1—3. Піс хайдағ «харибде» одырчабыс паза хайди Иегова пісті аннаң позыдып алар?

САҒЫН КӦРІҢЕР, сірер итпеен сайбағның ӱчӱн, сірерні, чуртазыңар тоозылғанҷа, харибге одырт салғаннар. Амды сірер харибде одырчазар. Позып аларға ізеніс чоғыл. Сірер пір дее ниме алыстыр полбассар. Ізенізіңер саңай чіт парған туста сірерні харибдең сығарып аларға сӧс пирген кізі парын піліп алзар, ниме чувствовать поларзар?

² Ӧлімні, чуртас тоозылғанҷа, харибге одырт салғанынаң тиңнестірерге чарир. Ноо даа ниме итсебіс, позып полбаспыс. Че Иегованың пісті позыт полар кӱзі пар. Ол ӧлімні чох идібізерге молҷапча (1 Коринфтегілерге 15:26).

³ Ӧлімнең хорыхпин чуртирға хайдағ чахсы полар! Иегова ӧлімнең осхырарға ла молҷабинча, че ӱреп тее парған кізілерні тірілдірерге молҷапча. Худай: «Ӱреп парған кізілер хатап чуртирлар», — тіпче (Исаия 26:19). Библияда анзы тіріліс тіп адалча.

4. а) Чағыннарыбыс ӱреп парза, пісті ниме часхар полар? б) Иисустың нанҷылары кем полған?

⁴ Чағын нанҷыбыс алай туғаныбыс ӱреп парза, піс тың чобалланчабыс паза чӱреебіс тың ағырча. Ноо даа ниме итсебіс, ӱреен кізіні тірілдір полбаспыс. Че Библия пісті часхар полар. (2 Коринфтегілерге  1:3, 4 хығырыбызыңар.) Иегованаң Иисус пістің чағыннарыбыс хатап чуртазыннар тіп хынчалар. Аны кӧзітчеткен пір кӧзідім кӧр кӧреелер. Иисус чирде чуртаанда, Лазарьнаң паза аның пиҷелерінең, Марфанаң Мариянаң, нанҷыласхан. Библияда «Иисус Марфаа, аның туңмазы Марияа паза оларның харындазы Лазарьға хынҷаң» тіп пазылча. Пірсінде Лазарь, тың ағырыбызып, ӱреп парған (Иоанн 11:3—5).

5, 6. а) Иисус, Лазарьның ылғапчатхан нанҷыларын паза пиҷелерін кӧр салғанда, хайди полған? б) Иисустың ӧлімге хайди хайчатханы ноға пісті часхарча?

⁵ Иисус Марфанаң Мариязар оларны часхарарға парған. Иисустың оларзар килчеткенін ис салып, Марфа аны удурлирға сыххан. Марфаа Иисусты кӧрерге ӧріністіг полған полза даа, ол ағаа теен: «Син мында полған ползаң, харындазым ӱребесчік». Ағаа Иисус тың орайлат салды тіп пілдірген. Анаң Иисус аның пиҷезінің, Марияның, ылғапчатханын кӧр салған. Иисус, оларға айап парып, ідӧк ылғап сыххан (Иоанн 11:21, 33, 35). Чағыннарыбыс ӱреп парза, пістің чӱреебіс хайди ағырча, Иисустың чӱрее ідӧк ағырған.

⁶ Иисустың пістің чувстволарыбысты пілчеткені пісті уғаа тың часхарча! Анзында ол позының Пабазына тӧӧй (Иоанн 14:9). Ӱр ниместең Иегова ӧлімні саңай чох идібізер. Иегованың ӧлімні чох идібізер кӱзі пар.

7, 8. Ноға Марфа хуюдаң тасты хыйа аларға чаратпаан? Иисус ниме идібіскен?

⁷ Иисус Лазарьны чыып салған хуюзар килген.  Хуюны чоон таснаң чаап салған полғаннар. «Тасты хыйа алыңар», — теен Иисус. Лазарьның сӧӧгі тӧрт кӱн хуюда чатчатханнаңар, Марфа тоғыр полған (Иоанн 11:39). Ӱреп парған харындызына полыс пирер ӱчӱн, Иисус ниме идерге сағынчатханын Марфа пілбеен.

⁸ Тасты хыйа алыбысханда, Иисус хысхырыбысхан: «Лазарь! Сых пеер!» Анаң Марфанаң Мария уғаа хайхастығ ниме кӧр салғаннар — «ӱреен кізі хуюдаң сых килген». «Азах-холлары ӱреен кізіні орааҷаң сӱбӱректернең сарыл парған полғаннар» (Иоанн 11:43, 44). Иисус Лазарьны тірілдіріп алған! Сағын кӧріңер, аның нанҷылары, туғаннары хайди ӧрінген поларлар. Олар пазох хада полғаннар, чоохтасханнар, хуҷахтасханнар. Иисустың Лазарьны тірілдіргені улуғ хайхас полған!

9, 10. а) Кізілерні тірілдірер кӱсті Иисус хайдаң алған? б) Ноға Библияда тірілістеңер пазыл парған?

⁹ Кізілерні тірілдірҷең кӱсті Иисус хайдаң алған? Лазарьны тірілдірер алнында Иисустың Иеговаа пазырып алғаны, ағаа Иегова кӱс пиргенін кӧзітче. (Иоанн 11:41, 42 хығырыбызыңар.) Лазарьдаң пасха тірілген кізілер полғанох. Библияда тың ағырыбысхан 12 частығ хызыҷахтаңар чоохталча. Аның пабазы Иаир, Иисуссар пас киліп, алданып, хызын чазылдырарға сурынған. Ол хыс аның чалғыс ла палазы полған. Олар іди чоохтасчатхан туста Иаирге искіргеннер: «Синің хызың ӱреп парды, Ӱгретчіні нимее тик тутчазың?» Че Иисус Иаирге теен: «Хорыхпа, киртін  не одыр, андада хызың хазыхтанып алар». Анаң олар Иаирнің туразынзар хада парғаннар. Тура хыринда Иисус ылғапчатхан кізілерге тоғас парған. Иисус оларға теен: «Ылғабаңар, ол ӱребеен, че узупча». Иисустың нимедеңер чоохтапчатханын хызыҷахтың паба-іҷезі читіре піл полбаан поларлар. Иисус прайларын турадаң сығарыбысхан. Анаң ол хызыҷахтың паба-іҷезінең хада хызыҷах чатчатхан пӧліксер кірген. Хызыҷахтың холын алып алып, теен: «Хызыҷах, сағаа тіпчем, тур!» Хызыҷах тур киліп, пас чӧр сыхханда, аның паба-іҷезі хайди ӧрінген полар! Іди Иисус Иаирнің хызыҷаан тірілдірібіскен (Марк 5:22—24, 35—42; Лука 8:49—56). Ол кӱннең сығара паба-іҷезі, хызыҷағын кӧріп, Иегова Иисустаң пастыра оларның палазын тірілдір пиргенін сағысха кир турҷаңнар *.

¹⁰ Иисус тірілдірген кізілер соонаң пазох ӱреп парғаннар. Че пу кізілердеңер чоохтар Иегова кізілерні тірілдірерге хынчатханын паза хайди даа тірілдірерін кӧзітчелер. Уғаа чахсы ізеніс!

11. Экклезиаст 9:5 ӱреен Лазарьдаңар нимее ӱгретче?

¹¹ Библияда «ӧліглер, тізең, пір дее ниме пілбинчелер» тіп пазылча. Лазарь даа пір дее ниме пілбеен  (Экклезиаст 9:5). Иисус аны узупчатхан кізінең тиңнестірген (Иоанн 11:11). Ӧл парып, хуюда чатчатханда, Лазарь «пір дее ниме пілбеен».

12. Лазарьның сынап тірілгенін піс хайдаң пілчебіс?

¹² Лазарьның тірілгенін кӧп кізі кӧрген. Иисустың ыырҷылары даа ол хайхас ит салғанын пілгеннер. Лазарьның тіріг чӧрчеткені тіріліс полғанын киречілеен (Иоанн 11:47). Лазарьзар килген кізілер, аның тіріг чӧрчеткенін кӧріп, Иисусты Худай ысханына киртін сыхчаңнар. Андағ кирек ыырҷыларның кӧңніне кірбеен. Олар Иисусты даа, Лазарьны даа ӧдірібізерге сағын сыхханнар (Иоанн 11:53; 12:9—11).

13. Иегова ӱреен кізілерні тірілдірерінде ноға ікінҷілебеске чарир?

¹³ Иисус «сыыраттарда чатчатханнар прайзы» тірілер теен (Иоанн 5:28). Че кемні-де тірілдірер ӱчӱн, Иегова аны сағызында тударға кирек. Ол кізілерні прай ӧтіре пілерге кирек. Иегова сынап прайзын сағыста тут полча ба? Сағын кӧреелер. Тилекейде нинҷе-нинҷе миллиард чылтыстар. Библияда Иегова полған на чылтыстың адын пілче тіп пазылча. (Исаия 40:26 хығырыбызыңар.) Ағаа прай чылтыстарның хайди адалчатханын сағыста тударға аар полбаза, тірілдірерге сағынчатхан кізілернің аттарын сағыста тударға аар полар ба?! Ағаа хоза, Иегова — ол Чайаачы, аннаңар ікінҷілебеңер, кізілерні тірілдірерге аның кӱзі чидер.

14, 15. Иовтың сӧстерінең тірілістеңер ниме піліп алчабыс?

¹⁴ Худайға киртістіг кізі, Иов, тіріліс поларына киртінген. Пірсінде ол сурған: «Кізі ӱреп парза, хатап чуртап полар ба?» Анаң, Иеговазар айланып, теен: «Син хығырарзың, мин нандырарбын. Холың иткен  нимее сағын парарзың». Йа, ӱреен кізілерні тірілдірер тусты Иегова чидікпин сағыпчатханын Иов пілген (Иов 14:13—15).

¹⁵ Тірілістеңер сағынзар, чӱрееңерде ниме полча? Чағыннарыңның піреезі ӱреен полза, ол хатап чуртир ба тіп сағынча поларзар. Иегова ӱрееннер хатап чуртазыннар тіп хынчатханын пілгені уғаа часхарча. Че Худай кемні тірілдірер? Хайда олар чуртирлар? Пу сурығларға Библия хайди нандырчатханын піліп алаалар.

16. Чирдегі чуртасха тірілген кізілернің чуртастары хайдағ полар?

¹⁶ Мының алнында тірілген кізілер сӧбірелерінең паза нанҷыларынаң хада чирде чуртааннар. Полар туста тірілер кізілернің чуртастары мының алнындағызынаң хай-хай артых полар. Сағын на кӧріңер, оларға хаҷан даа ӱребеске оңдай пирілер. Оларны чаалар, сайбағлар паза ағырығлар чох чуртас сағыпча.

17. Худай кемні тірілдірер?

¹⁷ Худай кемні тірілдірер? Иисус теен: «Сыыраттарда чатчатханнар прайзы Кізі Оолғының ӱнін ис салып... тур килерлер» (Иоанн 5:28, 29). Азых чоох 20:13-те, тізең, пазыл парған: «Талай позындағы ӧліглерні пирібіскен, ӧлім паза Чир тӱбі постарының ӧліглерін ідӧк пирібіскеннер». Йа, миллиардтар тірілерлер. Павел илҷі «арығ даа, арығ нимес тее чӱректіг» кізілер тірілерлер теен. (Илҷілернің 24:15 хығырыбызыңар.) Кемнердеңер мында чоохталча?

18. «Арығ чӱректіглер» кемнер олар?

 ¹⁸ Иисус Христос чирзер килер алнында чуртаан Иеговаа киртістіг нымысчыларны «арығ чӱректіглерге» санирға чарир. Кӧзідімге: Ной, Авраам, Сарра, Моисей, Руфь паза Эсфирь. Еврейлерге пічікте 11 пастағда пасха даа киртістіг нымысчылардаңар хығырып аларға чарир. Тірілген соонда олар прайлары чирде чуртирлар.  Амғы туста ӱрепчеткен Иегованың киртістіг нымысчыларын «арығ чӱректіглерге» санирға чарир ба? Йа, оларны даа Худай тірілдірер.

19. «Арығ нимес чӱректіглер» кемнер олар? Тірілген соонда оларға хайдағ оңдай пирілер?

¹⁹ «Арығ нимес чӱректіглер» — Иеговадаңар піліп алҷаң оңдай чох полған нинҷе-нинҷе миллиардтар. Олар ӱреп парғаннар, че Иегова олардаңар ундутпаан. Иегова оларны тірілдіріп алар, андада оларға, анынаң танызып алып, ағаа нымысчыланарға оңдай пирілер.

20. Ноға піреелері тірілбестер?

²⁰ Ӱреннернің прайлары тірілерлер бе? Чох. Иисус прай кізілер тірілбестер теен (Лука 12:5, НТ). Кемні тірілдірерге, кемні тірілдірбеске кем пӧгін алча? Иегова, иң пӧзік чарғыҷы, «тіріг паза ӧліг кізілерні» чарғылирын Иисустың холына пирібіскен полза даа, халғанҷы пӧгін ол алча (Илҷілернің 10:42). Кемні олар чабал паза алызарға хынминчатхан кізі тіп чарғылирлар, олар тірілбестер. (19 приложениені кӧріңер.)

21, 22. а) Тигірдегі чуртасха тірілгені — нимедір ол? б) Тигірдегі чуртасха кем иң пурун тірілген?

²¹ Библияда піреелері тигірдегі чуртасха тірілерлер тіп пазылча. Олар, чирде чуртапчатхан кізі чіли, ит-сӧӧктіг полбастар, олар хуттар поларлар.

²² Тигірдегі чуртасха тірілгеннернің пастағызы Иисус полған (Иоанн 3:13). Иегова Иисусты ӱреен соонда ӱзінҷі кӱнінде тірілдіріп алған (Псалом 16:10; Илҷілернің 13:34, 35). Иисус, чирде чуртапчатхан кізі чіли, ит-сӧӧктіг тірілбеен, че уғаа кӱстіг хут полып тірілген (1 Коринфтегілерге 15:3—6). Пётр илҷі пасхан:  «Христос кізі чіли ӧдірт салған, че Худынаң тіріл парған» (1 Петрның 3:18). Библияда пасха даа кізілер тигірдегі чуртасха тірілерлер тіп пазылча.

23, 24. Иисус чоохтаан кічіг ӧӧрнің санына кем кірче паза оларның саны нинҷе?

²³ Иисус ӧлер алнында позының киртістіг ӱгренҷілеріне теен: «Сірерге орын тимнирге парчам» (Иоанн 14:2). Пу сӧстер кӧзітчелер: Иисустың ӱгренҷілерінің піреелері тигірдегі чуртасха тірілерлер. Оларның саны нинҷе полар? Иисус оларны «кічіг хой ӧӧрі» тіп адаан, аннаңар оларның саны асхынах полар (Лука 12:32). Иоанн илҷі оларның саны нинҷе поларын пас салған. Кӧспекте ол Иисусты паза «аннаң хада 144 муң кізіні» кӧр салған (Азых чоох 14:1).

²⁴ Пу пір чӱс хырых тӧрт муң кізі хаҷан тірілер? Пу кирек Иисус Христос тигірде устирға пастаан соонда полар тіп Библияда чоохталча (1 Коринфтегілерге 15:23). Христос устапча, аннаңар 144 муң киртістіг христианнарның кӧбізі тигірдегі чуртасха тіріл парған. Оларның халғаннары ӱреп парзалар, сах андох тигірзер парыбысчалар. Кӧріңер, тірілгеннернің кӧбізі чирдегі райда чуртирға тірілер полза даа, кӧп нимес кізі тигірде чуртирға тірілер.

25. Мының соондағы пастағдаң ниме піліп аларбыс?

²⁵ Иегова ӧлімнің холынаң кізілерні позыдып алар тус уғаа чағын; ӧлім саңай чох пол парар. (Азых чоох 21:4 хығырыбызыңар.) Тигірде чуртирға тірілгеннер анда ниме идерлер? Библияда олар Худай Хан-ӱлгӱзінде Иисус Христоснаң хада устирлар тіп пазылча. Мының соондағы пастағда ол ӱлгӱдеңер кӧп арах піліп аларбыс.