1—3. Псори тутнакъым дису сыт жыпІэ щІэхъунур икІи дауэ Иеговэ хуит дызэрищІыжынур?

УИ НЭГУ КЪЫЩІЭГЪЭХЬЭ умылэжьа щІэпхъаджагъэм щхьэкІэ уи гъащІэр иухыху тутнакъым уисыну уагъэтІысауэ. Тутнакъым уисщ, укъаутІыпщыжынуи гугъэ лъэпкъ уиІэкъым. Уэ къыбгуроІуэ зыкІи узэрыздэмыІэпыкъужыфынур. А гупсысэм уи лъэр щІех. Ауэ зэгуэр уэ къыбощІэ укъригъэутІыпщыжыну лъэкІыныгъэ зиІэ цІыху гуэр зэрыщыІэр икІи укъригъэутІыпщыжыну уэ абы укъегъэгугъэ. Сытыт абдеж зыхэпщІэнур?

² Апхуэдэ Іуэхум лІэныгъэр ещхьщ. Дэ сыт дымыщІэми, абы дыкъыІэщІэкІыфынукъым. Ауэ лІэныгъэм дыкъыІэщІэзыхыфын къару Иеговэ иІэщ. Алыхьым псалъэ итащ лІэныгъэм кІэ иритыну (1 Коринф 15:26).

³ Сыту насыпышхуэ лІэныгъэм ущымышынэну! ЛІэныгъэм дыкъызэрыІэщІихынум нэмыщІ, Иеговэ ди лІахэри къигъэтэджыжыну дыкъегъэгугъэ (Исаия 26:19). ЛІахэр къызэрытэджыжынум Библиер убгъуауэ топсэлъыхь.

4. 1) Сыт гупсэхугъуэ къыдэзытыфынур фІыуэ тлъагъу гуэр щылІэм деж? 2) Хэтыт Хьисэ и ныбжьэгъухэр?

⁴ Ди Іыхьлы е ди ныбжьэгъу дунейм щехыжым деж, дэ узрэ гуауэрэ зыхыдощІэ. Ди лІам къигъэзэжыну дызэрыдэмыІэпыкъуфынум къарууншэ дыдэу зыкъытщегъэхъуж. Ауэ ди гум гупсэхугъуэ къизылъхьэн гупсысэ Библием къыщыдогъуэт. (Къеджэ 2 Коринф 1:3, 4.) Иеговэрэ Хьисэ Мэссихьрэ хуейщ фІыуэ тлъагъухэр сыт щыгъуи псэуну. Абы щыхьэт техъуэ зы Іуэхугъуэ зэпкърытхынщ. Хьисэ щІылъэм щыпсэуам щыгъуэ, Лазаррэ абы и шыпхъуитІ Марфэрэ Мэриемрэ и ныбжьэгъут. Библием щыжыІащ: «Хьисэ Марфи, Марфэ и шыпхъури, Лазари фІыуэ илъагъурт». Зэгуэр Лазар сымаджэ хьэлъэ хъури лІащ (Иуан 11:3—5).

5, 6. 1) Лазар и ныбжьэгъухэмрэ и шыпхъухэмрэ гъыуэ щилъагъум Хьисэ сыт зыхищІар? 2) Хьисэ и ныбжьэгъум и лІэныгъэр и гум зэрыщІыхьам гупсэхугъуэ щхьэ дэ къыдитрэ?

⁵ Хьисэ Марфэрэ Мэриемрэ хуэгузэвэну кІуат. Хьисэ къызэрыкІуэр щызэхихым Марфэ абы пежьащ. Марфэ Хьисэ илъэгъуну и гуапэми, и гум къеуэр мыпхуэдэу жиІащ: «Уэ мыбдеж ущыІатэмэ, си дэлъхур лІэнтэкъым». Хьисэ нэхъ пасэу къэкІуэн хуеяуэ Марфэ къилъытэт. ИтІанэ Хьисэ абы и шыпхъу Мэрием  къилъэгъуащ — ар гуІэу гъыт. Хьисэ абыхэм я гуауэр и гум щІыхьэри къэгъащ (Иуан 11:21, 33, 35). Дэ фІыуэ тлъагъу гуэр щытфІэкІуэдым деж зыхэтщІэ гуауэм хуэдэ Хьиси абы щыгъуэ зыхищІащ.

⁶ Хьисэ ди гурыщІэхэр къызэрыгурыІуэм, дауикІ, гупсэхугъуэ къыдет! АбыкІэ ар и Адэм ещхьщ (Иуан 14:9). Куэд дэмыкІыу Иеговэ лІэныгъэм кІэ иритынущ. Ар абы хузэфІэкІын Іуэхущ.

7, 8. БгъуэнщІагъым Іулъ мывэр Іуахыну сытыт Марфэ щІыхуэмейр? Ауэ сыт Хьисэ ищІар?

⁷ Лазар зыщІэлъ бгъуэнщІагъым мывэшхуэ Іулът. Хьисэ абы бгъэдыхьэри, жиІащ: «Мывэр Іуфх». Ауэ Марфэ ар идакъым, сыт щхьэкІэ жыпІэмэ хьэдэр зэрыщІалъхьэрэ махуиплІ хъуат (Иуан 11:39). Абы къыгурыІуэтэкъым и дэлъху лІам Хьисэ хуищІэну зигъэхьэзырыр.

⁸ Мывэр щыІуахам Хьисэ и макъым зригъэІэтри жиІащ: «Лазар, мыбы къыщІэкІыж!» Абдежым Марфэрэ Мэриемрэ телъыджэ ящыхъуа Іуэхугъуэ къэхъуащ — «лІар, и Іэхэми и лъакъуэхэми джэбынхэр къешэкІауэ, и нэкІуми щэкІ хужь тепхъуауэ, кхъэлэгъунэм къыщІэкІыжащ» (Иуан 11:43, 44). Лазар къэпсэужат — Хьисэ ар къигъэтэджыжауэ арат! Уи нэгу къыщІэгъэхьэ Лазар и Іыхьлыхэмрэ и  ныбжьэгъухэмрэ зыхащІа гуфІэгъуэшхуэр! Ахэр аргуэру зэгъусэт, ІэплІи зэхуащІт икІи зэдэуэршэр хъунут. Ар телъыджэшхуэт!

9, 10. 1) Хьисэ Мэссихь хэт и къарукІэт лІахэр къызэригъэтэджыжыр? 2) ЛІахэм щыщ къызэрагъэтэджыжам сыт къигъэлъагъуэр?

⁹ Хьисэ Мэссихь хэт и къарукІэт лІахэр къызэригъэтэджыжыр? Лазар къигъэтэджыжын ипэ Хьисэ Иеговэ тхьэлъэІукІэ зыхуигъэзат. Абы къегъэлъагъуэ Хьисэ лІахэр къызэригъэтэджыж къарур Иеговэ къызэрыбгъэдэкІтэр. (Къеджэ Иуан 11:41, 42.) Лазар и закъуэкъым лІахэм къахэтэджыкІыжар. Илъэс 12 зи ныбжь хъыджэбз цІыкІу гуэрым Библиер топсэлъыхьыж. Зэгуэр ар сымаджэ хьэлъэ хъуат. Абы и адэ Иаир Хьисэ деж къакІуэри ипхъу цІыкІур игъэхъужыну елъэІуащ. Иаир а зырат быну иІэр. Иаир Хьисэ щепсалъэм абы къыжраІащ: «Уи пхъур дунейм ехыжащ. Дин егъэджакІуэр сыт щхьэкІэ гугъу ебгъэхьыжрэ?» Ауэ Хьисэ Иаир жриІащ: «Умышынэ, фІэщхъуныгъэ зигъыІэ къудей. Уи пхъур къэхъужынущ». АдэкІэ ахэр зэгъусэу Иаир и деж кІуащ. Абдежым цІыхухэр гъыуэ зэхэтт. Хьисэ абыхэм яжриІащ: «ФыщІызэрызехьэр, хьэдагъэ щІэфщІыр сыт? Хъыджэбз цІыкІур лІакъым, ар мэжей». АбыкІэ Хьисэ жиІэну зыхуеяр хъыджэбз цІыкІум и адэ-анэм къагурыІуауэ къыщІэкІынкъым.  Хьисэ цІыхухэм елъэІуащ ахэр унэм щІэкІыну. ИужькІэ Хьисэ Иаиррэ абы и щхьэгъусэмрэ и гъусэу хъыджэбз цІыкІур зыщІэлъ пэшым щІыхьащ. Сабийм и Іэр щабэу къищтэри, жриІащ: «Си хъыджэбз, сэ ныбжызоІэ, къызэфІэувэ!» Ар зэрыжиІэу, хъыджэбз цІыкІур къызэфІэувэри, къикІухьу щІидзащ. Сыту гуфІэгъуэшхуэт ар адэ-анэм дежкІэ! Апхуэдэу Хьисэ Иаир и пхъур къигъэтэджыжащ (Марк 5:22—24, 35—42; Лука 8:49—56). Абы иужь махуэ къэс я пхъум Іуплъэху, адэ-анэм ягу къэкІыжт Иеговэ абыхэм къахуищІар *.

¹⁰ Хьисэ къигъэтэджыжахэр, дауикІ, иужькІэ лІэжащ. Ауэ Хьисэ ищІам къегъэлъагъуэ Иеговэ лІахэр къигъэтэджыжыну зэрыхуейр. Алыхьым иІэ мурадыр Іэмал имыІэу игъэзэщІэнущ. Сыту гугъэ дахэ ар!

11. Экклезиаст 9:5 итым Лазар лІа нэужь къыщыщІам теухуауэ сыт къыдгуригъаІуэр?

¹¹ Библием зэрыжиІэмкІэ, «лІахэм зыри ящІэкъым». Ар дыдэр жыпІэ хъунут Лазар теухуауэ (Экклезиаст 9:5). Ар цІыху жейм хуэдэт  (Иуан 11:11). Лазар лІауэ бгъуэнщІагъым щІэлъыху гупсысэ зыри иІакъым.

12. Лазар пэж дыдэу лІахэм къазэрыхэтэджыкІыжар сыт ди фІэщ зыщІыр?

¹² Лазар къызэрытэджыжар цІыху куэдым ялъэгъуат. Ар телъыджэ Іуэхуу зэрыщытыр Хьисэ и бийхэми къагурыІуэт. Лазар къызэрыпсэужар щыхьэт тохъуэ цІыху лІар къызэрытэджыжыфынум (Иуан 11:47). Лазар къызэрытэджыжар зылъэгъуа цІыхухэм я фІэщ хъут Хьисэ Алыхьым къызэригъэкІуар. ДауикІ, Хьисэ и бийхэм ар ягу ирихьакъым. Абыхэм мурад ящІат Хьисэрэ Лазаррэ яукІыну (Иуан 11:53; 12:9—11).

13. Иеговэ лІахэр къызэригъэтэджыжынур сыт ди фІэщ зыщІыр?

¹³ Хьисэ жиІащ «кхъэм щІэлъ псори» къызэрытэджыжынур (Иуан 5:28). Абы къегъэлъагъуэ Иеговэ ди лІахэр зэрыщымыгъупщар икІи ахэр къызэригъэпсэужынур. Ауэ зыгуэр къигъэпсэужын щхьэкІэ, Иеговэ а цІыхум теухуауэ псори ищІэжын хуейщ. Иеговэ ар хузэфІэкІыну пІэрэ? Мыпхуэдэ щапхъэм дегупсысынщ. Уафэм вагъуэхэр миллиард бжыгъэкІэ щызэбгырыпхъащ икІи, Библием зэрыжиІэмкІэ, Иеговэ абыхэм щыщ дэтхэнэми и цІэр ещІэ. (Къеджэ Исаия 40:26.) Вагъуэхэм я цІэхэр Иеговэ щищІэжкІэ, ди лІахэм теухуауэ, дауикІ, абы псори ещІэж! Абы нэмыщІ Иеговэ  псори къыщигъэщІакІэ, дэ шэч къытедмыхьэми хъунущ лІахэр къигъэтэджыжыну абы зэрыхузэфІэкІынур.

14, 15. Іэиуб и псалъэхэм сыт къагъэлъагъуэр?

¹⁴ Алыхь фІэлІыкІ зиІэ Іэиуб лІахэр къызэрытэджыжынур и фІэщ хъут. Зэгуэр абы мыпхуэдэ упщІэ къиІэтат: «ЦІыхур лІэмэ, ар къэпсэужыну пІэрэ?» ИтІанэ Иеговэ зыхуигъазэри жиІащ: «Уэ укъызэджэнурэ, сэ жэуап уэстынущ. Уэ уи ІэдакъэщІэкІым ухуэзэшынущ». Мы псалъэхэм къызэрагъэлъагъуэмкІэ, лІахэр къыщигъэтэджыжыну махуэм езы Иеговэ къыхуэмыгъэсу зэрыпэплъэр Іэиуб быдэу и фІэщ хъут (Иов 14:13—15).

¹⁵ ЛІахэр къызэрытэджыжынум сыт хуэдэ гурыщІэхэр къыуитрэ? ФІыуэ плъагъу гуэр пфІэкІуэдамэ, ари къэтэджыжыну пІэрэ жыпІэу уегупсысу къыщІэкІынщ. Иеговэ ди лІахэр къигъэпсэужыну зэрыхуейр пщІэну гупсэхугъуэщ. АдэкІэ къэтщІэнщ хэт къэтэджыжынуми икІи дэнэ ахэр щыпсэунуми.

16. ЖэнэтыщІым къыщытэджыжынухэм сыт хуэдэ гъащІэ яІэнур?

¹⁶ Япэм лІэуэ къэтэджыжа цІыхухэм Іэмал ягъуэтыжат аргуэру гъащІэм гуфІэгъуэ хахыну икІи я унагъуэмрэ я ныбжьэгъухэмрэ я гъусэу псэуну. ДунеищІэм лІахэр къыщытэджыжкІэ-щэ?  Дауэ къыпщыхъурэ, ахэр зэи мылІэжу псэуфынущ! Ахэр щыпсэуну дунейм зауи, щІэпхъаджагъи, узыфи щыІэжынукъым!

17. ЛІахэм щыщу хэт къэтэджыжынур?

¹⁷ ЛІахэм щыщу хэт къэтэджыжынур? Хьисэ жиІащ: «Кхъэм щІэлъ псоми Тхьэм и Къуэм и макъыр зэхахыу, кхъэм къыщыщІэкІыжыну махуэр къэсынущ» (Иуан 5:28, 29). Абы нэмыщІ  Апокалипсис 20:13 щыжыІащ: «Хым итхьэла цІыхухэр къитыжащ. ЛІэныгъэми лІахэм я дунейми цІыху лІауэ яІэхэр къатыжащ». Аращи, лІахэр миллиард бжыгъэкІэ къэпсэужынущ. Апостол Паул жиІат «щыпкъагъэ зиІи зимыІи» къызэрытэджыжынур. (Къеджэ Апостолхэм 24:15.) Хэт Паул зи гугъу ищІар?

18. «Щыпкъагъэ зиІэхэм» хэт хыхьэр?

¹⁸ «Щыпкъагъэ зиІэ» жыхуиІэр ар Хьисэ щІылъэм къэкІуэн ипэ Иеговэ хуэпэжу псэуахэращ. Псалъэм папщІэ, абыхэм хохьэ Нухь, Ибрэхьим, Сарэ, Мусэ, Руфэ, Эсфирь сымэ. Иеговэ и лэжьакІуэ пэжхэм щыщу нэгъуэщІхэм теухуауэ Еврейхэм 11-нэ псалъащхьэм къыщыпщІэфынущ. Ахэр псори къэтэджыжа иужь щІылъэм щыпсэунущ. Ди зэманым Иеговэ пэжу хуэлажьэхэм щыщу дунейм ехыжхэм «щыпкъагъэ зиІэкІэ» уеджэ хъуну? Хъунущ икІи абы къегъэлъагъуэ ахэри къызэрытэджыжынур.

19. «Щыпкъагъэ зимыІэхэм» хэт хыхьэр? Алыхьым ахэр къигъэтэджыжа иужь, сыт хуэдэ Іэмал яритынур?

¹⁹ «Щыпкъагъэ зимыІэ» жыхуиІэр ар Иеговэ теухуауэ къащІэну Іэмал ямыгъуэту дунейм ехыжа цІыху миллиардхэращ. Иеговэ ахэр щыгъупщэжакъым. Алыхьым ахэр къигъэтэджыжынурэ Іэмал яритынущ езым теухуауэ къащІэну икІи абы хуэлэжьэн щІадзэну.

20. Сыт языныкъуэ лІахэр къыщІэмытэджыжынур?

²⁰ ЛІа псори къэтэджыжыну пІэрэ? Хьэуэ.  Хьисэ жиІат лІахэр псори къызэрымытэджыжынур (Лука 12:5). Хэт къэтэджыжынуми, хэт къэмытэджыжынуми унафэ зыщІыр хэт? Абы теухуауэ унафэ пыухыкІа зыщІыр Иеговэщ, ауэ «псэухэми лІахэми» хьэкум ятрищІыхьыну Алыхьым Хьисэ и ІэмыщІэ ирилъхьащ (Апостолхэм 10:42). ЦІыхур бзаджэу икІи зихъуэжыну хуэмейуэ щытамэ, ар лІа иужь къэтэджыжынукъым. (19-нэ Приложением еплъ.)

21, 22. 1) Уафэм щыпсэуну къэтэджынухэм сыт хуэдэ Іэпкълъэпкъ ягъуэтынур? 2) Уафэм щыпсэуну япэу къэтэджыжар хэт?

²¹ Библием щыжыІащ къэтэджыжынухэм щыщу языныкъуэхэр уафэм зэрыщыпсэунур. Абыхэм нэрымылъагъу Іэпкълъэпкъ ягъуэтынущ.

²² Уафэм щыпсэуну япэу къэтэджыжар Хьисэщ (Иуан 3:13). Хьисэ лІа иужь махуэ ещанэм Иеговэ ар къигъэтэджыжащ (Псалом 16:10; Апостолхэм 13:34, 35). Хьисэ игъуэтар цІыху Іэпкълъэпкъкъым (1 Коринф 15:20, 50). Абы мелыІычхэм яІэм хуэдэ нэрымылъагъу Іэпкълъэпкъ игъуэтащ (1 Коринф 15:3—6). Ауэ, Хьисэ нэмыщІ, иджыри щыІэщ уафэм щыпсэуну къэтэджыжынухэр.

23, 24. Хьисэ зи гугъу ищІа «гуп мащІэм» хэт хыхьэр икІи дапщэ ахэр зэрыхъур?

²³ Хьисэ яукІын ипэ и гъэсэн пэжхэм яжриІащ:  «ПсэупІэ къыфхуэзгъэхьэзырыну сыкІуэнущ» (Иуан 14:2). Мы псалъэхэм къагъэлъагъуэ Хьисэ и гъэсэнхэм щыщу языныкъуэхэр уафэм и гъусэу щыпсэуну къызэригъэтэджыжынур. ЦІыху дапщэ ахэр зэрыхъунур? Ахэр куэд зэрымыхъунур къигъэлъагъуэу, Хьисэ абыхэм «гуп мащІэкІэ» еджащ (Лука 12:32). Апостол Иуан зэритхамкІэ, ахэр «мин щэрэ плІыщІрэ плІы» мэхъу (Апокалипсис 14:1, ДЩІ).

²⁴ Мин щэрэ плІыщІрэ плІыр дапщэщ къыщытэджыжын хуейр? Библием зэрыжиІэмкІэ, ар къыщыхъун хуейр Хьисэ уафэм Пащтыхьу теува иужьт (1 Коринф 15:23). Хьисэ Пащтыхьу теуващ икІи 144 000-м щыщу и нэхъыбэр уафэм щыпсэуну къэтэджыжащ. Абыхэм щыщу щІылъэм къэна мащІэр зэрылІэу, асыхьэту уафэм къыщотэджыж. Ауэ лІахэм я нэхъыбэр къыщытэджыжынур щІылъэращ.

25. КъыкІэлъыкІуэ псалъащхьэм сыт къыщытщІэнур?

²⁵ Куэд мыщІэу Иеговэ цІыхухэр лІэныгъэм къыІэщІихынущ икІи лІэныгъэр афІэкІа щыІэжынукъым. (Къеджэ Исаия 25:8.) Ауэ уафэм щыпсэунухэм сыт ящІэнур? Тхыгъэ ЛъапІэм зэрыжиІэмкІэ, ахэр Хьисэ Мэссихь и гъусэу Алыхьым и Пащтыхьыгъуэм щытепщэнущ. Иеговэ и Пащтыхьыгъуэм теухуауэ къыкІэлъыкІуэ псалъащхьэм нэхъыбэ къыщыпщІэнущ.