1-3. Se a te mea e ‵nofo fakapagota tatou ki ei, kae ka fakasaoloto pefea tatou ne Ieova?

FAKAATAATA i tou mafaufau i a koe ko fakasala ki te mate i se agasala telā e seki fai ne koe. Ko seai loa se suā auala ke mafai o sao ei koe. Ko seai sou fakamoemoega mō aso mai mua, kae ko seai sau mea e mafai o fai ki ei. Kae i te taimi eiloa telā ko seai ei sou fakamoemoega, kae iloa aka ne koe me isi se tino e isi sena malosi o fakasao koe kae ne tauto mai me ka fesoasoani a ia ki a koe! Ka pefea ou lagonaga?

² A tatou katoa ko pagota a te mate. Faitalia me ne a ‵tou mea e fai, e seai se auala e ‵sao ei tatou. Kae e maua ne Ieova te malosi ke faka‵sao tatou mai te mate. Kae ko oti ne tauto mai a ia me i “te ‵toe fili telā e ‵tau o fakaseai atu ko te mate.”—1 Kolinito 15:26.

³ Mafaufau ki te fiafia ka maua ne koe māfai ko se toe manavase koe ki te mate! Kae e se ko te mate fua ka tapale kea‵tea ne Ieova. Ka toe fakaola mai foki ne ia a tino kolā ko oti ne ‵mate. Mafaufau ki te uiga o te mea tenā ki a koe. Ne tauto mai a ia me i tino kolā “e seai se lotou malosi i te mate” ka toe ola mai. (Isaia 26:19, fakamatalaga mai lalo) Tenei te mea e taku ne te Tusi Tapu ko te toetuga.

4. (a) Se a te fakamafanafanaga e mafai o maua ne tatou māfai ko mate se tino i te kāiga io me se taugasoa? (e) Ko oi a nisi taugasoa ‵pili o Iesu?

⁴ Kafai ko mate se tino i te kāiga io me se taugasoa pele, e mafai eiloa o faigata ke fa‵ki i te logo‵mae mo te loto  fanoanoa. E mafau‵fau tatou me ko seai se ‵tou mea koi mafai o fai. E seai se ‵tou mea e mafai o fai ke toe fakaola mai te tino tenā. Kae e tuku mai i te Tusi Tapu se fakamafanafanaga tonu. (Faitau te 2 Kolinito 1:3, 4.) Ke mafaufau nei tatou ki se fakaakoakoga telā e fakaasi mai ei te lasi o te manakoga o Ieova mo Iesu ke toe fakaola mai a ‵tou tino pele. I te taimi ne nofo ei Iesu i te lalolagi, ne āsi atu sāle a ia ki a Lasalo mo ana tuagane, ko Maleta mo Malia. A te tokotolu konei ne taugasoa pele o Iesu. Muna a te Tusi Tapu: “Ne alofa malosi a Iesu ki a Maleta mo tena taina, e pelā foki mo Lasalo.” Kae i te aso e tasi ne mate a Lasalo.—Ioane 11:3-5.

5, 6. (a) Ne a mea ne fai ne Iesu i te laveaga ne ia a kāiga mo taugasoa o Lasalo e ‵tagi fanoa‵noa? (e) Kaia e fakamafanafana mai ei ki a tatou ke iloa atu a lagonaga o Iesu e uiga ki te mate?

⁵ Ne fano a Iesu o fakamanafanafana a Maleta mo Malia. I te logoga a Maleta me i a Iesu ko vau, ne fanatu a ia ki tua mo te fakai ke fakafetaui ki tou tagata. Ne fiafia a ia ke fetaui mo Iesu, kae ne fai atu tou fafine ki a ia: “Moi ne nofo koe i konei penei e se mate toku tuagane.” Ne mafaufau Maleta me i a Iesu ko tō tuai mai. Oti aka, ne lavea ne Iesu tena taina, ko Malia, e tagi. I te kilo atu ki te lasi o te lā fanoa‵noa, ne logo‵mae tou tagata, tagi ei a ia. (Ioane 11:21, 33, 35) Ne lagona ne ia te lasi o te logo‵mae e maua māfai ko galo atu se tino pele.

⁶ E fakamafanafana mai eiloa ki a tatou a te iloa atu me ‵pau eiloa lagonaga o Iesu mo tatou e uiga ki te mate. Kae ko Iesu e pelā eiloa mo tena Tamana. (Ioane 14:9) E maua ne Ieova te malosi ke tapale kea‵tea te mate ki te se-gata-mai, kae tena loa te mea ko pili o fai ne ia.

7, 8. Kaia ne seki manako ei a Maleta ke tapale kea‵tea te fatu mai te tanuga o Lasalo, kae se a te mea ne fai ne Iesu?

⁷ I te okoatuga a Iesu ki te tanuga telā ne tuku i ei te foitino  o Lasalo, ko oti ne ‵pono te mataloa ki se fatu lasi. Muna a Iesu: “Ave kea‵tea te fatu.” Kae ne seki manako Maleta ke fai ne latou te mea tenā. Ko fa nei aso ne tuku ei te foitino o Lasalo i te tanuga. (Ioane 11:39) E se iloa ne ia me se a te mea ka fai ne Iesu ke fesoasoani atu ei ki tena tuagane.

⁸ Muna a Iesu ki a Lasalo: “Vau ki tua!” Ne fakaofoofogia ‵ki eiloa te mea telā ne lavea ne Maleta mo Malia mai tua ifo. “Ne vau ki tua te tagata telā ne mate mo ana vae mo ana lima e saisai ki laugatu.” (Ioane 11:43, 44) A Lasalo ko oti ne toe fakaola mai! Ne toe ‵kau fakatasi a ia mo tena kāiga mo ana taugasoa. Ne mafai o puke atu latou ki a ia, pa‵tele ki ei, kae fai‵pati ki a ia. Mafaga o vavega! Ne fakatu aka ne Iesu a Lasalo.

9, 10. (a) Ko oi ne tuku atu ne ia ki a Iesu te malosi ke faka‵tu aka a tino ‵mate? (e) Kaia e tāua ei ki a tatou a tala o tino kolā ne faka‵tu aka mai te mate?

⁹ E mata, ne faka‵tu aka ne Iesu a tino i tena malosi eiloa? Ikai. Mai mua o fakatu aka ne ia a Lasalo, ne ‵talo a Iesu ki a Ieova, kae ne tuku atu ne Ieova te malosi ki a ia ke fakatu aka Lasalo. (Faitau te Ioane 11:41, 42.) E se ko Lasalo fua te tino ne fakatu aka. E fai mai te Tusi Tapu e uiga ki se tamaliki fafine ko 12 ana tausaga telā ne masaki malosi. A tena tamana, ko Iailo, ne manavase malosi, kae ne fakamolemole atu a ia ki a Iesu ke faka‵lei tou fafine. E tokotasi fua te tamaliki a te tagata tenei. I te taimi koi faipati ei a ia ki a Iesu, ne olo atu ne tāgata ki a ia kae fai atu: “A tau tamaliki fafine ko mate! E se ‵tau o toe fakalavelave atu koe ki te Faiakoga.” Kae ne fai atu a Iesu ki a Iailo: “Sa  mataku, fakatuanaki fua koe, kae ka toe ola a ia.” Tenā ne sa‵sale atu ei lāua ki te fale o Iailo. I te piliatuga a lāua ki te fale ne lavea kae lagona ne Iesu a tino e ‵tagi. Muna a Iesu ki a latou: “Sa ‵tagi, me i a ia e seki mate kae e moe fua.” Kāti ne ‵segi a mātua o te tamaliki fafine me se a te mea e fakauiga Iesu ki ei. Ne fesili atu a Iesu ki tino katoa ke olo kae puke ne ia a mātua o te tamaliki fafine ki loto i te potu telā e moe ei tou fafine. Ne puke atu a Iesu mo te atafai ki te lima o tou fafine kae fai atu ki ei: “Te tamaliki fafine, au e fai atu ki a koe, ‘tu ki luga!’” Mafaufau la ki te fia‵fia o mātua o te tamaliki i te taimi ne tu aka ei a ia ki luga kae kamata o sasale! Ne fakatu aka eiloa ne Iesu te lā tamaliki fafine. (Maleko 5:22-24, 35-42; Luka 8:49-56) Mai te aso tenā o fano ki mua, i so se taimi e lavea ne lāua te lā tama, e masaua faeloa ne lāua te mea ne fai ne Ieova mō lāua e auala i a Iesu. *

¹⁰ A tino kolā ne toe faka‵tu aka ne Iesu ne toe ‵mate. Kae ko mea e faitau ne tatou e uiga ki tino konei e tāua ‵ki me tuku mai i ei ki a tatou se fakamoemoega tonu. E manako a Ieova ke toe faka‵tu aka a tino, kae ka fai eiloa ne ia te mea tenā.

11. Se a te mea e akoako mai i te Failauga 9:5 ki a tatou e uiga ki a Lasalo?

¹¹ E fakaasi manino mai i te Tusi Tapu me i “tino ‵mate e seai eiloa se lotou mea e iloa.” Tenā eiloa te mea ne tupu  ki a Lasalo. (Failauga 9:5) E pelā eiloa mo pati ne fai mai ne Iesu, a Lasalo e pelā fua me ne moe. (Ioane 11:11) I te taimi ne nofo ei i te tanuga, a Lasalo e seai sena “mea e iloa.”

12. E iloa pefea ne tatou me ne toetu eiloa Lasalo?

¹² I te taimi ne fakatu aka ei ne Iesu a Lasalo, ne lavea ne tino e tokouke te mea tenā. Ke oko ki fili o Iesu ne iloa ne latou me ne fai ne ia te vavega tenei. Ne toe ola mai Lasalo, kae e fakamaoni mai i ei me ne isi eiloa se toetuga ne fai. (Ioane 11:47) E se gata i ei, e tokouke a tino ne olo atu o āsi ki a Lasalo, kae ne fai ei ke tali‵tonu latou i a Iesu ne uga mai ne te Atua. Ne seki fia‵fia a fili o Iesu ki te mea tenā, taumafai ei latou ke tamate a Iesu mo Lasalo.—Ioane 11:53; 12:9-11.

13. Kaia e tali‵tonu ei tatou me ka toe faka‵tu aka ne Ieova a tino ‵mate?

¹³ Ne fai mai a Iesu me i “tino katoa kolā e i loto i tanuga” ka toe faka‵tu mai. (Ioane 5:28) Ko tena uiga, a tino katoa kolā e masaua ne Ieova ka toe ola mai. Kae ko te mea ke fakatu aka ne Ieova se tino, e ‵tau o masaua ne ia a mea katoa e uiga ki te tino tenā. E mata, e mafai eiloa o fai ne ia te mea tenā? Ia, e lau i piliona a fetū i te iunivesi. E fai mai te Tusi Tapu me iloa ne Ieova a igoa o fetū takitasi konā. (Faitau te Isaia 40:26.) Kafai e masaua ne ia a igoa o fetū takitasi, ko tena uiga e faigofie fua ke masaua ne ia a mea katoa e uiga ki a latou kolā ka toe fakaola mai ne ia. E sili atu i ei, ne faite ne Ieova a mea katoa, tela la, e iloa ne tatou me maua ne ia te malosi ke toe faka‵foki mai ne ia a tino ki te ola.

14, 15. Ne a mea e akoako mai ne pati a Iopu e uiga ki te toetuga?

¹⁴ Ne talitonu te tagata fakamaoni ko Iopu ki te toetuga. Ne fesili mai a ia: “Kafai e mate se tagata, e mafai o toe ola mai a ia?” Oti aka, fai atu ei a ia ki a Ieova: “Ka kalaga mai  koe, kae ka tali atu au ki a koe. Ka manako malosi koe ki galuega a ou lima.” Ao, ne iloa ne Iopu me olioli eiloa a Ieova ki te taimi ka faka‵tu aka ei ne ia a tino ‵mate.—Iopu 14:13-15.

¹⁵ Ne a ou lagonaga e uiga ki te fakamoemoega ki te toetu? Kāti ka mafaufau koe, ‘Kae pefea la oku kāiga mo taugasoa kolā ko oti ne ‵mate, e mata, ka toe faka‵tu aka latou?’ E fakamafanafana mai eiloa ki a tatou ke iloa atu me manako tonu eiloa a Ieova ke toe fakaola mai a tino ‵mate. Ke onoono tatou me ne a pati a te Tusi Tapu e uiga ki te koga ka ‵nofo latou i ei kae ko oi a tino ka faka‵tu aka.

16. Se a te vaegā olaga ka maua ne tino kolā ka faka‵tu aka ki te ola i te lalolagi nei?

¹⁶ I aso mua, a tino kolā ne faka‵tu aka ne toe ‵kau fakatasi mo olotou kāiga mo taugasoa i te lalolagi nei. Ka tupu foki te mea tenei i aso mai mua, kae ka ‵lei atu. Kaia? Me i tino kolā ka toe fakaola mai ki te lalolagi nei ka maua ne latou te avanoaga ke ola ki te se-gata-mai kae ka se toe ‵mate eiloa. Kae ka ola latou i se lalolagi telā e ‵kese mai te lalolagi e ola tatou i ei i aso nei. Ka seai ne taua, seai ne amioga solitulafono, kae seai ne masaki.

17. Ko oi a tino ka toe faka‵tu aka?

¹⁷ Ko oi ka toe faka‵tu aka? Muna a Iesu ko ‘tino katoa kolā e i loto i tanuga ka lagona ne latou tena leo ko ulu mai ei ki tua.’ (Ioane 5:28, 29) Kae e fai mai te Fakaasiga 20:13 ki a tatou: “Ne tuku mai ne te tai a tino ‵mate i loto i ei, kae ne tuku mai ne te mate mo te Tanuga a tino ‵mate i loto i ei.” Ao, e lau i piliona a tino ka toe ola mai. Ne fai mai foki te apositolo ko Paulo me i “tino amio‵tonu mo  tino sē amio‵tonu” ka toe faka‵tu aka. (Faitau te Galuega 24:15.) Se a te mea e fakauiga ki ei?

18. Ko oi a “tino amio‵tonu” kolā ka faka‵tu aka?

¹⁸ “A tino amio‵tonu” e aofia i ei a tavini fakamaoni a Ieova kolā ne ola mai mua o vau a Iesu ki te lalolagi. A tino e pelā mo Noa, Apelaamo, Sala, Mose, Luta mo Eseta ka toe faka‵tu aka ki te ola i te lalolagi. E mafai o faitau koe ki  tala o nisi tāgata mo fāfine konā i te Epelu mataupu e 11. Kae pefea la a tavini fakamaoni a Ieova kolā ne ‵mate i ‵tou aso nei? A latou foki ne “tino amio‵tonu,” tela la, ka toe faka‵tu aka latou.

19. Ko oi a “tino sē amio‵tonu”? Se a te avanoaga ka tuku atu ne Ieova ki a latou?

¹⁹ A “tino sē amio‵tonu” e aofia i ei te fia piliona o tino kolā ne seki maua ne latou te avanoaga ke iloa ne latou a Ieova. E ui eiloa ko ‵mate atu latou, e seki puli i a Ieova latou. Ka toe faka‵tu aka ne ia latou, kae ka maua ne latou te avanoaga ke tauloto e uiga ki a ia kae tavini atu ki a ia.

20. Kaia e se faka‵tu aka ei a tino katoa?

²⁰ E mata, e fakauiga te mea tenei me ko tino katoa kolā ko oti ne ‵mate ka toe faka‵tu aka katoa? Ikai. Ne fai mai Iesu me e isi ne tino ka se faka‵tu aka ki te ola. (Luka 12:5) Ko oi e fakaiku aka ne ia me e fakatu aka se tino io me ikai? Ko Ieova eiloa te Famasino sili, kae ne tuku atu foki ne ia te pule ki a Iesu “ke fai mo famasino o tino ola mo tino ‵mate.” (Galuega 10:42) So se tino telā e fakamasino aka me se tino masei kae e se manako o ‵fuli ka se toe fakatu aka.—Onoono ki te Fakamatalaga Fakaopoopo i te 19.

21, 22. (a) Se a te uiga o te toetuga ki te lagi? (e) Ko oi te tino muamua ke fakatu aka ki te lagi?

²¹ E fai mai foki te Tusi Tapu me e isi ne tino ka ola i te lagi. Kafai e fakatu aka se tino ki te lagi, e se fakatu aka a ia e pelā me se tino ola i te feitu faka-te-foitino. E fakatu aka a ia ki te ola i te lagi e pelā me se tino faka-te-agaga.

²² Ko Iesu te tino muamua ke fakatu aka i te auala tenei. (Ioane 3:13) E tolu aso mai tua o te tamatega a Iesu, ne fakatu aka ne Ieova a ia. (Salamo 16:10; Galuega 13:34, 35) Ne seki fakatu aka a Iesu i te foitino faka-te-foitino.  Ne fakamatala mai te apositolo ko Petelu me i a Iesu “ne tamate a ia i te foitino, kae ne toe fakaola aka i te agaga.” (1 Petelu 3:18) A Iesu ne toe fakatu aka ki te ola e pelā me se tino faka-te-agaga telā e malosi ‵ki! (1 Kolinito  5:3-6) Kae fai mai te Tusi Tapu me e se ko ia fua e fai penā.

23, 24. Ko oi te “lafu mamoe foliki” telā ne faipati a Iesu e uiga ki ei, kae tokofia latou?

²³ Mai mua malie eiloa o mate a ia, ne fai atu a Iesu ki ana soko fakamaoni: “Au ka fano o fakatoka se koga mō koutou.” (Ioane 14:2) Ko tena uiga e isi ne ana nisi soko ka faka‵tu aka ke ola fakatasi mo ia i te lagi. E tokofia? Ne fai mai Iesu me se aofaki foliki fua, se “lafu mamoe foliki.” (Luka 12:32) Ne taku mai ne te apositolo ko Ioane te aofaki tonu i te taimi ne lavea ei ne ia a Iesu e “tu mai . . . i luga i te Mauga o Siona [i te lagi], kae ne ‵tu fakatasi mai mo ia te toko 144,000.”—Fakaasiga 14:1.

²⁴ Ko te taimi fea ka faka‵tu aka ei a Kelisiano e toko 144,000? E fai mai te Tusi Tapu me ka tupu te mea tenei māfai ko oti ne kamata o pule mai a Keliso mai te lagi. (1 Kolinito 15:23) Ko ola nei tatou i te taimi tenā, kae ko te tokoukega o te toko 144,000 ko oti ne faka‵tu aka ki te lagi. A latou kolā koi ‵nofo mai i te lalolagi kae e ‵mate i ‵tou aso nei ka faka‵tu fakavave aka ki te ola i te lagi. Kae ko te tokoukega o tino ka faka‵tu aka i aso mai mua ki te ola i te Palataiso i te lalolagi.

25. Se a te mea ka tauloto ne tatou i te suā mataupu?

²⁵ I se taimi pili ‵ki mai mua nei, ka fakasaoloto ei ne Ieova a tino katoa mai te mate, kae ka galo atu a te mate ki te se-gata-mai! (Faitau te Isaia 25:8.) Kae ne a mea ka fai ne tino kolā e olo atu ki te lagi? E fai mai te Tusi Tapu me ka pule latou fakatasi mo Iesu i te Malo. Ka tauloto ne tatou a mea e uke atu e uiga ki te malo tenā i te suā mataupu.