၁-၃. ပ​အိၣ်ဘၣ်​လၢ ဃိာ်ပူၤ​လၢ​ကျဲ​ဒ်လဲၣ်, ဒီး​ကစၢ်​ယွၤ က​မၤ​ပူၤဖျဲး​ပှၤ​ဒ်လဲၣ်.

ထံၣ်ကမှံ​ကွၢ်​လၢ န​တၢ်ကမၣ်​တအိၣ်​ဘၣ်​ သနာ်က့ ပှၤ​စံၣ်ညီၣ်​နၤ​လၢ န​က​ဘၣ်​အိၣ်​လၢ​ဃိာ်ပူၤ တစိၤသး​န့ၣ်​တက့ၢ်. န​တအိၣ်​ဒီး​တၢ်ခွဲး​တၢ်ယာ်​လၢ န​က​ထူၣ်ဖျဲး​ထီၣ်​လၢ​ဃိာ်ပူၤ​ဘၣ်, ဒီး​ဖျါ​လၢ​န​တၢ်​မုၢ်လၢ်​စ့ၢ်ကီး တအိၣ်​ဝဲ​လၢၤဘၣ်. ဘၣ်ဆၣ်​ ဖဲ​န​တၢ်​မုၢ်လၢ်​တအိၣ်​လၢၤဘၣ်​အဆၢ​ကတီၢ် န​နၢ်ဟူ​ဘၣ်​လၢ ပှၤ​အိၣ်ဝဲ​တဂၤ​လၢ အ​မၤ​ထူၣ်ဖျဲး​ထီၣ်​နၤ​သ့ဝဲ​ဒီး အဝဲ​အၢၣ်လီၤ​စ့ၢ်ကီး​ဝဲ​လၢ က​မၤ​ထူၣ်ဖျဲး​ထီၣ်​နၤ​န့ၣ်​လီၤ. ဖဲ​န့ၣ်​အဆၢ​ကတီၢ် န​က​တူၢ်ဘၣ်​ဒ်လဲၣ်.

^၂ ပဝဲ​ခဲလၢာ်​ပ​အိၣ်ဘၣ်​လၢ တၢ်သံ​အ​ဃိာ်ပူၤ​လီၤ. ပ​မ့ၢ်​ဂုာ်ကျဲးစၢး​ဒ်လဲၣ်​ဂ့ၤ​ဒ်လဲၣ်​ဂ့ၤ သနာ်က့ ပ​ထူၣ်ဖျဲး​ထီၣ်​တ​သ့ဝဲ​ဘၣ်. ဘၣ်ဆၣ်​ ယဟိဝၤ​ယွၤ​အိၣ်ဒီး တၢ်စိ​တၢ်ကမီၤ​လၢ က​မၤ​ထူၣ်ဖျဲး​ထီၣ်​ပှၤလၢ တၢ်သံ​အစုပူၤ​လီၤ. ဒီး​အဝဲ​အၢၣ်လီၤ​ဝဲ​လၢ “ဒုၣ်ဒါ​လၢ​အ​က​ဘၣ်​တၢ်​ဟးဂီၤ​လၢခံကတၢၢ်​န့ၣ်, မ့ၢ်​တၢ်သံ​လီၤ.”—၁ ကရံၣ်သူး ၁၅:၂၆.

^၃ ခါဆူညါ​ဖဲ​တၢ်သံ​တအိၣ်​လၢၤဘၣ်​အဆၢ​ကတီၢ် န​တၢ်အိၣ်မူ​က​ပှဲၤ​ဒီး တၢ်​သူၣ်ဖှံ​သးညီ​ထဲလဲၣ်​န့ၣ်​ ဆိကမိၣ်​ကွၢ်​တက့ၢ်. ဘၣ်ဆၣ်​ ယဟိဝၤ​ယွၤ​တ​မၤ​လီၤမၢ်​ကွံာ်​ထဲ တၢ်သံ​တခါ​ဧိၤ​ဘၣ်. အဝဲ​က​မၤ​သမူထီၣ်​က့ၤ​ပှၤလၢ အ​သံ​တ့ၢ်​တဖၣ်​စ့ၢ်ကီး​လီၤ. တၢ်အံၤ အခီပညီ​အိၣ်​လၢ​နဂီၢ်​ဒ်လဲၣ်​န့ၣ်​ ဆိကမိၣ်​ကွၢ်​တက့ၢ်. ကစၢ်​ယွၤ​အၢၣ်လီၤ​ဝဲ​လၢ “ပှၤသံ” န့ၣ်​က​သမူထီၣ်​က့ၤဝဲ​လီၤ. (ယၡါယၤ ၂၆:၁၉) တၢ်အံၤ​လံာ်စီဆှံ​ကိးဝဲ​လၢ တၢ်​ဂဲၤဆၢထၢၣ်​သမူထီၣ်​က့ၤ​န့ၣ်​လီၤ.

၄. (က) ဖဲ​ပ​ဟံၣ်ဖိ​ဃီဖိ မ့တမ့ၢ် ပ​တံၤသကိး​လၢ ပ​အဲၣ်ဘၣ်​အီၤ​တဂၤ​သံဝဲ​အခါ တၢ်မနုၤ​ဟ့ၣ်​ပှၤ​တၢ်​သူၣ်မံ​သးမုာ်​သ့ဝဲ​လဲၣ်. (ခ) မတၤ​သ့ၣ်​တဖၣ်​ မ့ၢ်​ယ့ၣ်ၡူး​အ​တံၤသကိး​လၢ​အဂ့ၤ​လဲၣ်.

^၄ ဖဲ​ပ​ဟံၣ်ဖိ​ဃီဖိ မ့တမ့ၢ် ပ​တံၤသကိး​လၢ ပ​အဲၣ်ဘၣ်​အီၤ​တဂၤ​သံ​အခါ ဘၣ်​သ့ၣ်​သ့ၣ်​ ပ​က​တူၢ်ဘၣ်​တၢ်​သူၣ်ကိၢ်​သးဂီၤ ဒီး​တၢ်​သူၣ်​တ​မုာ်​သး​တ​မုာ် လၢ​ပ​တူၢ်​တ​န့ၢ်​ခီၣ် တကဲ​န့ၣ်​လီၤ. ပ​က​တူၢ်ဘၣ်​လၢ ပ​မၤတၢ်​တ​သ့​နီတမံၤ​ဘၣ်. ဘၣ်ဆၣ်​သနာ်က့ လံာ်စီဆှံ​ဟ့ၣ်​ပှၤ တၢ်​သူၣ်မံ​သးမုာ်​သ့ဝဲ​သပှၢ်​ကတၢၢ်​လီၤ. (ဖး ၂ ကရံၣ်သူး ၁:၃, ၄ တက့ၢ်.) ယဟိဝၤ​ယွၤ​ဒီး​ယ့ၣ်ၡူး အဲၣ်ဒိး​မၤ​သမူထီၣ်​က့ၤ ပှၤလၢ​ပ​အဲၣ်ဘၣ်​အီၤ​တဖၣ်​ထဲလဲၣ်​န့ၣ်​ ပ​က​ဆိကမိၣ်​ကွၢ်​တၢ်အဒိ​တခါ​လီၤ. ဖဲ​ယ့ၣ်ၡူး​အိၣ်​လၢ ဟီၣ်ခိၣ်​ချၢ​အဆၢ​ကတီၢ်​န့ၣ်​ အဝဲ​လဲၤ​ဟး​အိၣ်သကိး​ဝဲ စီၤ​လါစရူး​ဒီး​အ​ဒီပုၢ်ဝဲၢ်​မုၣ်​ နီၢ်​မၢ်သၤ​ဒီး​နီၢ်​မၤရံ​အါ​ဘျီ​န့ၣ်​လီၤ. အဝဲသ့ၣ်​သၢ​ဂၤန့ၣ်​ မ့ၢ်​ယ့ၣ်ၡူး​အ​တံၤသကိး​လၢ​အဂ့ၤ​လီၤ. လံာ်စီဆှံ​စံး​ဝဲ​လၢ– “ယ့ၣ်ၡူး​အဲၣ်​နီၢ်​မၢ်သၤ​ဒီး အ​ဒီပုၢ်ဝဲၢ်​မုၣ်, ဒီး​စီၤ​လါစရူး​လီၤ.” ဘၣ်ဆၣ်​ ဘၣ်​တနံၤ​န့ၣ်​ စီၤ​လါစရူး​သံဝဲလီၤ.—ယိၤဟၣ် ၁၁:၃-၅.

၅, ၆. (က) ဖဲ​ယ့ၣ်ၡူး​ထံၣ်ဘၣ်​ဝဲ စီၤ​လါစရူး​အဟံၣ်​ဖိ​ဃီဖိ ဒီး​အ​တံၤသကိး​တဖၣ်​ ပှဲၤ​ဒီး​တၢ်သူၣ်အုး​သးအုး​အခါ ယ့ၣ်ၡူး​တူၢ်ဘၣ်​ဝဲ​ဒ်လဲၣ်. (ခ) ယ့ၣ်ၡူး​အ​တၢ်​တူၢ်ဘၣ်​လၢ ဘၣ်ဃး​ဒီး​တၢ်သံ​န့ၣ်​ ဘၣ်​မနုၤ​အဃိ ဟ့ၣ်​ပှၤ​တၢ်​သူၣ်မံ​သးမုာ်​လဲၣ်.

^၅ ယ့ၣ်ၡူး​က​လဲၤ​မၤမုာ်​ထီၣ်​က့ၤ နီၢ်​မၢ်သၤ​ဒီး​နီၢ်​မၤရံ အသး​န့ၣ်​လီၤ. ဖဲ​နီၢ်​မၢ်သၤ​နၢ်ဟူ​ဘၣ်​ဝဲ​လၢ ယ့ၣ်ၡူး​ဟဲဝဲ​အခါ အဝဲ​လဲၤထီၣ်​ဆူ​ဝ့ၢ်​အ​ချၢ ဒ်သိး​အ​က​လဲၤသဂၢၢ်​ဝဲ​ယ့ၣ်ၡူး​လီၤ. အဝဲ​သးခု​လၢ အ​ထံၣ်ဘၣ်​ယ့ၣ်ၡူး ဘၣ်ဆၣ်​အဝဲ​တဲဘၣ်​ယ့ၣ်ၡူး​လၢ– “န​မ့ၢ်​အိၣ်တ့ၢ်​ဖဲ​အံၤ​ဒီး, ယ​ဒီပုၢ်ဝဲၢ်​ခွါ​တ​သံ​ဘၣ်​ဝဲ​ဘၣ်.” နီၢ်​မၢ်သၤ​ဆိကမိၣ်​ဝဲ​လၢ ယ့ၣ်ၡူး​ဟဲ​တုၤ​န့ၣ်​ စဲၤခံဝဲ​လံ. လၢခံ ဖဲ​ယ့ၣ်ၡူး​ထံၣ်ဘၣ်​ဝဲ စီၤ​လါစရူး​အ​ဒီပုၢ်ဝဲၢ်​မုၣ်​ နီၢ်​မၤရံ ဟီၣ်ဝဲ​အဆၢ​ကတီၢ်​န့ၣ် အသး​ဘၣ်ဒိ​ဒိၣ်မး​ဒီး အဝဲ​ဟီၣ်ဝဲ​စ့ၢ်ကီး​လီၤ. (ယိၤဟၣ် ၁၁:၂၁, ၃၃, ၃၅) ဖဲ​န့ၣ်​အဆၢ​ကတီၢ် ယ့ၣ်ၡူး​တူၢ်ဘၣ်​ဝဲ တၢ်​သူၣ်​တ​မုာ်​သး​တ​မုာ်​နးမး​လီၤ. ဒ်​န့ၣ်​အသိး ပဝဲ​စ့ၢ်ကီး ဖဲ​ပှၤလၢ​ပ​အဲၣ်ဘၣ်​အီၤ​တဂၤဂၤ​သံသဒၣ်​ကွံာ်​ပှၤ​အခါ ပ​က​တူၢ်ဘၣ်​တၢ်​သူၣ်​တ​မုာ်​သး​တ​မုာ်​န့ၣ်​လီၤ.

^၆ ဘၣ်ဃး​ဒီး​တၢ်သံ​န့ၣ်​ ယ့ၣ်ၡူး​တူၢ်ဘၣ်​ဝဲ ဒ်သိး​ဒီး​ပှၤ​အဃိ ကဲထီၣ်​တၢ်​သူၣ်မံ​သးမုာ်​လၢ​ပဂီၢ်လီၤ. ဒီး​ယ့ၣ်ၡူး​န့ၣ်​လီၤဂာ်​ဒီး​အ​ပၢ်​လီၤ. လၢတၢ်န့ၣ်​အဃိ ပ​သ့ၣ်ညါ​ဘၣ်​လၢ ယ့ၣ်ၡူး​ဒီး​အ​ပၢ် ယဟိဝၤ​ယွၤ​န့ၣ်​ တ​အဲၣ်ဒိးဝဲ​လၢ ပှၤ​ဟီၣ်ခိၣ်​ဖိ​တဖၣ်​က​သံဝဲ​ဘၣ်. (ယိၤဟၣ် ၁၄:၉) တကးဒံးဘၣ်​ ယဟိဝၤ​ယွၤ​အိၣ်ဒီး​တၢ်စိ​တၢ်ကမီၤ​လၢ က​မၤ​လီၤမၢ်​ကွံာ်​တၢ်သံ လီၤထူ​လီၤယိာ်​ဒီး အဝဲ​က​မၤဝဲ​ဘူးထီၣ်လံ.

၇, ၈. ဘၣ်​မနုၤ​အဃိ​လၢ နီၢ်​မၢ်သၤ​တ​အဲၣ်ဒိးဝဲ​လၢ ပှၤ​က​တလ့ၣ်ကွံာ်​လၢၢ်​လၢ စီၤ​လါစရူး​အ​တၢ်သွၣ်ခိၣ်​ အ​ခိၣ်ထိး​လဲၣ်, ဘၣ်ဆၣ်​ ယ့ၣ်ၡူး​မၤဝဲ​ဒ်လဲၣ်.

^၇ ဖဲ​ယ့ၣ်ၡူး​လဲၤ​တုၤလၢ စီၤ​လါစရူး​အ​တၢ်သွၣ်ခိၣ်​အလီၢ်​န့ၣ်​ ထံၣ်ဘၣ်​ဝဲ​ပှၤ​ကးတံာ်​ဃာ် တၢ်သွၣ်ခိၣ်​ အ​ခိၣ်ထိး​လၢ​လၢၢ်​န့ၣ်​လီၤ. ဒီး​ယ့ၣ်ၡူး​စံး​ဝဲ​လၢ– “ဟံးထီၣ်​ကွံာ်​လၢၢ်​န့ၣ်​တက့ၢ်.” ဘၣ်ဆၣ်​နီၢ်​မၢ်သၤ​တ​အဲၣ်ဒိးဝဲ​လၢ ပှၤ​က​မၤဝဲ​ဒ်​န့ၣ်​ဘၣ်. မ့ၢ်​လၢ​စီၤ​လါစရူး​အစိၣ်​ အိၣ်​လၢ​တၢ်သွၣ်ခိၣ်​အ​ပူၤ အိၣ်​လံ​လွံၢ်သီ​လံ. (ယိၤဟၣ်​ ၁၁:၃၉) ယ့ၣ်ၡူး​က​မၤဝဲ​တၢ်မနုၤ​လဲၣ်န့ၣ်​ နီၢ်​မၢ်သၤ တ​နၢ်ပၢၢ်​ဝဲ​ဘၣ်.

^၈ ယ့ၣ်ၡူး​စံး​ဘၣ်​စီၤ​လါစရူး​လၢ– “ဟဲက့ၤ​ထီၣ်​တက့ၢ်.” ဒီး​နီၢ်​မၢ်သၤ​ဒီး​နီၢ်​မၤရံ ထံၣ်ဘၣ်​ဝဲ​တၢ်​လီၤ​ကမၢ​ကမၣ်​တခါ​လီၤ. လံာ်စီဆှံ​စံး​ဝဲ​လၢ “ပှၤလၢ​အ​သံ​တ့ၢ်​တဂၤ​န့ၣ်, ဟဲက့ၤ​ထီၣ်​ဒီး အ​စု​အ​ခီၣ်​ဘိၣ်ဃာ်​အသး​လၢ တၢ်ကံးညာ်” လီၤ. (ယိၤဟၣ်​ ၁၁:၄၃, ၄၄) စီၤ​လါစရူး​သမူထီၣ်​က့ၤဝဲ ဒီး​အဝဲ​ထံၣ်ဘၣ်​က့ၤ အဟံၣ်​ဖိ​ဃီဖိ​ဒီး အ​တံၤသကိး​တဖၣ်​န့ၣ်​လီၤ. အဝဲသ့ၣ်​ထိးဘၣ်​အီၤ​ဒီး တဲသကိး​တၢ်​ဒီး​အီၤ​သ့ဝဲ​လီၤ. ယ့ၣ်ၡူး​မၤ​သမူထီၣ်​က့ၤ စီၤ​လါစရူး​လီၤ. တၢ်အံၤ​မ့ၢ် တၢ်​လီၤလး​ဖးဒိၣ်​တခါ​လီၤ.

၉, ၁၀. (က) မတၤ​ဟ့ၣ်​စိ​ဟ့ၣ်​က​မီၤ​ယ့ၣ်ၡူး လၢ​က​မၤ​သမူထီၣ်​က့ၤ ပှၤ​ဟီၣ်ခိၣ်​ဖိ​လဲၣ်. (ခ) လံာ်စီဆှံ​ပာ်ဖျါ​ထီၣ်ဝဲ တၢ်ဂ့ၢ်​တၢ်ကျိၤ​လၢ ဘၣ်ဃး​ဒီး​တၢ်​ဂဲၤဆၢထၢၣ်​သမူထီၣ်​က့ၤ​န့ၣ်​ ဘၣ်​မနုၤ​အဃိ ကဲဘျုး​လၢ​ပဂီၢ်​လဲၣ်.

^၉ မ့ၢ်​ယ့ၣ်ၡူး​မၤ​သမူထီၣ်​က့ၤ ပှၤ​ဟီၣ်ခိၣ်​ဖိ​လၢ အ​နီၢ်ကစၢ် အ​တၢ်စိ​တၢ်ကမီၤ​ဧါ. တမ့ၢ်​ဘၣ်. တချုး​လၢ​ယ့ၣ်ၡူး မၤ​သမူထီၣ်​စီၤ​လါစရူး​န့ၣ်​ အဝဲ​ဃ့​ဘါ​ထုကဖၣ်​တၢ်​ဆူ ယဟိဝၤ​ယွၤ​အ​အိၣ်​ ဒီး​ယဟိဝၤ​ယွၤ​ဟ့ၣ်​အီၤ တၢ်စိ​တၢ်ကမီၤ​ဒ်သိး အဝဲ​က​မၤ​သမူထီၣ်​က့ၤ စီၤ​လါစရူး​အဂီၢ်​လီၤ. (ဖး ယိၤဟၣ်​ ၁၁:၄၁, ၄၂ တက့ၢ်.) ဘၣ်ဆၣ်​ ပှၤလၢ​အ​ဂဲၤဆၢထၢၣ်​သမူထီၣ်​က့ၤ​န့ၣ်​ တမ့ၢ်​ထဲ စီၤ​လါစရူး​တဂၤဧိၤ​ဘၣ်. လံာ်စီဆှံ​ပာ်ဖျါ​ထီၣ်ဝဲ​ဘၣ်ဃး​ဒီး ပိာ်မုၣ်​ဖိ​လၢ​အသး​အိၣ်​ ၁၂ နံၣ်​တဂၤ တူၢ်ဘၣ်​ဝဲ​တၢ်ဆါ​နးမး​လီၤ. ပိာ်မုၣ်​ဖိ​အ​ပၢ်​လၢ အ​မံၤ​မ့ၢ်​စီၤယၤအ့ၤရူး​န့ၣ်​ ပှဲၤ​ဒီး​တၢ်​ဘၣ်ယိၣ်​ဒီး လိၣ်ဘၣ်​ဝဲ​တၢ်မၤစၢၤ​သပှၢ်​ကတၢၢ်​အဃိ အဝဲ​ဃ့ဝဲ​တၢ်မၤစၢၤ​လၢ ယ့ၣ်ၡူး​က​မၤဘျါ​က့ၤ အ​ဖိမုၣ်​န့ၣ်​လီၤ. စီၤယၤအ့ၤရူး​န့ၣ်​ အဖိ​အိၣ်​ထဲ​တဂၤဧိၤ​လီၤ. ဖဲ​အဝဲ​တဲတၢ်​ဒီး ယ့ၣ်ၡူး​အဆၢ​ကတီၢ် ပိာ်ခွါ​တနီၤ​ဟဲဝဲ​ဒီး စံး​ဝဲ​လၢ– “န​ဖိမုၣ်​သံ​လံဝဲလံ. မၤတံာ်တာ်​သရၣ်​န့ၣ်​တဂ့ၤ.” ဘၣ်ဆၣ်​ယ့ၣ်ၡူး​စံး​ဘၣ်​ စီၤယၤအ့ၤရူး​လၢ– “ပျံၤတၢ်​တဂ့ၤ, ထဲ​နာ်​တၢ်​တက့ၢ်, ဒီး​က​ဘၣ်​တၢ်​အုၣ်က့ၤ​ခီၣ်က့ၤ​အီၤ​လီၤ.” ယ့ၣ်ၡူး​လဲၤ​ဃုာ်ဒီး စီၤယၤအ့ၤရူး​ဆူ​အဟံၣ်​လီၤ. ဖဲ​အဝဲသ့ၣ်​ဟဲက့ၤ​ဘူးထီၣ်​ဒီး ဟံၣ်​အဆၢ​ကတီၢ် ယ့ၣ်ၡူး​ထံၣ်ဘၣ်​ဝဲ ဒီး​နၢ်ဟူ​ဘၣ်​ဝဲ​ပှၤ​ဟီၣ်​န့ၣ်​လီၤ. ယ့ၣ်ၡူး​စံး​ဘၣ်​အဝဲသ့ၣ်​လၢ– “ဟီၣ်​တဂ့ၤ, အဂ့ၢ်ဒ်အံၤ, တ​သံ​ဘၣ်. မ့ၢ်​အ​မံသပ့ၤဝဲ​လီၤ.” ယ့ၣ်ၡူး​အဲၣ်ဒိးစံးဝဲ တၢ်မနုၤ​လဲၣ်န့ၣ်​  ဖိသၣ်မုၣ်​အံၤ​အမိၢ်​အ​ပၢ် က​ဆိကမိၣ်​ထံ​ဝဲ​လီၤ. ယ့ၣ်ၡူး​မၢ​ပှၤ​ဟးထီၣ်​ကွံာ်​ကိးဂၤ​ဒဲး ဒီး​ကိး​ဖိသၣ်မုၣ်​အမိၢ်​အ​ပၢ် ဒီး​လဲၤနုာ်​ဝဲ​ဆူ​ဖိသၣ်မုၣ်​အ​ဒၢး​ပူၤ​လီၤ. ယ့ၣ်ၡူး​ဖီၣ်​အ​စု​က​ဖီလီ​ဒီး စံး​ဘၣ်​အီၤ​လၢ– “ပိာ်မုၣ်​ဖိသၣ်​ဧၢ, ဂဲၤဆၢထၢၣ်​တက့ၢ်.” ဖဲ​ဖိသၣ်မုၣ်​အံၤ​ဆၢထၢၣ်​ဟးထီၣ်​အဆၢ​ကတီၢ် အမိၢ်​အ​ပၢ်​က​သးခုဝဲ​ထဲလဲၣ်​န့ၣ်​ ဆိကမိၣ်​ကွၢ်​တက့ၢ်. ယ့ၣ်ၡူး​မၤ​ဂဲၤဆၢထၢၣ်​သမူထီၣ်​က့ၤ အဝဲသ့ၣ်​အ​ဖိမုၣ်​လီၤ. (မၢ်ကူး ၅:၂၂-၂၄, ၃၅-၄၂; လူၤကၣ်​ ၈:၄၉-၅၆) စးထီၣ်​လၢ​နံၤ​အဝဲ​န့ၣ်​လံၤ​လံၤ​န့ၣ်​ ဖဲ​အဝဲသ့ၣ်​ထံၣ်ဘၣ်​ဝဲ အ​ဖိမုၣ်​အခါ အဝဲသ့ၣ်​ကသ့ၣ်​နီၣ်ထီၣ်က့ၤ​ဝဲ​လၢ ယဟိဝၤ​ယွၤ​မၤ​သမူထီၣ်​က့ၤ​အ​ဖိမုၣ်​ ခီဖျိ​လၢ​ယ့ၣ်ၡူး​ခရံာ်​န့ၣ်​လီၤ. *

^၁၀ ဒ်​တၢ်​ဆၢကတီၢ် လဲၤ​ပူၤကွံာ်ဝဲ​အသိး ပှၤလၢ​ယ့ၣ်ၡူး မၤ​သမူထီၣ်​က့ၤ​တဖၣ်​န့ၣ်​ သံ​ကဒါက့ၤ​ဝဲ​လီၤ. ဘၣ်ဆၣ်​သနာ်က့ တၢ်​လၢ​ပ​ဖးဘၣ်​သ့ၣ်​တဖၣ်​ ကဲဘျုး​လၢ​ပဂီၢ် မ့ၢ်​လၢ​အ​ဒုးအိၣ်​ထီၣ်​ပ​တၢ်​မုၢ်လၢ်​လၢ ခါဆူညါ​အဂီၢ်​န့ၣ်​လီၤ. ယဟိဝၤ​ယွၤ​အဲၣ်ဒိး မၤ​သမူထီၣ်​က့ၤ ပှၤ​ဟီၣ်ခိၣ်​ဖိ​ဒီး အဝဲ​က​မၤဝဲလီၤ.

၁၁. စံၣ်တဲၤ​တဲလီၤ​တၢ် ၉:၅ န့ၣ်​သိၣ်လိ​ပှၤ တၢ်ဂ့ၢ်​ဘၣ်ဃး​ဒီး စီၤ​လါစရူး​န့ၣ်​ဒ်လဲၣ်.

^၁၁ လံာ်စီဆှံ​ပာ်ဖျါ​ထီၣ်ဝဲ လီၤတံၢ်​လီၤဆဲး​လၢ “ပှၤသံ​န့ၣ်​တ​သ့ၣ်ညါ​ဘၣ်​တၢ်​နီတမံၤ​ဘၣ်.” ဖဲ​စီၤ​လါစရူး​သံဝဲ​အဆၢ​ကတီၢ် တၢ်မၤ​အသး​ဒ်​န့ၣ်​စ့ၢ်ကီး​လီၤ. (စံၣ်တဲၤ​တဲလီၤ​တၢ် ၉:၅) ဒ်​ယ့ၣ်ၡူး​တဲဝဲ​အသိး ဖဲ​စီၤ​လါစရူး​သံဝဲ​အခါ​န့ၣ်​ လီၤဂာ်​ဒ်​အဝဲ​မံသပ့ၤဝဲ​န့ၣ်​လီၤ. (ယိၤဟၣ်​ ၁၁:၁၁) လၢတၢ်န့ၣ်​အဃိ ဖဲ​စီၤ​လါစရူး​အိၣ်​လၢ တၢ်သွၣ်ခိၣ်​ပူၤ​အဆၢ​ကတီၢ်​န့ၣ်​ အဝဲ​တ​သ့ၣ်ညါ​တၢ် “နီတမံၤ​ဘၣ်.”

၁၂. စီၤ​လါစရူး ဂဲၤဆၢထၢၣ်​သမူထီၣ်​က့ၤ​အ​နီၢ်ကီၢ်​န့ၣ်​ ပ​သ့ၣ်ညါ​ဘၣ်​ဒ်လဲၣ်.

^၁၂ ဖဲ​ယ့ၣ်ၡူး​မၤ​သမူထီၣ်​က့ၤ စီၤ​လါစရူး​အဆၢ​ကတီၢ်​န့ၣ်​ ပှၤ​အါဂၤ​ထံၣ်ဘၣ်​ဝဲ​လီၤ.  ယ့ၣ်ၡူး​အဒုၣ်အဒါ​တဖၣ်​ဒၣ်လဲာ်​သ့ၣ်ညါ​ဝဲ​လၢ အဝဲ​မၤဝဲ​တၢ်​လီၤလး​တခါ​အံၤ ဒီး​ဂ့ၢ်လိာ်​အီၤ​တန့ၢ်ဘၣ်. စီၤ​လါစရူး​သမူထီၣ်​က့ၤဝဲ​အဃိ ပာ်ဖျါ​ထီၣ်ဝဲ​လၢ တၢ်​ဂဲၤဆၢထၢၣ်​သမူထီၣ်​က့ၤ​န့ၣ်​ အိၣ်ဝဲ​နီၢ်ကီၢ်​လီၤ. (ယိၤဟၣ်​ ၁၁:၄၇) ပှၤ​အါဂၤ လဲၤ​အိၣ်သကိး​ဝဲ​စီၤ​လါစရူး​လီၤ. လၢတၢ်န့ၣ်​အဃိ​အဝဲသ့ၣ်​ စးထီၣ်​နာ်ဝဲ​လၢ ယ့ၣ်ၡူး​မ့ၢ်​ပှၤလၢ အ​ဟဲ​လၢ​ယွၤ​အ​အိၣ်​လီၤ. ဘၣ်ဆၣ်​ ယ့ၣ်ၡူး​အဒုၣ်အဒါ​တဖၣ်​ တဘၣ်​အသး​ဘၣ်. လၢတၢ်န့ၣ်​အဃိ အဝဲသ့ၣ်​ကူၣ်ထီၣ်​ဖးလီၤ​ဝဲ​လၢ က​မၤသံ​ယ့ၣ်ၡူး​ဒီး စီၤ​လါစရူး​န့ၣ်​လီၤ.—ယိၤဟၣ်​ ၁၁:၅၃; ၁၂:၉-၁၁.

၁၃. ဘၣ်​မနုၤ​အဃိ ပ​နာ်​သ့​သပှၢ်​ကတၢၢ်​လၢ ယဟိဝၤ​ယွၤ​မၤ​သမူထီၣ်​က့ၤ ပှၤသံ​တဖၣ်​သ့ဝဲ​လဲၣ်.

^၁၃ ယ့ၣ်ၡူး​စံး​ဝဲ​လၢ “ကယဲၢ် ပှၤ​အိၣ်​လၢ​တၢ်သွၣ်ခိၣ်​အ​ပူၤ​ခဲလၢာ်​န့ၣ်” က​ဂဲၤဆၢထၢၣ်​သမူထီၣ်​က့ၤဝဲ​လီၤ. (ယိၤဟၣ်​ ၅:၂၈) တၢ်အံၤ​အဲၣ်ဒိးစံးဝဲ​လၢ ပှၤသံတ့ၢ်​တဖၣ်​လၢ ယဟိဝၤ​ယွၤ​က​မၤ​သမူထီၣ်​က့ၤဝဲ​န့ၣ်​ ကစၢ်​တိၢ်နီၣ်​အဝဲသ့ၣ်​အဂ့ၢ်​အကျိၤ ဘၣ်​ဝဲ​ခဲလၢာ်​အဃိ မၤ​သမူထီၣ်​က့ၤ​အဝဲသ့ၣ်​သ့ဝဲ​လီၤ. ဘၣ်ဆၣ်​သနာ်က့ ကစၢ်​ယွၤ​တိၢ်နီၣ်​ ပှၤ​တဖၣ်​အံၤ​အဂ့ၢ်​အကျိၤ​ဘၣ်ခဲ​လၢာ်​န့ၣ်​ ပ​သ့ၣ်ညါ​ဘၣ်​ဒ်လဲၣ်. အဒိ ဆၣ်​တဖၣ်​အိၣ်ဝဲ အ​ကကွဲၢ်​လၢ​အ​ကထိ​တဖၣ်​န့ၣ်​လီၤ. လံာ်စီဆှံ​စံး​ဝဲ​လၢ ယဟိဝၤ​ယွၤ​သ့ၣ်ညါ​ဝဲ ဆၣ်​တဖျၢၣ်​စုာ်စုာ်​အ​မံၤ​န့ၣ်​လီၤ. (ဖး ယၡါယၤ ၄၀:၂၆ တက့ၢ်.) ဒ်​ကစၢ်​ယွၤ​တိၢ်နီၣ်​ဝဲ ဆၣ်​တဖျၢၣ်​စုာ်စုာ်​အ​မံၤ​ဘၣ်​ဝဲ​အသိး ပ​သ့ၣ်ညါ​ဘၣ်​လီၤတံၢ်​လၢ ပှၤသံ​တဖၣ်​လၢ​အ​က​ဂဲၤဆၢထၢၣ်​သမူထီၣ်​က့ၤ​န့ၣ်​ ကစၢ်​တိၢ်နီၣ်​ဝဲ အဝဲသ့ၣ်​အဂ့ၢ်​အကျိၤ​ဘၣ်ခဲ​လၢာ်​လီၤ. အါန့ၢ်​အန့ၣ်​ ယဟိဝၤ​ယွၤ​တ့လီၤ​တၢ်​ခဲလၢာ်​အဃိ ပ​သ့ၣ်ညါ​ဘၣ်​လၢ အဝဲ​အိၣ်ဒီး​တၢ်စိ​တၢ်ကမီၤ​လၢ က​မၤ​သမူထီၣ်​က့ၤဝဲ ပှၤသံ​တဖၣ်​န့ၣ်​လီၤ.

၁၄, ၁၅. စီၤယိၤဘး​အ​တၢ်ကတိၤ​လၢ ဘၣ်ဃး​ဒီး​တၢ်​ဂဲၤဆၢထၢၣ်​သမူထီၣ်​က့ၤ​န့ၣ်​ သိၣ်လိ​ပှၤ​တၢ်မနုၤ​လဲၣ်.

^၁၄ ပှၤတီ​ပှၤလိၤ​စီၤယိၤဘး နာ်ဝဲ​လၢ​တၢ်​ဂဲၤဆၢထၢၣ်​သမူထီၣ်​က့ၤ အိၣ်ဝဲ​လီၤ. ဒီး​အဝဲ​သံကွၢ်ဝဲ​လၢ– “ပှၤကညီ​မ့ၢ်​သံ​ဒီး, က​မူထီၣ်​ဒံး​စ့ၢ်ကီး​ဧါ.” ဝံၤဒီး​အဝဲ​စံး​ဘၣ်​ ယဟိဝၤ​ယွၤ​လၢ– “ကိးထီၣ်​တက့ၢ်, ဒီး​ယ​က​စံးဆၢ​နၤ​လီၤ. မ်​န​သးအိၣ်​တၢ်​လၢ န​စု​တ့​အီၤ​တက့ၢ်.” လၢတၢ်န့ၣ်​အဃိ ယဟိဝၤ​ယွၤ​ခိး​ကွၢ်လၢ်​ဝဲ တၢ်​ဆၢကတီၢ်​လၢ အ​က​မၤ​သမူထီၣ်​က့ၤ​ပှၤသံ​န့ၣ်​ စီၤယိၤဘး​သ့ၣ်ညါ​ဝဲ​လီၤ.—ယိၤဘး ၁၄:၁၃-၁၅.

^၁၅ န​မ့ၢ်​ဆိကမိၣ်​ တၢ်​မုၢ်လၢ်​လၢ ဘၣ်ဃး​ဒီး တၢ်​ဂဲၤဆၢထၢၣ်​သမူထီၣ်​က့ၤ​န့ၣ်​ န​က​တူၢ်ဘၣ်​ဒ်လဲၣ်. ဘၣ်​သ့ၣ်​သ့ၣ်​ န​က​ဆိကမိၣ်​ဘၣ်​လၢ ‘ယ​ဟံၣ်ဖိ​ဃီဖိ​ဒီး ယ​တံၤသကိး​လၢ  အ​သံ​တ့ၢ်​တဖၣ်​န့ၣ်​ မ့ၢ်​အဝဲသ့ၣ်​ က​ဂဲၤဆၢထၢၣ်​သမူထီၣ်​က့ၤ စ့ၢ်ကီး​ဧါ.’ ပ​သ့ၣ်ညါ​ဘၣ်​လၢ ယဟိဝၤ​ယွၤ​အဲၣ်ဒိး​မၤ​သမူထီၣ်​က့ၤ ပှၤသံ​တဖၣ်​အဃိ မ့ၢ်​တၢ်​လၢ​အ​မၤမုာ်​ထီၣ်​က့ၤ​ပ​သးလီၤ. မတၤ​သ့ၣ်​တဖၣ်​ က​ဂဲၤဆၢထၢၣ်​သမူထီၣ်​က့ၤ​လဲၣ်​ ဒီး​အဝဲသ့ၣ်​က​အိၣ်မူ​ဘၣ်​လၢ​တၢ်လီၢ်​ဖဲလဲၣ်​န့ၣ်​ လံာ်စီဆှံ​ပာ်ဖျါ​ထီၣ်​န့ၢ်​ပှၤလီၤ.

၁၆. ပှၤသံ​လၢ​အ​က​ဂဲၤဆၢထၢၣ်​သမူထီၣ်​က့ၤ​လၢ ဟီၣ်ခိၣ်​ချၢ​န့ၣ်​ က​အိၣ်မူဘၣ်ဝဲ​ဒ်လဲၣ်.

^၁၆ လၢညါ​န့ၣ်​ ပှၤလၢ​အ​ဂဲၤဆၢထၢၣ်​သမူထီၣ်​က့ၤ​တဖၣ်​ ထံၣ်လိာ်​ဘၣ်က့ၤ​အသး​ဒီး အဟံၣ်​ဖိ​ဃီဖိ​ဃုာ်ဒီး အ​တံၤသကိး​တဖၣ်​လၢ​ဟီၣ်ခိၣ်​ချၢ​န့ၣ်​လီၤ. ခါဆူညါ​န့ၣ်​ တၢ်​က​မၤ​အသး​ဒ်​န့ၣ်​စ့ၢ်ကီး​လီၤ. ဘၣ်ဆၣ်​သနာ်က့ တၢ်​က​မၤ​အသး​ဂ့ၤဒိၣ်​န့ၢ် အလီၢ်​တက့ၢ်​လီၤ. ဘၣ်​မနုၤ​အဃိ​လဲၣ်. ခီဖျိ​လၢ ပှၤလၢ​အ​က​ဂဲၤဆၢထၢၣ်​သမူထီၣ်​က့ၤ​တဖၣ်​န့ၣ်​ အိၣ်ဒီး​တၢ်ခွဲး​တၢ်ယာ်​လၢ က​အိၣ်မူဘၣ်ဝဲ​လီၤထူ​လီၤယိာ် ဒီး​တ​သံဝဲ​နီတဘျီ​လၢၤဘၣ်. ဒီး​ဟီၣ်ခိၣ်​အ​တၢ်အိၣ်သး​တဖၣ်​ က​လီၤဆီ​န့ၢ်ဒံး တၢ်အိၣ်သး​လၢ​ပ​ထံၣ်ဘၣ်​လၢ မုၢ်မဆါ​တနံၤ​အံၤန့ၣ်​လီၤ. ဖဲ​န့ၣ်​အဆၢ​ကတီၢ် တၢ်ဒုး​တၢ်ယၤ, တၢ်အၢ​တၢ်သီ ဒီး​တၢ်ဆူး​တၢ်ဆါ​တအိၣ်​လၢၤဘၣ်.

၁၇. မတၤ​သ့ၣ်​တဖၣ်​ က​ဂဲၤဆၢထၢၣ်​သမူထီၣ်​က့ၤဝဲ​လဲၣ်.

^၁၇ မတၤ​တဖၣ်​ က​ဂဲၤဆၢထၢၣ်​သမူထီၣ်​က့ၤ​လဲၣ်. ယ့ၣ်ၡူး​စံး​ဝဲ​လၢ “ကယဲၢ် ပှၤ​အိၣ်​လၢ​တၢ်သွၣ်ခိၣ်​အ​ပူၤ​ခဲလၢာ်​န့ၣ်, က​နၢ်ဟူ​အ​ကလုၢ်​သီၣ်, ဒီး​က​ဟဲ​က့ၤထီၣ်ဝဲ” လီၤ. (ယိၤဟၣ်​ ၅:၂၈, ၂၉) ဒီး လီၣ်ဖျါ ၂၀:၁၃ စံး​ဝဲ​လၢ– “ပီၣ်လဲၣ်​ဟ့ၣ်ထီၣ်​ပှၤသံ​အိၣ်​လၢ​အ​ပူၤ, ဒီး​တၢ်သံ​ဒီး​ပျုၤ​ပူၤ​န့ၣ်​ ဟ့ၣ်ထီၣ်​ပှၤသံ​အိၣ်​လၢ​အ​ပူၤ” လီၤ. ပှၤ​ဟီၣ်ခိၣ်​ဖိ အ​ကကွဲၢ်​လၢ​အ​ကထိ​တဖၣ်​န့ၣ်​ ကအိၣ်​မူ​ဘၣ်က့ၤ​လၢ အသီ​တဘျီ​န့ၣ်​လီၤ. လၢတၢ်န့ၣ်​အဃိ တၢ်မၢဖိ​ပီလူး​စံး​ဝဲ​လၢ “ပှၤသံ​အတီ​မ့ၢ်ဂ့ၤ, တတီ​ဘၣ်​မ့ၢ်ဂ့ၤ” က​ဂဲၤဆၢထၢၣ်​သမူထီၣ်​က့ၤဝဲ​လီၤ. (ဖး မၤတၢ် ၂၄:၁၅ တက့ၢ်.) တၢ်အံၤ​အဲၣ်ဒိးစံးဝဲ​တၢ်မနုၤ​လဲၣ်.

၁၈. ပှၤ “တီ” လၢ​အ​က​ဂဲၤဆၢထၢၣ်​သမူထီၣ်​က့ၤ​န့ၣ်​ မ့ၢ်​မတၤ​သ့ၣ်​တဖၣ်​လဲၣ်.

^၁၈ ပှၤလၢ​အ “တီ” န့ၣ်​ပၣ်ဃုာ်ဒီး​ယဟိဝၤ​ယွၤ​အခ့အပှၤ​လၢ အတီ​အလိၤ​လၢ​အ​အိၣ်မူ​တ့ၢ်​ဝဲ​လၢ တချုး​ယ့ၣ်ၡူး​ဟဲ​လီၤ​ဆူ ဟီၣ်ခိၣ်​ချၢ​အဆၢ​ကတီၢ်​န့ၣ်​လီၤ. ပှၤတီ​ပှၤလိၤ​ဒ်သိး​ဒီး စီၤ​နိအၤ, စီၤ​အၤဘြၤဟၣ်, နီၢ်​စၤရါ, စီၤ​မိၤၡ့, နီၢ်​ရူၤသး ဒီး​နီၢ်အ့ၤစတၢ်​သ့ၣ်​တဖၣ်​န့ၣ်​ က​ဂဲၤဆၢထၢၣ်​သမူထီၣ်​က့ၤဝဲ​လီၤ. ဘၣ်ဃး​ဒီး​ပှၤ​ပိာ်ခွါ​ဒီး​ပိာ်မုၣ်​သ့ၣ်​တဖၣ်​အံၤ အဂ့ၢ်​အကျိၤ​န့ၣ်​န​ဖးဘၣ်​အီၤ​သ့​ဖဲ ဧ့ၤဘြံၤ အဆၢဒိၣ်​ ၁၁ န့ၣ်​လီၤ. မ့မ့ၢ် ယဟိဝၤ​ယွၤ​အခ့အပှၤ လၢ အတီ​အလိၤ​တဖၣ်​လၢ​အ​သံ​လၢ​မုၢ်မဆါ​တနံၤညါအံၤ​န့ၣ်​ မ့ၢ်​အဝဲသ့ၣ်​က​ဂဲၤဆၢထၢၣ်​သမူထီၣ်​က့ၤ​စ့ၢ်ကီး​ဧါ. အဝဲသ့ၣ်​စ့ၢ်ကီး​မ့ၢ်​ပှၤ “တီ” အဃိ​က​ဂဲၤဆၢထၢၣ်​သမူထီၣ်​က့ၤဝဲ​လီၤ.

၁၉. ပှၤလၢ​အ “တတီ” တဖၣ်​န့ၣ်​မ့ၢ်​မတၤ​လဲၣ်, ဒီး​ယဟိဝၤ​ယွၤ​က​ဟ့ၣ်​အဝဲသ့ၣ်​ တၢ်ခွဲး​တၢ်ယာ်​ဒ်လဲၣ်.

^၁၉ ပှၤလၢ​အ “တတီ” န့ၣ်​ပၣ်ဃုာ်ဒီး ပှၤ​ဟီၣ်ခိၣ်​ဖိ​အ​ကကွဲၢ်​လၢ​အ​ကထိ​တဖၣ်​လၢ အ တ​ဒိးန့ၢ်​ဘၣ်​တၢ်ခွဲး​တၢ်ယာ်​လၢ က​သ့ၣ်ညါ​ဘၣ်​ ယဟိဝၤ​ယွၤ​အဂ့ၢ်​န့ၣ်​လီၤ. အဝဲသ့ၣ်​သံဝဲ​ဘၣ်ဆၣ်​ ယဟိဝၤ​ယွၤ​တ​သးပ့ၤနီၣ်​အီၤ​ဘၣ်. ကစၢ်​ယွၤ​က​ဒုး​ဂဲၤဆၢထၢၣ်​က့ၤ​အဝဲသ့ၣ်​ ဒီး​အဝဲသ့ၣ်​က​ဒိးန့ၢ်​ဘၣ်​ဝဲ​တၢ်ခွဲး​တၢ်ယာ် လၢ​က​မၤလိ​ဘၣ်​ကစၢ်​ယွၤ​အဂ့ၢ် ဒီး​မၤ​တၢ်ဘၣ်​အသး​လီၤ.

၂၀. ဘၣ်​မနုၤ​အဃိ ပှၤ​တဂဲၤ​ဆၢထၢၣ်​သမူထီၣ်​ဘၣ်က့ၤ ကိးဂၤ​ဒဲး​လဲၣ်.

^၂၀ ပှၤသံ​တဖၣ်​န့ၣ်​ မ့ၢ်​အဝဲသ့ၣ်​က​ဂဲၤဆၢထၢၣ်​သမူထီၣ်​က့ၤ ကိးဂၤ​ဒဲး​ဧါ. တမ့ၢ်​ဘၣ်. ယ့ၣ်ၡူး​စံး​ဝဲ​လၢ ပှၤ​ဟီၣ်ခိၣ်​ဖိ​တနီၤ​န့ၣ်​ တဘၣ်​တၢ်မၤ​သမူထီၣ်​က့ၤ​အီၤ​ဘၣ်. (လူၤကၣ်​ ၁၂:၅) မတၤ​ကြၢး​သမူထီၣ်​က့ၤ​လဲၣ်​ ဒီး​မတၤ​တ​ကြၢး​သမူထီၣ်​က့ၤ​လဲၣ်န့ၣ်​ ပှၤလၢ​အ​က​ဆၢတဲာ်​တၢ် အိၣ်ဝဲ​လီၤ. ယဟိဝၤ​ယွၤ​မ့ၢ် စံၣ်ညီၣ်ကွီၢ်​လၢ​အ​က​ဆၢတဲာ်​တၢ် လၢခံကတၢၢ်​တဂၤ ဘၣ်ဆၣ်​အဝဲ​ဟ့ၣ်​ယ့ၣ်ၡူး​တၢ်စိ​တၢ်ကမီၤ​လၢ “အ​က​စံၣ်ညီၣ်​ပှၤ​မူ, ဒီး​ပှၤသံ​အကွီၢ်​န့ၣ်​လီၤ.” (မၤတၢ် ၁၀:၄၂) ပှၤလၢ​အဘၣ်​တၢ်​စံၣ်ညီၣ်​အီၤ​ဒ် ပှၤအၢ​ပှၤသီ​လၢ​အ​တ​သးအိၣ်​ဆီတလဲ​အသး​န့ၣ်​ တဘၣ်​တၢ်မၤ​သမူထီၣ်​က့ၤ​အီၤ​လၢၤဘၣ်.—ကွၢ်တၢ်ဂ့ၢ် ၁၈ လၢ​လံာ်​အ​ကတၢၢ်တက့ၢ်.

၂၁, ၂၂. (က) ပှၤလၢ​အ​ဂဲၤဆၢထၢၣ်​သမူထီၣ်​က့ၤ​ဆူ​မူခိၣ်​န့ၣ်​ ကအိၣ်​ဒီး​တၢ်အိၣ်မူ​ဒ်လဲၣ်​တ​ကလုာ်​လဲၣ်. (ခ) ပှၤလၢ​အ​ဂဲၤဆၢထၢၣ်​သမူထီၣ်​က့ၤ​ဆူ​မူခိၣ်​ အဆိ​ကတၢၢ်​တဂၤ​န့ၣ်​ မ့ၢ်​မတၤ​လဲၣ်.

^၂၁ လံာ်စီဆှံ​ပာ်ဖျါ​ထီၣ်ဝဲ​လၢ ပှၤ​ဟီၣ်ခိၣ်​ဖိ​တနီၤ က​အိၣ်မူ​ဘၣ်​လၢ​မူခိၣ်​န့ၣ်​လီၤ. ဖဲ​ပှၤ​တဂၤဂၤ​ဘၣ်​တၢ်မၤ​သမူထီၣ်​က့ၤ​အီၤ​ဆူ​မူခိၣ်​အခါ တၢ်​တ​မၤ​သမူထီၣ်​က့ၤ​အီၤ ဒ်​ပှၤ​ဟီၣ်ခိၣ်​ဖိ​အက့ၢ်​အဂီၤ​လၢၤဘၣ်. က​ဂဲၤဆၢထၢၣ်​သမူထီၣ်​က့ၤဝဲ​ဒ် ပှၤ​နီၢ်သး​ဖိ​လၢ​မူခိၣ်​အသိး​န့ၣ်​လီၤ.

^၂၂ ယ့ၣ်ၡူး​မ့ၢ်​ပှၤ​အဆိ​ကတၢၢ်​တဂၤ​လၢ အ​ဒိးန့ၢ်​ဘၣ်​ဝဲ​တၢ်​ဂဲၤဆၢထၢၣ်​သမူထီၣ်​က့ၤ ဒ်​ပှၤ​နီၢ်သး​ဖိ​အသိး​န့ၣ်​လီၤ. (ယိၤဟၣ်​ ၃:၁၃) ဖဲ​ယ့ၣ်ၡူး​သံ​သၢသီ​ဝံၤ​အလီၢ်​ခံ​န့ၣ်​ ယဟိဝၤ​ယွၤ​မၤ​သမူထီၣ်​က့ၤ​အီၤ​လီၤ. (စံးထီၣ်​ပတြၢၤ ၁၆:၁၀; မၤတၢ် ၁၃:၃၄, ၃၅) ကစၢ်​ယွၤ​တ​မၤ​သမူထီၣ်​က့ၤ​ယ့ၣ်ၡူး​ဒ် ပှၤ​ဟီၣ်ခိၣ်​ဖိ​အက့ၢ်​အဂီၤ​အသိး​ဘၣ်. တၢ်မၢဖိ​ပ့းတရူး​တဲဖျါထီၣ်​ဝဲ​လၢ ယ့ၣ်ၡူး “ဒိး​သံ​အသး​လၢ တၢ်ဖံး​တၢ်ညၣ်​အ​ပူၤ ဘၣ်ဆၣ်​ဒီး, ဒိး​တၢ်မၤ​မူထီၣ်က့ၤ​အီၤ​လၢ​သး​န့ၣ်​လီၤ.” (၁ ပ့းတရူး ၃:၁၈) ယ့ၣ်ၡူး​ဂဲၤဆၢထၢၣ်​သမူထီၣ်​က့ၤ​ဒ် ပှၤ​နီၢ်သး​ဖိ​တဂၤ​အသိး​န့ၣ်​လီၤ. (၁ ကရံၣ်သူး ၁၅:၃-၆) ဒီး​လံာ်စီဆှံ​စံး​ဝဲ​လၢ ပှၤ​က​ဂဲၤဆၢထၢၣ်​သမူထီၣ်​က့ၤ​ဒ်အံၤ​န့ၣ်​ တမ့ၢ်​ထဲ​ယ့ၣ်ၡူး​တဂၤ​ဘၣ်.

၂၃, ၂၄. ယ့ၣ်ၡူး​တဲဝဲ​ဘၣ်ဃး​ဒီး “သိ​လၢ​အ​စှၤ​တဖု” န့ၣ်​မ့ၢ်​မတၤ​တဖၣ်​လဲၣ်, ဒီး​အဝဲသ့ၣ်​အ​နီၣ်ဂံၢ်​အိၣ်ဝဲ​ထဲလဲၣ်.

 ^၂၃ တချုး​လၢ ယ့ၣ်ၡူး​သံ​ဒံး​အဆၢ​ကတီၢ် အဝဲ​တဲဘၣ်​အပျဲၢ်​အဘီၣ်​လၢ အတီ​အလိၤ​တဖၣ်​လၢ– “ယ​က​လဲၤ​ကတဲာ်​ကတီၤ တၢ်လီၢ်​လၢ သုဂီၢ်​လီၤ.” (ယိၤဟၣ်​ ၁၄:၂, ခ့ခါစှီၤကျိာ်) တၢ်အံၤ​အခီပညီ​မ့ၢ်ဝဲ အပျဲၢ်​အဘီၣ်​တနီၤ​န့ၣ်​ က​ဂဲၤဆၢထၢၣ်​သမူထီၣ်​က့ၤ​ဒ်သိး အဝဲသ့ၣ်​ကအိၣ်​ဒီး​အီၤ​လၢ​မူခိၣ်​လီၤ. ပှၤ​သ့ၣ်​တဖၣ်​အံၤ​အ​နီၣ်ဂံၢ်​က​အိၣ်ဝဲ​ထဲလဲၣ်. ယ့ၣ်ၡူး​ကိး​အဝဲသ့ၣ်​လၢ “သိ​လၢ​အ​စှၤ​တဖု” အဃိ အ​နီၣ်ဂံၢ်​ကအိၣ်​ထဲ​စှၤဂၤ​လီၤ. (လူၤကၣ်​ ၁၂:၃၂) တၢ်မၢဖိ​ယိၤဟၣ်​ထံၣ်ဘၣ်​ဝဲ​လၢ ယ့ၣ်ၡူး “ဆၢထၢၣ်​လၢ​ကစၢၢ်​စံယိၣ်​အလိၤ [လၢ​မူခိၣ်], ဒီး​ပှၤလၢ​အ​အိၣ်ဒီး​အဝဲဒၣ်​အ​မံၤ ဒီး​အ​ပၢ်​အ​မံၤ​ကွဲး​အသး​လၢ​အ​မဲာ်တူၢ်ခိၣ်​န့ၣ်, တ​ကလီၤ​လွံၢ်​ကလး​လွံၢ်​ကထိ​အိၣ်ဒီး​အီၤ​လီၤ.” လၢတၢ်န့ၣ်​အဃိ ပ​သ့ၣ်ညါ​ဘၣ်​လၢ သိ​လၢ​အ​စှၤ​တဖု​အံၤ​အ​နီၣ်ဂံၢ် အိၣ်ဝဲ​လီၤတံၢ်​လီၤဆဲး​န့ၣ်​လီၤ.—လီၣ်ဖျါ ၁၄:၁.

^၂၄ ပှၤ ၁၄၄,၀၀၀ လၢ​အမ့ၢ် ခရံာ်ဖိ​တဖၣ်​အံၤ က​ဂဲၤဆၢထၢၣ်​က့ၤဝဲ​လၢ ဆၢကတီၢ်​ဖဲလဲၣ်. လံာ်စီဆှံ​စံး​ဘၣ်​ပှၤလၢ အဝဲသ့ၣ်​ က​ဂဲၤဆၢထၢၣ်​သမူထီၣ်​က့ၤဝဲ​ဖဲ ယ့ၣ်ၡူး​ပၢတၢ်​လၢ မူခိၣ်​အဆၢ​ကတီၢ်​န့ၣ်​လီၤ. (၁ ကရံၣ်သူး ၁၅:၂၃) ပ​အိၣ်မူ​ဘၣ်​လၢ တၢ်​ဆၢကတီၢ်​အဝဲ​န့ၣ်​လီၤ. ပှၤ ၁၄၄,၀၀၀ အါဒၣ်​တၢ်​တက့ၢ်​န့ၣ်​ ဂဲၤဆၢထၢၣ်​သမူထီၣ်​က့ၤ​ဆူ​မူခိၣ်​လံ. မုၢ်မဆါ​တနံၤညါအံၤ ပှၤ ၁၄၄,၀၀၀ တဖၣ်​အံၤ​အကျါ​တနီၤ​န့ၣ်​ အိၣ်မူ​ဒံးဝဲ​လၢ​ဟီၣ်ခိၣ်​ချၢ​လီၤ. အဝဲသ့ၣ်​မ့ၢ်​သံ​န့ၣ်​ က​က့ၤထီၣ်​ဘၣ်​ဆူ​မူခိၣ်​တဘျီဃီ​လီၤ. ဘၣ်ဆၣ်​သနာ်က့ ပှၤ​ဟီၣ်ခိၣ်​ဖိ​အါဒၣ်​တၢ်​တက့ၢ် လၢ​က​ဂဲၤဆၢထၢၣ်​သမူထီၣ်​က့ၤ​န့ၣ်​ က​အိၣ်မူဘၣ်ဝဲ​လၢ ဟီၣ်ခိၣ်​ပၤရဒံစူး​အ​ပူၤ​န့ၣ်​လီၤ.

၂၅. တၢ်​မၤလိ​လၢခံ​တခါ​န့ၣ် ပ​က​မၤလိ​တၢ်ဂ့ၢ်​မနုၤ​လဲၣ်.

^၂၅ တ​ယံာ်လၢၤဘၣ်​န့ၣ်​ ယဟိဝၤ​ယွၤ​က​မၤ​ထူၣ်ဖျဲး​ထီၣ်​ကွံာ် ပှၤ​ဟီၣ်ခိၣ်​ဖိ​လၢ တၢ်သံ​အစုပူၤ ဒီး​တၢ်သံ​က​လီၤမၢ်​ကွံာ်ဝဲ​လီၤထူ​လီၤယိာ်​န့ၣ်​လီၤ. (ဖး ယၡါယၤ ၂၅:၈ တက့ၢ်.) ဘၣ်ဆၣ်​ ပှၤလၢ​အ​ဂဲၤဆၢထၢၣ်​သမူထီၣ်​က့ၤ​လၢ​မူခိၣ်​န့ၣ်​ က​မၤဝဲ​တၢ်မနုၤ​ဖဲ​န့ၣ်​လဲၣ်. လံာ်စီဆှံ​ပာ်ဖျါ​ထီၣ်ဝဲ​လၢ အဝဲသ့ၣ်​က​ပၢ​ဃုာ်​တၢ်​ဒီး​ယ့ၣ်ၡူး​လၢ ဘီမုၢ်​တၢ်ပၢ​တၢ်ပြး​အ​ပူၤ​လီၤ. တၢ်​မၤလိ​လၢခံ​တခါ​န့ၣ်​ ပ​က​မၤလိ​အါထီၣ်​ဘၣ်ဃး​ဒီး တၢ်ပၢ​တၢ်ပြး​တခါ​အံၤ​အဂ့ၢ်​န့ၣ်​လီၤ.