1-3. N’nga i-yo nili perezo ya tundu wan’ni? N’nga Yohova unodha iran’ni ira aniombole?

KATHUULELANI ira nyo mutomangiwa na e-liwa perezoni mwasa wa yongo ya-airile nyo. Thitho anamatongawo aliwa onga ira munokala perezoni inguminyu yothene. Mbwenye munoona ira kavali yongo inaodenyo laba ira mudhivulumuche. Nifwanafwani-e ira nyo mutovwa ira vatokala mutu mwinango una nguru dhoi unooda uvulumuchani thitho liye utouroromeli-ani ira unodha ukami-ani. N’nga nyo vevo munavivwe a-vi?

² Othene nili perezoni. Perezo yen’na kuukwa. Kavali inofuna i-yo laba ira niombowe muukwani. Mbwenye Yohova utokaana nguru ira aniombole. Liye ulanyedhile ira wukwa “mwidani omari-a unodha nongiwa.”—1 Akoritiyo 15:26.

³ Thuulelani munofuna i-yo kalela aimwerumweru yadhafiya hora yoi wukwa kunodha kalaove. Yohova unodha ira vyongo vinango vyowenjedheleya. Liye unodha avenyathi-a atu okwa. Bibilya linoromola ira venyathi-iwa. Yohova ulanyedhile ira: “Atu okwa anodha kalao.” (Esaya 26:19) Pievyo vinothapulela Bibilya voonga vyovenyathi-iwa.

4. (a) N’nga chini inofuna nikami-a bali-u venango fwi-u akwa? (b)  N’nga enango mwaafwee a Yesu avarimani ali aani?

⁴ Bali-u venango fwi-u akwa ninosukwala vinjinji. Kaninokaana yoonga mwasa oi kaninaoda ira yongo  ira fwi-uwo akaleo okoka. Mbwenye vinoonga Bibilya vinonididili-a rima. (Muleri 2 Akoritiyo 1:3, 4.) Mofwanafwani-a, Yesu angali vailambo yavathivano, vatoireya yongo imbo-i inooni-a ira liye na Yohova mbofunechecha weli-edha ingumi waatu ale akwide. Yesu anodhiveliwecha waredhela Lazaro na arongolee, Marta na Maria. Aliwa tali axamwali avarimani a Yesu. Bibilya linoonga ira: “Yesu anomdhiveliwana Marta, rongola wa Lazaro.” Mbwenye, dambo n’nango Lazaro atokwa.—Juwau 11:3-5.

5, 6. (a) N’nga Yesu airilen’ni angaoni abalee thitho afwee a Lazaro talanga? (b) Mwasiwa ngwan’ni pyolimbi-a idhiwa mwemo Yesu mwavwela liye vamwasa okwa?

⁵ Yesu atodhowa ira amalimbi-e Marta na Maria. Marta angavwide ira Yesu unaaudha, atoum-arela. Liye atodhiveliwa mmona Yesu angadhidhe, mbwenye atoonga ira: “Mbwiyeni mwa-akale uno rongolanga kaakwe.” Marta aona ira Yesu udhidhe modembuwa voi kavali yafuna liye ira. Ee-no Yesu angammoni Maria alanga, ato-indeya na tangaranga rimani mwee voona tangaranga dhan’na Maria ee-no liye atola. (Juwau 11:21, 33, 35) Tangaranga dhana Yesu tidhimbo-ive dhinokaana i-yo bali-u venango fwi-u akwa.

⁶ Pyolimbi-a idhiwa ira Yesu unovwa ninga munavwela i-yo fwi-u venango bali-u akwa. Ee-no kalelo leli, Yesu akumilena wa Babee. (Juwau 14:9) Yohova utokaana nguru dhomali-a wukwa, thitho unodha mali-a wukwa chineneeva.

7, 8. N’nga mwasiwa ngwan’ni Marta khaafuna ira vamasiyeni valokotiwile Lazarovo vadhuliwe?

⁷ Manungo a Lazaro ato-eliwa masiyeni thitho valango  valokotiwile liye tato-elavo libwe nlukulu. Yesu atoonga ira: “Kumi-anivo libweli.” Mbwenye Marta kaafuna ira vamasienivo vadhuliwe mwasa oi vatovira malambo manai Lazaro angakwide. (Juwau 11:39) Liye kaaidhiwa ira Yesu angavenyathi-idhe balee.

⁸ Yesu atoonga ira: “Lazaro kakuma!” Vevo Marta na Maria tatoona yongo yodabwi-a. “Mutu akwidule atokuma.” (Juwau 1:43, 44) Yesu atomvenyathi-a Lazaro! Liye atokalao okoka vambo-i na abalee thitho na afwee. Aliwa to-ooda mkumbarela Lazaro thitho mmongi-a. Vyali vyodabwi-adi!

9, 10. (a) N’nga amva-idhe Yesu nguru dhovenyathi-ana atu okwa mbaani? (b) Mwasiwa ngwan’ni pyofuneeleya idhiwa vyaatu ale avenyathi-iwile alembiwile Bibilyani?

⁹ N’nga Yesu nguru dhavenyathi-ana liye atu dhali dhee? E-i. Ngu Yohova amva-idhe nguru dhedhi. Yesu atooni-a vyevi valobela liye wa babee a-anavenyathi-e Lazaro. (Muleri Juwau 11:41, 42.) Mbwenye Lazaro kaavenyathi-iwile eka. Mofwanafwani-a, Bibilya linoonga vya sikana mmbo-i wa vyawa 12 asimbwile bulela. Ali mwana mmbo-i wa Jairo. Liye kaana idedi-edho atomvepa momsembezela Yesu ira ammwili-e mwaneuwo. Mbwenye Jairo vyaongana liye Yesu, vatofiya atu enango aliwa mmwandela ira: “Mwanaa ukwa! Mwasiwa ngwan’ni munomoni-a nyarwa Namafunji-a?” Mbwenye Yesu atommwandela Jairo ira: “Kuove, mbwenye ukaena iroromelo yoi liye unovenyathi.” Yesu atodhowa vandhe va Jairo. Angafiile, Yesu angaoni atu talanga atoonga ira: “Miyalani, liye kakwide; Mbwenye unaagona.” Anamabala a mwan’ne tanofwanela vifuka ira madhu enala anothapulelan’ni. Yesu atovepa atu enango  ira takume. Angairile ee-no, atovolowa subini wali sikanuo vambo-i na anamabalee. Yesu ato-inda dhandha la sikanuo momsembezela, liye onga ira: “Sikanawe, kavenyathi!” Kathuulelani imwerumweru yana anabala a sikanuo vyammoni aliwa ira utovenyathi unaawenda. Yesu atoavenyathi-edha mwaniwa! (Marku 5:22-24, 35-42; Luka 8:49-56) Adhamale vevo, vyammwig’ana aliwa sikan’ne takala tathuulelanga vyairile Yohova dhela mwa Yesu.

¹⁰ Chiimbarimbari ira Yesu atu aavenyathi-idhe liye talive o-olongomana vanduli viwa tatokwa okoka. Pyofuneyadi idhiwa venyathi-iwa wewu, neri-a vinooni-a ira mo-okaikela Yohova unodha venyathi-a atu okwa.

11. (a) N’nga Bibilya linoniwadhela n’ni va lemba la Namalaleya 9:5? (b) N’nga vyevi vinonioni-a n’ni vyamwiireele Lazaro?

¹¹ Bibilya linoonga movweya pama va lemba la Namalaleya 9:5 ira “atu okwa katinoidhiwa iliyathene.” Vyevi vinonioni-a ira, Lazaro angakwidhe, liye kaaidhiwa iliyothene yaireya. (Juwau 11:11) Pivyevyo vyaongile Yesu ira, vyakala ninga Lazaro aira gona.

12. N’nga ninoidhiwa a-vi ira Lazaro atovenyathi-iwadi?

¹² Atu anjinji atoummona Yesu amvenyathi-anga Lazaro. Venyathi-iwawo wali waimbarimbari. Lazaro atokaana ingumi. Thitho amwidani a Yesu tatoidhiwa vya  yodabwi-a yei. (Juwau 11:47) Wenjedhela vevo, atu anjinji tatodhowa mammona Lazaro ee-no tatoroma roromela ira Yesu arumiwiledi na Nlungu. Mbwenye amwidani a Yesu katadhiveliwile na vyevyo thitho tanofuna mpa Yesu vambo-i na Lazaro.—Juwau 11:53; 12:9-11.

13. Mwasiwa ngwa’ni ninooda kaana iroromelo yoi Yohova unooda venyathi-a atu okwa?

¹³ Yesu aongile ira: “Atu othene ali masiyeni aithuulelo anodha uvwa madhwee.” (Juwau 5:28) Vyevyo vinooni-a ira atu othene anothuuleliwa na Yohova anodha kaana ingumi okoka. N’nga vyevyo pyoodeyadi? Ee pyoodeya, mwasiwa Bibilya linoonga ira Yohova utoidhiwa dhina la nyenyedi iliyothene thitho ira utokala mabiliyau a nyenyedi dhulu. (Muleri Esaya 40:26.) Akala liye unooda thuulela dhina la nyenyedi iliyothene, mwaimbarimbari vinokala vyo-orucha wa liye thuulela vyongo vyothene vyaatu anofuna liye avenyathi-a.

14, 15. N’nga madhu a Yobo anonifunji-a n’ni vyoonga venyathi-iwa?

¹⁴ Yobo, namalaba ororomeleya wa Yohova anororomelecha ira mutu akwa unoda venyathi-iwa. Liye atofuka ira: “N’nga mutu akwa, unooda kaana ingumi okoka?” Ee-no atommwandela Yohova ira: “Nyo munodha ndiitana, thitho miyo ndinodha rumela. Munodha funafuna mabasa a mandhinyu.” Madhu aongiwa na Yobo anonifunji-a ira Yohova unofunechecha venyathi-a atu okwa.​—Yobo 14:13-15.

¹⁵ Nyo munovwa a-vi mwathuulelanga mwasa ovenyathi-iwa? Kamunodhiveliwa voidhiwa ira Yohova unofuna venyathi-a atu okwa? Mbwenye venango munodhifuka ira: ‘N’nga abalanga naafwanga? Aliwa thitho tanodha venyathi-iwa?’ Dhoweni nione vinoonga  Bibilya waale anofuna venyathi-iwa na unofuna aliwa makalanga.

16. Mwasiwa ngwan’ni venyathi-wa waatu okwa unofuna ira Nlungu sogolou unodha kala ova-a imwerumweru vinjinji?

¹⁶ Ndulimu, atu avenyathi-iwile tatowelela kala na abaliwa vambo-i na afwiwa vailambo yavathi vano. Vyevyo thitho vinodha ireya Nlungu adhavenyathi-a atu okwa sogolou, mbwenye vinodha kala vyapamadi. Nan’ni? Na mwasa oi atu anofuna venyathi-iwa vailambo yavathi anodha kaana ngari yokalao dhowa nodhowa, thitho katinodha wukwa okoka. Thitho ilamboyi inodha kala yo-iyana na vili aliwa malamboano. Khondo, uwalanga na marenda kavinodha kalaove.

17. N’nga mbaani anofuna dhavenyathi-iwa?

¹⁷ N’nga anofuna dhavenyathi-iwa mbaani? Yesu aongile ira “othene ali masiyeni aithuulelo anodhavwa madhwee thitho anodha kuma.” (Juwau 5:28, 29) Thitho Bibilya linoonga ira: “Bara latovelela atu okwa ali mwemo, thitho wukwa na masiye vyatovelela atu okwa alimwemo.” (Apokalipse 20:13) Vyevyo vinooni-a ira mamiliyau aatu anodha kalao okoka. Thitho rumiwi Paulo aongile ira “unodha kala venyathi-iwa waatu olongomana naatu o-olongomana.” (Muleri Mayirelo 24:15.) N’nga olongomana na o-olongomana mbaavi?

18. N’nga atu “olongomana” anofuna venyathi-iwa mbaavi?

¹⁸ Atu “olongomana,” mbaanamalaba ororomeleya a Yohova. Anamalaba othene a Yohova taliwo Yesu a-anadhe vailambo yavathi, anothangani-wa vaikundu yeyi. Nowa, Abrahamu, Sara, Mose, Rute, na Estere pivifwanafwani-o vinango. Nyo munooda leri vyoonga  vifwanafwani-o vya arumiwi a Yohova alombwana na a-iyana mu Aebere Kapitulu 11. Mbwenye atu “olongomana” kai anamalabave ororomeleya a Yohova a ndulimu baa-i. Anamalaba ororomeleya a Yohova anakwa malamboano thitho ano-eliwa vaikundu yaatu “olongomana” thitho anofuna dhavenyathi-iwa.

19. N’nga atu “olongomana” mbaani? Njingari iivi inofuna dhakaana atu enala?

 ¹⁹ Mu gulu laatu “o-olongomana” muli mabiliyau aatu a-anangari yommwidhiwa Yohova malamboano. Liye kaadiwalile. Yohova unodha venyathi-a atu enala thitho unodha ava-a ngari yofunjedha vyoonga liye na vyoira ifunelo yee.

20. Mbaatu a-vi a-anofuna dhavenyathi-iwa?

²⁰ N’nga atu othene anokwa anodha venyathi-iwa? E-i. Yesu aongile ira atu enango katinodha kalao okoka. (Luka 12:5) Mbaatu othakala thitho a-achinjile makalewiwa. N’nga mbaani unofuna sakula atu anofuna venyathi-iwa? Yohova ngunamatonga omari-edha, mbwenye liye utomva-a Yesu utongi “ira akale namatonga waatu okalao na atu okwa.” (Mayirelo 10:42) Ee-no mutu uliwethene unofuna tongiwa ninga othakala, thitho a-akale okozeya ira achinje kanodha venyathi-iwa.—Onani madhu akomoni 19.

21, 22. (a) N’nga mutu unofuna dhadhowa dhulu unodha dhavenyathi-iwa mwa tundu wani? (b) N’nga aromile venyathi-iwa dhowa dhulu aliani?

²¹ Bibilya thitho linoonga ira atu enango anodha kala dhulu. Anofuna dhowa dhulu kanovenyathi-iwa na tutu lanyama. Liye unovenyathi-iwa na tutu launemba.

²² Yesu ali mutu oroma avenyathi-iwile ira amakalenga dhulu. (Juwau 3:13) Vangavirile malambo mararu Yesu angakwide, Yohova atomvenyathi-a. (Salimo 16:10; Mayirelo 13:34, 35) Yesu kaavenyathi-iwile na tutu laumutu. Rumiwi Pedru aongile ira Yesu “akwidhe muututuni, mbwenye awachenle ingumi muunembani.” (1 Pedru 3:18) Yesu atowelela kala nemba wanguru!  (1 Akoritiyo 15:3-6) Mbwenye Bibilya linoonga ira kai Yesu eka vatokala atu enango anofuna dhowa dhulu.

23, 24. N’nga mbaani anofuna dhavenyathi-iwa makalanga dhulu?

²³ Vanga-adhi vag’ono ira Yesu akwe, atowandela anamafunjedhee ororomeleya ira: “Ndinaa masaka-edha limburo linyu.” (Juwau 14:2) Vyevyo vinooni-a ira enango mwaanamafunjedha a Yesu tangavenyathi-iwile ira tamakalenga na liye dhulu. Yesu atoromola gulu leli ira “gulu loyeva laanamabila” neri-a katakale anjinji. (Luka 12:32) Rumiwi Juwau atoro-edha numero ya gulu leli. Juwau aongile ira atommona Yesu dhulu “angaimenle vamwangoni wa Zioni, angali vambo-i na a 144.000.”—Apokalipse 14:1.

²⁴ N’nga ti-elini makristau okwakwana 144.000 vanofuna aliwa dhavenyathi-iwa ira tamakalenga dhulu? Vanduli voi Kristu uroma tonga dhulu. (1 Akoritiyo 15:23) E-ni Yesu ngu Mwene dhulu, thitho anjinji a 144.000 atomala wukwa thitho atomala venyathi-iwa. Mbwenye enango mwa gulu leli katinakwe. Aliwa tamala wukwa, tanodha venyathi-iwa ira tamakalenga dhulu. Ngumwasiwa, vyevyi vinooni-a ira mabiliyau aatu anjinji anofuna dhavenyathi-iwa anodha wachela ingumi paradaizo vailambo yavathi.

25. N’nga muru o-arela ninodha funjedhan’ni?

²⁵ Chineneeva Yohova unonikumi-a othene perezoni inoromoliwa wukwa. Kunodha kala ukwa! (Muleri Esaya 25:8.) N’nga alimbo venyathi-iwa dhowa dhulu anamalabewon’ni? Bibilya linoonga ira aliwa anaamatonga na Yesu mu Umwene wa Nlungu. Ninodha funjedha vinjinji vyoonga Umwene wen’na va muru o-arela.