1-3. Sa diin kita tanan napriso, kag paano kita hilwayon ni Jehova?

IMADYINA nga ginsentensiahan ka nga mapriso sa bilog mo nga kabuhi bangod sa krimen nga wala mo nahimo. Wala gid sing tsansa nga makagua ka. Daw wala ka na sing paglaum, kag daw wala ka na sing mahimo. Pero sang daw mangampo ka na, may nakilala ka nga may ikasarang sa pagpagua sa imo kag nagpromisa sia nga buligan ka niya! Ano ang batyagon mo?

² Tanan kita napriso sa kamatayon. Indi gid kita makapalagyo sa sini bisan ano pa ang himuon naton. Pero may gahom si Jehova nga hilwayon kita sa kamatayon. Kag nagpromisa sia nga “ang kamatayon amo ang katapusan nga kaaway nga iya dulaon.”—1 Corinto 15:26.

³ Sigurado nga maumpawan ka gid kay wala ka na mahadlok sa kamatayon! Pero indi lang pagdula sa kamatayon ang himuon ni Jehova. Buhion man niya liwat ang mga napatay. Pamensara ang epekto sini sa imo. Nagpromisa sia nga mabuhi liwat “ang mga wala sing mahimo sa kamatayon.” (Isaias 26:19, footnote) Amo ini ang ginasiling sang Biblia nga pagkabanhaw.

4. (a) Ano ang makapaumpaw sa aton kon mapatyan kita sang pamilya ukon abyan? (b) Sin-o ang suod nga mga abyan ni Jesus?

⁴ Kon mapatay ang miembro sang aton pamilya ukon suod nga abyan, grabe gid ini kasakit kag kasubo. Wala gid kita sing mahimo. Indi naton sia mabuhi liwat. Pero may matuod nga paumpaw nga ginahatag ang Biblia  para sa aton. (Basaha ang 2 Corinto 1:3, 4.) Istoryahan naton ang isa ka halimbawa nga nagapakita nga gusto gid ni Jehova kag ni Jesus nga buhion liwat ang aton napatay nga pinalangga. Sang si Jesus diri sa duta, pirme sia nagabisita kay Lazaro kag sa iya mga utod nga si Marta kag si Maria. Suod gid sila nga mga abyan ni Jesus. Ang Biblia nagasiling: “Ginahigugma ni Jesus si Marta kag ang iya utod nga babayi kag si Lazaro.” Pero isa ka adlaw, napatay si Lazaro.—Juan 11:3-5.

5, 6. (a) Ano ang ginhimo ni Jesus sang nakita niya ang pamilya kag mga abyan ni Lazaro nga ginasubuan gid? (b) Ngaa makapaumpaw gid nga mahibaluan ang nabatyagan ni Jesus parte sa kamatayon?

⁵ Nagkadto si Jesus para paumpawan si Marta kag si Maria. Sang nabal-an ni Marta nga nagapakadto na si Jesus, naggua sia sa siudad para sugataon ini. Nalipay sia sang nakita niya si Jesus, pero nagsiling sia: “Kon diri ka lang, wala kuntani mapatay ang akon utod.” Nagpensar si Marta nga ulihi na si Jesus. Dayon nakita ni Jesus ang utod ni Marta nga si Maria nga nagahibi. Sang nakita niya nga ginasubuan sila, nasakitan gid sia kag naghibi. (Juan 11:21, 33, 35) Nabatyagan niya ang grabe nga kasakit kon mapatyan kita sang pinalangga.

⁶ Makapaumpaw gid mahibaluan nga nabatyagan man ni Jesus ang aton ginabatyag. Kag si Jesus pareho sa iya Amay. (Juan 14:9) May gahom si Jehova sa pagdula sang kamatayon sing dayon, kag amo gid sini ang himuon niya sa indi madugay.

7, 8. Ngaa ginpunggan ni Marta nga kuhaon ang bato sa lulubngan ni Lazaro, pero ano ang ginhimo ni Jesus?

⁷ Sang nag-abot si Jesus sa lulubngan ni Lazaro, natabunan  na ini sang daku nga bato. Nagsiling si Jesus: “Kuhaa ninyo ang bato.” Pero ginpunggan sila ni Marta. Apat ka adlaw na nga nalubong si Lazaro. (Juan 11:39) Wala gid sia nakahibalo kon ano ang pagahimuon ni Jesus sa iya utod.

⁸ Nagsiling si Jesus kay Lazaro: “Gua ka!” Nagdayaw gid si Marta kag si Maria sa ila nakita. “Ang tawo nga napatay naggua. Ang iya mga tiil kag mga kamot nasamburan sang tela.” (Juan 11:43, 44) Nabuhi liwat si Lazaro! Nakaupod niya liwat ang iya pamilya kag mga abyan. Mahakos na nila sia kag maistorya. Milagro gid ini! Ginbanhaw ni Jesus si Lazaro.

9, 10. (a) Diin naghalin ang gahom ni Jesus sa pagbanhaw? (b) Ngaa ang rekord parte sa pagkabanhaw importante gid sa aton?

⁹ Ginbanhaw bala ni Jesus ang mga tawo paagi sa iya gahom? Indi. Antes niya ginbanhaw si Lazaro, nangamuyo si Jesus kay Jehova, kag ginhatagan sia ni Jehova sang gahom para banhawon si Lazaro. (Basaha ang Juan 11:41, 42.) Indi lang si Lazaro ang ginbanhaw. Ginasugid sang Biblia ang parte sa 12 anyos nga bata nga babayi nga may malubha nga balatian. Desperado na gid ang iya amay nga si Jairo, gani nakitluoy sia kay Jesus nga ayuhon ini. Bugtong lang niya ini nga bata. Samtang nagaistorya sia kay Jesus, may nagpalapit nga mga lalaki kag nagsiling: “Ang imo anak nga babayi patay na! Ngaa tublagon mo pa ang Manunudlo?” Pero nagsiling si Jesus kay Jairo: “Indi ka magkahadlok, magtuo ka lang, kag maluwas sia.” Dayon nag-upod sia kay Jairo pauli. Sang lapit na lang sila sa balay, nakita ni Jesus nga nagahinibi ang mga tawo. Nagsiling si Jesus  sa ila: “Indi na kamo maghibi, kay wala sia mapatay kundi nagakatulog lang.” Mahimo nga nakibot ang amay kag iloy sang bata sa ginsiling ni Jesus. Ginsilingan ni Jesus ang mga tawo nga maghalin, kag gin-upod niya ang amay kag iloy sang bata sa kuarto nga nahamyangan sini. Gin-uyatan ni Jesus ang kamot sang bata kag nagsiling: “Inday, nagasiling ako sa imo, ‘Bangon ka!’” Sigurado nga nalipay gid ang iya mga ginikanan sang nakita nila sia nga nagbangon kag naglakat! Ginbanhaw ni Jesus ang ila bata. (Marcos 5:22-24, 35-42; Lucas 8:49-56) Halin sadto nga adlaw, kada makita nila ang bata madumduman nila ang ginhimo ni Jehova sa ila paagi kay Jesus. *

¹⁰ Ang mga ginbuhi ni Jesus napatay liwat sang ulihi. Pero ang pagbasa naton parte sa sini nga mga tawo importante gid kay nagahatag ini sa aton sang matuod nga paglaum. Gusto ni Jehova nga banhawon ang mga tawo, kag himuon gid niya ini.

11. Ano ang ginatudlo sa aton sang Manugwali 9:5 parte kay Lazaro?

¹¹ Maathag nga nagasiling ang Biblia nga “ang mga patay wala gid sing nahibaluan.” Amo gid ini ang natabo kay Lazaro. (Manugwali 9:5) Pareho sa ginsiling ni Jesus, si Lazaro daw nagakatulog lang. (Juan 11:11) Sang ara sia sa lulubngan, “wala gid sing nahibaluan” si Lazaro.

12. Ngaa makasigurado kita nga nabanhaw gid si Lazaro?

 ¹² Madamo ang nakakita sang ginbanhaw ni Jesus si Lazaro. Bisan ang iya mga kaaway nakahibalo nga naghimo sia sing milagro. Buhi si Lazaro, kag nagapamatuod ini nga natabo gid ang pagkabanhaw. (Juan 11:47) Dugang pa, madamo ang nagbisita kay Lazaro, bangod sini nagpati sila nga si Jesus ginpadala sang Dios. Pero indi amo sina ang mga kaaway ni Jesus, gani ginplano nila nga patyon sia kag si Lazaro.—Juan 11:53; 12:9-11.

13. Ngaa makasalig kita nga banhawon ni Jehova ang mga patay?

¹³ Nagsiling si Jesus nga “ang tanan nga yara sa handumanan nga mga lulubngan” pagabanhawon. (Juan 5:28) Buot silingon, ang tanan nga ara sa handumanan ni Jehova buhion liwat. Pero para mabanhaw ni Jehova ang isa, dapat nga madumduman niya ang tanan parte sa sina nga tawo. Mahimo bala niya ina? Pamensara ang binilyon ka bituon sa uniberso. Nagasiling ang Biblia nga nahibaluan ni Jehova ang ngalan sang kada isa sa ila. (Basaha ang Isaias 40:26.) Kon madumduman niya ang ngalan sang kada bituon, sigurado nga madumduman man niya ang tanan nga detalye parte sa mga tawo nga iya banhawon. Isa pa, gintuga ni Jehova ang tanan, gani nakahibalo kita nga may gahom sia nga buhion liwat ang mga tawo.

14, 15. Ano ang ginatudlo sa aton sang mga ginsiling ni Job parte sa pagkabanhaw?

¹⁴ Ang matutom nga si Job nagapati sa pagkabanhaw. Namangkot sia: “Kon ang tawo mapatay, mabuhi pa bala sia liwat?” Dayon nagsiling sia kay Jehova: “Magapanawag ka, kag magasabat ako. Ginahandum mo gid nga makita ang imo binuhatan.” Nakahibalo si Job nga gusto ni Jehova nga banhawon ang mga patay.—Job 14:13-15.

 ¹⁵ Ano ang imo ginabatyag parte sa paglaum nga pagkabanhaw? Mahimo mamensar ka, ‘Mabanhaw man bala ang akon pamilya kag mga abyan nga napatay?’ Makapaumpaw mahibaluan nga gusto gid ni Jehova nga buhion liwat ang mga patay. Hibaluon naton ang ginasiling sang Biblia kon diin sila maistar kag kon sin-o ang mga banhawon.

16. Ano nga kabuhi ang maeksperiensiahan sang mga banhawon diri sa duta?

¹⁶ Nakaupod liwat sang mga ginbanhaw sang una ang ila pamilya kag mga abyan diri sa duta. Matabo man ini sa ulihi, pero mangin mas maayo pa gid ini. Ngaa? Kay ang mga buhion liwat diri sa duta may paglaum nga mabuhi sing wala katapusan. Kag maistar sila sa kalibutan nga lain gid sa sitwasyon naton subong. Wala na sing inaway, krimen, kag balatian.

17. Sin-o ang mga banhawon?

¹⁷ Sin-o ang mga banhawon? Si Jesus nagsiling nga “ang tanan nga yara sa handumanan nga mga lulubngan makabati sang iya tingog kag magagua.” (Juan 5:28, 29) Kag ang Bugna 20:13 nagasiling sa aton: “Ginhatag sang dagat ang patay nga yara sa sini, kag ginhatag sang kamatayon kag Lulubngan ang patay nga yara sa ila.” Huo, binilyon ang mabuhi liwat. Nagsiling man si apostol Pablo nga banhawon ang “mga matarong kag mga indi matarong.” (Basaha ang Binuhatan 24:15.) Ano ang buot silingon sini?

18. Sin-o ang “mga matarong” nga pagabanhawon?

¹⁸ Nalakip sa “mga matarong” ang mga alagad ni Jehova antes natawo si Jesus diri sa duta. Lakip sa mga  banhawon diri sa duta amo si Noe, si Abraham, si Sara, si Moises, si Rut, kag si Ester. Mabasa mo ang iban sa sina nga mga lalaki kag babayi sa Hebreo kapitulo 11. Mabanhaw man bala ang matutom nga mga alagad ni Jehova nga napatay sa aton panahon? Huo, kay “mga matarong” man sila.

19. Sin-o ang “mga indi matarong”? Ano nga tsansa ang ginhatag ni Jehova sa ila?

 ¹⁹ Nalakip sa “mga indi matarong” ang binilyon nga napatay nga wala makakilala kay Jehova. Bisan pa napatay sila, wala sila malipatan ni Jehova. Banhawon niya sila, kag hatagan sila sang tsansa nga matun-an ang parte sa iya kag mag-alagad sa iya.

20. Ngaa indi tanan nga napatay pagabanhawon?

²⁰ Buot bala silingon nga ang tanan nga napatay pagabanhawon? Indi. Nagsiling si Jesus nga may pila nga indi na mabuhi liwat. (Lucas 12:5) Sin-o ang magadesisyon kon sin-o ang mga banhawon? Si Jehova ang katapusan nga Hukom, pero ginhatagan niya si Jesus sang awtoridad “nga mangin hukom sang mga buhi kag sang mga patay.” (Binuhatan 10:42) Ang mga ginhukman nga malain kag indi gusto magbag-o indi pagbanhawon.—Tan-awa ang Endnote 19.

21, 22. (a) Ano ang buot silingon sang pagkabanhaw para magkabuhi sa langit? (b) Sin-o ang una nga ginbanhaw para magkabuhi sa langit?

²¹ Ginasilingan kita sang Biblia nga may pila ka tawo nga maistar sa langit. Ang mga pagabanhawon para magkabuhi sa langit, mabuhi liwat indi bilang tawo nga may pisikal nga lawas, kundi bilang isa ka espiritu nga persona.

²² Si Jesus ang una nga ginbanhaw sa sini nga paagi. (Juan 3:13) Tatlo ka adlaw sa tapos ginpatay si Jesus, ginbanhaw sia ni Jehova. (Salmo 16:10; Binuhatan 13:34, 35) Ginbanhaw si Jesus indi bilang tawo. Ginpaathag ni apostol Pedro nga “ginpatay [si Jesus] sa unod apang ginbuhi sa espiritu.” (1 Pedro 3:18) Ginbuhi liwat si Jesus  bilang gamhanan nga espiritu nga persona! (1 Corinto 15:3-6) Pero nagsiling ang Biblia nga indi lang si Jesus ang banhawon sa sina nga paagi.

23, 24. Sin-o ang “diutay nga panong” nga ginsiling ni Jesus, kag pila ang ila kadamuon?

²³ Ginsilingan ni Jesus ang iya matutom nga mga disipulo antes sia napatay: “Malakat ako agod maghanda sang lugar para sa inyo.” (Juan 14:2) Buot silingon, ang pila niya ka sumulunod pagabanhawon para magkabuhi sa langit upod sa iya. Daw ano kadamo? Nagsiling si Jesus nga pila lang, isa ka “diutay nga panong.” (Lucas 12:32) Ginsugid ni apostol Juan ang ila kadamuon sang nakita niya si Jesus nga “nagatindog sa [langitnon nga] Bukid Sion, kag kaupod niya ang 144,000.”—Bugna 14:1.

²⁴ San-o banhawon ang 144,000 nga Cristiano? Nagsiling ang Biblia nga matabo ini kon maggahom na ang Cristo sa langit. (1 Corinto 15:23) Nagakabuhi kita sa sina nga panahon, kag ang kalabanan sa 144,000 nabanhaw na kag nagakabuhi sa langit. Kon ang mga nagkalabilin sa ila diri sa duta mapatay sa aton panahon, pagabanhawon sila dayon para sa kabuhi sa langit. Pero, ang kalabanan nga tawo pagabanhawon sa ulihi sa Paraiso diri sa duta.

25. Ano ang tun-an naton sa masunod nga kapitulo?

²⁵ Malapit na lang hilwayon ni Jehova ang mga tawo sa kamatayon, kag madula na sing dayon ang kamatayon! (Basaha ang Isaias 25:8.) Pero ano ang himuon sang mga banhawon para magkabuhi sa langit? Ginapaathag sang Biblia nga magagahom sila kaupod ni Jesus sa isa ka Ginharian. Tun-an naton sa masunod nga kapitulo ang parte sa sina nga gobierno.