1-3. a) ¿Chuqui jiñi cʌchʌl bʌ i chaʼañonla? b) ¿Chuqui mi caj i mel Jehová chaʼan miʼ coltañonla?

ÑAʼTANCU chaʼan miʼ toʼol jojpʼel a mul, maʼ wotsʌntel ti cárcel i maʼañix baqui ora mi caj a loqʼuel. Maʼañix a pijtaya maʼ wubin. Maʼañic chuqui miʼ mejlel a mel (chaʼlen). Pero maʼ wubin chaʼan an juntiquil muʼ bʌ i mejlel i coltañet yicʼot miʼ yʌl chaʼan mucʼʌch caj i mel. ¿Bajcheʼ yubil mi caj a wubin?

² Ti lac pejtelel cʌchʌlonla ti jiñi chʌmel (sajtel). Maʼañic chuqui miʼ mejlel lac mel chaʼan mi lac putsʼtan. Pero Jehová añʌch i pʼʌtʌlel chaʼan miʼ coltañonla. ¿Bajcheʼ mi caj i mel? Tsaʼix i yʌcʼʌ i tʼan chaʼan «mi caj i jisan» jiñi chʌmel (1 Corintios 15:26).

³ ¡Ñaʼtancu jiñi tijicñʌyel muʼ bʌ caj la cubin cheʼ bʌ maʼañix jiñi chʌmel! Pero Jehová mach cojach mi caj jisan jiñi. Mi caj i coltan jaʼel jiñi chʌmeñobix bʌ. Jehová mi caj i chaʼ cuxtesañob come tsaʼix i yʌcʼʌ i tʼan chaʼan «mi caj i chaʼ cuxtiyelob» (Isaías 26:19). Jiñʌch muʼ bʌ i cʌjñel yaʼ ti Biblia bajcheʼ jiñi chaʼ chʼojyel. Ñaʼtancu bajcheʼ miʼ mejlel i coltañet ili wʌn albil bʌ.

4. a) ¿Baqui miʼ mejlel lac taj i ñuqʼuesʌntel lac pusicʼal cheʼ bʌ miʼ chʌmel juntiquil lac familia o la camigo? b) ¿Majqui jiñi wem bʌ i yamigojob Jesús?

⁴ Cheʼ bʌ miʼ chʌmel juntiquil lac familia o la camigo, wen cʼux mi la cubin. Wen chʼijiyem mi la cubin come maʼix chuqui miʼ mejlel lac mel chaʼan miʼ chaʼ cuxtʌyel.  Pero muʼ bʌ i yʌl jiñi Biblia mucʼʌch i ñuqʼuesan lac pusicʼal (pejcan 2 Corintios 1:3, 4). Laʼ laj qʼuel jumpʼejl ejemplo muʼ bʌ i pʌs chaʼan Jehová yicʼot Jesús yomʌch i chaʼ cuxtesan jiñi chʌmeñoʼ bʌ lac familia yicʼot la camigojob. Cheʼ bʌ Jesús wʌʼan ti Lum, miʼ wen julaʼtan Lázaro yicʼot i yijtiʼan i cʼabaʼ Marta yicʼot María. Wem bʌ i yamigojob Jesús tiʼ yuxticlelob. Jiñi Biblia miʼ yʌl: «Jesús tsiʼ cʼuxbi Marta yicʼot i yijtsʼin yicʼot Lázaro» (Juan 11:3-5).

5, 6. a) ¿Chuqui tsiʼ mele Jesús cheʼ bʌ tsiʼ qʼuele ti uqʼuel i familia yicʼot i yamigojob Lázaro? b) ¿Chucoch miʼ ñuqʼuesan lac pusicʼal jiñi i cʼuxel tsaʼ bʌ i yubi Jesús?

⁵ Ti jumpʼejl bʌ qʼuin Lázaro tsaʼ chʌmi, cheʼ jiñi, Jesús tsaʼ majli i ñuqʼuesʌben i pusicʼal Marta yicʼot María. Cheʼ bʌ Marta tsaʼ yubi chaʼan Jesús lʌcʼʌlix an yaʼ ti tejclum, tsaʼ majli i taj. Wen tijicña tsiʼ yubi cheʼ bʌ tsiʼ qʼuele Jesús, pero tiʼ sube: «C Yum, wʌʼic añet maʼanic tsaʼ chʌmi cʌscun». Marta tsiʼ ñaʼta chaʼan Jesús maʼañix chuqui miʼ mejlel i mel. Ti wiʼil, Jesús tsiʼ qʼuele chaʼan María woli (choncol) ti uqʼuel. Cheʼ bʌ tsiʼ qʼuele chaʼan i familia yicʼot i yamigojob Lázaro woliyob (yʌquelob) ti uqʼuel, tsaʼ caji ti uqʼuel jaʼel (Juan 11:21, 33, 35). Tsiʼ yubi jaʼel jiñi i cʼuxel muʼ bʌ la cubin cheʼ miʼ chʌmel jiñi muʼ bʌ lac wen cʼuxbin.

⁶ Jiñi i cʼuxel tsaʼ bʌ i yubi Jesús miʼ ñuqʼuesan lac pusicʼal. Miʼ pʌsbeñonla chaʼan Jesús yicʼot Jehová maʼañic miʼ mulañob cheʼ miʼ chʌmel juntiquil quixtañu (Juan 14:9). Cheʼ jaʼel, Jehová añʌch i pʼʌtʌlel chaʼan miʼ jisan jiñi chʌmel yicʼot tsaʼix i yʌlʌ chaʼan mi caj i mel.

7, 8. a) ¿Chucoch Marta mach yomic chaʼan miʼ locʼob jiñi xajlel? b) ¿Baqui bʌ milagro tsiʼ mele Jesús?

⁷ Jesús tsaʼ majli yaʼ baqui tsaʼ mujqui Lázaro. Jiñi  mucoñibʌl mʌcʌl ti colem xajlel. Jin chaʼan Jesús tsiʼ yʌlʌ: «Locʼsanla jini xajlel». Pero Marta mach yomic chaʼan miʼ locʼob come chʌmpʼejlix qʼuin i chʌmel Lázaro (Juan 11:39). Maʼañic tsiʼ ñaʼta chuqui mi caj i mel Jesús tiʼ tojlel Lázaro.

⁸ Cheʼ bʌ tsiʼ locʼoyob jiñi xajlel, Jesús tsiʼ yʌlʌ: «Lázaro, laʼ ti loqʼuel». Cheʼ jiñi, Marta yicʼot María an chuqui ñuc bʌ tsiʼ qʼueleyob: «Jini tsaʼ bʌ chʌmi tsaʼ loqʼui tilel, bʌcʼʌl i cʼʌb i yoc ti pisil» (Juan 11:43, 44). ¡Lázaro tsaʼ chaʼ cuxtʌyi! Tsaʼ ajñi yicʼot i familia yicʼot i yamigojob. Tsaʼ chaʼ mejli i tʌlob, i pejcañob yicʼot i mecʼob. ¡Jumpʼejlʌch ñuc bʌ milagro! Jesús tsiʼ chaʼ chʼojyesa Lázaro.

9, 10. a) ¿Majqui tsiʼ yʌqʼue i pʼʌtʌlel Jesús chaʼan miʼ chaʼ chʼojyesan jiñi chʌmeñoʼ bʌ? b) ¿Chucoch mucʼʌch i coltañonla jiñi relato tac chaʼan bʌ chaʼ chʼojyel?

⁹ ¿Majqui tsiʼ yʌqʼue i pʼʌtʌlel Jesús chaʼan miʼ chaʼ chʼojyesan jiñi chʌmeñoʼ bʌ? Cheʼ bʌ muʼto caj i chʼojyesan Lázaro, Jesús tsiʼ pejca Jehová i jiñʌch tsiʼ yʌqʼue i pʼʌtʌlel chaʼan miʼ chaʼ chʼojyesan (pejcan Juan 11:41, 42). Pero mach cojach Lázaro tsaʼ chaʼ chʼojyesʌnti. * Jumpʼejl ejemplo, yaʼ ti Biblia miʼ tajtʌl ti tʼan juntiquil ñoj cʼam bʌ alʌ xchʼoc am bʌ 12 i jabilel. I cʼabaʼ i tat jiñʌch Jairo i maʼañic yambʌ i yalobil. Jairo mach yujilic chuqui yom miʼ mel i tsiʼ cʼajtibe Jesús ti wocol tʼan chaʼan miʼ cʼoqʼuesʌben i yalobil. Cheʼ bʌ wolito ti tʼan yicʼot Jesús, tsaʼ cʼotiyob chaʼtiquil uxtiquil wiñicob i tiʼ subeyob: «Chʌmenix xchʼoc bʌ a walobil. ¿Chucoch wolaʼ chʌn  mʌcben qʼuin jini Maestro?» Pero Jesús tiʼ sube: «Mach a chaʼlen bʌqʼuen, chʌn ñopo ti a pusicʼal». Cheʼ jiñi, tsaʼ majliyob tiʼ yotot Jairo. Cheʼ bʌ cʼotelix mucʼob, Jesús tsiʼ qʼuele chaʼan wen woliyob ti uqʼuel jiñi wiñicob xʼixicob (quixtañujob). Jesús tiʼ subeyob: «¿Chucoch woliyetla ti uqʼuel? Jini xchʼoc mach chʌmenic. Woli ti wʌyel». Tajol i tat i ñaʼ jiñi alʌ xchʼoc maʼañic tsiʼ ñaʼtayob tsaʼ bʌ i yʌlʌ Jesús. Cheʼ jiñi, Jesús tiʼ sube jiñi quixtañujob chaʼan miʼ loqʼuelob i tsiʼ pʌyʌ majlel i tat i ñaʼ yaʼ baqui an jiñi alʌ xchʼoc. Jesús tsiʼ chucbe i cʼʌb i tiʼ sube: «Xchʼoc, mic subeñet, chʼojyen». Ñaʼtancu jiñi tijicñʌyel tsaʼ bʌ i yubi i tat i ñaʼ jiñi alʌ xchʼoc cheʼ bʌ tsaʼ chaʼ tejchi i tsaʼ chaʼ caji ti xʌmbal. ¡Jesús tsiʼ chaʼ chʼojyesa jiñi alʌ xchʼoc! (Marcos 5:22-24, 35-42). Cheʼ bʌ Jairo yicʼot i yijñam miʼ chʌn qʼuelob jiñi i yixicʼal mi caj i cʼajtesañob bajcheʼ Jehová tsiʼ coltayob tiʼ tojlel Jesús.

¹⁰ Jiñi quixtañujob tsaʼ bʌ i chʼojyesa Jesús tsaʼ chaʼ chʌmiyob ti wiʼil. Pero jiñi relato tac chaʼan bʌ chaʼ chʼojyel miʼ wen coltañonla come miʼ yʌqʼueñonla i sujm bʌ lac pijtaya. Cheʼ jaʼel, miʼ pʌsbeñonla chaʼan Jehová yomʌch i chaʼ chʼojyesan jiñi chʌmeñoʼ bʌ i mucʼʌch caj i mel.

11. Cheʼ bajcheʼ miʼ yʌl Eclesiastés 9:5, ¿chuqui tsiʼ chaʼle Lázaro cheʼ bʌ tsaʼ chʌmi?

¹¹ Jiñi Biblia miʼ yʌl chaʼan jiñi chʌmeñoʼ bʌ «maʼanix chuqui yujilob» (Eclesiastés 9:5). Cheʼʌch tsaʼ ujti tiʼ tojlel Lázaro. Cheʼ bʌ yaʼan ti mucoñibʌl, mach yujilic chuqui woliʼ yujtel tiʼ joytʌlel. Cheʼ bajcheʼ tsiʼ yʌlʌ Jesús, Lázaro cheʼʌch bajcheʼ wolijach ti wʌyel (Juan 11:11).

12. ¿Bajcheʼ mi lac ñaʼtan chaʼan Lázaro tsaʼʌch chaʼ chʼojyi?

 ¹² Cabʌl quixtañujob tsiʼ qʼueleyob cheʼ bʌ Jesús tsiʼ chaʼ chʼojyesa Lázaro. Cheʼto jaʼel, jiñi i contrajob tsaʼ cʼoti i ñaʼtañob chaʼan jiñʌch tsiʼ mele jiñi milagro. Maʼañic majqui miʼ mejlel i yʌl chaʼan mach i sujmic come Lázaro tsaʼ chaʼ cuxtʌyi (Juan 11:47). Cheʼ jaʼel, cabʌl quixtañujob tsaʼ majli i qʼuelob Lázaro i tsaʼ caji i ñopob chaʼan Jesús chocbilʌch tilel ti Dios. Jiñi i contrajob maʼañic tsiʼ mulayob iliyi, jin chaʼan tsaʼ caji i ñaʼtañob bajcheʼ miʼ mejlel i tsʌnsañob Jesús yicʼot Lázaro (Juan 11:53; 12:9-11).

13. ¿Chucoch mucʼʌch i mejlel lac wen ñop chaʼan Jehová mi caj i chaʼ chʼojyesan jiñi chʌmeñoʼ bʌ?

¹³ Jehová tsiʼ mele (pʌtʌ) pejtelel chuqui an, jin chaʼan an i pʼʌtʌlel chaʼan miʼ chʼojyesan jiñi chʌmeñoʼ bʌ. Jesús tsiʼ yʌlʌ chaʼan «jini añoʼ bʌ ti mucoñibʌl» mi caj i chaʼ chʼojyelob (Juan 5:28). Ili yom i yʌl chaʼan Jehová mi caj i chʼojyesan jiñi muʼ bʌ i cʼajtesan. Chaʼan miʼ mejlel i mel iliyi, yom miʼ cʼajtesan bajcheʼ yilal jiñi quixtañu. ¿Muʼ ba i mejlel i mel? Ñaʼtancu: Yaʼ ti panchan an cabʌl millón ecʼ i jiñi Biblia miʼ yʌl chaʼan Dios miʼ pejcan tiʼ cʼabaʼ jujumpʼejl ecʼ (pejcan Isaías 40:26). Mi Jehová miʼ mejlel i cʼajtesan i cʼabaʼ jujumpʼejl ecʼ, miʼ mejlel i luʼ cʼajtesan bajcheʼ yilal jiñi quixtañujob muʼ bʌ caj i chaʼ chʼojyesañob.

14, 15. ¿Chuqui miʼ cʌntesañonla tsaʼ bʌ i yʌlʌ Job chaʼan jiñi chaʼ chʼojyel?

¹⁴ Juntiquil i wiñic Dios ti wajali i cʼabaʼ Job tsaʼʌch i ñopo jiñi chaʼ chʼojyel. Ti jumpʼejl bʌ qʼuin tsiʼ cʼajti: «Cheʼ mic chʌmel lojon, ¿muʼ ba caj c chaʼ cuxtiyel?». Cheʼ jiñi tsiʼ yʌlʌ: «Mi cheʼʌch, mi caj c jacʼ baʼ ora maʼ pʌyon, come tiʼ yutslel a pusicʼal mi caj a cʼajtesan a winic tsaʼ bʌ a mele». Ili miʼ pʌsbeñonla chaʼan Jehová  wen yomix i chʼojyesan jiñi chʌmeñoʼ bʌ (Job 14:13-15).

¹⁵ ¿Bajcheʼ yubil maʼ wubin a bʌ cheʼ bʌ maʼ ñaʼtan jiñi chaʼ chʼojyel? Miʼ wen ñuqʼuesan lac pusicʼal cheʼ mi lac ñaʼtan chaʼan Jehová yom i chaʼ chʼojyesan jiñi chʌmeñoʼ bʌ. Pero tajol maʼ cʼajtiben a bʌ: «¿Chuqui mi caj i yujtel tiʼ tojlel c familia yicʼot camigojob chʌmeñobix bʌ? ¿Muʼ ba caj i chaʼ chʼojyelob?». Laʼ laj qʼuel chuqui miʼ yʌl jiñi Biblia chaʼan majqui mi caj i chaʼ chʼojyelob yicʼot baqui mi caj i chumtʌlob.

16. ¿Bajcheʼ yilal mi caj i chumtʌlob jiñi muʼ bʌ caj i chaʼ chʼojyelob ila ti Pañimil?

¹⁶ Jiñi quixtañujob tsaʼ bʌ chaʼ chʼojyiyob ti wajali tsiʼ chaʼ tempayob i bʌ yicʼot i familia yicʼot i yamigojob ila ti Pañimil. Cheʼʌch mi caj i yujtel jaʼel ti talto bʌ qʼuin, pero ñumen wento miʼ cajel. ¿Chucoch? Come jiñi muʼ bʌ caj i chaʼ chʼojyelob mi caj i mejlelob ti chumtʌl tiʼ pejtelel ora. Cheʼ jaʼel, qʼuexelix mi caj lac chumtʌl. Maʼañix miʼ cajel guerra, wocol tac yicʼot cʼamʌjel.

17. ¿Majqui mi caj i chaʼ chʼojyelob?

¹⁷ ¿Majqui mi caj i chaʼ chʼojyelob? Jesús tsiʼ yʌlʌ: «Mi caj i yubibeñob i tʼan i Yalobil Winic jini añoʼ bʌ ti mucoñibʌl [...]. Mi caj i chʼojyelob loqʼuel» (Juan 5:28, 29). Cheʼ jaʼel, jiñi Biblia miʼ yʌl: «Jini colem ñajb tsiʼ chaʼ colo jini chʌmeñoʼ bʌ añoʼ bʌ ti jaʼ. Jini i yajñib chʌmeñoʼ bʌ tsiʼ colo jini yaʼ bʌ añob» (Apocalipsis [Revelación] 20:13). Cheʼʌchi, yonlel quixtañujob mi caj i chaʼ chʼojyelob. Jiñi apóstol Pablo tsiʼ yʌlʌ jaʼel chaʼan mi caj i chʼojyelob «jini tojoʼ bʌ yicʼot jini mach bʌ tojobic» (pejcan Hechos 24:15).

18. ¿Majquiyob jiñi «tojoʼ bʌ» muʼ bʌ caj i chaʼ chʼojyelob?

 ¹⁸ ¿Majquiyob jiñi «tojoʼ bʌ»? Jiñobʌch jiñi i wiñicob Jehová tsaʼ bʌ chumleyob ti wajali cheʼ bʌ maxto tilemic Jesús. Tiʼ pejtelelob mi caj i chʼojyelob ila ti Lum, bajcheʼ Noé, Abrahán, Sara, Moisés, Rut yicʼot Ester. Jiñi capítulo 11 i chaʼan Hebreos miʼ taj ti tʼan chaʼtiquil uxtiquil i wiñicob Dios ti wajali. Pero ¿chuqui mi caj i yujtel  tiʼ tojlel jiñi xucʼul bʌ i wiñicob Dios muʼ bʌ i chʌmelob ti ili ora? Yaʼʌch ochemob jaʼel ti jiñi «tojoʼ bʌ» muʼ bʌ caj i chaʼ chʼojyelob.

19. a) ¿Majquiyob jiñi «mach bʌ tojobic»? b) ¿Chuqui mi caj i mel Jehová tiʼ tojlelob?

¹⁹ ¿Majquiyob jiñi «mach bʌ tojobic»? Jiñobʌch jiñi maʼañic bʌ tsaʼ mejli i cʌñob Jehová. Anquese tsaʼix chʌmiyob, Jehová mucʼʌch i cʼajtesañob. Mi caj i chʼojyesañob chaʼan miʼ mejlel i cʌñob yicʼot miʼ mejlelob ti sujtel tiʼ wiñicob.

20. ¿Majquiyob jiñi maʼañix bʌ mi caj i chʼojyelob?

²⁰ Cheʼ jiñi, ¿muʼ ba caj i chaʼ chʼojyelob tiʼ pejtelel jiñi chʌmeñobix bʌ? Maʼañic. Jesús tsiʼ yʌlʌ chaʼan an quixtañujob maʼañix bʌ mi caj i chʼojyelob (Lucas 12:5; qʼuele jiñi nota 18). ¿Majquiyob jiñi? Jiñobʌch jiñi jontoloʼ bʌ maʼañic bʌ tsiʼ jacʼʌyob i qʼuextan i melbal. Pero ¿majqui mi caj i yʌl mi juntiquil quixtañu mucʼʌch i chaʼ chʼojyel o maʼañic? Jiñʌch Jehová, jiñi ñumen ñuc bʌ xMeloñel, pero tsaʼix i yʌqʼue tiʼ wenta Jesús jaʼel chaʼan miʼ «mel jini cuxuloʼ bʌ yicʼot chʌmeñoʼ bʌ» (Hechos 10:42).

21, 22. a) ¿Bajcheʼ yilal i bʌcʼtal miʼ yʌqʼuentelob jiñi muʼ bʌ i majlelob ti panchan? b) ¿Majqui jiñi tsaʼ bʌ ñaxan chʼojyi chaʼan miʼ majlel ti panchan?

²¹ Jiñi Biblia miʼ yʌl jaʼel chaʼan an muʼ bʌ caj i majlelob ti panchan. Iliyob mi caj i chʼojyelob bajcheʼ espíritu, maʼañix mi caj i yʌqʼuentelob i bʌcʼtal.

²² Jesús jiñʌch tsaʼ bʌ ñaxan tejchi chaʼan miʼ chumtʌl ti panchan (Juan 3:13). Cheʼ bʌ ñumeñix uxpʼejl qʼuin i tsʌnsʌntel, Jehová tsiʼ chaʼ chʼojyesa pero maʼañic tsiʼ yʌqʼue i bʌcʼtal (Salmo 16:10; Hechos 13:34, 35).  Jiñi apóstol Pedro tsiʼ yʌlʌ chaʼan Jesús «tsaʼ tsʌnsʌnti tiʼ bʌcʼtal, pero tsaʼ chaʼ cuxtiyi ti jini espíritu» (1 Pedro 3:18). Tsaʼ chʼojyi bajcheʼ juntiquil pʼʌtʌl bʌ espíritu (1 Corintios 15:3-6). Pero jiñi Biblia miʼ yʌl chaʼan mach cojach Jesús mi caj i chʼojyel bajcheʼ jiñi.

23, 24. ¿Majquiyob jiñi mach bʌ cabʌlobic muʼ bʌ caj i majlelob ti panchan?

²³ Cheʼ bʌ Jesús tsʼitaʼ jachix yom chaʼan miʼ chʌmel, tiʼ sube jiñi xcʌntʼañob i chaʼan: «Mic majlel c chajpʌbeñetla laʼ wajñib» (Juan 14:2). Ili yom i yʌl chaʼan an xñoptʼañob muʼ bʌ caj i majlelob yicʼot Jesús ti panchan. Tsiʼ yʌlʌ chaʼan mach cabʌlobic (Lucas 12:32). Ti jumpʼejl i ñajal jiñi apóstol Juan tsiʼ taja i qʼuel Jesús yaʼ ti panchan i tsiʼ yʌlʌ jaytiquilob. Juan tsiʼ qʼuele «jini Tiñʌmeʼ tiʼ pam wits i cʼabaʼ Sion yicʼot waxʌclujumpic (144,000) winicob xʼixicob» (Apocalipsis 14:1).

²⁴ ¿Jalaqui mi caj i chʼojyelob jiñi 144 mil xñoptʼañob? Jiñi Biblia miʼ yʌl chaʼan jiñʌch cheʼ bʌ Jesús tsaʼix i teche i yumʌntel yaʼ ti panchan (1 Corintios 15:23). Jesús woliyix ti yumʌntel i lʌcʼʌ tiʼ pejtelel jiñi 144 mil tsaʼix chʼojyiyob i yaʼix añob yicʼot. Pero an wʌʼto bʌ añob ti Pañimil. Cheʼ bʌ miʼ chʌmelob, ti ora miʼ chʼojyesʌntelob majlel ti panchan. Cheʼ jaʼel, cabʌl quixtañujob mi caj i chʼojyelob ti talto bʌ qʼuin chaʼan miʼ chumtʌlob tiʼ pejtelel ora ti jumpʼejl paraíso ila ti Lum.

25. ¿Chuqui mi caj laj cʌn yaʼ ti yambʌ cʌntesʌntel?

²⁵ Tsʼitaʼ jachix yom chaʼan Jehová miʼ coltañonla loqʼuel tiʼ pʼʌtʌlel jiñi chʌmel yicʼot miʼ junyajl jisan (pejcan Isaías 25:8). Pero ¿chuqui mi caj i melob ti panchan jiñi 144 mil? Jiñi Biblia miʼ yʌl chaʼan miʼ cajelob ti yumʌntel yicʼot Jesús. Yaʼ ti yambʌ cʌntesʌntel mi caj lac ñumen cʌn chaʼan ili yumʌntel.