1-3. Hinkwerhu ka hina hi swib’ochwa swa yini naswona Yehovha atahi tshunxisa kuyini?

TI VONI u gweviwe kutshama djele wutomi la wena hinkwalu, hi mhaka ya xihoxo lexi u kalaka ungaxi yendlanga. Phela waswi tiva leswaku ungata tshuka u humile. U heleliwa hi ntshembo hi wumundzuku naswona waswi tiva leswaku aku na nchumu lexi ungaxi yendlaka leswaku u huma. Kambe na wahaku heleliwa hi ntshembo, kuhumelela munhu lweyi anga ni matimba ya kuku ponisa naswona a tshembisa kuku pfuna! Awuta titwisa kuyini?

² Hinkwerhu hi swib’ochwa swa lifu. Hambi hi yendla yini na yini, ahingeswi koti kuli baleka. Kambe Yehovha a ni matimba ya kuhi tshunxa ka lona. Naswona a tshembise leswaku ‘nala lweyi wohetelela lweyi angatahelisiwa i lifu.’ — 1 Vakorinto 15:26.

³ Pimisa hi ndlela leyi hingataku hefu hi yona loko hingaha tshuki hi karhateka hi lifu. Kambe Yehovha angata susa lifu ntsena. Ata tlhela a pfuxa lava feke. Pimisa hi leswi sweswo swingata vula swona ka wena! A tshembisa leswaku hinkwavu “lava hluliweke hi lifu” vata tlhela va hanya. (Esaya 26:19) Bibele li vula leswaku leswo i kupfuxiwa ka vafi.

4. a) I yini lexingahi tiyisaka loko hi feliwa hi xaka kumbe munghanu wa hina? b) I vamani van’wana lava ava li vanghanu va Yesu?

⁴ Loko hi feliwa hi xaka kumbe munghanu wa hina lwenkulu, ha rila hi tlhela hi vaviseka swinene. Aku na lweyi angahi chavelelaka. Aku na nchumu lexi hingaxi  yendlaka leswaku a tlhela a hanya. Kambe Bibele lahi tiyisa. (Lerha 2 Vakorinto 1:3, 4.) Ahi kambisisi xikombiso lexi kombaka ndlela leyi Yehovha na Yesu vaswi lavaka hi yona kupfuxa vafi. Loko Yesu a li laha misaveni a atolovela kuya pfuxela Lazaru ni vamakwavu, kunga Marta na Mariya. Hinkwavu ka vona, ava li vanghanu va Yesu. Bibele li vula leswi: ‘Yesu aarhandza Marta ni makwavu Mariya, arhandza na Lazaru.’ Kambe, siku lin’wana, Lazaru a file. — Yohane 11:3-5.

5, 6. a) Yesu a yendle yini loko a vona maxaka ni vanghanu va Lazaru vali karhi va rila swinene? b) Hi mhaka muni swihi chavelela kutiva ndlela leyi Yesu a titwaka hi yona hi lifu?

⁵ Yesu a fambe a ya chavelela Marta na Mariya. Loko Marta a twile leswaku Yesu a le ndleleni ya kuya va pfuxela, a hume leswaku amu tlhangaveta. A atsakile hi leswi anga kumana na Yesu, kambe Marta a vule leswi ka Yesu: “Hosi, loko onge awule kona, makwerhu ina angafanga.” Marta a apimisa leswaku Yesu a ahlwele swinene. Ndzhaku ka leswo, Yesu a vone makwavu wa yena, kunga Mariya, na ali karhi a rila. Hi kuvona kuvaviseka ka vona, Yesu a vavisekile a gama a rila. (Yohane 11:21, 33, 35) A twe kuvava lokukulu loku hi kutwaka loko hi feliwa hi lweyi himu rhandzaka.

⁶ Kutiva leswaku Yesu a titwa hi ndlela leyi hi lifu swahi tiyisa. Yesu a fana ni B’ava wa yena. (Yohane 14:9) Yehovha a ni matimba yohelisa lifu hilaha kunga heliki naswona kungali khale ata yendla tanu.

7, 8. Hi mhaka muni Marta aangaswi lavi leswaku va susa ribye ka sirha la Lazaru, kambe Yesu a yendle yini?

⁷ Loko Yesu a fika ka sirha leli Lazaru a alahliwe ka lona, nyangwha wa lona awu pfaliwe hi ribye lelikulu swinene. Yesu a te: “Susani ribye!” Kambe Marta aangaswi  lavi leswaku va yendla tanu. Se aku hundza 4 wa masiku Lazaru a lahliwile. (Yohane 11:39) Marta aangaswi tivi leswi Yesu a alava kuswi yendla leswaku a pfuna Lazaru.

⁸ Yesu a vule leswi ka Lazaru: “Lazaru, humela handle!” Leswi Marta na Mariya vangaswi vona swa hlamalisa swinene. ‘Kutani mufi ahuma na atsondziheliwile minenge ni mavoko hi mabandichi’. (Yohane 11:43, 44) Lazaru a tlhele a hanya. A tlhele a kumana ni vanghanu ni maxaka ya yena. Vamu khomile, van’wana vamu khumba ni kutlhela va vulavula na yena. Pimisa hi kutsakisa ka singita leli! Yesu a pfuxe Lazaru lweyi a afile.

9, 10. a) I mani anga nyika Yesu matimba yaku pfuxa vanhu lava feke? b) Hi mhaka muni marungula ya kupfuxiwa ka vafi ma li ya lisima ka hina?

⁹ Kunga va leswaku Yesu a pfuxe vanhu hi matimba ya yena? Nikatsongo. Yesu a khongele ka Yehovha na angese pfuxa Lazaru lweyi a afile, naswona Yehovha amu nyike matimba ya kuyendla leswo. (Lerha Yohane 11:41, 42.) Ahi Lazaru ntsena anga pfuxiwa leswaku a tlhela a hanya. Bibele lihi byela leswaku ku ni ntombhi ya 12 wa malembe leyi ayi vabya swinene. Papayi wa yona Yayiro, a avilela swinene naswona a kombele Yesu leswaku a daha ntombhi leyi. Phela avo va ni n’wana yelweyo ntsena. Kambe na aha vulavula na Yesu, kuhumelele vavanuna vokarhi va vula leswi: ‘N’wana wa wena afile, wahamukarhatela yini Mudjondzisi ke?’ Kambe Yesu a vule leswi ka Yayiro: “Ungachavi, pfumela ntsena.” Hiloko va famba xikan’we kaya ka Yayiro. Loko va li kusuhi ni munti, Yesu a avona ni kutwa vanhu va rila. Kutani a ku: “Mirilela yini? Nhwanyana lweyi angafanga, ayoyetlela.” Swingaha  yendleka papayi ni mamana wa ntombhi leyi va tivutisile hi nhlamuselo ya marito ya Yesu. Yesu a humese vanhu handle, a gama a nghena ka kwartu leli ntombhi ayi vekiwe kona. Kutani ayi khoma hi voko a ku: “Nhwanyana, nili ka wena: Pfuka!” Pimisa hi ndlela leyi va tsakeke hi yona, loko hi kuhantlisa ntombhi yi pfuka yi sungula kufamba. Hi ndlela leyo, Yesu a pfuxe n’wana wa vona. (Marka 5:22-24, 35-42; Luka 8:49-56) Kusukela ka siku lolelo, loko va vona n’wana wa vona, avata khumbuka leswi Yehovha angava yendlela swona hi kutirhisa Yesu. *

¹⁰ Hi kufamba ka nkama, lava pfuxiweke hi Yesu, va tlhele va fa. Kambe leswi hiswi djondzaka ka marungula ya kupfuxiwa ka vona, i swa lisima hikusa swihi nyika ntshembo wa ntiyiso. Yehovha waswi lava kupfuxa vanhu lava feke naswona ata yendla tanu.

11. Eklesiasta 9:5 yihi djondzisa yini hi Lazaru?

¹¹ Bibele li vula hi kukongoma leswaku “lava feke ava tivi nchumu nikatsongo”. Leswo aku li ntiyiso hi Lazaru. (Eklesiasta 9:5) Hilaha Yesu anga vula ha kona, aswi fana ni loko Lazaru a ayetlele wurhongo lelikulu. (Yohane 11:11) Loko Lazaru a li sirheni, aanga tivi “nchumu nikatsongo”.

12. Hiswi tivisa kuyini leswaku Lazaru a pfuxiwile hakunene?

¹² Yesu a voniwe hi vanhu votala loko a pfuxa Lazaru. Hambi valala va Yesu vaswi tivile leswaku a yendle singita  leli. Lazaru a tlhele a hanya naswona leswi swi tiyisekise leswaku kupfuxiwa ka yena aku li ka ntiyiso. (Yohane 11:47) Nakambe vanhu votala va pfuxele Lazaru. Hi mhaka leswo, va sungule kukholwa leswaku Yesu a rhumiwe hi Xikwembu. Leswi aswiva tsakisanga valala va Yesu, kutani va luke makungu yodlaya Yesu na Lazaru. — Yohane 11:53; 12:9-11.

13. Hi mhaka muni hi tiyiseka leswaku Yehovha ata pfuxa lava feke?

¹³ Yesu a vule leswaku “hinkwavu lavanga masirheni” vata pfuxiwa. (Yohane 5:28) Leswo swi vula leswaku vafi hinkwavu lava Yehovha ava khumbukaka vata tlhela va hanya. Kambe leswaku Yehovha a pfuxa munhu lweyi anga fa, a fanele a khumbuka hinkwaswu hi yena. Kunga va leswaku angaswi kota? Phela ku ni mabiliyoni ya tinyeleti ka wuyaku hinkwalu. Bibele li vula leswaku Yehovha a tiva mavito ya tinyeleti hinkwatu. (Lerha Esaya 40:26.) Kutani, loko Yehovha a khumbuka mavito ya nyeleti yin’wana ni yin’wana, hinga tiyiseka leswaku ata khumbuka hi kuvevuka wuxokoxoko hinkwalu hi vafi lava angatava pfuxa. Kutlula hinkwaswu, Yehovha hi yena anga tumbuluxa swilo hinkwaswu, kutani haswi tiva leswaku a ni matimba ya kupfuxa hinkwavu lava feke.

14, 15. Marito ya Yobo mahi djondzisa yini hi kupfuxiwa ka vafi?

¹⁴ Yobo, wanuna wotshembeka a akholwa ka kupfuxiwa ka vafi. A vutise leswi: “Loko munhu a fa, anga tlhela a hanya?” Ndzhaku ka leswo a vule leswi ka Yehovha: “Uta vitana, kutani nitaku hlamula. Uta xuva ntirho wa mavoko ya wena.” Hakunene, Yobo aaswi tiva leswaku Yehovha aswi navela swinene kupfuxa vafi. — Yobo 14:13-15.

¹⁵ U titwisa kuyini hi ntshembo wa kupfuxiwa ka vafi? Kumbexana ungaha tivutisa leswi: ‘Kunga va leswaku  maxaka ni vanghanu va mina lava feke, na vona vata tlhela va hanya?’ Swahi tiyisa nhlana kutiva leswaku Yehovha waswi lava hakunene kupfuxa lava feke. Se ahi kambisiseni leswaku Bibele li li i vamani lavangata pfuxiwa ni ndhawu leyi vangata hanya ka yona.

16. Vanhu lavangata pfuxiwa ankameni lowu taka vata tikhorisa hi wutomi la kutshamisa kuyini?

¹⁶ Vafi lava va pfuxiweke minkameni ya khale, va tlhele va kumana ni maxaka ni vanghanu va vona kola misaveni. Ni le ka nkama lowu taka kuta yendleka leswi fanaka, kambe hi ndlela yoyampsa swinene. Hi mhaka muni? Hikusa lavangata pfuxiwa ankameni lowu taka vata kuma mukhandlu wa kuhanya hilaha kunga heliki laha misaveni naswona avangahata fa. Vata hanya ka misava leyi hambaneke ni leyi hi hanyaka ka yona namuntlha. Tinyimpi, wugevenga ni mavabyi aswingahata va kona.

17. I vamani lavangata pfuxiwa?

¹⁷ I vamani lavangata pfuxiwa? Yesu a vule leswaku ‘hinkwavu lavanga masirheni vatatwa rito la yena kutani vatahuma’. (Yohane 5:28, 29) Naswona buku la Nhlavutelo 20:13 li li: ‘Lwandle litlhelisa lavafeleke ka lona. Lifu ni Sirha switlhelisa vafi lava avali ka swona’. Hakunene, vanhu votala swinene, vata tlhela va hanya. Mupostola Pawulo a vule leswaku mintlawa ha yimbirhi, ya “lavolulama ni lavangalulamangiki” yita pfuxiwa. (Lerha Mintirho 24:15.) Swi vula yini leswo?

18. I vamani “lavolulama” vangata pfuxiwa ka lava feke?

¹⁸ “Lavolulama” kuvuliwa vagandzeli va Yehovha votshembeka. Kupatsiwa ni lava hanyeke khale na Yesu angese ta laha misaveni. Va kufana na Nowa, Abrahama, Sara, Moxe, Ruti na Estere, vata pfuxeliwa kuhanya laha  misaveni. Unga djondza hi vavanuna ni vavasati lava ka Vaheveru ndzima 11. Kambe kuta yendleka yini hi vagandzeli va Yehovha votshembeka, lava faka amasikwini ya hina? Na vona va nghena ka ntlawa wa “lavolulama,” kutani vata pfuxiwa.

19. I vamani “lavangalulamangiki”? Hi wihi mukhandlu lowu Yehovha angatava nyika wona?

¹⁹ “Lavangalulamangiki” kuvuliwa vanhu votala swinene lava kalaka vanga kumanga mukhandlu wa kutiva  Yehovha. Hambileswi se vanga fa, Yehovha angava khohlwanga. Atava pfuxa va tlhela va hanya, naswona vata kuma mukhandlu wa kudjondza hi Yehovha ni kumu tirhela.

20. Hi mhaka muni kunga li vafi hinkwavu lavangata pfuxiwa?

²⁰ Se kunga va leswaku leswaku hinkwavu lava feke vata pfuxiwa? Nikatsongo. Yesu a vule leswaku vanhu van’wana vangata pfuxiwa. (Luka 12:5) I mani lweyi angata yavanyisa lava faneleke kupfuxiwa ni lava kalaka vanga faneleki? Yehovha hi yena Muyavanyisi wohetelela, kambe a nyike Yesu wulawuli la kuva “muyavanyisi wa lavahanyaka ni lavafeke.” (Mintirho 10:42) Lweyi angata yavanyisiwa tani hi munhu wobiha naswona anga pfumelanga kucinca, angata pfuxiwa. — Vona Nhlamuselo 19.

21, 22. a) Lava yaka tilweni va pfuxiwa va li ni miri wa kutshamisa kuyini? b) I mani munhu wosungula lweyi anga pfuxeliwa kuya hanya tilweni?

²¹ Bibele lihi byela leswaku vanhu van’wanyana vata ya hanya tilweni. Loko munhu a pfuxiwa leswaku a ya hanya tilweni, angaha tlheli ava ni miri wa nyama. Kambe a ya hanya tani hi munhu lweyi anga ni miri wa moya.

²² Yesu a ve munhu wosungula kupfuxiwa hi ndlela leyi. (Yohane 3:13) Ndzhaku ka masiku manharhu na Yesu a dlayiwile, Yehovha amu pfuxile leswaku a tlhela a hanya. (Tipisalema 16:10; Mintirho 13:34, 35) Yesu anga pfuxiwanga na a ni miri wa nyama. Mupostola Petro a hlamusela leswaku Yesu ‘adlayiwile hi tlhelo la miri, kambe ayendliwile lweyi ahanyaka hi tlhelo la moya.’ (1 Petro 3:18) Yesu a pfuxiwe leswaku a ya hanya tani hi  munhu wa moya lweyi anga ni matimba! (1 Vakorinto 15:3-6) Kambe Bibele li vula leswaku akungata va yena ntsena.

23, 24. I vamani lava vumbaka “ntlhambinyana” lowu Yesu anga vulavula hi wona naswona i vangaki?

²³ Loko a li kusuhi ni kufa, Yesu a byele vadjondzisiwa va yena votshembeka a ku: “kutani niyamilungisela” ndhawu. (Yohane 14:2) Leswo swi vula leswaku van’wana va valandzeli va Yesu avata pfuxiwa leswaku va ya hanya atilweni na yena. I vangaki? Yesu a vule leswaku i vatsongo, a te i “ntlhambinyana”. (Luka 12:32) Mupostola Yohane a vule numeru ya vona loko a vone Yesu tani hi xinyimpfana na ‘xiyimile [tilweni] ntshaveni ya Siyoni, na xili ni lava 144.000’. — Nhlavutelo 14:1.

²⁴ Se Vakreste va 144.000 avata pfuxiwa siku muni leswaku va tlhela va hanya? Bibele li vula leswaku leswo aswita yendleka ndzhaku ka loko Kreste a sungule kufuma atilweni. (1 Vakorinto 15:23) Hi hanya ankameni wolowo swoswi naswona kutala ka lava va 144.000 se va pfuxiwile leswaku va hanya atilweni. Lava vaha hanyaka laha misaveni ni lava faka ka minkama ya hina va tekela kupfuxiwa leswaku va ya hanya atilweni. Kambe kutala ka vanhu lava feke vata pfuxiwa ankameni lowu taka leswaku va hanya ka Paradeyisi laha misaveni.

25. Hita djondza yini ka ndzima leyi landzelaka?

²⁵ Kungali khale, Yehovha atahi tsavula ka lifu naswona alingehe vi kona hilaha kunga heliki. (Lerha Esaya 25:8.) Kambe, lava yaka tilweni va ya tirha yini? Bibele li hlamusela leswaku va ya fuma na Yesu ka Mfumo wa Xikwembu. Hita djondza swin’wana ka ndzima leyi landzelaka.