1-3. I vekpi-in bang sungah thongkia ihi hiam? Jehovah in koi bangin hong suaktasak ding a hiam?

NA khialh lohpi thu khat tung hong kimawhsakin na khantawnin thong a kia ci-in kingaihsun dih in. Na suahtak theih nading thu bangmah om lo hi. Na lametna zong bei-in, tua banah bangmah na sep theih zong om nawn lo hi. Ahih hang na lametna khempeuh beita na kisak laitakin, na suahtak theih nading vangliatna a nei mi khatin hong huh nuam ing ci-in kamciam hong pia leh nangh bang na ci tam?

² I vekpi-in sihna khut sunga thongkia mi ihi hi. En’ bangbang i sem zongin suahtak nading lampi a om kei hi. Ahih hang Jehovah in sihna pan i suahtak theih nading vangliatna a nei hi. Tua khit teh ama’n “A tawpna-ah suksiat ding a gal nunung pen in sihna ahi hi,” ci-in hong kamciam hi.—1 Korin 15:26.

³ Sihna tawh kisai-in na patauh ding a kul loh hun a tun ciang na suahtakna kingaihsun dih in! Ahih hang Jehovah in sihna bek hemkhia lo ding hi. A sisate zong a nungta dingin hong hingkiksak ding hi. Tua pen nang ading bang a khiatna om hiam cih ngaihsun in. Ama’n “sawtpi-a a sisa mite” hingkik ding hi ci-in na kamciam hi. (Isaiah 26:19) Tua pen Lai Siangtho in thawhkikna na ci hi.

4. (a) I innkuanpih ahih kei leh i lawm khat in hong nusiat ciang bangin hong hehnem takpi ding a hiam? (b) Jesuh ii a ki-it pih mahmah a lawm pawlkhatte kua a hiam?

⁴ I innkuanpih ahih kei leh i it mahmah i lawm khat in  hong nusiat ciang i lungsim na mahmah a, i khasia mahmah hi. Panpih ding nei lo bangin i kingaihsun hi. Amah a nuntakkik nading i sep theih bangmah om lo hi. Ahih hang Lai Siangtho in hehnepna hong pia takpi hi. (2 Korin 1:3, 4 Sim in.) Jehovah le Jesuh in i it mi khat bangzah takin nungtakik sak nuam hiam cih i theih nading thu khat kikum ni. Jesuh leitungah a om lai-in Lazaras le a sanggamnu Martha le Mary-te kiang hawh zelzel hi. A thumun Jesuh ii lawmhoihte ahi uh hi. Lai Siangtho in: “Jesuh in Martha-te unau le Lazaras it mahmah hi” ci hi. Tua leh ni khat, Lazaras hong si hi.—Johan 11:3-5.

5, 6. (a) Jesuh in Lazaras innkuanpihte le a lawmte dahna a muh ciang amah bangci a hiam? (b) Sihna tawh kisai Jesuh’ lungsim i theihna in ba’hang hehnepna ngah ihi hiam?

⁵ Martha le Mary a hehnem dingin Jesuh va pai hi. Martha in Jesuh hong pai lam a zak ciang a dawn dingin khua pua lamah paikhia hi. Jesuh tawh a kimuh a lungdam mahmah hang ama’n: “Hih lai-ah a om hi lecin ka u si het lo ding hi,” ci hi. Martha ngaihsutna-ah Jesuh in lap nawn lo hi ci-in um hi. Tua khit ciang Jesuh in a sanggamnu Mary a kah a mu hi. Tua a khasiathuai thute Jesuh in a muh ciang a lungsim sukha-in kap hi. (Johan 11:21, 33, 35) I it khatin hong nusiat ciang i dahna ama’n hong theihpih hi.

⁶ Ei mah bangin Jesuh zong sihna hangin a khasiat i theih ciang hong hehnem hi. Tua banah Jesuh pen a Pa tawh kisun hi. (Johan 14:9) Jehovah in sihna a tawntungin hepkhiat theihna vangliatna nei a, tua pen hong hepkhiatsak ding hun naita hi.

7, 8. Lazaras hankhuka suangtum Martha in ba’hang hemkhia nuam lo a hiam? Ahih hang Jesuh in bangcih a hiam?

⁷ Lazaras a luang a kivuina hanah Jesuh a tun ciang  suangtum golpi tawh a kongvang na kikhak hi. Jesuh in: “Suangtum likkhia un,” ci hi. Ahih hang Martha in kong a hon ding deih lo hi. Lazaras a kivui zawh ni li phakhin ta hi. (Johan 11:39) A sanggampa ading Jesuh in bang sepsak ding hiam cih ama’n thei lo hi.

⁸ Jesuh in Lazaras kiang: “Hong pusuak in!” ci hi. Tua khit teh thupiang pen Martha le Mary-te in a muh uh ciang lamdang salua uh hi. “A misipa a khut a khe dial tawh kituamin, a maitang puan tawh a kitunsa-in hong pusuak hi.” (Johan 11:43, 44) Lazaras hong nungtakik ta! A innkuanpihte le a lawmte tawh kimukik hi. Amah kawi-in lawng uh a, hopih uh hi. A lamdang mahmah thu hi! Jesuh in Lazaras hingkiksak hi.

9, 10. (a) Jesuh in mite a hinkiksak nading vangliatna kua’n pia a hiam? (b) A kiciamteh thawhkikna tangthute pen ei ading ba’hang manpha mahmah ahi hiam?

⁹ Jesuh in mi a hinkiksak pen ama vangliatna tawh maw? Hi lo hi. Lazaras a hinkiksak ma-in Jesuh in Jehovah kiang thungen a, Jehovah in Lazaras a hinkiksak nading vangliatna na pia hi. (Johan 11:41, 42 Sim in.) Tua banga mi a thokik pen Lazaras bek na hilo hi. Lai Siangtho in cina a, a gim kum 12 a pha numeino khat thu hong gen hi. A pa Jairas in a cih nading thei loin Jesuh kiang a tanu a damsak nading na thum hi. A tanu neihsun ahi hi. Jesuh tawh a kiho laitakun pasal pawlkhat hong pai-in: “Na tanu si khinta hi! Bang hangin Siapa mawk gimsak nawn ding na hi hiam?” ci uh hi. Ahih hang Jesuh in Jairas kiangah: “Lunghimawh kei in; upna nei peuh lecin na tanu a hingkik ding hi,” ci hi. Tua khit teh Jesuh in Jairas’ inn lam zuanin amah tawh hong pai khawm uh hi. A inn gei hong tun uh ciang Jesuh in mite kahna za-in mu hi.  Jesuh in: “Kap nawn kei un, amah a si hi lo hi; a ihmu bek ahi hi,” a ci hi. A nu le a pa te’n Jesuh ii cihnopna pen lamdangsa uh hi. Jesuh in mi khempeuh a pusuah nading ngenin, numeino lupna inndei sungah a nu le pa tawh lut khawm uh hi. Jesuh in damtakin a khut len a, “Numeino aw, tho in!” ci hi. Numeino hong tho pahin lam a pai ciang a nu le a pate lungdam dan ding na mitkha tawh na bawl thei hiam! Jesuh in a tanu uh hingkiksak hi. (Marka 5:22-24, 35-42; Luka 8:49-56) Tua ni-in a tanu ahi numeino a hinkikna a muh uh ciang Jesuh tungtawnin amau ading Jehovah in a sepsak thute phawkkha ding uh hi. *

¹⁰ Jesuh in a hinkiksak tua mite a nung ciang sikik veve uh hi. Ahih hang tua mite thu i simna in manpha mahmah hi. Ahang pen lametna man hong pia ahih man hi. Jehovah in mite thokiksak nuam a, zong thokiksak ding hi.

11. Lazaras tawh kisai-in Thuhilhna 9:5 in bang hong hilh a hiam?

¹¹ Lai Siangtho in “A sisate in bangmah thei nawn lo uh hi,” ci-in siangtakin gen hi. Tua pen Lazaras tung na man mahmah hi. (Thuhilhna 9:5) Jesuh gen mah bangin Lazaras pen a ihmu mah tawh kibang hi. (Johan 11:11) Lazaras han sungah a om lai-in ama’n “bangmah thei nawn lo hi.”

12. Lazaras hong hinkikna pen a piang takpi thu hi cih en’ koici theih ihi hiam?

¹² Jesuh in Lazaras a hinkiksak lai-in mitampi in na  mu uh hi. Tua na lamdang a bawl pen Jesuh ii galte na ngawn in zong thei uh hi. Lazaras a hinkikna in thawhkikna om takpi hi cih kician takin lak hi. (Johan 11:47) Mihon tampi zong Lazaras kiang hong pai uh a, Lazaras a muhna uh pan Jesuh pen Pasian hong sawl ahihlam hong um ta uh hi. Tua thu Jesuh ii gal te’n deih lo ahih manin Jesuh le Lazaras a nihun thah ding na gel uh hi.—Johan 11:53; 12:9-11.

13. Jehovah in a sisate thokiksak ding hi cih ba’hang muang thei ihi hiam?

¹³ Jesuh in “Han sungah a om misi khempeuh,” thokik ding cih thu a gen hi. (Johan 5:28) A cihnopna-ah Jehovah in a phawk mi khempeuh hong thokik ding uh cihna hi. Ahih hang Jehovah in mi khat peuhpeuh a hinkiksak ciang tua mi tawh kisai a thu khempeuh a thei hi. Tua bangin thei zo takpi ding maw? Khuavannuai-ah aksi awn tampitak om hi. Jehovah in aksi khat ciat ii min thei hi ci-in Lai Siangtho in gen hi. (Isaiah 40:26 Sim in.) Aksi khat ciat ii min thei zo ahih leh ama hinkiksak ding mi khempeuhte ii thu oltakin thei khin ding hi cih kician hi. A thupi penah Jehovah in na khempeuh bawl ahih manin mite a hinkiksak nading ama’n vangliatna a neihlam i thei hi.

14, 15. Thawhkikna tawh kisai Job ii kammalte in bang hong hilh a hiam?

¹⁴ Mi citak pasal Job in thawhkikna na um hi. Ama’n: “Mi a sih ciang, a hingkik thei ding hiam?” ci-in dong hi. Tua ciang Jehovah kiang: “Kei na hong sam ding a, ke’n kong dawng ding hi. Nangma bawlsa ahi keimah na hong lunggulh ding hi,” ci hi. Hi mah hi, Jehovah in a site a thokiksak ding hun ngaklah mahmah hi cih Job in a thei hi.—Job 14:13-15, NW.

¹⁵ Thawhkikna lametna in na lungsim hong sukha  hiam? Nangh: ‘Hong nusia ka innkuanpihte le ka lawmte e le, amau hong thokik uh tam maw?’ ci-in thei nuam kha ding hi teh. Jehovah in a site hingkiksak nuam takpi hi cih i theihna in hong hehnem hi. Kuate hong thokik ding uh a, amau koi-ah nungta ding uh hiam cih Lai Siangtho genna en ni.

16. Leitungah a nungta dinga hong thokik khempeuh koi bangin nungta ding uh a hiam?

¹⁶ A beisa huna a hingkik mite pen amau innkuanpihte le a lawmte uh tawh hih leitung mahah kimukik uh hi. Mai lamah zong tua bang mahin hong piang ding a, tua sang hong hoihzaw ding hi. Ba’hangin maw? Ahang pen hih leitungah hong nungtakik khempeuh in a tawntunga nuntak theihna le cikmah hunin sihkik nawn lohna hunpha ngah ding uh hi. Tua khit teh tu huna i nuntakna tawh a kikhai mahmah leitungah hong nungta ding uh hi. Tua takah galdona, tatsiatna le cinatnate om nawn lo ding hi.

17. Kuate hong thokik ding uh a hiam?

¹⁷ Kuate hong thokik ding uh hiam? Jesuh in “Han sungah a om misi khempeuh in ama aw za-in, han sung panin a hong paikhiat uh hun hong tung ding hi” ci hi. (Johan 5:28, 29) Tua khit teh Maangmuhna 20:13 in: “Tuipi sungah a om misite, tuipi in hong pusuah a, Sihna le Misite’ Gam in zong amau sungah a om misite hong pusuah” ding uh hi ci hi. Hi mah hi, mi awn tampi hong nungtakik ding uh hi. Sawltak Paul in zong “miphate le misiate” hingkiksak khawm ding hi ci hi. (Sawltak 24:15 Sim in.) Bang a cihnopna hiam?

18. Kuate “miphate” hi a, kuate hong thokik ding uh hiam?

 ¹⁸ “Miphate” sungah Jesuh leitung hong pai ma-a a nungta Jehovah ii a citak silate kihel uh hi. Tua sungah Noah, Abraham, Sarah, Moses, Ruth le Esther cihte hih leitungah a nungta dingin hong thokik ding uh hi. Tua numei le pasal pawlkhatte’ thu Hebru a lian 11 sungah  sim thei hi teh. Tu huna a si Jehovah ii a citak silate e le? Amau zong “miphate” ahih manin hong thokik ding uh hi.

19. Kuate “misiate” hi uh a hiam? Jehovah in bang hunpha pia ding a hiam?

¹⁹ “Misiate” sungah Jehovah thu theih nading hunpha a ngah lo mi awn tampi kihel uh hi. Amau a sih uh hang Jehovah in na mangngilh lo hi. Pasian in amau’ thokiksak ding a, tua banah ama thu a sin theih nading le a na sem dingin hunpha ngahkik ding uh hi.

20. Ba’hang mi khempeuh hingkik lo ding ahi hiam?

²⁰ A sisa khempeuh hong thokik ding uh cihna maw? Hi lo hi. Jesuh in mi pawlkhat nungtakik nawn lo ding ci hi. (Luka 12:5) Kua thokik ding, thokik lo ding cih pen kua ii khensat ding a hiam? A tawpna-a thukhem mangpi Pa pen Jehovah ahi hi. Ahih hang ama’n “mihing le misite tungah thu a khen dingin” Jesuh zong aana na pia hi. (Sawltak 10:42) Migilote le a kikhel nuam lo mi kuamapeuh thu kikhen dinga, thokik nawn lo ding uh hi.—A Nunga Ciaptehna 19 en in.

21, 22. (a) Vantungah thokik uh a cih ciang bang a cihnopna hiam? (b) Vantungah a nungta dingin a thokik masapen in kua a hiam?

²¹ Lai Siangtho in mi pawlkhat pen vantungah nungta ding hi ci-in zong hong gen hi. Mi khat peuhpeuh vantungah a thawhkik ciang cilesa a nei mihing khat bangin nungtakik lo ding hi. Amah pen vantungah a nungta dingin kha pumpi tawh a thokik ding hi.

²² Hih bang danin thawhkikna a ngah masapen in Jesuh ahi hi. (Johan 3:13) Jesuh a kithah zawh ni thum khit ciang Jehovah in amah hingkiksak hi. (Late 16:10; Sawltak 13:34, 35) Jesuh pen mihing pumpi tawh thokik lo hi. Sawltak Peter in Jesuh pen “Mite in ama  leitung pumpi that a, ahi zongin Pasian in kha nuntakna a pia hi,” ci hi. (1 Peter 3:18) Jesuh in a vanglian kha pumpi a ngahkik hi! (1 Korin 15:3-6) Ahih hang amah bek hi lo ding hi ci-in Lai Siangtho in gen hi.

23, 24. Jesuh gen “tuuhon tawmno” a cih in kuate a hiam? Bangzah pha ding uh hiam?

²³ Jesuh a sih ma deuhin a citak ama nungzuite kiang: “Note’ om nading mun a bawlkhol dingin a pai ding ka hi hi” ci hi. (Johan 14:2) A cihnopna-ah ama nungzui pawlkhat pen vantungah amah tawh a nungta dingin thokik ding uh cihna hi. Bangzah pha ding uh hiam? Jesuh in amau pen tawm bek a pha “Tuuhon tawmno” na ci hi. (Luka 12:32) Sawltak Johan in “[Vantung] Zion Mual tungah Tuuno” Jesuh “tawh mi tul za le tul sawmli le tulli dingkhawm uh” a muh lai-in a mi phazah lian na gen hi.—Maangmuhna 14:1.

²⁴ Cik ciang 144,000 Khristiante thokik ding uh a hiam? Lai Siangtho in vantungah Khrih in ukna a kipat khit teh tua thute piang ding ci hi. (1 Korin 15:23) Tu’n tua a ukna hun sungah i nungta a, 144,000-te lakpan a tamzaw vantungah thokik khin uh hi. Tu-in leitungah a nungta zong om lai uh a, amau a sih phetin vantungah a nungta dingin thokik pah ding uh hi. Ahih hang mi a tamzaw pen hih leitung Paradais-ah a nungta dingin mai lamah hong thokik ding uh hi.

25. A zom khenpi-ah bang thu sin ding ihi hiam?

²⁵ A sawt loin Jehovah in sihna pan mihing khempeuh suaktasak ding a, sihna a tawntungin maimangsak tading hi! (Isaiah 25:8 Sim in.) Ahih hang vantungah a kahte in tua takah bang sem ding uh hiam? Pasian Gam ki-ukna-ah Jesuh tawh kumpi-in uk khawm ding uh hi ci-in Lai Siangtho in hong hilh hi. Tua Gam thu a zom khenpi-ah i sin ding hi.