1-3. Inogne ty magnagadra antikagne iaby, le akore ty hagnavota i Jehovah antikagne?

ERETSERETO tie tsy mba nisy raty nanoe’o rehe, faie gadraegne ankandavà ty iaigna’o. Tsy misy hivotsora’o rehe. Hoe tsy misy raha tamaegne ty fiaigna’o, sady tsy misy azo’o atao ty miomba izay. Faie amy i fotoagne mampamoe fo azoy, ro inge misy ndaty mahery afake magnavotse azo sady mbe te hagnampe azo ka! Azo antoke fa fale rehe!

² Gadrae o fateo tika iaby. Tsy misy azontikagne atao hilaisagne aze. Faie managne hery hagnavotagne antikagne amo o fateo ty Jehovah. Sady mampitamà reke tie: “Hafahagne o fateo, fa fahavalo fara’e.”—1 Korintianina 15:26.

³ Akore ty hafalea’o naho fa mahatsapa rehe tie tsy hivali-doha amo o fateo sasa? Faie tsy o fateo avao ty hafaha i Jehovah, fa hamelogne ze ndaty fa nimate ka reke. Eretsereto ty dika izay ama’o! Mampitamà reke fa hovelomegne indraike “ty mate tsy misy raha vita’e.” (Isaia 26:19) Izay ty rehafe ty Baiboly tihoe famelomagne ty mate.

4. a) Inogne ty afake mampionogne antikagne naho fa misy longo ndra ragnentikagne mate? b) Ia iaby ty ragnetse maifitse i Jesosy?

⁴ Mafe amantikagne ty miatreke o fateo naho fa longontikagne ndra ragnetse maifitse ro mate.  Mamoe fo tikagne, fa tsy misy azontikagne atao hamelomagne iareo indraike. Soa fa mampionogne antikagne ty Baiboly. (Vakio 2 Korintianina 1:3, 4.) Misy ohatse raike manoro tie, teà i Jehovah naho i Jesosy hovelomegne indraike ty longontikagne fa nimate. Andao tikagne handineke izay. Mateteke nitilike i Lazarosy naho i Marita vaho i Maria rahavave’e ty Jesosy, tamy ie tan-tane etoỳ. Ragne i Jesosy maifitse aze iareo telo. Rehafe ty Baiboly fa “niteà i Jesosy ty Marita naho i rahavave’ey vaho i Lazarosy.” Ie tamy ty andro raike, nimate ty Lazarosy.—Jaona 11:3-5.

5, 6. a) Nanao akore ty Jesosy naho fa nahatrea fa nanahelo i Lazarosy ty longo’e naho ty ragne’e? b) Nagnino ro mampionogne ty mahafantatse tie nanahelo ty Jesosy naho fa misy mate?

⁵ Nandeha nampionogne i Marita naho i Maria ty Jesosy. Nanalaka i Jesosy ty Marita naho fa naharey tie fa ambaly i tanàgney ao reke. Fale reke naho fa nahatrea i Jesosy, faie nirehake tie: “Naho teto rehe, le tsy ho nimate ty rahalahiko.” Nieretseretse ty Marita fa nitara ty fiavy i Jesosy. Nanahelo ty Jesosy naho fa nahatrea i Maria nitagny. Nitagny ka reke naho fa nahatrea ty fanahelo iareo. (Jaona 11:21, 33, 35) Manahelo mafe ka reke naho fa misy longo maifitse antikagne mate.

⁶ Mampionogne antikagne ty mahafantatse tie manahelo manahake antikagne ka ty Jesosy naho fa misy mate. Sady manahake an-dRae’e ty Jesosy. (Jaona 14:9) Managne hery hagnafahagne o fateo ty Jehovah, sady toe hanao izay tsy ho ela.

7, 8. Nagnino ro tsy nimete ty Marita naho fa ho sinokake ty kibory nisy i Lazarosy, faie akore ty natao i Jesosy?

⁷ Mbe zoe i Jesosy nirindrigne vato bey ty kibory nilevegna  i Lazarosy. Hoe ty Jesosy: “Afaho i vatoy.” Faie tsy nimete ty Marita, fa efatse andro ty nimateza i Lazarosy. (Jaona 11:39) Tsy nifanta i Marita ty raha hatao i Jesosy i Lazarosy.

⁸ Hoe ty Jesosy tamy i Lazarosy: “Miakara!” Nahalatsa ty raha nitrea i Marita naho i Maria. “Le niakatse boake ao i lahilahy fa nimatey sady mbe nifehe lamban-dolo iaby o tagna’eo naho o tombo’eo.” (Jaona 11:43, 44) Nivelogne indraike ty Lazarosy! Niharo tamy ty longo’e naho ty ragne’e reke. Nifamihigne naho nifanazoke sady nifampirehake tama’e iareo. Nahalatsa fa nivelome i Jesosy indraike ty Lazarosy.

9, 10. a) Ia ty nagnomey hery i Jesosy nameloma’e ty mate? b) Nagnino ro sarobily amantikagne ty fitantaragne miomba ty famelomagne ty mate?

⁹ Ty hery i Jesosy vao ty nameloma’e ty mate? Aha’a. Nivavake tamy i Jehovah hey ty Jesosy, taloha ty nameloma’e i Lazarosy. I Jehovah ty nagnomey aze hery hameloma’e i Lazarosy. (Vakio Jaona 11:41, 42.) Tsy i Lazarosy avao ty nivelomegne. Rehafe ty Baiboly fa narare mafe ty somondrara raike 12 taogne. Fa namoe fo ty Jairo rae’e, le nihalale tamy i Jesosy mba hagnasitragne aze, fa io raike avao ty ana’e. Naho mbe nirehake tamy i Jesosy ty Jairo, le niavy ty lahilahy raike sady nirehake tie: “Fa mate i ana’oy, a inogne ty mbe anahiragna’o o Mpagnanatseo?” Fa hoe ty Jesosy tamy i Jairo: “Ko matahotse, fa manàgna finoagne avao.” Nimbamy i tragno i Jairoy mbeo ty Jesosy. Naharey sady nahatrea ndaty tomagny reke naho fa narine i tragnoy. Hoe ty Jesosy: “Soa hinane zay, fa tsy  mate reke fa miroro.” Tsy fanta i Jairo mirovaly ty teà i Jesosy horehafegne. Nampiakare i Jesosy iaby ty ndaty tamy i tragno nisy i somondraray ao, fa i Jairo mirovaly avao ty nengà’e hizilike ao. Nirambese i Jesosy ty tagna i somondraray, le hoe reke: “O pelake, hoe raho ama’o: ‘Mitsangàna!’ ” Eretsereto ty hafalean-drae’e naho i rene’e naho fa nahatrea aze nitsangagne sady nandeha! Nivelome i Jesosy i anak’ampela iareoy. (Marka 5:22-24, 35-42; Lioka 8:49-56). Tafara izay naho fa trea i Jairo mirovaly i ana iareoy, le tsiaro iareo ty nampiasae i Jehovah i Jesosy mba hamelomagne i ajajay. *

¹⁰ Mbe nimate indraike i ndaty nivelome i Jesosy rey. Faie sarobily iaby ty raha nivakientikagne miomba o ndaty rehoe, fa mahavy antikagne hanan-draha tamaegne. Teà i Jehovah hovelomegne o ndatio, sady hanao izay reke.

11. Inogne ty ampianare ty Mpitoriteny 9:5 antikagne miomba i Lazarosy?

¹¹ Rehafe ty Baiboly mazava soa “fa ty mate tsy misy raha rendre’e.” Izay ty raha nanjò i Lazarosy. (Mpitoriteny 9:5) Izay ty teà i Jesosy horehafegne naho fa nanao tihoe reke, miroro ty Lazarosy. (Jaona 11:11) “Tsy misy raha rendre’e” ty Lazarosy tamy ie tan-kibory aoy.

12. Akore ty ahafantarantikagne tie nivelomegne vata’e ty Lazarosy?

 ¹² Maro ty ndaty nahatrea ty nameloma i Jesosy i Lazarosy. Ndra i fahavalo i Jesosy rey ka nahatrea ty nanoa’e o fahagagagne iohoe. Nivelogne ty Lazarosy, sady izay ty nagnamaregne tie nisy ty famelomagne ty mate. (Jaona 11:47) Nino i ndaty maro nitilike i Lazarosy rey tie, nirahen’Andrianagnahare vata’e ty Jesosy. Tsy nahafale i fahavalo i Jesosy rey izay, le nipay fomba hamonoagne i Jesosy naho i Lazarosy iareo.—Jaona 11:53; 12:9-11.

13. Inogne ty atokisantikagne fa hamelogne ty mate ty Jehovah?

¹³ Nirehafe i Jesosy fa hovelomegne iaby “ze ankibory ao.” (Jaona 5:28) Ty dika izay, hovelome i Jehovah indraike ze ndaty agn’eretsere’e ao. Tsy maintsy tsiarove i Jehovah iaby ty miomba o ndatio naho fa hamelogne ty mate reke. Ho vita’e vao zay? Agnarivo’e tapetrisa o vasiagneo, faie rehafe ty Baiboly tie, hay i Jehovah tsikiraidraike ty agnara’e. (Vakio Isaia 40:26.) Kanao tsiaro’e iaby ty agnara o vasiagneo, le azo antoke fa ho tsiaro’e iaby ka ty miomba ty ndaty hovelome’e. Fa ty lahibey ama’e, i Jehovah ty namorogne ze kila raha. Fantantikagne amy izay fa managne hery hamelomagne ty mate reke.

14, 15. Mampianatse inogne antikagne ty reha i Joba miomba ty famelomagne ty mate?

¹⁴ Nino ty famelomagne ty mate ty lahilahy tsy nivalike atao tihoe Joba. Hoe reke: “Naho mate ty lahilahy tsy marare, le mbe ho velogne indraike vao reke?” Le hoe reke tamy i Jehovah: “Hikanjy rehe, le hanoigne azo raho. Fa hagniry mafe hahavazoho ty asa ty fità’o rehe.” Maregne zay! Nahafantatse ty Joba tie, fa  tsy ligne i Jehovah ty fotoagne hameloma’e ty mate.—Joba 14:13-15.

¹⁵ Inogne ty tsapa’o amy ty fampitamàgne miomba ty famelomagne ty mate? Va’e hieretseretse rehe tie: ‘Mbe hovelomegne indraike vao ty longoko naho ty ragneko fa nimate?’ Mampionogne antikagne ty mahafantatse tie magniry hamelogne ty mate ty Jehovah. Andao tikagne hagnente ty irehafa ty Baiboly tie hitoboke aia iareo, sady ia ty hovelomegne.

16. Hanao akore ty fiaigna ze ndaty hovelomegne an-tane etoy?

¹⁶ Niharo tamy ty longo’e naho ty ragne’e indraike, i ndaty nivelomegne tan-tane etoy taloha rey. Mbe ho soa mandilatse izay ty raha hiseho amy ty hoavy. Inogne ty anto’e? Hiaigne nainai’e an-tane etoy sady tsy ho mate sasa ze ndaty hovelomegne. Sady ho soa ka ty tontolo hisy iareo, fa tsy manahake ty tontolo misy antikagne hinane zao. Tsy hisy aly, malaso naho aretegne ty ao.

17. Ia ty hovelomegne?

¹⁷ Ia ty hovelomegne? Hoe ty Jesosy: ‘Ho rey ze an-kibory agne ty feo’e, le hiakatse iareo.’ (Jaona 5:28, 29) Hoe ka ty Apokalypsy 20:13: “Nagnakatse ze nimate tama’e ao i riakey, le ty fahafatezagne naho o Kiborio ka nagnakatse ze nimate tama’e ao.” Ie zay, ho velogne indraike ty ndaty an-tapetrisa’e fa nimate. Fa nirehafe i apositoly Paoly ka tie, “hisy ty famelomagne ze maregne naho ze tsy maregne.” (Vakio Asan’ny Apostoly 24:15.) Inogne ty teà izay horehafegne?

18. Ia o ndaty ‘maregne’ hovelomegneo?

 ¹⁸ Agnisa “ze maregne” ze mpanompo i Jehovah tsy nivalike, velogne taloha ty niavia i Jesosy an-tane etoy. Manahake i ry Noa, i Abarahama, i Saraha, i Mosesy, i Rota vaho i Esitera. Sambe hovelomegne an-tane etoy iareo. Hahatrea ty ila’e amo o ndaty reo rehe, naho fa mamaky ty Hebreo toko 11. A vaho akore ze  mpanompo i Jehovah tsy mivalike mate amy izao? Mbe agnisa “ze maregne” hovelomegne ka iareo.

19. Ia o ndaty ‘tsy maregneo,’ sady inogne ty tombotsoa homey i Jehovah iareo?

¹⁹ Agnisa “ze tsy maregne” ze ndaty agnarivo’e tapetrisa fa nimate, faie mbe tsy nahafantatse i Jehovah. Tsy haligno i Jehovah iareo ndra tie fa nimate. Hovelome’e iareo, sady homea’e tombotsoa hianatse ty miomba aze naho hanompo aze.

20. Inogne ty anto’e mahavy ty ndaty ila’e tsy hovelomegne?

²⁰ Ty dika izay vao hovelomegne iaby ze ndaty fa nimate? Tsy izay. Nirehafe i Jesosy fa misy ndaty ila’e tsy hovelomegne.(Lioka 12:5) Ia ty manapa-kevetse ndra hovelomegne ndra tsy hovelomegne ty ndaty raike? I Jehovah. Ie ty Mpitsara fara’e, faie fa nimea’e fahefagne “hitsara ty velogne naho ty mate” ka ty Jesosy. (Asan’ny Apostoly 10:42) Tsy hovelomegne ze ndaty mpanao raty naho ze tsy mete miova amy ty raty anoe’e. Henteo ty Fagnazavagne 19.

21, 22. a) Inogne ty dika tihoe hovelomegne an-dagnitse agne? b) Ia ty ndaty voaloha’e nivelomegne an-dagnitse agne?

²¹ Rehafe ty Baiboly fa misy ndaty ila’e hiaigne an-dagnitse agne. Ho fagnahy iareo naho fa hovelomegne an-dagnitse agne fa tsy ho ndaty.

²² I Jesosy ty ndaty voaloha’e nivelomegne ho fagnahy. (Jaona 3:13) Nivelome i Jehovah reke telo andro tafara ty namonoagne aze. (Salamo 16:10; Asan’ny Apostoly 13:34, 35) Tsy ndaty ty Jesosy naho fa nivelomegne. Nagnazava ty apositoly Petera tie “nofotse reke naho fa vinono, faie fagnahy naho fa vinelogne.” (1 Petera 3:18) Nivelomegne ho fagnahy mahery ty  Jesosy! (1 Korintianina 15:3-6) Faie rehafe ty Baiboly, fa tsy ie raike avao ty vinelogne ho fagnahy.

23, 24. Ia o “agnondry tsy ampe” nirehafe i Jesosy reo, sady fire ty isa’e?

²³ Hoe ty Jesosy tamo o mpiana’e reo, taloha ty nimateza’e: “Handeha hagnomagne toeragne ho anareo raho.” (Jaona 14:2) Ty dika izay, hovelomegne hiharo ama’e an-dagnitse agne ty ila’e amy ty mpanonjohy aze. Fire ty isa’e? Nirehafe i Jesosy tie, “agnondry tsy ampe” iareo. (Lioka 12:32) Nisy “144 000” isake, ty ndaty nitrea i apositoly Jaona niharo amy i Jesosy, tamy ie “nitsangagne amy i Vohitse Ziona eoy.”—Apokalypsy 14:1.

²⁴ Nanomboke ombiagne ty namelomagne o 144 000 reo? Rehafe ty Baiboly fa nanomboke zay, naho fa nanjaka an-dagnitse agne ty Kirisity. (1 Korintianina 15:23) Miaigne amo o fotoagne iohoe tikagne hinane zao. Fa maro amo o Kirisitianagne 144 000 reo, ty fa nivelomegne an-dagnitse agne. Naho mate ze mbe velogne an-tane etoy amy iareo amo o andro hinane zao, le avy le velomegne mba hiaigne an-dagnitse agne. Fa hiaigne amy i Paradisa an-tane etoỳ, ty ankamaroa ty ndaty hovelomegne amy ty hoavy.

25. Inogne ty hianarantikagne amy ty toko manonjohy itoy?

²⁵ Tsy ho ela ty Jehovah, le hagnafake o fateo, sady le lia’e tsy hisy sasa ty fate! (Vakio Isaia 25:8.) Fa hanao inogne an-dagnitse agne o ndaty ho agne reo? Rehafe ty Baiboly fa hiharo Fitondragne amy i Jesosy iareo. Hianatse ty miomba o fitondragne iohoe tikagne amy ty toko manonjohy itoy.