1-3 Ngaˬ hui teˇ g’aˇ le le aˬ htoꞈ ma htawnˍ hk’aw chehˇ taˍ ve htaꞈ shuˍ ve le? Yaˬhoˉvaˬ aˬ htoꞈ ma ka tiꞈ te taˍ ve le?

Dawˇ nyi sheˍ, nawˬ maˇ te yaꞈ htawˇ teˇ co-e htawnˍ hk’aw haw laˇ tuˬ suhˉ jehˬ laˇ ve yoˬ. Nawˬ lehˬ nawˬ awˬ to ponˬ tuˬ teꞈ chiˉ te maˇ g’a leh hpehˇ laˇ tuˬ dawˇ law kuiˬ kaꞈ maˇ cawˬ. Yaꞈ hk’aˇ, awˬ yanˇ chi ve awˬ hk’aw lo, chaw teˇ g’aˇ nawˬ htaꞈ ca ga laˇ ve yoˬ. Yawˇ nawˬ htaꞈ ga ponˬ laˇ tuˬ kanˇ paˆ cawˬ leh nawˬ htaꞈ awˬ tehˬ awˬ na ga laˇ tuˬ yoˬ tehꞈ ka tiꞈ te laˇ ve yoˬ! Nawˬ hk’aˬ hk’e dawˇ ve le?

² Ngaˬ hui teˇ g’aˇ le le htawnˍ hk’aw chehˇ taˍ ve hk’a shuˍ yoˬ. Htawnˍ chi ve lehˬ suh ve teˇ ceuˬ yoˬ. Ngaˬ hui hk’aˬ ma coˇ caˇ ve htawˇ, tawˆ-e g’a hk’aˇ maˇ mawˬ. Yaꞈ hk’aˇ, Yaˬhoˉvaˬ kanˇ paˆ cawˬ leh ngaˬ hui suh ve htaꞈ ponˬ laˇ tuˬ yoˬ. Yawˇ ka tiꞈ te taˍ ve, “awˬ leh meuˇ te luˬ piˇ tuˬ ve canˇ paˍ lehˬ, suh ve teˇ ceuˬ htaꞈ yoˬ.”—1 Kawˇrenˍhtuˆ 15:26.

³ Dawˇ nyi sheˍ, maˇ g’a suh ve k’o nyi ma hk’aˬ ma sha ve le! Yaˬhoˉvaˬ suh ve htaꞈ ceh tiˉ te luˬ tuˬ ve maˇ heˆ. Yawˇ suh peuˬ ve chaw htaꞈ k’awꞈ teꞈ tu la piˇ tuˬ yoˬ. Chi ve awˬ tehˬ hpehꞈ la ve k’o, hk’aˬ ma daꞈ ve dawˇ nyi sheˍ. Yaˬhoˉvaˬ ka tiꞈ te taˍ ve, ‘suh taˍ peuˬ ve chaw k’awꞈ teꞈ la tuˬ yoˬ.’—Iˉsaˍyaˆ 26:19.

4. (a) Ngaˬ hui haꞈ ve chaw suh-e htaˇ, dawˇ sha tuˬ hk’aˬ kaˬ lo g’a tuˬ le? (b) Yeˍsuˆ yawˇ haꞈ ve awˬ chawˇ a shu le?

⁴ Ngaˬ hui ve yehˬ hk’aw maˇ k’oˆ, awˬ chawˇ meuˆ ve suh ve k’o, nyi ma luˬ jaˇ leh hk’aˬ hk’e te k’ai tuˬ maˇ shiˍ. Ngaˬ hui  yawˇ hui htaꞈ ga piˇ maˇ g’a leh, k’awꞈ teꞈ tu la piˇ tuˬ kaꞈ te maˇ g’a. Yaꞈ hk’aˇ, Liꞈ hpu lehˬ dawˇ sha tuˬ te laˇ g’a ve yoˬ. (2 Kawˇrenˍhtuˆ 1:3, 4 g’aw ve.) Yaˬhoˉvaˬ leh Yeˍsuˆ ngaˬ hui haꞈ ve chaw htaꞈ k’awꞈ teꞈ tu la piˇ gaˇ jaˇ ve yoˬ tehꞈ shiˍ tuˬ, hpehꞈ la ve awˬ lawn htaꞈ nyi sheˍ. Yeˍsuˆ miˬ guiˬ hk’oˆ chehˇ htaˇ, Laˍzaˍruˆ, Maˍhtaˆ, Maˍriˆ geh ca guiˇ-e hk’eh ve yoˬ. Yawˇ hui 3 g’aˇ Yeˍsuˆ haꞈ ve awˬ chawˇ hpehꞈ ve yoˬ. Liꞈ hpu hk’aw k’oˆ ve, “Yeˍsuˆ lehˬ, Maˍhtaˆ leh yawˇ ve awˬ nyi ma htaꞈ maˇ k’oˆ, Laˍzaˍruˆ htaꞈ maˇ k’oˆ, haꞈ ve yoˬ.” Te nyi gaˬ leh Laˍzaˍruˆ suh-e ve yoˬ.—Yoˇhanˬ 11:3-5.

5, 6. (a) Laˍzaˍruˆ suh ve htaꞈ yawˇ ve yehˬ k’a leh awˬ chawˇ hawˬ ve htaꞈ mawˬ htaˇ, Yeˍsuˆ hk’aˬ hk’e k’ai ve le? (b) Chaw suh htaˇ Yeˍsuˆ dawˇ haˍ ve htaꞈ g’a shiˍ ve aˬ htoꞈ ma te ngaˬ hui awˬ g’aˇ g’a ve le?

⁵ Maˍhtaˆ, Maˍriˆ htaꞈ awˬ g’aˇ piˇ tuˬ, Yeˍsuˆ k’ai ve yoˬ. Yeˍsuˆ laˬ chehˇ ve htaꞈ Maˍhtaˆ g’a kaˇ htaˇ, venˇ awˬ baˬ hpawˇ lo haˆ k’ai ve yoˬ. Yawˇ Yeˍsuˆ htaꞈ g’a mawˬ htaˇ, ha lehˬ ve yoˬ. Yaꞈ hk’aˇ, yawˇ k’oˆ ve, “Jawˇ mawˇ-oˬ, nawˬ choˬ kaˬ chehˇ taˍ ve hk’e k’o, ngaˬ ve awˬ nyi paˍ suh tuˬ ve maˇ heˆ.” Maˍhtaˆ dawˇ ve Yeˍsuˆ laˬ naiˇ ve yoˬ. Oˇ htaˇ, Maˍriˆ hawˬ chehˇ ve htaꞈ Yeˍsuˆ g’a mawˬ ve yoˬ. Oˇ kaˬ lo chaw hk’a peu-eˬ dawˇ haˍ ve htaꞈ mawˬ htaˇ, Yeˍsuˆ nyi ma luˬ leh hawˬ ve yoˬ. (Yoˇhanˬ 11:21, 33, 35) Chi lehˬ haꞈ ve chaw suh htaˇ, ngaˬ hui hk’a shuˍ Yeˍsuˆ dawˇ haˍ ve yoˬ.

⁶ Yeˍsuˆ Awˬ pa Yaˬhoˉvaˬ htaꞈ shuˍ ve pa taw, Yeˍsuˆ dawˇ haˍ ve teˇ ceuˬ ngaˬ hui awˬ g’aˇ g’a ve yoˬ. Chi lehˬ Awˬ pa dawˇ haˍ leh suh ve htaꞈ nyi bawˬ ve yoˬ tehꞈ, g’a shiˍ ve yoˬ. (Yoˇhanˬ 14:9) Suh ve htaꞈ peuˬ k’ai tuˬ, Yaˬhoˉvaˬ kanˇ paˆ cawˬ leh maˇ maw k’o yawˇ te tuˬ yoˬ.

7, 8. Aˬ htoꞈ ma te Maˍhtaˆ tuˍ hpfuh hk’oˇ meuˇ lo haˉ pui shiˍ maˇ hpfuhˆ baˬ tcuh gaˇ ve le? Yaꞈ hk’aˇ, Yeˍsuˆ hk’aˬ hk’e te ve le?

⁷ Laˍzaˍruˆ ve tuˍ hpfuh lo Yeˍsuˆ gaˬ la htaˇ, awˬ hk’oˇ meuˇ  lo haˉ pui shiˍ hoˆ taˍ ve yoˬ. Yeˍsuˆ k’oˆ ve, “haˉ pui shiˍ htaꞈ hpfuhˆ baˬ-oꞈ.” Maˍhtaˆ maˇ hpfuhˆ baˬ tcuh gaˇ. Awˬ lawn k’o, Laˍzaˍruˆ suh ve “4 nyi” gaˬ peuˬ. (Yoˇhanˬ 11:39) Laˍzaˍruˆ htaꞈ ga piˇ tuˬ, Yeˍsuˆ aˬ htoꞈ ma te tuˬ yawˇ maˇ shiˍ.

⁸ Haˉ pui hpfuhˆ baˬ leh, Yeˍsuˆ Laˍzaˍruˆ htaꞈ k’oˆ piˇ ve, “tawˆ la-o!” Maˍhtaˆ, Maˍriˆ anˇ tuˬ htaꞈ g’a mawˬ ve yoˬ. “Suh peuˬ ve chaw oˇ ve lehˬ, tuˍ hpfuh awˬ hk’aw lo tawˆ la ve yoˬ. Yawˇ ve hkui sheh laꞈ sheh htaꞈ hpa hawˆ taˍ leh, yawˇ ve mehˆ hpfuhˇ htaꞈ hpaˉ ceꞈ hpeh tsuhꞈ taˍ ve yoˬ.” (Yoˇhanˬ 11:43, 44) Laˍzaˍruˆ k’awꞈ teꞈ tu la ve yoˬ! Yawˇ ve yehˬ k’a hk’aw ve chaw leh awˬ chawˇ geh k’awꞈ g’a chehˇ ve yoˬ. Yawˇ hui Laˍzaˍruˆ htaꞈ tawˇ yaw daꞈ leh k’uˉ piˇ g’a ve yoˬ. Chi lehˬ anˇ tuˬ cawˬ jaˇ! Yeˍsuˆ Laˍzaˍruˆ htaꞈ k’awꞈ teꞈ tu la piˇ ve yoˬ.

9, 10. (a) K’awꞈ teꞈ tu la piˇ g’a tuˬ kanˇ paˆ Yeˍsuˆ htaꞈ a shu piˇ ve le? (b) K’awꞈ teꞈ tu la piˇ ve chaw awˬ lawn g’a g’aw ve, ngaˬ hui aˬ htoꞈ ma awˬ bon g’a ve le?

⁹ Yeˍsuˆ chaw htaꞈ k’awꞈ teꞈ tu la piˇ ve yawˇ ve kanˇ paˆ laˇ? Maˇ heˆ. Yeˍsuˆ Laˍzaˍruˆ htaꞈ maˇ teꞈ tu piˇ sheˍ htaˇ, yawˇ Yaˬhoˉvaˬ geh bon lawˬ leh Laˍzaˍruˆ htaꞈ k’awꞈ teꞈ tu la piˇ tuˬ, Yaˬhoˉvaˬ yawˇ htaꞈ kanˇ paˆ piˇ ve yoˬ. (Yoˇhanˬ 11:41, 42 g’aw ve.) K’awꞈ teꞈ tu la ve chaw lehˬ Laˍzaˍruˆ ceh tiˉ maˇ heˆ. Yaˇ miˇ ehˉ a shaꞈ 12 hk’awꞈ naˬ jaˇ ve awˬ lawn Liꞈ hpu hk’aw k’oˆ taˍ ve yoˬ. Yaˇ miˇ ehˉ awˬ pa Yaˍiˉruˆ dawˇ maˇ tawˆ leh yaˇ teˇ g’aˇ tiˉ ve htaꞈ gu na-e laˇ tuˬ, Yeˍsuˆ geh ca lawˬ ve yoˬ. Yaˍiˉruˆ Yeˍsuˆ geh tawˇ yaw chehˇ htaˇ, chaw teˇ g’aˇ laˬ leh k’oˆ ve, “nawˬ ve yaˇ miˇ suh peuˬ. Saˍ laꞈ htaꞈ taˇ k’awꞈ shoꞈ shaꞈ piˇ loˬ.” Yeˍsuˆ yawˇ htaꞈ k’oˆ piˇ ve, “taˇ kawˆ. Yonˍ ve tiˉ te-o. Yawˇ na-e la tuˬ yoˬ.” Yawˇ huiˉ maˬ teˇ geh juˇ k’ai leh yehˬ awˬ paˇ gaˬ la htaˇ, laiˉ g’aˇ kuˬ hawˬ chehˇ ve htaꞈ Yeˍsuˆ g’a mawˬ ve yoˬ. Yawˇ yawˇ hui htaꞈ k’oˆ piˇ ve, “taˇ hawˬ. Yawˇ suh ve maˇ heˆ. Zuhꞈ muiˉ k’a chehˇ ve  yoˬ.” Yawˇ aˬ htoꞈ ma k’oˆ gaˇ ve awˬ pa awˬ e maˇ shiˍ. Yeˍsuˆ teˇ g’aˇ le le htaꞈ tawˆ-e tcuh leh awˬ pa awˬ e htaꞈ yaˇ teh taˍ ve bawehˇ hk’aw loꞈ-e tcuh ve yoˬ. Peuˬ leh, Yeˍsuˆ yaˇ laꞈ sheh htaꞈ htawˇ leh k’oˆ ve, “yaˇ miˇ ehˉ-oˬ, tu la-o!” Yaˇ teˇ cawˬ haˉ tu la leh te toˇ puiˉ la ve awˬ pa awˬ e hk’aˬ ma ha lehˬ ve dawˇ nyi sheˍ! Yeˍsuˆ yawˇ hui ve yaˇ htaꞈ k’awꞈ teꞈ tu la piˇ ve yoˬ. (Maˍkuˆ 5:22-24, 35-42; Luˉkaꞈ 8:49-56) Oˇ htaˇ tanˬ leh awˬ pa awˬ e yaˇ htaꞈ mawˬ ve teˇ pawˆ le le, Yeˍsuˆ yawˇ hui awˬ pon Yaˬhoˉvaˬ te tcuh ve htaꞈ dawˇ nawˇ ve yoˬ hehˉ. *

¹⁰ Oˇ htaˇ, Yeˍsuˆ k’awꞈ teꞈ tu la piˇ ve chaw awˬ leh meuˇ htaˇ g’a k’awꞈ suh ve yoˬ. Yaꞈ hk’aˇ, yawˇ hui ve awˬ lawn g’a g’aw ve k’o, ngaˬ hui awˬ tehˬ dawˇ law kuiˬ cawˬ g’a ve yoˬ. Yaˬhoˉvaˬ chaw htaꞈ k’awꞈ teꞈ tu la piˇ gaˇ leh awˬ g’uˇ suhˍ hpawˇ te tuˬ yoˬ tehˬ, ngaˬ hui g’a shiˍ ve yoˬ.

11. Laˍzaˍruˆ suh htaˇ Cuˇ yiˍ piˇ ve liꞈ 9:5 hk’aw k’oˆ taˍ ve hk’e, hk’aˬ hk’e hpehꞈ ve le?

¹¹ Liꞈ hpu hk’aw k’oˆ taˍ ve, “suh peuˬ ve chaw lehˬ teꞈ chiˉ maˇ shiˍ.” Laˍzaˍruˆ suh htaˇ, awˬ tehˬ awˬ na chi hk’e hpehꞈ ve yoˬ. (Cuˇ yiˍ piˇ ve 9:5) Yeˍsuˆ k’oˆ ve hk’e yawˇ zuhꞈ muiˉ k’a taˍ ve yoˬ. (Yoˇhanˬ 11:11) Laˍzaˍruˆ tuˍ hpfuh hk’aw chehˇ htaˇ, “teꞈ chiˉ maˇ shiˍ.”

12. Aˬ htoꞈ ma te Laˍzaˍruˆ k’awꞈ teꞈ tu la ve awˬ tehˬ hpehꞈ ve yoˬ tehꞈ, ngaˬ hui yonˍ g’a ve le?

¹² Laˍzaˍruˆ k’awꞈ teꞈ tu la ve lehˬ awˬ tehˬ hpehꞈ ve yoˬ. Yeˍsuˆ Laˍzaˍruˆ htaꞈ k’awꞈ teꞈ tu la piˇ htaˇ, chaw laiˉ g’aˇ g’a mawˬ ve  yoˬ. Yeˍsuˆ ve canˇ paˍ htawˇ, anˇ tuˬ chi ve htaꞈ shiˍ ve yoˬ. (Yoˇhanˬ 11:47) Chi ve awˬ hk’oˆ, chaw laiˉ g’aˇ Laˍzaˍruˆ geh ca guiˇ k’ai ve pa taw, Yeˍsuˆ htaꞈ G’uiˬ sha peu laˇ ve yoˬ tehꞈ, yawˇ hui tanˬ yonˍ ve yoˬ. Yaꞈ hk’aˇ, canˇ paˍ maˇ dawˇ cawˇ leh Yeˍsuˆ leh Laˍzaˍruˆ htaꞈ tiˇ pehˍ tuˬ awˬ hk’aˇ gu taˍ ve yoˬ.—Yoˇhanˬ 11:53; 12:9-11.

13. Yaˬhoˉvaˬ suh ve chaw htaꞈ k’awꞈ teꞈ tu la piˇ tuˬ yoˬ tehꞈ aˬ htoꞈ ma te ngaˬ hui yonˍ g’a ve le?

¹³ Yeˍsuˆ k’oˆ ve, “tuˍ hpfuh” hk’aw hk’a chehˇ ve chaw k’awꞈ teꞈ tu la tuˬ yoˬ. (Yoˇhanˬ 5:28) K’oˆ gaˇ ve lehˬ, Yaˬhoˉvaˬ tawnˇ g’a ve chaw teˇ g’aˇ le le htaꞈ k’awꞈ teꞈ tu la piˇ tuˬ yoˬ. Chaw teˇ g’aˇ htaꞈ k’awꞈ teꞈ tu la piˇ tuˬ, Yaˬhoˉvaˬ hk’a dehꞈ g’a tawnˇ taˍ cawˇ ve yoˬ. Yawˇ awˬ tehˬ tawnˇ g’a ve laˇ? Tawnˇ g’a ve yoˬ. Mvuhˇ naw ma hk’oˆ meuꞈ keu shiˍ laiˉ hinˉ lanˬ shiˍ cawˬ ve htawˇ, awˬ meh hk’a peu-eˬ htaꞈ Yaˬhoˉvaˬ shiˍ taˍ ve yoˬ tehꞈ, Liꞈ hpu hk’aw k’oˆ taˍ ve yoˬ. (Iˉsaˍyaˆ 40:26 g’aw ve.) G’uiˬ sha meuꞈ keu shiˍ ve awˬ meh htaꞈ tawnˇ g’a ve k’o, yawˇ k’awꞈ teꞈ tu la piˇ ve chaw htaꞈ hk’a dehꞈ tawnˇ g’a tuˬ maˇ haˍ. Chi hk’oˆ kaꞈ, Yaˬhoˉvaˬ hk’a peu-eˬ htaꞈ te hpanˍ taˍ ve pa taw, suh peuˬ ve chaw k’awꞈ teꞈ la tuˬ Yaˬhoˉvaˬ kanˇ paˆ cawˬ ve yoˬ.

14, 15. Yawˇbaˆ k’oˆ ve htaꞈ nyi k’o, Yaˬhoˉvaˬ aˬ htoꞈ ma te gaˇ ve le?

¹⁴ G’uiˬ sha htaꞈ ka tiꞈ yeˬ ve Yawˇbaˆ k’awꞈ teꞈ tu la ve htaꞈ yonˍ ve yoˬ. Yawˇ k’oˆ ve, “chaw teˇ g’aˇ suh-e ve k’o, yawˇ k’awꞈ teꞈ la hpehꞈ-aw laˇ?” Yawˇ Yaˬhoˉvaˬ htaꞈ k’awꞈ k’oˆ piˇ ve, “oˇ htaˇ nawˬ kuˬ leh, ngaˬ k’awꞈ yaw hk’awꞈ tuˬ yoˬ. Nawˬ te hpanˍ taˍ ve ngaˬ chaw yaˇ htaꞈ nawˬ nyi ma cawˇ tuˬ yoˬ.” Chaw k’awꞈ teꞈ tu la piˇ ve awˬ nyi htaꞈ Yaˬhoˉvaˬ law taˍ ve yoˬ tehꞈ, Yawˇbaˆ shiˍ ve yoˬ.—Yawˇbaˆ 14:13-15.

¹⁵ K’awꞈ teꞈ tu la piˇ ve awˬ lawn nawˬ hk’aˬ hk’e dawˇ ve le? Nawˬ dawˇ ve, ngaˬ ve yehˬ hk’aw chaw leh awˬ chawˇ k’awꞈ teꞈ tu la tuˬ laˇ? Suh ve chaw htaꞈ Yaˬhoˉvaˬ k’awꞈ teꞈ tu la piˇ tcuh gaˇ ve yoˬ tehꞈ, g’a shiˍ ve pa taw awˬ g’aˇ g’a jaˇ ve yoˬ. K’awꞈ teꞈ  tu la piˇ ve chaw hk’aˬ kaˬ lo chehˇ tuˬ ve leh a shu htaꞈ kuˬ tu piˇ tuˬ ve Liꞈ hpu hk’aw nyi sheˍ.

16. K’awꞈ teꞈ tu la ve chaw hk’aˬ kaˬ lo chehˇ tuˬ le? Hk’aˬ hk’e ve a shaꞈ cawˬ tuˬ le?

¹⁶ Aˬ sho-eˬ htaˇ, k’awꞈ teꞈ tu la ve chaw yawˇ ve yehˬ k’a hk’aw ve chaw leh awˬ chawˇ geh miˬ guiˬ hk’oˆ g’a k’awꞈ chehˇ ve yoˬ. Chi hk’a shuˍ, awˬ g’uˇ suhˍ hpawˇ k’awꞈ teꞈ tu la ve chaw miˬ guiˬ hk’oˆ chehˇ tuˬ yoˬ. Yaꞈ hk’aˇ, chi aꞈ kehˉ daꞈ tuˬ yoˬ. Aˬ htoꞈ ma pa taw le? Awˬ lawn k’o, yawˇ hui co co taiˍ taiˍ teꞈ chehˇ g’a leh maˇ k’awꞈ g’a naˬ leh maˇ k’awꞈ g’a suh. Yawˇ hui chehˇ tuˬ ve miˬ guiˬ lehˬ chi teˇ hkui htaꞈ maˇ shuˍ. Yawˇ hui bawˆ daꞈ yaꞈ daꞈ ve, awˬ haiˬ te daꞈ ve, naˬ ve gawˬ ve maˇ cawˬ ve miˬ guiˬ hk’oˆ g’a chehˇ tuˬ yoˬ.

17. A shu k’awꞈ teꞈ tu la tuˬ le?

¹⁷ A shu k’awꞈ teꞈ tu la tuˬ le? Yeˍsuˆ k’oˆ ve, “tuˍ hpfuh awˬ hk’aw lo chehˇ ve chaw hk’a peu-eˬ lehˬ, yawˇ ve tawˇ hkawˇ htaꞈ g’a kaˇ leh tawˆ la tuˬ ve awˬ yanˇ gaˬ la tuˬ yoˬ.” (Yoˇhanˬ 5:28, 29) Hpeuꞈ maˍ ve liꞈ 20:13 hk’aw k’oˆ ve, “laˇ tsuhˇ g’uiˬ lehˬ, yawˇ awˬ hk’aw lo cawˬ ve suh peuˬ ve chaw teˇ hpaˍ htaꞈ chiˇ aꞈ piˇ ve yoˬ. Suh ve teˇ ceuˬ leh Suh mvuhˇ miˬ htawˇ, yawˇ hui awˬ hk’aw lo cawˬ ve suh peuˬ ve chaw hui htaꞈ chiˇ aꞈ piˇ ve yoˬ.” K’oˆ gaˇ ve lehˬ, suh peuˬ ve chaw laiˉ hinˉ lanˬ g’aˇ k’awꞈ teꞈ tu la tuˬ yoˬ. Tcuh yaˇ Pawˇluꞈ k’oˆ ve, “hteˇ ve chaw kaꞈ maˇ hteˇ ve chaw kaꞈ” k’awꞈ teꞈ tu la tuˬ yoˬ. (Tcuh yaˇ 24:15 g’aw ve.) Chi ve hk’aˬ hk’e k’oˆ gaˇ ve le?

18. K’awꞈ teꞈ tu la tuˬ “hteˇ ve chaw” a shu le?

¹⁸ “Hteˇ ve chaw” lehˬ Yeˍsuˆ miˬ guiˬ hk’oˆ maˇ yaꞈ la sheˍ htaˇ, Yaˬhoˉvaˬ htaꞈ ka tiꞈ yeˬ ve chaw hui hpehꞈ ve yoˬ. Tawˇ pa haˉ te k’o, Noˉaꞈ, Aˍbraˍhanˍ, Saˍraˇ, Moˉseˍ, Ruˉhtaˆ leh Iˉsaˍtaˆ  chaw chi teˇ hpaˍ yoˬ. Yawˇ hui miˬ guiˬ hk’oˆ k’awꞈ teꞈ tu la tuˬ yoˬ. Yawˇ hui ve awˬ lawn Heˍbrehˇ liꞈ kaˇ nanˉ uiˍ 11 hk’aw g’aw nyi sheˍ. Chi beuꞈ teˇ co-e Yaˬhoˉvaˬ htaꞈ ka tiꞈ yeˬ ve chaw suh-e ve k’o, hk’aˬ hk’e hpehꞈ ve le? Yawˇ hui kaꞈ “hteˇ ve chaw” teˇ moˍ hpehꞈ ve pa taw, k’awꞈ teꞈ tu la tuˬ yoˬ.

19. K’awꞈ teꞈ tu la tuˬ “maˇ hteˇ ve chaw” a shu le? Yaˬhoˉvaˬ yawˇ hui htaꞈ aˬ htoꞈ ma awˬ yanˇ piˇ tuˬ le?

 ¹⁹ “Maˇ hteˇ ve chaw” lehˬ laiˉ hinˉ lanˬ g’aˇ Yaˬhoˉvaˬ htaꞈ maˇ shiˍ daꞈ jaw ve chaw hui hpehꞈ ve yoˬ. Yawˇ hui suh peuˬ ve htawˇ, Yaˬhoˉvaˬ maˇ leunˇ. Yawˇ yawˇ hui htaꞈ k’awꞈ teꞈ tu la piˇ peuˬ hk’awꞈ nawˉ, yawˇ ve awˬ lawn henˇ tuˬ, yawˇ ve kanˉ htaꞈ te tuˬ awˬ yanˇ piˇ tuˬ yoˬ.

20. Aˬ htoꞈ ma te chaw hk’a peu-eˬ maˇ k’awꞈ teꞈ tu la ve le?

²⁰ Suh peuˬ ve chaw hk’a peu-eˬ k’awꞈ teꞈ tu la tuˬ yoˬ tehꞈ k’oˆ gaˇ ve laˇ? Maˇ heˆ. Yeˍsuˆ k’oˆ ve, chaw teˇ hpaˍ maˇ g’a k’awꞈ teꞈ tu la ve yoˬ. (Luˉkaꞈ 12:5) Chaw chi teˇ moˍ maˇ k’awꞈ teꞈ tu la tehꞈ a shu suhˉ jehˬ tuˬ le? Uiˍ jaˇ mvuh jaˇ ve Suhˉ jehˬ shehˍ hpaˇ lehˬ Yaˬhoˉvaˬ hpehꞈ ve yoˬ. Yaꞈ hk’aˇ, “teꞈ chehˇ ve chaw htaꞈ maˇ k’oˆ, suh peuˬ ve chaw htaꞈ maˇ k’oˆ,” suhˉ jehˬ tuˬ, Yaˬhoˉvaˬ Yeˍsuˆ htaꞈ a hkaw-anˬ piˇ ve yoˬ. (Tcuh yaˇ 10:42) Haiˬ leh nyi ma maˇ pa ve yoˬ tehꞈ suhˉ jehˬ piˇ ve chaw hk’aˬ ve teˇ g’aˇ maˇ k’oˆ, maˇ g’a k’awꞈ teꞈ tu la ve yoˬ.—K’oˆ maˍ ve awˬ lawn 19 htaꞈ nyi sheˍ.

21, 22. (a) Mvuhˇ naw ma hk’oˆ teꞈ tu-e ve chaw awˬ to hk’aˬ hk’e hpehꞈ ve le? (b) Mvuhˇ naw ma hk’oˆ teꞈ tu-e ve awˉ lawˉ teˇ g’aˇ a shu le?

²¹ Liꞈ hpu hk’aw k’oˆ ve, chaw teˇ hpaˍ hpaˍ mvuhˇ naw ma hk’oˆ chehˇ tuˬ yoˬ. Chaw oˇ ve teˇ hpaˍ a shaꞈ awˬ suhˉ k’awꞈ teꞈ tu-e htaˇ, awˬ to chaw yaˇ hk’a shuˍ maˇ k’awꞈ hpehꞈ. Maˇ mawˬ g’a ve awˬ ha hpehꞈ ve yoˬ.

²² Mvuhˇ naw ma hk’oˆ teꞈ tu-e ve awˉ lawˉ teˇ g’aˇ lehˬ Yeˍsuˆ hpehꞈ ve yoˬ. (Yoˇhanˬ 3:13) Yawˇ suh ve 3 nyi peuˬ hk’awꞈ nawˉ, Yaˬhoˉvaˬ k’awꞈ teꞈ tu la piˇ ve yoˬ. (Chiˇ mvuh ve 16:10; Tcuh yaˇ 13:34, 35) Yeˍsuˆ htaꞈ chaw yaˇ ve awˬ to hk’e k’awꞈ teꞈ tu la piˇ ve maˇ heˆ. Tcuh yaˇ Peˍtruˆ k’oˆ ve, “chaw yaˇ ve awˬ to htaꞈ tiˇ pehˍ piˇ ve yoˬ. Yaꞈ hk’aˇ, mvuhˇ naw ma hk’oˆ ve a shaꞈ awˬ  suhˉ k’awꞈ g’a ve yoˬ.” (1 Peˍtruˆ 3:18, MGS) Yeˍsuˆ k’awꞈ teꞈ tu la peuˬ hk’awꞈ nawˉ, yawˇ kanˇ paˆ cawˬ ve awˬ ha ve awˬ to hpehꞈ la ve yoˬ. (1 Kawˇrenˍhtuˆ 15:3-6) Liꞈ hpu hk’aw k’oˆ ve, mvuhˇ naw ma hk’oˆ Yeˍsuˆ hk’a shuˍ awˬ to cawˬ ve chaw cawˬ tuˬ yoˬ.

23, 24. “I ve yawˬ teˇ moˍ” a shu le? Hk’aˬ nyiˇ g’aˇ cawˬ ve le?

²³ Yeˍsuˆ maˇ suh sheˍ g’uˇ suhˍ htaˇ, ka tiꞈ yeˬ ve awˬ laꞈ g’awˇ htaꞈ k’oˆ piˇ ve, “ngaˬ k’oꞈ-e leh, nawˬ hui awˬ pon chehˇ kuiˬ ca gu tuˬ yoˬ.” (Yoˇhanˬ 14:2) Awˬ laꞈ g’awˇ teˇ hpaˍ k’awꞈ teꞈ tu-e leh mvuhˇ naw ma hk’oˆ yawˇ geh chehˇ tuˬ yoˬ. Hk’aˬ nyiˇ g’aˇ cawˬ ve le? Yeˍsuˆ k’oˆ ve taˆ-e ve chaw maˇ cawˬ maˇ. Yawˇ hui lehˬ “i ve yawˬ teˇ moˍ” hpehꞈ ve yoˬ. (Luˉkaꞈ 12:32) ‘[Mvuhˇ naw ma hk’oˆ] Ziˉonˍ hk’aw hk’oˆ lo chaw 144,000 g’aˇ Yeˍsuˆ geh huˉ chehˇ ve htaꞈ’ tcuh yaˇ Yoˇhanˬ g’a mawˬ ve yoˬ.—Hpeuꞈ maˍ ve 14:1.

²⁴ Hkriꞈ yaˇ 144,000 g’aˇ hk’aˬ htaˆ k’awꞈ teꞈ tu-e tuˬ le? Liꞈ hpu hk’aw k’oˆ ve, Yeˍsuˆ mvuhˇ naw ma hk’oˆ uˉ peunˍ hk’awꞈ nawˉ, k’awꞈ teꞈ tu-e tuˬ yoˬ. (1 Kawˇrenˍhtuˆ 15:23) Chi teˇ hkui 144,000 g’aˇ k’awꞈ teꞈ tu-e piˇ ve awˬ yanˇ hk’aw ngaˬ hui chehˇ taˍ leh, maˇ-awˍ ve mvuhˇ naw ma hk’oˆ taˆ-e peuˬ. Chi beuꞈ teˇ-co-eˬ chi teˇ moˍ hk’aw leuˉ taˍ ve chaw suh-e k’o, laꞈ haˉ mvuhˇ naw ma hk’oˆ teꞈ tu-e tuˬ yoˬ. Yaꞈ hk’aˇ, chi teˇ moˍ hk’aw maˇ chehˇ ve chaw awˬ g’uˇ suhˍ hpawˇ k’awꞈ teꞈ tu la htaˇ, Paˍraˍdiˇsuˆ hk’aw g’a chehˇ ve yoˬ.

25. Awˬ g’uˇ suhˍ teˇ lawn hk’aw aˬ htoꞈ ma awˬ lawn henˇ tuˬ le?

²⁵ Maˇ maw k’o, Yaˬhoˉvaˬ lehˬ chaw yaˇ teˇ g’aˇ le le suh ve htaꞈ ponˬ piˇ leh suh ve teˇ ceuˬ maˇ k’awꞈ cawˬ. (Iˉsaˍyaˆ 25:8 g’aw ve.) Mvuhˇ naw ma hk’oˆ taˆ-e ve chaw aˬ htoꞈ ma ca te ve le? Liꞈ hpu hk’aw k’oˆ ve, yawˇ hui G’uiˬ sha ve mvuhˇ miˬ hk’aw Yeˍsuˆ geh uˉ peunˍ tuˬ yoˬ. Awˬ lawn chi ve awˬ g’uˇ suhˍ teˇ lawn hk’aw henˇ tuˬ yoˬ.