1-3. a) Túcuy, ¿ima enemigu apíysh? b) ¿Imaina Jehová ckeshpíchiaj ’ríysh?

 PÉNSAY si ckam huanchinaas únay unáypaj condenascka canqui, pero ckam chayta mana ’ruaranqui. Mana suyana apinqui ckeshpiscka canayquípaj. Y creenqui túcuy chincascka tiasckanta, y mana atinqui imátap ’ruayta. Pero creeptiyqui mana suyanát apisckayquita, enteracunqui pillapas ckeshpichisuyta munan y comprometecun yanapásoj ’risckanta. ¿Imaina senticunquiman?

² Túcuy condenasckas huañúypaj tiáysh. Mana importas imát ’ruaycu mana huañúypaj, mana ckeshpiyta atíysh. Pero Tata Yaya Jehová atiyta apin huañuymanta ckeshpichiáyshpaj. Huáñuy suj enemigu can y Tata Yaya prometera huañuyuan únay unáypaj puchúcaj ’risckanta (1 Corintios 15:26).

³ ¡Pénsay ancha súmaj caj ’rin ni pipas astaan huañuptin! Jehová manalla huañuyta sórckoj ’rin, manapé causachiconcka picunasta huañorancu. Jehová prometeáysh picunasta huañusckas tiancu cutis cáusaj ’rincu (Isaías 26:19). Cayta Biblia huajyan resurrección. Pénsay imaina cay ckamta yanapasun.

4. a) Áicap suj aillu o yanasu huañun, ¿maypi consuelo tariyta atíysh? b) ¿Picunas carancu huaquin Jíshup yanasusnin?

⁴ Áicap suj familiamanta o suj aillu, o suj yanasu  ima munáysh huañun, ashcát llaquichiáysh y usúysh. Mana fuersasníyoj senticúysh y ancha mana alli. Mana imátap ’ruayta atíysh chá persunát causachíypaj. Pero Biblia consuelo ckoáysh (2 Corintios 1:3, 4 léey). Pensayta atíysh suj ejemplupi maypi ckaachiáysh Jehová y Jishu aicát desiancu cutis causachicuyta picunasta huañorancu. Jishu Ashpapi cáusaj captin ashca cutis Lasarút y ñañasninta, Marta y Mariát visitácoj ’rej cara. Quimsaynin Jíshup ancha alli yanasusnin carancu. Biblia nin: «Jishu Martát, ñañanta y Lasarút ancha munácoj cara» (Juan 11:3-5). Suj punchau Lásaru huañora.

5, 6. a) Jishu, ¿imát ’ruara ckaacus Lasárup yanasusninta y familianta huackas? b) ¿Imaina yanapaáysh yachayta Jishu sentisckanta pillapas huañuptin?

⁵ Jishu Martát y Mariát consoláypaj ’rera. Marta enteracus Jishu amushcasckanta ciudarman, payman ’rera. Pay ancha cusiscka tiara Jishút ckaas, pay nipora: «Señor si ckam caypi tianquiman cara túray mana huáñoj ’rera». Marta pensara Jishu ancha tarde chayasckanta. Jishu ckaara Mariát huackas tiasckanta. Ckaas yanasusninta y aillusninta huackashcasckancunata paypas llaquicora y huackara (Juan 11:21, 33, 35). Ckaara ashcát nanasckanta chincayta huañuypi suj persuna ancha munasckayshta.

⁶ Yachayta Jishu quiquin nockáysh senticun pillapas huañuptin, nockáyshpaj suj consuelo can. Jishu quiquin Tatan huañuyta chejnin (Juan 14:9). Jehová atiyta apin unáypaj huañuyuan puchucáypaj, y chayta mana unas ’rúaj ’rin.

7, 8. a) ¿Imajchus Marta mana munara ’rumít sorckonancunata Lasárup sepulturanmanta? b) ¿Imát Jishu ’ruara?

⁷ Áicap Jishu ’rera sepulturaman maypi Lasárup cuerpunta churarancu, sepultúrap puncun suj atun ’rumian uyshckascka tiara. Jishu nera: «’Rumít ckechuychis». Pero Marta mana munara sorckonancunata. Lasárup cuerpun sepulturapi na taa punchaus tiasa cara (Juan 11:39). Marta mana yachara, Jishu ’rúaj ’risckanta turanta yanapáypaj.

⁸ Rumít sorckorancu y Jishu Lasarút nipora: «Llójsiy». Marta y María mana creeyta aterancu ckaashcasckancunata. «Ckari ima huañuscka tiasa cara, maquisnin, chaquisnin, y uyan vendasuan huatascka y leascka llojsera» (Juan 11:43, 44). ¡Lásaru causachiscka casa cara! Cutis familianuan, yanasusninuan tantanacora. Aterancu abrasayta, chamckayta y payuan ’rimayta. ¡Suj atun milagru! Jishu Lasarút causachisa cara.

9, 10. a) ¿Pichus Jishút atiyta ckora huañusckasta causachicunánpaj? b) ¿Imajchus nockáyshpaj resurrección ashca valor apin?

⁹ ¿Nerachu Jishu paypa atiyninuan gentét causachisckanta? Mana. Manáraj pay Lasarút causachis, Jehovát orapora, y Jehová atiyta ckora Lasarút causachinánpaj (Juan 11:41, 42 léey). Mana Lasarullát causayman voliachera *. Biblia ’rimaáysh suj sipitas 12 huatasmanta ancha onckoscka tiara. Tatan Jairo  huajyascka, pay sujlla sipitas apera. Mana yachas imát ’ruayta, Jishút rogapus mañara huaanta ampinanta. Pay Jishuan ’rimas tiaptin, huaquin ckaris ckemicorancu y niporancu: «¡Sipitayqui huañora! ¿Ímaj yachachejta na molestayta?» Jishu Jairót nipora: «Ama manchacuychu, fe apinayqui tían». Chaymantá cuscas Jáirop huasinman ’rerancu. Na chayashcaptin Jáirop huasinpi Jishu ckaara y uyarera gente huackaptin. Jishu nipucora: «¿Imajchus [...] huackanquísh? Sipitas mana huañora, manapé puñun». Tatan y maman deberancu tapunacuyta Jishu imatásh niyta munara. Jishu mañacora túcuy tiajcunata huasi ucunpi aaman llojsichuncu y pusara tatanta y mamanta ucuman maypi sipitas sirera. Pay cuidauan maquinmanta apis, nipora: «Sipitas, nisuni: ¡Atáriy!» ¡Pénsay imaina tatasnin deberancu cusicuyta áicap pay chayllapi atarera y ckallarera puriyta! ¡Jishu Jáirop huaanta causachisa cara! (Marcos 5:22-24, 35-42). Chá punchaumantapacha sipasnincuta ckaas yuyancuman Jishu paycunaraycu ’ruasckanta Jehóvap yanapanuan.

¹⁰ Chá persunas ima Jishu causachicora huatas chaymanta huañorancu. Yachayta Jishu ’ruasckanta chá persunasraycu suyanát ckoáysh chayraycu ashca valor apin. Aseguraáysh Jehová huañusckasta causachicuyta munan, y dejuro ’ruancka.

11. Eclesiastés 9:5, ¿imát Lasarumanta yachachiáysh?

¹¹ Biblia nin «pero huañusckas, paycuna mana imátap yachancu» (Eclesiastés 9:5). Lásaru ni imátap  yachara sepulturapi tias. Chayna imaina Jishu nera, cara imainásh si Lásaru puñushcara (Juan 11:11).

12. ¿Imaina yacháysh ciertu casckanta Lásaru causachiscka casckanta?

¹² Ashca persunas ckaarancu, áicap Jishu Lasarút causachisckanta. Jíshup enemigusninpas yacharancu pay chá milagru ’ruasckant cara. Lásaru causascka tiara, y chay ckaachera resurrección cierto casckanta (Juan 11:47). Nátaj, ashca persunas Lasarút visítaj ’rerancu, chaypi, ckallarerancu creeyta Tata Yaya Jishút cachasa cara. Jíshup enemigusninta mana gustapucora, chayraycu tramarancu Jishút y Lasarút huanchicuyta (Juan 11:53; 12:9-11).

13. ¿Imajchus segurus tiayta atíysh Jehová huañusckasta causachícoj ’risckanta?

¹³ Jishu nera «túcuy sepulturaspi tiajcuna» cáusaj ’rincu (Juan 5:28). Cay niyta munan túcuy chackaycuna ima Jehóvap yuyayninpi tiancu causayman voliachiconcka. Pero Jehová pillatapas causachinánpaj, yuyanan tían túcuy imaina chá persuna cara. ¿Atinchu chayta ’ruayta? Cielopi ancha ashca, ashca estrellas tían. Biblia nin Jehová sapa estréllap sutinta yachan (Isaías 40:26 léey). Pay yuyayta atispá sapa estréllap sutinta, dejuro atencka yuyayta facilidaruan túcuy imaina carancu chackaycunát causachícoj ’risckanta. Nátaj, Jehová tucuyta ’ruara, chayraycu atiyta apin persunasta cutis causachicunánpaj.

14, 15. ¿Imát yachachiáysh Job nisckanta resurrecciunmanta?

¹⁴ Job resurrecciunpi créej cara. Pay tapora: «Suj ckari huañuspá, ¿cutis causayta atin?». Chaymanta Jehovát nipora: «Ckam huájyaj ’rinqui y nocka contestásoj ’rini. Maquisniyqui ’ruasckanta anchát desianqui». Ari Job yachara Jehová suyashcan momentu chayachun huañusckasta causachinánpaj (Job 14:13-15).

 ¹⁵ ¿Imaina yanapasun suyana resurrecciunmanta? Ckam tapunacuyta atinqui: «¿Imát sucédej ’rin yanasusniyuan y familiayuan ima na huañorancu, causajchu ’rincu?» Cusicúysh yachas cierto casckanta Jehová huañusckasta causachicuyta munan. Ckaasúysh Biblia nisckanta maypi causanckancu y picunas cáusaj ’rincu.

16. ¿Ima laya cáusay apenckancu cay Ashpapi picunas causachisckas caj ’rincu?

¹⁶ Ñaupapi, picunas causachisckas carancu tantanacorancu familiasnincuan, yanasusnincuan caypi Ashpapi. Quiquin sucédej ’rin ámoj pachapi, pero astaan súmaj caj ’rin. ¿Ímaj? Picunas causachisckas caj ’rincu caypi Ashpapi únay unáypaj cáusaj ’rincu ni aicappas huáñoj ’rincu. Cáusay mana cunan punchau ina caj ’rin. Mana astaan guerras ni ónckoy tiancka, ni huanchinaconckancu.

17. ¿Picunas cáusaj ’rincu?

¹⁷ ¿Picunas cáusaj ’rincu? Jishu nera: «Túcuy sepulturaspi tiajcuna ’rimapucuptin uyárej ’rincu y llojsenckancu» (Juan 5:28, 29). Y Revelación [Apocalipsis] 20:13 niáysh: «Y mar huañusckasta entregara ima chaypi tiarancu, y huáñuy y Hades entregarancu huañusckas ima chaypi tiarancu». Hades sepultura can. Ari, ancha ashca ashca persunas huañusckas cutis cáusaj ’rincu. Apóstul Pablu nerapas «justusta imaina injustusta» causachisckas caj ’rincu (Hechos 24:15 léey). ¿Imát niyta munara?

18. ¿Picunas «justus» cancu cáusaj ’rincu?

¹⁸ «Justus» cancu siervos fieles Jehovamanta ima  causarancu manáraj Jishu Ashpaman amuptin. Persunas Noé ina, Abraham, Sara, Moisés, Rut y Ester causachisckas caj ’rincu causanancunápaj caypi Ashpapi. Ckam paycunamanta leeyta atinqui Hebreospi capítulo 11. ¿Ima sucédej ’rin Jehóvap siervus fielesninuan ima punchausniyshpi huañuncu? Paycunapas «justus» cancu chayraycu causachisckas caj ’rincu.

19. a) ¿Picunas cancu «injustus»? b) ¿Ima oportunidar Jehová ckócoj ’rin?

 ¹⁹ «Injustus» cancu chackaycuna ancha ashca ashca personas mana oportunidar aperancu Jehovát ’rejsiyta. Aunque paycuna huañorancu, Jehová paycunamanta mana ckonckacun. Pay causachiconcka, y oportunidar apenckancu Jehovamanta aprendeyta y payta siruipuyta.

20. ¿Picunas mana causachisckas caj ’rincu?

²⁰ ¿Cay niyta munan túcuy ima na huañorancu cutis cáusaj ’rincu? Mana. Jishu nera mana túcuy persunas cáusaj ’rincu (Lucas 12:5; Ckáay Astaan yacháypaj 19, paginapi 215). ¿Picunas mana causachisckas caj ’rincu? Túcuy persuna mana allis y mana cambiayta munarancu. ¿Pichus decídej ’rin si suj persuna causachiscka caj ’rin o mana? Jehová can jues pay decídej ’rin, pero Jishutapas autoridarta ckora «Jues canánpaj causasckasmanta y huañusckasmanta» (Hechos 10:42).

21, 22. a) ¿Ima cúerpu apenckancu picunas cielopi cáusaj ’rincu? b) ¿Pít cara huámaj persona ima causachiscka cara cielopi causanánpaj?

²¹ Bibliapas niáysh huaquin persunas cielopi cáusaj ’rincu. Áicap pillapas causachiscka can cielopi causanánpaj mana causachiscka can suj humanu ina. Manapé suj cúerpu espiritualuan mana tullu ni aicha ápej ’rin.

²² Jishu cara huámaj persona causachiscka cielopi causanánpaj (Juan 3:13). Jishu huañusckanmanta quimsa punchaus chaymanta, Jehová causachera. Jishu mana causachiscka cara suj cúerpu humanu ina (Salmo 16:10; Hechos 13:34, 35). Apóstul Pilu nin  Jishu «aichanpi huañuscka cara, pero espíritu ina causachiscka» (1 Pedro 3:18). ¡Jishu cutis causayman voliacora suj persona espiritual ina! (1 Corintios 15:3-6). Pero Biblia nin mana paylla canman.

23, 24. ¿Picunas cancu «utula rebañu» ima Jishu ’riman, y aicas caj ’rincu?

²³ Manáraj huañus Jishu fieles discipulusninta nipucora: «suj lugar ckamcunápaj prepáraj ’rini» (Juan 14:2). Chay niyta munan huaquin discipulusnin causachisckas cancuman payuan cielopi causanancunápaj. ¿Aicas? Jishu nera mana ashcas cancuman, suj «utula rebañu» (Lucas 12:32). Apóstul Juanchu nera aicas cancuman, áicap Jishút ckaara, «sayascka sacha Sionpi [celestial], y payuan 144.000» (Revelación 14:1).

²⁴ ¿Aicapchus 144.000 cristianus ungisckas causachisckas caj ’rincu? Biblia niáysh cay caj ’rin Jishu ckallariptin gobernayta cielopi chaymanta (1 Corintios 15:23). Chá momentupi causashcáysh y ashca cá ungidusmanta na causachisckas carancu y cielopi tiancu. Picunas punchausniyshpi Ashpapi causasckaslla tiancu, y huañuptincu chayllapi causachisckas caj ’rincu cieloman ’rinancunápaj. Pero ancha ashca ashca persunas ámoj pachapi causayman voliaconcka causanancunápaj caypi Ashpapi suj jardín ina ’ruascka.

25. ¿Ámoj capitulopi imát aprendesúysh?

²⁵ Mana unas, Jehová túcuy persunasta huañuymanta ckeshpichencka, ¡huáñuy ni aicappas astaan cancka! (Isaías 25:8 léey). Pero ¿imát ’rúaj ’rincu cielopi picunas chayman ’rincu? Biblia nin Jishuan Reinunpi gobérnaj ’rincu. Ámoj capitulopi astaan apréndej ’ríysh cá gobiernumanta.