1-3．所有人都摆脱唔到乜嘢？但耶和华会点样帮我哋？

想象一下，你冇犯过法就俾人判处终身监禁，一世都冇机会获得释放。睇嚟你已经冇晒希望，亦都改变唔到呢个事实。当你感到绝望嘅时候，你发觉有一个人有能力使你得到释放，佢仲承诺会帮你。你会有咩感觉呢？

² 某方面嚟讲，我哋每个人都系死囚。无论我哋点样做，都冇办法摆脱死亡。但系，耶和华有能力改变呢个情况，佢保证“死亡呢个最后嘅仇敌都必被消灭”。（哥林多前书15:26）

³ 试谂吓，人唔使面对死亡系几咁令人欣慰！耶和华唔单止会除去死亡，仲会使死去嘅人重获生命。噉意味住乜嘢？上帝应许会使“丧命嘅人”再次活过嚟。（以赛亚书26:19）呢个就系圣经所讲嘅复活。

4．（甲）当至亲或好友去世嘅时候，乜嘢俾到我哋安慰？（乙）耶稣有边啲好朋友？

⁴ 当至亲或好友去世嘅时候，我哋都会感到好悲痛好无助。我哋冇能力改变呢个事实。但系，圣经 俾到我哋真正嘅安慰。（请读哥林多后书1:3,4）耶和华同耶稣好想将我哋所爱嘅人复活，等我哋嚟睇吓一个记载。耶稣喺地上嘅时候经常探望拉撒路、马大同马利亚。呢三姐弟都系耶稣嘅好朋友。圣经话：“耶稣爱马大同佢嘅妹妹，亦都爱拉撒路。”不过，后来拉撒路死咗。（约翰福音11:3-5）

5,6．（甲）耶稣见到拉撒路嘅家人同朋友咁悲痛，佢有咩反应？（乙）点解知道耶稣对死亡嘅感受令人感到安慰？

⁵ 耶稣于是去安慰马大同马利亚。马大知道耶稣嚟紧，就出去城外见佢。马大见到耶稣，就同佢讲：“如果你早啲喺呢度，我嘅兄弟就唔会死嘞”。马大觉得耶稣嚟迟咗。之后，耶稣见到马大嘅妹妹马利亚悲伤痛哭，又见到在场嘅人咁难过，自己亦都伤心流泪。（约翰福音11:21,33,35）耶稣嘅反应表明，佢深切感受到我哋丧失至亲嘅悲痛。

⁶ 知道耶稣对人失去至亲好友嘅感受同我哋一样，令人好安慰。耶稣就好似佢天父一样，所以，我哋可以肯定耶和华同样感受到我哋嘅悲痛。（约翰福音14:9）耶和华唔单止有能力将死亡永远除去，而且佢好快就会噉做。

7,8．点解马大唔赞成移开拉撒路坟墓嘅石头？但系耶稣跟住点做？

⁷ 耶稣嚟到拉撒路嘅坟墓，坟墓入口用一块大石 封住。耶稣吩咐人话：“你哋将石头移开”。不过马大唔赞成，因为拉撒路已经死咗四日。（约翰福音11:39）马大唔知道耶稣跟住会点样帮佢嘅弟弟。

⁸ 耶稣同拉撒路讲：“出嚟！”马大同马利亚跟住见到嘅事的确令人好震撼。“嗰个死咗嘅人就出嚟，手脚都用布巾包住”。（约翰福音11:43,44）拉撒路复活咗嘞！佢再次同亲友重聚，可以互相拥抱同交谈。耶稣复活拉撒路，实在系一个奇迹！

9,10．（甲）耶稣复活人嘅能力嚟自边个？（乙）点解圣经里面复活嘅记载对我哋咁有价值？

⁹ 耶稣系咪凭自己嘅能力复活死去嘅人？唔系。佢复活拉撒路之前先向耶和华祷告，耶和华就赐能力俾佢复活拉撒路。（请读约翰福音11:41,42）拉撒路并唔系唯一一个被复活嘅人。圣经记载有个人叫崖鲁，佢有个12岁嘅独生女，病得好严重。崖鲁冇晒办法，就去求耶稣医好佢个女。崖鲁同耶稣仲讲紧嘢嗰阵，有人嚟同崖鲁讲：“你个女死咗喇！何必仲麻烦老师呢？”但系，耶稣同崖鲁讲：“唔使惊，只要有信心，佢必能得救”。于是，耶稣就去崖鲁屋企。差唔多到嗰阵，耶稣见到啲人喺度哭哭啼啼，就同佢哋讲：“唔好喊，佢冇死，只系瞓着咗”。 小姑娘嘅父母肯定好想知道耶稣讲嘅系咩意思。耶稣叫其他人离开，然后同小姑娘嘅父母入去间房。之后，耶稣温柔噉拉住个女仔只手，同佢讲：“小姑娘，我叫你起身！”想象吓，当小姑娘即刻起身开始行走，佢嘅父母几咁开心！耶稣复活咗佢哋个女。（马可福音5:22-24,35-42；路加福音8:49-56）从嗰日起，当人见到呢个女仔，就会记得耶和华通过耶稣所做嘅事。 *

¹⁰ 耶稣复活过嘅人后来都再次死去。噉系咪话复活呢啲人系冇意义嘅呢？当然唔系，呢啲记载使我哋有真正嘅希望，可以确信耶和华好想复活人，而且佢一定会噉做。

11．关于拉撒路死后嘅情况，我哋从传道书9:5学到乜嘢？

¹¹ 圣经清楚指出：“死咗嘅人……毫无知觉”。拉撒路复活嘅记载可以证实呢一点。（传道书9:5）正如耶稣所讲，死去嘅拉撒路就好似瞓着咗噉。（约翰福音11:11）当拉撒路喺坟墓嘅时候，佢“毫无知觉”。

12．我哋点知道拉撒路复活呢件事真系发生过？

 ¹² 耶稣复活拉撒路嗰时，好多人都在场。甚至连耶稣嘅敌人都知道佢施行过呢个奇迹。复活咗嘅拉撒路有力噉证明复活真系发生过。（约翰福音11:47）后来，好多人去探望拉撒路，结果佢哋开始相信耶稣真系上帝派嚟嘅。虽然证据确凿，耶稣嘅敌人仲系要密谋杀死佢，连拉撒路都唔放过。（约翰福音11:53；12:9-11）

13．点解我哋可以肯定耶和华会复活死去嘅人？

¹³ 耶稣话“所有喺纪念墓入面嘅人”都会复活。（约翰福音5:28）意思即系话耶和华会将佢记念嘅人都复活过嚟。但系耶和华要复活一个人，就要记得嗰个人嘅一切。耶和华系咪真系做得到呢？试谂吓，宇宙有数以亿万计嘅星星，而圣经话耶和华知道每一粒星嘅名。（请读以赛亚书40:26）既然耶和华能够记得每一粒星嘅名，佢绝对能够记住将要复活嘅人所有细节。更重要嘅系，耶和华创造咗一切，所以我哋知道佢有能力复活人。

14,15．关于复活，我哋从约伯所讲嘅话学到乜嘢？

¹⁴ 上帝嘅忠仆约伯相信人会复活。佢问：“人死咗能唔能够再活？”然后佢同耶和华讲：“到时你呼唤我，我就回应。你必切切想念你手所造嘅。”冇错，约伯知道耶和华好热切期待复活死去嘅人。（约伯记14:13-15）

 ¹⁵ 你对复活嘅希望有咩感觉呢？你可能会谂：“死去嘅亲人同朋友会唔会复活呢？”耶和华真系好想将死去嘅人复活。知道呢一点的确令我哋感到好安慰。等我哋嚟睇吓，圣经话将来边啲人会复活同埋喺边度复活。

16．将来喺地上复活嘅人会享有点样嘅生活？

¹⁶ 以往喺地上复活嘅人可以同亲友重聚。将来复活嘅人同样都可以，不过到时情况会更好。点解噉讲？因为喺地上复活嘅人有机会永远生活落去，唔使再经历死亡。而且佢哋到时身处嘅环境会同而家好唔同。到时唔会再有战争、罪行同疾病。

17．边啲人会复活呢？

¹⁷ 边啲人会复活？耶稣话：“所有喺纪念墓入面嘅人都会听见佢嘅声音，就出嚟”。（约翰福音5:28,29）启示录20:13亦都话：“海交出其中嘅死人，死亡同坟墓亦交出其中嘅死人”。冇错，亿万人会重获生命。使徒保罗话“义人同不义嘅人”都会复活。（请读使徒行传24:15）保罗嘅话系咩意思呢？

18．将会复活嘅“义人”系指边啲人？

¹⁸ “义人”包括耶稣降世前忠于耶和华嘅人。例如挪亚、亚伯拉罕、撒拉、摩西、路得同以斯帖，佢 哋都会喺地上复活。圣经嘅希伯来书第11章记载咗佢哋其中一啲人嘅事迹。耶和华嘅现代忠仆又点呢？佢哋都系“义人”，所以去世之后都会复活。

19．“不义”嘅人系指边啲人？耶和华会俾佢哋乜嘢机会？

¹⁹ “不义”嘅人包括数以亿万计仲未有机会认识耶 和华就死去嘅人。不过，耶和华并冇忘记佢哋。耶和华会复活佢哋，使佢哋有机会认识同埋事奉佢。

20．边啲人唔会复活？

²⁰ 噉系咪话每个死去嘅人都会复活呢？唔系。耶稣讲过有啲人系唔会复活嘅。（路加福音12:5）一个人可唔可以复活，究竟由边个决定呢？耶和华系最终嘅审判者，不过佢已经将审判权交俾耶稣。耶稣“要审判活人死人”。（使徒行传10:42）所有被判定为唔愿意悔改嘅恶人都唔会被复活。——请睇附注19

21,22．（甲）复活到天上系乜嘢意思？（乙）第一个被复活到天上嘅系边个？

²¹ 圣经亦都话有啲人会复活到天上。佢哋会复活成为灵体，而唔系血肉之躯。

²² 耶稣系第一个得到呢种复活嘅人。（约翰福音3:13）耶稣被处死之后第三日，耶和华将佢复活。（诗篇16:10；使徒行传13:34,35）耶稣唔系复活成血肉之躯。使徒彼得指出，耶稣“被处死嘅时候系血肉之躯，活过嚟嘅时候系灵体”。（彼得前书3:18）耶稣被复活成为一个大能嘅灵体！（哥林多前书15:3-6）不过圣经话耶稣并唔系唯一一个经历呢种复活嘅人。

23,24．耶稣所讲嘅“小群羊”系指边啲人？佢哋总共有几多人？

 ²³ 耶稣牺牲生命前同忠心嘅门徒讲：“我而家要去为你哋预备地方”。（约翰福音14:2）耶稣嘅意思系有部分门徒会复活到天上同佢一齐。复活到天上嘅基督徒有几多呢？耶稣将呢啲数目唔多嘅基督徒称为“小群羊”。（路加福音12:32）通过使徒约翰嘅话我哋可以知道精确嘅数目。喺异象中约翰见到耶稣“企喺［天上嘅］锡安山上，有十四万四千人同佢喺一齐。”（启示录14:1）

²⁴ 14万4000个基督徒几时会被复活呢？圣经话基督喺天上开始统治之后，佢哋就会被复活。（哥林多前书15:23）而家我哋正生活喺呢段时期，而14万4000人当中大部分已经被复活到天上，其余仲喺地上嘅人一旦死去就会立即复活到天上。至于曾经喺世上活过嘅大多数人，就可以喺未来嘅地上乐园复活。

25．下一章我哋会学到乜嘢？

²⁵ 耶和华好快就会使所有人摆脱死亡嘅奴役，而死亡最终会永远消失！（请读以赛亚书25:8）噉复活到天上嘅人会喺天上做乜嘢呢？圣经话佢哋会同耶稣喺天上嘅王国一齐统治。关于呢个王国，下一章我哋会学到更多。