1-3. Ama woro aru ru a’dusi, dika Yehova ni di nga ama onze ngoniru?

MI EGA di nga ’ba su mi o’azu arujoa kpere mini drazu isu de mi ezani e’yo azi ku. Geri azi ’bani ecozu mi onzezu ni yo. Asi ’baza azi mini ra ni yo, dika e’yo azi vini mini eco ’ye drinia ra ni yo. Mini di asi nzezu e’yo dria ma dria ’bo ria, mi isu oni kini ’ba azi okpo be ecopi mi onzepi ra ni ci, dika so oyo kini i nga mi aza ko ra! Ayiko eco di mi fu ngopi?

² Dra ombe ama dria aru ru. Aka tro a’du ’ye i ka ti, geri azi amani apazu ra ni yo. Te di Yehova ma okpo ama onzezu dra ma alea risi ci. Dika so oyo kini ari’bo “erini ngale ojale tokoru vile asizuri eri drani.”​—1 ’Ba Korintoa ’Diyi 15:26.

³ Mi ega di nga ayiko ngapi mi fupi a’dusiku mi econi di ’ye dra si orisi ku ri! Yehova ngani lu dra atri i a’dule ku. Eri nga vini ’ba odrapi ’bo ’diyi enga idriru dika. Mi ega di nga e’yo orodri mini nga isu otuta ’di ma alea ri ma dria. Mungu ece amani kini ’ba “drapi ’bo ’diyi” nga enga idriru. (Isaya 26:19) ’Di bani afa Biblia ni omve engata ru ri i.

4. (a) ’Ba azi ama ori’ba ru kaniku ama agyiru ni ka dra, ama eco asi omiza isu ngoa? (b) A’di pi ndra Yesu ma agyiru ni?

⁴ ’Ba azi ama ori’ba ru kaniku ama agyiru ni ka dra, asi suza amani ovuzu alenia ri ni ovu angiri  saaru. Ama asi nyoza isu angiri tu. Afa azi amani eco ’ye agu drapi ’da engazu idriru dika ni yo. Te di Biblia eco amani asi omiza adari fe ra. (Mi la 2 ’Ba Korintoa ’Diyi 1:3, 4.) Ama ma ne di nga eceta alu, e’dapi Yehova pi Yesu be avasi lezu ’ba amani odrapi ’bo ’diyi engazu idriru dika ri. Yesu ni ndra nga ovuzu nyakua ’dia ria, eri ndra mu Lazaro pi ne amvipika erini, Marita azini Maria pie indi. ’Ba’diyi ndra na tro Yesu ma agyi ni. Biblia ’yo kini: “Yesu le Marita pi, amvipi be, Lazaro pie avasi.” Te di o’du azini alu, Lazaro dra di ra.​—Yohana 11:3-5.

5, 6. (a) Yesu ni nezu ’ba Lazaro vu akua azini eri ma agyiru ’diyi candiru ri fe erini a’du ’yezu? (b) E’yo dra ni eji ri ni fizu Yesu ma asia candiru ri amani asi omiza ru a’dusi?

⁵ Yesu mu asi omiza fe Marita pini Maria be. Marita ka mu eri kini Yesu ni emuria ’dini ’bo, fu mu eri ma dri tezu. Ayiko fu eri saaru erini Yesu ni nezu risi, te ’yo Yesu ni ’dini: “Mi ka ndra ovu ’doa, te’do adripi mani drani ku.” Marita ni ega risi Yesu eza sa ecazu amba amba. ’Da ma vutia, Yesu ne eri ma amvi Maria ni owuria. Erini candi eyini ovuzu alenia ri nezu ri fe candi ni fizu eri ma asia, dika e’do owu. (Yohana 11:21, 33, 35) Yesu ma asi su tro tro ama asi ni suzu de ama ’ba azi amani lele tu ni drani rile.

⁶ Nizu e’yo dra vuri ni fi Yesu ma asia tro tro erini fizu ama asia rile ri ni amani asi omiza fe saaru. Yesu ni e’yo ’ye ima Ati le. (Yohana 14:9) Yehova ma okpo ecozu dra dezu iriti ri ci, dika eri nga ’dile ri ’ye mbele ru ra.

7, 8. ’Bani lezu oni Lazaro ma nyadri ma ti opizuri guzu kala ria, Marita oga si a’dusi? Te di Yesu ’ye a’duni?

⁷ Yesu ni ecazu Lazaro ma nyadria ’bo ria, isu de ’ba opi nyadri nde ma ti oni amboru ni si. Yesu nga di ’yo: “Emi gu oni amve.” Te Marita oga yi dri si. Lazaro ma avu o’a de ’bilea o’du su ’bo. (Yohana 11:39) Marita awini e’yo Yesu ni ndra lele ’yeleri ni ku.

⁸ Yesu nga di ’yo Lazaro ni: “Mi efu amve!” E’yo Marita pini ne Maria be ’di ma vutia ri osuta ru. “’Ba drapi ’bori nga efu ra, de drini pi pa be ovu nga otizaru bongo ’ba sazu ’biliarisi.” (Yohana 11:43, 44) ’Ba enga Lazaro ni idriru ogogo ’bo! Nga di i eci ’ba ivu akua, azini ’ba ima agyiru ’diyi pie. ’Ba eco di ndra Lazaro ni elo, azini e’yo nze eri be ra. ’Di ndra tali azi amboru ni! Yesu enga di Lazaro ni idriru ’bo.

9, 10. (a) A’di fe Yesu ni okpo ’ba odrapi ’bo ’diyi engazu ri ni? (b) E’yo ’bani sile engata ma dria ’diyi amani orodriru a’dusi?

⁹ Yesu ni ndra ’ba draza enga okpo ima ngulupi niri si ya? Yo. Yesu ni nga Lazaro ni engazu ku ria, zi Yehova ni, Yehova fe di erini okpo Lazaro ni engazu. (Mi la Yohana 11:41, 42.) ’Ba engapi dra ma alea ri ovuni Lazaro i a’dule ku. Biblia ece vini amani e’yo zamva azi eli be 12 azo ni bi onzi onzi ri ma dria. Eri ma ati, Yairo ma asi ri ombu tu, ’ba matu Yesu vu ecozu ima zi ni atizu. Eri ndra Yairo ma mva ru a’dule. Erini nga e’yo nzeria Yesu be, ’ba azi emu e’yo luzu erini kini: “Mi zi dra ’bo. Mi di ’Ba ’ba Imbapiri ecandi ’dani a’disi ya?” Te Yesu ’yo Yairo ni: “Mi ru ku,  mi a’i lu kiri’i, eri nga ovu pazaru ra.” Yesu mu di Yairo be tualu erivu akua. Eyini ecazu aku ma ageyia ria, Yesu ne ’ba yi awu wuria. Yesu ’yo di yini: “Emi wu ku; eri drani ku, te eri o’du ko.” Eri ma ati eco ndra e’yo ega eri ma andri be e’yo Yesu ni nze ’da ma efi ngoni yari ma dria ra. Yesu ofu ’ba azi ’diyi amve, te ji zamva werea ’da ma ati pi andri be pari ’bani zamva nde ma avu ’bazu ria. Yesu e’du di eri ma dri e’yere, ’yo di erini “Zamva wereari, ma ’yo mi tia, ‘Mi enga uru!’” Mi ega di nga ayiko zamva ’da ma tipika yi fupi sa erini engazu ra, erini di e’dozu acizu ’dasi ri! Yesu enga di eyi ma zi ni ’bo. (Marako 5:22-24, 35-42; Luka 8:49-56) E’dozu o’du ’dasi, eyini eyi ma zi ni nezu ri ni fe eyini e’yo egazu e’yo Yehova ni ndra ’ye eyini Yesu vusi ri ma dria. *

¹⁰ ’Ba ndra Yesu ni enga idriru ’diyi emu odra ’da ma vutia dika. Te e’yo amani la ’ba ’diyi ma dria ri orodriru a’dusiku eri amani asi ’baza ada ri fe. Yehova le ’ba odrapi ’bo ’diyi ma enga ra, eri vini nga eyi enga ra ecekokoru.

11. Eklesiaste 9:5 imba amani Lazaro ma dria ngoni?

¹¹ Biblia ece amani nditiri kini “’ba drapi ’bo ’diyi nini afa azini aluni ku.” ’Di di e’yo ndra i ’yepi Lazaro be ri i. (Eklesiaste 9:5) Tro tro Yesu ni ndra ’yole  rile, Lazaro ni drazu ri si dria ekile eri ndra o’du ko rile. (Yohana 11:11) Lazaro ni ndra ovuzu nyadria ria, “nini afa azini aluni ku.”

12. Ama ni ngoniru Lazaro enga ndra idriru ra?

¹² Yesu ni Lazaro ni engazu ria, ’ba kakau ne yi ma mile si ra. ’Ba ndra Yesu ma ari’boru ’diyi ni vini Yesu ’ye tali ’ba draza engazu ’di ra ri ra. Lazaro ni ovuzu idriru ’da e’da kini Lazaro enga idriru ra. (Yohana 11:47) ’Ba mupi Lazaro ni nepi erini engazu ’bo ri ma vutia ’diyi vini kakau. ’Di fe di eyini a’izu ra kini Mungu epe Yesu ma ti ni. ’Ba Yesu ma ari’bo ru ’diyi ni e’yo ’di lezu ku risi, e’do di e’yo otu Yesu pi ’dizu Lazaro be iritro.​—Yohana 11:53; 12:9-11.

13. Ama ni ngoniru Yehova ni nga ’ba odrapi ’bo ’diyi enga idriru ra?

¹³ Yesu ’yo kini “’ba dria ovupi nyadria” ’diyi nga enga ra. (Yohana 5:28) Efini si ’ba dria Yehova ni eyi ma e’yo egazu ra ’diyi nga enga idriru dika ra. Te di Yehova ni ecozu ’ba azi engazu, le ma ega e’yo agu ’da ma dria ’diyi dria. Yehova eco e’yo ’daleri ega ra ada ya? ’Bi’bio ’bua ’diyi ma kalafe bilioni bilioni. Biblia ’yo kini Yehova ni ’bi’bio ’diyi woro ru si. (Mi la Isaya 40:26.) Ka di eco ’bi’bio ’diyi ni dria ru si ra, efinisi eco e’yo ’ba erini le enga idriru ’diyi ma dria ’diyi ega woro ra. Ani ra Yehova ma okpo ’ba yi engazu idriru dika ri ci a’dusiku o’ba afa dria ni.

14, 15. E’yo Yobu ni nze engata ma dria ri imba ama ngoni?

¹⁴ Agu ndra a’ita be omvele Yobu ruri ni ndra engata ni nga ovu ci ri ra. Zi zita ’dini: “’Ba ka dra ra, eri nga ovu idriru dika ya?” ’Yo di vutinia Yehova ni ’dini: “Mi nga omve, ma nga di e’yo omvi mi tia ra; azi mi dri pamvuniri ma avani nga mi va ra.” Yobu ni  ndra ra sa Yehovani ngazu ’ba odrapi ’bo ’diyi engazu ri ma ava ni eri fu saaru.​—Yobu 14:13-15.

¹⁵ Asi ’baza engata niri ni mini ayiko fe ngopi ya? Mi eco di ’dile e’yo ega ’dini, ‘’Ba ma ori’ba ru azini ma agyiru ’diyi vini nga enga ra ya?’ Nizu Yehova le ’ba odrapi ’bo ’diyi enga idriru dika ri ni amani asi omiza fe saaru. Ama ma ne di nga e’yo Biblia ni nze pari eyini ngazu o’azu ri ma dria ri, azini a’di eco nga enga ni yari ma dria.

16. ’Ba ’bani nga enga o’azu nyakua ’dia ’diyi nga ovu idri ngoleri ma alea?

¹⁶ Ewu ndra drio ’dasi, ’ba engapi dra ma alea ’diyi ri ndra dri fu ori’ba azini agyi yini ’diyi pie dika nyakua ’dia. ’Dileri ni nga i ’ye ewu drileri ma alea dika ra, te eri di nga ’diri aga onyisi ra. A’dusi? A’dusiku ’ba ’bani nga enga ’diyi nga o’a nyakua ’dia ’dani ’dani. Wudrikuru eyini ngazu o’azu ri co vini esele amani sa ’disi ovuzu alenia ’di be ra. A’di ’diza, adra, azini azo ni nga ovu yo.

17. A’di eco nga enga ra ni ya?

¹⁷ A’di eco nga enga ra ni ya? Yesu ’yo kini ‘Ba dria ovupi nyadria ’diyi nga o’duko erini eri ra, yi di nga efu ra.’ (Yohana 5:28, 29) Dika E’yo Eceza 20:13 ece amani ’dini: “Miri ofu ’ba draza ovupi eri ma alia ’diyi, dra pi Pari ’ba drazaniri be ofu vini ’ba draza yi ma alia ’diyi indi.” Adaru, ’ba bilioni bilioni odrapi ’bo ’diyi nga enga idriru ra. ’Ba ti pele Paulo ’yo kini “’ba kililiru ’diyi azini ’ba kililiru ku ’diyi iri tro” yi nga enga ra. (Mi la ’Yeta 24:15.) E’yo ’di ma efi ngoni?

18. ’Ba “kililiru” ’bani nga enga ra ’diyi a’dipi ya?

 ¹⁸ “’Ba kililiru” ’diyi ma alea indi ri ati’bo ndra Yehova ni drio de nga Yesu emuni nyakua ku ’diyi. ’Ba ekile Noa le, Ibrahimu le, Sara le, Musa le, Rutu le, azini Esiteri le ’diyi nga enga o’azu nyakua ’dia. Mi eco e’yo la agupi azini oku ’diyi ma azi ma dria ’Ba Ebraniani ma capita 11 ma alea. Te di ati’bo Yehova  ni a’ita be odrapi ewu amavu ’di ma alea ’diyi ria? Eyi vini ’ba “kililiru” ’diyi, ani ’ba nga eyi enga ra.

19. “’Ba kililiru ku” ’diyi ’ba ngole ’diyi? Yehova ni nga eyini drileba ngoleri fe?

¹⁹ “’Ba kililiru ku” ’diyi ’ba bilioni bilioni ndra awipi drileba isupi e’yo onizu Yehova ma dria ku ’diyi. Eyini tro odrazu ra ti, Yehova avini nga eyi ma e’yo ku. Eri nga eyi enga ra, dika eyi vini nga drileba isu e’yo onizu eri ma dria, azini eri inzizu.

20. Engata ovuni ’ba dria ni ku a’dusi?

²⁰ ’Di ma efi di ’ba dria odrapi ’bo ’diyi nga enga ra ’dini ya? Yo. Yesu ’yo ndra kini, ’ba odrapi ’bo ’diyi ma azi econi nga enga ku. (Luka 12:5) A’di ni nga ’ba azi ma enga ra kaniku ma enga ku ri ma e’yo ne ni? Yehova ni e’yo liza asizu ri li ni, te fe vini Yesu ni okpo ngazu “’ba idriru pi ma e’yo lizu ’ba draza ’diyi be.” (’Yeta 10:42) Agu azi ’bani eri ma e’yo lizu ’ba onziru lepi idri ini ojapi ku ri econi nga enga ku.​—Mi ne E’yo O’bazaru ’Diyi 19 ri.

21, 22. (a) ’Ba ngapi engapi tuzu ’bua ’diyi nga enga rua ngoleri be? (b) Agu ndra ’bani enga oko rua orindiru ri be o’azu ’bua ri a’di i?

²¹ Biblia lu vini amani kini ’ba engapi dra ma alea ’diyi ma azi yi nga tu ’bua. ’Ba ngapi tupi ’bua ri econi nga enga rua amani ’ba adaru ’dileri be ku. Eri nga enga o’azu ’bua orindiru.

²² Yesu ni ’ba engata ’dileri isupi oko ri i. (Yohana 3:13) O’du ka mu ali na ’bani Yesu ni ’dizu ri ma vutia ’bo, Yehova enga eri idriru dika. (Zaburi 16:10; ’Yeta 13:34, 35) Yesu awini ndra enga rua ’ba ada niri be ku. ’Ba ti pele Petero ece amani kini ’ba fu ndra  Yesu ni “ruasi ra, te fe eri dri idri dika orindi si.” (1 Petero 3:18) ’Ba enga ndra Yesu ni orindiru, okpo be tu! (1 ’Ba Korintoa ’Diyi 15:3-6) Biblia awini ’yo engata ’daleri asi di lu Yesu si ’dini ku.

23, 24. ’Ba ovupi “kabilo were” ndra Yesu ni e’yo nzezu drinia ri ma azi ru ’diyi a’dipi, dika eyi ma kalafe si?

²³ Yesu ni nga drazu ku ria, ’yo ’ba ima vuti bipi ’diyi ni ’dini: “Ma mu pari edezu emi dri” (Yohana 14:2) E’yo erini nze ’di ma efi, ’ba eri ma vuti bipi ’diyi ma azi yi nga o’a eri be tualu ’bua ’dale. Eyi ma kalafe ni nga ovu si? Yesu ’yo ndra eyi ma kalafe ni nga ovu were ru, omve eyi “kabilo were” ’diyi. (Luka 12:32) ’Ba ti pele Yohana ece amani ’ba ’da yi ma kalafe ra, kini i ne Yesu ‘so pa Oni Zionia, azini eri be ’ba 144,000.’​—E’yo Eceza 14:1.

²⁴ ’Ba nga Kristiani 144,000 ’diyi enga sa ngosi? Biblia ece amani kini eyi nga e’do enga Kristo ni e’dozu opi nyazu ’bua ’bo ri ma vutia. (1 ’Ba Korintoa ’Diyi 15:23) Ama di sa ’disi ewu ’da ma alea, dika ’ba 144,000 ’diyi ma kalafe angiri ndeni ’diyi di sa ’disi ’bua. Eyi ma azi ngapi odrapi ewu amavu ’di ma alea ’diyi tu ’bua eyini odrazu ’bo ri ma vutia coti coti. Te di ’ba azi odrapi ’bo ’diyi ma joloko yi nga enga o’azu Paradisia nyakua ’dia.

25. Capita ’di ma drilea ri ni nga ama imba a’du ma dria?

²⁵ Ace were Yehova ni nga ama onze dra ma alea si ra, azini dra ngani di ovu dika ku! (Mi la Isaya 25:8.) Te ’ba mupi ’bua ’dale ’diyi di mu a’du ’ye? Biblia ece kini eyi nga opi nya Yesu be Suru Munguniri ma alea. Ama nga e’yo oni opi nyaza ’da ma dria capita ’di ma drilea ri ma alea.