1-3. Kúkélee kúkaa a pelesinɛ-ŋa gbɛ̂ɛ yée mu, nyaŋ Ziova a pâi kúŋuŋ ma ɓó pere kɛ́i léŋ?

ÍKILI-ŊA sia I bîlaŋ à kɛ̀ da I lɔ kpíni-pɛ́rɛ mu à gɛ́ɛ íkɛ naa e lɛ́ɛ la zu I saa sɔnyɔ̂ŋ ta mɛni ma nyii íyée fé zui. Nyaŋ pere kélee ta fé naa à gɛ́ɛ I kula gbíni-pɛ́rɛi tí mu. Kili-kɛ-zu ta kélee fé íyêei, nyaŋ mɛni ta kélee fé naa nyii ya pɔri gɛi e pîlaŋ ma. È kɛ nɔ́ tí, I m̀ɛni à gɛ́ɛ núu ta káa naa nyii a pɔri kpɔŋ maa tɛɛi ípɔ, nyaŋ aâ gono tee à gɛ́ɛ a pâi I kulai gbíni-pɛ́rɛi tí mu! Nyíŋi fé pâi ílii nɛ̃ɛi?

² Kúkélee kúkaa a saa ŋɔpelesinɛ-ŋa. A nɛɛ máŋ kú kɔ́ a pere sîi kélee, kúfa pɔri pui ǹyêei. Kɛ́lɛ wala-walalaa káa Ziova yêei à gɛ́ɛ e kúŋuŋ ma ɓo saa yêei. Nyaŋ aâ gono tee à gɛ́ɛ a pâi “gbɔara-nuui gbɛɛ ŋai saa su karai.”​—1 Kɔleŋtiɛŋ 15:​26.

³ Íkili-ŋa sia I bîlaŋ tãi ma ífe ŋɔ́nɔ pâi íkili ŋa siai la é pîlaŋ saa mɛni mai. Kɛ́lɛ Ziova fé pâi saa kulai nɔ́ ɣele ma. A pâi diai daâ saai mu-siɣei saa yêei. Íkili ŋa sia I bîlaŋ berei ma nyíŋi a pâi ílii nɛ̃ɛi lai. È gono tee à gɛ́ɛ diai daâ saai “da pâi dímu-siɣei dí kula m̀olôŋ su” díkɛ ŋɔ́nɔ ɣele ma. (Azaya 26:​19) Nyíŋi ɓe Ŋâla-kɔlɔi a dòli a m̀u-siɣe saa-yêei.

4. (1) Lé ɓa pɔri kúŋa nɛnɛi à kɛ̀ kúkaayɔɔ̂i su nuu ta kpaa kúlaoi ta a saa? (2) Gbɛ̂ɛ-ni ɓé kɛ a Zîsɛ ǹaoi-ni taŋa?

⁴ Kúkaayɔɔ̂i su nuu ta a saa, kpaa kúloai ta, nyíŋi a  kúlii too pôlu a dámaa. A kɛ yɛ̂ɛ nya ɓe kúkpɔŋ maa nuu kélee ta fé ŋɔ́nɔ ma ŋéniɛi su. Kúfa pɔri mɛni kélee ta kɛ́i à gɛ́ɛ kú ǹúui tí mu-siɣe saa yêei. Kɛ́lɛ, m̀ɛnii Ŋâla-kɔlɔi sui a pɔri kúŋa nɛnɛi. (2 Kɔleŋtiɛŋ 1:​3, 4 lóno.) Kwaa mɛni-kɔɔŋ-maa tɔnɔ káa nyii a nɛ berei Ziova da Zîsɛ da ŋwɛ̂lii la dí kúwɛli-kɛ-maa-ɓelai mu-siɣe saa yêei. Tãi Zîsɛ è kɛ la ǹɔii mai, a káa li Lâzara da zaaɓɔlɔ-ni Maatɛ da Mere naa káai a tãi kélee. Dí saaɓa-ŋɔɔ díkɛ a Zîsɛ ǹaoi-ni. Ŋâla-kɔlɔi è mò nyɛɛi: “Zîsɛ è kɛ a Maatɛ wɛ́liɛ da ǹia Mere, da Lâzara.” Nya ɓe fólo tɔnɔ, Lâzara è saa.​—Zɔ̂ŋ 11:​3-5.

5, 6. (1) Lé ɓe Zîsɛ è gɛ tãi è Lâzara zaaɓɔlɔ-ni da ǹaoi-ni kaa la díkɛ wɔlɔi? (2) Lé ɓe gɛ a ŋa nɛnɛ mɛni à gɛ́ɛ Zîsɛ nya máŋ nii è too pôlu saa mɛni mai?

⁵ Zîsɛ è li à gɛ́ɛ e Maatɛ da Mere ŋa nɛnɛ. Tãi Maatɛ è m̀ɛni la à gɛ́ɛ Zîsɛ káa pâi, è li berei ŋuŋ la à gɛ́ɛ e berei tɔɔ. Nii è nɛ̃ɛ tãi è Zîsɛ kaa lai, kɛ́lɛ è mò ma nyɛɛi: “Îi kɛ ɓɛ, ńzaaɓɔlɔ fei saa.” È kɛ Maatɛ kili ŋa à gɛ́ɛ Zîsɛ fé pa ní a súmoɔ. Naa pôlu ma, Zîsɛ è Maatɛ ǹia Mere kaa gɛ wɔlɔ. Tãi è dí káa la dílii kɛ too pôlui, maloŋ è too ma nya máŋ e wɔlɔ. (Zɔ̂ŋ 11:​21, 33, 35) È berei kaa núu líi a soli la ŋɔwɛ̀li-kɛ-maa nuu ta a saa.

⁶ Gáa a ŋa nɛnɛ mɛni à gɛ́ɛ Zîsɛ nya máŋ è berei kɔ́lɔŋ kúlíi a soli la kúwɛ̀li-kɛ-maa nuu ta a saa. Nyaŋ Zîsɛ káa nɔ́ yɛ̂ɛ Ǹâŋ. (Zɔ̂ŋ 14:9) Wala-walalaa káa Ziova yêei à gɛ́ɛ e saa kpera wɔlɔ-wɔlɔ da wɔlɔ-wɔlɔ, nyaŋ tãi kpua yée mu, a pâi gɛi tí.

7, 8. Lé mɛni ɓé Maatɛ fé kɛ ní ŋwɛ̂lii la à gɛ́ɛ dí vɛ̃ɛ-ɓelai siɣe Lâzara ɓolôŋ lai, kɛ́ɛ lé ɓé Zîsɛ è gɛi?

⁷ Tãi Zîsɛ è li la m̀olôŋ la ɓɛ́i dí Lâzara loo naai, è gáa à gɛ́ɛ daâ ná tɛ a fɛ̃ɛ-ɓela. Zîsɛ è mò nyɛɛi: “Ka vɛ̃ɛ-ɓelai   siɣe ná.” Kɛ́lɛ Maatɛ fé kɛ ní ŋwɛ̂lii dí vɛ̃ɛ-ɓelai siɣe ná, è kɛ gili ŋa à gɛ́ɛ bumai kuŋ káa nâa ma kpɛ́ni fêi Lâzara puma aâ nâa “fólo náaŋ” kɛ m̀olôŋ su. (Zɔ̂ŋ 11:​39) Vé kɛ ní a gbɔŋ maai kɔ́lɔŋɔɔ Zîsɛ e kɛ pa dɛɛ̂i zaaɓɔlɔ Lâzara pɔ́i.

⁸ Zîsɛ è mò Lâzara ma nyɛɛi: “Kula!” M̀ɛnii kɛ naa pôlu mai, e kɛ a gulaa a Maatɛ da Mere. “Zaa-nuui è kula ǹyée da gɔ́ɔ la ɣiriɛ a seɣe.” (Zɔ̂ŋ 11:​43, 44) Lâzara aâ mu-siɣe saa yêei! E mu-siɣe saa yêei e pa pôlu ŋɔkaayɔɔ̂i da ǹao-ni pɔ́. Ŋɔnûai díkɛ pɔrii díyée pɛlɛi gbono ma, díkɛ pɔrii lonoi bɔ. Nyíŋi è kɛ a ŋɛi-kɛ-maa. Zîsɛ è Lâzara mu-siɣe saa yêei.

9, 10. (1) Gbɛ̂ɛ ɓé wala-walalaa tɛɛ Zîsɛ pɔ́ à gɛ́ɛ e nûa mu-siɣe saa yêei? (2) Lé mɛni ɓé m̀u-siɣe saa-yêei mɛni-ŋai Ŋâla-kɔlɔi su da kúlii soŋ lai?

⁹ I laai la Zîsɛ è nûa mu-siɣe saa yêei a gbɔɔ wala-walalaa? Kpa. E lɛ́ɛ pâi Lâzara mu-siɣei saa yêei, è Ziova fɛli nyaŋ Ziova è wala-walalaa tɛɛ bɔ à gɛ́ɛ e Lâzara mu-siɣe saa yêei. (Zɔ̂ŋ 11:​41, 42 lóno.) Lâzara nya dɔnɔ nɔ́ fé wɔ́lɔ mu-siɣe saa yêei. Ŋâla-kɔlɔi è lono é pîlaŋ kóraŋ puu kao feerɛ (12) nɛnî-loo ta ma nyii kɛ kɔlɛi kpɔ́ a gbánaŋɔɔ. Nâŋ Zailɔ è pa e too Zîsɛ kɔ́ɔ mu e gbera fe à gɛ́ɛ e nóŋ-nɛnîi ɓalo. Nɛnî-looi ŋí nɔ́ ɓé kɛ a Zailɔ nóŋ tɔnɔi. Tãi è kɛ nîi lonoi la Zîsɛ pɔ́i, nûa tani dí pa dí mo ma díyɛɛ: “Ílóŋ-nɛnîi aâ saa! Ya fũa-fua tɔɔ̂i Kaamɔ̃ɔ ma lé mɛni ma?” Kɛ́lɛ Zîsɛ è mò Zailɔ ma nyɛɛi: “Ífe yao, laa nɔ́ a Ɣâla, ílóŋ-nɛnîi a pâi ɓáloi.” Nya ɓe da Zailɔ dí li ŋɔpɛ́rɛi la. Tãi díkɛ lɛɣɛi lai, Zîsɛ è wɔlɔ-woo mɛni gɛ nûa kaa wɔlɔi. Nya ɓe Zîsɛ è mò ǹûai dîa nyɛɛi:  “Káfe wɔlɔ, vé saa ní, kɛ́lɛ gáa nyiî.” Nɛnî-looi nee da nâŋ díkɛ díkili ŋa siai é pîlaŋ Zîsɛ wóoi ŋí sukulai ma. Nya ɓe Zîsɛ è mò ǹûai kélee dîa à gɛ́ɛ dí kula banaŋ ma, nɛnî-looi nee da nâŋ nɔ́ ɓé lɔ bɛ́rɛi mu. Zîsɛ è nɛnî-looi soŋ a ǹyée nyɛɛ ma: “Nɛnî-loo, ‘ímu siɣe!’” Íkili-ŋa sia I bîlaŋ berei ma gaa-ɓela líi e nɛ̃ɛ lai tãi dílóŋ è mu-siɣe la e pɛlɛ siai! Zîsɛ aâ dílóŋ-nɛnîi mu-siɣe saa yêei. (Mâki 5:​22-24, 35-42; Lûu 8:​49-56) Tãi kélee da káa dílóŋ-nɛnîi tí kaa lai, da káa díkili-ŋa sia é pîlaŋ m̀ɛnii ma Ziova è gɛ diɛ Zîsɛ sârai. *

¹⁰ Diai kélee Zîsɛ e wɔ́lɔ dímu-siɣe saa yêei, dí ŋɔ́nɔ saa naa pôlu ma. Kɛ́ɛ, m̀ɛnii Ŋâla-kɔlɔi è mò é pîlaŋ m̀u-siɣe saa-yêei-ŋai ŋí diai a kúlii soŋ gɛ̀ pa a kili-kɛ-zu kúpɔ. Kpɛ́ni fêi Ziova a ŋwɛ̂lii e nûa mu-siɣe saa yêei, nyaŋ a pâi gɛ́i.

11. Lé ɓe kwa pɔri maa-kɔ̂rii Ikilisiati 9:5 su é pîlaŋ Lâzara ŋɔsaai mɛni mai?

¹¹ Ŋâla-kɔlɔi è mò a zuponoɔ nyɛɛ “zaa-ɓelai dífe mɛni kélee ta kɔ́lɔŋ.” Bere ɓé è kɛ la a Lâzara. (Ikilisiati 9:5) Yɛ̂ɛ berei Zîsɛ è mò lai, è kɛ nɔ́ yɛ̂ɛ Lâzara è kɛ nyiî. (Zɔ̂ŋ 11:​11) Tãi Lâzara è kɛ la mòloŋ sui, vé kɛ ní a “mɛni da kɔ́lɔŋɔɔ.”

12. Kú gɔ́lɔŋ léŋ à gɛ́ɛ Lâzara ŋɔmu-siɣe saa-yêei mɛnii è kɛ a tɔ̃yâ?

¹² Tãi Zîsɛ è Lâzara mu-siɣe la saa yêei, nûa támaa dí  naa kaa. Zîsɛ kpɔara-ɓela kpîŋ díkɛ a gɔ́lɔŋɔɔ à gɛ́ɛ Zîsɛ è Lâzara mu-siɣe saa yêei. Lâzara è kɛ ŋɔ́nɔ a vúlu, nyaŋ nyíŋi è nɛ à gɛ́ɛ ŋɔmu-siɣe saa-yêei mɛnii è kɛ a tɔ̃yâ. (Zɔ̂ŋ 11:​47) E tee nyíti ma, nûa támaa dí li à gɛ́ɛ dí Lâzara naa kaa, nyaŋ nyíŋi è gɛ dí pɛlɛ laai la à gɛ́ɛ Ɣâla ɓé Zîsɛ tɛɛ. Nyíŋi wɛ́li fé kɛ ní Zîsɛ kpɔara-ɓela dîa, m̀ɛni ma, dí gbɛtɛ díkili-ŋa à gɛ́ɛ dí Zîsɛ da Lâzara paa.​—Zɔ̂ŋ 11:​53; 12:​9-11.

13. Kú gɔ́lɔŋ léŋ à gɛ́ɛ Ziova a pâi zaa-ɓelai mu-siɣei saa yêei?

¹³ Zîsɛ è mò nyɛɛ “diai kélee m̀olôŋ sui” da pâi dímu-siɣei saa yêei. (Zɔ̂ŋ 5:​28) Nyíŋi sukulai ɓa diai kélee m̀olôŋ sui nyii-ŋai dímaa mɛni káa Ziova kili ŋai, da pâi dímu-siɣei saa yêei. Kɛ́lɛ, à gɛ́ɛ Ziova e núu ta mu-siɣe saa yêei, fɛ̂ɛ nɔ́ maa núui tí maa mɛ́ni kélee e lɛ́ɛ gili ŋa. Kɛ́ɛ, I laai la Ziova a pɔri nyíŋi kɛ́i? Ôowei, kpɛ́ni fêi, pɛmɛlɛŋ-kao ŋɔbiliyɔ̂ŋ támaa káa ŋele-kɔlɔŋ su. Nyaŋ Ŋâla-kɔlɔi nyɛɛ Ɣâla è díkélee díláa kɔ́lɔŋ tɛ́itɛi. (Azaya 40:​26 lóno.) À kɛ̀ Ɣâla è bɛmɛlɛŋ-kao-ŋai kélee láa kɔ́lɔŋ, nyíŋi a nɛ kûa à gɛ́ɛ diai kélee daâ saai, è dímaa mɛni kélee kɔ́lɔŋ, nyaŋ a pâi dímu-siɣei saa yêei. E tee nyíŋi ma, Ziova ɓé sɛŋ kélee kpɛtɛ, m̀ɛni ma, kú gɔ́lɔŋ à gɛ́ɛ wala-walalaa káa ǹyêei à gɛ́ɛ é nûa mu-siɣe saa yêei.

14, 15. M̀ɛni-ŋai Zôo è mòi, lé ɓe da nɛ kûa é pîlaŋ m̀u-siɣe saa-yêei ma?

¹⁴ Laa-la è kɛ Ŋâla-nuui Zôo yêei é pîlaŋ m̀u-siɣe saa-yêei mɛnii ma. È m̀arê-kɛ́i ŋí kɛ nyɛɛi: “À kɛ̀ núu ta a saa a ŋɔ́nɔ pa pôlu?” Nya ɓe è mò Ziova ma nyɛɛi: “Ya pâi tóli ɓói, nyaŋ ŋa pâi faai íwóo mu. Kpɛ́ni fêi, a pâi kɛ́i a ínĩ̂a-mɛni à gɛ́ɛ I íkpɛtɛ sãa mu-siɣe saa yêei.” Ôowei, Zôo è kɛ a gɔ́lɔŋɔɔ à gɛ́ɛ Ziova a Ŋwɛ̂lii kpɔ́ e zaa-ɓelai mu-siɣe saa yêei.​—Zôo 14:​13-15, NW.

 ¹⁵ M̀u-siɣe saa-yêei maa kili-kɛ-zui, a ílii kɛ léŋ? Tãi ta ya kɛ íkili-ŋa siai íkɛ mo yɛ̂ɛ, ‘Ŋakaayɔɔ̂i su ɓelai da ńaoi-ni daâ saai dia máŋ da pâi wɔ́lɔ dímu-siɣei saa yêei?’ Kúlii a nɛ̃ɛ kwa gɔ́lɔŋ à gɛ́ɛ Ziova a ŋwɛ̂lii kpɔ́ e zaa-ɓelai mu-siɣe saa yêei. Kwaa m̀ɛnii káa Ŋâla-kɔlɔi è mò é pîlaŋ ǹûai Ɣâla a pâi dímu-siɣei saa yêei dîa da ɓɛ́i da pâi kɛ́i naai.

16. Fúlu-laa kɛ́ɛ léŋ ɓé diai pâi dímu-siɣei saa yêei díkɛ ǹɔii ma da pâi zɔlɔ ɓói?

¹⁶ Diai wɔ́lɔ dímu-siɣe saa yêei, da díkaayɔɔ̂i e pɛlɛ dílaoi-ni dîa, díkɛ ŋɔ́nɔ díkîe ma ǹɔii ma. Bere nɔ́ ɓé a pâi kɛ́i la tínaa-tuɛ-pere, kɛ́lɛ tínaa-tuɛ-pere ŋɔi a pâi kɛ́i a nɛ́lɛɛ e tɛɛ wɔlɔ-wɔlɔ tí kɛ ŋɔi ma. Lé ɓe pâi gɛ́i tíi? Kpɛ́ni fêi, diai pâi dímu-siɣêi saa yêei, dífe pâi ŋɔ́nɔ saai, kɛ́lɛ, da pâi kɛ́i ɣele ma wɔlɔ-wɔlɔ da wɔlɔ-wɔlɔ. Nyaŋ ŋéniɛi da pâi kɛ́i zui, vé pâi kɛ́i yɛ̂ɛ sâa. Kpɛ́ni fêi kɔ́, ŋwana-lɔɔ da kɔlɔ-fela fé pâi ŋɔ́nɔ kɛ́i naa.

17. Gbɛ̂ɛ-ni ɓé pâi dímu-siɣei saa yêei?

¹⁷ Gbɛ̂ɛ-ni ɓé pâi dímu-siɣei saa yêei? Zîsɛ è mò nyɛɛ “diai kélee m̀olôŋ sui da pâi ŋ̀óo mɛnii dí kula.” (Zɔ̂ŋ 5:​28, 29) Nyaŋ Azaya 26:​19 è mò nyɛɛi: “Kúnûai nyii-ŋai daâ saai, da pâi dímu-siɣei dí kula m̀olôŋ su.” Tɔ̃yâ ma, núu ŋɔbiliyɔ̂ŋ támaa da pâi dímu-siɣei saa yêei. Zia-nuui Pɔ̂ɔ nya máŋ è mò nyɛɛ “dɔ̃yâ-ɓelai da diai dífe a tɔ̃yâ-ɓelai” da pâi dímu-siɣei saa yêei. (Dikɛ-mɛni-ŋai 24:​15 lóno.) Nyíŋi sukulai ɓa lé?

18. Gbɛ̂ɛ-ni ɓa “dɔ̃yâ-ɓelai” nyii-ŋai pâi dímu-siɣei saa yêei?

¹⁸ “Dɔ̃yâ-ɓelai” ɓa diai wɔ́lɔ kɛ  Ɣâla nĩ̂a-mɛni kɛ́i Zîsɛ kɛ lɛɛ pa pâi ǹɔii ma. Nûa kɛ́ɛ yɛ̂ɛ Nôa, Eberaɣɛ̃ɛ, Seera, Mose, Lûfi, da Ɛtɛ da pâi dímu-siɣei saa yêei díkɛ ŋɔ́nɔ ǹɔii ma. Ya pɔri mɛni maa-kɔ̂rii é pîlaŋ ǹûai ŋí daŋa dîa Ibulu kɔlɔi ŋuŋ 11 su. I laai la diai Ziova nĩ̂a-mɛni kɛ́i kútãi mai, dia máŋ díkaa a “tɔ̃yâ-ɓela”? Ôowei, mɛni ma, da pâi dímu-siɣei saa yêei.

19. Gbɛ̂ɛ-ni ɓa “diai dífe a tɔ̃yâ-ɓelai”? Lé mɛni lɛ́lɛɛ ɓé Ziova a pâi gɛ́i diɛi?

 ¹⁹ “Diai dífe a tɔ̃yâ-ɓelai” dia ɓa ǹúu ŋɔbiliyɔ̂ŋ támaai nyii-ŋai pɔri maa fé kɛ́ ní diɛ à gɛ́ɛ dí Ziova maa mɛni maa-kɔ́ri. Tɔ̃yâ ma dí saa, kɛ́ɛ, Ziova fé niî nia tí dímɛni ma. A pâi dímu-siɣei saa yêei, nyaŋ pere a pâi kɛ́i díyêei à gɛ́ɛ dí mɛni maa-kɔ́ri é pîlaŋ Ɣâla ma, dí nĩ̂a-mɛni kɛ.

20. Lé mɛni ɓé núu kélee fé pâi mu-siɣei la saa yêei?

²⁰ I laai la nyíŋi à nɛ̂i kûa à gɛ́ɛ diai kélee daâ wɔ́lɔ saai da pâi dímu-siɣei saa yêei? Kpa. Zîsɛ è mò à gɛ́ɛ nûa tani dífe pâi dímu-siɣei saa yêei. (Lûu 12:5) Kɛ́ɛ, gbɛ̂ɛ ɓa pɔri núu ta ŋɔmɛni ŋa teei à kɛ̀ maa nɛ̃̂ɛi e mu-siɣe saa yêei kpaa maa fé nɛ̃ɛ ní e mu-siɣe saa yêei? Ziova ɓé gáa a m̀ɛni kélee ŋa-tee nuui, kɛ́lɛ aâ walalaa tɛɛ Zîsɛ pɔ́ à gɛ́ɛ “e kɛ a mɛni ŋa-tee nuu vúlu-ɓelai da zaa-ɓelai mɛni ma.” (Dikɛ-mɛni-ŋai 10:​42) Diai kélee Zîsɛ a pâi dímɛnii ŋa teei a sɔnyɔ̂ŋ-ɓelai, nyaŋ dífe ŋwɛ̂lii à gɛ́ɛ dí dísɔŋ maa falêŋ, dífe pâi dímu-siɣei saa yêei.​—M̀ɛni-ŋuŋ Gɔlɔi Kpɛɛ Ŋa 19 káa.

21, 22. (1) Diai pâi dímu-siɣei dí lí ɣâla-taai, lé kpono ɓé da pâi dímu-siɣei lai? (2) Gbɛ̂ɛ ɓé kɛ a ǹúui maa-ŋuŋ nyii mu-siɣe saa yêei e lí ɣâla-taai?

²¹ Ŋâla-kɔlɔi è mò à gɛ́ɛ nûa taŋa da pâi dímu-siɣei saa yêei à gɛ́ɛ dí lí ɣâla-taa. Ǹúui pâi mu-siɣei saa yêei à gɛ́ɛ e lí ɣâla-taai, a pâi mu-siɣei saa yêei a mɔ̂leŋ kpono.

²² Zîsɛ ɓé kɛ́ a ǹúui maa-ŋuŋ à gɛ́ɛ e mu-siɣe saa yêei e lí ɣâla-taa. (Zɔ̂ŋ 3:​13) Fólo kuu saaɓa tɛɛ pôlu ma tãi Zîsɛ è saa lai, Ziova è mu-siɣe saa yêei. (Ŋule-wooi 16:​10; Dikɛ-mɛni-ŋai 13:​34, 35) Zîsɛ fé mu-siɣe ní saa yêei a núu-kpune kɔlɔ. Zia-nuui Pitɛ è mò nyɛɛ dí Zîsɛ “kpono pàa, kɛ́lɛ, e kɛ a vúlu mɔ̂leŋ su.”  (1 Pitɛ 3:​18) Zîsɛ è mu-siɣe saa yêei a mɔ̂leŋ wala-wala! (1 Kɔleŋtiɛŋ 15:​3-6) Kɛ́ɛ Ŋâla-kɔlɔi è mò à gɛ́ɛ nya dɔnɔ nɔ́ fé pâi mu-siɣei saa yêei a bere siî ŋí.

23, 24. Gbɛ̂ɛ-ni ɓa “ǹúu kpulu loŋ” Zîsɛ è lono é pîlaŋ dîai, nyaŋ da pâi kɛ́i a núu ɣɛɛlu?

²³ Zîsɛ e lɛ́ɛ pâi saai è mò ŋɔpôlu-ɓelai dîa nyɛɛi: “Ŋa liî kwaa ma kpɛtɛi kámɛni ma.” (Zɔ̂ŋ 14:2) Nyíŋi à nɛ̂i kûa à gɛ́ɛ Zîsɛ ŋɔpôlu-ɓelai dani da pâi dímu-siɣei saa yêei à gɛ́ɛ da dia-ni díkɛ ɣâla-taa. Da pâi kɛ́i a núu ɣɛɛlu? Zîsɛ è mò nyɛɛ dífe pâi kɛ́i a dí támaa, da pâi kɛ́i a “núu kpulu loŋ.” (Lûu 12:32) Zia-nuui Zɔ̂ŋ è ǹúu kpului ŋí ŋɔnɔŋbai lɛ tãi è Zîsɛ kaa la “tɔɔ̂i Zãiyɔŋ yeei ma [ɣâla-taa] da ǹúu wala ŋuŋ tɔnɔ pôlu [wala] buu náaŋ kao náaŋ (144,000).”—M̀ɛni-lɛɛi 14:1.

²⁴ Mí tãi ɓé ǹúu wala ŋuŋ tɔnɔi pôlu wala buu náaŋ kao náaŋ (144,000) ŋí da pâi dímu-siɣei la saa yêei? Ŋâla-kɔlɔi è mò nyɛɛ nyíŋi a pâi kɛ́i tãi Kôrai Ŋɔkâloŋ-laai a pâi pɛlɛi tíi kɛ́i la ɣâla-taai. (1 Kɔleŋtiɛŋ 15:​23) Kúkaa nâa maa tãi tí su, nyaŋ ǹúu wala ŋuŋ tɔnɔ pôlu wala buu náaŋ kao náaŋ (144,000) dí támaa ɣele daâ dímu-siɣe saa yêei daâ li ɣâla-taa. Nyii-ŋai kélee díkaa nîi ǹɔii mai, da saa, da dímu-siɣe saa yêei ŋá ma dí li ɣâla-taa. Kɛ́lɛ núu-kpune támaa da pâi dímu-siɣei saa yêei díkɛ ǹɔii ma ɓɛ́ Paredai.

25. Lé ɓé kwa pâi maa-kɔ̂rii gɔlɔ-ŋuŋ ŋí bôlu ma ŋɔi sui?

²⁵ Tãi kpua yée mu, Ziova a pâi núu-kpune ŋuŋ ma ɓói saa yêei, nyaŋ saa fé ŋɔ́nɔ pâi kɛ́i ɣele ma wɔlɔ-wɔlɔ da wɔlɔ-wɔlɔ! (Azaya 25:8 lóno.) Kɛ́lɛ, tíi kɛ́ɛ léŋ ɓé diai pâi liî ɣâla-taai da pâi kɛ́i gɛ́i naai? Ŋâla-kɔlɔi è mò nyɛɛ da Zîsɛ-ni da pâi kɛ́i Ŋɔkâloŋ-laa gɔ́mɛtii mɛi. Kwa pâi mɛni támaa maa-kɔ̂rii é pîlaŋ gɔ́mɛtii tí ma gɔlɔ-ŋuŋ ŋí bôlu ma ŋɔi su.