1-3. (a) Ko tose tili mudjeri iponi? (b) Ko Yahova adzatibulise tani mudjeri mwiyi?

TILINGANIZE kuti imwepo mwatongewa kuti mukhale mudjeri pa chinthu chomwe mulibe kuchichita ndipo ati mufere mumo. Imwepo palibe chamungachite kuti mudzipulumuse ndipo mundoti basi nafakale. Koma mosayembekezereka mwabva kuti munthu munango wamali wabwera kuti alipire kuti mubule. Ko mungabve tani?

² Tose tili mudjeri ya impfa. Palibe chatingachite kuti tiyithawe. Koma Yahova anamphanvu zotipulumusa kudjeri mweyi. Iye adapolomisa kuti, ‘impfa yomwe ni m’dani womalizira idzachenekewe.’​—1 Akorinto 15:26.

³ Ndoganizani momwe tidzabvere kukadzakhala kulibe impfa. Sikuti Yahova adzandoyichosa impfa basi. Iye adzapereke soti moyo kwa wanthu womwe adafa. Baibolo ichanena kuti kumoku ni kumukisiwa. Yahova adapolomisa kuti: ‘Wanthu wanu womwe adafa adzakhale soti na moyo.’ (Yesaya 26:19) Ko vingadzakhalelini vokondweresa kuwona soti wanthu omwe adafa akumukisiwa?

4. (a) Ko nchani chingatilimbikise tikaferewa wachibale panango shamwali? (b) Ko anango mwa azishamwali wa Yesu enze mbani?

⁴ Munthu wa m’banja yathu akafa,  vichatiwawa maninge. Tichawona kuti palibe vatingachite kuti akhale soti na moyo. Koma vomwe Baibolo ichanena vichatikhazika moyo pasi. (Lewengani 2 Akorinto 1:3, 4.) Naboni tikambirane chitsanzo chowonesa kuti Yahova na Yesu achada maninge kumukisa azibale na azishamwali wathu womwe adafa. Yesu pewenze padziko yapasi pano, angakonda kucheza na Lazaro pabodzi na azilongosi wake, Malita na Mariya. Iwo angabverana maninge na Yesu, mpakana Baibolo ichati: ‘Yesu angakonda wose mwawa, Malita, Mariya na Lazaro.’ Koma nkupita kwa nthawe Lazaro adadzafa.​—Yohane 11:3-5.

5, 6. (a) Ko Yesu adatani padawona Malita na Mariya ankulira? (b) Ndawa chani nivolimbikisa kudziwa momwe Yesu achabvera pa nkhani ya impfa?

⁵ Yesu adayenda kukalimbikisa Malita na Mariya. Malita padabva kuti Yesu ankubwera, adayenda kukamuchunguzira. Wenze wokondwa kuwona Yesu, koma iye adalewa kuti: ‘Sembe mwenze kuno, mulongosi wangu adakafalini.’ Malita angawona kuti palibe chomwe Yesu angachite ndawa wachebwa kubwera. Yesu padawona Mariya ankulira, adabva ntsisi ndipo adayambambo kulira. (Yohane 11:21, 33, 35) Iye adawawiwa m’moyo ninga momwe tichabvera tikaferewa.

⁶ Nivolimbikisa kudziwa kuti Yesu achabva ninga mwatichabvera tikaferewa wachibale panango shamwali. Yesu adatengera khalidwe mweyi kwa Ababa wake. (Yohane 14:9) Yahova anamphanvu zomalisira impfa ndipo aimalise manje-manje.

7, 8. (a) Ndawa chani Malita wenze adalambiza kuti chimwala chichosewe pamanda ya Lazaro? (b) Ko Yesu adachita chani pachidachosewa chimwala?

⁷ Yesu padafika kumanda komwe Lazaro adaikhiwa, adagumana kuti mpofunga  na chimwala chikulu. Pamwapo Yesu adawuza wanthu kuti: ‘Chichoseni chimwala.’ Koma Malita angadalini kuti wanthu achichose ndawa penze padapita kale ntsiku zinayi Lazaro wayikhiwa kale m’manda. (Yohane 11:39) Iye angadziwalini vomwe Yesu angada kuchita.

⁸ Pamwapo Yesu adati: ‘Lazaro, bula panja!’ Vomwe Malita na Mariya adawona venze vodabwisa maninge, ndawa ‘yemwe wenze wakufa adabula. Minyendo na manja yake, yenze yozelengerewa na nguwo zamaliro.’ (Yohane 11:43, 44) Lazaro adakhala soti na moyo, ndipo adapitiriza kukhala na azibale pabodzi na azishamwali wake. Iwo angakwanisa kumuphata achimbayankhula naye. Venze vodabwisa kuti Yesu adakwanisa kumukisa Lazaro!

9, 10. (a) Ko Yesu angazitenga kuponi mphanvu zomukisira wanthu? (b) Ndawa chani nkhani za wanthu omwe adamukisiwa ni zakudikana?

⁹ Ko Yesu angamukisa wanthu na mphanvu zake? Neye. Viritene ndawa akanati kumukisa Lazaro, iye adapemphera kwa Yahova kuti amupase mphanvu zomukisira Lazaro. (Lewengani Yohane 11:41, 42.) Koma pali soti wanthu anango womwe adamukisiwa. Baibolo ichanena va mtsikana munango wa magole 12 yemwe wenze adadwala maninge. Ababa wake a Yairo, adasowa muti wophata ndawa iye wenze mwana wake m’bodzi basi ndipo adakumbira Yesu kuti amupolese. Yairo pangayankhula na Yesu wanthu anango adabwera nkumuwuza kuti: ‘Mwana wanu wamwalira! Mulekeni mpfunzisi moyu, ayi kumuboneresa.’ Pamwapo Yesu adawuza Yairo kuti: ‘Ayi kuchita mantha, undokhala  na chikhulupiriro basi ndipo mwana wako apulumusiwe.’ Pamwapo adayenda na Yairo kumuyi kwake. Padafika, Yesu adawona wanthu ankulira. Iye adawawuza kuti: ‘Nyamalani, ndawa mwana moyu alibe kufa koma wagona.’ Abereki wa mwana moyu adadabwa maninge na vomwe Yesu adalewa. Yesu adawuza wanthu enze m’nyumba kuti abule panja ndipo adatengana na abereki wa mwana nkungena kuchipinda kwadagonesa mwana. Yesu adaphata djanja ya mwana nkulewa kuti: ‘Iwe kam’tsikana, ninkuwuza iwepo, ‘muka!’’ Ndoganizani momwe abereki wake adakondwererera padawona kuti mwana wawo wamusiwa nkuyamba kufamba! (Maliko 5:22-24, 35-42; Luka 8:49-56) Kundochokera pamwapo, abereki wa mwana ule ambati akandowona mwana wawo, angakumbukiriratu vomwe Yahova adawachitira pophatisa basa Yesu. *

¹⁰ Wanthu omwe adamukisiwa na Yesu, patsogolo pake adadzafa soti. Koma nkhani za wanthu mwawa ni zakudikana ndawa zichatithandiza kukhulupirira kuti Yahova achada maninge kumukisa wakufa ndipo palibe chingamukangise.

11. Mwakubverana na lemba ya Mlaliki 9:5, ko Lazaro padafa angadziwa vingachitika?

¹¹ Baibolo ichafotokoza mwakubveka bwino kuti ‘wanthu wakufa achadziwalini chilichose.’Ndimo mwevenzere na Lazaro. (Mlaliki 9:5) Ninga momwe Yesu adanenera, venze ninge Lazaro wagona tulo. (Yohane 11:11) Panthawe yewenze m’manda, Lazaro ‘angadziwalini chinthu.’

12. Ko tinkudziwa tani kuti Lazaro adamusiwadi?

¹² Panthawe yomwe Yesu adamukisa Lazaro penze wanthu  azinji. Olo wanthu wachizondo na Yesu, adadziwambo kuti Yesu wamumukisadi Lazaro. Vimwevi vichawonesa kuti nkhani mweyi ni yazedi. (Yohane 11:47) Ndipo wanthu azinji adayenda kukamuwona Lazaro achikukhulupirira kuti Yesu adatumiziwadi na Mulungu. Wanthu omwe angazonda Yesu, alibe kukondwa navo ndipo adapangana kuti aphe Yesu pabodzi na Lazaro.​—Yohane 11:53; 12:9-11.

13. Tingatsimikize tani kuti Yahova adzamukisedi wanthu womwe adafa?

¹³ Yesu adati ‘wose omwe ali m’manda yachikumbuso adzamukisiwe.’ (Yohane 5:28) Kuthandawuza kuti wose omwe Yahova ankuwakumbukira adzamukisiwe. Koma kuti Yahova amukise munthu, achadikana kukumbukira bwino-bwino momwe munthu muyo angawonekera. Tsono Yahova angadzakwanise kukumbukira wose? Kuti tidawire, poyamba naboni tikumbukire momwe nyenyezi ziliri zowanda kudzulu. Baibolo ichati Yahova achadziwa dzina ya nyenyezi liyose. (Lewengani Yesaya 40:26.) Peno achakwanisa kukumbukira madzina ya nyenyezi zose, ndiye kuti adzashupikelini kukumbukira wanthu wose wachada kudzamukisa. Mpfundo inango yakudikana maninge ni yakuti Yahova ndiye adasika vinthu vose, ndipo anamphanvu zomukisa wanthu omwe adafa.

14, 15. Ko mawu ya Yobu yachatipfunzisa chani va kumukisiwa?

¹⁴ Yobu yemwe wenze munthu wokhulupirika, angakhulupirira kuti wakufa adzamuke. Iye adabvunza kuti: ‘Ko munthu akafa, angakhale soti na moyo?’ Ndipo adawuza Yahova kuti: ‘Imwepo mudzachemere ndipo ine nidzadawire. Mudzakhale na shungu na basa ya manja yanu.’ Mawu mwaya yakuwonesa kuti Yobu angadziwa kuti Yahova adzamukise wakufa ndipo anashungu kuti nthawe mweyi ifike.​—Yobu 14:13-15.

 ¹⁵ Ko munkubva tani mukaganizira kuti wakufa adzamukisiwe? Panango mungambadzibvunze kuti, ‘ko abale wangu na azishamwali wangu womwe adamwalira adzamukisiwembo?’ Vichatilimbikisa kudziwa kuti Yahova achada kumukisa wanthu adamwalira. Naboni tiwone vomwe Baibolo ichanena pankhani ya wanthu womwe adzamukisiwe na komwe adzakhale akadzamukisiwa.

16. Ndawa chani kumusa komwe Mulungu adzachite kudzakhale kwabwino maninge?

¹⁶ Wanthu womwe adamukisiwa kale-kale, adakhala soti na azibale na azishanwali wawo pano padziko yapasi. Ndimo mwati vidzakhalirembo na wanthu womwe Mulungu adzawamuse kutsogolo. Koma vidzakomedze maninge ndawa wanthu womwe adzamukisiwe padziko yapasi pano adzakhale na mwayi wokhala na moyo wosapera ndipo adzafelini soti. Ndipo dziko idzakhale yosiyana na dziko yomwe tinayo ntsiku zino. Nkhondo, ugananga na matenda vidzapere.

17. Ko ni mbani womwe adzamukisiwe?

¹⁷ Ko ni mbani adzamukisiwe? Yesu adati ‘wose ali m’manda yachikumbuso adzabve mawu yake ndipo adzabule.’ (Yohane 5:28, 29) Baibolo ichati: ‘Nyanja idapereka wakufa enze mumo. Nayombo manda na impfa zidapereka wakufa enze mumo.’ (Chivumbulutso 20:13) Kuthandawuza kuti mamidyawu ya wanthu adzamukisiwe. Mtumi Paulo adati kudzakhale kumusiwa kwa ‘wolungama na wosalungama.’ (Lewengani Machitidwe 24:15.) Ko wolungama na wosalungama ni mbani?

18. Ko ‘wolungama’ ni mbani womwe adzamukisiwe?

¹⁸ ‘Wolungama’ ni atumiki wokhulupirika wa  Yahova womwe adakhalako Yesu akanati kubwera padziko. Nowa, Abulahamu, Sara, Mose, Rute na Esitere, ni vitsanzo vochepa va wanthu mwawa. Imwepo mungalewenge va wanthu mwawa mu msolo 11 wa bukhu ya Aheberi. Atumiki ‘wolungama’ wa Yahova womwe ankufa ntsiku zathu zino adzamukisiwembo.

19. Ko ‘wosalungama’ ni mbani? Ko iwo adzapasiwe mwayi uponi?

 ¹⁹ ‘Wosalungama’ akuphatanidzapo mamidyawu ya wanthu womwe alibe kukhala na mwayi wakumudziwa Yahova. Yahova alibe kuwayebwa ndipo adzawamukise nkuwapasa mwayi wopfunzira va iye na kumutumikira.

20. Ko ni wanthu wati womwe adzamukisiwelini?

²⁰ Ko vimwevi vinkuthandawuza kuti wose womwe adafa adzamukisiwe? Neye. Yesu adanena kuti wanthu anango adzamukisiwelini. (Luka 12:5) Amwawa ni wanthu woyipa womwe alibe kubvuma kuchinja. Tsono ni mbani wati adzagemule kuti awa amukisiwe, awa neye? Yahova ndiye Woweruza nkulu. Koma iye adapereka kwa Yesu mphanvu ‘yoweruza wamoyo na wakufa.’​—Machitidwe 10:42; wonani mawu yakumapeto 19.

21, 22. (a) Ko womukisiwa nkuyenda kudzulu achayenda na thupi ya khaindi yanyi? (b) Ko ni mbani woyambirira kumukisiwa achiyenda kudzulu?

²¹ Baibolo ichanena kuti wanthu anango akakhale kudzulu. Munthu yemwe akakhale kudzulu achamukisiwalini na thupi ninge ya munthu. Iye achamukisiwa na thupi yawuzimu.

²² Yesu ndiye adayamba kutambira thupi ya khaindi mweyi padamukisiwa. (Yohane 3:13) Pazidapita ntsiku zitatu kuchokera pomwe Yesu adaphewa, Yahova adamumukisa. (Salimo 16:10; Machitidwe 13:34, 35) Yesu alibe kumusiwa na thupi ninge ya munthu. Mtumi Petulo adati Yesu ‘adaphewa muthupi, koma adatambira moyo wawuzimu.’  (1 Petulo 3:18) Yesu adakhala soti na moyo ninge mzimu wamphanvu! (1 Akorinto 15:3-6) Koma Baibolo ichati iye ndiyelini yekha.

23, 24. Ko ‘kagulu ka nkhosa’ ni mbani, ndipo alipo angani?

²³ Padasala pang’ono kufa, Yesu adawuza wopfunzira wake wokhulupirika kuti: ‘Ninkuyenda kukakukonzerani malo.’ (Yohane 14:2) Pamwapa angathandawuza kuti ateweri wake anango akakhale naye pabodzi kudzulu. Yesu adati amwawa ni ‘kagulu kankhosa’ ndawa ni adiki-diki. (Luka 12:32) Mtumi Yohane adawona m’masomphenya Yesu kudzulu ‘ali imirire paphiri ya ziyoni, ndipo wenze pabodzi na wokwana 144.000.’​—Chivumbulutso 14:1.

²⁴ Ko nilini pati adzamukisiwe Akhrisitu 144.000 kuti akakhale kudzulu? Kundochokera pomwe Yesu adakhala Mpfumu, iwo adayamba kumukisiwa nkuyenda kudzulu. (1 Akorinto 15:23) Yesu adakhala kale Mpfumu kudzulu, ndipo azinji wa 144.000 adafakale ndipo adamukisiwa. Womwe akanamoyo ntsiku zino, akafa achayenderatu kudzulu. Tsono nilini pati wanthu mabiliyoni yazinji adzamukisiwe kuti adzakhale mu paradaiso padziko yapasi pano? Ni kutsogolo.

25. Ko tidzapfunzire chani mu msolo wakutsogolo?

²⁵ Manje-manje Yahova adzamasule wanthu ku impfa. Impfa idzakhalekolini soti! (Lewengani Yesaya 25:8.) Ko womwe adzakhale kudzulu, ankuyenda katani? Baibolo ichanena kuti iwo akatonge pabodzi na Yesu mu Ufumu wa Mulungu. Tidzapfunzire vizinji va Ufumu moyu mu msolo wakutsogolo.