1-3. Na ituvaki cava eda bobula kece tu kina? Ena sereki keda vakacava o Jiova?

KAYA mada ke o totogitaki mo cakacaka mate e valeniveivesu ena vuku ni dua na cala o sega ni cakava. E tukuni vei iko ni o na sega vakadua ni sere. Sa na wacava nomu lomabibi ena ituvaki leqataki qori. Ni o sa sega ni vakasamataka rawa tale na ka mo cakava, o qai rogoca ni rawa ni sereki iko e dua, sa yalataka tale ga me vukei iko! Ena tarai iko vakacava qori?

² Eda bobula kece tu ina mate. Eda sega ni cakava rawa e dua na ka ena ituvaki qori se mani kaukaua vakacava noda sasaga. Ia e tu vei Jiova na kaukaua me sereki keda mai na mate. Sa yalataka tale ga ni na ‘vakamalumalumutaki na “iotioti ni meca o mate.”​—1 Korinica 15:26.

³ E veivakacegui dina noda kila nida na sega ni bobula tawamudu ina mate! Ena sega wale ga ni vakaotia o Jiova na mate, ena vakaturi ira tale ga era sa mate. Vakasamataka mada ya. E yalataka o Jiova nira na bula tale “na mate.” (Aisea 26:19) Na ka ena yaco qori e vakatoka na iVolatabu me veivakaturi.

4. (a) Na cava ena vakacegui keda ni takali e dua na wekada se noda itokani? (b) O cei eratou itokani dredre i Jisu?

⁴ E sega ni tukuni rawa na mosi kei na rarawa eda  vakila ni takali e dua na wekada se noda itokani dredre. Eda sega ni cakava rawa e dua na ka me bula tale kina o koya qori. Ia ena vakacegui keda na iVolatabu. (Wilika 2 Korinica 1:3, 4.) Meda raica mada e dua na ivakaraitaki eda na vakadeitaka kina ni rau vinakata dina o Jiova kei Jisu mera bula tale na wekada era sa mate. Ni se bula voli e vuravura o Jisu, e dau gadivi ratou nona itokani dredre. Qori o Lasarusa kei rau na ganena o Meri kei Marica. E kaya na iVolatabu: “E dau lomani Marica kei tacina kei Lasarusa o Jisu.” Ia e qai mate ena dua na siga o Lasarusa.—Joni 11:3-5.

5, 6. (a) Na cava e cakava o Jisu ni raica nodratou lolosi na weka i Lasarusa kei na nona itokani? (b) Na cava e veivakacegui kina noda kila na rai i Jisu me baleta na mate?

⁵ E gole o Jisu me lai vakacegui rau o Marica kei Meri. Ni rogoca o Marica ni sa voleka yani o Jisu, e lai tavaki koya sara ena taudaku ni korolevu. Dua na ka nona marau o Marica, ia e kaya vei Jisu: “Ke oni a tiko eke, ke a sega ni mate o ganequ.” E nanuma o Marica ni sa bera yani o Jisu. Ni raica o Jisu nodrau rarawa na veitacini kei na nona tagi voli o Meri, e vusolo na lomana, e tagi tale ga. (Joni 11:21, 33, 35) Io, e vakila o Jisu na rarawa e dau vakilai ni mate e dua eda dau veivolekati.

⁶ E veivakacegui noda kila ni sega ni taleitaka na mate o Jisu, me vakataki keda ga. E vakatotomuria tale ga o Jisu na rai i Tamana. (Joni 14:9) E tu vei Jiova na kaukaua me vakaotia vakadua na mate, qori sara ga na ka sa vakarau cakava qo.

7, 8. Na cava e sega ni vinakata kina o Marica me vaqiqici tani na vatu mai na ibulubulu i Lasarusa? Na cava e qai cakava o Jisu?

⁷ Sa lai bulu toka o Lasarusa ena dua na qaravatu e  kena isogo tu e dua na vatu levu. Ni yaco yani o Jisu, e kaya sara: “Ni kauta tani na vatu.” E sega ni duavata kei na kerekere qori o Marica ni sa siga va na mate nei Lasarusa. (Joni 11:39) E sega tiko ni kila o Marica ni sa vakarau cakava e dua na ka o Jisu vei ganena.

⁸ E kaya vei Lasarusa o Jisu: “Lako mai tuba!” Erau qoroqoro o Marica kei Meri ni rau raica na ka e yaco. “E  . . . lako mai tuba na tagane a mate, e viviraki tu na yavana kei na ligana ena isulu.” (Joni 11:43, 44) Sa bula tale o Lasarusa! Era marautaki koya na wekana kei na nona itokani. Era mokoti koya ra qai vosa vua. Dua dina na ka vakatubuqoroqoro ya, nona vakaturi Lasarusa o Jisu.

9, 10. (a) O cei e solia vei Jisu na kaukaua me veivakaturi? (b) Na cava e yaga kina na ivolatukutuku ni veivakaturi ena iVolatabu?

⁹ A sega ni veivakaturi o Jisu ena nona kaukaua ga. Ni bera ni vakaturi Lasarusa, a masu vei Jiova. Sa qai solia vua o Jiova na kaukaua me vakaturi Lasarusa. (Wilika Joni 11:41, 42.) A sega ni vakaturi ga o Lasarusa. E tukuni tale ga ena iVolatabu ni a tauvimate bibi e dua na goneyalewa yabaki 12. Qori na luvena duabau ga o Jairo. Na levu ni nona vinakata me bula o luvena, e kerei Jisu kina o Jairo me vakabulai koya. Ni rau se veivosaki tiko ga kei Jisu, era gole yani eso ra qai kaya vei Jairo: “Sa mate na luvemu! Cava mo vakaogai qasenivuli tale kina?” Ia e tukuna vei Jairo o Jisu: “Kua ni lomaleqa, mo vakabauta ga, ena bula o koya.” E gole sara kei Jairo o Jisu. E caka tiko e vale na veitagicaki ni  rau yaco yani. E kaya sara o Jisu: “Ni kua ni tagi, e sega ni mate o koya, e moce ga.” Erau rairai sega ni taura rawa na itubutubu nei goneyalewa na ka e kaya o Jisu. E kerei ira sara na tu e kea o Jisu mera vagalala, sa qai gole ga kei rau na itubutubu ina vanua e davo toka kina o goneyalewa. E taura na ligana o Jisu qai kaya vua: “Goneyalewa, au tukuna vei iko, ‘tucake!’” Sa wacava nodrau marau na itubutubu ni rau raica ni sa tucake o luvedrau qai veilakoyaki! Io, a vakaturi luvedrau yalewa o Jisu. (Marika 5:22-24, 35-42; Luke 8:49-56) Oti na ka e yaco ya, gauna kece erau raica kina na luvedrau erau vakasamataka sara na ka e cakava vei rau o Jiova ena vuku i Jisu. *

¹⁰ Era qai mate tale o ira e vakaturi ira o Jisu. Ia e yaga na kedra ivolatukutuku ni na dei kina noda inuinui. E via vakaturi ira dina na mate o Jiova, sega tale ga ni dua na ka ena tarova na nona cakava qori.

11. Na cava e vakadeitaka vei keda na Dauvunau 9:5 me baleti Lasarusa?

¹¹ E vakamatatataka na iVolatabu ni “o ira na mate era sega sara ga ni kila e dua na ka.” Qori sara ga na ituvaki kei Lasarusa. (Dauvunau 9:5) E vaka ga nona tukuna o Jisu ni moce tu o Lasarusa. (Joni 11:11) E ‘sega sara ga ni kila e dua na ka’ o Lasarusa ena nona tu ena ibulubulu.

12. Eda kila vakacava ni a vakaturi dina o Lasarusa?

 ¹² E levu era raica na nona vakaturi Lasarusa o Jisu. Era kila mada ga na meca ni qori na cakamana i Jisu. A bula tale o Lasarusa, kena ibalebale a yaco dina na veivakaturi. (Joni 11:47) Levu na lewenivanua era lako sara mera lai raici Lasarusa, era vakabauta kina ni talai Jisu mai na Kalou. Ia era sega ni taleitaka qori na meca, era mani bosea mera vakamatei Jisu kei Lasarusa.—Joni 11:53; 12:9-11.

13. Eda vakadeitaka vakacava ni na vakaturi ira na mate o Jiova?

¹³ E kaya o Jisu nira na vakaturi “o ira kece na tu ena ibulubulu nanumi.” (Joni 5:28) Kena ibalebale era na vakaturi o ira kece e nanumi ira o Jiova. Ia vakacava e rawa ni nanuma kece o Jiova na kena itukutuku e dua sa mate me rawa ni vakaturi koya? Vakasamataka ga na kalokalo e robota tu na lomalagi. E vica vata na bilioni na kedra iwiliwili, ia e kaya na iVolatabu ni kila o Jiova na yacadra yadua. (Wilika Aisea 40:26.) Ke sa nanuma rawa o Jiova na yacadra yadua na kalokalo, sega sara ga ni dredre vua me nanuma na kedra itukutuku kece o ira na vakaturi. Meda nanuma tale ga ni o Jiova e bulia na ka kece, e tu gona vua na kaukaua me vakaturi ira na mate.

14, 15. Na cava eda kila me baleta na veivakaturi ena vosa i Jope?

¹⁴ A vakabauta na veivakaturi na turaga yalodina o Jope. A taroga: “Ke mate e dua na tamata, ena bula tale?” Oti e kaya tale vei Jiova: “Oni na kaci mai, au na rogo yani. Oni na vinakata vakalevu na cakacaka ni ligamuni.” Io, e kila o Jope ni vakanamata tu o Jiova ina gauna ena vakaturi ira kina na mate.—Jope 14:13-15.

 ¹⁵ Na cava nomu rai me baleta na inuinui ni veivakaturi? De dua o na veinanuyaka, ‘Vakacava era na vakaturi tale ga na wekaqu kei na noqu itokani era sa mate?’ E veivakacegui noda kila ni vinakata dina o Jiova me vakaturi ira na mate. Meda raica mada na ka e kaya na iVolatabu me baleti ira era na vakaturi, kei na vanua era na bula kina.

16. Na ituvaki vakacava era na bula kina o ira na vakaturi?

¹⁶ O ira na vakaturi ena veigauna sa oti era marautaka tale na bula e vuravura kei na wekadra se nodra itokani. Qori tale ga na ka ena yaco ena gauna se bera mai. Ia sa na totoka sara na bula nira sa rawa ni bula tawamudu e vuravura o ira na vakaturi, era na sega tale ni mate. Na ituvaki tale ga era na bula kina ena vinaka cake mai na kena eda donuya tu ena gauna qo. Sa na sega kina na ivalu, basulawa, kei na tauvimate.

17. O cei ena vakaturi?

¹⁷ O cei ena vakaturi? E kaya o Jisu nira na “rogoca . . . na domona o ira kece na tu ena ibulubulu nanumi mera tucake mai.” (Joni 5:28, 29) E kaya tale ga na Vakatakila 20:13: “E qai solia mai o wasawasa na mate era tu kina, e solia tale ga mai o mate kei na iBulubulu na mate era tu kina.” Io, era na vakaturi e vica vata na bilioni, qai kaya na yapositolo o Paula nira na vakaturi “na yalododonu kei ira na sega ni yalododonu.” (Wilika Cakacaka 24:15.) Na cava na kena ibalebale ya?

18. O cei o ira “na yalododonu” era na vakaturi?

¹⁸ O ira “na yalododonu” era okati kina na tamata yalodina i Jiova era bula ni se bera ni lako mai vuravura o Jisu. Kena ivakaraitaki, era na vakaturi mera bula e vuravura o Noa, Eparama, Sera, Mosese, Ruci, kei Esiteri. Era vakamacalataki eso na tagane kei na yalewa qori ena Iperiu wase 11. Vakacava o ira na tamata  yalodina i Jiova era mate ena noda itabagauna? Io, era na vakaturi tale ga nira okati mera “yalododonu.”

19. O cei o ira “na sega ni yalododonu”? Na cava era na rawa ni cakava nira sa vakaturi?

 ¹⁹ O ira “na sega ni yalododonu” era okati kina na vica vata na bilioni era sega tu ni kilai Jiova ena gauna era mate kina. E sega ni guilecavi ira tale ga qori o Jiova. Era na vakaturi, ena soli vei ira na gauna mera vulica na veika me baleti Jiova ra qai qaravi koya.

20. Na cava era na sega ni vakaturi kece kina na mate?

²⁰ Sega ni kena ibalebale nira na vakaturi kece na mate. E kaya o Jisu nira na sega ni vakaturi eso. (Luke 12:5) O cei ena lewa o koya me vakaturi, o koya me kua? Na iotioti ni lewa ena tauca o Jiova, ia sa solia tale ga vei Jisu na lewa “me nodra turaganilewa na bula kei na mate.” (Cakacaka 10:42) Era na sega ni vakaturi o ira na lewai mera daucaka ca ra qai sega ni via veisau.—Raica na iKuri ni iVakamacala 19.

21, 22. (a) Na yago vakacava era na vakaturi kina o ira na lai bula i lomalagi? (b) O cei e isevu ni veivakaturi qori?

²¹ E tukuna na iVolatabu nira na lai bula i lomalagi eso. Ni mate o koya ena lai bula i lomalagi, ena sega ni vakaturi tale ina yago vakayago. Sa na vakaturi ina yago vakayalo me rawa ni lai bula i lomalagi.

²² E isevu ni veivakaturi qori o Jisu. (Joni 3:13) A vakaturi koya o Jiova ni oti e tolu na siga na nona mate. (Same 16:10; Cakacaka 13:34, 35) Ia e sega ni vakaturi ina yago vakayago o Jisu. E kaya na yapositolo o Pita ni a “vakamatei o koya ena yago vakayago, ia e qai vakabulai ena yago vakayalo.” (1 Pita 3:18) A vakaturi o Jisu me dua na kabula vakayalo! (1 Korinica 15:3-6) E kaya  na iVolatabu ni so tale ena vakayacori vei ira na veivakaturi qori.

23, 24. O cei era lewe ni “qelenisipi lailai” e cavuta o Jisu? Era le vica?

²³ A tukuna o Jisu vei ratou nona tisaipeli yalodina ni bera ni mate: “Au sa lako tiko qo meu lai vakarautaka e dua na tikina me nomudou.” (Joni 14:2) Kena ibalebale era na vakaturi eso na imuri i Jisu mera lai bula kei koya i lomalagi. E vakamacalataka o Jisu ni o ira qori era lewe ni dua na “qelenisipi lailai.” (Luke 12:32) Sa qai vakamatatataka na yapositolo o Joni na kedra iwiliwili ni raici Jisu ni “tucake tu e Ulu i Saioni [vakalomalagi], era tucake vata tu kei koya e 144,000.”—Vakatakila 14:1.

²⁴ Era na vakaturi ena gauna cava na le 144,000? E kaya na iVolatabu ni na yaco qori ni sa tekivu veiliutaki mai lomalagi o Karisito. (1 Korinica 15:23) Eda sa bula donuya sara tu ga na gauna ya, era sa vakaturi oti tale ga ina bula vakalomalagi e levu vei ira na le 144,000. O ira na se bula tiko e vuravura ra qai mate ena noda itabagauna qo era na sega tale ni wawa, era sa na vakaturi sara ina bula vakalomalagi. Ia e dua na iwiliwili levu ni kawatamata era na qai vakaturi ena gauna se bera mai mera bula ena vuravura Parataisi.

25. Na cava eda na vulica ena wase tarava?

²⁵ Sa vakarau sereka na kawatamata o Jiova mai na mate. Io, sa na oti vakadua na mate! (Wilika Aisea 25:8.) Ia na cava nodra itavi na lai bula i lomalagi? E kaya na iVolatabu nira na lai veiliutaki kei Jisu ena dua na Matanitu. Eda na qai vulica e levu tale na ka me baleta na Matanitu qori ena wase tarava.