1-3. Iyo nili anyakambura addi, ki Yehova onere ddi wihina anoobole?

KUBUWELA ogatorihiwe wi ovolosihiwe mukambura wahinna ejhehedho yokumihiwamo mwaha wa ethu oheriliwena. Osogolo wawo kunoneye enafuna wereya, ni kunna yowera wodhela eyo. Vano, we omubuwela muthu onna kopolo yowuwobola ni onuroromeliha wukavihera! Wonemo addi?

² Iyo nili anyakambura a okwa. Naarive nere ethu-siithu, kannanda othawa. Mbwenye Yehova ohukanna kopolo yomariha okwa. Oliye ohupaganya wi ‘Mwiddani oogomihera, okwa, onere ogujhuliwa.’—1 Coríntios 15:26.

³ Wubuwele woobowa onakanniwena mudhidhi okwa ohunadhiwa okalawo! Mbwenye Yehova kanaamarihe okwave baahi. Oliye onere wahogolosela egumi ale ekwile. Wubuwele makalelo eyo enatapuleliwa mwigumini mwawo. Oliye ohupaganya wi ‘ale ekwile wale’ enere ohogolowela okalawo. (Isaías 26:19) Ohogoloseliwa wula okalawo Bibliya onithana ovenyihiwa muukwani.

4. (a) Akwa mmudhihu obe mukwihu namudhilihu nnalibihiwe wuvi? (b) Akwaye amodha oofuneya a Yesu yaali aani?

⁴ Akwa mmudhihu obe mukwihu, nnowukuwa vanlubale. Iyo nnona wi kaninna ejhehedhelo. Iyo  kannanda wera ethu-siithu wi ninvenyihe mmudhihu ole okwile. Mbwenye Bibliya ononlibiha. (Omwileri 2 Coríntios 1:3, 4.) Kasugwa yotajhiha emodha enatonyihedha wi Yehova ni Yesu enofuna vanlubale wahogolosela egumi ale ekwile. Yesu agali elabo yavati, ahidhowa omoona Lazaru vamodha naarogoliye, Marta ni Mariya. Ala yaali akwaye apama a Yesu. Bibliya onasoriha wi: ‘Yesu oomudhivela Marta, Lazaru ni ddibileya.’ Mbwenye nlabo nimodha Lazaru okwa.—João 11:3-5.

5, 6. (a) Yesu vawoniliye amudhaaye Lazaru ni akwaye yunlaga, murima waye wari aavi? (b) Onona wi Yesu onowidda okwa enanlibiha addi?

⁵ Yesu oofuna omulibiha Marta ni Mariya. Marta viwaliye wi Yesu era odha, oliye omuharelega. Vamoniliye Yesu ahihagalala, oliye wera: ‘Nabuya mwahere mukala wewuno, murogolaga kaakwe.’ Marta ubuwela wi Yesu ahithabwa olegela. Voharela Yesu ahimona, Mariya, unlaga. Yesu ahukuuwa murima vamoniliye Mariya unlaga, vano oliye obajha wunla. (João 11:21, 33, 35) Mariya ahukuuwa vanlubale, wukuuwa wimodhave winanifwanya akwa muthu namudhivelihu.

⁶ Onona wi Yehova ni Yesu enowidda okwa eyo enonlibiha vanlubale. (João 14:9) Yehova ohukanna kopolo yomariha okwa. Siyeyo onafuniye werana osogolo mohilegela.

7, 8. Mwahaya bwaddi Marta adhe ahirumedhege ovenyihiwawo nibwe naafugiwena mahame avitiwewo Lazaru?, Ki Yesu enre ddi?

⁷ Yesu nuufiya omahame wule avitiwewo Lazaru, omusiwoniwa wahifugiwa nnibwe. Vano Yesu wera: ‘Nvenyihewo nibwe nno.’ Mbwenye Marta kaafuna wi  nibwe nne nivenyihiwewo. Mwaha wi yahivira malabo mannayi Lazaru agakwile. (João 11:39) Marta kanona ele Yesu afuniye omwerela Lazaru.

⁸ Yesu wera: ‘Lazaru, kakumela ode!’ Voharela Marta ni Mariya woona ethu yootikiniha yereye. ‘Muthu ole aakwile okumela ode agaapothiwe moddo ni moono, omentoniwa wigapothiwe niisala.’ (João 11:43, 44) Lazaru ohogolowela okalawo dila bili! Oliye okalaga namudhaye ni akwaye. Vano aliwa yahikanna ofuru womukubareela ni othapanya nuliye. Ayo matikiniho ohagalasa! Yesu ahinvenyiha Lazaru.

9, 10. (a) Anvahile Yesu kopolo dhowavenyihana anookwa baani? (b) Ovenyihiwa muukwani wereyile kale winanlibiha addi?

⁹ Yesu aavenyiha athu ni kopolo dhaye? Naari. Ahinathi onvenyiha Lazaru, Yesu arajhihile olobela wa Yehova, wi anvahe kopolo dhonvenyihana Lazaru. (Omwileri João 11:41, 42.) Kahiyo Lazaruve baahi aavenyihiwe muukwani. Bibliya onomusoriha mwana namwali a Yaka 12 ali muredda. Baabeya Jayiro, kaajhehedha wi eere ovulumuwa, odhowa waali Yesu wera: Kamwerena munvulumuse mwanaga. Oliye anna mwaana mmodha baahi. Awogagave ni Yesu, ofiya alobwana dhala omwaddela: ‘Mwanawo ohukwa! Kito onamunyonyela ddi Namahudhiha?’ Vano Yesu waakula: ‘Kuwoove, mbwenye okanne nroromelo.’ Nuwindo oliye odhowa vaade va Jayiro. Nufiyawo, aafwanye athu yunlaga. Yesu wera: ‘Kamunle, kakwile; mbwenye onogoona.’ Ababe a namwali ole kiyonelamo ele Yesu afuniye owoga. Yesu waloba athu yali mba mune okumela ode, wahisa abaabi anamwali  ole odhowa wali muruthuya. Ni mukalelo wapama ohidda nlada na namwali ole omwiithana: ‘Namwali, onawoga ddi miyo ‘kavenya!’’ Wubuwele makalelo amudhaaye yamuthabeliwa, emoniliwa avenyaga nuwindo ambela weedda! Yesu ahinvenyiha mwaniwa muukwani! (Marcos 5:22-24, 35-42; Lucas 8:49-56) Ovenya nlabo nenne, yamonaga mwaniwa, yubuwela ele Yehova awerihedhiye wodhela Yesu. *

¹⁰ Athu ala evenyihiwe ni Yesu ehikwa dila bili. Mbwenye iyo nilerigi wodhela athu yayo enonlibiha mwaha wi enonivaha ejhehedhelo yeebaribari. Yehova onofuna wavenyiha athu muukwani, ni onere werena ndo.

11. Eclesiastes 9:5, onahudhiha ddi wodhela Lazaru?

¹¹ Bibliya onohudhiha pamadhene wi: ‘Anookwa kinonne ethu.’ Siyene yapadduwe ni Lazaru. (Eclesiastes 9:5) Ninga mwawogile Yesu, Lazaru akala ninga era ogona. (João 11:11) Eyo enatapulela wi, Lazaru ‘kubuwela ethu.’

12. Nnone addi wi ovenyihiwa wa Lazaru mwebaribarene wihereya?

¹² Athu owinjhiva, yahimona Yesu anvenyihaga Lazaru. Naamwiddaniya yahinona wi mwebaribarene Yesu ohawerana matikiniho ale. Lazaru ahihogolowela okalawo, yopadduwa ela yovenyihiwa muukwani mwebaribarene yahereya. (João 11:47) Ohiya eyo,  athu owinjhiva yahidhowa omoona Lazaru, vano aliwa, yahikanna ebaribari wi Yesu aarumiwe ni mwinnyene Mulugu. Mbwenye amwiddani a Yesu newene kiyadhiveliwe, mowindo aliwa wambela omwiwananela wi empe Yesu ni Lazaru.—João 11:53; 12:9-11.

13. Kannanganyedha wi Yehova onere wavenyiha anookwa. Mwahaya bwaddi?

¹³ Yesu ohuwoga wi ‘atene eli mmahame ammubuweloni’ enere ovenyihiwa. (João 5:28) Eyo enatapulela wi ale eli mmubuweloni mwa Yehova enere ohogolowela okalawo. Mbwenye wihina Yehova anvenyihe muthuya, oliye onambele wubuwela dhego dhatedhene wodhela muthu ole. Mwebaribarene oliye onere owedha werana eyo? Hee, dhihikalawo matxikwi ni matxikwi a thendderi odhulu. Ninga Bibliya onawogiye, Yehova ohunona ndina na kadda thendderi. (Omwileri Isaías 40:26.) Akala oliye onoowedha wubuwela ndina na kadda thendderi, mwebaribarene oliye onere wubuwela dhego dhatedhene dhaathu ale onavenyihiye muukwani. Ethu yofuneya sowi, Yehova dipaddusile dhego dhatedhene, iyo nihinona wi oliye dinna kopolo dhowavenyihana athu muukwani.

14, 15. Madhu a Jo enanihudhiha ddi wodhela ovenyihiwa muukwani?

¹⁴ Mudhari oororomeleya ithaniwa, Jo oorumedha wi ovenyihiwa winere okalawo. Oliye ahikoha: ‘Muthu akwa, podi ohogolowela okalawo?’ Ahiwoga ni Yehova egihina: ‘Nyu munere ogithana, vano miyo ginere wuwakulani. Munere okanna munukwela wa mabasa mwaparilinyu ni madiinyu.’ Hee, Jo ahinona wi Yehova ohukanna munukwela wowavenyiha athu muukwani.— Jó 14:13-15.

 ¹⁵ Ononamo addi, wubuwela ovenyihiwa muukwani? Podi wera onowikoha, ki amudhaga ni akwaaga ekwile, enere ovenyihiwa muukwani? Ethu enanlibiha fuunona wi Yehova onofuna wavenyiha ale ekwile. Kabeni none ele Bibliya onawogiye wodhela ale enaavenyihiwe ni mburoya enakalegiwawo.

16. Ovenyihiwa onereye osogolo, onakalele ddi wohagalasa okwaranya ovenyihiwa wereye malabo amundduli?

¹⁶ Malabo amundduli, ale yavenyihiwe muukwani, yahidhowa okalaga naamudhiwa vamodha ni akwiwa elabo yela yavati. Emodhave enereye osogolo, mbwenye, ovenyihiwa wula winere ohagalasa okwaranya ovenyihiwa wereye mundduli. Mwahaya? Mwaha athu enaavenyihiwe wi ekalege elabo yela yavati enere okanna ofuru wokalawo malabo amatene, newene kidha ekwagwaga. Elabo yeyo enaakale yowoma okwaranya niila nnakalihu peeno. Kawinaakale koddo, otimbwini newene oredda.

17. Onavenyihiwe muukwani baani?

¹⁷ Onavenyihiwe muukwani baani? Yesu ohuwoga: ‘Atene eli mmahame ammubuweloni enere wiwa ndhu naye ni enere ovenya.’ (João 5:28, 29) Apocalipse 20:13 onawoga wi: ‘Niya yahapeleka ale yakwelemo, okwa ni mahame yahapeleka anookwa yali wengo.’ Hee, Matxikwi ni matxikwi aathu ekwile enere ohogolowela okalawo. Murumiwi Pawulo ohuwoga: ‘Winoodha wikale ovenyihiwa waathu owogowa murima ni ohogowa murima.’ (Omwileri Atos 24:15.) Ki athu ala owogowa murima ni ohogowa murima baani?

18. Athu ala ‘owogowa murima’ enaavenyihiwe, baani?

 ¹⁸ ‘Owogowa murima’ enagiwana adhari oororomeleya a Yehova yaliwo Yesu ahinathi odha elabo yavati. Athu ninga Nowe, Abaraawu, Sara, Moses, Ruti ni Estere, enere ovenyihiwa wi ekalege elabo yela yavati. We podi wileri wodhela athu yala va Hebreus kapitulu 11. Ki adhari a Yehova enakwa malabo yala a peeno  enere ovenyihiwa? Hee. Naaliwaya athu ‘owogowa murima’, enere ovenyihiwa.

19. Athu ala ‘ohogowa murima’ baani? Ki ofuru baani Yehova onaavahiye?

¹⁹ ‘Ohogowa murima’ enagiwana, matxikwi ni matxikwi aathu ekwile yahanna ofuru yomunona Yehova. Naari ekwileve, Yehova onowawubuwela. Oliye onere wavenyiha muukwani, ni onere wavaha ofuru wohudhera wodhela oliye ni womulabela.

20. Athu atene enere ovenyihiwa muukwani?

²⁰ Mbwenye athu aatene enere ovenyihiwa muukwani? Naari. Yesu ohuwoga wi athu amodha kinavenyihiwe muukwani. (Lucas 12:5) Ki onaathonge baani akala enere ovenyihiwa obe naari? Yehova di namatoriha oogomihedha, mbwenye ohumusakula Yesu ‘wihina akale namatoriha aathu eliwo naale ekwile.’ (Atos 10:42) Muthu di muthu onatorihiwe ninga abure ni ahitwaruwa kanaavenyihiwe.— Osugwe wonelamo 19.

21, 22. (a) Ale enavenyihiwa wi yakalege odhulu enavenyihiwa ni mwiili baani? (b) Muthu oobajha ovenyihiwa wi akalege odhulu baani?

²¹ Bibliya onahudhiha wi athu amodha enaya yakalege odhulu. Ale enavenyihiwa wi yakalege odhulu, kinavenyihiwa ni mwiili weemuthu. Aliwa enavenyihiwa ni mwiili womuzimuni.

²² Yesu di muthu oobajha ovenyihiwa wi akalege odhulu. (João 3:13) Egavirile malabo mararu Yesu agakwile, Yehova ahinvenyiha muukwani. (Salmos 16:10; Atos 13:34, 35) Yesu kavenyihiwe ni mwiili wemuthu. Murumiwi Peduru ohuwoga wi Yesu ‘okwile omwilini, mbwenye ohakela egumi yomuzimuni.’  (1 Pedro 3:18) Yesu avenyihiwiye ohuvahiwa mwiili womuzimuni wakopolo! (1 Coríntios 15:3-6) Mbwenye Bibliya onowoga wi kaakale oliyeneve baahi adhowe odhulu.

23, 24. Nikuru nna nig’ono owogile Yesu eri athu angasi, ki enavenyihiwa alini?

²³ Yesu ahinathi okwa, ahiwoga ni anamaharaye oororomeleya eraga: ‘Ginodhowa guwajeleni mburo.’ (João 14:2) Eyo enatapulela wi anamahara amodha a Yesu yere ovenyihiwa wi yakalege odhulu. Eri angasi? Yesu ohuwoga wi eri ‘nikuru nig’ono.’ (Lucas 12:32) Murumiwi Juwawu ahisoriha numerona. Oliye ahimona Yesu odhulu ‘agimenle omwangoni wo Siyawu, agaali naathu owakwana 144 000.’—Apocalipse 14:1.

²⁴ Makiristawu ala owakwana 144 000 enaavenyihiwe alini wi yakalege odhulu? Bibliya onahudhiha wi yavenyihiwe mudhidhi Yesu Kiristu abajha othonga odhulu. (1 Coríntios 15:23) Iyo niri mudhidhi yoyo wa 144 000, owinjhiva ehikwa ni ehivenyihiwa ehidhowa odhulu. Mbwenye amodha eri elabo yela yavati. Mudhidhi yole enakwiwa enovenyihiwa odhowa okalaga odhulu. Mbwenye, athu owinjhiva enere ovenyihiwa osogolo wi ekalege mparayizu elabo yela yavati.

25. Musolo onaharela nnahudhere ddi?

²⁵ Mohilegela Yehova onere wawobola athu muukwani, okwa kunadha okalawo! (Omwileri Isaías 25:8.) Ale enaya odhulu mabasiwaya enaakale ddi? Bibliya onowoga wi aliwa enaya yalamulege ni Yesu kumweneni mwa Mulugu. Musolo onaharela nnere ohudhera wodhela omwene wa Mulugu.