1-3. (1) Koleā e tou tuʼā fuli ki ai? (2) E fakalauātea fefeʼaki loa tātou e Seova mei le mate?

KOTOU fakakaukauʼi muʼa: Ko se tasi e fakatuʼā ki le mate o tupu ko sana agatukipō na fai. E ave a ia o pilisoni ti se mafai ke toe fakamavae mai. Kua puli a amanaki fuli iate ia ti kua lotomamae. Kae i le tasi a aso, e logo a ia e iai le kilisiteano e mafai ke fakamavaeʼia mai a ia ti e fakapapau e tokoi ake loa a ia! Koleā e logoʼi e le tagata lenā?

² E tou tuʼā fuli ki le mate. Ti leʼese mafai ke tou lauātea mei i ai. Kae mafai ke ʼaga a Seova o fakalauātea tātou mei le mate. Na fakapapau feneʼeki mai a ia: “Ko le fili fakamuli leia e maumaui loa, ko le mate.”—1 Kolinito 15:26.

³ Kotou fakakaukauʼi muʼa le aso leia e leʼese tou toe tuʼania ai loa ki le mate. Ko se logo fakatupu fiafia. E se gato faʼi ki le ʼaga a Seova o puliʼi le mate, kae e fakapapau mai e ia e toe aumai loa “le kau mate” ki le maʼuli. (Esaia 26:19) Ko ia e fakaʼigoa i le Tosi-Tapu, ko le fakatuʼuake.

4. (1) Koleā e mafai ke fakafīmālieʼi ai tātou mokā mate a se tasi na tou alofa mamae ki ai? (2) Ko ai a kausoa o Sesu?

⁴ Mokā mate a se tasi na tou alofa mamae ki ai, e tou lotomamae ʼai. E se mafai ke tou toe fakamaʼuli ake a ia. Kae e soli mai e le Tosi-Tapu a le fakafīmālie. (Lau 2 Kolinito 1:3, 4.) Tou tioʼi se fakamatala e fakasā ai le  loto o Seova mo Sesu, ke lā toe fakatuʼuake le kakai kua mamate. Na ano tuʼumaʼu a Sesu o fakatiotio ki ona kausoa ko Lasalo mo ona tuagaʼane, ko Maleta mo Malia. Ko ia, e pati i le Tosi-Tapu: “Na alofa Sesu kia Maleta, mo lona taina, ti mo Lasalo.” Kae i le tasi a aso na mate loa Lasalo.—Soane 11:3-5.

5, 6. (1) Koleā na logoʼi e Sesu i lana tio ki le lotomamae o tuagaʼane ti mo kausoa o Lasalo? (2) Koleā e fakatupu fīmālie, mokā tou iloa na toe logoʼi e Sesu a le lotomamae?

⁵ Na ano a Sesu kia Maleta mo Malia o fakafīmālieʼi lāua. I le iloa e Maleta kua vave kaku ake a Sesu, na ano a ia o fakatau kiate ia. Na fiafia loa a Maleta i lana tio kia Sesu. Kae na pati a ia kiate ia: “Aliki kanapau na ke nofo i leinei, na leaise mate loku tuagaane.” Kia Maleta, na ʼau tausala a Sesu. Ti na tio loa a Sesu kua tagi a Malia. I le lotomamae o le tokaʼapi, na toe ʼaloʼalofa loa Sesu mo tagi. (Soane 11:21, 33, 35) E toe logoʼi e Sesu le lotomamae leia e tou logoʼi mokā mate a se tasi.

⁶ E fakatupu fīmālie, mokā tou iloa na toe logoʼi e Sesu a le lotomamae. E fakasā ai e vesiʼa a ia ki le mate. Kāpau ko le paaki lenā o Seova, ti e toe vesiʼa mo Seova ki le mate. (Soane 14:9) E mafai kia Seova, lana puliʼi le mate o talu ai, ti ko le anoʼaga lenā kua vave fakasoko e ia.

7, 8. (1) Koleā na se loto ai a Maleta ke saʼu le fā fatu leia na tapono ai le ʼana o Lasalo? (2) Koleā na fai e Sesu ma Lasalo?

⁷ Na tapono le ʼana o Lasalo ki se fatu lasi. I le kaku mai a Sesu ki ai, na pati a ia: “Kotou too le fatu.” Kae na se loto loa Maleta ki ai talie na ku aso fā lana tuku i  loto ti lagi kua sauga. (Soane 11:39) Na se iloa fua e ia pe koleā ka ʼaga a Sesu o fai ki lona tuagaʼane.

⁸ Na saʼu loa le fā fatu, ti na pati Sesu kia Lasalo: “Au ki fafo !” Na tio loa a Maleta mo Malia ki le neʼa fakapunamaʼuli na soko, na au loa Lasalo ki fafo. (Soane 11:43, 44) Na fakatuʼuake e Sesu a Lasalo. Na fakafiafia fakatasi ona fāmili mo ona kausoa mo ia. Na lotou fetāpiki mo fāfā ti mo māsau ki ai. Ko se milakulo fakatalatupuʼa.

9, 10. (1) Ko ai na soliʼia le makeke kia Sesu ke fakatuʼuake le kau mate? (2) Koleā e maʼuiga ai kia tātou a fakamatala o lātou alā na toe fakatuʼuake?

⁹ Na fakatuʼuake ko ia e Sesu le kau mate o tupu ko lona makeke tokatasi? Leʼai. I muʼa o lana fakatuʼuake a Lasalo, na faikole a ia kia Seova. Ti na soli e Seova kiate ia le makeke ke fakatuʼuake ai a Lasalo. (Lau Soane 11:41, 42.) Na se ko Lasalo fua leia na toe fakatuʼuake mei le mate. * E toe māsau a le Tosi-Tapu ki le gā taʼine na fētuʼu 12. Na veli ʼai lona masaki, ti na se iloa e lona tamana ko Sailusi pe koleā se faitoʼo ke fai ke fakamālolo ai lona taʼine. Na kole fakamālotoloto a ia kia Sesu ke fakamaʼuli ake lona toe talie ko lona taʼine fuatasi. I lana lolotoga māsau mo Sesu, na ʼau a ʼiki tagata o pati kiate ia: “Kua mate lou taine ; koleā e ke toe fakapakia ai ki le pule ?” Na tali feneʼeki a Sesu kia  Sailusi: “Aua na ke tuania, tui fua ti e mauli loa a ia.” Na ano loa a Sesu mo ia ki lona kāiga. I lalātou kaku atu, na logo a Sesu ki le kakai e lotou fetagisi. Na pati loa a ia kia lātou: “Aua na kotou fetagisi ; e leaise mate a ia, kae e moe a ia.” Lagi na se matala a matuʼa o le taʼine ki le neʼa e māsau a ia ki ai. Na fakamavae loa e Sesu le kakai ki fafo, kae na ano loa a ia mo mātuʼa o le taʼine ki lona koga fale. Na toʼo loa e ia le lima o le taʼine o pati: “E kau pati atu, taine, tuu ki aluga !” I le lakaga faʼi lenā, na tuʼu loa le taʼine ki aluga, o kamata saʼele, ti na punamaʼuli ona mātuʼa mo lā fiafia lasi ʼai. Kua toe fakatuʼuake e Sesu le taʼine. (Maleko 5:22-24, 35-42; Luka 8:49-56) Talu mei le aso lenā, mokā tio lāua ki lolāua taʼine, ti e lā manatu ki le neʼa na fai e Seova ma lāua mei le faigamālie o Sesu.

¹⁰ Ko kakai alā na toe fakatuʼuake e Sesu kua lotou toe mamate. Ko fakamatala o uiga mo lātou alā na fakatuʼuake, e maʼuiga ti mo ʼaoga kia tātou talie e tou maʼua ai se amanaki mālie. Ko ia, e fakasoko loa e Seova lana fakapapau ki le toe fakatuʼuake o le kau mate.

11. Koleā e fakamāʼoki ki ai a le koga tosi o Ekelesiasi 9:5 o uiga mo le fakamatala o le fakatuʼuake o Lasalo?

¹¹ E pati i le Tosi-Tapu: “E leaise iloa se nea” e latou ala kua mamate. (Ekelesiasi 9:5) E fakamāʼoki ki ai le fakamatala leinei o le toe fakatuʼuake o Lasalo. I lona tuku i le ʼana, na leaise iloa fua e ia se neʼa. O fai pe le pati a Sesu, ko Lasalo e moe.—Soane 11:11.

12. Koleā e mafai ke tou tui na fakatuʼu māʼoki ake Lasalo?

 ¹² Na tokaʼapi lātou na tio ki le fakatuʼuake e Sesu o Lasalo. Toe felaʼaki mo ona fili, na lotou tio mata ki le milakulo lenā na fai e Sesu. Na toe maʼuli Lasalo o fakamāʼoki ai lona toe fakatuʼuake. (Soane 11:47) Na tokaʼapi lātou na ʼau o tio kia Lasalo. Ti na lotou iloa ai ko Seova leia na kakauʼia mai a Sesu. Kae na loto veli ʼai ona fili kiate ia, o lātou fakatuʼutuʼu ke lotou ʼaga o mateʼi a ia mo Lasalo.—Soane 11:53; 12:9-11.

13. E tou tui papau fefeʼaki e toe fakatuʼuake loa e Seova a le kau mate?

¹³ Na pati Sesu ko “latou fuli ala e nonofo i tanuma” e toe fakatuʼuake loa lātou. (Soane 5:28) Ko lona fakaʼuiga, e toe fakatuʼuake loa e Seova lātou fuli alā na mamate. Kae ke toe fakatuʼuake e Seova a se tasi, e tonu ke toe manatuʼi e ia a lona uiga totonu. Kae e mafai ko ia ke toe manatuʼi a ia e Seova? Eio. E tou tio e lasi ʼai a fetuʼu, ti e pati i le Tosi-Tapu: E iloa e Seova o lātou igoa fuli. (Lau Esaia 40:26.) Kāpau e mafai ke manatuʼi e ia a igoa o fetuʼu fuli, ti leʼaise faigataʼa lana toe manatuʼiʼia lātou alā e tonu ke fakatuʼuake mei le mate. Tasi leia, kāpau ko Seova le Tupuʼaga o neʼa fuli, e toe maʼua e ia le makeke ke toe fakatuʼuake le kau mate ki le maʼuli.

14, 15. Koleā le ako e tou maʼua mei le māsau na fai e Sopo o uiga mo le fakatuʼuake?

¹⁴ Ko Sopo ko le tagata agatonu a Seova. Na vesili a ia: “Ka na feala ke toe maʼuli le tagata leia kua mate.” Ti na toe pati feneʼeki a ia kia Seova: “E ke kalaga mai loa kiate au, ti e kau tali atu loa kiate koe, e ke fia tio loa ki le gaoiaga o ou lima.” Na tui a Sopo ki le fakatuʼuake. Ti na iloa e ia, le fakaʼamu a Seova ke soko  mai la le temi ke toe fakatuʼuake e ia a le kau mate.—Sopo 14:13-15.

¹⁵ Koleā e kotou logoʼi mokā kotou manatu ki le fakatuʼuake? E fakatupu fiafia kia tātou a latātou iloa e fakatuʼuake loa e Seova le kau mate. Lagi e tou manatu feneʼeki: ‘E toe fakatuʼuake loa oku fāmili mo oku kausoa? Ko ai lātou ka toe fakatuʼuake? E lotou maʼuʼuli loa i fea?ʼ Tou tioʼi muʼa le manatu a le Tosi-Tapu.

16. E fefeʼaki loa le maʼuli o lātou alā ka toe fakatuʼuake ki le kele?

¹⁶ I muʼa atu ko lātou alā na fakatuʼuake, na lotou toe maʼuʼuli mo olātou fāmili mo olātou kauneʼa i le kele. Ti ko le anoʼaga lenā ka soko loa i le temi kāʼau, kae e toe kese ake loa lona mālie. Koleā lona tupuʼaga? Talie ko lātou alā ka toe fakatuʼuake ki le kele, e lotou maʼua loa le faigamālie ki le maʼuli leʼegato. E lotou maʼuʼuli loa i se mālama e kese ake i le temi nei. E leʼaise toe iai loa ni tau, ni agamakeke mo ni masaki.

17. Ko ai ma lātou alā ka toe fakatuʼuake?

¹⁷ Ko ai ma lātou alā ka toe fakatuʼuake? Na pati loa a Sesu: “E logo ai loa latou fuli ala e nonofo i tanuma ki lona leo, ti e lotou ulu loa ki tafa.” (Soane 5:28) Ti e fakasā i Apokalipisi 20:13: “Na tuku ake loa e le tai a kau mate ala na maua e ia. Ti na tuku ake loa e le mate mo le nofoaga o le kau mate a kau mate ala na la maua ia.” E tokaʼapi lātou alā ka toe fakatuʼuake. Na toe pati foki le apositolo ko Paulo: E i ai loa “se toe tuuake o le kau agatonu mo le kau lee agatonu.” (Lau Tosi Gaoi 24:15.) Koleā lona fakaʼuiga?

18. Ko ai “le kau agatonu” ka toe fakatuʼuake loa?

 ¹⁸ Ko “le kau agatonu” ko lātou alā na kaunaga kia Seova i muʼa o le ʼau a Sesu ki le kele. O fai pe, Noe, Apalaamo, Sala, Moisese, Lute ti mo Esitele, e fakatuʼuake loa lātou anā ki le maʼuli i le kele. Ti e māsau i Epeleo kapite 11 kia lātou anā. Kae e fefeʼaki ki kaunaga a Seova e mamate i le temi nei, e toe fakatuʼuake loa ko  ia mo lātou? Eio, talie e lotou kau ki “le kau agatonu.”

19. Ko ai “le kau lee agatonu”? Ko le faigamālie fea ka ʼaga loa Seova o soli kia lātou?

¹⁹ Ko “le kau lee agatonu” ko lātou alā na mamate kae lekise lotou maʼua le faigamālie ke lotou iloa a Seova. E leʼaise galoʼi lātou e Seova. Ko ia e toe fakatuʼuake loa e ia lātou, ti e lotou maʼua loa le faigamālie ke lotou iloʼia ti mo tausi kiate ia.

20. Ko ai ma lātou alā ka se toe fakatuʼuake?

²⁰ Ko lona fakaʼuiga, e toe fakatuʼu fuli ake loa le kau mate? Leʼai. Na pati feneʼeki a Sesu: E iai a ʼiki e leʼese toe fakatuʼuake loa. (Luka 12:5) Ko ai leia e fakalogo ki ai le toe fakatuʼuake o se tasi? Ko Seova, le Tuifakamāu leia ko le pule tauʼaluga. Kae na toe soli e ia kia Sesu le pule ke mafai lana liliu ko le “tui fakamaau o le kau mauli mo le kau mate.” (Tosi Gaoi 10:42) Ko ai ma lātou ka se toe fakatuʼuake? Ko lātou e pati ko ni kau agaveli alā e se fia fetogi mo fia tafoki.—Lau le Nota Fakaʼoki 19..

21, 22. (1) E fefeʼaki loa lātou alā ka toe fakatuʼuake ki selo? (2) Ko ai leia na ʼuluaki fakatuʼuake ki selo?

²¹ E fakasā i le Tosi-Tapu e iai loa a ʼiki ka maʼuʼuli i selo. Mokā toe fakatuʼuake a se tasi ki selo, e leʼaise toe tuʼuake loa a ia i se tino fakatagata. E maʼua loa e ia se tino fakalaumālie ko lona fakaʼuiga o fai pe se āselo.

²² Ko Sesu le ʼuluaki fakatuʼuake ki le maʼuli i selo. (Soane 3:13) Na fakatuʼuake a ia e Seova i le tolu o aso mei lona mate. (Pesalemo 16:10; Tosi Gaoi 13:34, 35) Na se fakatuʼuake a ia i lona tino fakatagata. E fakamatala e le apositolo ko Petelo: “Na tamate a ia i lona tino fakatagata, kae na toe aumai a ia ki le mauli [“i,” MN]  le Laumalie.” (1 Petelo 3:18) Ko ia na toe liliu loa a Sesu ko se āselo makeke! (1 Kolinito 15:3-6) Kae e fakasā i le Tosi-Tapu, ko ʼiki e fakatuʼuake loa ki selo.

23, 24. (1) Ko ai e kau ki le “ga kau manu ikiiki” leia na māsau ki ai a Sesu? (2) E lotou toka fia loa?

²³ I muʼa o lona mate, na pati a Sesu ki ana tisipulo: “E kau ano o teuteui se nofoaga kia koutou.” (Soane 14:2) Ko lona fakaʼuiga, ko ʼiki i ana tisipulo e fakatuʼuake loa ke maʼuli mo ia i selo. E lotou toka fia? Na pati a Sesu: E ko ni “ga kau manu ikiiki,” ko ia e se lotou ʼapi loa. (Luka 12:32) Na fakasā e le apositolo ko Soane pe na lotou toka fia. Na tio a ia kia Sesu na tuʼu: “I le mauga o Sione [i selo], ti na tuu mo ia se kakai ko le tino lelau tino fa tupu fa afe.”—Apokalipisi 14:1.

²⁴ Ko āfea e toe fakatuʼuake loa le tino 144000 Kilisiteano anā? O mulimuli ki le Tosi-Tapu, e koi fakatuʼuake loa lātou mokā ʼoki le fakanofo o Sesu ko le sau i selo. (1 Kolinito 15:23) E tou maʼuʼuli nei i le temi lenā. Ko ʼiki ʼi le tino 144000 Kilisiteano kua ʼoki i le fakatuʼuake ki selo. Kae ka mate se tasi ia lātou koi maʼuʼuli i le kele, ti e toe fakatuʼuake a ia i le temi lenā ki selo. Kae, ki le tokaʼapi e fakatuʼuake loa lātou i se temi, ke maʼuʼuli i le kele ka fakaliliu loa ko le Palatiso.

25. Koleā ka tou ako loa i le kapite ka soa mai?

²⁵ Kua vave fakalauātea loa e Seova a le mālamanei mei le mate! (Lau Esaia 25:8.) Koleā e fai loa e le kau tino 144000 Kilisiteano i selo? E fakasā i le Tosi-Tapu ko lātou anā, e sau fakatasi loa mo Sesu i lona Puleʼaga. Kae e fakasā i le kapite ka soa mai a ʼiki anoʼaga o uiga mo le puleʼaga lenā.