1-3. a) ¿Tu lu náʼ nuu guiranu? b) ¿Xi zuni Jehová para gulá laanu?

BIXUIʼLÚ cayuni juzgárcabe lii pur xiixa ni qué ñúniluʼ ne gudíxhecabe guieguyooloʼ guidubi xquendanabániluʼ. Maʼ qué ziuu dxi guireeluʼ. Runi sentirluʼ maʼ binítiluʼ guiráʼ ni. Gastiʼ qué zanda gúniluʼ. Ne ora ruluíʼ maʼ qué gápaluʼ nin ti esperanza, gúnnaluʼ nuu tuuxa ni zanda cuee lii de ndaaniʼ cárcel ne cayuni prometer zacané lii. ¿Ximodo ñuni sentirluʼ yaʼ?

² Guiranu nuunu lu náʼ guendaguti. Ne qué zanda gúninu gastiʼ para guireʼnu de lu náʼ ni. Peru napa Jehová poder para gulá laanu. ¿Ximodo chigúnibe ni yaʼ? Maʼ biʼniʼ prometerbe zunitilube guendaguti (1 Corintios 15:26).

³ ¿Ñee ruxuíʼluluʼ pabiáʼ zatadxí ladxidoʼno dxi maʼ qué chuʼ guendaguti la? Peru qué zabee si Jehová guendaguti. Laaca zúnibe ca gueʼtuʼ ca libre. Zusibani Jehová ca ni maʼ guti, laabe maʼ biʼniʼ prometerbe laanu «zabani ca gueʼtuʼ» (Isaías 26:19). Nga nga ni ribee lá Biblia resurrección. Guníʼ ique xi raca significar promesa riʼ para lii.

4. a) ¿Paraa zanda guidxélanu ni quixhedxí ladxidoʼno ora gatiʼ ti familia stinu o ti xhamígunu? b) ¿Tuu nga ca ni nabé guca xhamigu Jesús?

⁴ Ora rati ti familia stinu o ti xhamígunu, guizáʼ  naná yuubaʼ rápanu. Riuʼnu triste purtiʼ qué zanda gúninu gastiʼ para guibani binni ca sti biaje. Peru ni rusiidiʼ Biblia dxandíʼ peʼ riguixhedxini ladxidoʼno (biindaʼ 2 Corintios 1:3, 4). Guidúʼyanu ti ejemplu ni rusihuinni racalaʼdxiʼ Jehová ne Jesús gusibánicaʼ ca familia stinu ne ca xhamígunu ni maʼ guti. Dxi guyuu Jesús lu Guidxilayú riʼ, gatigá yegánnabe Lázaro ne ca bizaʼnaʼ, Marta ne María. Guiónnacabe guizáʼ guca xhamígucabe Jesús. Biblia ná: «Nabé nadxii Jesús Marta, María ne Lázaro» (Juan 11:3-5). Peru ti dxi, guti Lázaro.

5, 6. a) ¿Xi biʼniʼ Jesús ora biʼyaʼ cayuunaʼ xfamilia Lázaro ne ca xhamigu? b) Ni biʼniʼ sentir Jesús dxi gutiʼ Lázaro, ¿xiñee riguixhedxini ladxidoʼno?

⁵ Óraque guyé Jesús ra nuu María ne Marta para quixhedxibe ladxidoʼcaʼ. Ora gunna Marta maʼ zedadxiña Jesús guidxi ra nabeza la? biree para idxaagalú laabe. Guizáʼ biéchebe ora bíʼyabe Jesús, peru gúdxibe laa: «Pa ñuuluʼ raríʼ, qué ñati diʼ bizanaʼ». Guníʼ ique Marta guizáʼ bindaa Jesús. Despué, laaca biʼyaʼ Jesús cayuunaʼ María. Ora biʼyaʼ Jesús cayuunaʼ xfamilia Lázaro ne ca xhamigu, guizáʼ gucaná ladxidoʼbe ne laaca biinabe (Juan 11:21, 33, 35). Biʼniʼ sentir Jesús yuubaʼ naná ni runi sentirnu ora rati tuuxa ni nadxiinu.

⁶ Ni biʼniʼ sentir Jesús riʼ, riguixhedxini ladxidoʼno. Rusiidiʼ ni laanu nanalaʼdxiʼ Jehová ne Jesús guendaguti (Juan 14:9). Ne cadi ngasi, napa Jehová poder para gunduuxeʼ guendaguti ne maʼ biʼniʼ prometerbe maʼ cadi candaa zúnibe ni.

7, 8. a) ¿Xiñee qué niná Marta nibeecabe guié ni nuseeguʼ baʼ ra gaʼchiʼ Lázaro? b) ¿Xi milagru biʼniʼ Jesús?

⁷ Guyé Jesús ra gaʼchiʼ Lázaro. Nuseegucabe baʼ que  né ti guié naroʼbaʼ. Óraque guníʼ Jesús: «Lacuee guié ca». Peru qué niná Marta nibeecabe guié que, purtiʼ maʼ tapa gubidxa de guti Lázaro (Juan 11:39). Dxandíʼ, qué ganna Marta xi ngue chiguni Jesús pur Lázaro.

⁸ Guleesícabe guié que, bicaa Jesús ti ridxi reciu ne ná: «¡Lázaro, biree!». Óraque biiyaʼ Marta ne María xiixa ni bidxagayaacaʼ: «Biree hombre ni guti que. Liibi venda náʼ ne ñee ne renda ti lari lú» (Juan 11:43, 44). ¡Bibani Lázaro sti biaje! Maʼ nuunebe familia stibe ne ca xhamígube sti biaje. Guirácabe gunda gudáʼnacabe laabe, gudiidxicabe ne guniʼnécabe laabe. ¡Guizáʼ galán milagru riʼ! Bisibani Jesús Lázaro.

9, 10. a) ¿Tu bidii poder Jesús para gusibani ca ni maʼ guti? b) Ca relatu ra riete bibani ca binni ni maʼ guti, ¿xiñee racané ca ni laanu?

⁹ ¿Tu bidii poder Jesús para gusibani ca ni maʼ guti? Ante gusibánibe Lázaro, biʼniʼ orarbe Jehová. Ne óraque bidii Jehová poder laabe para gusibánibe Lázaro (biindaʼ Juan 11:41, 42). Peru cadi Lázaro si bisibánibe. * Lu Biblia laaca riete ni bizaaca ti dxaapahuiiniʼ de 12 iza ni guizáʼ huará. Jairo láʼ bixhózebe ne maʼ qué gáparuʼ xiiñiʼ. Maʼ qué guidxela Jairo xi guni, ngue runi gunábabe Jesús gusianda xiiñibe. Laga caníʼnebe Jesús beeda caadxi hombre ra nuube ne nacaʼ rábicaʼ Jairo: «Maʼ guti dxaapahuiiniʼ stiluʼ. ¿Xi para guchiichirouʼ Maestru?». Peru Jesús gudxi laabe:  «Cadi guidxíbiluʼ, gupa si fe». Óraque bireecabe zécabe ra lidxi Jairo. Ora mayaca chindácabe ra lidxi Jairo, biiyaʼ Jesús pabiáʼ cayuunaʼ ne cayacaná ca binni que. Para ná rabi laacabe: «Maʼ cadi gúʼnatu, purtiʼ caʼruʼ gátibe, sínuque nisiaasibe». Zándaca qué ñene jñaa ne bixhoze dxaapahuiiniʼ riʼ xi racalaʼdxiʼ Jesús guiníʼ. Despué, gunabaʼ Jesús guiráʼ ca binni que guireecaʼ de raqué ne yenebe jñaa ne bixhoze dxaapahuiiniʼ riʼ ra nuu. Óraque gunaaze Jesús náʼ dxaapahuiiniʼ que, ne rábibe laa: «Dxaapahuiiniʼ, cayabeʼ lii “¡Biasa!”». Bixuiʼlú pabiáʼ nayecheʼ guyuu jñaa ne bixhoze dxaapahuiiniʼ riʼ ora bíʼyacaʼ biasa xiiñicaʼ ne bizulú guzá. ¡Bisibani Jesús dxaapahuiiniʼ riʼ! (Marcos 5:22-24, 35-42; Lucas 8:49-56). Cada biaje guʼyaʼ Jairo ne xheelaʼ xiiñicaʼ la? zietenaláʼdxicaʼ biquiiñeʼ Jehová Jesús para bisibani xiiñicaʼ.

¹⁰ Dxandíʼ, ca binni ni bisibani Jesús de lade gueʼtuʼ, gudiʼdiʼ si tiempu gúticaʼ sti biaje. Peru ora ridúʼndanu ca relatu ra riete biasa binni de lade gueʼtuʼ dxiqué, racanécani laanu purtiʼ rudiini laanu esperanza: rusiidiʼ ca ni laanu racalaʼdxiʼ Jehová gusibani ca binni ni maʼ guti ne zúnibe ni.

11. Casi ná Eclesiastés 9:5, ¿xi bizaaca Lázaro ora gutiʼ?

¹¹ Biblia ná: «Ca ni maʼ guti la? qué lica gánnacaʼ gastiʼ» (Eclesiastés 9:5). Nga peʼ nga ni bizaaca Lázaro. Dxi nuube ndaaniʼ baʼ qué lica ñánnabe gastiʼ. Nga runi guníʼ Jesús, casi xa ñaca nisiaasiʼ Lázaro (Juan 11:11).

12. ¿Xiñee nánnanu dxandíʼ biasa Lázaro de lade gueʼtuʼ?

 ¹² Biʼyaʼ stale binni ora bisibani Jesús Lázaro de lade gueʼtuʼ. Dede né ca enemigu stiʼ Jesús gúnnacaʼ laabe bíʼnibe milagru riʼ. Guirutiʼ niníʼ cadi dxandíʼ biasa Lázaro de lade gueʼtuʼ, purtiʼ maʼ nabani Lázaro sti biaje (Juan 11:47). Ne stale binni yeguuya Lázaro ne biʼniʼ crecaʼ Dios biseendaʼ Jesús. Qué ñuulaʼdxiʼ ca enemigu stiʼ Jesús ni cayaca que, ngue runi gudixhe íquecaʼ guuticaʼ Jesús ne Lázaro (Juan 11:53; 12:9-11).

13. ¿Xiñee nanna dxíchinu zusibani Jehová ca ni maʼ guti?

¹³ Jesús guníʼ zabani «guiráʼ ca ni nuu ndaaniʼ baʼ» (Juan 5:28). Ndiʼ riníʼ, zusibani Jehová guiráʼ ca ni nuu lu xquendabiaaniʼ. Para nga la? caquiiñeʼ guietenaláʼdxibe ximodo peʼ cada binni. ¿Zanda guni Jehová ndiʼ la? Guníʼ ique ndiʼ: nuu stale mil de millón de estrella lu universu, ne Biblia ná nanna Dios lá cada tobi de laacani (biindaʼ Isaías 40:26). Pa rietenalaʼdxiʼ Jehová lá cada estrella, nanna dxíchinu qué zaca nagana para laabe guietenaláʼdxibe ximodo peʼ cada binni ni chindísabe de lade gueʼtuʼ. Jehová nga bizáʼ guiráʼ ni nuu, nga rusihuinni nápabe poder para gusibánibe ca binni ni maʼ guti.

14, 15. ¿Xi rusiidiʼ ca diidxaʼ guníʼ Job laanu de ora guibani ca ni maʼ guti?

¹⁴ Ti xpinni Dios ni biree lá Job biʼniʼ cré zusibani Dios ca ni maʼ guti. Ti biaje gunabadiidxabe: «Pa gatiʼ ti hombre, ¿ñee zanda guibánibe sti biaje la?». Óraque gúdxibe Jehová: «Lii zucaa riʼdxuʼ, ne naa zacabeʼ lii. Guizáʼ zápaluʼ gana gúʼyaluʼ ni bizáʼ naluʼ». Ni guníʼ Job riʼ rusiidini laanu guizáʼ racalaʼdxiʼ Jehová gusibani ca binni ni maʼ guti (Job 14:13-15).

 ¹⁵ ¿Ximodo runi sentirluʼ ora riníʼ íqueluʼ zabani ca binni ni maʼ guti? Ratadxí ladxidoʼno ora gánnanu racalaʼdxiʼ Jehová gusibani ca ni maʼ guti. Peru zándaca guinabadiidxaluʼ: «¿Xi zazaaca né ca familia stinneʼ ne ca xhamiguaʼ ni maʼ guti yaʼ? ¿Laaca zabánicabe la?». Guidúʼyanu xi rusiidiʼ Biblia de tuu nga ca ni chiguibani de lade gueʼtuʼ ne paraa chindézacabe.

16. ¿Ximodo zabani ca binni ni guiasa de lade gueʼtuʼ lu Guidxilayú riʼ?

¹⁶ Ca binni ni biasa de lade gueʼtuʼ dxiqué guyuunecaʼ ca familia sticaʼ ne ca xhamígucaʼ lu Guidxilayú riʼ sti biaje. Ngaca nga ni chiguizaaca despué, peru jma galán. ¿Xiñee yaʼ? Primé, purtiʼ ca ni chiguibani de lade gueʼtuʼ zápacaʼ oportunidad de guibánicaʼ para siempre lu Guidxilayú riʼ. Ne guiropa, purtiʼ maʼ gadxé modo guidxilayú riʼ. Maʼ qué zaca guerra, qué ziuu cosa malu nin guendahuará.

17. ¿Tuu nga ca ni chiguibani de lade gueʼtuʼ?

¹⁷ ¿Tuu nga ca ni chiguibani de lade gueʼtuʼ yaʼ? Jesús guníʼ «zunadiaga guiráʼ ca ni nuu ndaaniʼ baʼ voz stibe ne zareecaʼ» (Juan 5:28, 29). Ne Biblia ná: «Biʼniʼ entregar nisadóʼ ca gueʼtuʼ nuu ndaaniʼ, ne biʼniʼ entregar guendaguti ca gueʼtuʼ ni napa ne biʼniʼ entregar Baʼ ca gueʼtuʼ nuu ndaaniʼ» (Apocalipsis 20:13). Ya, zabani mil de millón de binni de lade gueʼtuʼ. Ne apóstol Pablo guníʼ zabani «ca ni biʼniʼ ni jneza ne ca ni qué ñuni ni jneza» (biindaʼ Hechos 24:15). ¿Xi gucaláʼdxibe niniʼbe né ca diidxaʼ riʼ?

18. ¿Tuu nga «ca ni biʼniʼ ni jneza» ni chiguibani de lade gueʼtuʼ?

 ¹⁸ ¿Tuu nga «ca ni biʼniʼ ni jneza» ca yaʼ? Ládecabe nuu ca xpinni Jehová ni guca fiel, ni bibani ante gueeda Jesús lu Guidxilayú. Guirácabe zabánicabe lu Guidxilayú riʼ. Caadxi de laacabe nga Noé, Abrahán, Sara, Moisés, Rut ne Ester. Lu capítulo 11 stiʼ Hebreos riete de ca hombre ne ca gunaa riʼ. Peru ¿xi zazaaca né ca  xpinni Dios ni naca fiel ni gatiʼ tiempu riʼ yaʼ? Laaca nuucabe lade «ca ni biʼniʼ ni jneza» ne zabánicabe sti biaje.

19. a) ¿Tuu nga «ca ni qué ñuni ni jneza»? b) ¿Xi oportunidad zudii Jehová laacabe?

¹⁹ ¿Tuu nga «ca ni qué ñuni ni jneza» yaʼ? Ládecabe nuu mil de millón de binni ni qué ñapa oportunidad de ñunibiáʼ Jehová. Neca gúticabe, caʼruʼ gusiaandaʼ Jehová laacabe. Zusibánibe laacaʼ ne zudiibe laacaʼ oportunidad de gunibiaʼcaʼ laabe ne gácacaʼ xpínnibe.

20. ¿Tuu nga ca ni qué zabani?

²⁰ Yanna, ¿ñee zabani guiráʼ ca binni ni maʼ guti la? Coʼ. Jesús guníʼ cadi guiráʼ diʼ binni zabani (Lucas 12:5). ¿Tuu nga ca ni qué zabani yaʼ? Ca binni malu ni qué niná nuchaa. Peru ¿tuu nga guiníʼ pa ziasa tuuxa o coʼ yaʼ? Jehová. Laabe nga Juez ni jma nandxóʼ, peru laaca maʼ bidiibe Jesús autoridad para gaca «juez stiʼ ca ni nabani ne stiʼ ca ni maʼ guti» (Hechos 10:42). (Biindaʼ nota 19, «Gehena»).

21, 22. a) ¿Xi cuerpu zapa ca ni chiguibani para cheʼ guibáʼ? b) ¿Tuu nga primé binni ni biasa de lade gueʼtuʼ para guibani guibáʼ?

²¹ Laaca ruzeeteʼ Biblia zabani caadxi binni guibáʼ. Qué ziasa diʼ ca binni riʼ né ti cuerpu de beela, sínuque né ti cuerpu de espíritu.

²² Jesús nga primé binni ni biasa de lade gueʼtuʼ para guibani guibáʼ (Juan 3:13). Bisibani Jehová laabe chonna gubidxa despué de biiticabe laabe, peru qué ñásabe né ti cuerpu de beela (Salmo 16:10; Hechos 13:34, 35). Apóstol Pedro guníʼ guti Jesús dxi «gúcabe binni guidxilayú, peru maʼ de espíritu nga bisibani  Dios laabe» (1 Pedro 3:18). Biasa Jesús de lade gueʼtuʼ casi ti espíritu ni napa poder (1 Corintios 15:3-6). Peru Biblia ná cadi laasibe nga biásabe zacá.

23, 24. ¿Tuu nga ca ni nuu lu «grupuhuiiniʼ de dendxuʼ» ni bizeeteʼ Jesús, ne pándacabe?

²³ Ante gatiʼ Jesús, gúdxibe ca discípulo stibe ca diidxaʼ riʼ: «Chaaʼ para guneʼ preparar ti lugar para laatu» (Juan 14:2). Ndiʼ riníʼ ziasa caadxi de ca xpinni Cristu de lade gueʼtuʼ para guibaninecaʼ Jesús guibáʼ. Jesús guníʼ zaca ca binni riʼ ti «grupuhuiiniʼ de dendxuʼ» purtiʼ huaxieʼcaʼ (Lucas 12:32). Ne apóstol Juan guníʼ pándacabe ora biʼyaʼ lu ti visión nuu Jesús guibáʼ. Biiyaʼ Juan zuhuaa Jesús «lu dani Sion, ne zuhuaanebe 144,000» (Apocalipsis 14:1).

²⁴ ¿Padxí guiasa 144,000 xpinni Cristu riʼ yaʼ? Biblia ná zuzulú ziásacabe despué de guzulú Cristu guni mandar guibáʼ (1 Corintios 15:23). Tiempu riʼ maʼ cayuni mandar Jesús guibáʼ, ne maʼ biasa stale de ca ni nuu lu 144,000 ne maʼ nuunecaʼ Jesús guibáʼ. Peru nuuruʼ xcaadxi de ca xpinni Cristu riʼ lu Guidxilayú, ca ni chiguibani guibáʼ. Ora gáticabe, nagueendaca zabánicabe para chécabe guibáʼ. Peru jma stale binni ziasa lu futuro para guibani para siempre ndaaniʼ ti paraísu lu Guidxilayú riʼ.

25. ¿Xi chiguizíʼdinu lu sti capítulo ca?

²⁵ Maʼ cadi candaa, zulá Jehová guiranu de lu náʼ guendaguti, ne maʼ qué ziuuruʼ dxi chuʼ ni (biindaʼ Isaías 25:8). Peru ¿xi chiguni 144,000 xpinni Cristu riʼ guibáʼ yaʼ? Biblia cusiene chiguni mandarnécabe Jesús guibáʼ. Lu sti capítulo ca chiguizíʼdinu xcaadxi cosa de gobiernu riʼ.