1-3. Wanem samting i kalabusim yumi olgeta? Olsem wanem Jehova i helpim yumi long lusim dispela kalabus?

TINGIM olsem kot i tok yu mas kalabus long laip olgeta bilong yu long wanpela rong yu no bin mekim. I no gat rot long yu lusim kalabus. Na i no gat gutpela samting bai painim yu, na yu no inap mekim wanpela samting long dispela. Tasol taim yu pilim olsem yu no gat rot, yu kisim save olsem i gat wanpela man i gat strong long helpim yu long lusim kalabus na em i tok promis long em bai helpim yu! Bai yu pilim olsem wanem?

² Yumi olgeta i stap kalabus long indai. Maski yumi mekim wanem samting, yumi no inap ranawe long en. Tasol Jehova i gat bikpela strong bilong helpim yumi long lusim kalabus bilong indai. Na em i tok promis olsem “dai, dispela laspela birua, em bai pinisim olgeta.”—1 Korin 15:26.

³ Tingim amamas yu bai pilim taim yu no gat wok long wari long dai! Jehova i no inap pinisim dai tasol. Em bai kirapim bek ol man i dai pinis. Tingim samting dispela bai mekim long yu. Em i tok promis olsem ol man i dai pinis ol bai stap laip gen. (Aisaia 26:19)

4. (a) Wanem samting i mekim gut bel bilong yumi taim wanpela long famili bilong yumi o pren bilong yumi i dai? (b) Husat sampela gutpela pren bilong Jisas?

⁴ Taim wanpela long famili o pren bilong yumi i dai, pen na bel hevi bilong dispela i hatwok tru long karim. Na yumi pilim olsem yumi no inap mekim wanpela  samting. I no gat wanpela samting yumi inap mekim bilong helpim dispela man long i stap laip gen. Tasol tok bilong Baibel i mekim gut bel bilong yumi. (Ritim 2 Korin 1:3, 4.) Yumi ken skelim wanpela stori i helpim yumi long save long bikpela laik bilong Jehova na Jisas long kirapim bek ol man yumi laikim tru. Taim Jisas i stap long graun, em i save go lukim Lasarus na ol susa bilong em, Maria na Marta. Ol i gutpela pren bilong Jisas. Baibel i tok: “Jisas i laikim tru Marta na susa bilong em na Lasarus.” Tasol bihain Lasarus i dai.—Jon 11:3-5.

5, 6. (a) Jisas i mekim wanem taim em i lukim famili na ol pren bilong Lasarus i krai? (b) Bilong wanem bel hevi bilong Jisas i strongim bel bilong yumi?

⁵ Jisas i go bilong mekim gut bel bilong Marta na Maria. Taim Marta i harim olsem Jisas i kam, em i go ausait long taun bilong bungim em. Em i amamas long lukim Jisas, tasol em i tokim em: “Bikpela, sapos yu bin stap long hia, brata bilong mi i no inap i dai.” Marta i ting olsem Jisas i kam leit stret. Bihain long dispela, Jisas i lukim susa bilong Marta, Maria, i krai. Em i lukim bel hevi bilong ol, na em i pilim tru dispela na em i krai. (Jon 11:21, 33, 35) Jisas i pilim tru pen yumi save pilim taim wanpela yumi laikim tru em i dai.

⁶ Bel hevi bilong Jisas i strongim bel bilong yumi. Em i soim olsem Jisas na Papa bilong em, Jehova, ol i nolaik tru long ol man i dai. (Jon 14:9) Jehova i gat strong bilong pinisim dai olgeta na em samting em bai mekim klostu nau.

7, 8. Bilong wanem Marta i no laik bai ol i rausim ston long matmat bilong Lasarus? Tasol Jisas i mekim wanem?

⁷ Taim Jisas i go kamap long matmat we ol i planim Lasarus, ol i bin pasim maus bilong matmat long wanpela  bikpela ston. Jisas i tok: “Rausim ston i go.” Tasol Marta i no laik ol i mekim olsem. Bodi bilong Lasarus i bin stap inap 4-pela de long matmat. (Jon 11:39) Em i no save long wanem samting Jisas bai mekim bilong helpim brata bilong em.

⁸ Ol i rausim ston, na Jisas i tokim Lasarus olsem: “Kam ausait!” Marta na Maria i lukim narakain samting i kamap. “Dispela man husat i dai pinis em i kam ausait, na laplap i karamapim lek na han bilong em.” (Jon 11:43, 44) Lasarus i kirap bek! Em i bung gen wantaim famili bilong em na ol pren bilong em. Ol inap holimpasim em, tatsim em, na toktok wantaim em. Em wanpela mirakel! Jisas i kirapim bek Lasarus.

9, 10. (a) Husat i givim strong long Jisas long kirapim bek ol man? (b) Bilong wanem stori bilong ol man i kirap bek i bikpela samting long yumi?

⁹ Yu ting Jisas i kirapim bek ol manmeri long strong bilong em yet? Nogat. Paslain long em i kirapim bek Lasarus, Jisas i beten long Jehova, na Jehova i givim em strong long kirapim bek Lasarus. (Ritim Jon 11:41, 42.) I no Lasarus tasol i kirap bek. Baibel i stori long wanpela gel i gat 12-pela krismas i sik nogut tru. Papa bilong em, Jairus, i wari stret na em i askim Jisas long oraitim em. Em i gat dispela wanpela pikinini tasol. Taim em i toktok long Jisas i stap, sampela man i kam na tok olsem: “Pikinini meri bilong yu i dai pinis! Maski long givim hevi moa long Tisa.” Tasol Jisas i tokim Jairus: “No ken pret, yu mas i gat bilip na em bai kamap orait.” Na em i go wantaim Jairus long haus bilong em. Taim ol i kam kamap klostu long haus, Jisas inap lukim na harim ol manmeri i krai. Jisas i tokim ol: “Yupela i no ken krai  moa, long wanem, em i no dai, em i slip tasol.” Ating papa na mama bilong em i mas tingting planti long tok Jisas i mekim. Jisas i tokim olgeta long go ausait na em i kisim papa na mama bilong dispela gel na i go long rum em dispela gel i stap long en. Jisas i holim han bilong em isi na i tokim em: “Liklik gel, mi tokim yu, ‘Kirap!’” Tingim amamas papamama bilong em i pilim taim ol i lukim em i kirap na stat long wokabaut! Jisas i kirapim bek pikinini meri bilong tupela. (Mak 5:22-24, 35-42; Luk 8:49-56) Kirap long dispela de na i go, taim tupela i lukim liklik gel bilong tupela, tupela bai tingim samting Jehova i bin mekim long rot bilong Jisas. *

¹⁰ Ol manmeri Jisas i bin kirapim bek, bihain ol i dai gen. Tasol stori bilong ol dispela manmeri em yumi ritim i bikpela samting, long wanem, ol i helpim yumi long wetim ol gutpela samting. Jehova i laik kirapim bek ol manmeri, na em bai mekim olsem.

11. Tok bilong Eklisiastis 9:5 i givim wanem skul long yumi long Lasarus?

¹¹ Baibel i tokaut klia olsem “ol man i dai pinis ol i no inap save long wanpela samting.” Stori bilong Lasarus i kamapim klia dispela samting. (Eklisiastis 9:5) Olsem Jisas i bin tok, i olsem Lasarus i bin slip i stap. (Jon 11:11) Taim Lasarus i slip i stap tasol long matmat, em “i no save long wanpela samting.”

12. Olsem wanem yumi save kirap bek bilong Lasarus i bin kamap tru?

 ¹² Taim Jisas i kirapim bek Lasarus, planti manmeri i bin lukim. Ol birua bilong Jisas i save olsem em i bin mekim dispela mirakel. Lasarus i stap laip, na dispela i kamapim klia olsem kirap bek i bin kamap tru. (Jon 11:47) Na tu, planti man i go lukim Lasarus, na dispela i mekim na ol i bilip olsem God i bin salim Jisas i kam. Ol birua bilong Jisas i no amamas long dispela, olsem na ol i toktok long kilim i dai Jisas na Lasarus.—Jon 11:53; 12:9-11.

13. I gat wanem as na yumi ken bilip tru olsem Jehova inap kirapim bek ol man i dai pinis?

¹³ Jisas i tok “olgeta man i stap long matmat” ol bai kirap bek. (Jon 5:28) Dispela i makim olsem olgeta man i stap long tingting bilong Jehova ol bai kisim laip gen. Tasol bilong Jehova i ken kirapim bek wanpela, em i mas tingim olgeta samting bilong dispela man. Yu ting em inap long mekim olsem? I gat planti bilion sta i stap long ples antap. Baibel i tok Jehova i save long nem bilong olgeta wan wan sta. (Ritim Aisaia 40:26.) Sapos em inap tingim nem bilong olgeta wan wan sta, orait em inap tingim olgeta samting bilong ol man we em bai kirapim bek. Bikpela samting, Jehova i wokim olgeta samting, olsem na yumi save em i gat strong long kirapim bek ol man.

14, 15. Tok bilong Jop i skulim yumi long wanem samting long kirap bek?

¹⁴ Gutpela man Jop i bilip long kirap bek. Em i mekim dispela askim: “Sapos wanpela man i dai, em inap kisim laip gen?” Na em i tokim Jehova: “Yu bai singautim mi, na mi bai bekim. Bai yu gat bikpela laik tru long lukim samting em yu yet i bin wokim.” Yes, Jop i save olsem Jehova  i wet long taim we em bai kirapim bek ol man i dai pinis.—Jop 14:13-15.

¹⁵ Yu gat wanem tingting long bilip bilong kirap bek? Ating yu bai tingting olsem, ‘Olsem wanem long ol famili na ol pren bilong mi i dai pinis, ol bai kirap bek tu?’ Em i gutpela samting tru long save olsem Jehova i gat bikpela laik tru long kirapim bek ol man i dai pinis. Nau yumi bai kisim save long tok Baibel i mekim long ol man i dai pinis ol bai kirap bek na stap long wanem hap, na husat bai kirap bek.

16. Ol man i dai pinis ol bai kirap bek na stap long graun na laip bilong ol bai olsem wanem?

¹⁶ Long bipo, ol manmeri i bin kirap bek na i stap gen wantaim famili na ol pren bilong ol hia long graun. Bai i gat kirap bek long bihain, tasol em bai gutpela moa. Bilong wanem? Long wanem, ol man i kirap bek long graun, ol bai stap oltaim na ol i no inap dai gen. Na ol bai stap long wanpela taim we i no wankain olsem long nau. Bai i no gat woa, pasin raskol, na ol sik.

17. Husat bai kirap bek?

¹⁷ Husat ol bai kirap bek? Jisas i tok “olgeta man i stap long matmat ol bai harim nek bilong Pikinini na kam ausait.” (Jon 5:28, 29) Na Buk Revelesen 20:13 i tok: “Na solwara i larim ol man i dai pinis na i stap long en, ol i go. Na dai wantaim Matmat i larim ol man i dai pinis na i stap long ol, ol i go.” Yes, planti bilion manmeri bai kisim laip gen. Aposel Pol i tok: “Ol stretpela man na ol man nogut” bai kirap bek. (Ritim Aposel 24:15.) Wanem mining bilong dispela tok?

18. Husat “ol stretpela manmeri” em ol bai kirap bek?

¹⁸ “Ol stretpela man” em ol manmeri i bin stap taim  Jisas i no kam daun yet long graun. Ol man olsem Noa, Abraham, Sara, Moses, Rut, na Esta bai kirap bek na stap laip hia long graun. Yu inap ritim stori bilong sampela bilong ol dispela man na meri long Hibru sapta 11. Tasol olsem wanem long ol gutpela wokman bilong Jehova i dai long taim bilong yumi? Ol tu i “stretpela man,” olsem na ol bai kirap bek.

19. Husat em ol “man nogut”? Jehova i opim wanem rot long ol?

 ¹⁹ “Ol man nogut” em planti bilion manmeri em ol i no gat rot long kisim save long Jehova. Maski ol i dai, tasol Jehova i no lusim tingting long ol. Em bai kirapim bek ol na ol bai i gat rot long kisim save long em na mekim wok bilong em.

20. Bilong wanem i no olgeta bai kirap bek?

²⁰ Olsem wanem? Dispela i makim olsem olgeta man husat i bin dai ol bai kirap bek? Nogat. Jisas i tok sampela manmeri i dai pinis ol bai i no inap kirap bek. (Luk 12:5) Husat bai makim sapos wanpela man bai kirap bek o nogat? Jehova em i nambawan Jas, tasol em i givim namba long Jisas tu long “stap jas bilong ol man i stap laip na bilong ol man i dai pinis.” (Aposel 10:42) Jehova bai i no kirapim bek ol man em i skelim olsem ol i man nogut tru na i no laik senisim pasin bilong ol.—Lukim Futnot long pes 215.

21, 22. (a) Ol man i kirap bek na i go long heven ol bai i gat wanem kain bodi? (b) Husat em i namba wan man long kirap bek olsem spirit long heven?

²¹ Baibel i tok tu olsem sampela manmeri bai kisim laip long heven. Taim wanpela i kirap bek na i go long heven, em i no inap stap olsem wanpela man na em bai i no gat bodi bilong ol man. Em bai kirap bek olsem spirit long heven.

²² Jisas em i namba wan man long kisim dispela kain kirap bek. (Jon 3:13) Tripela de bihain long ol i kilim i dai Jisas, Jehova i kirapim em bek. (Song 16:10; Aposel 13:34, 35) Jisas i kirap bek na em i no stap moa olsem wanpela man. Aposel Pita i tok “ol i kilim em [Jisas] i dai, tasol em i kirap bek na i stap spirit long heven.”  (1 Pita 3:18) Jisas i stap laip gen olsem wanpela strongpela spirit! (1 Korin 15:3-6) Tasol Baibel i tok em i no laspela man long kirap bek olsem.

23, 24. Dispela “liklik lain sipsip” em Jisas i tok long en, ol i makim husat? Namba bilong ol i hamas?

²³ Paslain long Jisas i dai, em i tokim ol gutpela disaipel bilong em: “Mi bai go bilong redim hap bilong yupela.” (Jon 14:2) Dispela i makim olsem sampela disaipel bilong em bai kirap bek na go stap wantaim em long heven. Hamas bai go long heven? Jisas i tok i no planti, “liklik lain sipsip” tasol. (Luk 12:32) Aposel Jon i kolim namba stret bilong ol taim em i lukim Jisas i “sanap antap long Maunten Saion [bilong heven], na 144,000 manmeri i sanap wantaim em.”—Revelesen 14:1.

²⁴ Kirap bek bilong dispela 144,000 Kristen bai kamap long wanem taim? Baibel i tok dispela samting bai kamap bihain long taim Krais i kirap long mekim wok king long heven. (1 Korin 15:23) Yumi stap long dispela taim, na planti bilong dispela lain 144,000, ol i dai pinis na kisim laip long heven. Ol manmeri bilong dispela lain i stap yet long graun na i dai long taim bilong yumi, ol bai kirap bek wantu na kisim laip long heven. Tasol bikpela lain manmeri bai kirap bek long bihain na kisim laip long Paradais long graun.

25. Bai yumi skelim wanem samting long sapta i kamap bihain?

²⁵ Klostu nau, Jehova bai helpim ol manmeri long lusim kalabus bilong indai, na dai bai pinis olgeta! (Ritim Aisaia 25:8.) Tasol lain i go long heven bai mekim wanem long hap? Baibel i tok ol bai mekim wok king wantaim Jisas long wanpela gavman long heven. Bai yumi kisim sampela save moa long dispela gavman long sapta i kamap bihain.