1-‏3.‏ (‏الف)‏ اَسی سارے کیہڑی قید چ آں؟‏ (‏ب)‏ یہوواہ خدا سانوں ایس قید چوں کیویں چھڈائے گا؟‏

ذرا سوچو کہ توانوں اِک ایہو جہے جُرم لئی عمرقید ہو گئی اے جیہڑ‌ا تُسی کیتا ای نئیں۔‏ توانوں ایس قید چوں نکلن دی کوئی امید نئیں۔‏ تُسی بالکل لاچار او تے توانوں اپنا مستقبل تباہ ہوندا نظر آ رہیا اے۔‏ پر ایس مایوسی چ توانوں پتہ چلدا اے کہ اِک بندہ توانوں چھڈا سکدا اے تے اوہنے تواڈی مدد کرن دا وعدہ وی کیتا اے۔‏ ایہہ جان کے توانوں کیہو جیہا محسوس ہوئے گا؟‏

² اَسی سارے موت دی قید چ آں۔‏ اَسی بھانویں جو مرضی کر لئیے،‏ اَسی ایس قید چوں نکل نئیں سکدے۔‏ پر یہوواہ خدا سانوں موت دی قید چوں چھڈا سکدا اے۔‏ اوہنے ایہہ وعدہ کیتا اے کہ اوہ آخری دُشمن یعنی موت نُوں ختم کر دَوے گا‏۔‏—‏1-‏کُرنتھیوں 15:‏26‏۔‏

³ ذرا سوچو کہ جدوں موت ختم ہو جائے گی تے توانوں کِنّاں سکون محسوس ہوئے گا۔‏ پر یہوواہ خدا صرف موت نُوں ای ختم نئیں کرے گا سگوں اوہ اوہناں لوکاں نُوں زندہ وی کرے گا جیہڑ‌ے مر گئے نیں۔‏ اوہنے وعدہ کیتا اے کہ مُردے جی اُٹھن گے۔‏ (‏یسعیاہ 26:‏19‏)‏ ایہہ جان کے کیہہ توانوں خوشی نئیں ہوندی؟‏

4.‏ (‏الف)‏ جدوں ساڈا کوئی عزیز مر جاندا اے تے سانوں تسلی کتھوں مِل سکدی اے؟‏ (‏ب)‏ یسوع مسیح دے کجھ قریبی دوست کون سن؟‏

⁴ جدوں ساڈے گھر دا کوئی جی یاں ساڈا کوئی دوست مر جاندا اے تے اَسی بوہت دُکھی ہو جانے آں۔‏ اَسی بوہت لاچار ہو جانے آں۔‏ اَسی اوہنوں زندہ کرن لئی کجھ وی نئیں کر سکدے۔‏ پر ایس مایوسی چ سانوں خدا دے کلام توں تسلی مِلدی اے۔‏ ‏(‏2-‏کُرنتھیوں 1:‏3،‏ 4 نُوں پڑھو۔‏)‏ آؤ،‏  اِک واقعے تے غور کرئیے جدے توں پتہ چلدا اے کہ یہوواہ خدا تے یسوع مسیح ساڈے مرے ہوئے عزیزاں نُوں زندہ کرن دی بڑی خواہش رکھدے نیں۔‏ جدوں یسوع مسیح زمین تے سن تے اوہ لعزر تے اوہناں دِیاں بھیناں مارتھا تے مریم نُوں مِلن اوہناں دے گھر جاندے سن۔‏ اوہناں دی یسوع مسیح نال بڑی چنگی دوستی سی۔‏ پاک کلام چ لکھیا اے کہ یسوع مارتھا،‏ مریم تے لعزر نُوں بوہت پیار کردے سن۔‏ پر فیر اِک دن لعزر فوت ہو گئے۔‏—‏یوحنا 11:‏3-‏5‏۔‏

5،‏ 6.‏ (‏الف)‏ جدوں یسوع مسیح نے لعزر دے گھر والیاں تے دوستاں نُوں روندے ویکھیا تے اوہناں نے کیہہ کیتا؟‏ (‏ب)‏ ایہہ جان کے سانوں کیہہ تسلی مِلدی اے کہ یسوع مسیح ساڈے غم نُوں محسوس کردے نیں؟‏

⁵ لعزر دی موت دا سُن کے یسوع مسیح مارتھا تے مریم نُوں تسلی دین گئے۔‏ حالے اوہ راہ چ ای سن کہ مارتھا نُوں اوہناں دے آؤن دی خبر مِل گئی تے اوہ اوہناں نُوں مِلن گئی۔‏ اوہ یسوع مسیح نُوں ویکھ کے خوش ہوئی تے اوہناں نُوں آکھن لگی کہ جے تُسی ایتھے ہوندے تے میرا وِیر نہ مردا۔‏ مارتھا دا خیال سی کہ یسوع مسیح نُوں آؤن چ دیر ہو گئی اے۔‏ ایہدے بعد یسوع مسیح نے مریم نُوں وی بوہت دُکھی تے روندے ہوئیاں ویکھیا۔‏ لعزر دے گھر والیاں تے دوستاں دے غم نُوں ویکھ کے یسوع مسیح دِیاں اَکھاں چ وی اتھرو آ گئے‏۔‏ (‏یوحنا 11:‏21،‏ 33،‏ 35‏)‏ یسوع مسیح نے اوس غم نُوں محسوس کیتا جیہڑ‌ا کسے اپنے دی موت دی وجہ توں ہوندا اے۔‏

⁶ ایہہ جان کے سانوں بڑی تسلی مِلدی اے کہ یسوع مسیح اوس غم نُوں محسوس کردے نیں جیہڑ‌ا سانوں کسے اپنے دی موت دی وجہ توں ہوندا اے۔‏ یسوع مسیح بالکل اپنے باپ وانگوں نیں۔‏ (‏یوحنا 14:‏9‏)‏ ایس توں پتہ چلدا اے کہ یہوواہ خدا وی ساڈے غم تے دُکھ نُوں محسوس کردا اے۔‏ اوہ موت نُوں ہمیشاں لئی ختم کرن دی طاقت رکھدا اے تے اوہ بوہت چھیتی اِنج کرے گا وی۔‏

7،‏ 8.‏ (‏الف)‏ مارتھا کیوں نئیں سی چاہندی کہ لعزر دی قبر توں پتھر ہٹایا جائے؟‏ (‏ب)‏ یسوع مسیح نے کیہہ کیتا؟‏

⁷ جدوں یسوع مسیح قبر تے پونچے تے اوہناں ویکھیا کہ قبر دے مونہہ تے اِک بوہت وڈا پتھر  رکھیا ہویا اے۔‏ یسوع مسیح نے کہیا کہ ایس پتھر نُوں ہٹا دیو۔‏ پر مارتھا ایہہ نئیں سی چاہندی کیونکہ لعزر دی لاش نُوں قبر چ رکھیاں چار دن ہو گئے سن۔‏ (‏یوحنا 11:‏39‏)‏ مارتھا نُوں کجھ پتہ نئیں سی کہ یسوع مسیح کیہہ کرن دا سوچ رہے نیں۔‏

⁸ یسوع مسیح نے اُچی آواز چ کہیا لعزر،‏ باہر آ جا۔‏ فیر ایہدے بعد جو کجھ ہویا،‏ اوہنوں ویکھ کے مارتھا تے مریم حیران رہ گئیاں۔‏ لعزر قبر چوں نکل آئے۔‏ اوہناں دے ہتھ پیر پٹیاں نال بنھے ہوئے سن۔‏ (‏یوحنا 11:‏43،‏ 44‏)‏ لعزر زندہ ہو گئے سن۔‏ ہُن اوہناں دے گھر والے تے دوست اوہناں نُوں چُھو سکدے سن،‏ اوہناں نُوں اپنے گلے لا سکدے سن تے اوہناں نال گل‌بات کر سکدے سن۔‏ یسوع مسیح نے لعزر نُوں زندہ کر دِتا سی۔‏ ایہہ بوہت ای شان‌دار معجزہ سی۔‏

9،‏ 10.‏ (‏الف)‏ یسوع مسیح نُوں مُردیاں نُوں زندہ کرن دی طاقت کنہے دِتی سی؟‏ (‏ب)‏ جنہاں لوکاں نُوں زندہ کیتا گیا،‏ اوہناں بارے پڑھ کے سانوں کیہہ فائدہ ہوندا اے؟‏

⁹ کیہہ یسوع مسیح نے مرے ہوئے کجھ لوکاں نُوں اپنی طاقت نال زندہ کیتا سی؟‏ نئیں۔‏ لعزر نُوں زندہ کرن توں پہلاں یسوع مسیح نے یہوواہ خدا کولوں دُعا کیتی سی تے یہوواہ خدا نے اوہناں نُوں لعزر نُوں زندہ کرن دی طاقت دِتی سی۔‏ ‏(‏یوحنا 11:‏41،‏ 42 نُوں پڑھو۔‏)‏ یسوع مسیح نے لعزر دے علاوہ ہور لوکاں نُوں وی زندہ کیتا سی۔‏ پاک کلام چ دَسیا گیا اے کہ یسوع مسیح نے 12 سالاں دی اِک کُڑی نُوں وی زندہ کیتا سی۔‏ اوہ اپنے ماں پیو دی اِکواِک دھی سی تے بوہت ای بیمار سی۔‏ اوہدے پیو دا ناں یائیر سی۔‏ یائیر اوہدی بیماری دی وجہ توں بوہت پریشان سن۔‏ اوہناں نے یسوع مسیح دی منت کیتی کہ اوہ اوہناں دی دھی نُوں ٹھیک کر دین۔‏ پر جدوں اوہ یسوع نال گل کر رہے سن تے کجھ آدمیاں نے آ کے اوہناں نُوں دَسیا کہ اوہناں دی دھی مر گئی اے ایس لئی اوہ یسوع مسیح نُوں کھیچل نہ دین۔‏ پر یسوع مسیح نے یائیر نُوں کہیا کہ پریشان نہ ہو سگوں ایمان رکھ تے تیری دھی بچ جائے گی۔‏ فیر اوہ یائیر نال اوہدے گھر گئے۔‏ جدوں اوہ گھر دے کول پونچے تے اوہناں ویکھیا کہ لوک رون‌پٹن ڈھئے نیں۔‏ اوہناں نے لوکاں نُوں کہیا کہ روو نہ،‏ کُڑی مری نئیں سگوں سُتی‌ہوئی اے۔‏  ایہہ گل سُن کے کُڑی دے ماں پیو بڑے حیران ہوئے ہون گے۔‏ فیر یسوع مسیح نے سارے لوکاں نُوں باہر جان لئی کہیا تے کُڑی دے ماں پیو نُوں لے کے اوس کمرے چ گئے جتھے کُڑی دی لاش پئی ہوئی سی۔‏ یسوع مسیح نے بڑے پیار نال کُڑی دا ہتھ پھڑیا تے کہیا،‏ کُڑئیے،‏ مَیں تینوں کہنا واں اُٹھ جا۔‏ ذرا سوچو کہ جدوں اوہ کُڑی اُٹھ کے چلن‌پھرن لگ پئی تے اوہدے ماں پیو کِنّے خوش ہوئے ہون گے۔‏ یسوع مسیح نے اوہناں دی دھی نُوں زندہ کر دِتا سی۔‏ (‏مرقس 5:‏22-‏24،‏ 35-‏42؛‏ لُوقا 8:‏49-‏56‏)‏ اوس دن دے بعد اوہ جدوں وی اپنی دھی نُوں ویکھدے ہون گے تے اوہناں نُوں اوہ شان‌دار کم یاد آؤندا ہوئے گا جیہڑ‌ا یہوواہ خدا نے یسوع مسیح دے ذریعے اوہناں لئی کیتا سی۔‏ *

¹⁰ یسوع مسیح نے جیہڑ‌ے لوکاں نُوں زندہ کیتا اوہ بعد چوں فیر مر گئے۔‏ پر ایہناں لوکاں بارے پڑھ کے سانوں بوہت ای ودھیا امید مِلدی اے۔‏ ایس توں پتہ چلدا اے کہ یہوواہ خدا مُردیاں نُوں زندہ کرنا چاہندا اے تے اوہ اِنج کرے گا وی۔‏

11.‏ واعظ 9:‏5 توں سانوں لعزر دی حالت بارے کیہہ پتہ چلدا اے؟‏

¹¹ پاک کلام چ صاف صاف دَسیا گیا اے کہ مُردے کجھ وی نئیں جان دے۔‏ مرن توں بعد لعزر دا وی ایہو ای حال سی۔‏ (‏واعظ 9:‏5‏)‏ یسوع مسیح دے مطابق لعزر دی حالت گُوڑھی نیندر سُتے ہوئے بندے ورگی سی۔‏ (‏یوحنا 11:‏11‏)‏ جدوں لعزر قبر چ سن تے اوہناں نُوں کسے گل دی ہوش نئیں سی۔‏

12.‏ سانوں کیویں پتہ اے کہ لعزر نُوں واقعی زندہ کیتا گیا سی؟‏

¹² یسوع مسیح نے بوہت سارے لوکاں دِیاں اَکھاں سامنے لعزر نُوں زندہ کیتا سی۔‏ ایس  گل توں تے یسوع مسیح دے دُشمن وی اِنکار نئیں کر سکدے سن کہ اوہناں نے اِک بوہت وڈا معجزہ کیتا اے۔‏ لعزر آپ وی ایس گل دا جیونداجاگدا ثبوت سن کہ اوہناں نُوں زندہ کیتا گیا اے۔‏ (‏یوحنا 11:‏47‏)‏ بوہت سارے لوک لعزر نُوں ویکھن وی گئے تے جدوں اوہناں نے لعزر نُوں اپنی اَکھیں ویکھیا تے اوہ ایس گل تے ایمان لے آئے کہ یسوع مسیح نُوں خدا نے گھلیا اے۔‏ یسوع مسیح دے دُشمن سڑبھج گئے تے اوہناں نے لعزر تے یسوع نُوں قتل کرن دا منصوبہ بنایا۔‏—‏یوحنا 11:‏53؛‏ 12:‏9-‏11‏۔‏

13.‏ سانوں ایہہ یقین کیوں اے کہ یہوواہ خدا مُردیاں نُوں زندہ کرے گا؟‏

¹³ یسوع مسیح نے کہیا سی کہ اوہ سارے لوک زندہ ہون گے جیہڑ‌ے قبراں وچ نیں۔‏ (‏یوحنا 5:‏28‏)‏ ایس لئی اَسی ایمان رکھ سکنے آں کہ یہوواہ خدا اوہناں سارے مرے ہوئے لوکاں نُوں زندہ کرے گا جیہڑ‌ے اوہدی یاد وچ نیں۔‏ پر کسے بندے نُوں زندہ کرن لئی ضروری اے کہ یہوواہ خدا نُوں اوہدے بارے ہر گل یاد ہوئے۔‏ کیہہ یہوواہ خدا کسے بندے بارے ہر گل یاد رکھ سکدا اے؟‏ بالکل رکھ سکدا اے۔‏ ایس کائنات چ ارباں ستارے نیں تے پاک کلام چ دَسیا گیا اے کہ یہوواہ خدا ہر ستارے دا ناں جان دا اے۔‏ ‏(‏یسعیاہ 40:‏26 نُوں پڑھو۔‏)‏ جے اوہنوں ہر ستارے دا ناں یاد اے تے فیر اوہ اوہناں لوکاں بارے ہر گل وی یاد رکھ سکدا اے جنہاں نُوں اوہ زندہ کرے گا۔‏ ایہدے علاوہ اوہ سب دا خالق اے ایس لئی اَسی یقین رکھ سکنے آں کہ اوہ مُردیاں نُوں زندہ کرن دی طاقت رکھدا اے۔‏

14،‏ 15.‏ ایوب دی گل توں سانوں مُردیاں دے زندہ ہون بارے کیہہ پتہ چلدا اے؟‏

¹⁴ خدا دے وفادار بندے ایوب دا ایمان سی کہ مُردیاں نُوں زندہ کیتا جائے گا۔‏ اوہناں نے خدا نُوں پچھیا کہ جے انسان مر جائے تے کیہہ اوہ فیر زندہ ہوئے گا؟‏ فیر اوہناں نے خدا نُوں کہیا کہ تُوں مینوں پکاریں گا تے مَیں تینوں جواب دواں گا۔‏ تینوں اپنے ہتھاں نال بنائی ہوئی شے لئی دِلی آرزو ہوئے گی۔‏ ایوب نُوں پتہ سی کہ یہوواہ خدا اوس ویلے دا اِنتظار کر رہیا اے جدوں اوہ مُردیاں نُوں زندہ کرے گا۔‏—‏ایوب 14:‏13-‏15‏۔‏

¹⁵ مُردیاں دے زندہ ہون بارے سُن کے توانوں کیہو جیہا لگدا اے؟‏ شاید تُسی سوچو کہ  کیہہ میرے اوہ عزیز وی زندہ ہون گے جیہڑ‌ے مر گئے نیں؟‏ سانوں ایس گل توں بوہت تسلی مِلدی اے کہ یہوواہ خدا مُردیاں نُوں زندہ کرنا چاہندا اے۔‏ پر سوال ایہہ وے کہ کیہڑے لوکاں نُوں زندہ کیتا جاوے گا تے اوہ کتھے رہن گے؟‏ آؤ،‏ پاک کلام چوں ایس سوال دا جواب حاصل کرئیے۔‏

16.‏ جیہڑ‌ے لوکاں نُوں زمین تے زندہ کیتا جائے گا اوہناں دی زندگی کیہو جہی ہوئے گی؟‏

¹⁶ پرانے وقتاں چ جیہڑ‌ے لوکاں نُوں زندہ کیتا گیا اوہ فیر توں اپنے رشتےداراں نال زمین تے رہن لگ پئے۔‏ مستقبل وچ وی اِنج ای ہوئے گا۔‏ اوہدوں جنہاں نُوں زندہ کیتا جائے گا اوہ فیر کدی نئیں مرن گے۔‏ زمین تے حالات وی بوہت چنگے ہون گے۔‏ اوہدوں جنگ،‏ جُرم تے بیماری بالکل نئیں ہوئے گی۔‏

17.‏ کیہڑے لوکاں نُوں زندہ کیتا جائے گا؟‏

¹⁷ کیہڑے لوکاں نُوں زندہ کیتا جائے گا؟‏ یسوع مسیح نے کہیا سی کہ اوہ سارے لوک جیہڑ‌ے قبراں وچ نیں اوہناں دی آواز سُنن گے تے نکل آؤن گے۔‏ (‏یوحنا 5:‏28،‏ 29‏)‏ مکاشفہ 20:‏13 چ لکھیا اے کہ سمندر نے اوہ مُردے رِہا کر دِتے جیہڑ‌ے اوہدے وچ سن تے موت تے قبر نے اوہ مُردے رِہا کر دِتے جیہڑ‌ے اوہناں وچ سن۔‏ واقعی،‏ ارباں لوکاں نُوں زندہ کیتا جائے گا۔‏ پولُس رسول نے وی کہیا سی کہ خدا نیک تے بُرے دونویں طرحاں دے لوکاں نُوں زندہ کرے گا۔‏ ‏(‏اعمال 24:‏15 نُوں پڑھو۔‏)‏ ایس گل دا کیہہ مطلب اے؟‏

18.‏ اعمال 24:‏15 چ جیہڑ‌ے نیک لوکاں دا ذکر کیتا گیا اے اوہناں چ کون شامل نیں؟‏

¹⁸ اعمال 24:‏15 چ جیہڑ‌ے نیک لوکاں دا ذکر کیتا گیا اے اوہناں چ کون شامل نیں؟‏ ایہناں چ یہوواہ خدا دے اوہ وفادار بندے شامل نیں جیہڑ‌ے یسوع مسیح دے زمین تے آؤن توں پہلے زمین تے رہندے سن جیویں کہ نوح،‏ ابراہام،‏ سارہ،‏ موسیٰ،‏ رُوت تے آستر وغیرہ۔‏ تُسی ایہناں چوں کجھ لوکاں بارے عبرانیوں 11 باب چ پڑھ سکدے او۔‏ ایہناں نُوں زمین تے زندہ کیتا جائے گا۔‏ یہوواہ خدا دے  جیہڑ‌ے وفادار بندے اَج کل مردے نیں اوہ وی نیک لوکاں چ شامل نیں ایس لئی اوہناں نُوں وی زندہ کیتا جائے گا۔‏

19.‏ (‏الف)‏ اعمال 24:‏15 چ جیہڑ‌ے بُرے لوکاں دا ذکر کیتا گیا اے اوہناں چ کون شامل نیں؟‏ (‏ب)‏ یہوواہ خدا ایہناں لوکاں نُوں کیہڑا موقع دَوے گا؟‏

¹⁹ اعمال 24:‏15 چ جیہڑ‌ے بُرے لوکاں دا ذکر کیتا گیا اے اوہناں چ کون شامل نیں؟‏ ایہناں  چ اوہ ارباں لوک شامل نیں جنہاں نُوں یہوواہ خدا بارے جانن دا کدی موقع ای نئیں ملیا۔‏ بھانویں کہ اوہ مر گئے نیں پر یہوواہ خدا اوہناں نُوں نئیں بُھلیا۔‏ اوہ اوہناں نُوں زندہ کرے گا تے اوہناں نُوں ایہہ موقع دَوے گا کہ اوہ اوہدے بارے سکھن تے اوہدی عبادت کرن۔‏

20.‏ اوہناں سارے لوکاں نُوں زندہ کیوں نئیں کیتا جائے گا جیہڑ‌ے مر گئے نیں؟‏

²⁰ کیہہ ایہدا مطلب ایہہ وے کہ اوہ سارے ای لوک زندہ ہون گے جیہڑ‌ے مر گئے نیں؟‏ بالکل نئیں۔‏ یسوع مسیح نے کہیا سی کہ کجھ لوکاں نُوں زندہ نئیں کیتا جائے گا۔‏ (‏لُوقا 12:‏5‏)‏ پر ایہہ فیصلہ کون کرے گا کہ کسے بندے نُوں زندہ کیتا جائے گا یاں نئیں؟‏ ایہہ فیصلہ یہوواہ خدا کرے گا۔‏ پر اوہنے یسوع مسیح نُوں وی زندہ تے مرے ہوئے لوکاں دا انصاف کرن دا اِختیار دِتا اے۔‏ (‏اعمال 10:‏42‏)‏ جیہڑ‌ے لوکاں بارے ایہہ فیصلہ ہوئے گا کہ اوہ بھیڑے سن تے اپنے آپ نُوں بدلنا نئیں چاہندے سن،‏ اوہناں نُوں زندہ نئیں کیتا جائے گا۔‏—‏کتاب دے آخر چ نکتہ نمبر 19 نُوں ویکھو۔‏

21،‏ 22.‏ (‏الف)‏ جیہڑ‌ے لوکاں نُوں اسمان تے جان لئی زندہ کیتا جاندا اے اوہناں نُوں کیہڑا جسم دِتا جاندا اے؟‏ (‏ب)‏ سب توں پہلے کِنہوں اسمان تے جان لئی زندہ کیتا گیا سی؟‏

²¹ پاک کلام چ دَسیا گیا اے کہ کجھ لوک اسمان تے رہن گے۔‏ جدوں کسے نُوں اسمان تے جان لئی زندہ کیتا جاندا اے تے اوہنوں انسانی جسم نئیں سگوں روحانی جسم دِتا جاندا اے۔‏

²² یسوع مسیح اوہ پہلے انسان سن جنہاں نُوں روحانی جسم نال زندہ کیتا گیا سی۔‏ (‏یوحنا 3:‏13‏)‏ جدوں یسوع مسیح نُوں قتل کیتا گیا تے اوہدے تِن دن بعد یہوواہ خدا نے اوہناں نُوں زندہ کر دِتا۔‏ (‏زبور 16:‏10؛‏ اعمال 13:‏34،‏ 35‏)‏ پر اوہناں نُوں انسانی جسم نئیں سی دِتا گیا۔‏ پطرس رسول نے دَسیا کہ یسوع مسیح نُوں انسان دے طور تے ماریا گیا پر روح دے طور تے زندہ کیتا گیا۔‏ (‏1-‏پطرس 3:‏18‏)‏ یسوع مسیح زندہ ہون توں بعد اِک طاقت‌ور ہستی دے طور تے روحانی جسم چ اسمان تے گئے۔‏  ‏(‏1-‏کُرنتھیوں 15:‏3-‏6‏)‏ پاک کلام چ دَسیا گیا اے کہ ہور لوکاں نُوں وی اسمان تے جان لئی یسوع مسیح وانگوں روح دے طور تے زندہ کیتا جائے گا۔‏

23،‏ 24.‏ (‏الف)‏ یسوع مسیح نے چھوٹا گلّہ کِنہاں نُوں کہیا سی؟‏ (‏ب)‏ چھوٹے گلّے چ کِنّے لوک شامل نیں؟‏

²³ یسوع مسیح نے مرن توں پہلاں اپنے وفادار شاگرداں نُوں کہیا سی کہ مَیں تواڈے لئی جگہ تیار کرن جا رہیا واں۔‏ (‏یوحنا 14:‏2‏)‏ ایہدا مطلب اے کہ یسوع مسیح دے کجھ وفادار لوکاں نُوں اوہناں دے نال اسمان تے رہن لئی زندہ کیتا جاوے گا۔‏ پر ایہہ کِنّے لوک ہون گے؟‏ یسوع مسیح نے ایہناں لوکاں نُوں چھوٹا گلّہ کہیا سی جدے توں ظاہر ہوندا اے کہ ایہناں دی تعداد بوہت تھوڑی ہوئے گی۔‏ (‏لُوقا 12:‏32‏)‏ یوحنا رسول نے دَسیا کہ ایہناں دی تعداد 1 لکھ 44 ہزار اے کیونکہ اوہناں نے اِک رُویا چ ویکھیا سی کہ یسوع مسیح اسمان تے کوہِ‌صیون تے کھلوتے ہوئے نیں تے اوہناں نال 1 لکھ 44 ہزار لوک نیں۔‏—‏مکاشفہ 14:‏1‏۔‏

²⁴ پر 1 لکھ 44 ہزار لوکاں نُوں کدوں زندہ کیتا جانا سی؟‏ پاک کلام توں پتہ چلدا اے کہ ایہناں نُوں اوہدوں زندہ کیتا جانا سی جدوں یسوع مسیح نے اسمان تے حکمرانی شروع کرنی سی۔‏ (‏1-‏کُرنتھیوں 15:‏23‏)‏ اَج اَسی اوس دَور چ رہ رہے آں جدوں یسوع مسیح حکمرانی کر رہے نیں تے 1 لکھ 44 ہزار وچوں بوہت سارے لوک زندہ ہو کے اسمان تے جا چُکے نیں۔‏ باقی جیہڑ‌ے حالے زمین تے نیں،‏ اوہناں چوں جدوں کوئی مردا اے تے اوہنوں اسمان تے جان لئی فوراً زندہ کر دِتا جاندا اے۔‏ پر ایہناں دے علاوہ دُوجے انسان جیہڑ‌ے مردے نیں،‏ اوہناں نُوں مستقبل چ زندہ کیتا جائے گا تاکہ اوہ عدن وانگوں سوہنی زمین تے ہمیشاں تک زندہ رہن‏۔‏

25.‏ اگلے باب چ اَسی کدے بارے سکھاں گے؟‏

²⁵ بوہت چھیتی یہوواہ خدا انساناں نُوں موت دی قید چوں چھڈائے گا۔‏ فیر موت ہمیشاں لئی ختم ہو جائے گی۔‏ ‏(‏یسعیاہ 25:‏8 نُوں پڑھو۔‏)‏ پر جیہڑ‌ے لوک اسمان تے جاندے نیں،‏ اوہ اوتھے کیہہ کرن گے؟‏ پاک کلام چ دَسیا گیا اے کہ اوہ اوتھے یسوع مسیح نال رَل کے بادشاہی کرن گے‏۔‏ اگلے باب چ اَسی ایس بادشاہی بارے سکھاں گے۔‏