1-3. a) Tut boos tudy biin bulok bwabiny? b) I mushind kaay udy Yehow wiiy kwiitukuuloh ku lufw?

LANG ket neey: I bakuh cibaw bwa bubiih buwudy kuy mulong. Bakumb mu bulok bwa ushalomw bwa mafuk mibuh ma buumy. Kwiish ni mushind ning mukeeh bwa kuhatukomw. Ni kwiin utakaminoh bwaal mu mafuk miiyiiy. Ni kwiish mwa kulong bwaal ning bwaakaabumw. Kunyim kwa byoos, ujiijimbaj kutakamin kwiibuh koos. Ki difuuk dikwaabw, umvumvw bakwambil neey, kudy muut mukwaabw udy mwa kukukuuloh ni i mulay neey wiiyiiy kukukwanjok! Umvumvw bicy ku mucim aak?

² Tut boos tudy biin bulok bwa lufw. Katwiish ni cya kulong ning cya kabumw bwa kwiiluy lubil. Yehow ki udy mwa kwiitukuuloh ku lufw. I mulay neey: lufw “mulwiish a bulekeel” itut “wiiyiiyey kubutul.”​—1 Biin Korent 15:26.

³ Lang difuuk dikwaabw diwiikal kuy umvwoh bend mooy bwa lufw. Es wiiyiiy wiiyumvw bilengel! Ki Yehow ka kwiiy kufulok teng lufw kayaal. Wiiyiiy cikwaabw kusangul baat. Lang cidy bwaal oobw mwa kukulongel. Yehow i mulay neey “Bady kabay ni diikand mu lufw” biiyiiy kwiikal ni buumy. (Yeshaay 26:19, NWT) Ki cidy Bibl ubikan neey “Kusanguk kwa baat.”

4. a) Hady mwaaneet wa mu cisak eeny mulund neet ufw, i biny bidy mwa kwiitukashiish ku micim? b) Teelok majiin ma balund ba Yeez.

⁴ Hafwaafw mwaaneet wa mu cisak eeny mulund, tuyakal tubungam bikasakan ni bitukooyesh menmen mu  mikon. Katwiish ni cikwaabw cya kulong bwa ku mubuush ku lufw. Ki Bibl wiitukaakashiish biin-biin ku micim. (Bal 2 Biin Korent 1:3, 4.) Tutalaay cileejel cileeleej neey Yehow ni Yeez i bakat biin-biin kusangul baat batudy bakat. Yeez waakady misang yivul uy ukatal Lazaar ni baan baabw ba bakaj, Mart ni Mariy. Boos basat baakady balund ba Yeez. Bibl uleeleeb nook: “Yeez waakady mukat Mart ni mwaanabw Mariy, mukacilok ni Lazaar.” Ki diifuk dikwaabw, Lazaar ufwiil.​—Jah 11:3-5.

5, 6. a) Hatadil Yeez biin mu cisak cya ba Lazaar ni balund nend badil, ulongel biny? b) Bwabiny bitukaakashiish ku micim bwa kumanyik neey Yeez umvwiil kakunying hakady Lazaar mufw?

⁵ Yeez uyiil kutal Mart ni Mariy. Hamanyikil Mart neey Yeez wendend wiiy, uhatukil mu cibunj bwa kuy ka musambakeenomw. Waakady ni musangal imwiin bwa kutal Yeez, ki wambiil Yeez neey: “Bu uw mwiikal hiinaah, mwaaneet kaakadyoh bend mwa kufw.” Bwindiy, Yeez waakady mwiiy diib diman kuhit. Ki hatadil Yeez Mariy udil. Mukutal mwaakady baat babungam bimutondel bikasakan, bya muhit bituh ni wadil. (Jah 11:21, 33, 35) Yeez umvwiil kakunying kavul kikiin katuyakal tumvw diib didy muut utudy bakat ufw.

⁶ Mu mushiind mukwaabw, bitukaakashiish ku micim bwa kumanyik neey Yeez umvwiil kakunying. Kumvw kwindiy kwa kakunying ook, kuleeleej neey Yeez imukin lufw. Ni bu mudyey mufwaanakan bikasakan ni Yehow, Yehow byend i mukin lufw. (Jah 14:9) Yehow udy mwa kufulok lufw buyiil, ki ciiyiiyey kulong mu mafuk makeeh oomw.

7, 8. a) Bwabiny Mart kaakady mukat bwa bafulok diibw dyaakadyobw bajik ku maajamw ma Lazaar? b) I cingany cilongel Yeez bwa Lazaar?

⁷ Maajamw maakadyobw bajiik Lazaar maakady majik ni diibw ditam. Hafikil Yeez ku maajamw, umbiil diiy  neey: “Fulaay diibw” ki Mart kaakady mukat bwa bafulok diibw bwaal nyeet ya Lazaar yaakady ki yinuuk, bwaal waakady mujiik kukaady mafuk manaay. (Jah 11:39) Kaakady mumanyik cyaakady Yeez wiiy ulong bwa mwaan aabw.

⁸ Bafudil diibw, ni Yeez umbil diiy dikasakan neey: “Lazaar, hatuk!” Mart ni Mariy batadil bwaal oobw bwiibakemesh: Lazaar uhatukil mu maajamw. (Jah 11:43, 44) Yeez ubuushil Lazaar ku lufw! Wiinow wiiyiil cikwaabw ni buumy, waatalangan ni biin cisak cya babw ni balund nend. Baakady mwa kumwaakidil mu mabok, kumutengok ni kwiisaamb nend. Cishim kaay cihit kulengel nook!

9, 10. a) I ngany waakishil Yeez bukash bwa kusangul baat? b) Bwabiny misamb ya kusanguk kwa baat yidy ni buseeb kutudy?

⁹ I kumakand mindiy kayend kwaakady Yeez ni bwa kusangul baat eeny? Waakweeh! Kuuhal kwa kusanguley Lazaar, ulombel Yehow. Ni Yehow waakady mumwaakish bukash bwa kusanguley Lazaar. (Bal Jah 11:41, 42.) Lazaar kishoh teng yiy kayend waakadyobw basangul. * Bibl uleeleeb cikwaabw bwa sangikaj wa mivw 12 waakady ubeel menmen. Taat indiy, Jayirus, Kaakady mumanyikoh cya kulong bwa kumondah. Wiisanjil Yeez bwa ondah mwaan indiy. Waakady mwaan indiy a diimung. Haakadyey wiisamb ni Yeez, baat biiyiil ba mwambil neey: “Mwaan iibuh yaaw ubaaman kufw! Lek kutacishoh bituh Mukaleng.”  Ki Yeez wambil Jayirus neey: “Kuzakal bend; iikal teng muteekok micim (iikal ni diitabij) mwaan wiiyiiy kukasakan.” Cikwaabw, Yeez bayiil ni Jayirus kwindiy. Hafweejelobw habwiih ni ku nzubw, Yeez utadil ni umvw baat badil. Wiimbambiil neey: “Lekaay kudilaay, mwaan kiish mufw, i mulaal!” Balel ba sangikaj oow bakady ni bwa kwiiyihanguj bwa cyaakady Yeez ukaam kuleeb. Yeez wambiil baat baakady mu nzubw bwa kuhatukobw. Utweedyel ni Jayirus ni mukaj indiy cyaab cyaakadyobw baladik mwaan. Ni kutukij koos, Yeez ukwaacil mwaan ku kubok, ni wamwambil neey: “A mwaan a mim, buuk!” Mwaan ubuukil teng hiinaah ni waatang kwend. Taatend a mwaan ni mameend basangel bikasakan menmen: Yeez waakady mubuush sangikaj a babw! (Mark 5:22-24, 35-42; Luuk 8:49-56) Kutambwiil teng diifuk aady, haakadyobw batal mafuk moos sangikaj a babw oow, baakady balang ku cyaakady Yehow mwiibalongel kuhicil kudy Yeez.

¹⁰ Baat basangwiil Yeez biiyiil kufw cikwaabw. Ki misamb ya mu Bibl yitaatal kusanguk kwa baat, i ya buseeb buvul menmen kutudy, bwaal yitwaakakish kutakamin kwa biin-biin: Yehow i mukat kusangul baat ni ki ciiyiiyey kulong.

11. Bwabingany mwiisamb a kusanguk kwa Lazaar uleeleej neey cidy Muleej 9:5 uleeb i cya biin-biin?

¹¹ Bibl uleeleeb neey bafw “kabiishoh bend bamanyikoh ciit ning cyaakaabumw.” (Muleej 9:5) Mwiisamb a kusanguk kwa Lazaar uleeleej neey, i cya biin-biin. Haakady Lazaar mu maajamw “kaakady mu manyikoh bend ciit ning cyaakaabumw.” Bu mwaakady Yeez muman kwiibuleeb, waakady bu mulaal tul.​—Jah 11:11.

12. Bwabiny tudy mwa kwiikal bajaadik neey baakady basangul Lazaar?

 ¹² Baat bavul batadil mwaakady Yeez musangul Lazaar. Ni balwiish ba Yeez byaabw bamanyikil neey, Yeez ulongel cishim eecy. Lazaar waakady ni buumy, aaby byaakady bileej neey baakady bamubuush ku lufw. (Jah 11:47) Baat bavul biiyiil kutal Lazaar. Hamutadilobw, biiyiil kumanyik neey Yeez bakady bamutum kudy Mawej. Ki balwiish ba Yeez kaabakadyoh bend ni musangal. Baswiikil diiy bwa kuzuhobw ni Lazaar.​—Jah 11:53; 12:9-11.

13. Bwabiny tudy mwa kwiikal bajaadik neey Yehow wiiyiiy usangul bafw?

¹³ Yeez uleebel neey “boos bady mu maajamw” biiyiiy kubuuk ku lufw. (Jah 5:28) Byumvwumvwiij neey baat boos bady Yehow muteek mu meej biiyiiy kwiikal ni buumy. Ki bwa Yehow kubuush baat ku lufw, biikakaam avuluk myaand yoos yitaatal muut aaw. I mumw eeny? Ing. Kudy miliyar yivul ya tumbedimbedy (mitoot). Nook Bibl uleeleeb neey, Yehow i mumanyik diijin dya mutoot woos. (Bal Yeshaay 40:26.) Hikaley uvuluuk diijin dya mutoot woos, wiiyiiy uvuluk kakuy bwaal baat boos biikaley mwa kusangul. Bu mudyey muhang biit byoos, udy ni bukokesh bwa kwaakishilul bafw buumy.

14, 15. Myand yidy Yoob muleeb habitaatal kusanguk kwa baat yituloolongweesh biny?

¹⁴ Yoob, muut waakady mulamat Yehow wiiyihangujil neey: “Ki muut yiiy mufw udy mwa kuhing kubuuk eeny?” Cikwaabw wambiil Yehow neey: “Awaabiikan niiy nakwiitab, wiiyiiy uutal mim mudimw a bikam biibuh.” Yoob waakady wiitab kusanguk kwa baat. Waakady mumanyik neey Yehow i mwindil ni micim kwiiwul ciisang ciiyey kusangul baat baakady bafw.​—Yoobw 14:13-15

 ¹⁵ Wiiyumvumvw bicy awulalang bwa kusanguk kwa baat? Kumanyik neey Yehow i mukat biin-biin kusangul baat, kwiitukakashish ku micim. Ki udy mwa kwiiyihanguj misang yikwaabw neey: “Biin mu cisak cya mim ni balund nany biiyiiyok byabw kubuuk eeny?” I ngany wiiyiiy kubuuk? Baat biikal Yehow mwa kwiiy kusangul bikakal ni buumy kweeh? Tutalayak cileeleeb Bibl.

16. Shikacil a baat biikalobw mwa kubuush ku lufw ha bulab wiikaakal bicy?

¹⁶ Mu ciisang cya kal, baat babuushilobw ku lufw biiyiil kutalangan ni biin mu cisak cya babw ni balund naabw ha bulab aah. Ki ciikal mwa kwiiy kulongek mafuk miiyiiy kuuhal. Ki biiyiiy kwiikal bilengel byeeh. Bwabingany? Bwaal baat biiyiiyobw kubuush ku lufw ha bulab biiyiiy kwiikal ni buumy buyiil kabay bafw, biiyiiy bashikat ha bulab bushilangan ni butudy nabw lelow. Kakwiish kwiikaloh bend mavit, bulongavy ning mabeej.

17. I bangany biiyiiy kusanguk?

¹⁷ I bangany biiyiiy kusanguk? Yeez uleebel neey: “Boos bady mu majaamw ma civulukil biiyiiy kumvw diiy dindiy ni biiyiiy kuhatuk mu majaamw maababw.” (Jah 5:28, 29, NWT) Ni Myand yisokolweel Jah 20:13 uleeleeb neey: “Mwanz a kaabuuk-koony uhatwiil bafw boos bafwiidilomw. Lufw ni cyaab cidyaakal bafw bafwaafw bashikat [Lukit, NWT] bahatwiil byaabw bafw baakadyomw.” Miliyar ni miliyar ya baat biiyiiy kwiikal ni buumy. Mupostol Pool uleebel byend neey: kwiiyiiy kwiikal “kusanguk kwa baat bawaakan ni bakiish bawaakan.” (Bal Myand yilongel Bapostol 24:15, NWT.) Bwaloobw bumvumvwiij biny?

18. “Baat bawaakan” biiyiiy kusanguk i bangany?

 ¹⁸ Mu “baat bawaakan,” mudy biin mudimw ba Yehow baakady ni buumy kuuhal kwa kwiiy kwa Yeez ha bulab. Cileejel, Noweh, Abraham, Sarah, Moyiz, Luut ni Eseteel biiyiiy kwiibasangul ha bulab. Biin Ebreh shapitil 11 uleeleeb bwa baat bakwaabw ba ku baan-balum ni baan-bakaj baadyobw bateel aab. Biin mudimw ba Yehow bafwaafw mu ciisang citut eecy, biiyiiy byaabw kusanguk eeny? Ing. Bwaal bab byaabw bady mu baat “bawaakan.”

19. a) “Baat bakiish bawaakan” i bangany? b) Yehow wiiyiiy waakish “baat bakish bawaakan” mushind a babw kulong biny?

 ¹⁹ Mu “baat bakiish bawaakan” mudy Miliyar ni Miliyar ya baat baakady bafw kabay baheet mushind a kumanyik Yehow. Yehow kiish mubavulaminoh bend. Wiiyiiy kubasangul ni wiiyiiy kwiibakish mushind a babw kumumanyik ni wa kumuhambidil.

20. I bangany bakiish biiy kusanguk?

²⁰ Bwaaloobw bukakaam kumvwiij neey bafw boos biiyiiy kusanguk eeny? Waakweeh. Yeez uleebel neey baat bakwaabw kabaakwiiy cikwaabw ni buumy. (Luuk 12:5, NWT) I ngany udy ni diiy dya bulekeel bwa kuleeb neey muut oow wiiyiiy kusanguk eeny waakweeh? Yehow i yiy zuj udy ni bukokesh ha mut a biit byoos. Ki imwaakish Yeez byend bukokesh bwa yiy “kulumbulwiish bafw ni batal.” (Myand yilongel Bapostol 10:42) I bangany bakiish biiy kusanguk? I baat babiih bady kabay bakat kufutuluk.​—Bal Dimanyish dya ku bulekel 19.

21, 22. a) Baat badyobw basangul bwa kuy mu diiwul biikakal ni nyeet ya mushind kaay? b) I ngany wa kuuhal waakadyobw basangul bwa kuy mu diiwul?

²¹ Bibl i muleeb cikwaabw neey, baat bakwaabw biiyiiy kwiikal ni buumy mu diiwul. Hady muut usanguk bwa kuyey mu diiwul, kiish wiiy kwiikal ni buumy ni nyeet ya buumuut. Uhehet nyeet ya mu spirit, tuleeb neey, nyeet ya bwiin ya banjel.

²² Yeez i muut a kuhal usangwiilobw bwa kwiikal ni buumy mu diiwul. (Jah 3:13) Bakady ba musangul kudy Yehow kuunyim kwa mafuk masat babw baman kumuzuh. (Misambw 16:10; Myand yilongel Bapostol 13:34, 35) Kabaakady basangul Yeez ni nyeet ya buumuut. Mupostol Pool umvumvwiij neey “bajiijiik nyeet ya buumuut;  hiiyiiyey kusanguk wiiyiiy kwiikal ni nyeet ya ciifwaan Mawej (ya mu spirit).” (1 Biin Korent 15:44) Yeez wiiyiil cikwaabw mwanjel a bukash buvul! (1 Biin Korent 15:3-6) Ki Bibl uleeleeb neey baat bakwaabw bibasasangul bwa kuyobw mu diiwul.

23, 24. a) “Kasumbw kakeeh” kaleebel Yeez ikalong ni bangany? b) Bady buny kaay?

²³ Kuhal kwa Yeez kufw, wambiil biiyij bindiy nook: “Naayay nakiinulongolweel cyaab.” (Jah 14:2) Bwaal oobw bumvumvwiij neey bamw ba ku biiyij bindiy biiyiiy kusanguk bwa kwiikal ni buumy mu diiwul hamw ni Yeez. Biiyiiy kwiikal buny kaay? Yeez uleeleeb neey biiyiiy kwiikal “kasumbw kakeeh.” Tuleeb neey kabakwiikaloh bend bavul. (Luuk 12:32) Mupostol Jah utwaadil buny bwa babw: utadil Yeez “mwiimanakan a mulund a Siyoon [mu diiwul], waakady ni baat 144 000.”​—Myand Yisokolweel Jah 14:1.

²⁴ I diib kaay dyaakady biin krist 144 000 ni bwa kwiiy kusanguk? Bilondeshel Bibl, kusanguk kwa babw kwaakady mwa kwiiy kutang kuunyim kwa Yeez muman kutwaadij kukooyesh mu diiwul. (1 Biin Korent 15:23) Ki ciisang citudy eecy, ni bavul ba ku biin krist 144 000 baakady baman kwiibasangul mu diiwul. Hady bacidy ha bulab bafw, bibasasangul bwa kuyobw mu diiwul. Ki baat bavul biiyiiy kusanguk mu mafuk miiyiiy kuuhaal bwa kushikatobw mu paradiz ha bulab.

25. Shapitil uloolond wiiyiiy kwiitulongweesh biny?

²⁵ Mu mafuk makeeh oomw, Yehow wiiyiiy kukuuloh baat ku lufw. Lufw kalwiish lwiikalok cikwaabw! (Bal Yeshaay 25:8.) Ki baat 144 000 bayaay kalong biny mu diiwul? Bibl uleeleeb neey bikakal bakaleng, biiyiiy kulombol hamw ni Yeez. Shapitil uloolond wiiyiiy kwiitulongweesh bivul habitaatal bukaleng oobw.