1-3. Ginani gi modego hatshavbothu pasoni gwagyo, nigu ina Jehovha a na hi tshula kharini?

NGA dzi dundrugeya na u konedwe gu vbanya pasoni khu gighoho wa sa girago. Gu mwalo ndziya nyo thuge u duswa pasoni momo. So gira khatshi wumindru wago wubotshwa basi, nigu u mwalo tshivba nyo gire gilogyo. Ganiolu, hwane nyo ba u vbeledwe khu guvireya gwatshavbo, wa guti gu khuwe womo a gu na ni tshivba nyo gu duse pasoni nigu uye tumbiside gu khuye a na gu phasa! U di hadzi gu dzipwa kharini?

² Ethu hatshavbo hi sibotshwa nya lufu. Ambari ho zama gu li vhika, mwalo a vbulugago. Ganiolu Jehovha na ni tshivba nyo hi duse gufani. Nigu hi tumbiside gu khuye “nala nya guhegise a na padwago, khu gufa.” — 1 Vakorinto 15:26.

³ Nga dundrugeya gutshulega u na gu pwago tepo u no ne gu garadzega gambe khu gufa! Ganiolu Jehovha kha na nga hegeya avba nyo fuvise gufa basi. Uye gambe a na wusa ava va fudego gasi va vbanya gambe. Nga pimisa gu khuwe si na gu khuha kharini isoso. Uye a ngu tumbisa gu khuye vale “va fudego” va na vbanya gambe. (Isaya 26:19) Isoso khiso Bhibhiliya yi si ranago gu khiso guwuga ga ava va fudego.

4. a) Ginani gi nga hi thaveleyago ho fedwa khu givbango nya ndranga yathu mwendro pari? b) Khu vamani va nga ba vari dzipari nya dzikhongolo dza Jesu?

⁴ Ho fedwa khu givbango nya ndranga yathu mwendro pari, wuvi wakona wu ngu rera. Ho dzipwa na hiri  mwalo tshivba. Gimwalo hi kodzago gu gira gasi gu bweledzeya womi muthu yoyo. Ganiolu Bhibhiliya yi ngu hi thaveleya khu lisine. (Leri 2 Vakorinto 1:3, 4.) Hongoleni hi wona gimwegyo nya siyeyedzo si nonedzago edzi Jehovha ni Jesu va dzinago khidzo gu bweledzeya womi sigodwa sathu. Tepo Jesu a nga ba ari mafuni, a di gu ya wuseya Lazaro ni vandriyaye, Marta ni Mariya. Vatshavbo va vararu va diri dzipari nya dzikhongolo dza Jesu. Bhibhiliya yari khiyo: “Jesu a di gu gola Marta, ni ndriyaye Mariya, ni Lazaro.” Ganiolu, litshigu limwedo Lazaro a difa. — Johane 11:3-5.

5, 6. a) Ginani a nga gira Jesu tepo a nga wona valongo va Lazaro ni dzipari dzaye na va vbisega? b) Khu ginani si hi thaveleyago guti edzi Jesu a dzi pwidego khidzo khu gufa?

⁵ Jesu hongode a ya thaveleya Marta ni Mariya. Tepo Marta a pwidego gu pwani Jesu a nguta, a di duga khu dhoropani a mu khinga. A di tsaka khu gu wona Jesu, ganiolu a mu embeya khuye: “Pfhumu, nari pwani u di romo avba, ndriyangu gima na safa!” Marta a di gu pimisa gu khuye Jesu gedwe gu vboha. Hwane nya isoso, Jesu a di wona Mariya, ndriye wa Marta, na gu liya. Tepo a nga wona wuvi wawe a di vbisega ngudzu, a liya nuye. (Johane 11:21, 33, 35) Pwide guvbisa nya gukhongolo ogu hi gu pwago tepo hi fedwago khu muthu hi mu golago.

⁶ Guti gu khethu Jesu o dzipwa nga edzi hi dzi pwago khidzo khu gufa si ngu hi thaveleya. Nigu Jesu a ngu fana ni Babe waye. (Johane 14:9) Jehovha na ni tshivba nyo fuvise gufa kala gupindruga, nigu khiso isoso a na girago nugunugu.

7, 8. Khu ginani Marta a nga ba a si dzini gu khuye giwindri gi duswa vbaphagotunu a nga ba a dzingidwe umo Lazaro, ganiolu ginani egi a giridego Jesu?

⁷ Tepo Jesu a nga vboha thowoni a nga ba a dzingidwe  avbo Lazaro, mwanya wakona wu di segidwe khu giwindri nya gikhongolo. Jesu a di khuye: “Dusani giwindri.” Ganiolu Marta kha nga ba a dzina. Girumbi gya Lazaro gi di khade “matshigu mana” thowoni mule. (Johane 11:39) A di si giti egi Jesu a nga ba a vbweta gu gi gira gasi gu phasa ndriyaye.

⁸ Jesu a di embeya Lazaro khuye: “Duga vbavbandze.” Esi Marta ni Mariya va si wonidego khu gulandreya si samadziside. “Mufi a di duga na hungidwe mawogo ni mawundru khu mikeka nya sindzingelo.” (Johane 11:43, 44) Lazaro a di wuswa a vbanya gambe! A tshangana ni valongo gumogo ni dzipari dzaye. Va kodzide gu mu phara, gu mu khuha ni gu ganeya naye. Gi diri gisamadziso nya gikhongolo ngudzu! Jesu a di wuside Lazaro khu gufani.

9, 10. a) Khu mani a ningindego Jesu tshivba nyo wuse vathu? b) Khu ginani matimo nya guwuswe nya vathu khu ga vafudego ma gu na ni lisima gwathu?

⁹ Ina Jesu a di wusa vathu khu tshivba yaye? Ahihi. Na si wusi Lazaro, Jesu gombede ga Jehovha nigu Jehovha mu ningide tshivba gasi gu wusa Lazaro. (Leri Johane 11:41, 42.) Lazaro khandruye enga a wusidwego. Bhibhiliya yo hi embeya khu nyamahegyane nya 12 myaga a nga ba a dwala ngudzu. Babe waye Jayiro, a di gu garadzega a bwe a lomba Jesu gasi gu mu vbanyisa. Gi diri igyo basi gyanana a nga ba ari nagyo. Na a ngo ganeya ni Jesu, gu dita vama va ta khavo gwaye: “Nyamahegyane wago fude. Khu ginani u nga gu garadzago Muhevbudzi?” Ganiolu Jesu a di embeya Jayiro khuye: “U nga thavi, khodwa basi; mwanago a na vbanya.” Khavbovbo Jesu hongode ndrangani ga Jayiro. Nari vbafuvbi ni gu beya nyumbani, Jesu wonide ni gupwa vathu na va gu liya. Jesu a di va embeya khuye: “Mu nga lili, kholu gyanana  kha gyafa, gi di lala.” Adzina babe wagyo ni mayi wagyo va samade khesi Jesu a nga ganeya. Jesu lombide gu vatshavbo va duga, a dzega basi babe ni mayi wakona a beya navo nyumbani mule a nga ba a ladzisidwe umo nyamahegyane. Khu gwadi, Jesu a di gi phara khu libogo a gi embeya khuye: “Nyamahegyane, nyi ngu gu ruma, wuga.” Nga dundrugeya gutsaka va gu manego vavelegi vagyo tepo gi nga dzegeya gu wuga gi pheya gu gimbiya! Jesu a di wuside gyanana gyawe. (Marko 5:22-24, 35-42; Luka 8:49-56) Gukhugeya litshigu lolo, vo wona nyamahegyane wawe, va di gu dundruga esi Jehovha a va giredego khu gu thumisa Jesu. *

¹⁰ Vathu vale Jesu a va wusidego va fude gambe khu gugimbiya nya tepo. Ganiolu esi hi si hevbulago khu vathu vovo si na ni lisima kholu si ngu hi ninga gutumba nya lisine. Jehovha a ngu dzina gu wusa vathu, nigu a na si gira.

11. Ginani egi Muhevbudzi 9:5 a hi hevbudzago khu Lazaro?

¹¹ Bhibhiliya yi ngu tshamuseya gwadi gu khiyo ‘vale va fudego kha va pimi gambe gilo.’ Isoso si wonegide na siri lisine avba ga Lazaro. (Muhevbudzi 9:5) Kha nga edzi Jesu a nga ba a ganede, si di gu fana ni gu ba Lazaro a lade. (Johane 11:11) Na a nga romo thowoni, Lazaro ‘kha nga ba a pima gilo gambe.’

12. Ho dziti kharini gu khethu khu lisine Lazaro wusidwe?

¹² Vathu nya vangi va mu wone Jesu na gu wusa Lazaro.  Ambari valala va Jesu va di gu dziti gu khavo Jesu giride giliwugiso gyogyo. Lazaro a di gu vbanya, nigu isoso si di gu yeyedza kamo gu khiso gu di wusidwe muthu khu ga vafudego. (Johane 11:47) Vbavbandze nya isoso, vathu nyo khaguri va hongode va ya wuseya Lazaro, nigu khu kotani nya esi va nga si wona, va di pheya gu khodwa gu khavo Jesu a di rumedwe khu Nungungulu. Valala va Jesu kha va si gola isoso, khu kharato va di hunga gikungo nyo songe Jesu ni Lazaro. — Johane 11:53; 12:9-11.

13. Khu ginani hi kodzago gu tiyisega gu khethu Jehovha a na wusa vale va fudego?

¹³ Jesu a di khuye “vatshavbo va fudego va gomo marowoni” va na wuswa. (Johane 5:28) Isoso so thula gu khiso vatshavbo vale Jehovha a va dundrugago va na wuga va vbanya gambe. Ganiolu, gasi gu Jehovha a wusa muthu, gu vbwetega gu a dundruga satshavbo si yelanago ni muthu yoyo. Ina khu lisine a ngu kodza gu gira isoso? Nga pimisa, gu na ni dzibhiliyoni nya dzinyeledzi ndadzini. Bhibhiliya yari khiyo Jehovha a ngu mati malina nya dzinyeledzi dzatshavbo khu mweyo ni mweyo. (Leri Isaya 40:26.) O ba a kodza gu dundruga lina nya nyeledzi mweyo ni mweyo, vbavbanze nyo kanakane uye a ngu kodza gu dundruga khu guvbevbuga satshavbo si yelanago ni vale a na va wusago. Gimbe gilo gambe nya lisima khu gu Jehovha vangide silo satshavbo, khu kharato ethu hi ngu dziti gu khethu uye na ni tshivba nyo wuse vathu.

14, 15. Malito ya Joba mo hi hevbudza ginani khu guwuswa ga ava va fudego?

¹⁴ Joba, mwama nyo tumbege, a di gu khodwa gu khuye ava va fudego va na wuswa. Uye a di khuye: “Naripwani muthu a gufa, a ngu dzi kodza guwuga a vbanya gambe . . .” Khavbovbo a di embeya Jehovha khuye: ‘U na rana, eni nyi na gu hakha. U na dileya thumo  nya mandza yago.’ Khu lisine, Joba a di gu dziti gu khuye Jehovha o vireya tepo eyi a na wusago ava va fudego. — Joba 14:13-15, NM.

¹⁵ Wo dzipwa kharini khu gitumbiso nya guwuswe ga ava va fudego? Gudzina saye u nga dzi wudzisa, ‘Ina dzipari ni valongo vangu va fudego va na wuga va vbanya navo?’ Si ngu hi thaveleya guti gu khethu khu lisine Jehovha a ngu dzina gu wusa ava va fudego. Hongoleni hi wona esi Bhibhiliya yi si ganeyago khu ava va na wuswago ni omu va na vbanyago umo.

16. Mavbanyelo muni ma na manwago khava va na wuswago gasi gu vbanya mafuni?

¹⁶ Gale yoyo, ava va nga wuswa va di tshanganiswa ni valongo gumogo ni dzipari dzawe mafuni momu kamo. Isoso si na girega gambe mindru wa tshigu, ganiolu khu ndziya nya tshukwana ngudzu. Khu ginani? Kholu ava va na wuswago va vbanya gambe mafuni va na ningwa lithomo nyo vbanye kala gupindruga nigu avo gima kha va na ngafa gambe. Nigu va na vbanya mafuni ma hambanidego ngudzu ni aya hi vbanyago umo muhuno. Gu na ba guri mwalo nyimbi, wughevenga, ambari madwali.

17. Khu vamani va na wuswago khu gufani?

¹⁷ Khu vamani va na wuswago khu gufani? Jesu a di khuye ‘vatshavbo va fudego va gomogo marowoni va napwa lito laye, va wuga.’ (Johane 5:28, 29) Livru nya Gutuledwa 20:13 niyo yo hi embeya esi: “Linene li di dusa vbavbandze vafi va nga dzamago ga ilo, lufu ni lithowo si di bweledza vafi vawe.” Khu lisine, vathu nya dzibhiliyoni va na wuga va vbanya gambe. Mupostoli Pawulo ganede gu khuye “va nya gululama ni va nya sighoho” va na wuswa khu gufani. (Leri Mithumo 24:15) So thula ginani isoso?

18. Khu vamani “va nya gululama” va na wuswago?

 ¹⁸ Vbakari ga “va nya gululama” go patwa sithumi sa Jehovha nyo tumbege si vbanyidego na a si guti mafuni Jesu. Vathu nya nga Nowa, Abrahama, Sara, Mosi, Rute ni Esiteri va na wuswa va vbanya mafuni momu. U nga hevbula khu vambe vama ni vanyamayi vovo omu ga Vahebheru gipimo 11. Ahati sithumi nyo tumbege sa Jehovha  si fago teponi yathu? Aniso “va nya gululama,” khu gighelo gyogyo va na wuswa.

19. Khu vamani “va nya sighoho”? Lithomo muni eli Jehovha a na va ningago?

¹⁹ Vbakari ga “va nya sighoho” go patega dzibhiliyoni nya vathu va nga ne mana lithomo nyo muti Jehovha. Ambari olu va fudego, Jehovha kha va divala. Uye a na va wusa, va na mana lithomo nyo hevbule khuye va bwe va mu thumeya.

20. Khu ginani va si rigu vatshavbo va na wuswago?

²⁰ Ina isoso so thula gu khiso vatshavbo va fudego va na wuswa? Ahihi. Jesu ganede gu khuye vomo ava va no ne gu wuswa. Khu mani a na hungago gu khuye muthu nyo khaguri a na wuswa mwendro ne? Jehovha khuye Mulamuli nyo hegise, ganiolu uye gambe ningide tshivha Jesu “kha nga mulamuli nya va nya guvbanya ni va nya gufa.” (Mithumo 10:42) Ni wevbini a na lamudwago kha nga gighohi gi si dzumeyigo gu vbindrugedza mavbanyelo, kha na nga wuswa. — Wona Tshamuselo 19.

21, 22. a) So thula ginani gu wuswa gasi gu ya vbanya ndzadzini? b) Khu mani muthu nyo pheye gu wuswa gasi gu ya vbanya ndzadzini?

²¹ Bhibhiliya yo hi embeya gambe khu vathu nyo khaguri va na ya vbanyago ndzadzini. Tepo muthu a wuswago gasi gu ya vbanya ndzadzini, kha wuswi gasi gu vbanya gambe kha nga muthu nya nyama. O wuswa gasi gu ya vbanya ndzadzini kha nga muthu nya liphuvbo.

²² Jesu khuye muthu nyo pheye gu mana guwuswa nya makhalelo yoyo. (Johane 3:13) Hwane nya matshigu mararu Jesu na songidwe, Jehovha mu wuside. (Dzindzimo 16:10; Mithumo 13:34, 35) Jesu kha wuswa nari ni givili nya nyama. Mupostoli Pedro o tshamuseya gu khuye Jesu “fude khu givili, aholu wusidwe khu liphuvbo.”  (1 Pedro 3:18) Jesu wusidwe a vbanya kha nga muthu nya liphuvbo nya tshivba! (1 Vakorinto 15:3-6) Ganiolu Bhibhiliya yari khiyo kha na nga ba ari uye enga.

23, 24. Khu vamani “tshambi dugwana” ava Jesu a ganedego khavo nigu vathu vangani?

²³ Na a si gufi, Jesu embede vapizane vaye nyo tumbege khuye: “Nyi ngu mi thangela nyiya dongisela wulanga.” (Johane 14:2) Isoso so thula gu khiso vambe vbakari nya valandreyi vaye va di hadzi gu wuswa gasi gu ya vbanya naye dzadzini. Vangani? Jesu ganede gu khuye va diri tengo nya wudugwana, “tshambi dugwana.” (Luka 12:32) Mupostoli Johane ganede tengo wakona tepo a nga wona Jesu na “emide gigomoni gya Siyoni [wa ndzadzini]. Gumogo ni Nvutana, va diromo lizana ni magumana na mana magumi mazana (144.000).” — Gutuledwa 14:1.

²⁴ Lini ma nga hadzi gu wuswa maKristo nya 144.000? Bhibhiliya yo hi embeya gu khiyo si di hadzi gu dugeleya hwane nyo ba Kristo a phede gu fuma ndzadzini. (1 Vakorinto 15:23) Ethu ho vbanya teponi yakona olu, nigu vangi nya ava nya 144.000 va wusidwe gasi va ya vbanya ndzadzini. Vale va ngo vbanyago mafuni va bwe vafa matshigoni yathu, vo dzegeya gu wuswa va ya vbanya ndzadzini. Ambari ulolo, vathu nya vangi va na wuswa va vbanya kala gupindruga Paradhesini mafuni momu.

25. Ginani hi na hevbulago khigyo omu nya gipimo gi landreyago?

²⁵ Nugunugu Jehovha a na tshula vathu gufani a bwe a fuvisa gufa kala gupindruga! (Leri Isaya 25:8.) Ganiolu ginani egi ava va hongolago ndzadzini va na ya girago iyoyo? Bhibhiliya yo tshamuseya gu khiyo avo va na ya fuma ni Jesu Mufumoni waye. Hi na hevbula simbe khu mufumo wowo omu nya gipimo gi landreyago.