1-3. Ana wosopewe tuli pa ukapolo wa chichi, soni Yehofa chachitugopola chamtuli?

AGANICHISYE ali ŵapele chilango pa magambo gakuti nganalemwa chilichose. Kaneko akwaponya m’nyumba ja ukayidi ni akwasalila kuti chatame m’nyumba ja ukayidijo kwa umi wawo wosope. Yikuwonekasoni kuti pangali upile soni chembecheyo chilichose chakulosya kuti chachikopoka m’nyumba ja ukayidijo. Nambosoni pangali chilichose champaka atende panganiji. Nambo mwaupile, akupikana ya mundu jwine jwakwete machili gakwakamuchisya kopoka mu ukayidimo, soni jwalakwe akwasimichisya kuti chiŵakamuchisye. Ana mpaka apikane uli?

² Wosopewe tuli achikapolo wa chiwa. Atamose tuli tulinjilile chamtuli, chiwa ngaŵa mkuchitila. Nambo Yehofa akwete machili gakutugopola ku ukapolo wa chiwa. Jwalakwe akutusimichisya kuti, “Mdani jwakumalisya jwali chiwa, chachimjonanga.”—1 Akolinto 15:26.

³ Agambe ganisya muchachipikanila pandaŵi jakuti ngasadandawula chilichose pakwamba ya chiwa. Nambo ngaŵa kuti Yehofa chachigamba kutyosya chiwape, jwalakwe chachijimusyasoni ŵandu ŵaŵawile. Yeleyitu yichiŵa yakusangalasya kwa wawojo. Jwalakwe akutusimichisya kuti ‘ŵawe.’ chachikolasoni umi. (Yesaya 26:19) Baibulo jikusakolanga yeleyi kuŵa kwimuka kwa ŵawe.

4. (a) Ana chichi champaka chitulimbikasye naga jwamwiŵasa mwetu kapena mjetu ajasiche? (b) Ana ŵane mwa achimjakwe ŵa Yesu ŵaliji ŵani?

⁴ Naga jwamwiŵasa mwetu kapena mlongo mjetu  ajasiche, tukusapikana kupweteka soni tukusaŵa ŵachanasa mnope. Tukusasoŵaga chakutenda, soni pangali champaka tutende kuti tumkamuchisye jwawilejo kolasoni umi. Nambo Baibulo jikusatukamuchisya kola chembecheyo chisyesyene. (Aŵalanje 2 Akolinto 1:3, 4.) Kwende tulole chisyasyo chimo chakulosya kuti Yehofa soni Yesu ali ŵakusachilila mnope kwajimusya ŵakunonyelwa ŵetu ŵaŵawile. Yesu paŵaliji pachilambo chapasi ŵanonyelaga kwawula kukukunguluka ni Lasalo soni achalumbugwe ŵaŵaliji Malita soni Maliya. Jemanjaji ŵaliji achimjakwe ŵa Yesu, mwati Baibulo jikusati, “Yesu ŵaliji mkwanonyela wosopeŵa, Malita ni Maliya, soni Lasalo.” Nambo lisiku line Lasalo ŵajasiche.—Yohane 11:3-5.

5, 6. (a) Ana Yesu ŵatesile chichi paŵaweni ŵandu ŵamwiŵasa lya Lasalo soni achimjakwe ali mkulila malilo? (b) Ana chanasa chaŵalosisye Yesu chili chakulimbikasya ligongo chichi?

⁵ Ligongo lya chiwacho, Yesu ŵajawile kukumtondoya Malita ni Maliya. Malita paŵapikene kuti Yesu akwisa, jwalakwe jwakopweche mumsinda kukumchingamila Yesu. Jwalakwe jwaliji jwakusangalala paŵawonegene ni Yesu mwati ŵamsalile kuti, “Akaŵe kuti wawojo ŵaliji akuno, mlumbwangu ngamkanawa.” Pelepatu Malita ŵayiwonaga kuti Yesu achelewe mnope kwisa. Kaneko Yesu ŵam’weni m’balegwe Malita, Maliya, ali mkulila. Ligongo lyakwawona jemanjaji ali mkulila, jwalakwe chamkamwile mnope chanasa mwati ŵalisile. (Yohane 11:21, 33, 35) Yesu jwapikene kupweteka kwakukusayika naga jwakunonyelwa jwetu ajasiche.

⁶ Chanasa chaŵalosisye Yesu chili chakulimbikasya, ligongo lyakuti yikusatujiganya kuti Yesu soni Atatigwe akusaŵengana ni chiwa. (Yohane 14:9) Yehofa akwete machili gakuchityosya chiwa mpaka kalakala, soni yeleyi ni yachatende pamkaŵapepa.

7, 8. Ana ligongo chichi Malita nganasakaga kuti ŵandu atyosye liganga palilembe liŵam’ŵisile Lasalo, nambo ana Yesu ŵatesile chichi?

⁷ Yesu paŵayiche pa lilembe liŵam’ŵisile Lasalo, ŵasimene kuti paliji pewugale ni liganga lyekulungwa. Kaneko Yesu ŵatite, “Atyosye ligangalyo.” Nambo Malita nganasaka kuti atyosye ligangalyo ligongo chilu cha Lasalo chaliji chili chitemi mwilembemo kwa masiku mcheche. (Yohane 11:39) Jwalakwe nganamanyilila kuti Yesu ŵasakaga kuti amjimusye mlumbugwejo.

⁸ Kaneko Yesu ŵamsalile Lasalo kuti, “Mkopoche!” Yakuyichisya yakwe, Malita ni Maliya ŵayiweni yindu yakuti nganayiwoneje chitandilile. “Mundu jwam’wejo jwakopweche. Sajo soni makono gakwe galiji gesyenganye ni nguwo.” (Yohane 11:43, 44) Lasalo ŵajimwiche ku ŵawe. Jwalakwe ŵatamagasoni ni ŵamwiŵasa mwakwe soni achimjakwe. Jemanjajo ŵamkumbatilaga, kumkwaya, soni kuŵecheta najo. Chelechitu chaliji chindu chakusimonjesya kwabasi! Yesu ŵamjimwisye Lasalo ku ŵawe.

9, 10. (a) Ana ŵani ŵaŵampele Yesu machili gakwajimuchisya ŵawe? (b) Ana ngani sya ŵandu ŵaŵajimwiche ku ŵawe sili syakusosekwa mnope kwa m’mweji chatuli?

⁹ Ana Yesu ŵajimusyaga ŵandu ni machili gakwe? Iyayi. Jwalakwe mkanamjimusye Lasalo, jwapopesile kaje kwa Yehofa, kaneko Yehofa ŵampele machili gakumjimuchisya Lasalo ku ŵawe. (Aŵalanje Yohane 11:41, 42.) Lasalo nganaŵa mundu jikape juŵajimwiche ku ŵawe. Baibulo jikusatusalila yakwamba kamwali ka yaka 12 kakalwasile mnope. Babagwe kamwalika ŵaŵaliji Yailo ŵasoŵile chakutenda, ni ŵam’ŵendile Yesu kuti amposye mwanachejo. Yailo ŵakwete mwanache jumopejo. Nambo paŵaliji chiŵela kuŵechetana ni Yesu ya nganiji, achalume ŵane ŵayiche ni ŵatite, “Mwanache jwenu ajasiche! Mkalagasyasoni  Mwalimuju.” Nambo Yesu jwamsalile Yailo kuti, “Mkasimjogopa, mgambe kola chikulupi.” Kaneko jwalakwe jwapite ku nyumba ja Yailo. Paŵaliji kuŵandichila ku nyumbako, Yesu jwaweni soni kupikana ŵandu ali mkulila. Jwalakwe jwasalile kuti, “Aleche kulila, jwalakwe nganawa, nambo akwamba gona.” Komboleka kuti, achinangolo ŵa malemujo, nganapikanichisya maloŵe gaŵaŵechete Yesuga. Kaneko Yesu jwaŵendile wosope ŵaŵaliji pelepowo kuti atyoche, ni ŵajigele achinangolowo ni kwinjila nawo m’chipinda chiŵagonile malemujo. Yesu ŵakakamwile kamwaliko pamkono ni ŵakasalile kuti, “Mwali nguŵecheta ni m’mwejo, ‘mjimuche!’” Aganichisye yaŵatite achinangolowo kusangalala ali akaweni kamwali kala kali mkwimuka ni kutanda kuŵecheta nawo. Yesu ŵajimwisye mwanache jwawo. (Maliko 5:22-24, 35-42; Luka 8:49-56) Kutandila palisikuli kwawula msogolo, jemanjaji pakaweni kamwali kala, nganaliŵalila yaŵatesile Yehofa kupitila mwa Yesu. *

¹⁰ Mkupita kwandaŵi ŵandu ŵele Yesu ŵajimwisye ku ŵawe, ŵajasichesoni. Nambo yatukusaŵalanga pakwamba ya jemanjaji yili yakusosekwa mnope ligongo yikusatukamuchisya kola chembecheyo chisyesyene. Yehofa ali jwakusachilila kwajimusya ŵandu ku ŵawe, soni chachajimusya kwene.

11. Ana lilemba lya Jwakulalichila 9:5 likusatujiganya yatuli pakwamba ya Lasalo?

¹¹ Baibulo jikusasala mwakupikanika chenene kuti “ŵawe ŵangamanyilila chilichose.” Ngani ja Lasalo jikusalosya kuti yeleyi yili yisyene. (Jwakulalichila 9:5)  Mpela muŵaŵechetele Yesu, yaliji mpela kuti Lasalo ŵagonile. (Yohane 11:11) M’yoyo, paŵaliji mwilembe, Lasalo ‘nganamanyilia chilichose.’

12. Ana pana umboni watuli wakulosya kuti Lasalo ŵajimwiche ku ŵawe?

¹² Yesu paŵamjimwisye Lasalo, ŵandu ŵajinji ŵayiweni. Atamose adani ŵa Yesu, ŵayimanyi kuti yaŵatesile Yesuyi yaliji yakusimonjesya. Lasalo ŵaŵelesoni ni umi, yayasimichisye kuti jwalakwe ajimwiche ku ŵawe. (Yohane 11:47) Nambosoni, ŵandu ŵajinji ŵajawulaga kukum’wona Lasalo. Yakuyichisya yakwe yaliji yakuti ŵatandite kulupilila kuti Mlungu ŵamtumile Yesu. Nambo adani ŵa Yesu nganiyanonyela, mwati ŵatandite kulinganya yakuti am’wulaje Yesu yalumo ni Lasalo.—Yohane 11:53; 12:9-11.

13. Ana mpaka tusimichisye chatuli kuti Yehofa chachikombola kwajimusya ŵawe?

¹³ Yesu ŵatite, ŵandu “ŵali m’malembe gachikumbuchilo,” chachijimuka. (Yohane 5:28) Yeleyi yikugopolela kuti ŵandu ŵele Yehofa akwakumbuchila chachiŵasoni chijumi. Nambo kuti Yehofa akombole kumjimusya mundu jwalijose akusosekwa kukumbuchila chilichose chakwana ni mundujo. Nambo ana jwalakwe mpaka akombole kutenda yeleyi? Kwene! Agambe ganisya, kwinaniku kwana ndondwa mabiliyoni mabiliyoni. Nambo Baibulo jikusati, Yehofa akusamanyilila lina lya ndondwa jilijose. (Aŵalanje Yesaya 40:26.) Naga jwalakwe akusakumbuchila lina lya ndondwa jilijose, yili yangakayikasya kuti jwalakwe mpaka akumbuchilesoni chilichose chakwamba ya ŵandu ŵaŵawile wachachajimusya. Soni chakusosekwa mnope ni chakuti, Yehofa ni juŵapanganyisye yindu yosope. M’yoyo tukumanyilila kuti jwalakwe akwete machili gakwajimusya ŵandu ŵaŵawile.

14, 15. Ana tukulijiganya chichi kutyochela pa maloŵe gaŵaŵechete Yobu pakwamba ya kwimuka kwa ŵawe?

¹⁴ Mundu jwakulupichika Yobu, jwakulupilaga kuti ŵawe  chachijimuka. Jwalakwe jwawusisye kuti, “Ali awile mundu, ana chachitamasoni ni umi?” Kaneko jwamsalile Yehofa kuti, “chachiŵilanga, nipo une chinjajanga. Chachigasachilila masengo ga magasa gawo.” Yeleyi yikulosya kuti Yobu jwamanyililaga kuti Yehofa akusajembecheya mwalung’wanu ndaŵi jachachijimusya ŵawe.—Yobu 14:13-15.

¹⁵ Ana akupikana uli kumanyilila kuti ŵawe chachijimuka? Nambo komboleka kuliwusya kuti, ‘Ana ŵamwiŵasa mwangu, ni achalongo achimjangu ŵaŵawile, chachijimuka?’ Yili yakulimbikasya kumanyilila kuti Yehofa akusachilila mnope kwajimusya ŵawe. Nambo kwende tulole yajikusasala Baibulo pakwamba ya kwachachitama ŵachachijimukawo, soni kuti ŵani ŵachachijimuka.

16. Ana ŵandu ŵachachijimuchila pachilambo chapasi chachitamaga ni umi wamtuli?

¹⁶ Kalakalako, ŵandu ŵaŵajimwiche ku ŵawe ŵatamagasoni pachilambo chapasi ni ŵamwiŵasa mwawo soni achimjawo. Kusogoloku, kuchitendekwasoni yeleyi, nambo yichiŵa yambone mnope kupunda kalakalako. Ligongo chichi tukuŵecheta yeleyi? Lili ligongo lyakuti ŵandu ŵachachijimukawo chachikola upile wakutama ni umi wangamala. Nambosoni chachitamaga m’chilambo chakulekangana mnope ni chatukusatamachi. Kuchiŵa kuli kwangali ngondo, kasa malamusi, soni kulwala.

17. Ana ŵani ŵachachijimuka?

¹⁷ Ana ŵani ŵachachijimuka? Yesu ŵatite, “ŵandu wosope ŵali m’malembe gachikumbuchilo chachipikana maloŵe gakwe ni chachijimuka.” (Yohane 5:28, 29) Nambosoni lilemba lya Chiwunukuko 20 ndime 13 likusati, “Nyasa japeleche ŵandu ŵawe ŵaŵaliji mwelemo, soni chiwa ni Malembe yapelechesoni ŵawe ŵaŵaliji mwelemo.” Kusala  yisyene, ŵandu ŵajinji chachitamasoni ni umi. Nombe najo ndumetume Paulo ŵasasile kuti kuchiŵa kwimuka kwa “ŵakulungama ni ŵangalungama ŵakwe.” (Aŵalanje Masengo 24:15.) Ana yeleyi yikugopolela chichi?

18. Ana ŵandu “ŵakulungama” ŵachachijimuka ali ŵani?

¹⁸ Ŵandu ‘ŵakulungamaŵa’ akupwatikapo ŵakutumichila ŵa Mlungu ŵakulupichika ŵaŵapali Yesu mkanayiche  pachilambo chapasi. Jemanjaji ali mpela mwanja Nowa, Abulahamu, Sala, Mose, Lute, soni Esitele. Ŵandu ŵeleŵa chachijimuchila pachilambo chapasi pano. Komboleka kuŵalanga ya achalume ni achakongwe ŵane mwa ŵeleŵa pa Ahebeli mtwe 11. Nambi wuli pakwamba ya ŵakutumichila ŵa Yehofa ŵakuwa mundaŵi jetu jino? Jemanjajisoni ali “ŵakulungama,” m’yoyo nombe nawo chachijimuka.

19. Ana ŵandu “ŵangalungama” ali ŵani? Ana Yehofa chachapa upile watuli?

¹⁹ Ŵandu “ŵangalungama” akupwatikapo mabiliyoni gejinji ga ŵandu ŵanganakola upile wakummanyilila Yehofa. Atamose kuti jemanjaji ŵawile, nambo Yehofa nganiŵaliŵalila. Jwalakwe chachajimusya, soni chachapa upile wakulijiganya ya jwalakwe ni kumtumichila.

20. Ana ligongo chichi ŵandu wosope ngasajimuka ku ŵawe?

²⁰ Ana yeleyi yikugopolela kuti jwalijose juŵawile chachijimuka? Iyayi. Yesu ŵasasile kuti ŵandu ŵane ngasajimuka ku ŵawe. (Luka 12:5) Ana ŵani ŵachachisagula kuti mundu ajimuche kapena iyayi? Yehofa ni jwali Jwakwelusya jwakumalisya, nambo jwalakwe ampele Yesu ukumu “wakwelusya ŵandu ŵachijumi soni ŵawe.” (Masengo 10:42) Mundu jwalijose juchachimlamula kuti ali jwakusakala soni jwakuti nganasakaga kuchenga umi wakwe, ngasajimuka.—Alole Maloŵe Gakumbesi 18.

21, 22. (a) Ana kwimuka ni kwawula kwinani kukusagopolela chichi? (b) Ana ŵani ŵaŵaliji ŵandanda kwimuka ni kwawula kwinani?

²¹ Baibulo jikusatusalilasoni kuti ŵandu ŵane chachitamaga kwinani. Naga mundu ajimwiche ni kwawula kwinani, jwalakwe jwangajimuka ni chilu cha mundu mpela mwatuŵelelemu. Jwalakwe akusajimuchila kuti akatameje ni umi kwinani ni chilu chausimu.

²² Yesu jwaliji jwandanda kwimuka ni kwawula kwinani. (Yohane 3:13) Yehofa ŵamjimwisye Yesu pali papite masiku  gatatu chiwile. (Salimo 16:10; Masengo 13:34, 35) Jwalakwe nganajimuka ni chilu chaumundu. Ndumetume Petulo jwasasile kuti Yesu “ŵawile m’chilu nambo ŵamjimwisye mpela msimu.” (1 Petulo 3:18) Yesu ŵajimwiche ni chilu cha machili chausimu. (1 Akolinto 15:3-6) Nambo Baibulo jasasile kuti pachiŵasoni ŵane ŵachachijimuka ni chilu mpela chelechi.

23, 24. Ana “kakuga ka ngondolo” kaŵakasasile Yesu kali ŵani? Soni kali ka ŵandu ŵalingwa?

²³ Yesu ali asigele panandi kuwa, ŵasalile ŵakulijiganya ŵakwe kuti, “Ngwawula kukwalinganyichisya malo.” (Yohane 14:2) Yeleyi yikugopolela kuti ŵane mwa ŵakumkuya ŵakwe ŵaliji ŵakuti chachijimuka ni kwawula kwinani. Ana chachiŵa ŵandu ŵalingwa? Yesu ŵasasile kuti chiŵalanjilo cha jemanjaji chichiŵa chamnono. Jwalakwe ŵatite kali “kakuga ka ngondolo.” (Luka 12:32) Ndumetume Yohane jwakolasile chiŵalanjilo chisyesyene cha ŵanduŵa, paŵam’weni Yesu “ali ajimi Petumbi lya Siyoni [lyakwinani] yalumo ni ŵandu 144,000.”—Chiwunukuko 14:1.

²⁴ Ana Aklistu 144,000 ŵeleŵa chachijimuka chakachi? Baibulo jikusatusalila kuti jemanjaji chachitanda kwimuka Yesu ali atandite kulamulila kwinani. (1 Akolinto 15:23) Apano tukutama mundaŵi jelejo, soni ŵajinji mwa 144,000 ŵeleŵa ŵajimwiche kala soni ŵapite kwinani. Ŵasigalile pachilambo chapasi naga awile, akusajimuka ni kwawula kwinani ndaŵi jijojo. Nambope ŵandu ŵajinji chachijimuka kusogolo kuti chatame ni umi pachilambo chapasi cha paladaiso.

25. Ana mumtwe wakuyichisya tuchilijiganya yatuli?

²⁵ Pachangakaŵapa Yehofa chiŵagopole ŵandu ku chiwa, soni chiwa ngasichipagwasoni mpaka kalakala. (Aŵalanje Yesaya 25:8.) Nambo ana ŵachachijawula kwinani chachijawula kukutenda chichi? Baibulo jikusasala kuti jemanjaji chachilamulila ni Yesu mu boma jakwinani. Tuchilijiganya yejinji yakwamba boma jeleji mumtwe wakuyichisya.