1-3. (a) Eje ileodene hna wose so hnei nge? (b) Iehova co cengi eje buti korione wene ri tango?

DAI uanelo: Hna hnengo bua ti o se hna atangoni ngome me deko ma nia ni bua. Bua ha ile ri kalabusi ca pina ri tango. Deko sa ko co ukunibuti ke bua. Ka deko ma numu ci uroi ke bua, ka bua se tha thuni ko co rue o se ac. Hue kore ta ezien, ha tako kore ci uroi ni bua. Roidi, ri se ran, bua ci taedrehngi ko sa kore ngome thuni co aukuni bua but, ka bone hna ie sesekone ko, bone co konekatu bua! Nge di kore uane bua ri hnor?

² Eje ileodene hna wose so hnei tango. Eje tha thuni ko co rue o se ace bane sicon’ ore tango. Roidi, Iehova kore thuni co cengi eje buti wene ri tango. Ka Nubonengo hna ie ko tango, ore “icuhma me hna dirine”, ha “co atakoni.”​—1 Korinito 15:26.

³ Dai uanelo ore rane bua ha deko co pareuon’ ore tango. Kolo, bua ngei co nidi opodon! Ke Iehova deko ma co atakoni so ore tango. Nubonengo se co aroinilo yawe ore ta tango. Dai ua roionelo ore kakailen’ omelei bane so bua. Iehova ci ie sesekone ko, buice “o re ci menenge ri thotho” ha  co roilo yawe. (Isaia 26:19) Tusi Hmijoc ci kaion’ omelei ko “roilo yawe.”

4. (a) Ngei ma tango ko se kani ej, nge kore thuni co aopodoneni ej? (b) Dai ielo ore yele nore ta nidi kani Iesu.

⁴ Ngei ma tango ko se kani ej, eje ci nidi sheusheu, ka ha deko ma numu engetac. Eje tha thuni ko co rue o se ace bane aroini bone lo yawe. Roidi, Tusi Hmijoc ci kanu ej’ ore nidi opodon. (Ieielo 2 Korinito 1:3, 4.) Eje dai ule sesonelo sa kore aekoweni ci aehngeni ko, Iehova ne Iesu ci nidi alane co aroinilo yawe ore ta ngome eje ci hnoron. Se ta ezien, Iesu hna iara hue co sisi Lazaro ne rue isingene bon, Matha ne Maria. Buice xara theri, nidi kani Iesu. Tusi Hmijoc ci ie ko: “Iesu ci rato Matha, ne ace celuaiene ne nubon, ne Lazaro te.” Ke ri se ran, ha tango kei Lazaro.”​—Ioane 11:3-5.

5, 6. (a) Ma ulelo kei Iesu ore sheusheu ni rue isingene ni Lazaro ne ta kani bon, nge kore Nubone hna rue? (b) Ci aengetaceni eje ma ci ule ko Iesu hna sheusheu ri tango ni Lazaro. Tan’ ore nge?

⁵ Ha hue kei Iesu co athaberedreni Matha ne Maria. Ma taedrehngilu kei Matha ko, ha co pina kei Iesu, hale bone me ukunibuti sere ri pa hnamenenge ha thu co ekede ne Nubon. Hna opodone ke bone co ule Iesu, ke bone hna ie du Nubone ko: “Kacene bua da hna nae ome kacene deko hna tango kore isingene inu.” Du bon, Iesu hna pina kurehmug. Thubenelo, Iesu hna ule Maria ci mane. Nubone hna sheusheu, ka se hna mane joko  ma ci ule ore sheusheu nore ta ngome me melei ne Maria. (Ioane 11:21, 33, 35) Ore hnei Iesu hna sheusheu ri hnore inelu kom’ ore sheusheu ni eje ma tango ko se ngome eje ci hnoron.

⁶ Seseko, ci aengetaceni eje ma ci ule ko, Iesu hna sheusheu. Melei ci aehngeni ko, Nubone ci kecon’ ore tango. Ka Nubone nidi wini Iehova, Iehova joko se ci kecon’ ore tango. (Ioane 14:9) Iehova thuni co atakonibut’ ore tango e iara oiru, ka Nubonengo ha bathu rue inomelei.

7, 8. (a) Matha deko hna alane ko buice co yose but’ ore ete ci thingi ore ta pua ni Lazaro. Wen’ ore nge? (b) Iesu hna rue ore nge bane so Lazaro?

⁷ Ore ta pua ni Lazaro hna thingi hnen’ ore sa kore gara ete. Ma pinalu kei Iesu ri tadan’ ore ta pua, ile Nubone me ie ko: “Yose bot’ o re ete.” Ke Matha deko ma alane ko buice co yose but’ ore ete, wen’ ore ha foa kore rane hnengome ni Lazaro hna ile ri ta pua. (Ioane 11:39) Bone tha ule ko ore Iesu co rue bane so isingene bon.

⁸ Yose buti ke buic’ ore ete, hale i Iesu me ie du Lazaro ko: “Okonebot!” Hale i Matha ne Maria me ule o se ace me hmajiadr: ci okonebuti sere ri ta pua kei Lazaro. (Ioane 11:43, 44) Iesu hna aroini Lazaro lo yawe! Lazaro ha melei yawe ne re kani bon. Ha thuni ke buice co cakui bon, co rue bon, ne co nengoce du bon. Melei ko se ace me shede bane uran!

9, 10. (a) Hnei la hna kanu Iesu ore nene thu co aroinilo yawe ore ta tango? (b) Tan’ ore nge nidi ace so eje kore ta nata nore ta ngome hna aroinilo yawe?

⁹ Ilo, Iesu hna aroinilo yawe ore ta tango hnen’ ore nene ni Nubone ko? Tangoko. Ri dan’ ore co aroini Lazaro lo, Nubone hna hmi du Iehova. Hale i Iehova me kanu Nubon’ ore nene bane aroini Lazaro lo. (Ieielo Ioane 11:41, 42.) Ka deko ma hna aroini Lazaro lo so. Ore Tusi Hmijoc ci lae natane joko ore nata no se cenewe me 12 kore kenereken. Bone nidi hna uedr. Jairo, ceceni bon, deko hna uni o se sereie bane aroini bon. Hale bone me kewiwi du Iesu ha thu co aroini o re tei bon, tenene me sa so. Ci etha nata ke bone ne Iesu, hale me pinalu kore ta ngome co ie du bone ko: “Ha tango ko re tei bua; bane nge yawe co aushiwani o re Thu yeno?” Roidi, Iesu ci ie du Jairo ko: “Hage pareu, unelo so ke nubo, ile me roibote ke nubon.” Hale i Iesu me hue ne Jairo sei bon. Ma acenonelo ore hnamenenge kei Iesu, Nubone ci taedrehngi, ne ci ule ore ta ngome ci mane. Ile i Iesu me ie du buice ko: “Hage mane ke buhnij, deko ma tango ke nubon, ka nubone ci thaet.” Cecene ne hmani cenewe ngei hna eto bushengone ko ore kakailen’ ore hnei Iesu hna ie. Ile i Iesu me sibonelo du nodei ngome ri hnamenenge co okonebut. Hale i Iesu me huete Jairo ne hmenue ni bone ri guhne ci adederue’ ile kore cenew. Yose nidranelo  kei Iesu ore wanine ni cenewe, ne ci ie du bone ko: “Cenewe ke, inu ci ie du nubo, ‘Pucalo.’” Kedi cenewe me canga ibetu co serelo ne co hue. Nidi hna opodone kei ceceni bone ne hmani bon: Iesu hna aroinilo yawe ore tei bushengon! (Mareko 5:22-24, 35-42; Luke 8:49-56) Whan’ omelei, ri nodei eziene bushengone ma ule ore tei bushengon, bushengone ci uan’ ore hnei Iehova hna rue so bushengon, lene sei Iesu. *

¹⁰ Seseko; nodei ngome Iesu hna aroinilo yawe hna tango yawe. Ke nidi ace kore ta nata nore ta hna aroinilo yawe omelei. Onome eje ha numu ci uroi me seseko. Iehova ci alane co aroinilo yawe ore ta tango, ka Nubonengo ha bathu rue inomelei.

11. Ore nata nore hna aroini Lazaro lo yawe ci aehngeni ko, seseko kore ci ie kei Thu Pule 9:5. Tan’ ore nge?

¹¹ Ore Tusi Hmijoc ci ie ko ta tango “tha ule ko se ac.” (Thu Pule 9:5) Ore nata nore hna aroini Lazaro lo yawe, ci aehngeni ko seseko komelei. Ri eziene bone hna ile ri ta pua, Lazaro “tha ule ko se ac.” Lazaro inom’ ore ci thaet, inom’ ore hnei Iesu hna ie.”​—Ioane 11:11.

12. Tan’ ore nge eje thuni co ua sesekone ko hna roilo yawe kei Lazaro?

 ¹² Hmaiai kore ngome hna ule Iesu ci aroini Lazaro lo yawe. Ta icuhma ne Iesu se ha ule joko ko Nubone hna rue ore ac’ omelei me se pengen. Ha melei yawe kei Lazaro, ka melei ci asesekoni ko, bone ha roilo yawe. (Ioane 11:47) Hmaiai kore ngome hna huebuti co ule Lazaro. Buice ma canga ule bone lu, buice ha carajewe ko, Madaru kore hna sia Iesu lu ome ri ten. Ke ta icuhma ne Iesu deko te sa ko ma opodon. Hale buice me uane co atangoni Iesu ne Lazaro.”​—Ioane 11:53; 12:9-11.

13. Tan’ ore nge eje thuni co ua sesekone ko Iehova co aroinilo yawe ore ta tango?

¹³ Iesu hna ie ko “o re nodei ngom’ ileodene ri nodei pua” ha co roilo yawe. (Ioane 5:28) Melei ci ie ko, nodei ngome me ile ri uane ni Iehova ha co roilo yawe. Ngei Iehova ma co aroinilo yawe sa kore ngom, nidi ace ke Nubonengo co ua roion’ ore nodei pengene ne nodei singene nore ngom’ omelei. Ilo, Iehova thuni? Egewa. Dai uanelo, ta milliards kore ta wajekole ri aw. Roidi, Tusi Hmijoc ci ie ko, Iehova ha ule ore yele nore etha wajekol. (Ieielo Isaia 40:26.) Ngei Nubonengo ma ule ore yele nore nodei wajekole ri aw, koiko deko ma ushiwa du Nubonengo co ua roion’ ore nodei pengene ne nodei singene nore nodei ngome Nubonengo co aroinilo yawe. Ka Iehova kore hna thati pupul, wen’ omelei Nubonengo numu nene bane aroinilo yawe ore nodei tango.

14, 15. Ci yeno ej’ ore nge kore hnei Iopu hna ie ri pon’ ore co roilo yawe?

 ¹⁴ Iopu hna ngome me netiti du Iehova. Bone hna etone ko: “Kacene me tango ko re ngom, ilo, nubone co roi yawe?” Thubenelo, bone hna ie du Iehova ko: “Bua co kaie, ka inu ha co cedi buango, buango ha co rereuon’ o re ruace no re rue aranine ni bua.” Iopu ci ua sesekone ko co numu roilo yawe. Bone ha ule ko Iehova ci ahnguni ore ezien, roidi Nubonengo ci nidi alane co aroini ibetuonelo yawe ore ta tango.”​—Iopu 14:13-15, MN.

¹⁵ Nge kore uane ni bua ri hnor, bua ma ci uan’ ore roilo yawe? Eje ci opodone ma ule ko Iehova ci nidi alane co aroinilo yawe ore ta tango. Ke bua ngei ci etone ko: ‘Ilo, ta re kani inu ngei co roilo yawe joko? La kore co roilo yawe? Ka co menenge ile kore nodei ngome co aroinilo yawe kei Madaru?’ Eje dai ule ore ci ie kei Tusi Hmijoc.

16. Co menenge korione kore nodei ngome co roilo yawe ome ri ten?

¹⁶ Ri ta eziene me hna dan, ta ngome hna aroinilo yawe, ha hna iule yawe ne ta re kani ni buice ome ri ten. Se co inomelei joko kore ta eziene co pina, roidi co thawalan’ ore ta eziene me hna dan. Wen’ ore nge? Wen’ ore ta ngome me co aroinilo yawe, ha co menenge ome ri tene e iara oiru. Ka buice co menenge ri ten’ ore awe me deko ma  ekowe sese ne il’ ore ten’ ore awe onom. Ha co deko irue, ha deko co atangoni ngom, ka ha co deko uedr.

17. La kore co roilo yawe?

¹⁷ La kore co roilo yawe? Iesu hna ie ko “nodei ngom’ ileodene ri nodei pua co taedengi ore lanengoce  ni nubon ka buice co kokorobot.” (Ioane 5:28, 29) Ka Ahngabot 20:13 ci ie ko: “Ka ono re cele ci nuebot’ o re nodei tango sei nubon, ka ono re tango ne hedise (ta pua) se ci nuebot’ o re nodei tango sei bushengon”. Hale me ta milliards kore ta ngome co roilo yawe. Paulo aposetolo hna ie joko ko “co roilo yawe sere ri hna tango ko re nodei ngome me netiti ne nodei ngome deko ma netit.” (Ieielo Ta Ruace 24:15.) Melei ci ie ko nge?

18. La kore ta “ngome me netiti” co roilo yawe?

¹⁸ Ore ta “ngome me netiti” omelei, melei numu ta sinemenenge ni Iehova hna menengon’ ore ten’ ore awe ri dan’ ore co pina kei Iesu. Inomei Noa, Aberahama, Sera, Mose, Ruth ne Esetera. Buic’ omelei co roilo yawe ome ri ten. Ri Hebera necene 11 ci ie ore ta yele nore ta mocahmane ne mohmenew’ omelei. Ka ilo, ore ta sinemenenge ni Iehova ci tango ri ta ezien’ onom co roilo yawe? Ka egewa, buice ci kan’ ore ta “ngome me netiti”.

19. La kore ta “ngome me deko ma netiti ?” Nge kore co kanu buice kei Iehova?

¹⁹ Ore ta “ngome me deko ma netiti” melei numu ta milliards ma ha tango, ke deko hna yenone ke buice co ule kaceni Iehova. Roidi, Iehova deko ma hnedungo buic. Nubonengo co aroini buice lo yawe, ka co kanu buic’ ore eziene ha thu yenone co ule kacen, ne co thidilu du Nubonengo.

20. La kore deko co roilo yawe?

 ²⁰ Melei ci ie ko, nodei tango co roilo yawe? Deko. Iesu hna ie ko numu ta ngome deko co roilo yawe. (Luke 12:5) La kore co musion’ ore co roilo yawe? Iehova kore Thu Hnengone me nidi Thu Mus. Roidi, Nubonengo hna kanu Iesu ore musi ha “Thu hnengon’ o re ta be roi ko ne ta tango.” (Ta Ruace 10:42) La kore deko co roilo yawe? Ore ta ngome Iesu ci hnengone ko ngome me nia, ka ci ke co cejan’ ore hnore ni buic.”​—Ule ore Note 19, ri page 246.

21, 22. (a) Korione kore ta ngome co roilo yawe jeu’ ore aw? (b) La kore hna aroini danelo ha thu co menenge ri aw?

²¹ Tusi Hmijoc ci ie ko numu joko ta ngome co roilo yawe ha thu co menenge ri aw. Ngei o se ngome ma roilo yawe jeu’ ore aw, melei bone deko ma ci roilo yawe ri hnengom. Bone ci roilo yawe ri uien, inom’ ore ta angela.

²² Iesu kore hna aroini danelo ha thu co menenge ri aw. (Ioane 3:13) Nubone hna aroinilo yawe hnei Iehova ri therion’ ore rane thubenelo ore hna tango. (Ta Salamo 16:10; Ta Ruace 13:34, 35) Iesu deko hna roilo yawe ri hnengom. Peteru aposetolo ci ie ahngane ko “hna ataetoni o re hneiwa, ka hna awieninilo yawe o re uien.” (1 Peteru 3:18) Iesu ha angela yawe me nidi engetac! (1 Korinito 15:3-6) Ka Tusi Hmijoc ci ie joko ko, numu ta ngome co roilo yawe jeu’ ore aw.

23, 24. (a) Iesu hna nengoceti ore “ehna me waiam”. La ke buic’ omelei? (b) Xara ele ke buic?

 ²³ Ri dan’ ore co tango, Iesu hna ie du re kokonieni Nubone ko: “Ka inu ha ci hue co hngoronatan’ o re guhne bane so buhnij.” (Ioane 14:2) Melei ci ie ko numu ta re kokonieni Nubone co roilo yawe jeu’ ore awe ha thu co menenge ne Nubon. Xara ele ke buice co roilo yawe jeu’ ore aw? Iesu hna ie ko buice “Ehna me waiam.” Buice deko ma xaranum. (Luke 12:32) Ioane aposetolo hna ie netitone ko: bone “hna ule Iesu ci thela ri wece Ziona (ri aw) . . . ka sei nubonengo ko re xara wane handede foti foa thausan (144000).””​—Ahngabot 14:1.

²⁴ Hodraele kore co roilo yawe kore nodei 144000? Kei Tusi Hmijoc ko, buice co roilo yawe thubenelo ore ma ha doku kei Iesu ri aw. (1 Korinito 15:23) Eje ci menenge ri ezien’ omelei, ka hmaiaiil’ ore ta 144000 ha ile ri aw. Ngei ma tango kore theren’ ore ta 144000 ome ri ten, melei buice canga ibetu co roilo yawe jeu’ ore aw. Omedi, dai tuilu, ha co roilo yawe kore hmaiaiil’ ore ta ngome ri paradrais ome ri ten.

25. Co yeno ej’ ore nge kore Yeno 8?

²⁵ Iehova ha bathu cengibut’ ore ngome wene ri tango. Ore tango ha co tako! (Ieielo Isaia 25:8.) Ke co rue di ore nge kore nodei 144000 ri aw? Tusi Hmijoc ci ie ko buice co doku nore baselaia sese ne Iesu. Ore Yeno co ie hmaiaione ri pon’ ore baselaia omelei.