1-3. Ichwe chwena tukaramulirwaki? isi, Yehova naija kutwihya atai omwiramu elyo?

TEKELEZA oramwirwe kufungwa ebiro byona orw’enshonga yekintu eky’otakozire. Kandi tibashobora kukutaishura, wayetamirwe, nobona toina kyakukora. Omu kany’ako mbali olikuba oyetamirwe muno nobona omuntu aina obushobora bw’okubasa kukwiya omukifungo mara nakushubiza kukujuna! Isi, wakwehulira otai?

² Ichwe chwena turamwirwe kufa. N’orwo twakukoraki titubasa kutantara rufu. Kyonka Yehova aina amani ag’okubasa kutwiya omu rufu. Wenene atulaganisize ati: “Omubisha alisiliika ali w’enzindo ni rufu.”​——1 Abakorinto 15:26.

³ Tekeleza okwo olyehulira arwo abantu baliba batakifa! Yehova talihyaho rufu kushai alihimbura na balinya abafire. Tekeleza okwo ebintu biliba. Yehova natushubiza ati, “alihimbura abafire eirai” babase kurora. (Isaya 26:19) Ekigiro ekyo, Ebibulia nekyeta okuhimbuka.

4. (a) Munywanyi waitu anga omuntu owo tulikuzarwa nawe karikufa nikihai ekya kutumaramara? (b) Banywanyi ba Yesu bakaba bali bahai?

⁴ Barumuna baitu anga banywanyi baitu orwo balikufa ichwe nitushasha muno mara nitujunahara. Nitwebona titwina bujuni bwona bwona. Titwina bushobora bwa kumuhimbura. Kyonka nitubasa kumaramarwa n’amazima agali omu Bibulia.  (Shoma 2 Abakorinto 1:3, 4.) Katulebeho obulebero obulikworekya nk’okwo Yehova na Yesu nibegomba muno kuhimbura abagonzibwa baitu. Yesu orwo yabaire aly’omu nsi yakyaliraga Lazaro hamoi na banyanya Lazaro; Maria na Marita. Kyonka ekiro kimoi Lazaro akafa.​—Yohana 11:3-5.

5, 6. (a) Yesu akakoraki orwo yashangire abarumuna hamoi na banywanyi ba Lazaro nibachura? (b) Katulikumanya nk’okwo Yesu nayehulira nkaichwe okwo twehulira tufeleirwe, kubaki ekyo nikitumaramara?

⁵ Yesu akagenda kumaramara Maria na Marita. Marita kayahuliire okwo Yesu alikwija, akagenda kumwakilira. Akashemelerwa muno kubona Yesu, Kyonka agambira Yesu ati: “Mukama kuba obaire oliho munyanyazi tiyakufire.” Marita akaba natekeleza ati shana rundi Yesu yakelelerwa. Aho Yesu abona Maria nalira. Orwo yaboine amajune agobabaire bainago ajunahara omu mwoyo nawe abanza kulira. (Yohana 11:21, 33, 35) Ekyo kikashasa muno Yesu, nkaichwe okwo twehulira obushasi orw’omugonzibwa waitu afa.

⁶ Katulikumanya nk’okwo Yesu nayehulira nkaichwe okwo twehulira tufeleirwe ekyo nikitumaramara, Orw’okuba Yesu aina engesho nk’ezaishe. (Yohana 14:9) Yehova aina obushobora bw’okwihyaho orufu, mara naija kukora atyo omu kanya akalikwija.

7, 8. Kubaki Marita tiyayenzire kabaihyaho eibare ely’obutahiro bw’empako mbali Lazaro yabaire azikirwe, kyonka Yesu akakoraki?

⁷ Yesu orwo yagobire aha mpako mbali Lazaro yabaire azikirwe, aha butahilo bw’empako hakaba hakingirweho eibare lihango. Aho Yesu abagambira “kwihyaho eibare elyo.” Kyonka Marita ahakana, orw’okuba omubili gwa Lazaro gukaba guzikirwe omu mpako gumaziremu  ebiro binai. (Yohana 11:39) Marita akaba atalikumanya ekyo Yesu yabaire nagonza kukora abase kujuna murumunawe.

⁸ Aho Yesu agambira Lazaro ati: “Lazaro turuka!” Marita na Maria bakagwa omu kitangaro. Orw’okuba “ayabaire afire aturuka emikono n’amaguru bikomire ebitambara.” (Yohana 11:43, 44) Lazaro ashuba arora orundi, abonangana na barumunabe na banywanyibe. Bamunyegeza muno, bashuba bagendelera kufumora nawe. Ekyo kikaba kili kitangaro ky’amani, orw’okuba Yesu akahimbura Lazaro.

9, 10. (a) Isi, nohai ayahaire Yesu amani ag’okuhimbura abafu? (b) Isi, kubaki ebaruro y’okuhimbura abafu negasha muno omuli ichwe?

⁹ Isi, Yesu akahimbura abafu omu manige? Chei. Yesu akashaba amani kuruga ahali Yehova orwo yabaire atakabandize kuhimbura Lazaro (Shoma Yohana 11:41, 42.) Lazaro tiwe wenka ayahimbwirwe. Ebibulia netushobororaho omwisiki w’emyaka 12 ayabaire arwaire muno. Yairo, ishe omwisiki ogwo akaba yayetamirwe orw’enshonga y’oburwaire bw’omwanawe, agenda kutagiliza Yesu kakiza omwanawe. Akaba ali mwanawe omugonzibwa. Kayabaire akyagambira Yesu haija abashaija bamugambira bati: “Muhara wawe yafire Omwegesa otamwita kubi lekera.” Kyonka Yesu agambira Yairo ati: “Otatina iwe kikuru oyesige” muhara wawe naija kurokorwa. Aho bakwata ekihanda bagenda omwa Yairo, Kyonka orwo babaire baija kugoba omwa Yairo Yesu ahulira abantu nibachura eyobobo. Yesu abagambira ati: “Kiki nka muliyo nimuchura eyobobo? Omwana tafire anagiire.” Ekigambo ekyo kikashobeza abazaire b’omwana ogwo. Yesu aturukya abantu bona  aheru akwata Yairo na mukaziwe na balinya abo yabaire ainabo bataha omu kiyumba mbali babaire bamubyamikire akwata omwana omukono amugambira ati: “Kaisiki ninkugambira imuka!” Tekeleza amashemelerwa ago babaire bainago orwo omwana yayemeleire akabanza kutambuka! Yesu akahimbura omwisiki ogwo. (Mariko 5:22-24, 35-42; Luka 8:49-56) Buli kanya orwo babonaga omwisiki ogwo baijukaga ekyo Yehova yabakoleire kulabira ahali Yesu. *

¹⁰ K’ebiro byabaire byahingwire abantu abo Yesu yahimbwire bakashuba bafa. Kyonka ebigambo ebyo tulikushoma ebibakweteho bina omugasho omuli ichwe orw’enshonga nibituha eshuubi eli kwokwokwo. Yehova nagonza muno kuhimbura abantu, mara aina ekihika eky’okukor’atyo.

11. Okufa kwa Lazaro kukorekya kutai amazima g’eihandiiko lya Mwegesa 9:5?

¹¹ Ebibulia negamba kabutekire nk’okwo “abafire tibalikumanya kyona kyona.” Okufa kwa Lazaro kukorekya kwokwokwo amazima ago. (Mwegesa 9:5) Nk’okwo Yesu yabaile yagambire, Lazaro akaba nashana omuntu anagiire. (Yohana 11:11) Lazaro orwo yabaire azikirwe omu mpako akaba “atalikumanya kyona kyona.”

12. Nitumanya tutai okwo okuhimbuka kwa Lazaro kwabaireho?

¹² Yesu akahimbura Lazaro omu maisho g’abantu bangi.  Nangu n’ababisha ba Yesu bakabona okwo yakozile ekitangaro ekyo. Lazaro akashuba yarora orundi, ekyo nikyorekya kwokwokwo okwo okuhimbuka kwabaireho. (Yohana 11:47) Abantu bangi muno bakagenda kukyalira Lazaro nabo besiga okwo Yesu yatumirwe Katonda. Ekigiro ekyo kikatamisa muno ababisha ba Yesu, kityo bategeka kwita Yesu na Lazaro.​—Yohana 11:53; 12: 9-11.

13. Kubaki nitwesiga muno okwo Yehova arahimbura abafu?

¹³ Yesu akagamba ati, “balinya bona abali omu bituro ebilikwijukwa mbaijakuhimburwa” (Yohana 5:28, NW) Ekigiro ekyo nikyorekya okwo, abantu bona abo Yehova alikwijuka nibaija kuhimbuka. Kyonka Yehova kwija kuhimbura omuntu, nayetaga kwijuka buli kantu akakwete aha muntu ogwo. Isi, yakubasa kwijuka buli kantu? Aliho amabilioni g’enyanyinyi eiguru, Ebibulia negamba okwo Yehova namanya amabara g’enyanyinyi ezo zona. (Shoma Isaya 40:26.) Nitwesiga okwo Yehova aina obushobora bw’okuhimbura abafu orw’okuba akatonda buli kintu.

14, 15. Nitwegaki kuruga aha bigambo bya Yobu ebikwete aha kuhimburwa?

¹⁴ Yobu, ayabaire ali mugorogoki, akabanayesiga nk’okwo okuhimbuka kuliho. Akabaza ati: “Omuntu k’afa ashuba arora?” ashuba agambira Yehova ati: “Aho olinyeta nkwetabuke, kandi olinshemelerwa inye ekitondwa kyawe.” Mazima, Yobu akaba namanya okwo Yehova atekatekire akanya ak’okwija kuhimbura abafu.—Yobu 14:13-15.

¹⁵ Isi, iwe noyehulira otai kolikuba notekeleza eshuubi y’okuhimburwa? Ndenga wakwebazaho oti, isi, abarumuna hamoi na banywanyi bange balihimburwa?  Katulikumanya okwo Yehova naija kuhimbura abafire ekyo nikitumaramara. Katuhenjuze tumanye ekyo Ebibulia elikugamba ekikwete ahali balinya abarahimburwa na mbali baratura.

16. Abarahimburwa nibaija kutura omu nsi elikushana etai?

¹⁶ Balinya abahimbwirwe karai, bakagendelera kwikara na barumuna babo na banywanyi babo omu nsi. Ekintu ekyo nikija kubaho orundi omu kanya akalikwija, kyonka nikija kukorwa omu ngeli elinungi kushagaho. Kubaki? Orw’enshonga balinya abalahimburwa nibaija kubona akanya ak’okwikara omu nsi eirai lyona mara tibalifa nakati. Mara nibaija kwikara omu nsi etalikushanangana n’egi. Omu nsi egyo tihalibamu ndashana, obubi n’endwara.

17. Nibahai abalihimburwa?

¹⁷ Nibahai abalihimburwa? Yesu akagamba ati: “Balinya bona abali omu bituro ebilikwijukwa balihulira eirakalye bahimbuke.” (Yohana 5:28, 29, NW) Kandi eihandiiko ly’Okushurulirwa 20:13 niligamba liti: “Enyanja eshohoza abafu ababaire bagilimu, Rufu agira kwo na Kuzimu kutyo.” Mazima, amamilioni g’abantu nibaija kurora orundi. Entumwa Paulo ekagamba nk’okwo “abagorogoki n’abatali bagorogoki” nibaija kuhimburwa. (Shoma Ebikorwa 24:15, NW.)

18. “Abagorogoki” abalihimburwa nibahai?

¹⁸ “Abagorogoki” ni hamoi n’balinya abesigwa ba Yehova abatwire Yesu atakaizire omu nsi. Abantu abo ninka; Noa, Aburahamu, Sara, Musa, Rutu, hamoi na Esita nibaija kuhimburwa baikare omu nsi. Wakubasa kushoma ebikwete aha bashaija n’abakazi abo omu mutwe gwa 11 y’ekitabo eky’Abaheburania. Isi, abakozi  ba Yehova abesigwa abali kufa kany’aka nibaija kubona mperwaki? Orw’okuba “bagorogoki,” kityo nibaija kuhimburwa.

19. “Abatali bagorogoki” nibahai? Isi, Yehova naija kubaha akanya ak’okukoraki?

 ¹⁹ “Abatali bagorogoki” mamilioni g’abantu abafire bataboine kanya k’okwega amazima agakwete ahali Yehova. N’orwo bafire, Yehova takabebirwe. Naija kubahimbura abaheleze akanya k’okwega amazima babase kumukolera.

20. Kubaki ti bantu bona abarahimburwa?

²⁰ Isi, ekyo nikyorekya nk’okwo buli muntu ayafire naija kuhimburwa? Chei. Yesu akagamba nk’okwo abandi tibalihimburwa. (Luka 12:5) Isi, n’ohai ayakuramura nk’okwo omuntu asaine kuhimburwa anga tasaine kuhimburwa? Yehova niwe muramuzi mukuru, kyonka ahaire Yesu obushobora obwo “kuramura abarora n’abafire.” (Ebikorwa 10:42) Balinya abalikukora entambara batechulize tibalihimburwa.​—Shoma Ekishoborozo Ekyongeirweho 19.

21, 22. (a) Balinya abarahimburwa kugya omwiguru nibaija kuba baina mubili gwa ngeliki? (b) N’ohai ayabaire ali wambere kuhimbuka kugya omwiguru?

²¹ Ebibulia netugambira okwo abantu bake nibaija kutura omwiguru. Balinya abarahimburwa kugya omwiguru, tibalihimburwa baina mubili nyabubili. Abalihimburwa kugya omwiguru balihimburwa baina omubili gw’omwoyo.

²² Yesu niwe muntu wa mbere kuhimbuka kugya omwiguru. (Yohana 3:13) Yesu orwo yafire, Yehova akamuhimbura omu kiro kya kashatu. (Ezaburi 16:10; Ebikorwa13:34, 35) Yesu orwo yahimbwirwe akaba ataina mubili nk’ogwabantu. Entumwa Petero neshobolora eti, “akaitwa omubili, kyonka akakorwa kuba murora omu mwoyo.” (1 Petero 3:18, NW) Yesu  akahimburwa ali kitondwa ky’omwoyo! (1 Abakorinto 15:3-6) Ebibulia negamba nk’okwo araba atali wenka.

23, 24. Isi, “obuhyo buke” obwo Yesu yagambireho nibahai, n’orubara rwabo ni bangahai?

²³ Orwo Yesu yabaire atakafire akagambira abegesibwabe ati: ‘Ningya kubashemeleza omwanya.’ (Yohana 14:2) Ekyo kikaba nikyorekya nk’okwo abahondezi ba Yesu bakuhimbwirwe babase kwikara nawe omwiguru. Orubara rwabo nibangahai? Yesu akagamba nk’okwo orubara rwabo, bantu bake, “buhyo buke.” (Luka 12:32) Entumwa Yohana ekabona orubara orwo hamoi na Yesu aha Ibanga lya Sioni “Akaba aina abantu 144,000.”​—Okushurulirwa 14:1.

²⁴ Abakirisito abo 144,000, bakabanza kuhimburwa maki? Ebibulia netushoborora nk’okwo okuhimburwa kwabo kwakubandize orwo Yesu yakubaire mutwazi omwiguru. (1 Abakorinto 15:23) Mara nitwikara omu kanya ako bangi omuli 144,000 bahimbukire kugya kutura omwiguru. Kyonka balinya abasigaire omu nsi, orwo balikufa nibahimburwa kany’ako babase kugya kutura omwiguru. Kityo abantu bangi nibaija kuhimburwa akanya akaraija babase kwikara omu nsi eliba eli paradiso.

25. Nitwija kwegaki omu mutwe ogulikuhonderaho?

²⁵ Akanya kake, Yehova naija kwihyaho orufu omu bantu bona! (Shoma Isaya 25:8.) Kyonka balinya abalihimburwa kugya omwiguru balikorayoki? Ebibulia neshoborora nk’okwo baliba batwazi hamoi na Kirisito omu bukama bwa Katonda omwiguru. Omu mutwe ogulikuhonderaho nitwija kwegaho ebikwete aha Bukama obwo.