1-3. Oinsá mak ita-nia situasaun hanesan ho ema iha komarka laran? Oinsá mak Jeová sei salva ita?

IMAJINA toʼok: Maski Ita la halo krime ida, maibé ema duun Ita, no Ita hetan kastigu atu sulan iha komarka ba nafatin. Iha komarka, Ita lakon ona esperansa no labele halo buat ida. Maibé bainhira atu rende an ona, Ita rona katak iha ema ida neʼebé iha kbiit atu halo Ita livre, no nia promete atu ajuda Ita! Ita sente oinsá?

² Ita-nia situasaun mak hanesan iha komarka laran. Ita hotu labele sai livre husi mate. Maibé Maromak Jeová iha kbiit atu halo ita livre husi mate. Nia mós promete atu “halakon” mate nuʼudar “inimigu ikus”.​—1 Korinto 15:26.

³ Se Ita la presiza hanoin barak kona-ba mate, Ita-nia moris sei sai kontente! Tuir loloos, buat neʼebé Jeová sei halo laʼós deʼit atu halakon mate. Nia mós promete: “Ema neʼebé mate sei moris fali.” (Isaias 26:19) Bíblia hatete katak Maromak sei fó moris-hiʼas ba ema neʼebé mate ona.

4. (a) Kuandu ita-nia família ka belun mate, ita bele hetan kmaan husi neʼebé? (b) Sé-sé deʼit mak Jesus nia belun neʼebé diʼak?

⁴ Kuandu ita-nia família ka belun ida mate, ita sente triste tebetebes. Ita labele halo buat ida no la iha kbiit atu halo nia moris filafali. Maibé Bíblia fó kmaan mai ita. (Lee 2 Korinto 1:3, 4.) Mai ita hanoin  kona-ba ezemplu ida neʼebé hatudu katak Jeová no Jesus hakarak fó moris-hiʼas ba ema neʼebé mate ona. Bainhira Jesus iha mundu, nia ransu beibeik ho Lázaro no ninia feton Marta no Maria. Sira hotu mak belun neʼebé diʼak. Bíblia dehan: “Jesus hadomi Marta no ninia alin-feto no mós Lázaro.” Maibé loron ida Lázaro mate.​—João 11:3-5.

5, 6. (a) Bainhira Jesus haree Lázaro nia família no belun sira triste tebes, oinsá mak neʼe book Jesus nia laran? (b) Tanbasá mak istória neʼe fó kmaan mai ita?

⁵ Jesus bá atu fó kmaan ba Marta no Maria. Bainhira Marta rona katak Jesus mai ona, nia bá hasoru Jesus. Nia kontente tanba Jesus mai, maibé nia hatete ba Jesus: “Se Ita-Boot iha neʼe karik, haʼu-nia alin sei la mate.” Marta hanoin katak Jesus mai tarde. Depois, bainhira Jesus haree Maria tanis hela no ema hotu triste, nia mós sai laran-triste tebes no tanis. (João 11:21, 33, 35) Neʼe hatudu katak Jesus sente triste no hanoin tebes ita bainhira ita-nia família mate.

⁶ Istória neʼe fó kmaan mai ita, tanba ita bele fiar katak Jesus no ninia Aman Jeová odi mate. (João 14:9) Jeová iha kbiit atu halakon mate ba nafatin, no lakleur tan, nia sei halo nuneʼe duni.

7, 8. Tanbasá mak Marta lakohi atu hasai fatuk neʼebé taka Lázaro nia rate? Jesus halo saida?

⁷ Bainhira Jesus toʼo Lázaro nia rate, rate neʼe taka metin ho fatuk boot ida. Jesus hatete: “Hasai tiha fatuk neʼe.” Maibé Marta lakohi, tanba Lázaro mate loron haat ona. (João 11:39) Marta la hatene saida mak Jesus sei halo atu ajuda Lázaro.

 ⁸ Jesus hatete: “Lázaro, sai mai liʼur!” Marta no Maria hakfodak ho buat neʼebé sira haree. “Mane neʼebé mate ona sai mai liʼur ho hena bobar hela iha nia liman no ain, no ninia oin falun ho hena.” (João 11:43, 44) Lázaro moris fali ona! Nia hamutuk fali ho ninia família no belun sira. Ema bele hakoʼak no koʼalia ho Lázaro. Neʼe mak milagre boot ida! Jesus fó moris-hiʼas ba Lázaro.

9, 10. (a) Sé mak fó kbiit ba Jesus atu halo ema mate moris hiʼas? (b) Oinsá mak istória kona-ba moris-hiʼas ajuda ita?

⁹ Jesus halo ema mate moris filafali ho ninia kbiit rasik ka lae? Lae. Antes atu halo Lázaro moris fali, Jesus halo orasaun ba Jeová, no Jeová fó kbiit ba nia atu fó moris-hiʼas ba Lázaro. (Lee João 11:41, 42.) Tuir loloos, Jesus mós fó moris-hiʼas ba ema seluk tan. Bíblia konta kona-ba labarik-feto tinan 12 neʼebé moras todan. Ninia aman naran Jairo, no labarik neʼe mak Jairo nia oan-feto mesak. Jairo laran-susar tebes no husu Jesus atu kura ninia oan-feto neʼe. Bainhira Jairo no Jesus koʼalia hela, ema balu mai no hatete: “Ita-nia oan-feto mate ona! Keta hakole tan Mestre.” Maibé Jesus hatete ba Jairo: “Keta taʼuk, hatudu fiar bá, no nia sei moris.” Tuirmai, Jesus laʼo ba Jairo nia uma. Jesus haree no rona ema barak tanis. Jesus hatete ba sira: “Keta tanis, tanba nia la mate, nia toba deʼit.” Karik liafuan neʼe halo labarik-feto neʼe nia inan-aman konfuzaun. Tuirmai, Jesus haruka ema hotu sai husi uma, no nia lori labarik-feto nia inan-aman atu tama ba fatin neʼebé sira hatoba labarik neʼe. Ikusmai, Jesus kaer labarik neʼe nia liman no hatete: “Noi, haʼu hatete  ba ó: Hadeer bá!” Imajina toʼok, inan-aman neʼe haksolok tebes bainhira haree sira-nia oan hamriik no laʼo! Jesus halo labarik-feto neʼe moris fali. (Marcos 5:22-24, 35-42; Lucas 8:49-56) Durante sira-nia moris tomak, sira sei nunka haluha buat neʼebé Jeová halo ona liuhusi Jesus. *

¹⁰ Ema neʼebé Jesus fó moris-hiʼas, ikusmai mate fali. Maibé istória kona-ba ema sira-neʼe fó esperansa kapás ba ita. Jeová hakarak ema neʼebé mate ona atu moris filafali, no nia sei halo nuneʼe duni.

11. Eclesiastes 9:5 hanorin saida kona-ba Lázaro nia kondisaun?

¹¹ Bíblia hatete ho klaru: “Ema neʼebé mate ona la hatene buat ida.” (Eclesiastes 9:5) Nuneʼe mós ho Lázaro. Hanesan Jesus hatete, bainhira Lázaro mate, ninia kondisaun mak hanesan toba. (João 11:11) Iha rate laran, Lázaro “la hatene buat ida”.

12. Tanbasá mak ita bele fiar katak Lázaro moris filafali?

¹² Bainhira Jesus halo Lázaro moris filafali, ema barak haree ida-neʼe. Ema neʼebé odi Jesus mós hatene kona-ba milagre neʼe. Sira haree Lázaro neʼebé moris filafali ona, no neʼe fó evidénsia katak moris-hiʼas akontese duni. (João 11:47) Ema barak mós bá vizita Lázaro, no komesa fiar katak Maromak mak haruka Jesus. Sira neʼebé odi Jesus sente laran-nakali, tan neʼe  sira halo planu atu oho Jesus no mós Lázaro.​—João 11:53; 12:9-11.

13. Tanbasá mak ita bele fiar katak Jeová sei fó moris-hiʼas ba ema neʼebé mate ona?

¹³ Jesus hatete katak “ema hotu neʼebé iha rate laran” sei moris hiʼas. (João 5:28) Neʼe katak ema hotu neʼebé iha Jeová nia memória sei moris filafali. Maibé atu Jeová bele halo ida-neʼe, nia tenke hanoin-hetan buat hotu kona-ba ema ida-idak. Nia bele halo ida-neʼe ka lae? Hanoin toʼok, iha lalehan, iha fitun rihun ba rihun toʼo sura labele, maibé Bíblia hatete katak Jeová hatene fitun ida-idak nia naran. (Lee Isaias 40:26.) Se nia bele hanoin-hetan fitun ida-idak nia naran, nia mós bele hanoin-hetan buat hotu kona-ba ema neʼebé nia sei fó moris-hiʼas, loos ka lae? Liután neʼe, Jeová mak ita-nia Kriadór, tan neʼe ita bele fiar katak nia mós iha kbiit atu halo ema mate moris filafali.

14, 15. Job nia liafuan hanorin saida kona-ba moris-hiʼas?

¹⁴ Maromak nia atan ida naran Job tau fiar ba moris-hiʼas. Nia husu: “Se ema ida mate, nia bele moris fali ka lae?” Tuirmai, nia hatete ba Jeová: “Ita sei bolu no haʼu sei hatán ba Ita. Ita sei hanoin tebes ema neʼebé Ita kria ona ho Ita-nia liman.” Loos duni, Job hatene katak Jeová hein ba tempu neʼebé nia sei fó moris-hiʼas ba ema mate sira.​—Job 14:13-15.

¹⁵ Ita sente oinsá kona-ba esperansa moris-hiʼas nian? Karik Ita hanoin: ‘Oinsá ho haʼu-nia família no belun neʼebé mate ona? Sira mós sei moris filafali ka lae?’ Hodi hatene katak Jeová hakarak duni halo ema mate moris filafali, neʼe halo ita sente kmaan. Agora, mai ita aprende husi Bíblia kona-ba ema mate  sei moris filafali iha neʼebé, no sé-sé deʼit mak sei moris filafali.

16. Ema neʼebé sei moris hiʼas iha futuru sei haksolok ho situasaun saida?

¹⁶ Iha tempu uluk, ema neʼebé moris hiʼas fali hasoru malu ho sira-nia família no belun iha mundu. Nuneʼe mós ho ema neʼebé sei moris hiʼas iha futuru, maibé iha futuru situasaun sei diʼak liután. Tanbasá? Tanba ema neʼebé sei moris hiʼas iha rai sei hetan oportunidade atu moris ba nafatin no la mate tan. No sira-nia moris sei la hanesan ohin loron, tanba sei la iha tan funu, krime no moras.

17. Sé-sé deʼit mak sei hetan moris-hiʼas?

¹⁷ Sé-sé deʼit mak sei hetan moris-hiʼas? Jesus hatete katak “ema hotu neʼebé iha rate laran sei rona ninia lian no sai husi rate”. (João 5:28, 29) Apokalipse 20:13 mós hatete: “Tasi entrega ema mate sira neʼebé iha laran, no mate no rate entrega ema mate sira neʼebé iha laran.” Loos duni, ema rihun ba rihun neʼebé mate ona sei moris filafali. Apóstolu Paulo mós hatete katak “ema neʼebé hatudu hahalok loos no mós ema neʼebé hatudu hahalok la loos” sei hetan moris-hiʼas. (Lee Apóstolu 24:15.) Neʼe katak sá?

18. Sé-sé deʼit mak “ema neʼebé hatudu hahalok loos”?

¹⁸ “Ema neʼebé hatudu hahalok loos” inklui Jeová nia atan sira neʼebé moris antes Jesus mai toʼo mundu. Porezemplu, ema hanesan Noé, Abraão, Sara, Moisés, Rute no Ester sei moris filafali iha mundu neʼe. Ita bele lee istória kona-ba sira balu iha Ebreu kapítulu 11.  Oinsá ho ema ohin loron neʼebé laran-metin ba Jeová toʼo mate? Sira mós “ema neʼebé hatudu hahalok loos”, tan neʼe Jeová sei fó moris-hiʼas ba sira.

19. “Ema neʼebé hatudu hahalok la loos” mak ema hanesan saida? Jeová sei fó oportunidade saida ba sira?

¹⁹ “Ema neʼebé hatudu hahalok la loos” inklui ema rihun ba rihun neʼebé la iha oportunidade atu hatene  kona-ba Jeová. Maski sira mate ona, Jeová la haluha sira. Aban-bainrua, Jeová sei halo sira moris hiʼas fali, no fó oportunidade ba sira atu aprende kona-ba nia no serbí nia.

20. Ema hanesan saida mak sei la hetan moris-hiʼas?

²⁰ Neʼe katak ema hotu neʼebé mate ona sei moris fali ka lae? Lae. Jesus hatete katak ema balu sei la hetan moris-hiʼas. * (Lucas 12:5) Sé mak halo desizaun kona-ba ema neʼebé sei moris filafali? Jeová mak Tesi-Lia Naʼin neʼebé boot liu, maibé nia mós fó kbiit ba Jesus atu “tesi-lia ba ema moris no ema mate”. (Apóstolu 10:42) Ema neʼebé hetan tesi-lia nuʼudar ema aat neʼebé lakohi arrepende an sei la hetan moris-hiʼas.​—Haree Apéndise 19.

21, 22. (a) Ema neʼebé hetan moris-hiʼas ba lalehan iha isin hanesan saida? (b) Sé mak ema primeiru neʼebé hetan moris-hiʼas ba lalehan?

²¹ Bíblia mós hatete katak ema balu sei bá lalehan. Bainhira ema ida hetan moris-hiʼas ba lalehan, nia sei moris nuʼudar kriatura espíritu ida, laʼós ho isin-lolon hanesan ita ema.

²² Jesus mak ema primeiru neʼebé hetan moris-hiʼas hanesan neʼe. (João 3:13) Liutiha loron tolu depois Jesus mate, Jeová halo nia moris filafali. (Salmo 16:10; Apóstolu 13:34, 35) Jesus hetan moris-hiʼas laʼós nuʼudar ema ho isin no raan. Apóstolu Pedro esplika: “Ema oho nia iha isin, maibé Maromak halo nia moris fali nuʼudar espíritu.” (1 Pedro 3:18) Jesus hetan  moris-hiʼas nuʼudar kriatura espíritu ida neʼebé forsa tebes! (1 Korinto 15:3-6) Maibé Bíblia hatete katak iha mós ema seluk neʼebé hetan moris-hiʼas hanesan neʼe.

23, 24. Sé tan mak hetan moris-hiʼas ba lalehan? Sira hamutuk naʼin-hira?

²³ Antes Jesus mate, nia hatete ba ninia dixípulu sira: “Agora haʼu bá atu prepara fatin ba imi.” (João 14:2) Neʼe katak Jesus nia dixípulu balu sei hetan moris-hiʼas ba lalehan no hela hamutuk ho nia. Maibé ema uitoan deʼit mak sei saʼe ba lalehan, tanba Jesus bolu sira “bibi-lubun kiʼik”. (Lucas 12:32) Entaun, ema naʼin-hira? Apóstolu João haree vizaun kona-ba Jesus “hamriik iha Foho Siaun [iha lalehan] hamutuk ho ema naʼin-144.000”.​—Apokalipse 14:1.

²⁴ Bainhira mak ema Kristaun naʼin-144.000 hetan moris-hiʼas? Bíblia fó-hatene ita katak neʼe sei akontese bainhira Kristu hahú ninia ukun iha lalehan. (1 Korinto 15:23) Tuir loloos, Kristu hahú ukun ona, no maioria husi ema naʼin-144.000 moris hiʼas ona ba lalehan. Husi ema naʼin-144.000, ema balu sei moris hela iha mundu, no bainhira sira mate, Maromak sei halo sira moris-hiʼas kedas hodi bá lalehan. Maibé ema rihun ba rihun neʼebé mate ona toʼo ohin loron sei hetan moris-hiʼas iha futuru iha mundu paraízu.

25. Ita sei aprende saida iha kapítulu tuirmai?

²⁵ Lakleur tan, Jeová sei halo ema hotu sai livre husi mate, no mate sei la iha tan! (Lee Isaias 25:8.) Maibé ema neʼebé hetan moris-hiʼas ba lalehan sei halo saida? Bíblia esplika katak sira sei ukun hamutuk ho Jesus iha ninia governu iha lalehan. Kona-ba ida-neʼe, ita sei aprende iha kapítulu tuirmai.