1-3. Dahme salihedi kitail koaros? Ia duwen Siohwa eh pahn ketin kasaledengkitailla?

MEDEWEHLA me ke ale kalokepen dihp ehu me kaidehn kowe me wiahda oh ke pahn selikihdi erein omw mour nan imweteng. Uhdahn ke sohte pahn kak pedoisang nan imweteng. Mwomwen sohte omw koapworopwor en ahnsou kohkohdo, oh sohte mehkot me ke kak wiahiong. Ahpw mwurinte eh sohla douluhl omw koapworopwor, ah ke diarada me mie emen me ahneki manaman en kasaledekeiukala oh e inoukihda me e pahn seweseiuk! Ia pahn omw pepehm?

² Kitail koaros sensel pahn manaman en mehla. Sohte lipilipil dahme kitail kin wia, kitail sohte kak pitsang. Ahpw Siohwa ketin sapwellimanki manaman en kasaledengkitailsang mehla. Oh e ketin inoukihda me “imwintihti me pahn lohdi keieu mwuhr, iei mehla.”​—1 Korint 15:26.

³ Medewehla uwen omw pahn nsenamwahula pwe ke solahr anahne pwunodki mehla! Ahpw Siohwa sohte pahn ihte ketikihsang mehla. E pahn pil ketin kapwurehdo irail me melahr ong mour. Medewehla wehwehn met ong uhk. E ketin inoukihda me irail kan “me melahr” pahn pwurehng mourda. (Aiseia 26:19) Ih met me Paipel kin kahdaneki kaiasada.

4. (a) Dahme kak kansenamwahwihkitailla ni ahnsou me emen tohn atail peneinei de kompoakepatail men mehla? (b) Ia ekei kompoakepahn Sises keren kan?

⁴ Ahnsou me emen tohn atail peneinei de kompoakepatail keren men mehla, kitail kin sohla kakohng medek oh pahtou me kitail mi loale. Kitail pehm me sohte sawaspatail. Sohte mehkot kitail kak wia pwehn kapwurehdo aramaso ong mour. Ahpw Paipel kin kansenamwahwihkitailla. (Wadek 2 Korint 1:3, 4.) Kitail pahn tehkpene ehu karasepe me kasalehda uwen Siohwa oh Sises ara ketin kupwurki kapwuredohng mour kompoakepatail kan me melahr. Ni Sises eh ketiket nin sampah, e kin kalapw mwemweitla rehn Lasarus oh rie lih ko, Marda oh Mery. Irail meh silimen pwukat koaros wia kompoakepahn Sises mwahu kei. Paipel mahsanih: “Sises kin ketin loalloale Marda, oh rie lih, oh pil Lasarus.” Eri ehu rahno Lasarus mehla.—Sohn 11:3-5.

5, 6. (a) Dahme Sises ketin wia ni ahnsou me e ketin mahsanihada ahn Lasarus peneinei oh kompoakepah kan ar wie sengiseng? (b) Dahme kahrehda e kansenamwahu en ese sapwellimen Sises pepehm me pid mehla?

⁵ Sises ketila pwehn kansenamwahwihala Marda oh Mery. Ni ahnsou me Marda rongada me Sises ketiket kohla rehra, e kohieila likin kahnimwo pwehn tuhwong. E perenkihda eh kilang Sises, ahpw e patohwanohng: “Ma komw ketikette met, riei ohlo sohte pahn mehla.” Marda medewe me Sises nohn pwand. Mwurin mwo, Sises  ketin mahsanihada Mery eh wie sengiseng. Ni eh ketin mahsanihada uwen ara nsensuwed, e ketin kupwurohkihla oh ketin tentenihr. (Sohn 11:21, 33, 35) E ketin pehm medek laud me kin kohsang mehlahn emen me kitail kin poakohng.

⁶ En ese me Sises kin ketin sapwellimanki soangen pepehmohte me kitail ahneki duwen mehla kin kansenamwahwihkitailla. Oh Sises ketin duwehte Semeo. (Sohn 14:9) Siohwa ketin sapwellimanki manaman en ketikihsang douluhl mehla, oh ihme e pahn ketin wia ni ahnsou keren.

7, 8. Dahme kahrehda Marda sohte men ren kihsang takaio ni ahn Lasarus sousowo? Ahpw dahme Sises ketin wia?

⁷ Ni Sises eh ketin lella ni sousou en Lasarus wasa me paliwereo nekinekdi ie, lapalahn takai ehu me pwaindi ewen pwoaren paipo. Sises mahsanih: “Kumwail pwekasang takaien!” Ahpw Marda sohte men ren pwekasang. Paliweren Lasarus mihmihkiher nan sousowo erein rahn pahieu. (Sohn 11:39) Marda sehse dahme Sises pahn nektehn wia pwehn sewese rie ohlo.

⁸ Sises ketin mahsanihong Lasarus: “Pedoido!” Dahme Marda oh Mery kilang mwurin mwo uhdahn kapwuriamwei. “Ohl melahro ahpw pedoido, peh oh neh kan kidikidkipene likoun nan sousou.” (Sohn 11:43, 44) Lasarus pwurehng mourda! E pwurehng patehng eh peneinei oh kompoakepah  kan. Re kak pwoalehdi, sair, oh lokaiahiong. Manaman kapwuriamwei ehu met! Sises ketin kaiasada Lasarus.

9, 10. (a) Ihs me ketikihong Sises manaman en kaiasada aramas? (b) Dahme kahrehda koasoipen irail kan me iasada kesempwal ong kitail?

⁹ Ia duwe, Sises ketin doadoahngki pein eh manaman pwehn kaiasada aramas? Soh. Mwohn eh ketin kaiasada Lasarus, Sises ketin kapakapohng Siohwa, oh Siohwa ketikihong manaman en kaiasada Lasarus. (Wadek Sohn 11:41, 42.) Kaidehn Lasarus kelehpw me iasada. Paipel padahkihong kitail duwen serepein men me sounpar 12 me uhdahn soumwahu laud. Eh pahpa, Sairus, uhdahn tihwohla, oh peki rehn Sises en ketin kamwahwihala serepeino. Ihte nah serien mwo. Nindoken eh patopatohwanohng Sises, ohl ekei ahpw pwarodo oh padahkihong: “Noumwi serepeino melahr; komw dehr kedirapwahki Sounpadahken.” Ahpw Sises ketin mahsanihong Sairus: “Komw dehr perki mehkot. Komw pwosonte, e ahpw pahn mourda.” Ih eri ketin iang Sairus kohla ni imweo. Ni ara kerenlahng ihmwo, Sises ketin mahsanihada oh kapaidoke ngilen aramas kan ar wie sengiseng. Sises ketin mahsanihong irail: “Kumwail dehr seng, pwe serepeinet sohte mehla, e memeir!” Ele eh pahpa oh nohno mwur medewe laud wehwehn sapwellimen Sises mahseno. Sises eri ketin peki koaros en  pedoila, ih eri ketin ukehda semen serepeino oh ine ketilong nan pere me serepeino wonohn ieo. Sises ahpw ketikihda pehn serepeino ni keneinei oh mahsanihong: “Serepein, pwourda!” Medewehla peren en eh pahpa oh nohno ni ahnsowo me serepeino mwadangete pwourda oh tepida alialuseli! Sises ketin kaiasada neira serepeino. (Mark 5:22-24, 35-42; Luk 8:49-56) Sang rahno kohla, ni ahnsou me re kin kilang kisin serepeino, re kin tamanda dahme Siohwa ketin wiahiong irail ni eh ketin doadoahngki Sises. *

¹⁰ Irail ako me Sises ketin kaiasada pwurehng mehla. Ahpw dahme kitail kin wadek duwen irail aramas pwukat uhdahn kesempwal pwehki e kin kihong kitail koapworopwor mehlel. Siohwa ketin kupwurki kaiasada aramas, oh ihme e pahn ketin wia.

11. Dahme Eklesiasdes 9:5 padahkihong kitail me pid Lasarus?

¹¹ Ni sansal Paipel mahsanih me “me melahr akan sohte ese mehkot.” Met mehlel me pid duwen Lasarus. (Eklesiasdes 9:5) Duwehte dahme Sises ketin mahsanih, e duwehte me Lasarus wie memeir. (Sohn 11:11) Ni Lasarus eh mihmi nan sousowo, e sohte “ese mehkot.”

12. Ia duwen atail ese me kaiasadahn Lasarus uhdahn wiawi?

 ¹² Aramas tohto iang kilang ni ahnsou me Sises ketin kaiasada Lasarus. Pil sapwellime imwintihti kan ese duwen manaman kapwuriamwei wet me e ketin wiahda. Lasarus momour, oh met kadehdehda me kaiasada uhdahn wiawi. (Sohn 11:47) Pil, aramas tohto mwemweitla rehn Lasarus, oh imwikihla irail tepida kamehlele me Koht me ketin poaronehdo Sises. Sapwellimen Sises imwintihti kan sohte perenki met kahrehda irail koasoanehdi en kemehla Sises oh Lasarus.​—Sohn 11:53; 12:9-11.

13. Dahme kahrehda kitail kak kamehlele me Siohwa pahn ketin kaiasada me melahr akan?

¹³ Sises ketin mahsanih me “irail koaros me mihmi nan sousou kan” pahn iasada. (Sohn 5:28) Met wehwehki irail koaros me Siohwa kin ketin tamataman pahn pwurehng mourda. Ahpw pwe Siohwa en ketin kaiasada emen, e anahne tamataman soahng koaros duwen aramaso. Ia duwe, e uhdahn kak ketin wia met? Nna medewe, mie usu lik kei me mi pahnlahng. Paipel mahsanih me Siohwa ketin mwahngih ehuehu eden usu pwukat koaros. (Wadek Aiseia 40:26.) Ma e kak ketin tamataman eden ehuehu usu pwukat, eri e uhdahn pahn ketin mengeiki en tamataman soahng koaros me pid duwen irail akan me e pahn ketin kaiasada. Kesempwal sang met, Siohwa me ketin kapikada soahng koaros, kahrehda kitail ese me e ketin sapwellimanki manaman en kaiasada aramas akan.

14, 15. Dahme ahn Sohp koasoi kan padahkihong kitail duwen kaiasada?

 ¹⁴ Ohl lelepek Sohp kamehlele kaiasada. E kalelapak: “Ma aramas emen pahn mehla, e kak pwurehng mourda?” Ih eri patohwanohng Siohwa: “Komw pahn ketin malipe ie, I ahpw pahn patohwan sapeng, komw ahpw pahn kupwurperenkiniehda, wiepen nin limomwiet.” Ei, Sohp ese me Siohwa ketin kupwurperenki ahnsou ehu me e pahn ketin kaiasada me melahr akan.​—Sohp 14:13-15.

¹⁵ Ia duwen koapworopwor en kaiasada eh kamwakid uhk? Ele ke pahn medemedewe: ‘Ia duwen ei peneinei oh kompoakepahi kan me melahr, irail pahn pil iang kaiasada? E kin kansenamwahu ong kitail en ese me Siohwa uhdahn ketin kupwurki kapwurehdo me melahr akan ong mour. Kitail pahn kilang dahme Paipel mahsanih duwen ia wasa me re pahn kousoan ie oh ihs me pahn iang iasada.

16. Soangen mour dah me irail akan me pahn iasadahng mour nin sampah pahn perenki?

¹⁶ Mahso, irail ako me iasada pwurehng patehng arail peneinei oh kompoakparail kan nin sampah. Met pahn pil wiawi ni ahnsou kohkohdo, ahpw e uhdahn pahn mwahusang met. Dahme kahrehda? Pwehki irail ako me pahn iasadahng mour nin sampah pahn ahneki koapworopwor en mour kohkohlahte oh sohla pwurehng mehla. Oh irail pahn momour nin sampah ehu me weksang douluhl  sampah me kitail mi loale rahnwet. Sohte pahn mie mahwen, sohte tiahk en mwersuwed, oh sohte soumwahu.

17. Ihs me pahn iasada?

¹⁷ Ihs me pahn iasada? Sises mahsanih me “irail koaros me mihmi nan sousou kan pahn rong kapitie,  oh re pahn pedoisang nan arail sousou kan.” (Sohn 5:28, 29) Oh Kaudiahl 20:13 padahkihong kitail: “Madau eri kapehda me melahr akan. Mehla oh wasahn me melahr akan pil kapehda me melahr akan me ira kolokol.” Ei, aramas lik kei pahn pwurehng mourda. Wahnpoaron Pohl pil koasoia me koaros “me mwahu oh suwed” pahn iasada. (Wadek Wiewia 24:15.) Ia wehwehn met?

18. Ihs “me mwahu” kan me pahn iasada?

¹⁸ “Me mwahu” kan kin iangahki sapwellimen Siohwa ladu lelepek kan me momour mwohn Sises eh ketidihdo nin sampah. Irail pwukat me duwehte Noha, Eipraam, Sara, Moses, Rud, oh Ester pahn iasadahng mour nin sampah. Ke kak wadek duwen ekei irail ohl oh lih pwukat nan Ipru irelaud 11. Ia duwen sapwellimen Siohwa ladu lelepek kan me melahr nan atail ahnsou? Irail pil “me mwahu” kan, eri irail pahn iasada.

19. Ihs me “suwed” kan? Soangen ahnsou mwahu dah me Siohwa pahn ketikihong irail?

¹⁹ Me “suwed” kan kin iangahki aramas lik kei me sohte ahneki ahnsou mwahu en ese Siohwa. Mendahki irail melahr, Siohwa sohte ketin manokeirailla. E pahn ketin kaiasada irail, oh irail pahn ahneki ahnsou mwahu en sukuhlki duwen ih oh papah ih.

20. Dahme kahrehda kaidehn aramas koaros pahn iasada?

²⁰ Ia duwe, met wehwehki me irail koaros me melahr pahn iasada? Soh. Sises mahsanih me ekei aramas sohte pahn iang iasadahng mour.  (Luk 12:5) Ihs me pahn pilada ma aramas emen pahn iang iasada de soh? Siohwa iei Sounkopwung lapalapo, ahpw e pil ketikihong Sises manaman “en wia sounkopwung en me momour oh me melahr akan.” (Wiewia 10:42) Mehmen me ale kadeik nin duwen aramas suwed men oh sohte men wekila, e sohte pahn iang iasada.​—Menlau kilang Ire kan 19.

21, 22. (a) Ia wehwehn en iasada nanleng? (b) Ihs tepin aramas me iasadahng mour nanleng?

²¹ Paipel pil padahkihong kitail me ekei aramas pahn mour nanleng. Ni ahnsou me emen pahn iasada nanleng, e sohte iasadahng mour nin duwen aramas emen me ahneki paliwar uduk ehu. E iasadahng mour nanleng nin duwen ngehn emen.

²² Sises iei tepin aramas me wia soangen iasada wet. (Sohn 3:13) Siohwa ketin kaiasada Sises rahn siluh mwurin eh kamakamala. (Melkahka 16:10; Wiewia 13:34, 35) Sises sohte ketin iasada nin duwen paliwar en aramas. Wahnpoaron Piter kawehwehda me Sises “ketin pwoula ni paliwar uduk, e ahpw ketin iasada nin duwen ngehn emen.” (1 Piter 3:18, NW) Sises ketin iasadahng mour nin duwen ngehn manaman emen! (1 Korint 15:3-6) Ahpw Paipel mahsanih me kaidehn ih kelehpw.

23, 24. Ihs irail “kisin pwihn sihpw” ko me Sises ketin mahsanih duwe, oh irail meh depe?

²³ Mwohnte eh ketin pwoula, Sises ketin mahsanihong  sapwellime tohnpadahk lelepek ko: “I pahn kohla oh kaunopadahng kumwail deumwail.” (Sohn 14:2) Met wehwehki me ekei sapwellime tohnpadahk kan pahn iasada pwehn iang ih mour nanleng. Meh depe? Sises ketin mahsanih me “kisin pwihn sihpw” malaulau kei. (Luk 12:32) Wahnpoaron Sohn koasoia uwen tohtohn irail ni eh kilangada Sises “ketiket pohn dohlen Saion [nanleng]; oh aramas lopw pahnen pahkid me iang ket wasao.”​—Kaudiahl 14:1.

²⁴ Iahd me irail Kristian 144,000 pwukat pahn iasada? Paipel mahsanihong kitail me met pahn wiawi mwurin Krais eh ketin tepida kakaun sang nanleng. (1 Korint 15:23) Met kitail momour nan ahnsowo, oh pali laud en irail meh 144,000 ko iasadahr nanleng. Irail ako me mihmihte nin sampah oh mehla nan atail ahnsou pahn iasada ahnsowohte nanleng. Ahpw, pali moron en aramas akan pahn iasadahng mour ni ahnsou kohkohdo nan Paradais nin sampah.

25. Dahme kitail pahn sukuhlki nan irelaud en mwurin met?

²⁵ Ni ahnsou keren, Siohwa pahn ketin kasaledekla aramas koaros sang mehla oh mehla pahn sohla kohkohlahte! (Wadek Aiseia 25:8.) Ahpw dahme irail ako me kohla nanleng pahn wia? Paipel kawehwehda me irail pahn iang Sises kakaun nan koperment en Wehio. Kitail pahn kalaudehla atail sukuhlki duwen koperment wet nan irelaud en mwurin met.