1-3. a) ¿Imamanda mana lugaryana ushanchi? b) ¿Imara ruranga Jehová Dios lugaryachingaj?

IYARI, canda mana imaras rurashcamanda caudsayachinun chiraigu intiru causai carcelbi pasangaraungui. Mana ima huras llucshina ushangui. Tucui ña pirdirishca sintiringui. Can imaras mana ruranara ushangui. Shinajllaira ña tucui pirdirishca sintirijpi, shu runa yanapasha canda llucchina munan. ¿Imasnara sintiringuima?

² Tucui ñucanchi huañuimanda carcelbi tiauj cuinta anchi. Chiraigumanda mana pis lugaryana ushanchichu. Shina ajpis Jehová Dios ñucanchira lugaryachingaj ushanmi. ¿Imara rurangaraun? Pai rimaca huañui tucuchishca anga (1 Corintios 15:26).

³ ¿Can iyarina ushangui imasnara sintirishun huañui tucurichishca ajpi? Jehová Dios mana huañuillara tucuchingachu. Pai huañushcaunara huañuimanda llushpichingami. Jehová Dios huañushcaunara cutillara causachingaraun, pai nin “huañushcauna causanungami” (Isaías 26:19). Caitami Bibliaga nin causarina. Cambahua shu gustu iyarinami an.

4. a) Shu aillu o amigo huañujpi ¿maibi cushiyachinara tupanchi? b) ¿Piguna Jesús ali amigoguna anuca?

⁴ Shu aillu o amigo huañujpi shungu ucui  llaquillami sintirinchi. Chi runara cutillara causachingaj, mana imaras rurana ushashcaraigu llaqui sintirinchi. Shinajpi Biblia rimashcara cierto pacha cushiyachinmi (leapai 2 Corintios 1:​3, 4). Ricushun shu ejemplo yachangaj Jehová Jesuspas cutillara ñucanchi llaquishcaunaras causachingahua munanun. Jesús cai Allpai ashcai catinlla pasiaj aca Lazarora paihua paniuna Marta Mariaras. Quinsandi Jesushua ali amigoguna anuca. Biblia nin: “Jesús Martaras, paihua ñañaras, Lazaroras llaquicami” (Juan 11:​3-5). Shinajpi shu punzha Lázaro huañuca.

5, 6. a) Jesús, Lázaro ailluunara amigogunaras huacaushcara ricusha ¿imasnara sintirica? b) ¿Imarasha Jesús nanaira sintirishcara yachasha, ñucanchira cushiyachin?

⁵ Jesús, Martara Mariaras cushiyachingaj rica. Marta Jesús ña llacta mayambi pactamungaraushcara uyasha tupangaj rica. Jesusta ricusha cushiyaca, shinajpi paita nica: “Can caibi tiaushca ajpi, ñuca turi mana huañunmachu aca”. Marta iyaca Jesús ña mana imaras rurana ushashcara. Chi huasha Jesús Mariara huacaujta ricuca. Astaumbas Lázaro ailluuna amigogunas huacaushcara ricusha paihua shungüi ashca llaquirisha, huacacami (Juan 11:​21, 33, 35). Jesús ashca nanai sintirica, imasna ñucanchi sintirinchi llaquishca aillu huañujpi.

⁶ Jesús nanaira sintirishcara yachasha, cushiyachinmi. Caita yachachin Jesús paihua Yayahuas huañuira chijninunmi (Juan 14:9). Shina ajpis Jehová huañuira tucuchingaj ushaira charinmi, astaumbas ñallami tucuchinga.

7, 8. a) ¿Imarasha Marta mana munacachu Lázaro pambashca puistumanda rumira anzhuchichu? b) Jesús ¿ima milagrora rurarca?

⁷ Jesús Lázaro pambashca puistuma rica. Icuna pungu atun rumihua tapashca aca. Shina ajpi Jesús nica: “Rumira anzhuchichi”. Martaga mana munacachu rumira anzhuchichu Lázaro ña chuscu punzha huañushca tiashcaraigu (Juan 11:39). Marta mana yachacachu, Jesús Lazarora ima rurangaraushcara.

⁸ Jesús Lazarora nica: “Pajllama llucshi”. Marta Mariahua mana ima huras ricushcara ricunucami: “Huañushca runa llucshicami, maquindi chaquindi llachapahua huatashca, ñahuis llachapahua pillushca” (Juan 11:​43, 44). Lázaro cutillara causaricami. Cutillara paihua ailluunahua amigogunahuas causaca. Tucuiguna paita llangana, ujllarina, rimana ushanuca. ¡Amallaulla! ima milagro. Jesús Lazarora causachicami.

9, 10. a) ¿Pita Jesusta ushaira cuca huañushcaunara causachingahua? b) ¿Imasnara causarinamanda cuintashcauna ñucanchira yanapan?

⁹ ¿Pita Jesusta ushaira cuca huañushcaunara causachingaj? Lazarora manara causachishcallaira Jesusga Jehová Diosta mañaca. Shina ajpi Jehová, Jesusta causachina ushaira cucami Lazarora causachingaj (leapai Juan 11:​41, 42). Lazarolla mana causaricachu. *  Biblia riman shu malta huahuamanda 12 huatayuj ashca ungurishca aca. Paihua yaya Jairo mas huahuaras mana charicachu. Jairo ashca turbarishca asha Jesusta paihua ushushira aliyachu mañaca. Jesushua rimaujllaira shu runaunas pactamusha Jairora ninuca: “Camba ushushi ña huañushcami ¿imarasha Yachachijta yanga mulistangui?”. Shinajpi Jesús nica: “Ama manzharichu. Quirilla”. Chi huasha Jairo pariju huasima rinuca. Huasima pactaushcai Jesús runauna turbarisha huacaushcara ricuca. Jesús nica: “¿Imarasha [...] huacaunguichi? Huahua mana huañushcachu, puñunllami”. Ushushihua yayauna Jesús rimashcara mana intindinucachu. Huasha Jesús mañaca tucuigunara rinuchu, yayaunara paihua huahua tiaushcai pushaca. Jesús huahuara maquimanda alinlla apisha rimacami: “Ushushihua, atari nini”. Iyari chi yayauna yapa cushi ashcara, paihua ushushi atarisha puringaj callarijpi ricusha. Jesús chi huahuara causachicami (Marcos 5:​22-24, 35-42). Jairo paihua huarmindi caran cuti ushushira ricushaga, iyarinungami Jehová imara rurashcara Jesús yanapaihua.

¹⁰ Jesús causachishca runauna cutillara huañunucami. Shinajpi causarinamanda cuintashcauna ashca yanapan ñucanchira shu gustu chapanara charingaj. Astaumbas ricunchi Jehová Dios huañushcaunara causachingaraun.

11. Eclesiastés 9:5 nishca cuinta Lázaro huañushcai ¿imara tucuca?

¹¹ Bibliaga riman huañushcauna “imaras mana yachanun” (Eclesiastés 9:5). Casnami Lázaro tucuca.  Pambashca tucushcai mana yachacachu imara tucuca paihua rayaibi. Jesús rimashca cuinta Lázaro puñushca cuinta aca (Juan 11:11).

12. ¿Imasnara yachanchi Lázaro cierto pacha causarishcara?

¹² Ashca runauna Jesús Lazarora causachishcara ricunuca. Jesusta chijnijcunas yachanucami pai chi milagrora rurashcara. Lázaro causarishcara mana pis mana pasashca cuinta rimana ushanucachu, pai causaricami (Juan 11:47). Shinallara ashca runaunas Lazarora ricungaj risha Dios, Jesusta cachamushcara quiringaj callarinuca. Chiraigu Jesusta chijnijcuna mana munanucachu, Jesusta Lazaroras huañuchingahua puruntunuca (Juan 11:53; 12:​9-11).

13. ¿Imarasha quirina ushanchi Jehová Dios huañushcaunara causachingaraun?

¹³ Jehová tucuira rurarcami, chiraigu huañushcaunara causachingaj ushaira charinmi. Jesús nica “tucui pambariajcuna” causarinungami (Juan 5:28). Caita ricuchin tucui huañushcauna Jehová Dios iyaibi ajcuna causarinungami, chi runauna imasna ajta iyarina an. ¿ Jehová chita rurangaj ushanzhu? Caita iyari, mundui ashca huaranga huaranga estrellaguna tianmi, Jehová Dios tucui paiguna shutiunara yachanmi (leapai Isaías 40:26). Jehová Dios estrellagunaj shutiunara mana cungarinzhu, chiraigu huañushcaunara imasna ajta causachingahua tucuira iyaringa.

14, 15. ¿Imara yachachin Job causarinamanda rimashcara?

¹⁴ Shu Diosta sirvij pasashca punzhaunai causaj Job nishca causarinai quirishcami. Pai tapucami: “Shu runa huañujpi, ¿cutillara causana ushangachu?”. Shinajpi Jehová Diosta nica: “Can cayasha, ñucallara  cutipashami. Camba maquihua rurashcaunamanda llaquina sintiringui”. Caita yachachin Jehová Dios huañushcaunara causachingahua munanmi (Job 14:​13-15).

¹⁵ ¿Imasnara sintiringui causarinai iyarisha? Cushimi sintirinchi Jehová Dios huañushcaunara causachingaj yachashcamanda. Tapurishcanguichari: “¿Imara tucunga ñucanchi huañushca ailluunahua, amigogunahuas? ¿Causarinungachu?”. Ricushun Bibliai pigunara causarinunga, maibi causanunga.

16. ¿Imasnara cutillara causarijcunas cai Allpai causanunga?

¹⁶ Pasashca punzhaunai causarishca runaunas paihua ailluunahuas, amigogunahuas cai Allpai tandarinuca. Shinallara shamuj punzhaunais pasanga, mas gustu causana anga. ¿Imasnara? Punda, cutillara causarijcunas huiñaigama cai Allpai causana ushanunga. Huasha, cai Allpaga cuna tiaushca cuinta mana angachu. Guerraguna, manali rashcauna, ungüigunas illangami.

17. ¿Pigunara causarinunga?

¹⁷ ¿Pigunara causarinunga? Jesús rimaca: “Tucui pambariajcuna paihua shimira uyanaungami” (Juan 5:​28, 29). Bibliaga nin: “Lamar yacu paihuajpi tiaj huañushcaunara cuca. Huañuis, ucu pachas [o pambariaushcai] paigunajpi tiaj huañushcaunaras cunauca” (Ricuchina 20:13). Huañushcauna pambana lugarbi anun. Huaranga huaranga runaunas causarinungami. Apóstol Pablo nica “imasna huañushcauna causarinaungami, aliunas, manaliunas” (leapai Rashcauna 24:15). ¿Imara nisha nica Pablo?

18. ¿Pigunara anun “aliunas” causarimungaraujcuna?

 ¹⁸ ¿Pigunara anun “aliunas”? Jehová Diosta sirvijcuna anun, Jesús Allpama manara shamujllaira causajcuna. Paiguna cai Allpai causarinunga. Huaquinguna anun Noé, Abrahán, Sara, Moisés, Ruth, Ester. Hebreos libroi capítulo 11​pimi cai cariunamandas, huarmiunamandas riman. Shinajpi ¿imara  tucunga Jesusta catijcuna ñucanchi punzhaunai huañusha? Paigunas “aliunas” anun, causarinungami.

19. a) ¿Pigunara anun “manaliunas”? b) Paigunaga ¿imara rurana ushanunga?

¹⁹ ¿Pigunara anun “manaliunas”? Huaranga huaranga Jehová Diosta mana ricsishcamanda manalira rurajcuna anun. Huañushca ashas, Jehová Dios paigunara mana cungarishcachu. Pai paigunara causachingami, paita ricsina, paihua sirvijcuna tucungaj ushanunga.

20. ¿Pigunara mana causarinunga?

²⁰ ¿Tucui huañushcauna causarinungachu? Mana. Jesús nica huaquin runaunas mana causarinungachu (Lucas 12:5; nota 19 ricungui). ¿Pigunara mana causarinunga? Tucui manalira rurajcuna turcaringahua mana munajcunas. ¿Pita ningairi maican runa causaringa o mana? Jehová mas Atun Taripajmi. Shinallara Jesusta mandanara cushca “causajcunaras huañushcaunaras Taripaj tucungaj” (Rashcauna 10:42).

21, 22. a) Ahua pachai ¿ima tunu aichai causarinun? b) ¿Pita aca ñaupa punda ahua pachai causachishca?

²¹ Biblia nin huaquin runauna ahua pachai causanungami. Chi runauna, runa tunu aichai mana causarinungachu, chi randimanda espíritu sami causana aichai causarinungami.

²² Jesús ahua pachai ñaupa punda causachishca aca (Juan 3:13). Jehová Dios quinsa punzha huañushca huasha Jesusta causachisha, runa tunu aichai mana causachica (Salmo 16:10; Rashcauna 13:​34, 35). Apóstol Pedro yachachicami Jesús “aichai huañuca, astaumbas ispiritui causachishca aca” (1 Pedro 3:18).  Jesús ursayuj espíritu cuinta causaricami (1 Corintios 15:​3-6). Bibliaga mana ninzhu Jesusllami causarishca.

23, 24. a) ¿Pigunara anun Jesús rimashca “ichilla muntun runauna”? b) ¿Masna anun chi “ichilla muntun runauna”?

²³ Jesús manara huañujllaira, paita catijcunara nica: “Ñuca cangunajta tianara alichingaj riunimi” (Juan 14:2). Caita yachachin huaquin Jesusta catijcuna ahua pachai paihua pariju tiangaj causarinunga. Jesús nica paiguna shu “ichilla muntun runauna” tucunungami ansalla ashcaraigu (Lucas 12:32). Apóstol Juan shu ricuchinai masna ashcara yachaca, Jesusta “Sión urcui shayajta ricucani. Paihua pariju shu patsaj chuscu chunga chuscu huaranga runauna tianauca” nisha (Ricuchina 14:1).

²⁴ ¿Ima huras 144.000 Jesusta catijcuna causarinunga? Bibliaga nin Cristo ahua pachai mandangaj callarishca huasha causarinungami (1 Corintios 15:23). Jesús ña mandaunmi ahua pachai ñaca tucui 144.000 causarinushca, paihua pariju tianun. Shinajpi chi Jesusta catijcunamanda huaquinguna chara cai Allpai tianun. Paiguna huañushca huasha, chi ratullaibi ahua pachai causarinun. Shinajpi ashca runaunas shamuj punzhaunai cutillara causarinunga cai Paraíso Allpai huiñaigama causangahua.

25. Shamuj temai ¿imara yachashun?

²⁵ Ñallami Jehová Dios tucuigunaras huañuimanda quishpichinga, huañuiga ña mana tiangachu (leapai Isaías 25:8). Shinajpi ¿imara ruranunga ahua pachai chi 144.000 runauna? Bibliaga intindichin Jesushua pariju mandanungami. Shamuj temai cai gobiernomanda mas yachashun.