1-3. 1) ¿Tuku xlakata wanaw pi xtachuna la kpulachin tanumaw? 2) ¿Tuku natlawa Jehová xlakata nakinkalakgmaxtuyan?

KALILAKPUWANTI pi wix limawakakana tuku nitu tlawapat, tamaknukana kpulachin chu wanikana pi nikxni katitaxtu. Lakpuwana pi nila tuku tlawaya. Pero akxni chuna titaxtupat, max katsiya pi wi tiku tlan namaxtuyan chu nachuna malaknuniyan pi xla tlan namakgtayayan. ¿La xmakgkatsi?

² Putum akinin xtachuna la kpulachin tanumaw xlakata putum akinin niyaw. Nila tuku tlawayaw xlakata natsalaniyaw. Pero Jehová tlan nakinkamakgtayayan. ¿La natlawa? Xla malaknunit pi «xa’awatiya kintalamakgasitsinkan, [...] linin, namalakgsputukan» (1 Corintios 15:26).

³ Kalilakpuwanti la namakgkatsiyaw akxni nialh katiʼanalh linin. Pero Jehová ni kaj xman wa namasputu linin. Nachuna, nakamalakastakwani tiku nikgonita. Jehová natlawa pi nalatamaparakgo, xlakata xla malaknu pi «tiku nikgonit nalatamaparakgo» (Isaías 26:19). Wa uma tuku Biblia limapakuwi talakastakwanat.

4. 1) ¿Niku tlan natekgsaw takgoxamixat akxni niy chatum tiku xalak kifamiliajkan o kiʼamigojkan? 2) ¿Tiku tlan xkatalalin Jesús?

⁴ Akxni niy tiku xalak kifamiliajkan o chatum kiʼamigojkan, makgkatsiyaw pi nila tuku tlawayaw. Nitlan makgkatsiyaw, xlakata nila malakastakwaniyaw tiku nilh. Pero tuku wan Biblia lu kinkamakgoxamixiyan (kalikgalhtawakga 2 Corintios 1:3, 4). Kaʼakxilhwi akgtum  liʼakxilhtit nema limasiya pi Jehová chu Jesús lu kamalakastakwaniputun tiku xalak kifamiliajkan chu kiʼamigoskan. Akxni Jesús xlama kKatiyatni, ankgalhin xkalakgapaxialhnan Lázaro chu xnatalan, Marta chu María. Xkgalhtutukan lu tlan xtalalinkgo Jesús. Biblia wan: «Jesús xkapaxki Marta, María chu Lázaro» (Juan 11:3-5). Pero akgtum kilhtamaku Lázaro nilh.

5, 6. 1) ¿Tuku tlawalh Jesús akxni akxilhli pi xfamilia chu xʼamigos Lázaro xtasamakgolh? 2) ¿Tuku xlakata kinkamakgoxamixiyan tuku makgkatsilh Jesús?

⁵ Jesús alh kamakgoxamixi Marta chu María. Akxni Marta katsilh pi Jesús xtalakatsuwima kkachikin, alh paxtokga. Xla lu lipaxuwalh akxni akxilhli Jesús, pero wanilh: «Komo unu xtitawila, kintala ni xtinilh». Marta lakpuwa pi Jesús lu xmakgapalanit. Alistalh, Jesús na akxilhli María pi xtasama. Akxni akxilhli pi xfamilia chu xʼamigos Lázaro lu xtasamakgolh, xla na lu lilipuwa chu tsukulh tasa (Juan 11:21, 33, 35). Jesús na makgkatsilh takatsanajwat nema makgkatsiyaw akxni niy tiku lu paxkiyaw.

⁶ Takatsanajwat nema makgkatsilh Jesús kinkamakgoxamixiyan. Kinkamasiyaniyan pi xla chu xTlat ni akxilhputunkgo linin (Juan 14:9). Nachuna, Jehová kgalhi litliwakga xlakata namasputu linin chu nialh makgas chuna natlawa.

7, 8. 1) ¿Tuku xlakata Marta ni xlakaskin pi xmakgenuka chiwix niku xmaknukanit Lázaro? 2) ¿Tukuya milagro tlawalh Jesús?

⁷ Jesús alh niku xmaknukanit Lázaro. Niku xlaktanukan xlilakgatalakanit akgtum lanka chiwix. Wa xlakata Jesús wa: «Kamakgenutit chiwix». Pero Marta ni xlakaskin pi xmakgenuka, xlakata xtitaxtunita akgtatita kilhtamaku lata xtiyatliwa Lázaro xwi kputaknun (Juan 11: 39). Marta ni xkatsi tuku xʼama tlawa Jesús xpalakata Lázaro.

⁸ Jesús pixlanka wa: «¡Lázaro, kataxtu!». Wa xlakata, Marta chu María lu kaks kamalakawanilh tuku akxilhkgolh: «Chixku tiku xninit taxtulh chu xlitamakgchinit lhakgat lata kxtantun chu kxmakan» (Juan 11:43, 44). ¡Lázaro xlakastakwananit! Akxtum xkatawilapa xfamilia chu xʼamigos. Putum tlan kxamakgo chu xtachuwinankgo. ¡Akgtum lanka milagro! Jesús malakastakwanilh Lázaro.

9, 10. 1) ¿Tiku maxkilh litliwakga Jesús xlakata tlan nakamalakastakwani tiku nikgonita? 2) ¿Tuku xlakata kinkamakgtayakgoyan uma liʼakxilhtit xlakata tiku kamalakastakwanika?

⁹ ¿Tiku maxkilh litliwakga Jesús xlakata tlan nakamalakastakwani tiku nikgonita? Akxni nina xmalakastakwani Lázaro, Jesús tlawanilh akgtum oración Jehová. Chu Jehová maxkilh litliwakga xlakata namalakastakwani (kalikgalhtawakga Juan 11:41, 42). Pero ni kajwatiya Lázaro tiku malakastakwanika. * Akgtum liʼakxilhtit, Biblia na lichuwinan chatum aktsu tsumat tiku xkgalhi akgkutiy kata tiku lu xtatatla. Xtlat xwanikan Jairo chu ni xkgalhi atanu kamanan. Jairo lu xlilakgaputsama chu tasaskinilh Jesús pi xmapaksalh xtsumat. Akxni xtachuwinama Jesús, minkgolh makgapitsi lakchixkuwin chu wanikgolh Jairo: «¡Mintsumat nilha! Nialh  kamakglhuwi Makgalhtawakgena». Pero Jesús wanilh: «Ni kapekuanti, kajwatiya kalimasiya takanajla». Akxtum ankgolh kxchik Jairo. Akxni xtalakatsuwimakgolh kchiki, Jesús akxilhli pi latamanin lu xtasamakgolh. Jesús kawanilh: «¿Tuku xlakata tasapatit chu lu tachilipatit? Aktsu tsumat nitu ninit kaj lhtatama». Max xnatlatni uma tsumat ni xʼakgatekgskgo tuku xwamputun Jesús. Alistalh, Jesús kawanilh pi xtaxtukgolh tiku xtanumakgolh kchiki chu alistalh kalilh xnatlatni tsumat niku xwilikanit. Jesús makgachipalh chu wanilh: «Aktsu tsumat, akit kwaniyan: “¡Kataki!”». Kalilakpuwanti tapaxuwan nema makgkatsikgolh xnatlatni tsumat akxni akxilhkgolh pi xtsumatkan takilh chu tsukulh tlawan. ¡Jesús xmalakastakwaninit uma aktsu tsumat! (Marcos 5:22-24, 35-42). Akxni Jairo chu xpuskat xʼakxilhkgolh xtsumatkan, xlakapastakkgolh tuku xtlawanit Jehová xpalakatakan.

¹⁰ Latamanin tiku Jesús kamalakastakwanilh alistalh niparakgolh. Pero umakgolh liʼakxilhtit xlakata tiku kamalakastakwanika lu kinkamakgtayayan xlakata kinkamaxkikgoyan xaxlikana takgalhkgalhin. Jehová kamalakastakwaniputun tiku nikgonita chu chuna natlawa.

11. Chuna la wan Eclesiastés 9:5, ¿tuku akgspulalh Lázaro akxni nilh?

¹¹ Biblia wan pi tiku nikgonita «nialhtu katsikgo» (Eclesiastés 9:5). Wa uma tuku akgspulalh Lázaro. Akxni xwi kputaknun, ni xkatsi tuku xlama. Chuna la wa Jesús, xtachuna la komo Lázaro klhtatama (Juan 11:11).

12. ¿Tuku likatsiyaw pi xlikana malakastakwanika Lázaro?

¹² Lhuwa latamanin akxilhkgolh akxni Jesús malakastakwanilh Lázaro. Asta xtalamakgasitsin xkatsikgo pi xla  xtlawanit uma milagro. Nitila xwan pi Lázaro ni malakastakwanikanit, xlakata Lázaro kstaknama (Juan 11:47). Nachuna, lhuwa latamanin kiʼakxilhkgolh Lázaro chu tsukukgolh kanajlanikgo pi Dios xmalakgachanit Jesús. Uma ni lakgatikgolh xtalamakgasitsinkan Jesús, wa xlakata lakkaxwilikgolh namakgnikgo Jesús chu Lázaro (Juan 11:53; 12:9-11).

13. ¿Tuku xlakata liwana katsiyaw pi Jehová nakamalakastakwanipara tiku nikgonita?

¹³ Jesús lichuwinalh pi «putum tiku wilakgolh kputaknun» nakamalakastakwaniparakan (Juan 5:28, nota). Uma wamputun pi Jehová nakamalakastakwanipara tiku wilakgo kxtalakapastakni. Xlakata tlan chuna natlawa talakaskin nalakapastaka la xwankgonit chatunu chatunu latamanin. ¿Tlan nakalakapastaka Jehová putum latamanin tiku nikgonita? Kalilakpuwanti uma: kʼakgapun wilakgolh lhuwa miles staku, chu Biblia wan pi Dios katsi tuku kawanikan akgatunu akgatunu staku (kalikgalhtawakga Isaías 40:26). Komo Jehová katsi tuku kawanikan akgatunu staku, xlikana pi tlan nalakapastaka la xwankgonit chatunu chatunu latamanin tiku nalakastakwanankgo. Jehová malakatsukilh putum tuku anan, wa xlakata kgalhi litliwakga nakamalakastakwani tiku nikgonita.

14, 15. ¿Tuku kinkamasiyaniyan xtachuwin Job xlakata talakastakwanat?

¹⁴ Chatum kskujni Jehová xwanikan Job xkanajla pi naʼanan talakastakwanat. Akgtum kilhtamaku xla kgalhskininalh: «Komo chatum chixku naniy, ¿tlan nalatamapara?». Wa xlakata wanipa Jehová: «Wix nakixakgatliya chu akit nakkgalhtiyan. Xlakata lu naʼakxilhputumparaya tuku litlawanita mimakan». Xtachuwin Job kinkamasiyaniyan pi Jehová lu kamalakastakwaniputun tiku nikgonita (Job 14:13-15).

 ¹⁵ ¿La makgkatsiya wix akxni lilakpuwana talakastakwanat? Max wix nalakpuwana: «¿Na nakamalakastakwanikan kifamilia chu kiʼamigos tiku nikgonita?». Lu kinkamakgoxamixiyan akxni katsiyaw pi Jehová lu kamalakastakwaniputun tiku nikgonita. Kaʼakxilhwi tuku wan Biblia xlakata tiku nakamalakastakwanikan chu niku nalatamakgo.

16. ¿La nawan xlatamatkan tiku nalakastakwanankgo kKatiyatni?

¹⁶ Latamanin tiku lakastakwanankgolh makgasata kilhtamaku akxtum katalatamakgolh xfamiliajkan chu xʼamigoskan unu kKatiyatni. Nachuna nala kilhtamaku nema aku mima, pero tlakg tlan nawan. ¿Tuku xlakata? Pulana, xlakata tiku nalakastakwanankgo tlan nalatamakgo putum kilhtamaku unu kKatiyatni. Chu xlipulaktiy, xlakata kakilhtamaku lu tanu nawan. Nialh katiʼanalh guerras, tuku nixatlan chu tajatat.

17. ¿Tiku nalakastakwanankgo?

¹⁷ ¿Tiku nalakastakwanankgo? Jesús lichuwinalh: «Putum tiku wilakgolh kputaknun nakgaxmatkgo xtachuwin chu nataxtukgo» (Juan 5:28, 29). Chu Apocalipsis 20:13 na wan: «Pupunu makamastalh tiku xnikgonit chu xwilakgolh anta, chu linin chu Putaknun makamastakgolh tiku xnikgonit chu xwilakgolh anta». Apóstol Pablo na lichuwinalh pi Jehová «nakamalakastakwani tiku xaʼakgstitum chu tiku ni xaʼakgstitum» (kalikgalhtawakga Hechos 24:15). ¿Tuku xwamputun?

18. ¿Tiku «xaʼakgstitum» nema nakamalakastakwanikan?

¹⁸ ¿Tiku «xaʼakgstitum»? Makgapitsi tiku xaʼakgstitum wa xlakskujnin Jehová tiku latamakgolh akxni Jesús nina xmin kKatiyatni. Makgapitsi xlakskujnin wa  Noé, Abrahán, Sara, Moisés, Rut chu Ester. Putum umakgolh nalakastakwanankgo kKatiyatni. Capítulo 11 xla Hebreos lichuwinan makgapitsi umakgolh lakchixkuwin chu lakpuskatin. Pero, ¿tuku nakaʼakgspula xlakskujnin Dios tiku nikgo la uku nema ni makgxtakgkgo Dios?  Xlakan na wa tiku kalilakgapaskan pi «xaʼakgstitum» chu nakamalakastakwanikan.

19. ¿Tiku «ni xaʼakgstitum» nema nakamalakastakwanikan? 2) ¿Tuku nakamaxki Jehová?

¹⁹ ¿Tiku «ni xaʼakgstitum»? Wa latamanin tiku ni lakgapaskgolh Jehová. Maski nikgolh, Jehová kalakapastaka. Xla nakamalakastakwanipara chu nakamaxki talakaskin pi nalakgapaskgo chu tlan kskujnin nalitaxtukgo.

20. ¿Tiku ni katilakastakwanankgolh?

²⁰ ¿Wamputun uma pi putum tiku nikgonit nakamalakastakwanikan? Ni. Jesús lichuwinalh pi makgapitsi latamanin ni katilakastakwanankgolh (Lucas 12:5). Pero, ¿tiku tlan nawan komo chatum lataman nalakastakwanan o ni? Jehová. Xla Juez xalak akgapun, pero nachuna maxkinit limapakgsin Jesús xlakata «xjuezkan nawan tiku lamakgolh chu tiku nikgonita» (Hechos 10:42). ¿Tiku ni katilakastakwanankgolh? Latamanin tiku lixkajnit xlikatsikgo chu nikxni talakgpalikgolh. (Kaʼakxilhti nota 19, niku wan «Gehena»).

21, 22. 1) ¿La lakastakwanankgo tiku ankgo kʼakgapun? 2) ¿Tiku xapulana lakastakwanalh xlakata nalatama kʼakgapun?

²¹ Biblia na lichuwinan pi makgapitsi latamanin nalatamakgo anta kʼakgapun. Umakgolh latamanin ni katilakastakwanankgolh la chatum lataman, wata la akgtum espíritu.

²² Jesús wa tiku pulana lakastakwanalh xlakata nalatama kʼakgapun (Juan 3:13). Xliʼakgtutu kilhtamaku lata xninit Jehová malakastakwanilh, pero ni malakastakwanilh la chatum lataman (Salmo 16:10; Hechos 13:34, 35). Apóstol Pedro lichuwinan pi Jesús «nilh chuna la chatum lataman, pero makglhtinalh latamat kʼakgapun»  (1 Pedro 3:18). Jesús lakastakwanalh la chatum tliwakga espíritu (1 Corintios 15:3-6). Pero Biblia wan pi ni kajwatiya Jesús xʼama lakastakwanan kʼakgapun.

23, 24. ¿Tiku kalilakgapaskan «ni xalhuwa borregos» nema lichuwinalh Jesús, chu la kgalhalit?

²³ Akxni nina xniy, Jesús kawanilh kstalaninanin: «Kama kakaxtlawaniyan lakatum niku tlan natawilayatit» (Juan 14:2). Uma wamputun pi makgapitsi kstalaninanin xʼamakgolh lakastakwanankgo kʼakgapun chu akxtum xtatawilakgolh. Jesús wa pi umakgolh latamanin xʼamakgolh litaxtukgo «ni xalhuwa borregos» xlakata ni klhuwakan xʼama wan (Lucas 12:32). Apóstol Juan lichuwinalh la kgalhalit tiku nalatamakgo kʼakgapun. Juan maʼakxilhnika pi Jesús «xya anta ksipi Sion, chu xtawilakgolh akgtum ciento tipuxamatati mil» (Apocalipsis 14:1).

²⁴ ¿Tukuya kilhtamaku xʼamakgolh lakastakwanankgo umakgolh 144,000 latamanin? Biblia wan pi xʼamakgolh lakastakwanankgo akxni Cristo xtsukulh mapakgsinan kʼakgapun (1 Corintios 15:23). Jesús mapakgsinamaja kʼakgapun, chu lhuwata anta wilakgocha. Pero makgapitsi tiku nalatamakgo kʼakgapun wilakgolhku unu kKatiyatni. Akxni nikgo, xlakan tunkun lakastakwanankgo kʼakgapun. Pero amakgapitsi latamanin nalakastakwanankgo kilhtamaku nema aku mima xlakata nalatamakgo kParaíso anta kKatiyatni.

25. ¿Tuku nakatsiniyaw kʼatanu capítulo?

²⁵ Nialh makgas, Jehová namasputu linin, chu nialhti katinilh (kalikgalhtawakga Isaías 25:8). Pero ¿tuku natlawakgo kʼakgapun umakgolh 144,000 latamanin? Biblia lichuwinan pi natamapakgsinankgo Jesús. Kʼatanu capítulo tlakg nakatsiniyaw xlakata uma tamapakgsin.