1–3) Andre savo pharipen amen savore sam a sar amen o Jehovas cirdela avri alestar?

PREDSTAVIN tuke, hoj sal andre bertena (harešta). Sal odsudzimen pro meriben vaš vareso, so na kerďal. Nane ňiko, ko tut šaj cirdel alestar avri. Ňič lačho tut na užarel. Ňič našťi keres. Ale akor, sar imar preačhes te paťal, hoj ela feder, dodžanes tut, hoj hin vareko, kas hin zor te zachraňinel tuke o dživipen a kamel tuke te pomožinel! Sar bi tuke sas?

² Savore sam sar bi phandle andre bertena (harešta) a užarel amen o meriben. Našťi alestar džas avri. Ale le Jehovas hin zor te zachraňinel amen. Sľubinďa, hoj „sar posledno ňeprjaťeľis ela zňičimen o meriben.“(1. Korinťanom 15:26)

³ Predstavin tuke, sar mište pro jilo tuke ela, te na mušineha te daral le meribnastar! Ale o Jehovas na odstraňinela ča o meriben. Ov tiš uštavela pale ko dživipen olen, so mule. Ča tuke predstavin ada! Ov sľubinel, hoj „ola, so našťi ňič keren, bo mule“, pale dživena. (Izaiáš 26:19) Ena uštade andal o meriben.

4) (a) Te amenge vareko merel, so šaj uťešinel amari dukh andro jilo? (b) Ko sas le Ježišoskere lačhe kamarata?

⁴ Te amenge merel vareko andal e fameľija, abo lačho kamaratos, amari dukh the žaľa hin ajsi bari,  hoj ada našťi ľikeras avri. O jilo amenge maj pukinel žaľatar. Našťi keras ňič, kaj les te anas pale ko dživipen. E Biblija amenge šaj pomožinel, kaj te ľikeras avri e dukh, so amen hin. (Pregen 2. Korinťanom 1:3, 4.) Akana peske phenaha pal jekh pribehos, savo sikavel, sar igen kamel o Jehovas the o Ježiš te anel pale ko dživipen olen, kas amen rado dikhahas. Sar sas o Ježiš pre phuv, avľa ko Lazar the pal leskere pheňa Marta the Maria. Savore 3 manuša sas le Ježišoskere lačhe kamarata. E Biblija phenel: „O Ježiš rado dikhelas la Marta the lakera pheňa, the le Lazar.“ (Ján 11:3–5 NZ)

5, 6) (a) So kerďa o Ježiš, sar dikhľa, savi žaľa hin le Lazaroskera fameľija? b) Soske amenge hin lokeder pro jilo, te džanas, so ciťinelas andro jilo o Ježiš, sar dikhelas o meriben?

⁵ O Ježiš kamelas te del zor la Marta the la Maria, kaj te na pukinel lenge o jilo žaľatar. Sar e Marta šunďa, hoj o Ježiš avel, geľa avri andal o foros, kaj pes leha te arakhel. Sas rado, hoj dikhel le Ježiš, ale phenďa leske: „Te adaj uľalas (avľalas), miro phral na muľahas.“ E Marta peske mišľinelas, hoj o Ježiš avľa nasig. Paľis o Ježiš dikhľa lakera pheňa la Maria, sar rovelas. Sar dikhľa o Ježiš lengeri dukh, the les zadukhanďiľa andro jilo a chudňa te rovel. (Ján 11:21, 33, 35) Les sas ajso baro pharipen, savo hin the amen, te amenge vareko muľa, kas igen kamahas.

⁶ Hin amenge lokeder, sar džanas, hoj le Ježiš tiš dukhal o jilo avka sar dukhal the amen, sar vareko merel. O Ježiš hino ajso sar leskero Dad. (Ján 14:9) Le Jehovas hin zor te odstraňinel o meriben pro furt. A kerela ada, so neksigeder!

7, 8) Soske na kamelas e Marta, kaj te odkeren o bar le hrobostar a so kerďa o Ježiš?

⁷ Sar avľa o Ježiš paš o hrobos, kaj sas le Lazaroskero ťelos, o vchodos sas zaučhardo bare bareha.  O Ježiš phenďa: „Odkeren o bar.“ Ale e Marta ada na kamelas. Le Lazaroskero ťelos sas andro hrobos imar „4 ďives.“ (Ján 11:39) Na džanelas, so kamel o Ježiš te kerel, kaj te pomožinel lakere phraleske.

⁸ O Ježiš phenďa le Lazaroske: „Av avri!“ Oda, so e Marta the Maria dikhle paľis, sas igen baro. „O murš, so muľa, avľa avri. O pindre the o vasta les sas zapaťarde pochtaneha.“ (Ján 11:43, 44) O Lazar sas vzkrjesimen. Sas pale peskera fameľijaha the kamaratenca. On les šaj obchudne, šaj pes lestar dotkňinde a šaj leha vakerenas. Ada sas baro zazrakos! O Ježiš uštaďa le Lazar andal o meriben.

9, 10) (a) Ko diňa le Ježiš zor te vzkrjesinel le manušen? (b) So amen hin olestar, te genas o spravi pal ola, so sas vzkrjesimen?

⁹ Vzkrjesinelas o Ježiš peskera zoraha? Na. Sigeder, sar vzkrjesinďa le Lazar, pes o Ježiš modľinelas ko Jehovas. O Del les diňa zor, kaj le Lazar te vzkrjesinel. (Pregen Ján 11:41, 42.) O Lazar na sas ča jekh, ko sas vzkrjesimen. Andre Biblija pes pisinel pal 12 beršengeri čhajori. Sas igen nasvaľi. Lakere dadeske, le Jajruske, čhinďolas o jilo alestar a jilestar mangelas le Ježiš, kaj la te sasťarel avri. Oj sas leskeri jekhori čhajori. Akor, sar delas duma le Ježišoha, avľa pal leste varesavo murš a phenďa: „Tiri čhajori muľa! De smirom (pokojis) le učiťeľis!“ Ale o Ježiš phenďa le Jajruske: „Ma dara, ča paťa a oj ela zachraňimen!“ Geľa leha andre leskero kher. Sar sas paš o kher, dikhľa a šunďa, sar o manuša roven. O Ježiš lenge phenďa:  „Ma roven, oj na muľa, oj ča sovel.“ Lakeri daj dad na achaľile, so aleha o Ježiš kamel te phenel. O Ježiš mangľa savoren, kaj te džan avri andal o kher, kaj sas e čhajori. Šaj odoj ačhile ča e daj o dad. O Ježiš la čha chudňa šukares vastestar a phenďa: „Čhajorije, phenav tuke, ušťi!“ La da le dades na sas, so te phenel radišagostar, sar dikhle la čhajora, sar ušťiľa a phirelas! O Ježiš la vzkrjesinďa. (Marek 5:22–24, 35–42; Lukáš 8:49–56 NZ) Akorestar furt, sar dikhenas pre peskeri čhajori, lenge avelas pre goďi, sar lenge o Jehovas pomožinďa prekal o Ježiš. *

¹⁰ Ola, so sas vzkrjesimen, paľis pale mule. Ale o spravi, so genas pal ola manuša, amenge pomožinen te paťal, so o Del mekča kerela. O Jehovas kamel te vzkrjesinel olen, so mule a kerela ada!

11) So amenge Kazateľ 9:5 phenel pal oda, so pes ačhiľa le Lazaroha?

¹¹ E Biblija phenel, hoj „ola, so mule, imar na džanen ňič“. Aňi o Lazar ňič na džanelas. (Kazateľ 9:5) Avka, sar phenďa o Ježiš, o Lazar sar bi zorales suťahas. (Ján 11:11) Sar sas andro hrobos, o Lazar na džanelas pestar.

12) Sar džanas, hoj o Lazar sas čačes vzkrjesimen?

¹² Ada, sar o Ježiš vzkrjesinďa le Lazar,  dikhle but manuša. The leskere ňeprjaťeľa dikhle, hoj kerďa ajso zazrakos. O Lazar pale dživelas. Sas vzkrjesimen. (Ján 11:47) But manuša gele te dikhel pro Lazar. Sar dikhle pre peskere jakha, hoj o Lazar dživel, paťanďile, hoj le Ježiš bičhaďa o Del. Olenge, so nanavidzinenas le Ježiš, pes ada na pačinelas. Kamenas te murdarel le Ježiš the le Lazar. (Ján 11:53; 12:9–11)

13) Soske šaj paťas, hoj o Jehovas vzkrjesinela olen, so mule?

¹³ O Ježiš phenďa, hoj ena vzkrjesimen „savore, so hine andro pametna hrobki“. (Ján 5:28) Ada znameňinel, hoj o Jehovas vzkrjesinela savore manušen, save hine andre leskeri goďi (andre le Devleskeri pameť). Kaj ada te kerel, mušinel peske te pametinel savoro pal leste. Šaj ada čačes kerel? Andro vesmiris hin milijardi čercheňa (hvjezdi). E Biblija phenel, hoj o Jehovas savoren prindžarel pal o menos. (Pregen Izaiáš 40:26.) Te peske džanel te pametinel, sar pes vičinel dojekh čercheň (hvjezda), ta určiťe hin leske lokes te pametinel peske savoro pal ola, kas kamel te vzkrjesinel. Ale nekbareder dvovodos, soske paťas, hoj o Jehovas šaj uštavel andal o meriben hin ada, hoj le manušen stvorinďa.

14, 15) So phenďa o Job pal o vzkrjeseňe?

¹⁴ Verno murš o Job paťalas andro vzkrjeseňe. Ov phučľa: „Te o manuš merel, šaj pale dživel?“ Paľis phenďa le Jehovaske: „Vičineha a me tuke odphenava. Igen kameha te dikhel oles, kas kerďal tire vastenca.“ O Job džanelas, hoj o Jehovas pes našťi doužarel, kana les vzkrjesinela andal o meriben. (Jób 14:13–15)

 ¹⁵ Sar tuke hin akana pro jilo, sar džanes, hoj ela vzkrjeseňe? Možno phučes: „So ela mira fameľijaha the kamaratenca, so mule? Ena tiš vzkrjesimen?“ Hin amenge feder pro jilo, sar džanas, hoj o Jehovas kamel te vzkrjesinel olen, so mule. Akana pes dodžanaha, so phenel e Biblija pal ada, ko ela vzkrjesimen a kaj paľis dživena.

16) Savo dživipen užarel olen, so ena vzkrjesimen pre phuv?

¹⁶ Ola, so sas andre biblicko doba vzkrjesimen, šaj pes pale arakhle peskera fameľijaha the le kamaratenca. Ale o vzkrjeseňe, so mekča užaras, ela šukareder. Soske? Bo ola, so ena vzkrjesimen pre phuv, imar na merena, ale šaj dživena pro furt. O svetos, andre savo dživena, ela aver sar ada, so hin akana. Na ela odoj vojni, kriminalita, aňi nasvaľibena.

17) Ko ela vzkrjesimen?

¹⁷ Ko ela uštado andal o meriben? O Ježiš phenďa, hoj „savore, so hine andro pametna hrobki, šunena leskero hlasos a avena avri.“ (Ján 5:28, 29) Andro Zjavenie 20:13 genas: „O moros premukhľa olen, so mule, a o meriben the o hrobos premukhle olen, so sas andre lende.“ Milijardi manuša pale dživena. O apoštol Pavol phenďa, hoj ena uštade andal o meriben the „o spravodliva the o ňespravodliva.“ (Pregen Skutky 24:15.) So ada znameňinel?

18) Ko hine „o spravodliva“, so ena vzkrjesimen?

¹⁸ „O spravodliva“ hine savore verna Jehovaskere  služobňika, so dživenas sigeder, sar o Ježiš avľa pre phuv. Pre phuv ena vzkrjesimen o Noach, Abraham, Sara, Mojžiš, Rut, Ester the aver manuša. Pal ala murša the romňija šaj genes andro Hebrejom 11 kapitola. Ale so ela le Jehovaskere služobňikenca, so leske verňe služinen adaďives? The on hine „spravodliva“ a ena vzkrjesimen.

19) Ko hine „o ňespravodliva“? Savi šanca len o Jehovas dela?

 ¹⁹ „O ňespravodliva“ hine milijardi manuša, saven na sas možnosť te sprindžarel le Jehovas. Imar mule, ale o Jehovas pre lende na bisterďa. Vzkrjesinela len a dela len šanca te sikavel pes pal leste a te služinel leske.

20) Soske na ena savore manuša vzkrjesimen?

²⁰ Znameňinel ada, hoj savore, so mule, ena vzkrjesimen? Na. O Ježiš phenďa, hoj varesave manuša na ena uštade andal o meriben. (Lukáš 12:5) Ko phenela, ko ela vzkrjesimen a ko na? O Jehovas ela o Sudcas, ale diňa autorita the le Ježiš, kaj te „sudzinel olen, so dživen the olen, so mule“. (Skutky 10:42) Savore posudzimen sar nalačhe manuša, abo ola, so pes na kamen te zmeňinel, ajse na ena vzkrjesimen. (Dikh e poznamka 19.)

21, 22) (a) So hino o vzkrjeseňe andro ňebos? (b) Ko sas peršo avka vzkrjesimen?

²¹ E Biblija tiš phenel, hoj varesave manuša dživena andro ňebos. Sar ela vareko vzkrjesimen, kaj te dživel andro ňebos, na ela uštado andal o meriben sar manuš, aňi les na ela manušeskero ťelos. Ov ela vzkrjesimen sar duchovno osoba.

²² O Ježiš sas peršo, so sas vzkrjesimen, kaj te dživel andro ňebos. (Ján 3:13) Trin ďivesa pal ada, sar o Ježiš muľa, les o Jehovas uštaďa andal o meriben. (Žalm 16:10; Skutky 13:34, 35) Sar sas o Ježiš vzkrjesimen, na sas les imar manušengero ťelos. O apoštol Peter phenďa pal ada, so pes le Ježišoha ačhiľa, hoj  o Ježiš „sas murdardo ťelesňe, ale obdžiďardo andro duchos“. (1. Petra 3:18 NZ) O Ježiš sas vzkrjesimen sar zoraľi duchovno osoba! (1. Korinťanom 15:3–6) Ale e Biblija phenel, hoj o Ježiš Kristus nane ča jekh, so ela vzkrjesimen andro ňebos.

23, 24) Ko hine „cikno stados“, pal savo o Ježiš vakerelas a keci hine?

²³ Sigeder, sar o Ježiš muľa, phenďa peskere verne učeňikenge: „Džav tumenge te pripravinel o than.“ (Ján 14:2 NZ) Ada znameňinel, hoj varesave leskere nasledovňika ena vzkrjesimen andro ňebos. Keci manuša dživena andro ňebos? O Ježiš phenďa, hoj na ena but, ča „cikno stados“. (Lukáš 12:32) O apoštol Jan pisinďa presňe keci ena. Dikhľa le Ježiš pro ňebesko verchos Sijon le 144 000 osobenca. (Zjavenie 14:1)

²⁴ Kana ena vzkrjesimen o 144 000 kresťana? Začňinela ada, sar chudela o Kristus te vladňinel andro ňebos. (1. Korinťanom 15:23) Akana dživas andre kadi doba. Buter andal o 144 000 sas imar vzkrjesimen andro ňebos a ola, so mek dživen pre phuv, ena vzkrjesimen andro ňebos takoj (minďar), sar merena. Ale čačipen hin, hoj milijardi aver manuša na ena vzkrjesimen andro ňebos, ale andro rajos pre phuv.

25) So pes dodžanaha andre 8 kapitola?

²⁵ So neksigeder, o Del oslobodzinela savore manušen andal o meriben a o meriben imar na ela. (Pregen Izaiáš 25:8.) Ale so kerena andro ňebos ola, so odoj ena vzkrjesimen? Vladňinena le Ježišoha sar kraľa. Pal kadi vlada pes dodžanaha buter andre 8 kapitola.