1—3. Ме чыланат могай «казаматыште» шинчена да Иегова мемнам кузе эрыкыш луктеш?

ШОНАЛТЫЗА ик пример нерген: те нимогай осал пашам ыштен огыдал гынат, тендам ӱмыр мучкылан казаматыш шынденыт. Эрыкыш лекташ нимогай ӱшан уке. Те нимомат вашталтен огыда керт да ойгыреда. Но икана тендам эрыкыш лукташ сӧрышӧ ик айдеме нерген пален налыда. Тыланда полшаш тудын йӧнжӧ уло. Тыгай уверым пален налын, мом те шижыда?

² Ӱмыр мучкылан казаматыш шындыме дене колымашым таҥастараш лиеш. Айдеме кеч-момат ыштыже, но колымаш деч утаралт огеш керт. Но Иегова мемнам эрыкыш луктын кертеш. «Колымаш пытарыме лиеш» манын, тудо сӧра (1 Коринфян-влаклан 15:26).

³ Колымаш деч лӱдде илаш — могай тиде пиал! Иегова мемнам веле огыл колымаш деч утараш сӧра, тыгак тудо колышо-влакымат угыч илаш пӧртылтынеже. Колышо-влак угыч илаш тӱҥалыт (Исаия 26:19). Библийыште тиде ылыжмаш маналтеш.

4. а) Лишылна-влакым йомдарымеке, мемнам мо лыпландарен кертеш? б) Кӧ Иисусын йолташыже-влак лийыныт?

⁴ Лишыл йолташна але родына-влак кокла гыч иктаж-кӧжӧ кола гын, мом ме шижына? Кугу ойгым, чон корштымым. Вет лишыл еҥнам угыч илаш пӧртылташлан ме нимомат ыштен огына керт. Но Библий мемнам лыпландарен кертеш. (2 Коринфян-влаклан 1:3, 4 лудын лекса.) Айста ик случайым ончалына. Иегова ден Иисус Христос мемнан йӧратыме лишылна-влакым ылыжтынешт манын, тудо ончыкта. Мландыште илымыж годым Иисус чӱчкыдын Лазарь, Марфа да Мария деке коштын. Нуно кумытынат тудын йолташыже лийыныт. Икана Лазарь чот черланен да колен (Иоаннын 11:3—5).

5, 6. а) Лазарьын шортшо лишылже-влакым ужмеке, Иисусын могай шижмашыже лектын? б) Лазарьын колымыжлан кӧра Иисусын шӱм-чон корштымашыже мемнам кузе лыпландара?

⁵ Иисус Марфа ден Мариям лыпландараш каен. Иисусын толмыж нерген колмеке, Марфа тудым вашлияш лектын. Иисусым ужмеке, Марфа куанен гынат, тудлан каласен: «Тый тыште лият ыле гын, мыйын изам ок коло ыле!» Тудо шонен, пуйто Иисус вараш кодын да ынде нимомат вашталтен огеш керт. Варажым Иисус Мариян чот шортмыжым ужын. Нунын ойгырымыштым ужмеке, Иисусын шинчавӱдшӧ лектын  (Иоаннын 11:21, 33, 35). Иисусын чон корштымашыже тыгаяк лийын, могайым ме лишылна-влакым йомдарымеке шижына.

⁶ Иисус шижмашнам сайын умыла. Вет тудо Ачаж гай улеш. Тидым палымаш мемнам чот лыпландара! (Иоаннын 14:9). Пеш вашке Иегова колымашым пытара. Тидым ышташ тудын вийже уло.

7, 8. Марфа кӱм кораҥдымылан молан тореш лийын? Иисус мом ыштен?

⁷ Иисус Лазарьын шӱгарыш толын. Лазарьым кугу кӱ дене петырыме курыкпомышыш тоеныт улмаш. Тудо каласен: «Кӱм кораҥдыза». Но Марфа Иисусын мутшылан тореш лийын, вет Лазарьын капше тушто ныл кече киен (Иоаннын 11:39). Колышо Лазарьлан полшаш манын, Иисус мом ыштынеже ыле Марфа пален огыл.

⁸ Кӱм кораҥдыме деч вара Иисус кычкыралын: «Лазарь, лек!» Вара «колышо лектын, кидше да йолжо тойымо вынер дене пӱтырымӧ лийын». Марфа ден Мария тыгай чудым вучен огытыл (Иоаннын 11:43, 44). Иисус Лазарьым ылыжтен да тудо угыч илаш тӱҥалын! Шоналтыза гына: Лазарь угыч ешыже да йолташыж-влак дене пырля лийын. Нуно тудым кид гыч кучен, ӧндалын да тудын дене мутланен кертыныт. Могай тиде чудо!

9, 10. а) Еҥ-влакым ылыжташ вийым Иисуслан кӧ пуэн? б) Ылыжмаш нерген библийысе пример-влак молан возымо лийыныт?

⁹ Иисус еҥ-влакым шке вийже дене ылыжтен мо? Уке. Лазарьым ылыжтыме деч ончыч Иисус Иеговалан кумалын. Сандене ылыжташ вийым тудлан Иегова пуэн. (Иоаннын 11:41, 42 лудын лекса.) Но Лазарь гына огыл ылыжтыме лийын. Тыгак Библийыште чот черланыше латкок ияш ӱдыр нерген каласыме. Ӱдырын ачаже, Иаир лӱман пӧръеҥ, Иисус деке толын да ӱдыржым паремдаш сӧрвален йодын. Иаирын ик ӱдыржӧ гына лийын улмаш. Иисус ден мутланымыж годым Иаирлан каласеныт: «Тыйын ӱдырет колен, мом эше Туныктышым азапландарет?» Но Иисус Иаирлан ӱшандарен каласен: «Ит лӱд, ӱшане веле, тунам ӱдырет утаралтеш». Вара нуно пырля Иаирын пӧртышкыжӧ каеныт. Пӧрт воктене Иисус шортшо еҥ-влакым вашлийын да нунылан каласен: «Ида шорт, тудо колен огыл, мала веле». Колышо ӱдырын ачаж ден аваже Иисусын мутшым, очыни, умылен шуктен огытыл. Тудо чыла еҥым пӧрт гыч лекташ йодын. Вара Иисус ӱдырын ача-аваж ден пырля ӱдыр кийыме пӧлемыш пурен. Ӱдырын кидшым кучен, Иисус тудлан каласен: «Ӱдыр, тылат ойлем: кынел». Шоналтыза гына, ачаж ден аважлан ӱдырын кынелмыже да кошташ тӱҥалмыже могай кугу пиалым конден! Тыге Иисус  Иаирын ӱдыржым ылыжтен (Маркын 5:22—24, 35—42; Лукан 8:49—56). Ындыжым илыше ӱдырыштым ужын, ачаж ден аваже Иегован ыштымыжым кажне кечын шарненыт *.

¹⁰ Мутат уке, чыланат, кӧм Иисус ылыжтен, жап эртымеке угыч коленыт. Туге гынат, нине случай-влак ончыктат: Иегова колышо-влакым ылыжтынеже да тидым чынжымак ышта. Тиде ӱшан чот куандара!

11. Экклезиаст 9:5 почеламутышто колышо-влак нерген мом возымо? Колымаш деч вара Лазарь дене мо лиймыжым тиде почеламут кузе умылаш полша?

¹¹ Библийыште ойлалтеш: «Колышо-влак нимомат огыт пале». Тидымак Лазарь нергенат каласаш лиеш (Экклезиаст 9:5). Иисусын каласымыж почеш Лазарьын колымыжо малыме гае лийын (Иоаннын 11:11). Шӱгарыште кийымыж годым тудо «нимомат пален огыл».

12. Лазарь чынжымак ылыжын манын, кушеч ме палена?

¹² Лазарьын ылыж кынелмыжым шукын ужыныт. Тиде чудо лийын манын, Иисусын тушманже-влакат умыленыт. Лазарьын угыч илаш тӱҥалмыже  теве мом пеҥгыдемда: ылыжмаш чынжымак лийын (Иоаннын 11:47). Ылыжше Лазарьым ужаш шуко еҥ миен. Тудым ужмеке, Иисусым Юмо колтен манын, калык ӱшанаш тӱҥалын. Мутат уке, Иисусын тушманже-влаклан тиде келшен огыл, сандене нуно Иисусымат, Лазарьымат пушташ шонен пыштеныт (Иоаннын 11:53; 12:9—11).

13. Иегова колышо-влакым ылыжта манын, молан ӱшанен кертына?

¹³ Шӱгарыште кийыше-влак чыланат ылыжыт манын, Иисус каласен (Иоаннын 5:28). Тугеже, чыланат, кӧм Иегова шарна, угыч илаш тӱҥалыт. Но иктаж-кӧм ылыжташлан, Иегова тудын нерген чылажымат шарнышаш. Юмо айдеме нерген чылажымат шарнен кертеш мо? Айста шоналтена. Сандалыкыштына миллиард дене шӱдыр уло. Иегова кажне шӱдырым лӱмжӧ дене пала манын, Библийыште возымо. (Псалом 146:4, 5 лудын лекса.) Тудлан чыла шӱдырын лӱмыштым шарнаш неле огыл гын, ылыжташ шонымо еҥ-влак нерген чылажымат шарнаш тудлан неле лийшаш мо?! А эше Иегова чылажымат Ыштыше. Сандене еҥ-влакым ылыжташ тудын вийже уло. Тидлан пеҥгыдын ӱшанен кертына.

14, 15. Иовын мутшо гыч ылыжмаш нерген мом пален налына?

¹⁴ Юмылан ӱшанле Иов лӱман ик еҥ ылыжмашлан ӱшанен. Икана тудо йодын: «Айдеме  кола гын, угыч илен кертеш мо?» Варажым Иеговалан каласен: «Тый ӱжат, да мый вашештем. Шке кидет дене ыштымет верч йокрокланаш тӱҥалат». Тиде мут ончыкта: Иегова шкежат ылыжташ тӱҥалме жапым чот вуча манын, Иов ӱшанен (Иов 14:13—15).

¹⁵ Ылыжмаш нерген шонкалымаш могай шижмашдам тарвата? Очыни те йодыда: колышо лишылем-влак ылыжтыме лийыт мо? Колышо-влак угыч илаш тӱҥалышт манын, Иегован кугу кумылжо уло. Тиде мемнам пешак лыпландара. А кӧ ылыжтыме лийыт да кушто нуно илаш тӱҥалыт? Тидын нерген Библийыште мом возымо айста пален налына.

16. Ылыжтыме еҥ-влакым могай илыш вуча?

¹⁶ Ожно ылыжтыме-влак ешышт да йолташышт дене пырля угыч куанен илен кертыныт. Лийшаш ылыжмаш утларак сай лиеш. Шоналтыза: еҥ-влакын колымаш деч посна курымеш илаш йӧнышт лиеш. Нуно тыгай жап годым илаш тӱҥалыт, кунам сар, осал ыштымаш да чер огеш лий.

17. Юмо кӧм ылыжта?

¹⁷ Кӧ ылыжтыме лиеш? Иисус каласен: «Шӱгарысе-влак чылан Тудын йӱкшым колыт да лектыт» (Иоаннын 5:28, 29). Тыгак Почмаш 20:13 ойла: «Теҥызат колышо-влакшым пуэн, колымаш  ден тамыкат [але шӱгар] колышо-влакыштым пуэныт». Тыгела, миллиардле еҥ ылыж кынелеш. «Чын ыштыше-влакат, осалым ыштыше-влакат» ылыжыт манын, апостол Павел каласен. (Апост. пашашт 24:15 лудын лекса.) Кӧ нерген тыште ойлалтеш?

18. «Чын ыштыше-влак» кӧ улыт?

 ¹⁸ «Чын ыштыше-влак» коклаште тыгай Иегован ӱшанле служитлышыже-влакат улыт, кудышт Иисус Христосын мландыш толмыж деч ончыч иленыт. Мутлан, Ной, Авраам, Сарра, Моисей, Руфь да Эсфирь. Нунын кокла гыч южышт нерген Еврей-влаклан колтымо серышын 11-ше ужаш гыч пален налаш лиеш. Нуно чыланат ылыжмышт деч вара мландыште илаш тӱҥалыт. А мемнан жапыште колышо Иегован ӱшанле служитлышыже-влак нерген мом каласаш лиеш? Нунымат «чын ыштыше-влак» манме, сандене нуно ылыжтыме лийыт.

19. «Осалым ыштыше-влак» кӧ улыт? Ылыж кынелмышт деч вара нунын могай йӧнышт лиеш?

¹⁹ «Осалым ыштыше-влак» — тиде миллиардле колышо еҥ, кудыштын Иеговам палаш йӧнышт лийын огыл. Иегова тыгай еҥ-влакым монден огыл, сандене нунат ылыжтыме лийыт. Тунам нунын Иеговам пален налаш да тудлан служитлаш йӧнышт лиеш.

20. Кӧм Юмо огеш ылыжте?

²⁰ Чыла колышо-влак ылыжтыме лийыт мо? Уке. Южышт ылыжтыме огыт лий манын, Иисус каласен (Лукан 12:5). Еҥ ылыжтыме лиеш але уке, кӧ пунчалым луктеш? Тӱҥ Судьяже — Иегова. Но тыгак, «колышымат, илышымат» судитлаш правам тудо Иисуслан пуэн (Апост. пашашт 10:42). Кӧм Иегова осал ыштышылан да  вашталташ торешланышылан шотла, тудым огеш ылыжте. (19-ше ешартыш статьям ончыза.)

21, 22. а) Каваште илашлан ылыжтыме-влакын могай капышт лиеш? б) Кавасе илышлан икымше ылыжтыме кӧ лийын?

²¹ Тыгак южышт каваште илаш ылыжтыме лийыт манын, Библийыште возымо. Мландысе илышлан ылыжтыме еҥ-влак дене таҥастарымаште, нуно айдеме капым огыл, а шӱлыш капым налыт.

²² Кавасе илышлан икымше ылыжтыме айдеме Иисус лийын (Иоаннын 3:13). Иегова Иисусым колымыж деч вара кумшо кечын ылыжтен (Псалом 15:10; Апост. пашашт 13:34, 35). Ылыжмыж деч вара тудлан айдеме кап пуалтын огыл. Апостол Павел умылтарен: «Кап ден вӱр Юмын Кугыжанышын наследникше лийын огыт керт» (1 Коринфян-влаклан 15:50). Иисус куатле шӱлыш личность семын ылыжын! (1 Коринфян-влаклан 15:3—6). Тыгак, Библий дене келшышын, Юмо весе-влакымат кавасе илышлан ылыжта.

23, 24. Иисусын ойлымо «изи кӱтӱш» кӧ пура? Нуно мынярын лийыт?

²³ Колымыж деч ончыч Иисус шке ӱшанле тунемшыж-влаклан каласен: «Мый тыланда „Верым ямдылаш каем“» (Иоаннын 14:2). Тугеже, тудын тунемшыж-влак кокла гыч южышт тудын  дене пырля каваште лияш ылыжыт. Нуно мынярын лийыт? Иисусын каласымыже почеш нуно шукын огыт лий. Тудо нуным «изи кӱтӱ» манын (Лукан 12:32). Апостол Иоанн нунын чотшым раш палемден. Кончымаштыже тудо Иисусым да «Тудын дене пырля шӱдӧ нылле ныл тӱжемым» ужын (Почмаш 14:1).

²⁴ Нине шӱдӧ нылле ныл тӱжем христианым Юмо кунам ылыжташ тӱҥалеш? Тиде событий Иисус Христос каваште вуйлаташ тӱҥалме деч вара лийшаш. Тидын нерген Библий палемда (1 Коринфян-влаклан 15:23). Христос ынде вуйлаташ тӱҥалын. 144 000 ӱшанле христиан-влак кокла гыч шукыштым кавасе илышлан уже ылыжтыме. Кодшыжо-влак — кызыт мартеат мландыште илыше-влак — колымекышт, вигак кавашке каят. Тугеже, ылыжше-влак кокла гыч шукыракше рай мландыште илаш тӱҥалеш гынат, изирак тӱшкаже кавасе илышлан ылыжтыме лиеш.

25. Вес ужаш гыч мом пален налына?

²⁵ Пеш вашке Иегова еҥ-влакым колымашын куллыкшо гыч утара; да колымаш ынде огеш лий. (Почмаш 21:4 лудын лекса.) Кавашке кайыше-влак тушто мом ышташ тӱҥалыт? Нуно Иисус Христос дене пырля Юмын Кугыжаныштыже вуйлаташ тӱҥалыт манын, Библийыште возымо. Шукырак тиде правительстве нерген вес ужаш гыч пален налына.