1. Wabiweco iwi rwo makani ma dhanu dupa ging’eyo?

DHANU milioni dupa ging’eyo rwo ma julwong’o Wegwa ma ni i polo, kunoke Sala pa Rwoth. Yesu utio ku rwo maeno pi niponjo julub pare ku kite mi rwo. Ebed erwo pi lembang’o? Pirang’o rwo maeno pire tek lee iwa tin?

2. Yesu uponjowa nirwo pi lembe adek makani?

² Yesu uwacu kumae: “Ka kumeno wurwo kumae, Wegwa ma ni i polo, Nyingi bed leng’. Ker peri bin, Yeny m’iyenyo utimbre i ng’om calu etimbre i polo.” (Som Matayo 6:9-13.) Pirang’o Yesu uponjowa nirwo pi lembe adek maeno?—Som Thenge ma jumedo, namba 20.

3. Lembang’o m’ukwayu wang’ei iwi Ker pa Mungu?

³ Waponjo nia nying’ Mungu tie Yehova. Waponjo bende nia yeny pa Mungu tie ang’o pi dhanu man pi ng’om. Ento, Yesu umito yero ang’o kinde m’ewacu nia “Ker peri bin”? Wabiponjo nia Ker pa Mungu tie ang’o, Kerne bitimo ang’o, man ebidwoko nying’ Mungu leng’ nenedi.

4. Ker pa Mungu tie ang’o, man ng’a ma tie Rwoth mi Kerne?

⁴ Yehova uketho bimobim mi polo man eng’io Yesu nibedo Rwoth mi bimobimne. Biblia lwong’o bimobimne Ker pa Mungu. Yesu tie “Ubimo ma wi ju m’ubimo bim, Rwoth mi rwodhi.” (1 Timoteo 6:15) Yesu tie ku copo mi timo lembe lee mabeco nikadhu ma jabim  moko ci ma dhanu copo timo, man etie ku tego ma lee nikadhu jubim ceke mi ng’om ka jucokogi karacelo.

5. Ker pa Mungu bibimo niai ku kani? Ebibimo wi ang’o?

⁵ Yesu udok i polo nindo pier ang’wen ing’ei cer pare. I ng’eye, Yehova ung’ie ebed ni Rwoth mi rwodhi. (Tic mi Jukwenda 2:33) Ker pa Mungu bibimo wi ng’om niai kud i polo. (Lembanyutha 11:15) Pi thelembe maeno re ma Biblia ulwong’o Kerne ‘Ker m’i polo.’—2 Timoteo 4:18.

6, 7. Pirang’o Yesu re m’utie Rwoth maber m’uloyo rwodhi mange ceke?

⁶ Biblia uyero nia Yesu tie Rwoth maber nikadhu rwoth moko ci ma dhanu, pilembe en kende re m’etie “won kwo ma rondo ku rondo [niwacu, etie ku kwo ma tho ngo].” (1 Timoteo 6:16) Jubim ceke ma dhanu githo nindo moko, ento Yesu bitho ki ngo. Lembe ceke mabeco ma Yesu bitimo iwa de bibedo rondo ku rondo.

⁷ Lembila mi Biblia uyero nia Yesu bibedo Rwoth m’umbe kud akoyakoya man ma won kisa. Eyero kumae: “Tipo pa Yehova bibedo i wie, tipo mi rieko man ng’eyong’ec, tipo mi lembapora ku tego, tipo mi ng’eyong’ec man mi lworo pa Yehova. Man anyong’a pare bibedo i lworo pa Yehova; man ebipoko lembe ngo calku nen m’i wang’e, kadok ajuka de ebijuko ngo calku winjo mi ithe; ento ebipoko lembe mi jucan ku bedopwe.” (Isaya 11:2-4) Nyo icopo maru ngo nia rwoth m’ubimo wii ubed kumeno?

8. Wang’eyo nenedi nia Yesu bibimo kende ngo?

⁸ Mungu ung’io dhanu moko ma gibibimo karacelo ku Yesu i polo. Ku lapor, jakwenda Paulo uyero ni Timoteo kumae: “Tek wamula ku cani, wabicamu ker  wakugi.” (2 Timoteo 2:12) Dhanu adi ma gibibimo ni rwodhi karacelo ku Yesu?

9. Dhanu adi ma gibibimo karacelo ku Yesu? Mungu ucaku ning’iogi awene?

⁹ Calu ma waponjo i wic mir 7, i gin ma wok i wang’ moko, jakwenda Yohana uneno nia Yesu tie Rwoth i polo; enene m’etie karacelo ku rwodhi mange 144 000 i ng’ete. Dhanu 144 000 maeno gitie jukani? Jakwenda Yohana ukoro nia, “nying’ [Yesu] ku nying’ Won de, ugore ternyimgi.” Ekoro kendo kumae: “Joni gi ju ma gilubo Nyathi Rombo [niwacu, Yesu] ku ba ka m’ecidho i ie ceke. Joni jung’iewogi kud i kind dhanu.” (Som Lembanyutha 14:1, 4.) Dhanu 144 000, gitie dhanu ma Mungu ung’io kud ikind Jukristu m’ugwoko bedoleng’ migi, kara ‘gibim wi ng’om’ ni rwodhi karacelo ku Yesu. Ka githo, gicer pi kwo mi polo. (Lembanyutha 5:10) Niai i nindo mi jukwenda, Yehova ubemedere ning’io Jukristu moko kud ikind Jukristu m’ugwoko bedoleng’ migi, kara gibed ikind udul dhanu 144 000 maeno.

10. Pirang’o wacopo yero nia maru ma Yehova umaru kowa re m’uketho eng’io nia Yesu karacelo ku dhanu 144 000 gibim wiwa?

¹⁰ Yehova ubedieng’ piwa lee dit, uketho epangu nia Yesu ubim karacelo ku dhanu. Yesu bibedo jabim maber pilembe eng’eyowa cuu. En de ebino dhanu man egam enwang’ere ku peko ve wan. Jakwenda Paulo uyero nia Yesu dieng’ pi masendi mwa, ‘can copo nege kum ng’ic ma wa ng’ic ko,’ man nia “jubidhe [niwacu, enwang’u amulaic] kum gin ceke ma calu jubidho kowa.” (Juebrania 4:15; 5:8) Dhanu 144 000 gibino bende dhanu ve wan. Ginyego bende ku koso bedoleng’ man remokum ma tung’ tung’. Pieno, watie ku  genogen nia Yesu karacelo ku dhanu 144 000 maeno, gibinyang’ cuu mandha i kite ma wamulara man wanyego ko ku peko.

11. Pirang’o Yesu uponjo julub pare girwo nia yeny pa Mungu utimere i polo?

¹¹ Yesu uponjo julub pare girwo nia yeny pa Mungu utimere i polo. Pirang’o? Waponjo i Wic mir 3 nia Sitani Wonabali ujai ni Yehova. Ing’ei jai parene, Yehova uweke karacelo ku jumalaika ma gigwoko ngo bedoleng’ migi, kunoke pajogi, gimediri asu nibedo i polo pi nindo moko. Pieno, jumoko bino timo ngo yeny pa Mungu i polo. I Wic mir 10, wabiponjo lembe lee iwi Sitani man iwi pajogi.

12. Lembanyutha 12:10 ukoro lembe ario makani ma pigi tek?

¹² Biblia ular ukoro nia, nindo ma nok ing’ei ma jubiketho Yesu ni Rwoth mi Ker pa Mungu, ebikiedo lwiny ku Sitani. (Som Lembanyutha 12:7-10.) Verse mir 10 ukoro lembe ario ma pigi tek m’utimere. Ker pa Mungu ma Rwothne tie Yesu Kristu ucaku nibimo, man jubolo Sitani cen kud i polo eloro i ng’om. Calu ma wabiponjo, lembe maeno udaru nitimere.

13. Kinde ma juriemo Sitani kud i polo, lembang’o m’ugam utimere kuca?

¹³ Biblia ukoro nia jumalaika ma gigwoko bedoleng’ migi, gibino kud anyong’a ma lee dit, ing’ei ma juriemo Sitani man pajogi pare kud i polo. Ewacu kumae: “Anyong’a negwu, E polo, ku wun ma wubedo i igi de.” (Lembanyutha 12:12) Kawoni dong’ akwiyacwiny ku winjiri ma yawe mbe utie i polo, pilembe ju ceke mi polo gibetimo yeny pa Mungu.

14. Lembang’o m’utimere iwi ng’om pilembe jubolo Sitani kud i polo?

 ¹⁴ Ento i ng’om, kwo utie rac magwei. Lembe mareco ubesendo dhanu pilembe “Wonabali loro piny” man “kwinyo ma dit ni i bang’e, m’eng’eyo ko nia nindo dong’ ire nyanok kende.” (Lembanyutha 12:12) Kwinyo ubenego Sitani. Jubole kud i polo, man eng’eyo nia jubinyothe ceng’ni eni. Ebetimo kero ceke ninyayu lembe mareco, remokum man masendi iwi ng’om ngung’.

15. Yeny pa Mungu pi ng’om utie ang’o?

¹⁵ Ento yeny pa Mungu pi ng’om ulokere ngo. Mungu ubemedere nimito nia weg bedopwe gikwo rondo ku rondo iwi ng’om ma bidoko ni paradiso. (Zaburi 37:29) Ker pa Mungu biketho nenedi yeny maeno utimere?

16, 17. Giragora pa Daniel 2:44 ubekoro iwa lembang’o iwi Ker pa Mungu?

¹⁶ Lembila ma nwang’ere i Daniel 2:44 uyero kumae: “I nindo mir ubimo maeno Mungu m’i polo biketho ker ma binyothre ngo rondo ku rondo, kadok camukerne de jubiweko ngo ni dhanu mi thek mange; ento ebituro nziki nziki man ebijigo ker maeni ceke, man ebicungo mi nja.” Lembila maeno ubeponjowa ku lembang’o iwi Ker pa Mungu?

¹⁷ Mi kwong’o, ebenyutho iwa nia Ker pa Mungu bicaku nibimo “i nindo mir ubimo maeno.” Eno nyutho nia Ker pa Mungu bicaku nibimo nwang’u fodi bimobim mi ng’om maeni utie asu. Mir ario, ebenyutho nia Ker pa Mungu bibimo nja ku nja man bimobim moko acel de mbe ma bidok cungo kakare. Man mir adek, lwiny bibedo nuti ikind Ker pa Mungu ku ker mi ng’om maeni. Ker pa Mungu biloyo lwiny maeno, man ing’eye Ker maeno  kende re ma bibimo wi ng’om ngung’. E dhanu bibedo ku bimobim maber ma yawe mbe.

18. Lwiny ma tokcen ma bibedo ikind Ker pa Mungu ku ker mi ng’om julwong’o ang’o?

¹⁸ Ker pa Mungu bitundo nenedi nibimo kaka ker mi ng’om maeni? Iwang’ lwiny ma tokcen ma julwong’o Armagedon, pajogi biwingo “ubimo m’i ng’om ngung’, nicokogi karacelo ni lwiny mi ceng’ ma dwong’ pa Mungu ma Jategokpo.” Eyo, Ker pa dhanu bikiedo i dhu Ker pa Mungu.—Lembanyutha 16:14, 16; som Thenge ma jumedo, namba 10.

19, 20. Pirang’o watie ku yeny ma nia Ker pa Mungu re m’ubin ubim wi ng’om ceke?

¹⁹ Pirang’o watie ku yeny mi Ker pa Mungu? Watie ku thelembe moko adek. Mi kwong’o, watie judubo, pieno watii man watho. Ento Biblia uyero nia i the Ker pa Mungu, wabikwo rondo ku rondo. Pieno, Yohana 3:16 uyero kumae: “Kum Mungu maru ng’om mumbe, ketho emio wode kulong’, kara ng’atu ma tek uyie kud erwiny ki, endre ebed ku kwo ma rondo ku rondo.”

²⁰ Thelembe mir ario m’uketho watie ku yeny mi Ker pa Mungu utie nia wabekwo ikind dhanu mareco. Dhanu dupa gicwayu ndra, gikwalu kwo mi kite ceke, man kura migi reco. Wambe ku copo mi daru lembe maeno mareco, ento Mungu utie ku copo m’ebidare kogi. I saa mi Armagedon, jubinyotho dhanu ceke ma gibemediri asu nitimo lembe mareco. (Som Zaburi 37:10.) Thelembe mir adek ma watie ko ku yeny mi Ker pa Mungu ni ee: Lembe daru voyo bimobim mi dhanu, cwinygi rac man gitie atira ngo. Gidieng’ ungo nikonyo dhanu uwor Mungu. Biblia uyero nia ‘ng’atu acel bedo ku tego kum wadi m’etime ko rac.’—Eklizia 8:9.

21. Ker pa Mungu biketho nenedi yeny pa Mungu utimere iwi ng’om?

 ²¹ Ing’ei Armagedon, Ker pa Mungu bitimo lembe ceke kara yeny pa Mungu utimere wi ng’om. Ku lapor, ebikabu Sitani ku pajogi pare. (Lembanyutha 20:1-3) Ing’ei lembe maeno, ng’atu moko mbe ma biremo kunoke ma bitho. Jamgony biketho dhanu ceke ma gigwoko bedoleng’ migi, gibikwo rondo ku rondo i Paradiso. (Lembanyutha 22:1-3) Ker maeno bidwoko nying’ Mungu leng’. Thelembene tie ang’o? Thelembene tie nia, ka bimobim pa Mungu bicaku nibimo wi ng’om ngung’, dhanu ceke biyungo nying’ Yehova.—Som Thenge ma jumedo, namba 21.

22. Wang’eyo nenedi nia Yesu udoko ngo Rwoth kinde m’ebino iwi ng’om, kunoke ndhu ndhu ing’ei cer pare?

²² Yesu uponjo julub pare girwo kumae: “Ker peri bin.” Wec maeno ugam unyutho kamaleng’ nia nwang’u fodi Ker pa Mungu bibino abina. Wecne unyutho bende nia Yehova bikelar ketho mi kwong’o Ker pare, man ebiketho Yesu ni Rwoth mi Kerne. Nyo Yesu udoko Rwoth ndhu ndhu ing’ei m’edok i Polo? Ungo,  ukwayere nia eke ekur. Nindo moko ing’ei cer pa Yesu, jakwenda Petro giku jakwenda Paulo ginyutho nia lembila ma nwang’ere i Zaburi 110:1 uweco pi Yesu. I lembila maeno Yehova uyero kumae: “Jany yo ku cinga ma yor acwic, maram aketh ko judegini ni kom mi tiendi.” (Tic mi Jukwenda 2:32-35; Juebrania 10:12, 13) Ugam ukwayere nia Yesu uke ukur nitundo awene ka Yehova ubin ukethe ni Rwoth?

23. (a) Yesu ucaku nibimo awene ni Rwoth mi Ker pa Mungu? (b) Wabiponjo lembang’o i wic m’ubelubo?

²³ Pi oro dupa iwang’ oro 1914, ungu moko mi Jukristu mandha gilar ginyang’ nia oro 1914 bibedo oro ma pire tek i lembila mi Biblia. Lembe ma tung’ tung’ m’utimere i ng’om, niai i oro 1914, unyutho nia giwondiri ngo. I oro maeno re ma Yesu udoko ni Rwoth man ecaku nibimo. (Zaburi 110:2) Nindo ma nok ing’eye, jubolo Sitani piny i ng’om, man kawoni “nindo dong’ ire nyanok kende.” (Lembanyutha 12:12) I wic m’ulubo, wabiponjo lembe mange dupa m’unyutho nia andha wabekwo i nindo maeno ma tokcen. Wabiponjo bende nia ceng’ni eni, Ker pa Mungu biketho yeny pa Mungu utimere iwi ng’om.—Som Thenge ma jumedo, namba 22.