1-3. a) Nout tout lé kondané par kosa ? b) Koman Jéova va libèr a nou de la mor ?

IMAJINN : Ou lé kondané pou in krim ke ou la pa fé. I anvoiy a ou la jol pou tout out vi. Ou na okin moiyin pou sort la. Out lavnir lé noir, é ou gingn pa fé rien. Anfin d’kont, ou la pu okin léspoir. Mé in jour, ou aprann ke kèlkin i pe libèr a ou é ke li la promèt èd a ou ! Kosa ou resan ?

² Nout tout nou lé kondané par la mor. Nou pe pa fé rien pou libèr a nou d’sa. Mé Jéova na pouvoir pou libèr a nou d’la mor. É li la promèt ke la mor, nout « dèrnié lènmi », « i sra détrui » (1 Korintien 15:26).

³ Majinn le jour ousa ou nora pu peur la mor. Kèl soulajman ! Mé Jéova i sar pa fé disparèt rienk la mor. Li va osi fé reviv bann domoun ke lé mor. Pans in kou, kosa i ve dir pou ou sa. Jéova i promèt ke « sak lé san fors dan la mor » i sar reviv (Izai 26:19). Sé sa ke la Bib i apèl « la rézuréksion ».

4. a) Kan inn dan nout fami oubien in kamarad i mor, kosa i pe konsol a nou ? b) Donn le non detroi kamarad Jézu.

⁴ Kan inn dan nout fami oubien in kamarad i mor, souvan sa i fé vréman souf a nou é nou pèrd  kouraj. Nou gingn pa fé rien pou fé reviv a zot. Mé la Bib i soulaj nout keur pou de vré (lir 2 Korintien 1:3, 4). Alon voir in légzanp ki mont ke Jéova é Jézu i ve vréman fé reviv bann domoun nou ièm. Souvandéfoi, Jézu la parti voir Lazar é son bann seur, Mart é Mari. Zot troi lété bann kamarad Jézu. La Bib i di : « Jézu té ièm Mart é son seur é Lazar. » Mé in jour, Lazar lé mor (Jan 11:3-5).

5, 6. a) Kan Jézu la vu ke le keur bann seur é bann kamarad Lazar té an douleur, kosa li la fé ? b) Lé ankourajan konèt ke le keur de Jézu té an douleur kan Lazar lé mor. Akoz ?

⁵ Jézu lé parti soulaj le keur Mart é Mari. Kan Mart la aprann ke Jézu té ariv, èl la sort dan le vilaj pou ni voir a li. Èl lété kontan voir Jézu, mé èl la di a li : « Si ou lavé été la, mon frèr i sré pa mor. » Pou èl, Jézu lété arivé tro tar. Aprésa, Jézu la vu Mari antrèn pleuré. Kan li la vu ke le keur bann domoun té an douleur, sa la fé mal son keur é son larm la koulé osi (Jan 11:21, 33, 35). Li la resanti le gran douleur ke nou néna kan in moun nou ièm i mor.

⁶ Dan in koté, nou lé ankourajé kan nou koné ke Jézu té resan la soufrans. Sa i mont ke li détès la mor. É kom li resanm in bonpe Jéova, sa i mont ke Jéova osi i détès la mor (Jan 14:9). Jéova i pe détrui la mor pou toultan, é i tard pa, li va fé sa mèm mèm.

7, 8. a) Mart té i ve pa ke i tir le gro galé ke té bouch lantré la tonm Lazar. Akoz ? b) Kosa Jézu la fé pou Lazar ?

⁷ La tonm Lazar lété fèrmé avèk in gro galé. Kan  Jézu lé arivé devan la tonm, li la di : « Tir le gro galé. » Mé Mart té ve pa ke i tir le gro galé parske le kor Lazar lété dan la tonm depui déja 4 jour (Jan 11:39). Èl té koné pa sak Jézu té sar fé pou son frèr.

⁸ La tir le gro galé, aprésa Jézu la di avèk Lazar : « Vien deor ! » Alor Mart é Mari la vu in nafèr inkroiyab : Lazar lé sorti dan la tonm (Jan 11:43, 44). Jézu lavé résusit Lazar ! Lazar lété vivan, avèk son fami é son bann kamarad. Banna la gingn sèr a li dan zot bra, touch a li é koz avèk li. Sa lé in mirak vréman inkroiyab !

9, 10. a) Kisa la donn Jézu le pouvoir pou résusit bann mor ? b) Pou kosa sak nou lir su bann rézuréksion néna in bonpe la valeur pou nou ?

⁹ Èske sé avèk son prop fors ke Jézu la gingn résusit bann mor ? Non. Avan résusit Lazar, li la priyé Jéova. É Jéova la donn a li le pouvoir pou résusit Lazar (lir Jan 11:41, 42). Lé pa rienk Lazar ke la été résusité *. La Bib i parl osi in ti fiy 12 zan ke lété bien malad. Son papa, Jayir, té koné pu ousa i fo alé pou soign a èl. Li la supli Jézu pou géri son fiy. Lété le seul zanfan ke li lavé. Alork li té i koz avèk Jézu, bann zom lé vnu di a li : « Out fiy lé mor !  Pou kosa déranj Lansénian plus ke sa ? » Mé Jézu la di avèk Jayir : « Pa bezoin ou la peur, mont out foi seulman, é èl i sra sové. » Aprésa, Jézu la fé in bout chemin èk Jayir juska son kaz. Kan zot la ariv a koté la kaz, Jézu la vu é antandu bann domoun pleuré. Jézu la di a zot : « Arèt pleuré, parske èl lé pa mor. Èl i dor. » Bann paran le ti fiy la surman demann a zot kosa Jézu té ve dir par la. Jézu la demann ke bann domoun dan la kaz i sort deor. Li la amèn Jayir é son madam dan la chanm ousa le ti fiy té alonjé. É dousman, li la pran son min é li la di avèk èl : « Ti fiy, lèv a ou ! » Toutsuit, èl la debout é èl la marché. Son bann paran lété tro kontan : Jézu lavé résusit zot fiy ! (Mark 5:22-24, 35-42 ; Luk 8:49-56). Depui se jour la, chak foi ke zot té regard zot fiy, banna té majinn sak Jéova lavé fé pou zot par le moiyin Jézu.

¹⁰ Bann domoun ke Jézu la résusité la fini par konèt ankor la mor. Mé sak nou lir su bann rézuréksion la, néna in bonpe la valeur pou nou, parske sa i donn a nou in vré léspoir : Jéova i ve résusit bann mor, é sé sa mèm mèm li sa va fé.

11. Sak nou lir su la rézuréksion Lazar i mont ke sak i di dann Éklézias 9:5 lé vré. Akoz ?

¹¹ La Bib i di ke bann mor « i koné pu rien » (Éklézias 9:5). Sak nou lir su la rézuréksion Lazar i  mont ke sa lé vré. Kan li té dan la tonm, Lazar « té koné pa rien ». Kom Jézu lavé di, lété komsi li té dor (Jan 11:11).

12. Pou kosa nou pe èt sur ke Lazar la été résusité ?

¹² In bonpe domoun la vu kan Jézu la résusit Lazar. Mèm bann zènmi Jézu té koné ke li la fé se mirak la. Lazar lété vivan, é sa té i prouv ke li la été résusité (Jan 11:47). In bonpe domoun lé vnu voir Lazar. Kan banna la vu a li, zot la konpri ke Jézu té anvoiyé par Bondieu. Mé bann zènmi Jézu lété pa kontan. Alor, zot la désid tué Jézu é Lazar (Jan 11:53 ; 12:9-11).

13. Pou kosa nou pe èt sur ke Jéova va résusit bann mor ?

¹³ Jézu la di ke « tout sak lé dan bann tonm » i sra résusité (Jan 5:28). Sa i ve dir ke tout bann domoun ke lé dan la mémoir Jéova va reviv. Mé pou ke Jéova i résusit kèlkin, i fo li souvien a li tout zafèr su moun la. Èske sa lé posib ? Oui. Néna bann zétoil par miliar. Pourtan, la Bib i di ke Jéova i koné le non tout bann zétoil (lir Izai 40:26). Si li oubli pa le non tout bann zétoil, li va rapèl a li san problèm é an détay bann domoun ke li va résusité. An plus ke sa, kom li la kré tout zafèr, sa i prouv ke li na le pouvoir fé reviv bann mor.

14, 15. Kosa sak Job la di su la rézuréksion i ansègn a nou ?

¹⁴ Job lété in bonom fidèl anvèr Jéova. Li la demandé : « Si in moun i mor, èske li pe reviv ? » Aprésa, li la di avèk Jéova : « Ou va aplé, é ma réponn  a ou. Ou sra vréman présé revoir sak ou la kréé. » Job té kroi la rézuréksion. Li té koné ke Jéova lé présé ke le tan ousa li va résusit bann mor i ariv (Job 14:13-15).

¹⁵ Kosa ou resan kan ou pans la rézuréksion ? Kom nou koné ke Jéova i ve vréman fé reviv bann mor, sa i soulaj nout keur. Mé somanké ou demann a ou : « Èske domoun dan mon fami é mon bann kamarad i sra osi résusité ? » Kisa i sra résusité ? É ousa bann domoun Bondieu va résusité i sar viv ? Alon voir sak la Bib i di.

16. Koman sra la vi pou bann résusité su la tèr ?

¹⁶ Dann tan avan, bann résusité la retrouv zot fami é zot kamarad, isi mèm su la tèr. Sé sa mèm sak va arivé dan lavnir, mé i sra plu gayar. Pou kosa ? Parske bann domoun ki sra résusité su la tèr va gingn viv pou toultan. É zot va viv dan in monn pa parèy dutou le monn koméla. Nora pu bann gèr, ni bann krim, ni bann maladi.

17. Kisa i sra résusité ?

¹⁷ Kisa i sra résusité ? Jézu la di ke « tout sak lé dan bann tonm va antann son voi é va sorti » (Jan 5:28, 29). É Révélasion 20:13 i di : « La mèr la rann bann mor ke lété anndan li, é la mor é la Tonm la rann bann mor ke lété anndan zot. » Donk, bann domoun par miliar va reviv. Lapot Pol la di osi ke nora  « in rézuréksion otan pou bann moun jus ke pou bann moun injus » (lir Akt 24:15). Kosa sa i ve dir ?

18. Kisa i lé bann « moun jus » ki sra résusité ?

¹⁸ Parmi bann « moun jus », néna bann sèrviteur Jéova ke la viv avan Jézu i vien su la tèr. Par égzanp, Noé, Abraam, Sara, Moiz, Rut é Éstèr i sra résusité  su la tèr. Ébreu chapit 11 i parl su bann zom é bann madam la. Èske bann sèrviteur Jéova ke i mor nout lépok i sra résusité ? Oui, parske zot lé anparmi bann moun « jus » osi.

19. a) Kisa i lé bann « moun injus » ? b) Kosa Jéova va donn bann « moun injus » lokazion fé ?

¹⁹ Anparmi bann « moun injus », néna bann domoun par miliar ke lé mor é zot la pa gingn lokazion konèt Jéova. Jéova i oubli pa zot. Li va résusit a zot é li va donn a zot le moiyin pou konèt é ador a li.

20. Kisa i sra pa résusité ?

²⁰ Èske sa i ve dir ke tout bann mor i sra résusité ? Non. Jézu la di ke désèrtin i sra pa résusité (Luk 12:5). Kisa va désidé si in moun i sra résusité ou non ? Jéova lé le Juj ke na le plu gran lotorité. Mé li la osi donn Jézu lotorité pou èt le « juj bann vivan é bann mor » (Akt 10:42). Kisa i sra pa résusité ? Sé le moun ke lé jujé kom méchan é ki ve pa chanj manir (regard la not n^o 19).

21, 22. a) Kèl kor sak i résusit dann sièl i gingn ? b) Kisa lété le premié pou èt résusité pou viv dann sièl ?

²¹ La Bib i di osi ke désèrtin va viv dann sièl. Kan in moun lé résusité dann sièl, li reviv pa avèk in kor an chèr. Li gingn in kor parèy sak bann zanj.

²² Jézu té le premié pou èt résusité pou viv dann sièl (Jan 3:13). Li lété résusité par Jéova 3 jour apré ke li la été tué (Psom 16:10 ; Akt 13:34, 35). Jézu la pa été résusité avèk in kor an chèr. Lapot Pièr i  ésplik ke la « mèt a li a mor èk son kor an chèr, mé la fé reviv a li dan léspri » (1 Pièr 3:18). Alor Jézu lé reni in lanj puisan ! (1 Korintien 15:3-6). Mé la Bib i di ke dot moun lé résusité dann sièl.

23, 24. a) Jézu la montré ke néna inn « ti troupo ». Kisa lé dedan ? b) Konbien de krétien lé anparmi le « ti troupo » ?

²³ Avank li mor, Jézu la di avèk son bann disip : « Mi sa va pou prépar a zot in plas » (Jan 14:2). Sa té i ve dir ke désèrtin anparmi son bann disip sra résusité pou viv dann sièl avèk li. Konbien zot i sra ? Jézu la di ke zot i sra inn « ti troupo ». Donk zot i sra pa in bonpe (Luk 12:32). Lapot Jan la donn la kantité égzak : li la vu Jézu ke « lété debout su la montagn Sion [o sièl], é avèk li 144 000 » (Révélasion 14:1).

²⁴ Kansa bann 144 000 krétien té sar èt résusité ? Dapré la Bib, zot rézuréksion va komansé apré ke Jézu sré devnu roi dann sièl (1 Korintien 15:23). Nou lapou viv lépok la, é prèske tout bann 144 000 krétien, la finn résusité dann sièl. Kan sak lé ankor su la tèr i mor, banna lé toutsuit résusité dann sièl. Parkont, i amuz pa, in bonpe bann domoun i sra résusité su la tèr, dann paradi.

25. Kosa nou sar aprann dann chapit i vien apré ?

²⁵ I tard pa, Jéova va libèr bann domoun d’la mor. La mor i sra détrui ! (Lir Izai 25:8). Mé kosa bann 144 000 i sar fé dann sièl ? La Bib i di ke zot i sra roi dan in roiyom avèk Jézu. Le chapit i vien apré va aprann a nou ankor plus su se roiyom la.