1-3. a) Imamandata mana quishpirina ushanchi. b) Jehovaga lugaryachingahua imatata ranga.

YUYAI, canda yangamanda carcelma huiñai cachanaunma. Carcelmanda mana ima uraspas llucshina ushashcamanda yapa llaquiringuima. Llaquirisha tiyaushcaibi cungaimanda shuc runa carcelmanda surcusha yanapasha nicpiga imasata sintiringuima.

² Carcelbi aushca shina, tucuiguna huañuimanda mana quishpirina ushanchichu. Huañuimanda quishpiringahua mana imatas rana ushanchichu. Chasna ashahuas Jehova huañuimanda quishpichina ushai tucunchimi. Jehovaga imasata pai nishcata pactachinga. Paiga “tucui piñaccunata binsisha [...] huañuita” tucuchingami (1 Corintios 15:26).

³ Huañuita Jehova Dios tucuchicpiga tucuigunami cushiyashun. Jehovaga huañuita tucuchishca huasha huañushcagunata causachinga. Chimandami, Bibliaga nin: “huañushcaguna causaringaunami” nisha (Isaias 26:19). Huañushcaguna causaringaraushca canda imasata yanapan.

4. a) Ñucanchi aillu o amigo huañucpi mana yapacta llaquiringahua ima ranata yanapai tucushun. b) Pigunata Jesuspa ali amigoguna anaura.

⁴ Ñucanchi aillu o amigo huañucpiga manacaillatachu llaquirinchi. Huañushca runata mana  causachina ushasha llaquirinchi. Chasna ashahuas, Biblia nishcata yachashami cushiyanchi (2 Corintios 1:​3, 4 leipai). Jehova y Jesus ñucanchi aillugunata, amigogunata cuti causachina munanaun. Por ejemplo, Jesus Allpai aushcaibiga, Lazarota, paiba pani Martata, Mariatas caran uras pasiac ara. Quimsandi Jesuspa ali amigo anaura. Bibliaga nin: ‘Jesusca Martata, Mariata, Lazarotahuas yapa llaquicʼ mara (Juan 11:​3-5). Chasna acpihuas, Lazaroga cungaimanda huañura.

5, 6. a) Lazarohua ailluguna, amigoguna huacashcata ricusha Jesusca imasata sintirira. b) Jesus llaquirishcata ricusha imata yachanchi.

⁵ Jesusca Martata, Mariata ricungahua rira. Jesus shamucta yachasha Martaga paita tupangahua rira. Paiga Jesusta ricusha yapata cushiyara. Chasna ashahuas nirami: “Can cai aushca acpiga ñuca turiga mana huañupanmachara”. Martaga Jesus yanga rishcata yuyara. Chi huasha, Jesus Maria huacashcata ricura. Lazarohua ailluguna, amigoguna huacashcata ricusha “paihua shungu ucuibi ashcata” llaquirisha huacara (Juan 11:​21, 33, 35). Ñucanchi llaquishca aillu o amigo huañucpi shungüibi nanarinchi. Chasnallatami Jesuspas sintirira.

⁶ Runa huañucpi Jesus imasa sintirishcata yachasha, cungailla sintirinchi. Runaguna huañunata Jehova y Jesus mana munashcata yachanchi (Juan 14:​9). Chimandahuas, Jehovaga huañuita tucuchina ushaita charin. Nallami huañuita huiñai tucuchingaraun.

7, 8. a) Martaga imaraicuta pambashca uctumanda rumita mana anchuchina munara. b) Jesusca imatata rara.

⁷ Jesusca Lazarota pambashcama rira. Pambashca  uctu pungutaga atun rumihuan tapashca mara. Chasna acpi Jesus nira: “Rumita anchuchichi”. Lazaro chuscu punzhata huañushca acpimi, Martaga rumita anchuchinata mana munara (Juan 11:39). Martaga Jesus Lazarota causachingaraushcata mana yacharachu.

⁸ Rumita anchuchishca huasha, Jesus casna nisha caparira: “Lazaro chimanda llucshi”. Chi huasha Marta y Mariaga: ‘Huañushca runa, paihua maqui chaqui pillushca llucshimuctaʼ ricunaura (Juan 11:​43, 44). Chasnami Lazaroga cuti causarira. Paiba aillugunahuan, amigogunahuan cuti anata ushara. Tucuigunami apisha, ugllarisha, paihuan cuintanacunata ushanaura. Jesusca milagrota rasha Lazarota causachira.

9, 10. a) Jesustaga pita huañushcagunata causachina ushaita cura. b) Huañushcaguna causarishcaga imangahuata yanapai tucunchi.

⁹ Jesustaga pita huañushcagunata causachina ushaita cura. Lazarota mana causachishallata Jesusca Jehova Diosta mañara. Jehovami huañushcagunata causachina ushaita cura ( Juan 11:​41, 42 leipai). Chasna ashahuas Jesusca mana Lazarollatachu causachira. * Por ejemplo, Bibliaga shuc 12 huatayuc ungushca maltahuamanda cuintan. Paiba yayaga Jairo mara. Paiga shuc ushillata charira. Jairoga llaquirisha pai ushita ambichun nisha Jesusta rugagrira.  Jesushuan cuintanacuushcai, runaguna shamusha: “Camba ushushi ña huañushcami, imaraicuta Señor Jesusta mas quillachingui” ninaura. Chita uyasha Jesus nira: ‘Ama manzharichu, Diosta quirillaʼ. Chi huasha, Jairohua huasita rinaura. Huasima caillayaushcai, runaguna manacaillata huacauta ricura. Chita ricusha Jesus nira, imaraicuta huacaunguichi ‘huahua mana huañushca chan, puñuunllamiʼ. Paiba yayagunaga Jesus nishcata manachari intindinaurachu. Chi huasha, Jesus huingunata canzhama cachasha, chi ushihua yayagunahuan ucuma yaicura. Jesusca chi huañushca ushihua maquita apisha nira: “Candami nini, atari mamacu”. Ushushi causarisha, purishcata ricusha yaya mamaga cushiyanaurami. Jesusca cai ushita causachirami (Marcos 5:​22-​24, 35-​42). Jairo pai huarmihuan, ushita ricusha Jehova ushaihuan Jesus causachishcata yuyarishca mangauna.

¹⁰ Jesus causachishcagunaga unaima huañunaurami. Causarishcagunamanda Bibliaibi cuintashcaga, ñucanchita cushiyachinmi. Chasnallata, Jehova huañushcagunata causachingahua chapaunmi. Paiga huañushcagunata causachingamiraun.

11. Eclesiastes 9:​5 nishca shina, Lazaro huañushcaibi imata tucura.

¹¹ Bibliaga nin huañushcagunaga, “mana ima yuyaitahuas charinaunzhu” (Eclesiastes 9:​5). Lazaroga mana ima yuyaitahuas charirachu. Pambashca uctuibiga, pai mayanbi ima tucushcata mana yacharachu. Jesus nishca shina, Lazaro puñushca shina mara (Juan 11:11).

12. Lazaro sirtu causarishcata imasata yachanchi.

 ¹² Jesus Lazarota causachishcata ashca runaguna ricunaura. Jesusta piñaccunahuas pai milagrota rashcata yachanaurami. Lazaro causarishcata ricusha mana pihuas umanata ushanaurachu (Juan 11:47). Chimandahuas, ashca runagunami Lazarota ricusha, Jesusta sirtu pacha Dios cachashcata quiringahua callarinaura. Jesuspa enemigogunaga, Lazarota Jesustahuas huanchinata munanaura (Juan 11:53; 12:​9-​11).

13. Jehova huañushcagunata causachinata imaraicuta quirinchi.

¹³ Jehovami tucuita rara, chiraicumi huañushcagunata causachina ushaita charin. Jesusca nirami, “tucui huañushca runaguna” causaringaunami ( Juan 5:​28). Jehovaga tucui paiba yuyaibi tiyauccunata causachinga. Causachingahuaga, huañushcaguna imasa ashcata yarina man. Jehovaga chita rana ushanzhu. Caita pinsai: cieloibiga ashca huaranga yali estrellagunami tiyanaun. Bibliaga ninmi, Diosca caran estrellagunahua shutita yachan nisha ( Isaias 40:26 leipai). Jehovaga tucui estrellagunahua shutita yarishaga, pai causachishca runaguna imasa ashcata yaringami.

14, 15. Job rimashcata yachasha causarinamanda imatata yachachin.

¹⁴ Callari timpu Jehovata sirvic Job nishca runa huañusha causarinaibi quiric ara. Shuc punzha pai tapura: “Shuc runa huañushaga [...] causarina ushanzhu”. Job Jehovata nira: “Can cayacpi, ñucallata cutichisha. Can maquihuan tarabashca runagunamanda yapacta cushiyangui”. Caita yachasha Jehova, runagunata causachina munashcata yachanchi (Job 14:​13-15).

¹⁵ Huañushcaguna causarinata yachasha imasata  sintiringui. Huañushcagunata Jehova causachina munashcata yachasha cushiyanchi. Chasna ashahuas, canga tapuringuichari: “Huañushca ailluguna, amigogunaga imata tucungauna. Paigunahuas causaringaunachu”. Pigunata causaringauna, causarishaga maibita causangauna. Caimanda Biblia imata nishcata yachashun.

16. Cai Allpaibi causarishaga imasata causangauna.

¹⁶ Ñaupa timpuibi huañushcamanda causaric runagunaga, paiba aillugunahuan, amigogunahuan cai Allpaibi tandarinaura. Shamuc punzhaibihuas huañushcaguna causarisha chasnami tandaringauna. Chibiga mas ali manga. Chibi causariccunaga cai Allpaibi huiñai causanata ushangauna. Chasnallata, gustu causaita charingauna. Guerraguna, mana alita ranaguna, ungüiguna ña mana tiyangachu.

17. Pigunata causaringauna.

¹⁷ Pigunata causaringauna. Jesus nirami: ‘Tucui huañushca runaguna ñuca rimashcata uyasha pambashcamanda llucshingaunamiʼ (Juan 5:​28, 29). Bibliaga nin: ‘Marbi huañushcaguna, allpa ucumanda tucui huañushca runagunami llucshiringaunaʼ nisha (Apocalipsis 20:13). Ashca huaranga yali runagunami causaringauna. Bibliaibi Apostol Pabloga ‘alita raccuna mana alita raccunahuas huañushca huasha cuti causaringaunamiʼ nira (Hechos 24:15 leipai). Imangahuata chasna nira.

18. “Alita rasha” causariccunaga piguna tanaun.

¹⁸ Alita raccunaga piguna tanaun. Jesus chara mana shamugllaita Jehovata sirviccuna manaun.  Jehovata ñaupa sirvisha causaccuna huingunami causaringauna. Maicangunaga Noe, Abrahan, Sara, Moises, Rut y Ester manaun. Hebreos capitulo 11bi cai cariguna, huarmigunamanda cuintan. Chasna ashahuas, cunan timpuibi Jehovata sirvisha huañuccunahuan imata tucunga. Paigunahuas “alita rac” muntungunahuan causaringauna.

19. a) “Mana alita raccunaga” piguna tanaun. b) Jehovaga causarishcagunata imata rachunda saquin.

 ¹⁹ “Mana alita raccunaga” piguna tanaun. Ashca huaranga runaguna Jehovata mana ricsisha huañuccuna manaun. Huañushca acpihuas, Jehovaga paigunata mana cungarishcachu. Causachisha, Jehovaga paita ricsisha sirvichun saquinga.

20. Pigunata mana causaringauna.

²⁰ Sashaga, tucui huañushca runagunachu causaringauna. Mana. Jesusca maican runaguna mana causaringaunachu nirami (Lucas 12:​5, NM nota 19​ta ricui). Pigunata mana causaringauna. Diosta mana casusha mana cambiana munac runagunami mana causaringauna. Chasna ashahuas, causachinata, o mana causachinata Jehovami anllanga. Jehovalla tucuita taripac ashahuas Jesustami ‘tucui huañushcagunata, causaccunatahuas taripangahua churashcaʼ (Hechos 10:42).

21, 22. a) Cieloibi causariccunaga ima tunu aichata apinaun. b) Cieloibi causangahua pita punda causarira.

²¹ Bibliaga nin, maican runagunaga cieloibi causangauna nisha. Paigunaga mana runa shina aichahuan causaringaunachu. Cieloibi causangahuaga espiritu shina causaringauna.

²² Cieloma ringahua punda causaric runaga Jesus mara ( Juan 3:​13). Jehovaga huanchishcamanda Jesusta quimsa punzhaibi causachira. Causachishaga mana runa shina aichahuanzhu causachira (Salmo 16:10; Hechos 13:​34, 35). Apostol Pedroga nirami Jesuspa ‘aichallami huañura, randi espiritu shina mana huañuc ashcamanda cuti causariraʼ  (1 Pedro 3:18). Jesusca causarisha ashca ushaita charira (1 Corintios 15:​3-6). Chasna ashahuas, Bibliaga Jesus mana sapalla changa nin.

23, 24. Pigunata ashilla ovejacuinta anaun, masna runaguna tanaun.

²³ Jesusca chara mana huañushallata, paiba apostolgunata nira: “Shuc lugartami cangunaraicu” alichingahua riuni (Juan 14:​2). Chiga nisha ninmi, maican runaguna cieloibi angahua causarinata. Jesusca cai runagunata ‘ashilla ovejacuintaʼ manguichi nira (Lucas 12:​32, NM). Apostol Juan Jesusta cieloibi ricushcaibi masna runaguna cieloma rinata ricura. Juanga Jesusta ‘Sion nishca urcu ahuaibi shuc patsac chuscu chunga chuscu huaranga (144mil)ʼ runaguna shayauta ricura (Apocalipsis 14:​1).

²⁴ 144.000 runagunaga ima urasta causaringauna. Bibliaga nin, Cristo cieloibi mandai callarishca huasha causarinata (1 Corintios 15:23). Jesusca ña cieloibi mandaunmi, 144.000 runagunamanda ashcagunami cieloibi Jesushuan aunguna. Cai Allpaibiga cieloma rina runaguna chara tiyanaunmi. Huañushaga cieloibi causarinaun. Randi, ashca runagunaga cai Allpa paraiso tucushcaibi huiñai causangauna.

25. Shuc capituloibiga imata yachashun.

²⁵ Nallami, Jehovaga tucuigunata huañuimanda lugaryachinga. Huañuiga huiñai chingaringa (Apocalipsis 21:​4 leipai). Chasna ashahuas 144.000 runagunaga cieloibi imata rangauna. Bibliaga ninmi Jesushuan mandangauna nisha. Shuc capituloibi cai mandanamanda mas yachashun.