5).

5, 6. а) Иисус Лазарьдыҥ билезин ле ыйлап турган најыларын кӧрӱп, нени сескен? б) Божогон најызы учун Иисустыҥ ыйлаганы бисти нениҥ учун токунадат?

⁵ Иисус Марфаны ла Марияны токунадарга барган. Оныҥ келип јатканын Марфа угуп ийеле, Иисуска удура барарга, каладаҥ чыкты. Марфа Иисусты кӧрӱп, сӱӱнген де болзо: «Сен мында јӱрген болзоҥ, карындажым ӧлбӧс эди!» — деп айтты. Марфа Иисусты арай ла орой келген деп сананган. Оныҥ кийнинде Иисус ыйлап турган Марияга јолуккан. Келген улустыҥ ончозыныҥ ыйлап турганын кӧрӱп, Иисустыҥ ичи ачып, кӧзи јашталды (Иоанн 11:21, 33, 35). Биске јуук улузысты јылыйтсаас, канайып ачу болот, анайып ла Иисуска ачу болгон.

⁶ Бистиҥ сезимдеристи Иисустыҥ оҥдоп турганы бисти токунадып јат. Мынызыла ол Адазына тӱҥей (Иоанн 14:9). Удабас Иегова бойыныҥ ийде-кӱчиле ӧлӱмди јоголтып салар.

7, 8. Марфа Лазарьдыҥ сӧӧгин салган куй-таштыҥ оозын нениҥ учун ачтырбаска сананган, је Иисус нени этти?

⁷ Лазарьдыҥ сӧӧгин јууп салган куй-таштыҥ оозы јаан ташла бӧктӧлгӧн болгон. Оныҥ учун Иисус бу  таштыҥ јанына базып келеле: «Тажын алып ийигер» — деп сураарда, Марфа оны ачтырбаска сананды, нениҥ учун дезе Лазарьдыҥ божогонынаҥ бери тӧрт кӱн ӧдӧ берген (Иоанн 11:39). Је Иисустыҥ нени эдерге турганын Марфа билбес болгон.

⁸ Је улус ташты тӱҥей ле туура јылдырып ийген. Оноҥ Иисус: «Лазарь, бери чык!» — деп кыйгырып ийерде, «ӧлгӧн кижи чыгып келди». Оныҥ «колы-буды чуулалган, јӱзи арчуулла оролгон болды». Мыны кӧрӱп, Марфа ла Мария кӧзине бӱтпей турдылар (Иоанн 11:43, 44). Лазарьдыҥ тӧрӧӧндӧри ле најылары оныла ойто кучактажып, куучындажар аргалу болгонына айдары јок сӱӱнип турдылар. Иисустыҥ Лазарьды тиргискени чыннаҥ ла кайкал болгон!

9, 10. а) Иисус Христос улусты тиргизетен ийде-кӱчти кайдаҥ алган? б) Агару Бичикте тирилиш керегинде учуралдар нениҥ учун бичилген?

⁹ Иисус Христос улусты тиргизетен ийде-кӱчти кайдаҥ алган? Лазарьды тирилтердеҥ озо, ол Иеговага мӱргӱген. Айдарда, мындый ийде-кӱчти ого Иегова берген. (Иоанн 11:41, 42 кычырыгар.) Иисус јаҥыс Лазарьды тиргиспеген. Агару Бичикте 12 јашту бир кызычак керегинде бичилген. Ол тыҥ ооруп каларда, оныҥ адазы, Иаир, Иисуска келип, сок јаҥыс кызычагын јазып ийзин деп јайнаган. Иаир Иисусла куучындажып јадарда, улус келип: «Кызычагыҥ јада калды, Ӱредӱчини темей јоботпо» — деп айдышты. Је Иисус Иаирге: «Коркыба, јаҥыс ла бӱт» — деди. Олор кожо Иаирдиҥ айлындӧӧн бардылар. Айылдыҥ јанында Иисус ыйлажып турган улусты  кӧрӱп: «Ыйлабагар, ол божобогон, уйуктап јат» — деп айтты. Иисустыҥ сӧстӧрин кызычактыҥ адазы ла энези, байла, учына јетире оҥдобогон болор. Ол ончозын турадаҥ чыксын деп сурап, кыстыҥ ада-энезин кызычак јаткан кыптӧӧн алып кирди. Иисус кызычактыҥ колын алып: «Кызычак, сеге айдадым: тур!» — деерде, кызычак туруп, база берди. Кызычагыныҥ тирилгенине адазы ла энези сӱӱнчизин јӱрегине бадырып болбой турдылар! (Марк 5:22—24, 35—42; Лука 8:49—56). Олор кӱнӱҥ сайын кызычагын кӧрӱп, Иегова Иисус ажыра олордыҥ балазын тиргизип берген деп ундыбай јӱргендер *.

¹⁰ Је Иисустыҥ тирилткен улузы кийнинде тӱҥей ле божоп калган. Андый да болзо, бу учуралдар Иегова божоп калгандарды тиргизерге кӱӱнзейт деп ле мыны алаҥзу јогынаҥ эдер деп ижемји берет!

11. Лазарь божоп каларда, оныла не болгонын Јарлыкчы 9:5 канайып кӧргӱзет?

¹¹ «Божогон улус нени де билбес» — деп, Агару Бичикте айдылат. Лазарь керегинде база мынайып айдарга јараар (Јарлыкчы 9:5). Оныҥ ӧлӱми уйкуга тӱҥей болгон (Иоанн 11:11). Оныҥ учун Лазарь сӧӧк салар јерде болордо, «нени де билбеген».

12. Лазарь чын ла тирилген деп, бис кайдаҥ билерис?

 ¹² Лазарьдыҥ тирилгенин кӧп улус кӧргӧн. Керек дезе Иисустыҥ ӧштӱлери де мыны кайкал болгон деп оҥдогон. Лазарьдыҥ тирилип калганы — тирилиш чыннаҥ ла болгон деп, улуска кере болгон (Иоанн 11:47). Кӧп улус Лазарьдыҥ тирилип калганын кӧрӱп, Иисусты Кудай ийген деп бӱдӱп баштаган. Је Иисустыҥ ӧштӱлери мыны јаратпай, Иисусты да, Лазарьды да ӧлтӱрер деп шӱӱжип алдылар (Иоанн 11:53; 12:9—11).

13. Иегова божоп калган улусты тиргизер деп, бис нениҥ учун алаҥзыбас аргалу?

¹³ Иисус «сӧӧк салар јерде јаткандардыҥ ончозы» тирилер деп айткан (Иоанн 5:28). Бу дезе, Иегованыҥ санаазында болгон улустыҥ ончозы тирилер деп кӧргӱзет. Је Иеговага улусты тирилтерге, олор керегинде ӱзе билер керек. Андый болзо, Иегова кажы ла кижи керегинде ӱзени сананып алар аргалу ба? Темдектезе, бистиҥ Јер-телекейде миллиардтар тоолу јылдыстар бар. А Агару Бичикте Иегова кажы ла јылдыстыҥ адын билер деп айдылат. (Исаия 40:26 кычырыгар.) Ого кажы ла јылдыстыҥ адын сананып аларга кӱч эмес болордо, тиргизерге турган улусты сананып аларга ого база бир де кӱч эмес! Анайда ок Иегова — Јайаачы, оныҥ учун ондо улусты тиргизетен ийде-кӱч бар.

14, 15. Иовтыҥ сӧстӧринеҥ тирилиш керегинде бис нени билип аладыс?

¹⁴ Иов деген кудайзак кижи Кудай улусты тиргизер деп бӱткен. Ол бир катап: «Божогон кижи ойто јӱрер бе?» — деп сурак берип, соондо Иеговага баштанып: «Сен кычырзаҥ — мен каруу берерим. Сен бойыҥныҥ  јайаандарыҥа санаап каларыҥ» — деген. Бу сӧстӧрлӧ болзо, Иегова божоп калгандарды тиргизерге, бойы да энчикпей сакып јат деп, Иов бӱткен (Иов 14:13—15).

¹⁵ Тирилиш керегинде сананып ийзеер, слерге кандый сезимдер келет? Слер: «Мениҥ божоп калган јуук улузым тирилгей не?» — деп, сананып турган болорыгар. Иегова божоп калгандарды тирилтерге тыҥ кӱӱнзеп турганын билгенис бисти токунадып јат. Је эмди дезе, кем тирилер ле ол улус кайда јадар деген сурактарга Агару Бичик нени айдып турганын кӧрӱп ийектер.

16. Јерде тирилетен улустыҥ јӱрӱми кандый болор?

¹⁶ Јебрен ӧйдӧ тирилген улус билезиле, најыларыла кожо ойто сӱӱнчилӱ јӱрер аргалу болгон. А келер ӧйдӧ мынаҥ јакшы болор. Нениҥ учун дезе келер ӧйдӧ тирилетен улуста качан да божобойтон арга болор. Олор јуу-чак, кыйын-шыра ла оору-јобол јок јерде тирилер.

17. Кандый улус тирилер?

¹⁷ Анда кандый улус тирилер? Иисус: «Сӧӧк салар јерде јаткандардыҥ ончозы Кудайдыҥ Уулыныҥ ӱнин угуп... тирилер» — деп айткан (Иоанн 5:28, 29). Анайда ок Ачылта 20:13-те: «Талай бойындагы ӧлгӧн улусты берген, Ӧлӱм ле Таамы ӧлгӧн улузын бергендер» — деп бичилген. Анайдарда, миллиардтар тоолу улус тирилер. Элчи Павел «актулар да, акту эместер де» тирилер деп айткан. (Апостолдордыҥ ижи 24:15 кычырыгар.) Мында Павел кемдер керегинде айткан?

18. «Актулардыҥ» тоозына кемдер кирет?

 ¹⁸ «Актулардыҥ» тоозына Иисус Христос јерге келердеҥ озо јӱрген Иегованыҥ чындык ишчилери кирет. Темдектезе, Ной, Авраам, Сарра, Моисей, Руфь ла Эсфирь јердеги јӱрӱмге тирилтилер. Ӧскӧ чындык ишчилер керегинде еврейлерге бичилген самара ныҥ 11-чи бажалыгынаҥ билип аларга јараар. Је бистиҥ ӧйдӧ божоп турган Иегованыҥ чындык ишчилери «актулардыҥ» тоозына кирет пе? Эйе, кирет. Айдарда, олор база тирилер.

19. «Акту эместер» — олор кемдер? Олор тирилзе, олордо кандый арга болор?

¹⁹ «Акту эместер» — Иеговала таныжып алатан арга јок болуп божоп калган миллиардтар тоолу улус. Иегова олорды да ундыбаган. Олор тирилзе, Иеговала таныжып, ого иштейтен аргалу болор.

20. Нениҥ учун кезик улус тирилбес?

²⁰ Божогон улустыҥ бастыразы тирилер бе? Јок. Иисус бастыра улусты тирилер деп айтпаган (Лука 12:5, ЈТ). Кемди тирилтерин, кемди тирилтпезин кем башкарат? Эҥ бийик Јаргычы Иегова да болзо, је «тирӱлерди ле ӧлгӧндӧрди» јаргылайтан јаҥды ол Иисуска берип салган (Апостолдордыҥ ижи 10:42). Иегова ла Иисус тӱзединер кӱӱн јок калју улусты тирилтпес. (18 Кожултаны кӧрӱгер.)

21, 22. а) Теҥеридеги јӱрӱмге тирилери дегени нени темдектейт? б) Теҥеридеги јӱрӱмге эҥ ле озо кем тирилген?

²¹ Анайда ок Агару Бичикте кезик улус теҥеридеги јӱрӱмге тирилер деп айдылган. Теҥериде јӱретен улус эт-канду эдип эмес, је кӧскӧ кӧрӱнбес тындар болуп тирилер.

²² Теҥеридеги јӱрӱмге эҥ ле озо Иисус тирилген (Иоанн 3:13). Иегова оны ӱчинчи кӱнде тиргизип алган (Сарын 16:10; Апостолдордыҥ ижи 13:34, 35). Иисус эт-канду эдип эмес, је ийде-кӱчтӱ кӧскӧ кӧрӱнбес тын эдип тиргизилген (1 Коринфтегилерге 15:3—6).  Иисус «эт-канла ӧлтӱрилген, тынла — тирилген» деп, элчи Петр айткан (1 Петр 3:18). Је Агару Бичикте ӧскӧ дӧ улус теҥеридӧӧн тирилтилер деп айдылат.

23, 24. Иисустыҥ айткан «ас ӱӱрине» кемдер кирет, олордыҥ тоозы канча?

²³ Божоор алдында Иисус бойыныҥ чындык ӱренчиктерине: «Слерге јер белетеп барып јадым» — деп айткан (Иоанн 14:2). Айдарда, Иисустыҥ кезик ӱренчиктери оныла кожо теҥеридеги јӱрӱмге тиргизилер. Олордыҥ тоозы канча болор? Иисус олордыҥ тоозы кӧп эмес деп кӧргӱзерге, олорды «ас ӱӱр» деп адаган (Лука 12:32). Элчи Иоанн олордыҥ чике тоозын бичип салган. Кӧрӱлтеде кӧргӧниле, Иисусла кожо «јӱс тӧртӧн тӧрт муҥ кижи» болгон (Ачылта 14:1).

²⁴ Бу јӱс тӧртӧн тӧрт муҥ кижи качан тиргизилер? Агару Бичик, Иисус Христостыҥ теҥериде башкарып баштаганынаҥ ала деп айдат (1 Коринфтегилерге 15:23). Эм тургуза Христос башкарып јат, оныҥ учун 144 000 чындык христиандардыҥ кӧп сабазы теҥеридеги јӱрӱмге тирилип калган. Олордыҥ арткан калганы, божогон ло соондо, теҥеридӧӧн баргылайт. Анайдарда, кӧп саба улус јерге јадарга тиргизилер де болзо, бир кичинек бӧлӱк улус теҥериде јӱрерге тиргизилер.

25. Келер бажалыктаҥ нени билип аларыс?

²⁵ Иегова удабас ла улусты ӧлӱмниҥ олјозынаҥ јайымдаар; ӧлӱм база качан да болбос. (Ачылта 21:4 кычырыгар.) Је теҥериге баратан улус анда нени эдер? Олор Иисус Христосло кожо башкарар деп, Агару Бичикте айдылат. Бу башкару керегинде келер бажалыктаҥ кӧптӧдӧ билип аларыс.