1-3. Mu nkia pelezo twina yeto awonso? Aweyi o Yave kekutuvevolwela?

YINDULA vo tumbu kia pelezo ozengelo mu kuma kia diambu kuvangidi ko. Kuna ye mpila olenda vevokela ko. E vuvu kiaku kidimbukidi. Kavena ye diambu olenda vanga ko. Kansi ekolo e vuvu kiaku kidimbukanga, omwene muntu una yo nkuma wa kuvevola. Usidi o nsilu wa kusadisa. Aweyi omona?

² Yeto awonso mu pelezo ya lufwa twina. Kana nkutu nkia diambu tuvanga, katulendi tina lufwa ko. Kansi, Yave una yo nkuma wa kutuvevola muna lufwa. Osianga o nsilu vo “e mbeni a nsuka ofukiswa e mvimba i lufwa.”—1 Korinto 15:26.

³ Yindula luvevoko okala lwau vava kilwanga e ntangwa ina kumona diaka wonga ko mu kuma kia lufwa! Yave ke katula kaka lufwa ko. Kansi, ofutumuna mpe awana bafwa. Yindula nluta dikutwasila. Yave osianga nsilu vo awana bafwa bevutuka zinga diaka. (Yesaya 26:19) Bibila kiyikilanga dio vo lufuluku.

4. (a) Nki kilenda kutufiaulwisa vava tufwilwanga yitu yovo nkundi? (b) Aki nani bakala akundi a Yesu?

⁴ Vava tufwilwanga yitu yovo nkundi, diampasi dikalanga mu zizidila e ntantu ye kinsona. Tumonanga vo ke tuna ye lusadisu ko. Kavena diambu ko tulenda vanga mu kumvutulwisa o moyo. Kansi, Bibila  kikutufiaulwisanga. (Tanga 2 Korinto 1:3, 4.) Yambula twabadika nona kimosi kisonganga o luzolo lwa Yave yo Yesu lwa fula awana bafwa. Vava Yesu kakala ova ntoto, nkumbu miayingi wakingulanga Lazaro ye mpangi zandi zamakento, Maria yo Mareta. Yau atatu akundi a Yesu bakala. Bibila kivovanga vo: “Yesu wazolanga Mareta, Maria yo Lazaro.” Kansi, lumbu kimosi Lazaro wafwa.—Yoane 11:3-5.

5, 6. (a) Adieyi Yesu kavanga vava kamona yitu ya Lazaro ye akundi andi badilanga? (b) Ekuma dinina dialufiaulwisu mu zaya una Yesu kamona mu kuma kia lufwa?

⁵ Yesu wayenda fiaulwisa Mareta yo Maria. Vava Mareta kawá vo Yesu mu kwiza kena, wayenda kunkika kuna mbazi a mbanza. Wayangalala vava kamona Yesu, kansi wavova vo: “Kele vo wakala ovava, o mpangi ame nga kafwidi ko.” Mareta wayindula vo Yesu kalendi vanga diaka diambu ko. I bosi, Yesu wamona Maria wa nsanga Mareta wadilanga. Vava kamona e ntantu zau, Yesu mpe wamona e mpasi mu ntima yo dila. (Yoane 11:21, 33, 35) Wamona e mpasi ye ntantu zitwasanga lufwa.

⁶ O zaya vo Yesu wamona ntantu mu kuma kia lufwa dikutufiaulwisanga. Yesu una nze Se diandi. (Yoane 14:9) Yave una yo nkuma wakatula lufwa yakwele mvu, ke kolo ko i diau kevanga.

7, 8. Ekuma Mareta kazolela ko vo e tadi diakatulwa vana ziami kia Lazaro? Adieyi Yesu kavanga?

⁷ Vava Yesu kalwaka vana nduka wazikilwa Lazaro, tadi diampwena diakala vana mwelo. Yesu wavova vo: “Nukatula e tadi.” Kansi Mareta kazola ko. E nitu a  Lazaro “lumbu yá” yakala muna ziami. (Yoane 11:39) Mareta kazaya ko dina Yesu kazola vanga muna sadisa mpangi andi.

⁸ Yesu wavovesa Lazaro vo: “Vaika!” Dina Mareta yo Maria bamona kuna kwalanda, diasivi kibeni. “Muntu ona wafwa ovaikidi, malu yo moko mandi mazingwa tenda ya nlele.” (Yoane 11:43, 44) Lazaro wavutuka diaka zinga kumosi ye yitu yandi ye akundi. Bambimbakana, kunsimba yo mokena yandi. Ekwe sivi diampwena! Yesu wafula Lazaro.

9, 10. (a) Nani wavana nkuma kwa Yesu wa fula wantu? (b) Ekuma tusansu twa lufuluku twinina o mfunu kwa yeto?

⁹ Nga Yesu mu nkuma wa yandi kibeni kafudila awana bafwa? Ve. Vitila kafula Lazaro, Yesu wasamba kwa Yave, i bosi Yave wamvana nkuma wafula Lazaro. (Tanga Yoane 11:41, 42.) Lazaro ke yandi kaka ko wafulwa. Bibila kiyikanga mpe dumbelele kia mvu 12 ona wakala ye kimbevo. Yairo wa se diandi watokana kwayingi, muna kuma kiaki, wadodokela Yesu kansasula. E dumbelele i mwana mosi kaka kakala yandi. Ekolo kamokenanga yo Yesu, valwaka wantu yo kumvovesa vo: “O mwan’aku ankento ofwidi! Ekuma otokanesena diaka Nlongi?” Kansi, Yesu wavovesa Yairo vo: “Kumoni wonga ko, kwikila kaka, ovuluka kwandi.” I bosi, Yesu wayenda kumosi yo Yairo kuna nzo andi. Vava balwaka, Yesu wamona yo wá wantu badilanga. Wabavovesa vo: “Nuyambula o dila, kadi kafwidi ko, leka kaka kalele.” Nanga o ngudi yo se bakiyuvula kana adieyi Yesu kazola vova. Yesu  walomba kwa wantu awonso bavaika, i bosi wavovesa ngudi yo se bakota muna suku dialekeswa dumbelele. Yesu wasimba koko kwandi yo kumvovesa vo: “E dumbelele, ivovese vo, ‘telama!’” Yindula e kiese bamona mase mandi vava mwana kasikama vana vau yo yantika diata! Yesu wafula mwan’au. (Maku 5:22-24, 35-42; Luka 8:49-56) Tuka muna lumbu kiakina, vava batalanga mwan’au, basungamenanga dina Yave kavanga mu kuma kiau muna Yesu. *

¹⁰ Awana bafulwa kwa Yesu, kuna kwalanda bafwa diaka. Kansi mana tutanganga mu kuma kia wantu awaya, mfunu mena kadi mekutuvananga e vuvu. Yave ozolele fula awana bafwa ye ovanga wo kikilu.

11. E sono kia Kimpovi 9:5, adieyi kitulongele mu kuma kia Lazaro?

¹¹ Bibila kitoma kiesesanga vo awana bafwa “ke bazeye konso diambu ko.” O lufuluku lwa Lazaro lusonganga e ziku kia diambu diadi. (Kimpovi 9:5) Nze una Yesu kavova, Lazaro wakala nze yandi waleka tulu. (Yoane 11:11) Ekolo kakala muna ziami, kazaya diaka “diambu ko.”

12. Aweyi tuzayidi wo vo Lazaro wafuluka kikilu?

¹² Vava Yesu kafula Lazaro, wantu ayingi bamona e sivi diadi. Kana nkutu mbeni za Yesu bazaya wo vo wavanga kikilu e sivi diadi. Lazaro moyo kakala,  ediadi diasonga e ziku vo lufuluku lwavangama kikilu. (Yoane 11:47) Wantu ayingi bayenda kingula Lazaro, muna kuma kiaki bayantika kwikila vo Nzambi kikilu watuma Yesu. Mbeni za Yesu ke bayangalela dio ko, muna kuma kiaki, bazola vonda Yesu yo Lazaro.—Yoane 11:53; 12:9-11.

13. Ekuma tulenda kadila ye ziku vo Yave ofula awana bafwa?

¹³ Yesu wavova vo “awonso bena muna ziami” befuluka. (Yoane 5:28) Ediadi disongele vo awonso bena muna nyindu a Yave bevutuka zinga diaka. Kansi, o Yave muna fula o muntu, kafwete sungamena mawonso mu kuma kia muntu ndioyo. Nga olenda wo vanga kikilu? Elo, kadi vena ye ulolo wa ntetembwa kuna zulu. Bibila kivovanga vo Yave ozeye e nkumbu ya konso ntetembwa. (Tanga Yesaya 40:26.) Avo osungamenanga e nkumbu ya konso ntetembwa, tuna ye ziku vo osungamena mawonso mu kuma kia awana kefula. Edi disundidi o mfunu, Yave wasema lekwa yawonso, tuzeye wo vo ovuidi nkuma wafula awana bafwa.

14, 15. E mvovo mia Yobi, adieyi mikutulonganga mu kuma kia lufuluku?

¹⁴ Yobi wa nkwa kwikizi wakwikilanga muna lufuluku. Wayuvula vo: “O muntu avo ofwidi, nga olenda zinga diaka?” I bosi wavova kwa Yave: “Obokela, mono itambulwila. Okala ye viangi muna salu kia moko maku.” Elo, Yobi wazaya wo vo Yave ovingilanga ye tima diawonso e ntangwa kefula awana bafwa.—Yobi 14:13-15.

¹⁵ Aweyi omonanga mu kuma kia vuvu kia lufuluku? Nanga olenda kukiyuvula, ‘Adieyi tuvova mu  kuma kia yitu ye akundi ame ana bafwa, nga besinga fuluka mpe?’ Dialufiaulwisu mu zaya vo Yave ozolele fula awana bafwa. Yambula twazaya dina Bibila kivovanga mu kuma kia fulu bezingila ye aki nani besinga fulwa.

16. Nkia mpila zingu bekala kiau awana befuluka yo zingila ova ntoto?

¹⁶ Awana bafulwa kuna nz’ankulu, bavutuka diaka zinga kumosi ye akundi ye yitu yau ova ntoto. Ediadi i diau mpe divangama kuna sentu, kansi lufuluku lwalu lusunda o wete. Ekuma? E kuma kadi, awana befuluka ova ntoto bekala ye lau dia zinga yakwele mvu ke besinga fwa diaka ko. Bezingila mu nza yaswaswana ye nza tuzingilanga o unu. Ke vekala diaka vita ko yovo umpumbulu ngatu mayela.

17. Aki nani besinga fulwa?

¹⁷ Aki nani besinga fulwa? Yesu wavova vo: “Awonso bena muna ziami bewá e nding’andi yo vaika.” (Yoane 5:28, 29) Muna Lusengomono 20:13, tutanganga vo: “O kalunga ovaikisi mafwa mena mo, o lufwa ye Ziami ivaikisi mafwa mena mo.” Elo, ulolo wa wantu bevutuka diaka zinga. Paulu wa ntumwa mpe wavova vo “vekala yo lufuluku lwa ansongi ye awana bena vo ke ansongi ko.” (Tanga Mavangu 24:15.) Ediadi aweyi disongele?

18. Aki nani i “ansongi” ana befuluka?

¹⁸ Awana beyikilwanga vo “ansongi” i selo yakwikizi ya Yave ana bazinga vitila Yesu keza ova ntoto. O wantu nze Noa, Abarayama, Sara, Mose, Rute, Estere befuluka yo zingila ova ntoto. Olenda tanga tusansu mu  kuma kia akala ye akento awaya muna kapu kia 11 kia nkand’a Ayibere. Adieyi tuvova mu kuma kia selo ya kwikizi ya Yave befwanga mu lumbu yeto? Oyau mpe “ansongi,” muna kuma kiaki befuluka.

19. Aki nani i wantu “bena vo ke ansongi ko”? Nkia lau Yave kekubavana?

 ¹⁹ Awana “bena vo ke ansongi ko” i ulolo wa wantu ana bafwa lembi zaya Yave. Kana una vo bafwa, Yave kabavilakana ko. Yave okubafula yo kubavana e lau dia longoka mu kuma kiandi yo kunsadila.

20. Aweyi tuzayidi wo vo ke wantu awonso ko befuluka?

²⁰ Nga ediadi disongele vo awonso bafwa besinga fuluka? Ve. Yesu wavova vo akaka ke befuluka ko. (Luka 12:5) Nani obaka e nzengo kana nani ofuluka ye nani ke fuluka ko? Yave i mfundisi ansuka, kansi wavana mpe wisa kwa Yesu kia fundisa “awana bena o moyo ye awana bafwa.” (Mavangu 10:42) Konso muntu una vo kimpumbulu olembi soba, ke fuluka ko.—Tala e Mvovo Misasilu 19.

21, 22. (a) Awana bekwenda zingila kuna zulu, nkia nitu befulukanga yau? (b) Nani i muntu antete wafuluka mu kwenda zingila kuna zulu?

²¹ Bibila kikutuzayisanga vo akaka kuna zulu bekwenda zingila. Vava muntu kefulukanga mu kwenda zingila kuna zulu, ke fulukanga ye nitu a kinsuni ko, nitu a kimwanda kefulukanga yau.

²² Yesu i muntu antete wafulwa mu kwenda zingila kuna zulu. (Yoane 3:13) Vava Yesu kavondwa, muna lumbu kiatatu Yave wamfula. (Nkunga 16:10; Mavangu 13:34, 35) Yesu kafuluka ye nitu a kinsuni ko. Petelo wa ntumwa wasasila vo Yesu “wavondelwa muna nitu, kansi wavewa o moyo muna mwanda.” (1 Petelo 3:18) Yesu wavutuka diaka o zinga se muntu a  kimwanda. (1 Korinto 15:3-6) Kansi, Bibila kivovanga vo ke yandi kaka ko ofulwa ye nitu a kimwanda.

23, 24. Aki nani Yesu kayikila vo “fikambi-kambi”? Wantu akwa bena?

²³ Vitila lufwa lwandi, Yesu wavovesa alandi andi akwikizi vo: “Isinga kwenda kimana yanukubikila e fulu.” (Yoane 14:2) Ediadi disongele vo akaka muna alandi andi befulwa mu kwenda zinga yandi kuna zulu. Wantu akwa bena? Yesu wavova vo lutangu lwa wantu awaya lwakete, i sia vo, “fikambi-kambi.” (Luka 12:32) Yoane wa ntumwa wayika lutangu lwasikididi vava kamona Yesu ‘otelamene [kuna zulu] vana Mongo a Zione, kumosi ye 144.000.’—Lusengomono 14:1.

²⁴ Nkia ntangwa 144.000 ma Akristu badi yantika fuluka? Bibila kivovanga vo ediadi diadi yantika vangama vava Kristu keyantika yala kuna zulu. (1 Korinto 15:23) Owau Yesu mu yala kena, ediadi disongele vo ndonga muna 144.000 bafuluka kala mu kwenda yo kuna zulu. Awana bakinu ova ntoto mu lumbu yeto, avo bafwidi, befulwanga vana vau mu kwenda zingila kuna zulu. Kansi, wantu ayingi, o lufuluku lwau kuna sentu lukala, bezingila muna Paradiso ova ntoto.

25. Adieyi tulongoka muna kapu kilanda?

²⁵ Fioti fisidi, Yave ovevola wantu awonso muna lufwa. O lufwa ke lukala diaka ko. (Tanga Yesaya 25:8.) Awana bekwenda kuna zulu, nkia salu bekwenda sala? Bibila kivovanga vo beyala kumosi yo Yesu muna Kintinu. Tulongoka mayingi mu kuma kia Kintinu kiaki muna kapu kilanda.