1. Mɛni sɔlemi nɛ́ nihi le saminya he wa ma susu piɔ?

NIMLI ayɔhi abɔ le sɔlemi nɛ a tsɛɛ ke Wa Tsɛ Nɛ Ngɛ Hiɔwe ɔ, aloo Nyɔmtsɛ ɔ Sɔlemi ɔ saminya. Yesu ngɔ jamɛ a sɔlemi ɔ kɛ tsɔɔ e kaseli ɔmɛ bɔ nɛ a sɔleɔ ha. Mɛni e sɔle kɛ bi? Nɛ mɛni he je nɛ jamɛ a sɔlemi ɔ he hia wɔ mwɔnɛ ɔ?

2. Mɛni níhi etɛ nɛ a he hia lɛ Yesu tsɔɔ kaa e sa nɛ waa sɔle kɛ bi?

² Yesu de ke: “Lɔ ɔ he ɔ, nyɛɛ sɔle kaa kikɛ nɛ ɔ: ‘Wa Tsɛ nɛ ngɛ hiɔwe; O biɛ ɔ he nɛ tsɔ. O Matsɛ yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔ nɛ a peeɔ ngɛ hiɔwe ɔ.’” (Kane Mateo 6:9-13.) Mɛni he je nɛ Yesu tsɔɔ kaa e sa nɛ waa sɔle kɛ bi ní etɛ nɛ ɔmɛ ɔ?​—Hyɛ Nyagbe Ningma 20.

3. Mɛni e he hia nɛ waa le ngɛ Mawu Matsɛ Yemi ɔ he?

³ Wa ba le kaa Mawu biɛ ji Yehowa. Nɛ wa susu Mawu yi mi nɛ e to ngɛ adesahi kɛ zugba a he ɔ hu he. Se mɛni Yesu ngɛ tsɔɔe benɛ e de ke: “O Matsɛ yemi ɔ nɛ ba” a? Wa ma susu nɔ́ nɛ Mawu Matsɛ Yemi ɔ ji, nɔ́ nɛ Matsɛ Yemi ɔ ma ba pee, kɛ bɔ nɛ Matsɛ Yemi ɔ ma plɛ kɛ ha nɛ Mawu biɛ ɔ he ma tsɔ ha a he.

4. Mɛni ji Mawu Matsɛ Yemi ɔ, nɛ mɛnɔ ji e nya Matsɛ?

⁴ Yehowa to nɔ yemi ko sisi ngɛ hiɔwe nɛ e hla Yesu kaa jamɛ a nɔ yemi ɔ nya Matsɛ. Baiblo ɔ tsɛɛ nɔ yemi nɛ ɔ ke Mawu Matsɛ Yemi. Yesu ji “matsɛmɛ a matsɛ, kɛ nyɔmtsɛmɛ tsuo a nyɔmtsɛ.” (1 Timoteo 6:15) Yesu  ma nyɛ maa pee ní kpakpahi fuu pe adesa nɔ yeli tsuo. Ke a bla he wami nɛ adesa nɔ yeli tsuo ngɛ ɔ, e sui he wami nɛ Yesu ngɛ ɔ.

5. Jije Mawu nɔ yemi ɔ maa hi kɛ ye nɔ? Mɛni nɔ e maa ye?

⁵ Benɛ a tle Yesu si ligbi 40 se ɔ, e kpale kɛ ho hiɔwe ya. Pee se ɔ, Yehowa wo lɛ Matsɛ ngɛ Matsɛ Yemi ɔ nya. (Bɔfo Ɔmɛ A Ní Tsumi 2:33) Mawu nɔ yemi ɔ maa hi hiɔwe kɛ ye zugba a tsuo nɔ. (Kpojemi 11:15) Enɛ ɔ he je nɛ Baiblo ɔ tsɛɛ Mawu Matsɛ Yemi ɔ ke “hiɔwe matsɛ yemi” ɔ nɛ.​​—Mateo 3:2.

6, 7. Mɛni ha Yesu hi pe adesa matsɛmɛ tsuo ɔ?

⁶ Baiblo ɔ tsɔɔ kaa Yesu nɔ kuɔ pe adesa matsɛmɛ tsuo, ejakaa lɛ pɛ nɛ e “be gboe gblegbleegble.” (1 Timoteo 6:16) Nyagbenyagbe ɔ, adesa nɔ yeli tsuo ma gbo, se Yesu lɛɛ e be gboe gblegbleegble. Ní kpakpahi nɛ Yesu maa pee kɛ ha wɔ ɔ maa hi si kɛ ya neneene.

⁷ Baiblo ɔ gba kɛ fɔ si kaa Yesu maa pee Matsɛ nɛ yeɔ dami sane nɛ e mi mi sãa lɛ ngɛ nihi a he. Baiblo ɔ de ke: ‘Yehowa mumi ɔ maa ba e nɔ. E ma ha lɛ sane se kɔmi, nile, kɛ ga nɛ e kɛ maa ye e ma a nɔ. E maa le Yehowa suɔmi nya ní, nɛ e maa bu lɛ. E maa ye Yehowa gbeye. Pi nɔ́ nɛ e hɛngmɛ na, loo e tue nu ɔ nɛ e kɛ maa kojo. Se e kɛ dami sane yemi maa kojo ohiatsɛmɛ, nɛ e maa bu nihi nɛ a ní ngɛ mɔbɔ ɔ a he.’ (Yesaya 11:2-4) Anɛ pi matsɛ ko kaa kikɛ nɛ ɔ nɛ o ngɛ hlae ɔ lo?

8. Kɛ wa plɛ kɛ le kaa pi Yesu pɛ nɛ maa ye matsɛ kɛɛ?

⁸ Mawu hla adesa komɛ konɛ a kɛ Yesu nɛ ye matsɛ ngɛ hiɔwe nɔ yemi ɔ nya. Kaa nɔ hyɛmi nɔ́ ɔ, bɔfo Paulo de Timoteo ke: “Ke wa mia wa hɛ mi ngɛ nɔ́ nami  mi ɔ, waa kɛ lɛ maa ye matsɛ hulɔ.” (2 Timoteo 2:12) Nimli enyɛmɛ nɛ a maa piɛɛ Yesu he kɛ ye matsɛ ɔ?

9. Nimli enyɛmɛ maa piɛɛ Yesu he kɛ ye matsɛ? Mɛni be nɛ Mawu bɔni mɛ hlami?

⁹ Kaa bɔ nɛ wa kase ngɛ Yi 7 ɔ mi ɔ, bɔfo Yohane na nina ko. Ngɛ jamɛ a nina a mi ɔ, e na Matsɛ Yesu kɛ matsɛmɛ kpahi 144,000 ngɛ hiɔwe. Mɛnɔmɛ ji nimli 144,000 ɔmɛ ɔ? Yohane tsɔɔ nya kaa ‘a ngma Yesu, kɛ e Tsɛ ɔ tsuo a biɛ ngɛ nimli nɛ ɔmɛ a ti nɔ tsuaa nɔ hɛ nya.’ Yohane de hu ke: ‘He tsuaa he nɛ To bi ɔ [nɛ ji, Yesu] yaa a, a kɛ lɛ yaa. Nimli nɛ ɔmɛ ji nihi nɛ a he mɛ kɛ je nimli a kpɛti.’ (Kane Kpojemi 14:1, 4.) Nimli 144,000 ɔmɛ ji Kristofohi anɔkualetsɛmɛ nɛ Mawu hla mɛ konɛ a piɛɛ Yesu he kɛ ‘ye zugba a nɔ.’ Ke a gbo ɔ, a tleɔ mɛ si kɛ yaa hiɔwe. (Kpojemi 5:10) Kɛ je Yesu bɔfo ɔmɛ a be ɔ mi nɛ Yehowa bɔni Kristofohi anɔkualetsɛmɛ 144,000 nɛ a maa ye nɔ kaa matsɛmɛ ɔ hlami.

10. Mɛni he je nɛ hlami nɛ Yehowa hla Yesu kɛ nimli 144,000 ɔmɛ konɛ a ye adesahi a nɔ ɔ tsɔɔ kaa Yehowa suɔ wɔ ɔ?

¹⁰ Yehowa susuɔ wa he wawɛɛ nitsɛ, enɛ ɔ he je nɛ e to blɔ nya kaa adesahi nɛ piɛɛ Yesu he kɛ ye matsɛ ɔ nɛ. Yesu maa pee nɔ yelɔ kpakpa, ejakaa e nuɔ wɔ sisi. E ba pee adesa hyɛ, nɛ e le haomihi nɛ adesahi kɛ kpeɔ. Paulo tsɔɔ kaa Yesu mi mi sãa lɛ ngɛ wa he, nɛ e ma nyɛ maa “nu wa gbɔjɔmi ɔmɛ a he ha wɔ.” “Abosiami ka lɛ ngɛ blɔ tsuaa blɔ nɔ kaa wɔ nɔuu.” (Hebri Bi 4:15; 5:8) Nimli 144,000 ɔmɛ hu le níhi nɛ adesahi kɛ kpeɔ. A hi si hyɛ kaa nihi nɛ a yi mluku, nɛ a na nɔ́ ngɛ hiɔ dɛ mi. Enɛ ɔ he ɔ, wa ma nyɛ ma ná nɔ mi mami kaa Yesu kɛ nimli 144,000 ɔmɛ maa nu wɔ sisi, nɛ a maa le níhi nɛ gbaa wa nya hulɔ.

11. Mɛni he je nɛ Yesu tsɔɔ e kaseli ɔmɛ kaa a sɔle konɛ a pee Mawu suɔmi nya ní ngɛ hiɔwe ɔ?

¹¹ Yesu tsɔɔ e kaseli ɔmɛ kaa a sɔle kaa a pee Mawu suɔmi nya ní ngɛ hiɔwe. Mɛni he je? Wa kase ngɛ Yi 3 ɔ mi kaa Satan Abosiami tsɔ Yehowa hɛ mi atua. Benɛ Satan tsɔ atua a se ɔ, Yehowa ngmɛ blɔ nɛ Satan kɛ bɔfohi nɛ a yi anɔkuale, aloo daimoniohi hi hiɔwe be saii. Enɛ ɔ he ɔ, jamɛ a be ɔ mi ɔ, tsa pi nihi nɛ a ngɛ hiɔwe ɔ tsuo nɛ a ngɛ Mawu suɔmi nya ní pee. Ngɛ Yi 10 mi ɔ, wa maa kase Satan kɛ daimonio ɔmɛ a he ní fuu.

12. Mɛni níhi enyɔ nɛ a he hia nɛ Kpojemi 12:10 tsɔɔ kaa e maa ya nɔ?

¹² Baiblo ɔ tsɔɔ kaa ke a wo Yesu Matsɛ ngɛ Mawu Matsɛ Yemi ɔ nya pɛ ɔ, e maa hia ta kɛ wo Satan. (Kane Kpojemi 12:7-10.) Kuku 10 tu ní enyɔ komɛ nɛ a he hia nɛ maa ya nɔ ɔ he munyu. Kekleekle ɔ, Mawu Matsɛ Yemi ɔ maa je nɔ yemi sisi be mi nɛ a maa wo Yesu Kristo Matsɛ ɔ. Nɛ nɔ́ nɛ ji enyɔ ɔ, a ma sake Satan kɛ je hiɔwe ba fɔ zugba a nɔ. Pee se ɔ, wa maa na kaa ní enyɔ nɛ ɔmɛ tsuo ya nɔ momo.

13. Mɛni ba ngɛ hiɔwe benɛ a fie Satan kɛ je lejɛ ɔ?

¹³ Baiblo ɔ tsɔɔ kaa benɛ a fie Satan kɛ e daimonio ɔmɛ kɛ je hiɔwe ɔ, hiɔwe bɔfohi anɔkualetsɛmɛ ɔmɛ a bua jɔ wawɛɛ nitsɛ. Wa kaneɔ ke: “Nyɛ nihi tsuo nɛ nyɛ ngɛ hiɔwe ɔ, nyɛ bua nɛ jɔ!” (Kpojemi 12:12) Amlɔ nɛ ɔ, tue mi jɔmi kɛ kake peemi nitsɛnitsɛ ngɛ hiɔwe, ejakaa nɔ fɛɛ nɔ nɛ ngɛ lejɛ ɔ peeɔ Mawu suɔmi nya ní.

14. Mɛni ba benɛ a sake Satan kɛ je hiɔwe ba fɔ zugba a nɔ ɔ?

¹⁴ Se bua jɔmi be zugba a nɔ. Haomi nguanguahi  baa nihi a nɔ, ejakaa “Abosiami kple si kɛ ba,” nɛ e “mi mi fu wawɛɛ, ejakaa e le kaa be bɔɔ kɛkɛ nɛ piɛ ha lɛ.” (Kpojemi 12:12) Satan gli wawɛɛ nitsɛ. A fie lɛ kɛ je hiɔwe, nɛ e le kaa e be kɛe kulaa nɛ a ma kpata e hɛ mi. E ngɛ mɔde bɔe wawɛɛ kaa e kɛ amanehlu maa ba wa nɔ ngɛ zugba a nɔ.

15. Mɛni ji Mawu yi mi tomi ngɛ zugba a he?

¹⁵ Se Mawu yi mi nɛ e to ngɛ zugba a he ɔ tsakee we. Loloolo ɔ, e suɔ kaa adesahi nɛ́ a ye mluku konɛ a hi paradeiso mi ngɛ zugba a nɔ kɛ ya neneene. (La 37:29) Mɛni blɔ nɔ Mawu Matsɛ Yemi ɔ maa gu kɛ tsu enɛ ɔ he ní?

16, 17. Mɛni Daniel 2:44 ɔ tsɔɔ wɔ ngɛ Mawu Matsɛ Yemi ɔ he?

¹⁶ A gba kɛ fɔ si ngɛ Daniel 2:44 ɔ ke: “Matsɛmɛ nɛ ɔmɛ a yi nɔ ɔ, Mawu nɛ ngɛ hiɔwe ɔ maa to matsɛ yemi ko sisi, nɛ e se be poe gblegbleegble. Matsɛ yemi nɛ ɔ, nɔ ko nɔ ko be nyɛe maa ye e nɔ; e ma kpata matsɛ yemi kpa amɛ tsuo a hɛ mi, nɛ e maa hi si kɛ maa ya neneene.” Mɛni gbami nɛ ɔ tsɔɔ wɔ ngɛ Mawu Matsɛ Yemi ɔ he?

¹⁷ Kekleekle ɔ, e ha nɛ wa le kaa Mawu Matsɛ Yemi ɔ ma bɔni nɔ yemi ngɛ “matsɛmɛ nɛ ɔmɛ a yi nɔ.” Enɛ ɔ tsɔɔ kaa benɛ Matsɛ Yemi ɔ maa je nɔ yemi sisi ɔ, nɔ yemi kpahi maa hi zugba a nɔ. Nɔ́ nɛ ji enyɔ ɔ, e ha nɛ wa le kaa Mawu Matsɛ Yemi ɔ maa hi si kɛ maa ya neneene. Nɔ yemi kpa ko be Matsɛ Yemi ɔ hɛ mi kpatae gblegbleegble. Nɛ nɔ́ nɛ ji etɛ ɔ, ta maa te si ngɛ Mawu Matsɛ Yemi ɔ kɛ je nɛ ɔ mi nɔ yemi ɔmɛ a kpɛti. Mawu Matsɛ Yemi ɔ maa ye kunimi, nɛ lɔ ɔ pɛ nɛ maa ye zugba a tsuo nɔ. Kɛkɛ ɔ, adesahi ma ná nɔ yemi nɛ hi pe kulaa.

18. Kɛ a tsɛɛ ta nɛ Mawu Matsɛ Yemi ɔ kɛ je nɛ ɔ mi nɔ yemi ɔmɛ maa hwu ɔ ha kɛɛ?

 ¹⁸ Mɛni blɔ nɔ Mawu Matsɛ Yemi ɔ maa gu kɛ ye zugba a tsuo nɔ? Loko a maa hwu nyagbe ta a nɛ a tsɛɛ ke Harmagedon ɔ, daimonio ɔmɛ ma ya sisi ‘je nɛ ɔ mi matsɛmɛ ɔmɛ tsuo, konɛ a ya bua a nya kɛ ha ta nɛ maa ba ligbi ngua a nɛ Mawu Ope ɔ maa kojo je ɔ.’ Ngɛ anɔkuale mi ɔ, adesa nɔ yemihi maa hwu kɛ si Mawu Matsɛ Yemi ɔ.​—Kpojemi 16:14, 16; hyɛ Nyagbe Ningma 10.

19, 20. Mɛni he je nɛ e he hia kaa Mawu Matsɛ Yemi ɔ nɛ ba ye zugba a nɔ ɔ?

¹⁹ Mɛni he je nɛ wa hia Mawu Matsɛ Yemi ɔ? Ke e hí kulaa a, ngɛ yi mi tomi etɛ komɛ a he je. Kekleekle ɔ, yayami peeli ji wɔ, enɛ ɔ he ɔ, wa nuu hiɔ nɛ wa gboɔ. Se Baiblo ɔ tsɔɔ kaa ngɛ Mawu Matsɛ Yemi ɔ sisi ɔ, wa maa hi si kɛ maa ya neneene. Ngɛ anɔkuale mi ɔ, Yohane 3:16 de ke: “Mawu suɔ je ɔ saminya, nɛ e ngɔ e Bi kake ɔ ngɔ ha, konɛ nɔ tsuaa nɔ nɛ heɔ lɛ yeɔ ɔ, e hɛ mi ko kpata, se mohu e ná neneene wami.”

²⁰ Yi mi tomi enyɔne he je nɛ wa hia Mawu Matsɛ Yemi ɔ ji kaa nimli yayamihi bɔle wɔ kɛ kpe. Nihi fuu yeɔ lakpa, a sisiɔ nɔ, nɛ a je mi bami hu puɛ. Wa be nyɛe ma je jamɛatsɛmɛ ɔmɛ ngɛ je ɔ mi, se Mawu maa pee jã. E ma kpata nihi nɛ a yaa nɔ nɛ a peeɔ ní yayamihi ɔ a hɛ mi ngɛ Harmagedon ta a mi. (Kane La 37:10.) Yi mi tomi etɛne he je nɛ wa hia Mawu Matsɛ Yemi ɔ ji kaa adesa nɔ yemihi nyɛ we nɔ́ ko peemi ha wɔ, a yi mi wa, nɛ a fiaa wɔ ojo. A sume kaa a maa ye bua nihi konɛ a bu Mawu tue. Baiblo ɔ tsɔɔ kaa adesahi “ngɔɔ blɔ nya nɛ a ná a kɛ yeɔ a nyɛmimɛ awi.”​​—Fiɛlɔ 8:9.

21. Mɛni blɔ nɔ Matsɛ Yemi ɔ maa gu kɛ hyɛ konɛ a pee Mawu suɔmi nya ní ngɛ zugba a nɔ?

 ²¹ Ke a hwu Harmagedon ta a ta a, Mawu Matsɛ Yemi ɔ maa hyɛ konɛ a pee Mawu suɔmi nya ní ngɛ zugba a nɔ. Kaa nɔ hyɛmi nɔ́ ɔ, e ma je Satan kɛ e daimonio ɔmɛ kɛ je je ɔ mi. (Kpojemi 20:1-3) Nyagbenyagbe ɔ, e maa po hiɔ kɛ gbenɔ se. Kpɔmi nɔ́ ɔ he je ɔ, adesahi anɔkualetsɛmɛ tsuo ma nyɛ maa hi si kɛ ya neneene ngɛ Paradeiso mi. (Kpojemi 22:1-3) Matsɛ Yemi ɔ ma ha Mawu biɛ ɔ he ma tsɔ. Mɛni enɛ ɔ tsɔɔ? E tsɔɔ kaa ke Mawu Matsɛ Yemi ɔ ngɛ zugba a nɔ yee ɔ, adesahi tsuo maa wo Yehowa biɛ ɔ hɛ mi nyami.​—Hyɛ Nyagbe Ningma 21.

22. Mɛni ha nɛ wa le kaa a wui Yesu Matsɛ benɛ e ngɛ zugba a nɔ, aloo benɛ a tle lɛ si pɛ ɔ?

²² Yesu tsɔɔ e kaseli ɔmɛ kaa a sɔle ke: “O Matsɛ yemi ɔ nɛ ba.” Enɛ ɔ tsɔɔ heii kaa Mawu nɔ yemi ɔ bɛ ngɛ jamɛ a be ɔ mi. Kekleekle ɔ, Yehowa maa to e nɔ yemi ɔ sisi, nɛ e maa wo Yesu Matsɛ ngɛ nya. Anɛ a wo Yesu Matsɛ benɛ e ho hiɔwe ya pɛ ɔ lo? Dɛbi, e mlɛ kɛ ya si be ko. Benɛ a tle Yesu si ɔ, pee se ɔ, Petro  kɛ Paulo tsuo ha nɛ munyu nɛ ɔ mi tɛ̃. A tsɔɔ kaa gbami nɛ ngɛ La 110:1 ɔ kɔ Yesu he. Yehowa de ngɛ jamɛ a gbami ɔ mi ke: ‘Hii si ngɛ ye hiɔ nɔ kɛ yaa si be nɛ ma ngɔ o he nyɛli ɔmɛ kɛ pee nɔ́ nɛ o kɛ o nane maa nɔ.’ (Bɔfo Ɔmɛ A Ní Tsumi 2:32-35; Hebri Bi 10:12, 13) Yesu mlɛ kɛ ya si mɛni be loko Yehowa wo lɛ Matsɛ?

23. (a) Mɛni be nɛ a wo Yesu Matsɛ ngɛ Mawu nɔ yemi ɔ nya? (b) Mɛni wa maa kase ngɛ yi nɛ nyɛɛ se ɔ mi?

²³ Loko e maa su jeha 1914 ɔ mi ɔ, Kristofohi anɔkualetsɛmɛ komɛ le kaa jeha 1914 ɔ maa pee jeha klɛdɛɛ ko. A tsɔɔ kaa Baiblo gbami ko maa ba mi ngɛ jamɛ a jeha a mi. Níhi nɛ bɔni nɔ yami kɛ je jeha 1914 ɔ mi kɛ ma nɛ ɔ tsɔɔ kaa nɔ́ nɛ a de ɔ da. A wo Yesu Matsɛ ngɛ jamɛ a jeha a mi. (La 110:2) Lɔ ɔ se ɔ, e kɛ we nɛ e sake Satan ba fɔ zugba a nɔ. Amlɔ nɛ ɔ, ‘be bɔɔ kɛkɛ nɛ piɛ ha Satan.’ (Kpojemi 12:12) Ngɛ yi nɛ nyɛɛ se ɔ mi ɔ, wa maa na níhi fuu nɛ tsɔɔ kaa jamɛ a be bɔɔ ɔ mi wa ngɛ ɔ nɛ. Jehanɛ hu ɔ, wa maa na kaa e piɛ bɔɔ pɛ nɛ Mawu Matsɛ Yemi ɔ maa hyɛ konɛ a pee Mawu suɔmi nya ní ngɛ zugba a nɔ.​—Hyɛ Nyagbe Ningma 22.