1-3. a) ¿Imata ñucanchitaca shuj carcelpi cuenda charin? b) Jehová Diosca ¿imatata ruragrijun?

YUYAPAI, yangata juchachishpa carcelpi churajpi nunca na llujshina cashcanguiman. Nimata na rurai ushashpa llaquilla tiajujpi, na yashcapi pipash quiquinda carcelmanda llujchingapaj shamujpica ¿nacha ninanda cushijunguiman?

² Yangata juchachishpa carcelpi churashca cuendami tucuicunallata shuj punllaca huañuna canchi. Imata rurajushpapash huañuimandaca na salvarita ushanchichu. Shinapash Jehová Diosca huañuimanda salvangapaj ushaita charinmi. Chaimandami nin: “Tucuripi tucuchi tucuna fiñajca [o contraca] huañuimi” can nishpa (1 Corintios 15:26).

³ Yuyapai, ima horapash ñana huañunata yachashpaca ¿nacha cushijunguiman? Jehová Diosca huañuita tucuchishca jahuapash, huañushcacunata causachingami. ¿Picunatata causachinga? Jehová Diosca ninmi, tucui huañushcacunami causaringa nishpa (Isaías 26:19).

4. a) Pipash huañujpi llaquilla cajpica ¿imata ñucanchitaca ayudan? b) ¿Picunata Jesuspa ashtahuan ali amigocuna carca?

⁴ Ñucanchi familiamanda o shuj rijsi amigo huañujpica huacashpa, imata ruraitapash na atinanchichu. Shina llaquilla cajpica Bibliami ñucanchitaca cushilla tranquilo  sintirichun ayudan (2 Corintios 1:3, 4, liipangui). Jehovapash, Jesuspash ñucanchi huañushca familiacunataca causachingami. Shuj ejemplota ricushun, Jesús cai Alpapi cashpaca Lázaro runaguta, paipa panicunatapash cutin cutin ricugrin carca. Quimsandimi Jesuspa ashtahuan ali amigocuna carca. Chaimandami Bibliapica nin: ‘Martata, paipa ñañata, Lazarotapash Jesusca ninandami juyarca’ nishpa (Juan 11:3-5).

5, 6. a) Lazaropa familia huacajujta ricushpaca ¿imashinata Jesusca sintirirca? b) Jesuspash ñucanchishna llaquirijta yachashpaca ¿imashinata sintirinchi?

⁵ Lázaro runagu huañujpi Marta, Mariapash llaquilla cajpimi Jesusca ricungapaj rirca. Jesús shamujujta uyashpaca Martaca Jesusta tuparingapami llujshirca. Jesusta ricushpaca Martaca ninanda cushijushpami cashna nirca: “Jesús, can cai llactapi cajpica, ñuca turiguca na huañunmanllu carca” nishpa. Martaca yashcangami imamandashi Jesusca na ucha shamurca nishpa. Jesusca Lazaropa caishuj pani María huacajujta ricushpami shungupi ninanda llaquirishpa paipash huacarca (Juan 11:21, 33, 35). Shinaca pipash huañujpi, gentecuna imashina sufrijtaca Jesusca alimi yachan.

⁶ Pipash huañujpi Jesuspash llaquilla sintirishcata yachashpaca ñucanchica cushilla, tranquilomi sintirinchi. Jesuspash, Jehová Diospash pipash huañuchunga na munanllu (Juan 14:9). Jehová Diosca huañuita tucuchingapaj ushaita charinmi. Ñallami huañuitaca tucuchinga.

7, 8. a) Martaca ¿imamandata rumita na suchuchichun munarca? b) ¿Imatata Jesusca rurarca?

⁷ Lazarota pambashca utujuman Jesús chayashpaca chai “rumita suchuchipaichi” nircami. Shinapash Martaca chai rumita suchuchichunga na munarcachu. Lazarota pambashcamandaca ñami “chuscu punlla” yalishca, ashnajungami  nircami (Juan 11:39). Lazarota Jesús causachigrijujtaca Martaca na yacharcachu.

⁸ Jesusca cashnami shinllita caparirca: “Lázaro, chaimanda Ilujshimui” nishpa. Martapash, Mariapash manllarishca ricunajujpimi “huañushca Lázaro runaguca maquindi, chaquindi pillushca llujshimurca” (Juan 11:43, 44). Shinami Lázaro runaguca huañuimanda causarishpa cutin paipa familiahuan, amigocunahuan carca. Tucuicunami Lazarota ugllashpa paihuan parlanajurca. Jesusmi shuj milagrota rurashpa Lazarotaca causachirca.

9, 10. a) Huañushcacunata causachichunga ¿pita Jesusmanga poderta curca? b) Chaicunata Bibliapi liinaca ¿imashinata ayudan?

⁹ Jesusca na paipa munaica huañushcacunataca causachircachu. Lazarota causachingapaca Jehovatami mañarca. Jehovami Lazarota causachichunga Jesusman poderta curca (Juan 11:41, 42, liipangui). Bibliapica, Lazarotalla causachishcataca na nijunllu. Jairopa ushi 12 huatata charishpa ungüihuan huañujpi causachishcatapashmi parlan. Chai cuitsaguca paipa shujlla ushimi carca. Chaimandami Jairoca imata ruraitapash na atinashpa Jesustaca ñuca ushiguta jambipai nirca. Shina nijujpillatami shuj jaricuna shamushpaca nirca: “Yachachijtaca, ¿imapajta yanga yanga fiñachijungui? cambaj ushiguca, ñamari huañurca” nishpa. Chaimi Jesusca Jairotaca nirca: “Ama manllaichu” fetami charina cangui, canba ushica causaringami nishpa. Shinami Jesusca, Jairopa huasiman chayarca. Ña huasiman chayajushpaca gentecuna huacanajujtami uyarca. Chaimandami Jesusca nirca: ‘¿Imashpata cangunaca huacanajunguichi? Cuitsaguca na huañushcachu, puñuitallami puñujun’ nishpa. Shina nijta uyashpaca cuitsagupa taitamamacunaca, Jesús imata ningapaj munajtaca na intindishcangachu.  Chaimi Jesusca cuitsagupa taitamamahuan cuitsagu sirijuj cuartoman yaicurca. Chaipimi cuitsagupa maquita alilla japishpa cashna nirca: ‘Cuitsagu, jatari ninimi’ nishpa. Shina nijpimi cuitsaguca jatarishpa puri callarirca. Chaita ricushpaca cuitsagupa taitamamacunaca ninandami cushijushcanga (Marcos 5:22-24, 35-42). Jesusman Jehová poderta cujpi paicunapa ushita causachishcataca nunca na cungashcangachu. *

¹⁰ Jesús causachishca gentecunaca jipamanga huañurcami. Chaicunata liishpaca, ñucanchipash chaita crichunmi ayudan. Jehová Diosca huañushcacunata causachingapachami.

11. Huañushcacunamandaca ¿imatata Eclesiastés 9:5​pica nijun?

¹¹ Bibliapica ninmi: “Huañushcacunaca imatapash na yachanllu” nishpa. Shinaca Lázaro huañushpaca imatapash na sintishcangachu (Eclesiastés 9:5). Jesús nishca shinaca, Lázaro huañushpaca huañuita puñujuj cuendami carca (Juan 11:11). Lázaro huañushpaca ‘imatapash na yacharcachu’.

12. ¿Imashinata yachanchi Lazarota ciertopacha causachishcata?

¹² Lázaro huañujpi Jesús causachishcataca ashtaca gentecunami ricurca. Jesusta na ricunayachij gentecunapashmi chai milagrota ricurca. Lazarota causachishpami, huañushcacunata causachinaca ciertopacha cashcata ricuchirca (Juan 11:47). Lazarota causachishcata ricungapaca ashtaca gentecunami rirca. Shinami Jesustaca Taita Dios cachamushcata cri callarirca.  Shinapash  Jesusta  na ricunayachij gentecunaca, nimamanda nalicachinajurcachu. Chaimandami Lazarota, Jesustapash huañuchingapaj munarca (Juan 11:53; 12:9-11).

13. Huañushcacunata Jehová causachinataca ¿imamandata crina capanchi?

¹³ Jesusca nircami: “Huañushpa pambai tucushcacunaca tucuillami” causaringa nishpa (Juan 5:28). Shinaca, Jehovapa yuyaipi cajcunaca tucuillacunami causaringa. Jehová Dios huañushcacunata causachingapaca tucuitami paicunamandaca yarina can. ¿Huañushcacunamanda tucuita yari ushangacha? Bibliapica ninmi, Jehová Diosca ashtaca ashtaca millón estrellacunatapash cada unotami shutipi rijsin nishpa (Isaías 40:26, liipangui). Shinaca tucui estrellacunata shutipi yarishpaca, gentecunata causachingapaj imatapash yarinaca Jehovapaca na shinllichu canga. Tucuita Ruraj Dios cashcamandaca gentecunata causachingapaj poderta charinmi.

14, 15. Job runaguca ¿imatata nirca? ¿Imatata yachajunchi?

¹⁴ Jehovata ali sirvij Job runagupash huañushcacuna causarinataca crircami. Chaimandami tapurca: “¿Runa huañushpaca, cutin causaringachu?” nishpa. Shinallata nircami: “Can cayajpimi tigrachisha. Chaipica, cambaj maquihuan rurashcataca juyanguimi” nishpa. Jehová Dios huañushcacunata shuj punlla causachinataca Job runaguca alimi yacharca (Job 14:13-15).

¹⁵ Jehová Dios huañushcacunata causachinata yachashpaca ¿imashinata sintiringui? ¿Ñuca amigocuna, ñuca familiacunapash causaringacha? nishpa tapuringuichari. Jehová Dios huañushcacunata shuj punlla causachinata yachashpaca ninandami cushijunchi. Shinaca huañushcacunata causachijpi paicuna maipi causanata, picunalla causarinata Bibliapi ricushun.

16. Cai Alpapi causachi tucushcacunaca ¿imashinata causanga?

¹⁶ Punda tiempopi huañushcacunata causachijpica cai Alpapillatami paicunapa familiacunahuan, amigocunahuan tandanajurca. Shamuj punllacunapi huañushcacuna causarinaca ashtahuan alimi canga. ¿Imamandata ashtahuan ali canga? Huañushcacunata causachijpica para siempre causana oportunidadtami charinga. Shinallata cunan punllacunahuan ricujpica, shamuj punllacunapica juyailla ali causaimi tianga. Chai punllacunapica guerracuna, nali ruraicuna, ungüicunapash ñana tiangachu.

17. ¿Picunatata causachinga?

¹⁷ ¿Picunatata causachinga? Jesusca nircami: Tucui “huañushpa pambai tucushcacunaca, tucuillami ñuca rimajta uyanga” nishpa (Juan 5:28, 29). Apocalipsis 20:13​pica ninmi: “Mama cuchapashmi, chaipi huañushcacuna tiashcataca tigrachirca. Huañuipash, Hades nishcapash, paicunapi huañushcacuna tiashcataca tigrachircami” nishpa. Shinaca ashtaca millón gentecunami causachishca canga. Apóstol Pabloca nircami: ‘Imatapash cashcatapacha rurajcuna, imatapash cashcatapacha na rurajcuna huañushcacunatapashmi’ causachinga nishpa (Hechos 24:15, liipangui). Caimandaca ¿imatata yachajunchi?

18. ¿Picunata “imatapash cashcatapacha rurajcuna” o justocuna can?

¹⁸ Jesús cai Alpaman nara shamujpillatami Noé, Abrahán, Sara, Moisés, Rut, Ester, paicuna shina shuj gentecunapash “imatapash cashcatapacha rurajcuna” o “justo” gentecuna carca. Paicunaca cai Alpapi causangapami causachishca canga. Hebreos capítulo 11​pimi paicunamanda ashtahuan ricuita ushangui. Cunanbi “imatapash cashcatapacha rurajcuna” o justo gentecuna huañushcata Jehová Diosmi causachinga.

19. a) ¿“Imatapash cashcatapacha na rurajcuna” o injustocunaca picunata can? b) Jehová Diosca ¿ima oportunidadtata cunga?

 ¹⁹ Ashtaca millón gentecunaca Jehovata na rijsishpami huañushca. Paicunaca “imatapash cashcatapacha na rurajcuna” o injustocunami can. Jehová Diosca paicunata na cungashcachu. Chaimandami huañuimanda causachishpa paita rijsichun, sirvichun oportunidadta cunga.

20. ¿Tucuilla huañushcacunachu causachishca canga?

²⁰ ¿Tucuilla huañushcacunachu causachishca canga? Jesusca nircami, huaquin gentecunaca na causaringachu nishpa (Lucas 12:5). Picunatalla causachinata o na causachinataca Jehová Diosllami yachan. Shinapash Jesustami juez cachun churashca. Paimi causajcunata, huañushcacunatapash juzganga (Hechos 10:42). Pipash na cazushpa, na cambiangapaj munashpa huañushcataca Jehová Diosca na causachingachu. (Página 216​pi nota 19​ta ricupangui.)

21, 22. a) Cieloman ringapaj causachishcacunaca ¿imashina cuerpohuanda causaringa? b) ¿Pitata pundapi cieloman richun causachirca?

²¹ Bibliapica ninmi, huaquingunaca jahua cielopi causangapami causachi tucunga nishpa. Jahua cieloman rijcunaca na ñucanchishna cuerpohuanga causaringachu. Cielopi causangapaca shuj espíritu shinami causaringa.

²² Jesustami cielopi causachun pundapica causachirca (Juan 3:13). Jesús huañushcamanda quimsa punlla jipami Jehová Diosca causachirca (Salmo 16:10; Hechos 13:34, 35). Aichayu, tulluyu cuerpohuanga na causachircachu. Apóstol Pedroca nircami: Jesusca ‘aichapi huañushca cashpapash, espiritupimi causachi tucurca’ nishpa (1 Pedro 3:18). Chaimandami Jesusca ushaita charij espíritu shina causarirca (1 Corintios 15:3-6). Bibliapica  ninmi, shuj gentecunapash jahua cieloman ringapaj causachishcami canga nishpa.

23, 24. Ashalla llamagucuna nishpaca ¿picunamandata parlajun? Ashalla llamagucunaca ¿mashnacunata can?

²³ Jesusca huañuna cashcata yachashpami paipa catijcunamanga cashna nirca: “Canguna chaipi causachun alichingapajmi rigrijuni” nishpa (Juan 14:2). Shina nishpaca paita catijcunamanda huaquingunaca cielopi causangapaj causachishca canatami nijurca. ¿Mashnacunata cielopica causanga? Jesusca nircami: ‘Ñucapa ashalla llamagucunami’ cielopi causanga nishpa (Lucas 12:32). Apóstol Juanga nircami: “Sión shuti urcu jahuapi Llama shayajujta ñapash ricurcani. Paihuanga, patsaj chuscu chunga chuscu huaranga [144 mil] gentecunami chaipi carca” nishpa. Shinami jahua cieloman mashnacuna rinata villarca (Apocalipsis 14:1).

²⁴ Jesusta catijcunamanda 144 milcunaca ¿ima horata causachishca canga? Bibliapica ninmi, Jesús jahua cielopi mandai callarishca jipami chaica pactaringa nishpa (1 Corintios 15:23). Cunanmi ña chai punllacunapi causanajunchi. Cunanbica cai 144 mil puracunamandaca huaquingunallami cai Alpapi causanajun. Paicunaca, huañushcandimi jahua cielopi causangapaj causaringa. Shinapash ashtaca ashtaca gentecunaca cai Alpa shuj juyailla paraíso tucujpi chaipi causangapami causaringa.

25. Shamuj capitulopica ¿imatata yachajugrinchi?

²⁵ Jehová Diosca ñallami huañuitaca tucuchinga, chaica ni pipash ñana huañunga (Isaías 25:8, liipangui). Shinapash jahua cielopi causangapaj rijcunaca ¿imatashi ruranga? Bibliapica ninmi, paicunaca Diospa Reinopimi Jesushuan mandanajunga nishpa. Shamuj capitulopimi chai Reinomandaca ashtahuan yachajushun.