1-3. Sian dia do hita ndang boi malua jala songon dia do Jahowa paluahon hita?

PINGKIRHON ma molo dipenjarahon hita hape ndang adong na sala taulahon. Ala ndang boi hita malua, gabe marsak ma hita jala mandele. Alai na so panagaman, adong ma sahalak parpangkat na olo mangurupi jala marjanji laho paluahon hita! Songon dia do pangkilalaanta?

² Songon i ma na masa tu hita, ndang boi hita malua sian hamatean. Jala, aha pe na tabahen, ndang boi hita malua sian i. Alai, margogo do Jahowa paluahon hita sian hamatean ala nunga didok, ”Hamatean i do musu na parpudi sipasohotonna i.”​—1 Korint 15:26.

³ Jahowa ndang holan pasohothon hamatean, alai halak na mate pe paheheonNa do. I do umbahen, ndang pola marhabiaran be hita tu hamatean. Rimangi ma pangkorhon ni on tu hita. Marjanji do Jahowa laho pahehehon ”angka naung mate”. (Jesaya 26:19) Di Bibel, didok ma on haheheon.

4. (a) Aha do na boi mangapuli rohanta tingki marujung ngolu na tahaholongi? (b) Aha do na masa tu aleale ni Jesus?

⁴ Molo marujung ngolu na tahaholongi, lungun situtu do rohanta. Ndang boi tarbahen hita asa mulak mangolu nasida. Alai, adong do pangapulion sian Bibel. (Jaha 2 Korint 1:3, 4.) Taida ma tudosan  na patuduhon sihol ni Jahowa dohot sihol ni Jesus Kristus laho pahehehon halak naung mate. Tingki di tano on Jesus, jotjot do ibana laho tu jabu ni si Lasarus. Adong do iboto ni si Lasarus, i ma si Marta dohot si Maria jala aleale ni Jesus do nasida na tolu. Bibel mandok, ”Holong do roha ni Jesus di si Marta dohot di anggina i, nang di si Lasarus.” Alai sada tingki, mate ma si Lasarus.​—Johannes 11:3-5.

5, 6. (a) Songon dia do pangkilalaan ni Jesus tingki mardok ni roha keluarga dohot aleale ni si Lasarus? (b) Boasa tarapul rohanta mamboto na lungun do roha ni Jesus mangida halak naung mate?

⁵ Ro ma Jesus laho mangapuli si Marta dohot si Maria. Tingki dibege si Marta na ro Jesus, laho ma ibana manomu Jesus tu ruar ni kota i. Dung jumpang dohot Jesus, didok ibana ma, ”Aut na dison Ho, ale Tuhan, ndang tagamon mate ibotongki!” Ninna roha ni si Marta, nunga tarlambat be Jesus ro tusi. Diida Jesus ma muse si Maria tumatangis, gabe lungun rohana jala dohot ma ibana tangis. (Johannes 11:21, 33, 35) Lungun hian do roha ni Jesus tingki i, dos songon lungun ni rohanta molo marujung ngolu na tahaholongi.

⁶ Tarapul ma rohanta mamboto na lungun roha ni Jesus molo adong na mate. Jala, pangkilalaan ni Jahowa pe dos do songon pangkilalaan ni Jesus. (Johannes 14:9) Alai, marhagogoon do Jahowa laho pasohothon hamatean salelenglelengna jala ndang sadia leleng nai, idaonta ma bahenonNa songon i.

7, 8. Boasa ndang lomo roha ni si Marta dihandit batu ni kuburan i, alai aha do dibahen Jesus?

⁷ Dung sahat Jesus di kuburan ni si Lasarus, nunga  ditutup pintu ni kuburan i dohot batu na balga. Ninna Jesus ma, ”Handit hamu ma batu i sian i.” Alai, nunga opat ari si Lasarus dung dikubur. Ndang lomo roha ni si Marta dibungka kuburan i. (Johannes 11:39) Ndang diboto ibana na laho paheheon ni Jesus do si Lasarus.

⁸ Didok Jesus ma gogo, ”O Lasarus, ruar ma ho!” Dung i, diida si Marta dohot si Maria ma halongangan. ”Dung i ruar ma tutu na mate i, lilit dope saput i tu patna dohot tu tanganna.” (Johannes 11:43, 44) Dipahehe ma si Lasarus! Boi ibana pajumpang muse dohot keluargana. Boi ditiop nasida si Lasarus, dihaol jala boi ibana mangkatahatai dohot nasida. Sada halongangan ma on! Dipahehe Jesus si Lasarus sian hamatean.

9, 10. (a) Ise do na mangalehon huaso tu Jesus pahehehon na mate? (b) Aha do labana di hita mamboto taringot haheheon?

⁹ Huasona sandiri do dipangke Jesus laho pahehehon? Ndang. Martangiang do Jesus andorang so dipahehe si Lasarus dung i, dilehon Jahowa ma huaso tu ibana laho pahehehon. (Jaha Johannes 11:41, 42.) Ndang holan si Lasarus na dipahehe sian hamatean. Dipaboa Bibel tu hita, adong dope na dipahehe, i ma boru ni si Jairus na marumur hirahira 12 taon na posi sahitna. Marsak situtu do ibana ala holan i boruna. Ro ma ibana tu Jesus mangido asa dipamalum boruna i. Alai mangkatai dope si Jairus tu Jesus, adong ma ro paboahon tu ibana, ”Nunga mate borumi, boasa dope lojaanmu Guru i?” Alai, didok Jesus ma, ”Unang ho mabiar, porsea sambing ma ho!” Dung i, laho ma  Jesus tu jabu ni si Jairus. Dung jonok nasida tu jabu i, diida jala dibege Jesus ma jolma tumatangis. Didok Jesus ma tu nasida, ”Boasa gaor hamu, boasa tangis hamu? Ndang na mate dakdanak i, holan na modom do i.” Ndang diboto si Jairus dohot tungganeboruna aha do lapatan ni hata ni Jesus i. Alai, disuru Jesus ma na torop i ruar sian jabu jala ditogihon ma amana dohot inana tu inganan ni dakdanak i. Ditiop ibana ma tangan ni dakdanak i ninna ma, ”Ale boruboru na metmet, Ahu mandok tu ho, hehe ma ho!” Boi do tahilala las ni roha ni natuatuana dung hehe dakdanak i jala mardalan? (Markus 5:22-24, 35-42; Lukas 8:49-56, Bibel siganup ari) Mulai sian i, diida nasida ma huaso ni Jahowa na dipatuduhon marhite Jesus. *

¹⁰ Sude na dipahehe ni Jesus i ujungna mate do. Alai, adong do labana tu hita saonari mamboto haheheon i. Alana, on boi patoguhon pangkirimonta tu haheheon. Sihol do roha ni Jahowa pahehehon halak na mate jala lomo do rohaNa.

11. Aha do diajarhon Parjamita 9:5 tu hita taringot si Lasarus?

¹¹ Tangkas do dipaboa di Bibel, molo ”halak naung mate ndang diboto agia aha”. Songon i ma na masa tu si Lasarus. (Parjamita 9:5) Didok Jesus, songon na modom do si Lasarus. (Johannes 11:11) Saleleng di kuburan i, ndang adong diboto si Lasarus ”agia aha”.

12. Sian dia do taboto na tutu masa haheheon ni si Lasarus?

 ¹² Tingki i, torop do mangida Jesus pahehehon si Lasarus. Halak na marmusu tu Jesus pe, diboto nasida do tanda halongangan na binahenna i. On patuduhon tutu do masa haheheon i. (Johannes 11:47) Jala, torop do halak ro mangida si Lasarus naung dipahehe i. Porsea ma nasida na sinuru ni Debata do Jesus. Alai, sogo do roha ni angka musu ni Jesus, gabe martahi ma nasida mambunu Jesus dohot si Lasarus.​—Johannes 11:53; 12:9-11.

13. Boasa pos rohanta na boi do paheheon ni Jahowa halak naung mate?

¹³ Jesus mandok, ”saluhut halak na di angka tanoman i” laho paheheonna. (Johannes 5:28) Lapatanna, mulak mangolu do saluhut halak naung mate na diingot Jahowa. Alai, asa boi paheheon ni Jahowa nasida, ingkon ingotonNa do saluhutna taringot tu sasahalak na laho dipahehe. Boi do ingotonNa saluhutna i? Bibel paboahon, adong do marmiliar bintang di langit jala diboto Jahowa do sude goar ni bintang i. (Jaha Jesaya 40:26.) Molo diingot Ibana do sude goar ni angka bintang, ndang maol ingoton ni Jahowa saluhut na hombar tu halak na laho paheheonNa. Na rumingkot muse, ala Jahowa do sipanompa, marhagogoon do Ibana laho pahehehon.

14, 15. Songon dia do hata ni si Job mangajar hita taringot haheheon?

¹⁴ Si Job sahalak na porsea, marpos ni roha na adong haheheon. Disungkun ibana, ”Ia dung mate baoa i, tung tagamon ma ulahanna mangolu?” Jala didok ibana tu Jahowa, ”Disi Ho joujou di ahu, pintor alusanku do Ho, halungunhononmu tahe jadi-jadian  ni tanganmu.” Diboto si Job do, na sihol roha ni Jahowa laho pahehehon halak na mate.​—Job 14:13-15.

¹⁵ Aha do pangkorhon ni pangkirimon on di hita? Sungkunsungkun do ra rohanta, ’PaheheonNa do angka na tahaholongi naung jumolo marujung ngolu?’ Alai, tarapul do rohanta ala nunga taboto laho paheheon ni Jahowa do halak na mate. Ise do na laho paheheonNa jala didia nasida maringanan? On ma muse na laho taparsiajari.

16. Hangoluan na songon dia do hilalaon ni halak na laho dipahehe di tano on?

¹⁶ Sude na dipahehe na dipaboa di Bibel, jumpang do muse dohot keluargana. Songon on ma na laho masa muse. Alai, umbalga dope haheheon na laho ro. Boasa? Ala sude na dipahehe mandapot hangoluan salelenglelengna jala ndang laho mate be. Tano inganan ni nasida pe dumenggan do sian na taida saonari. Disi, ndang adong be sahit, porang dohot hajahaton.

17. Angka ise do na laho dipahehe?

¹⁷ Angka ise do na laho dipahehe? Didok Jesus, ”Begeon ni saluhut halak na di angka tanoman i ma soarana.” (Johannes 5:28, 29) Pangungkapon 20:13, Bibel siganup ari paboahon, ”Diharuarhon laut i ma angka na mate di bagasanna jala hamatean dohot tanoman i pe diharuarhon ma angka na mate i.” Marmiliar do halak na laho paheheonNa. Alai dipaboa apostel Paulus, adong dua punguan na laho dipahehe, i ma ”angka na tigor dohot angka na geduk”. (Jaha Ulaon ni Apostel 24:15.) Ise do na nidokna dison?

18. Ise do na nidokna ”angka na tigor” na laho dipahehe?

 ¹⁸ Na nidokna ”angka na tigor” i ma angka na porsea tu Jahowa andorang so ro Jesus tu portibi on. Songon si Noak, si Abraham, si Sarah, si Musa, si Rut dohot si Ester, nasida paheheonNa do muse di tano on. Boi do tajaha taringot nasida di Bibel di Heber bindu 11. Songon dia do taringot tu naposo ni Jahowa na  mate di tingkinta on? Nasida pe digoari do na ”tigor”. Alani i, tongtong do paheheonNa.

19. Ise do na nidokna ”angka na geduk”? Songon dia do nasida asa boi mananda Jahowa?

¹⁹ ”Angka na geduk” i ma marmiliar halak na mate andorang so mananda Jahowa. Nang pe naung mate, ndang dihalupahon Jahowa nasida. PaheheonNa ma nasida asa boi marsiajar mananda Jahowa jala mangoloi Ibana.

20. Boasa ndang sude halak na mate dipahehe?

²⁰ PaheheonNa do saluhut halak naung mate? Ndang. Antong, ise do na boi manontuhon sasahalak dipahehe manang na ndang? (Lukas 12:5) Jahowa do panguhum jala Ibana do na boi manontuhon i. Alai, dilehon do tongtong huaso tu Jesus ”gabe panguhum di angka na mangolu ro di angka na mate”. (Ulaon ni Apostel 10:42) Angka na jahat na so olo muba ndang paheheonNa.​—Ida Lampiran 19.

21, 22. (a) Mardaging aha do halak na dipahehe tu surgo? (b) Ise do na parjolo na dipahehe tu surgo?

²¹ Dipaboa Bibel do muse taringot halak na dipahehe tu surgo. Sasahalak na dipahehe tu surgo, ndang mardaging jolma nasida songon angka na dipahehe di tano on. Alai, dipahehe nasida tu surgo mardaging tondi do.

²² Jesus do na parjolo dipahehe tu surgo. (Johannes 3:13) Dung tolu ari mate, dipahehe Jahowa ma ibana. (Psalmen 16:10; Ulaon ni Apostel 13:34, 35) Ndang mardaging jolma Jesus dipahehe. Songon na dipaboa apostel Petrus, ”Tarbunu do ianggo dagingna, alai  dipangolu do anggo tondina.” (1 Petrus 3:18) Mardaging tondi do Jesus dipahehe jala marhagogoon! (1 Korint 15:3-6) Alai songon na dipaboa Bibel, ndang holan Jesus na laho dipahehe tu surgo.

23, 24. Ise do na didok Jesus ”punguan na metmet” jala piga halak do nasida?

²³ Andorang so mate, dipaboa Jesus tu angka siseanna, ”Na laho do ahu mangarade inganan di hamu.” (Johannes 14:2) Lapatanna, deba sian angka na mangihuthon Jesus laho paheheonNa do rap dohot ibana tu surgo. Sadia godang do nasida? Dipaboa Jesus, otik do jala digoari ma on ”punguan na metmet”. (Lukas 12:32) Apostel Johannes paboahon bilanganna, diida ibana ”jongjong ma birubiru i di dolok Sion [surgo], adong ma donganna saratus opatpulu opat ribu”.​—Pangungkapon 14:1.

²⁴ Andigan do halak Kristen sisaratus opatpulu opat ribu on dipahehe? Dipaboa Bibel tu hita, on masa dung mamarenta Jesus di surgo. (1 Korint 15:23) Saonari ma i masa. Sian sisaratus opat pulu opat ribu i, gumodangan nunga dipahehe tu surgo. Nasida na mangolu dope di tano on, paheheonNa ma tu surgo disi mate nasida.

25. Aha do na laho taparsiajari di pasal na mangihut?

²⁵ Ndang sadia leleng nai, paluaon ni Jahowa ma sude halak sian hamatean jala pasohotonNa hamatean i salelenglelengna! (Jaha Jesaya 25:8.) Alai, aha do ulahonon ni nasida na laho hehe tu surgo? Songon na dipaboa Bibel, mamarenta ma nasida rap dohot Jesus di harajaonNa. Parsiajaranta ma muse taringot harajaon i di pasal na mangihut.