1-3. a) ¿Nda̱chun nda̱a̱ táki̱ʼva íyo na̱ ñúʼu veʼeka̱a saá íyoyó nu̱ú ña̱ xíʼi̱yó? b) ¿Ndáaña keʼé Jehová ña̱ va̱ʼa sakǎkura miíyó?

NDAKANIXI̱NÍ ña̱ tíinna ku̱a̱chi xíʼún xa̱ʼa̱ iin ña̱ʼa ña̱ va̱ása níkeʼún, ta chíka̱a̱na yóʼó veʼeka̱a ndiʼi tiempo. Ta nda̱a̱ ni iin ki̱vi̱ va̱ása kuchiñu kitaún. Ta nda̱a̱ ni iin ña̱ʼa va̱ása kivi keʼún xa̱ʼa̱ ña̱yóʼo. Soo, tá nda̱kanixi̱níún ña̱ kǒoka ña̱ kivi keʼún, kúnda̱a̱-iniún ña̱ íyo iin na̱ kivi tavá yóʼó veʼeka̱a ta káʼa̱nna ña̱ chindeétáʼanna xíʼún. ¿Ndáaña kundoʼún xa̱ʼa̱ ña̱yóʼo?

² Ndiʼi miíyó nda̱a̱ táki̱ʼva íyo na̱ ñúʼu veʼeka̱a saá íyoyó nu̱ú ña̱ xíʼi̱yó. Ta kǒo nda̱a̱ ni iin ña̱ kivi keʼéyó ña̱ va̱ʼa ka̱kuyó. Soo Jehová kúúmiíra ndee̱ ña̱ va̱ʼa sakǎkura miíyó nu̱ú ña̱yóʼo. ¿Ndáa ki̱ʼva keʼéraña? Miíra ni̱ka̱ʼa̱nra ña̱ sandíʼi-xa̱ʼa̱ra ña̱ xíʼi̱yó (1 Corintios 15:26).

³ ¿Á kivi ndakanixi̱níún xa̱ʼa̱ ña̱ kusi̱íní-iniyó tá ná ndiʼi-xa̱ʼa̱ ña̱ xíʼi̱yó? Soo su̱ví iinlá ña̱ xíʼi̱yó sandíʼi-xa̱ʼa̱ Jehová. Chi saátu sandátakura na̱ ni̱xi̱ʼi̱. Ta miíra ni̱ka̱ʼa̱nra ña̱ keʼéra ña̱yóʼo (Isaías 26:19). Ta ña̱yóʼo kúú ña̱ káʼa̱n ña̱ Biblia xa̱ʼa̱. Ndakanixi̱ní xa̱ʼa̱ ña̱ va̱ʼa ña̱ kivi ndakiʼún xa̱ʼa̱ ña̱yóʼo.

4. a) ¿Ndáa míí kivi ndani̱ʼíyó ña̱ sandíko-iniyó tá ni̱xi̱ʼi̱ iin na̱ veʼeyó á na̱ migoyó? b) ¿Ndáana kúú na̱ va̱ʼaní xi̱kitáʼan xíʼin ta̱ Jesús?

⁴ Tá xíʼi̱ iin na̱ veʼeyó á iin na̱ migoyó xóʼvi̱níyó xa̱ʼa̱ ña̱yóʼo. Ta nda̱a̱ ni loʼo va̱ása va̱ʼa kúniyó, saáchi kǒo nda̱a̱ ni iin ña̱ kivi keʼéyó ña̱ va̱ʼa sandátakuyó na̱yóʼo.  Soo ña̱ káʼa̱n Biblia va̱ʼaní sándi̱kóña-iniyó (kaʼvi 2 Corintios 1:3, 4). Ná kotoyó iin ejemplo ña̱ náʼa̱ nu̱úyó ña̱ kúni̱ní Jehová xíʼin ta̱ Jesús sandátakuna na̱ veʼeyó xíʼin na̱ migoyó na̱ ni̱xi̱ʼi̱. Tá ni̱xi̱yo ta̱ Jesús nu̱ú ñuʼú yóʼo, xi̱xa̱ʼa̱n ni̱ʼira xi̱xitora ta̱ Lázaro xíʼin ku̱ʼvara ñá Marta xíʼin ñá María. U̱ni̱ saá na̱yóʼo va̱ʼaní xi̱kitáʼanna xíʼin ta̱ Jesús. Ña̱ Biblia káchiña: “Ta̱ Jesús xi̱kuʼvi̱ní-inira xi̱xinira ñá Marta xíʼin ku̱ʼvi̱ñá, ta saátu ta̱ Lázaro” (Juan 11:3-5). Soo iin ki̱vi̱, ta̱ Lázaro ni̱xi̱ʼi̱ra.

5, 6. a) ¿Ndáaña ndo̱ʼo ta̱ Jesús tá xi̱nira xáku na̱ veʼe ta̱ Lázaro xíʼin na̱ migora? b) ¿Nda̱chun sándi̱koní ña̱ ke̱ʼé ta̱ Jesús iniyó?

⁵ Tasaá, ta̱ Jesús ku̱a̱ʼa̱nra sandíkora-ini ñá Marta xíʼin ñá María. Tá na̱kunda̱a̱-ini ñá Marta ña̱ xa̱a̱ ku̱yatin ta̱ Jesús ña̱ ñuu kán, ku̱a̱ʼa̱nñá ndakutáʼanñá xíʼinra. Ñáyóʼo ni̱kusi̱íní-iniñá tá xi̱niñá ta̱ Jesús, soo ni̱ka̱ʼa̱nñá xíʼinra: “Tá níxi̱yoún yóʼo va̱ása kuviví ku̱ʼvai̱”. Ñá Marta nda̱kanixi̱níñá ña̱ ni̱ku̱a̱chi̱ní ta̱ Jesús. Ta tándi̱ʼi, saátu xi̱ni ta̱ Jesús ña̱ xákuní ñá María. Tá xi̱nira ña̱ xákuní na̱ veʼe ta̱ Lázaro xíʼin na̱ migora, ku̱suchíní-inira ta xa̱kura xíʼinna (Juan 11:21, 33, 35). Ta̱ Jesús ni̱kusuchíní-inira nda̱a̱ táki̱ʼva ndóʼo ndiʼiyó tá xíʼi̱ iin na̱ kúʼvi̱ní-iniyó xíniyó.

⁶ Ña̱ ke̱ʼé ta̱ Jesús sándi̱koníña-iniyó. Ña̱yóʼo sánáʼa̱ña miíyó, ña̱ miíra xíʼin yivára kǒo kútóona ña̱ kuviyó (Juan 14:9). Soo Jehová kúúmiíra ndee̱ ña̱ sandíʼi-xa̱ʼa̱ra ña̱ xíʼi̱yó, ta xa̱a̱ ku̱nu̱mí keʼéra ña̱yóʼo.

7, 8. a) ¿Nda̱chun va̱ása níxiin ñá Marta taxiñá sáku̱taʼana yu̱u̱ nu̱ú ni̱ndu̱xu̱n ta̱ Lázaro? b) ¿Ndáa milagro kúú ña̱ ke̱ʼé ta̱ Jesús?

⁷ Ta̱ Jesús ni̱xa̱ʼa̱nra nu̱ú ni̱ndu̱xu̱n ta̱ Lázaro. Ta nu̱ú ni̱ndu̱xu̱nra ndásiña xíʼin iin yu̱u̱ káʼnu. Tasaá ta̱ Jesús  ni̱ka̱ʼa̱nra: “Sáku̱taʼandó yu̱u̱ yóʼo”. Soo ñá Marta va̱ása níxiinñá taxiñá sáku̱taʼana yu̱u̱ yóʼo, chi xa̱a̱ ku̱mí ki̱vi̱ kúú ña̱ ni̱xi̱ʼi̱ ta̱ Lázaro (Juan 11:39). Ña̱ nda̱a̱ kúúña, ñá Marta va̱ása xíni̱ñá ndáa ña̱ keʼé ta̱ Jesús xa̱ʼa̱ ta̱ Lázaro.

⁸ Tándi̱ʼi sa̱kútaʼana yu̱u̱, ta̱ Jesús ndeé va̱ʼa ka̱nara ta ka̱chira: “Lázaro, kita”. Tasaá, ñá Marta xíʼin ñá María xi̱niná iin ña̱ nda̱kanda̱ní-ininá xíʼin: “Ki̱ta ta̱ ni̱xi̱ʼi̱ yóʼo, núʼni ndaʼa̱ra, núʼni xa̱ʼa̱ra xíʼin ti̱ko̱to̱” (Juan 11:43, 44). Tasaá nda̱taku ta̱ Lázaro, ta tuku nda̱kutáʼanra xíʼin na̱ veʼera ta saátu xíʼin na̱ migora. Ndiʼina va̱ʼa ti̱innara, nu̱minara ta ni̱ka̱ʼa̱nna xíʼinra. Iin milagro xi̱kuu ña̱yóʼo chi ta̱ Jesús sa̱ndátakura ta̱ Lázaro.

9, 10. a) ¿Ndáana ta̱xi ndee̱ ndaʼa̱ ta̱ Jesús ña̱ va̱ʼa sa̱ndátakura na̱ ni̱xi̱ʼi̱? b) ¿Nda̱chun chíndeétáʼanní relato ña̱ káʼa̱n xa̱ʼa̱ na̱ nda̱taku tá ya̱chi̱ xíʼinyó?

⁹ ¿Ndáana ta̱xi ndee̱ ndaʼa̱ ta̱ Jesús ña̱ va̱ʼa sa̱ndátakura na̱ ni̱xi̱ʼi̱? Tá kúma̱níka sandátakura ta̱ Lázaro, siʼna ni̱ka̱ʼa̱nra xíʼin Jehová. Tasaá, mií Jehová ta̱xi ndee̱ ndaʼa̱ra ña̱ va̱ʼa sa̱ndátakura ta̱ Lázaro (kaʼvi Juan 11:41, 42). Soo su̱ví iinlá ta̱ Lázaro kúú ta̱ nísandátakura. * Chi saátu káʼa̱n ña̱ Biblia xa̱ʼa̱ iin ñá loʼo ñá kúúmií 12 ku̱i̱ya̱ ñá ndeéní ndóʼo. Yiváñá xi̱naníra Jairo, ta iinlá ñáyóʼo xi̱kuu se̱ʼera. Ta̱ Jairo ndíʼi̱ní-inira ta xa̱kundáʼvira nu̱ú ta̱ Jesús ña̱ ná sandáʼara ñá loʼo se̱ʼera.  Tá káʼa̱nkara xíʼin ta̱ Jesús, ki̱xaa̱ sava na̱ ta̱a ta ni̱ka̱ʼa̱nna xíʼin ta̱ Jairo: “Ñá loʼo se̱ʼún xa̱a̱ ni̱xi̱ʼi̱vañá. ¿Nda̱chun sándi̱ʼi̱kaún ta̱ Maestro?”. Soo ta̱ Jesús ni̱ka̱ʼa̱nra xíʼinra: “Va̱ása yi̱ʼvíún, kandíxa Ndióxi̱ ta ndatakuvañá”. Tasaá, ku̱a̱ʼa̱nna chí veʼe ta̱ Jairo. Tá xa̱a̱ ku̱yatinna veʼera, ta̱ Jesús xi̱nira ña̱ xákuní na̱ yiví. Ta ta̱ Jesús ni̱ka̱ʼa̱nra xíʼinna: “Va̱ása kuakukandó xa̱ʼa̱ñá, chi va̱ása níxi̱ʼi̱ñá ñá kísi̱va kúúñá”. Sana na̱ yivá ñá loʼo yóʼo va̱ása níkunda̱a̱-inina ndáa ña̱ xi̱kuni̱ kachi ta̱ Jesús xíʼin ña̱yóʼo. Tándi̱ʼi, ta̱ Jesús ni̱ka̱ʼa̱nra xíʼin ndiʼina ña̱ ná keena ini ña̱ veʼe kán, tasaá ni̱ki̱ʼvira xíʼin na̱ yiváñá nu̱ú kándúʼuñá. Ta̱ Jesús ti̱inra ndaʼa̱ ñá loʼo yóʼo ta ka̱chira: “Ñá loʼo káʼi̱n xíʼún: ndako̱o”. ¿Á kivi ndakanixi̱níún xa̱ʼa̱ ña̱ ni̱kusi̱íní-ini na̱ yivá ñá loʼo yóʼo tá xi̱nina ña̱ nda̱kooñá ta ki̱xáʼañá xíkañá? Ta̱ Jesús va̱ʼa sa̱ndátakura ñá loʼo yóʼo (Marcos 5:22-24, 35-42; Lucas 8:49-56). Ndiʼi yichi̱ ña̱ xi̱xito ta̱ Jairo xíʼin ñá síʼira ñá loʼo se̱ʼena, xi̱ndakaʼánna ndáa ki̱ʼva xi̱niñúʼu Jehová se̱ʼera ta̱ Jesús ña̱ sa̱ndátakura ñá loʼo yóʼo.

¹⁰ Ña̱ nda̱a̱ kúú ña̱ tuku ni̱xi̱ʼi̱va na̱ yiví na̱ sa̱ndátaku ta̱ Jesús. Soo relato ña̱ káʼa̱n xa̱ʼa̱ na̱ nda̱taku tá ya̱chi̱, chíndeétáʼanníña xíʼinyó ña̱ kandíxakayó ña̱ koo táʼan ña̱yóʼo chí nu̱únínu, ta saátu chíndeétáʼanña xíʼinyó ña̱ kunda̱a̱-iniyó ña̱ kúni̱ Jehová sandátakura na̱ ni̱xi̱ʼi̱, ta ndixa keʼévaraña.

11. Nda̱a̱ táki̱ʼva káchi Eclesiastés 9:5, ¿ndáaña ndo̱ʼo ta̱ Lázaro tá ni̱xi̱ʼi̱ra?

¹¹ Ña̱ Biblia káʼa̱nña ña̱ va̱ása kúnda̱a̱ka-ini na̱ ni̱xi̱ʼi̱ xa̱ʼa̱ nda̱a̱ ni iin ña̱ʼa (Eclesiastés 9:5). Ña̱yóʼo kúú ña̱  ndo̱ʼo ta̱ Lázaro tá ni̱xi̱ʼi̱ra. Tá xi̱ndika̱a̱ra nu̱ú ni̱ndu̱xu̱nra va̱ása níkunda̱a̱-inira xa̱ʼa̱ ña̱ kúu chí sa̱tá. Nda̱a̱ táki̱ʼva ni̱ka̱ʼa̱n ta̱ Jesús, nda̱a̱ táki̱ʼva íyo ta̱ ni̱ki̱si̱ saá ni̱xi̱yo ta̱ Lázaro (Juan 11:11).

12. ¿Nda̱chun va̱ʼa kúnda̱a̱-iniyó ña̱ ndixa nda̱taku ta̱ Lázaro?

¹² Ku̱a̱ʼání na̱ yiví xi̱nina tá sa̱ndátaku ta̱ Jesús migora ta̱ Lázaro. Nda̱a̱ na̱ xi̱sa̱a̱-ini xi̱xini ta̱ Jesús na̱kunda̱a̱-inina ña̱ ke̱ʼéra ña̱ milagro yóʼo. Ta nda̱a̱ ni iinna kǒo níkivi ka̱ʼa̱n ña̱ va̱ása níndataku ta̱ Lázaro, chi tákuvara (Juan 11:47). Ta saátu, ku̱a̱ʼání na̱ yiví ni̱xa̱ʼa̱nna xi̱tona ta̱ Lázaro ta ki̱xáʼana ka̱ndíxana ña̱ mií Ndióxi̱ kúú ta̱ chi̱ndaʼá ta̱ Jesús nu̱ú ñuʼú yóʼo. Na̱ sáa̱-ini xíni ta̱ Jesús va̱ása níkutóona ña̱yóʼo, ña̱kán ki̱xáʼana ndúkúna ndáa ki̱ʼva kaʼnína ta̱ Jesús xíʼin ta̱ Lázaro (Juan 11:53; 12:9-11).

13. ¿Nda̱chun kivi kandíxayó ña̱ sandátaku Jehová na̱ ni̱xi̱ʼi̱?

¹³ Ta̱ Jesús ni̱ka̱ʼa̱nra ña̱ ndiʼi na̱ ni̱xi̱ʼi̱ ndataku tukuvana (Juan 5:28, nota). Ña̱yóʼo kúni̱ kachiña ña̱ sandátaku Jehová ndiʼi na̱ ndákaʼánra xa̱ʼa̱. Ta ña̱ va̱ʼa keʼéra ña̱yóʼo, xíniñúʼu ndakaʼánra xa̱ʼa̱ ki̱ʼva ña̱ ni̱xi̱yo na̱ yiví kán. ¿Á kivi keʼé Jehová ña̱yóʼo? Ndakanixi̱ní xa̱ʼa̱ ña̱yóʼo: ku̱a̱ʼání kúú ki̱mi tí íyo chí ndiví, ta ña̱ Biblia káchiña ña̱ xíni̱ Jehová ki̱vi̱ iin tá iin tíyóʼo (kaʼvi Isaías 40:26). Tá xíni̱ Jehová ki̱vi̱ iin tá iin tí ki̱mi, va̱ása ixayo̱ʼvi̱ña xíʼinra ña̱ ndakaʼánra xa̱ʼa̱ ki̱ʼva ña̱ ni̱xi̱yo na̱ yiví na̱ sandátakura. Ta mií Jehová kúú ta̱ i̱xava̱ʼa ndiʼi ña̱ʼa, ña̱kán kúúmiíra ndee̱ ña̱ sandátakura na̱ ni̱xi̱ʼi̱.

14, 15. ¿Ndáaña sákuaʼayó xíʼin ña̱ ni̱ka̱ʼa̱n ta̱ Job xa̱ʼa̱ ña̱ ndataku na̱ ni̱xi̱ʼi̱?

¹⁴ Iin ta̱ xi̱ndasakáʼnu Ndióxi̱ ta̱ ni̱xi̱yo tá tiempo xi̱naʼá ta̱ xi̱naní Job, xi̱kandíxara ña̱ ndataku na̱ ni̱xi̱ʼi̱. Iin yichi̱ ni̱nda̱ka̱tu̱ʼunra ña̱yóʼo: “Tá ná kuvi iin ta̱a, ¿á  kivi ndatakura?”. Tasaá, ni̱ka̱ʼa̱nra xíʼin Jehová: “Yóʼó kanaún yi̱ʼi̱, ta yi̱ʼi̱ ndakuii̱n yuʼún. Chi kúni̱níún ndikóún kuniún na̱ ke̱ʼún xíʼin ndaʼún”. Ña̱ ni̱ka̱ʼa̱n ta̱ Job sánáʼa̱ña miíyó ña̱ kúni̱ní Jehová sandátakura na̱ ni̱xi̱ʼi̱ (Job 14:13-15).

¹⁵ ¿Ndáaña ndóʼún tá ndákanixi̱níún xa̱ʼa̱ ña̱ ndataku na̱ ni̱xi̱ʼi̱? Tá kúnda̱a̱-iniyó xa̱ʼa̱ ña̱ sandátaku Jehová na̱ ni̱xi̱ʼi̱ sándi̱koníña-iniyó. Soo, sana ndáka̱tu̱ʼún miíún: “¿Ndáaña kundoʼo na̱ veʼi̱ xíʼin na̱ migoi̱ na̱ ni̱xi̱ʼi̱? ¿Á ndataku na̱yóʼo?”. Ná kotoyó ña̱ káʼa̱n Biblia xa̱ʼa̱ ndáa na̱ ndataku ta ndáa míí kundoona.

16. ¿Ndáa ki̱ʼva koo ña̱ kutaku na̱ yiví na̱ ndataku nu̱ú ñuʼú yóʼo?

¹⁶ Na̱ yiví na̱ nda̱taku tá tiempo xi̱naʼá, nda̱kutáʼanna xíʼin na̱ veʼena ta saátu xíʼin na̱ migona nu̱ú ñuʼú yóʼo. Saátu koo chí nu̱únínu, soo va̱ʼaníka koo ña̱yóʼo. ¿Nda̱chun? Ña̱ nu̱ú, saáchi ndiʼi na̱ ndataku kivi kundoona ndiʼi tiempo nu̱ú ñuʼú yóʼo. Ta ña̱ u̱vi̱, saáchi xa̱a̱ síínní koo nu̱ú ñuʼú yóʼo. Va̱ása kooka ku̱a̱chi, ni na̱ kéʼé ña̱ va̱ása va̱ʼa ta saátu ndiʼi-xa̱ʼa̱ kue̱ʼe̱.

17. ¿Ndáana ndataku?

¹⁷ ¿Ndáana ndataku? Ta̱ Jesús ni̱ka̱ʼa̱nra: “Ndiʼi na̱ ni̱xi̱ʼi̱ kuniso̱ʼona ña̱ ka̱ʼa̱nra ta keena” (Juan 5:28, 29, nota). Ta saátu káʼa̱n ña̱ Biblia: “Tá mar nda̱taxira na̱ ni̱xi̱ʼi̱ na̱ xi̱ñuʼu inira, ta ña̱ xíʼi̱ na̱ yiví xíʼin nu̱ú ñúʼuna nda̱taxiñana” (Apocalipsis 20:13). Mií ña̱ nda̱a̱ ku̱a̱ʼání na̱ yiví ndatakuna. Ta̱ apóstol Pablo ni̱ka̱ʼa̱nra ña̱ ndataku na̱ yiví na̱ sa̱kuaʼa xa̱ʼa̱ Ndióxi̱ ta saátu na̱ va̱ása nísakuaʼa xa̱ʼa̱ra (kaʼvi Hechos 24:15). ¿Ndáaña xi̱kuni̱ kachira xíʼin ña̱yóʼo?

18. ¿Ndáana kúú na̱ yiví na̱ sa̱kuaʼa xa̱ʼa̱ Ndióxi̱ na̱ ndataku?

 ¹⁸ ¿Ndáana kúú na̱ yiví na̱ sa̱kuaʼa xa̱ʼa̱ Ndióxi̱? Na̱yóʼo kúú na̱ nda̱kú ni̱xi̱yo ini nda̱sakáʼnu Jehová tá tiempo xi̱naʼá, tá xi̱kuma̱ní kixi ta̱ Jesús nu̱ú ñuʼú yóʼo. Ndiʼi na̱yóʼo ndatakuna nu̱ú ñuʼú yóʼo. Sava na̱yóʼo kúú, ta̱ Noé, ta̱ Abrahán, ñá Sara, ta̱ Moisés, ñá Rut xíʼin ñá Ester. Ña̱ capítulo 11 ña̱ Hebreos káʼa̱nña xa̱ʼa̱ sava na̱  ta̱a yóʼo ta saátu xa̱ʼa̱ ná ñaʼá. Soo, ¿ndáaña kundoʼo na̱ nda̱kú íyo ini ndásakáʼnu Ndióxi̱ na̱ xíʼi̱ tiempo vitin? Na̱yóʼo kúúna táʼan na̱ sa̱kuaʼa xa̱ʼa̱ Ndióxi̱, ta ndatakuvana.

19. a) ¿Ndáana kúú na̱ yiví na̱ va̱ása nísakuaʼa xa̱ʼa̱ Ndióxi̱? b) ¿Ndáaña taxi Jehová keʼéna?

¹⁹ ¿Ndáana kúú na̱ yiví na̱ va̱ása nísakuaʼa xa̱ʼa̱ Ndióxi̱? Na̱yóʼo kúú na̱ yiví na̱ va̱ása níkivi kunda̱a̱-ini xa̱ʼa̱ Jehová. Ni xa̱a̱ ni̱xi̱ʼi̱na, Jehová va̱ása nínandósó-inira xa̱ʼa̱na. Chi sandátakurana ta taxira ña̱ ná sakuaʼana xa̱ʼa̱ra ta xa̱a̱na kachíñuna nu̱úra.

20. ¿Ndáana kúú na̱ va̱ása ndataku?

²⁰ Tá saá, ¿á ndataku ndiʼi na̱ ni̱xi̱ʼi̱? Va̱ása. Ta̱ Jesús ni̱ka̱ʼa̱nra ña̱ sava na̱ yiví va̱ása ndatakuna (Lucas 12:5). ¿Ndáana kúú na̱ va̱ása ndataku? Na̱yóʼo kúú na̱ va̱ása níxiin sandákoo ña̱ va̱ása va̱ʼa ña̱ xi̱keʼéna. Soo Jehová kúú ta̱ ka̱ʼa̱n, ndáa na̱ ndataku ta ndáa na̱ va̱ása ndataku. Ta̱yóʼo kúú mií ta̱ chíñu káʼnu ta̱ va̱ʼaní tíin ku̱a̱chi, soo saátu ta̱xira chiñu yóʼo ndaʼa̱ ta̱ Jesús ña̱ ndatiinra ku̱a̱chi xíʼin na̱ táku ta saátu xíʼin na̱ ni̱xi̱ʼi̱ (Hechos 10:42). (Koto nota 19, “Ña̱ Gehena”).

21, 22. a) ¿Ndáa ki̱ʼva íyo na̱ ndátaku chí ndiví? b) ¿Ndáana kúú na̱ nu̱ú nda̱taku ña̱ koona chí ndiví?

²¹ Ña̱ Biblia káʼa̱nña ña̱ sava na̱ yiví koona chí ndiví. Na̱ yiví na̱ ndataku kán va̱ása koona nda̱a̱ táki̱ʼva íyo miíyó na̱ yiví, chi espíritu koona.

²² Ta̱ Jesús kúú ta̱ nu̱ú nda̱taku ku̱a̱ʼa̱n koo chí ndiví (Juan 3:13). Jehová sa̱ndátakura ta̱yóʼo tá xa̱a̱ ni̱ya̱ʼa u̱ni̱ ki̱vi̱ ña̱ xa̱ʼnínara, soo va̱ása nísandátakurara ña̱ koora nda̱a̱ táki̱ʼva íyo miíyó (Salmo 16:10; Hechos 13:34,  35). Ta̱ apóstol Pedro ni̱ka̱ʼa̱nra ña̱ ta̱ Jesús ni̱xi̱ʼi̱ra soo nda̱takura ta ndu̱ura iin espíritu (1 Pedro 3:18). Ta̱ Jesús nda̱takura ta ndu̱ura iin espíritu ta̱ ndakúní (1 Corintios 15:3-6). Soo ña̱ Biblia káʼa̱nña ña̱ su̱ví iinlá ta̱ Jesús kúú ta̱ nda̱taku chí ndiví.

23, 24. ¿Ndáana kúú na̱ iin tiʼvi ni̱ka̱ʼa̱n ta̱ Jesús xa̱ʼa̱, ta nda̱saa kúúna?

²³ Tá kúma̱ní si̱lóʼo ña̱ kuvi ta̱ Jesús, ni̱ka̱ʼa̱nra ña̱yóʼo xíʼin na̱ discípulora: “Ku̱a̱ʼi̱n ndasaviíi̱ nu̱ú kundoondó” (Juan 14:2). Ña̱yóʼo kúni̱ kachiña ña̱ sava na̱ ndásakáʼnu Ndióxi̱ ndatakuna ña̱ koona xíʼinra chí ndiví. Ta̱ Jesús ni̱ka̱ʼa̱nra ña̱ iin tiʼvi loʼo koo na̱yóʼo (Lucas 12:32). Ta̱ apóstol Juan ni̱ka̱ʼa̱n káxira nda̱saa koo na̱yóʼo tá xi̱nira iin visión, nu̱ú ña̱yóʼo xi̱nira ña̱ íyo ta̱ Jesús chí ndiví. Ta̱ Juan xi̱nira ta̱ Jesús “níndichira nu̱ú yuku̱ Sion, ta xíʼin ta̱yóʼo ndíta 144,000” na̱ yiví (Apocalipsis 14:1).

²⁴ ¿Ama kúú ña̱ ndataku na̱ 144,000? Ña̱ Biblia káchiña ña̱ ndatakuna tá ná ndiʼi kixáʼa ta̱ Cristo kaʼndachíñura chí ndiví (1 Corintios 15:23). Ta̱ Jesús xa̱a̱ xáʼndachíñuvara chí ndiví vitin, ta xa̱a̱ ku̱a̱ʼání táʼan na̱ 144,000 nda̱taku íyo xíʼinra. Soo íyoka sava na̱yóʼo nu̱ú ñuʼú yóʼo. Tá xíʼi̱ na̱yóʼo, ndi̱ku̱n ndátakuna chí ndiví. Soo chí nu̱únínu ku̱a̱ʼání na̱ yiví ndatakuna, ta kundoona nu̱ú ñuʼú livi ndiʼi tiempo.

25. ¿Ndáaña sakuaʼayó nu̱ú ña̱ inka capítulo?

²⁵ Si̱lóʼo kúma̱ní, ta Jehová ndatavára miíyó nu̱ú ña̱ xíʼi̱yó, ta ña̱yóʼo va̱ása kookaña (kaʼvi Isaías 25:8). Soo, ¿ndáaña keʼé na̱ 144,000 chí ndiví? Ña̱ Biblia káʼa̱nña ña̱ kaʼndachíñuna xíʼin ta̱ Jesús. Nu̱ú ña̱ inka capítulo kunda̱a̱ka-iniyó xa̱ʼa̱ ña̱ kaʼndachíñuna.